قصة إسلام شاب فلبيني أصبح داعية إسلامي

[se_ Elsyed]

في إذاعة القرأن الكريم السعودية بيقدموا برنامج شيق جداً عن قصص إسلام الجاليات هنا .. يعني فلبيني ، هندي .... إلخ ... ييجي ويحكي كيف دخل في الإسلام ..لإن بالتأكيد وراء إسلام كل شخص قصة ..

فمن كام يوم كانوا جايبين شاب فلبيني ليحكي عن قصة إسلامه ، وبيكون مع الشخص مُترجم..

فالشاب ده أسلم من 10 سنوات وعرف نفسه إن كان إسمه " مارسيل " وبعد أن اسلم سمى نفسه " عمر " وهو من مدينة مانيلا وبدأ القصة في إنه قال إنه لم يكن يعرف أي شيء عن الإسلام سوى اللي بيقوله له اهله عن الإسلام وهو بالمختصر المفيد " دين همجي يدعو إلى العنف والمسلمون بيعبدوا الخنازير " فالمذيع إستغرب وانا كمان أستغربت .. وقال له ده طب همجي وعرفناها على أساس إنكم ما تعرفوش حاجة إسمها الجهاد في سبيل الله من اجل هدف محدد.. طب بنعبد الخنازير ليه ؟ .. فقال له لإن أهلي قالوا لي إن المسلمين ما بياكلوش الخنازير وإحنا أتعودنا إن اللي ما بياكلش حاجة ويحرمها على نفسه يبقى بيعبدها بالظبط زي الهندوس ما بيعملوا كده مع البقر ..

وقال إنه في المرحلة الثانوية والجامعية كان معاه شاب من جنوب الفلبين " جزيرة ميندناوه " وهو مسلم وكان بيحبه جداً وكان من أقرب أصدقاءه ولكنه كان فلاتي .. يعني هما الأتنين بيروحوا يسكروا ويعربدوا ويصاحبوا النساء والحاجات دي .. .. فلما سأله إنت دينك إيه : قال له الإسلام ... وإحنا بنؤمن بإله واحد ... وبس وما يعرفش حاجة أكثر من كده .. ولكنه كان حريص إنه يعرف منه معلومات أكثر .. وبعد فترة من الصداقة سأله على سبيل الدردشة و قال له طب لو أنا عايز أبقى مسلم أعمل إيه ؟ فصاحبنا – الله يخرب بيته – قال له : إوعى تقرب .. خلى بالك إحنا عندنا 5 صلوت في اليوم ودي حاجة ثقيلة جداً ولو ما صليتش وصومت المسلمين هايقيموا عليك الحد ويقتلوك ... خليك كده احسن ... صاحبنا نسي الموضوع وهرب بجلده ..

المهم إتخرج الولد وتزوج ويشاء السميع العليم ان يصاب إبنه " بالعمى " ولف على كل الأطباء وقالوا له مافيش أمل ..فبيقول بكل صراحة بإنه توجه إلى الله وهدده إنه هايبقى مُلحد وكافر ولا يؤمن بوجود إله – قال هو الأول كان بيصلي على السجادة ؟ – لو ما شفاش إبنه ورجعه سليم ... وده ما حصلش ... ففي ذات مره عرض إبنه على طبيب وقال له عن الأمل ضعيف وهايحتاج عملية والعملية هاتكلف كثير.. وطبعاً هما في الفليبين فقراء وهو ما معاهوش تكاليف العملية .. فتوجه إلى الله ثانية ودعاه إنه يرزقه بفلوس العملية ... وبعدها بفترة بسيطة جاءت له فرصة عمل في دول الخليج فاختار السعودية وهو مش عارف ليه هو اختارها . وقال أهي فرصة إني اعمل قرشين عشان عملية الولد .

