لقاء "1" فبراير في القاهرة

[se_ Elsyed]

على فكرة اللقاء مهم جدا يا جماعة ........

و خصوصاً انه حيبقى بعد أول يوم من اختيار فريق الاشراف الجديد اللى حيشارك الادارة السابقة فى تحديد مسار المنتدى الجميل ده ,....

الله ينور عليك يا ملك الفيويلتا ..

أهم من اللقاء والمشاريب ومين اللي هايحاسب هو ان يكون هناك تعارف مباشر بين أعضاء فريق الأشراف الجدد على الأقل اللي موجودين في القاهرة ويستطيعوا الحضور عشان نكمل كشف الهيئة ...

[محمد شلبى]

للرفع

فيه ولا ما فيش؟ <_<

يكون فى علمكوا ,انا من المنصورة بس هاحضر لان كله يهون فى سبيل المنتدى(حلوة دى).

يلا بقى قرروا عشان اعمل حسابى واجهز اللامبورجينى ال 128 بتاعتى عشان السفر <_<

[بنت شعنونة]

اعملوها يوم 31 وانا اجيييييييي

<_<

[METALLICA]

يا جدعااان !!!

آخر كلام ايه !!!

انا على نفسكوا لحد ما تقرروا . . . .

[METALLICA]

اعملوها يوم 31 وانا اجيييييييي

<_<

31 ايه بالضبط !!!

حسب معلوماتي ان فبراير هذا العام 28 يوم فقط !!

والا قصدك 31 يناير . . .

[METALLICA]

شوفوا بقى . . . . النهاردة 31/1/2005 يعني القاء بكرة الساعة 6 مساء جنينة مول

انا هكون هناك حتى لو ما شفتش اي تأكيدات من حد . . .

اللي عاوز يجي متهيألي عارف المكان والميعاد وطريق . . . .

طبعاً لو رحت بكرة ومالقيتش Violinking وLance و Mohamed هيكون ليا رد فعل صعب جداً . . . . ده مش تهديد لا سمح الله . . . ده انا بأستخدم حقي الديوقراطي :lol:

[mohamed]

شوفوا بقى . . . .  النهاردة 31/1/2005 يعني القاء بكرة الساعة 6 مساء جنينة مول

انا هكون هناك حتى لو ما شفتش اي تأكيدات من حد . . .

اللي عاوز يجي متهيألي عارف المكان والميعاد وطريق . . . .

طبعاً لو رحت بكرة ومالقيتش Violinking وLance  و Mohamed  هيكون ليا رد فعل صعب جداً . . . . ده مش تهديد لا سمح الله . . . ده انا بأستخدم حقي الديوقراطي  :lol:

عمي وعم عيالي

ميتاليكا باشا

اوعى تزعل نفسك

الراجل ده جاد جدا يا جدعان وزعله وحش

اوعمممممم حد ميجيش من اللى نده على اساميهم

انا حذرتكم اهو

عرفتو ليه عاوز اغير اسمي

الحقني يا عصام يا شوقييييييييييييييييييييييييييييييي

[METALLICA]

والبني ولو سميت نفسك برعي . . . . هجيبك يعني هجيبك . . .

[Guest Mohd Gramoun]

أتصلت بك يا عم أسو ...و مردتش عليا....وجاي تعمل اللقاء بعد ما سافرت...

[عادل أبوزيد]

الأفاضل

رغم ظروف إنقطاع المياه فى مدينة نصر إنشاء الله سأكون متواجدا من السادسة

أطيب تحياتى

[Lancelot]

و أنا كمان إن شاء الله ...

[METALLICA]

كده يبقى فيه 5 جايين بكرة . . .

METALLICA و( Violinking و Lance و Mohamed ) ودول جايين إجباري . . وعلى الله واحد فيهم يقول لأ

بالإضافة للأخ عادل ابو زيد . . . .

مين تاني هيعلن بمحض ارادته انه جاي !!! والا أدبس الناس انا بمعرفتي !!!