المهم وصل مطار الرياض وكان بلوق ليلاً وأستقبله شاب سعودي من طرف صاحب العمل ووصله بسيارته لمحل إقامته .. وبيقول وأنا في الطريق من المطار لسكني وعملي بالمنطقة الصناعية – دي في اطراف الرياض .. وهوووووووو وكلها ورش ومصانع بس وممكن السكن يبقى فوق الورشة أو المصنع – وهو في الطريق عدوا على وسط البلد – منطقة العليا والسليمانية والملز – فلاحظ عدد كبير جداً من المحلات ذات أضاءه مبهرة .. فقال : بس .. قشطة وليلتنا بيضا وأيامنا هاتبقى فُل في البلد دي .. لإن المحلات المضاءة واللي عامله ديكورات وحاجات من دي معناها عندهم إنها علب ليل ومراقص ...

صاحبنا قعد كام يوم في الهوووووو وما فيش غير الخناشير قدامه .. فسأل أصحابه وقالهم ما تيجوا نروح علب الليل اللي انا شوفتها في وسط المدينة دي ، وكان صديقه في الغرفة شاب فلبيني ومسلم .. فقال له : إنت عايز تروح مكان تلاقي فيه راحه نفسيه ؟ فقال له ألحقني به . ده انا خلاص مش قادر ؟ فأخذه في الويك إند على منطقة إسمها البطحاء – أشهر من النار على العلم هنا وزي العتبة كده أو الموسكي – وفيها مكان للفليبينيين بيتجمعوا فيه يوم الخميس والجمعة بالألوفات ، وتلاقي والشغالات والممرضات بينزلوا هما كمان يعملوا شوبنج فلو الواحد راح هناك يحس إنه في مانيلا والمكان مسميينه مانيلا بالفعل ..

المهم صاحبنا أخده على مكتب الدعوة والإرشاد وتوعية الجاليات واعطوه كتب وشرائط كاسيت للتعريف بالدين الإسلامي – باللغة الفليبينية - .. فرجع غاضباً ووبخ صديقه وقال له : إنت خدعتني وقلت لي هاتوديني علب الليل والديسكو تقوم توديني مكان زي ده ؟ .. انا زعلان منك ... إلخ

فيستكمل حديثه ويقول بإنه لم يستطع النوم تلك الليلة وأستمع لتلك الأشرطة وقرأ بعض الكتب فأحس براحة نفسية وبعد عدة أيام اعلن إسلامه ...

وحينما علم اهله بالفليبين بهذا الخبر غضبوا منه كثيراً وقاطعوه وغضبت زوجته أيضاً فقال لاه : اجلي هذا الغضب حتى آتي في الإجازة القادمة وأشرح لك تفاصيل أكثر عن الإسلام ...

وبالفعل استطاع إقناعها بالدخول في الإسلام ....

وما يميز هذا الشخص الذي يعتبر حديث العهد بالإسلام هو أن له هدف في الحياة فإلى جانب عمله الذي يقتات منه فقد أصبح من أشهر الدعاة الفليبينيين بالمملكة وما شاء الله أسلم علي يديه عشرات من الفليبينيين حتى الآن ، ويفعل هذا لوجه الله لإنه لما دخل الإسلام لم يحصل على أي مميزات مالية أو نقدية ولكنه أقتنع بإنه الدين الحق ..

ومن الملاحظ إن الفليبيني شخص يمكن محاورته وأقناعه بالحُسنى ويحب القراءة وذكي ، بعكس كثير من الهنود الهندوس والذين عندما نتحدث معهم تجده متعصب لعبادة البقرة تعصباً أعمى وينساق وراء كل ما هو خرافي ومُضل ... عمركوا شوفتوا شخص يحمل أعلى الشهادات ويتقلد منصباً رفيعاً في عمله ومع ذلك يجتهد بحثاً وتفتيشاً في أنحاء مدينة الرياض للحصول على روث الأبقار ليزين ويُبارك بها أركان المكان الذي يسكن فيه ؟ أهم بيعملوا كده وبيفتخروا بكده ..