[عادل أبوزيد]

الفاضل ميتالكا

سأكون سعيدا جدا بلقائكم و أدعوك لأخذ زمام المبادرة مرة أخرى لدعوة من تستطيع

و أذكرك أنى سأفتح معك موضوع التعليم الذى أثرته و موضوع مبادرة نقابة التطبيقيين و أتعشم أن يكون من بين الحاضرين أحد طلاب الطب.

و أتوق للقاء الفاضل محمد و أرجو إلتماس العذر إذا غابت عن ذهنى بعض الأسماء

[وليد صفوت]

رغم ان ربما يكون عندى تسجيل فى هذا اليوم ..... بس لو فيه ايه ..... برضو هاجى ........

و مدام اللقاء الساعة 6 يبقى حلحق احضره و بعدين اطير عالاستوديو ............

عزيزى ابن مصر ؟؟؟؟؟؟ انت فييييييييييين ؟؟؟؟

كليو ؟؟؟؟؟؟ تعالى و حنعفيكى من وجبة الشمعدان .... rs:

عصام شوقى ..... متخافش انا عازمك ! rs:

بنت مصرية ؟؟؟ عايزين نشوف محمد عشان وحشنا جدا جدا ؟؟؟

شانا ؟؟؟ ممكن تستأذنى ربع ساعة من المستوصف اللى انتى شغالة فيه عشان المقابلة !!!! rs: و لا ايه ؟؟؟؟

مين تانى ؟؟؟ مين يحب يحضر معانا ؟؟ rs:

تم تعديل 31 يناير 2005 بواسطة Violinking

[METALLICA]

رغم ان ربما يكون عندى تسجيل فى هذا اليوم ..... بس لو فيه ايه ..... برضو هاجى ........

انت جاي بإرادتك وبالديموقراطية المكفولة للجميع بمن فيهم انا . . . rs:

عزيزى ابن مصر ؟؟؟؟؟؟ انت فييييييييييين ؟؟؟؟

كليو ؟؟؟؟؟؟ تعالى و حنعفيكى من وجبة الشمعدان .... 

عصام شوقى ..... متخافش انا عازمك !

نعم نعم نعم !!!! وهما دول مكانوش ناويين يجوا . . . طب عارفين لو ما جيتوش هفرض عليكو مقاطعة محاورتية ممتدة لأجل غير مسمى . . . هع . . حلوة دي كمان آل ما يجوش آل . . .

بنت مصرية ؟؟؟ عايزين نشوف محمد عشان وحشنا جدا جدا ؟؟؟

بنت مصرية جاية جاية . . . أومال انا هلعب مع مين !!! دانا زوقت العجلة علشان اخد بيها محمد لفتين تلاتة . . . اعتبري نفسك مقبوض عليكي انت ومحمد . . . هو ده النظام vmp:

شانا ؟؟؟ ممكن تستأذنى ربع ساعة من المستوصف اللى انتى شغالة فيه عشان المقابلة !!!!  و لا ايه ؟؟؟؟

هو فين المستوصف ده وانا اروح اقفله وأجيبها وأجي طوالي rs:

يالا يا جماعة . . . مفيش اي أعزار . . . انا هاخد الغياب 6:15 ( شفته انا طيب ازاي ) مديكو ربع ساعة بحالها سماح . . . ربنا يخليني للديموقراطية rs:

[Scorpion]

اتقابلتم و الا لأ ؟؟؟؟؟ rs:

[METALLICA]

نعم لقد تقابلنا . . .

وسيوافينا العزيز Violinking بتقرير المقابلة . .

تحياتي للجميع . .

[وليد صفوت]

أعتذارى للجميع عن تأخرى فى وضع تقرير المقابلة البنائة التى تمت فى جنينة مول ,... حيث اننى كنت ضمن الطلاب الذين سافروا الى المنصورة للمشاركة فى فعاليات أسبوع شباب الجامعات السابع , مما انسانى تماما كتابة التقرير , أعتذر .

الحقيقة أن تلك المقابلة بالذات كانت تحمل طابع مميز , و ذلك لأننا تحدثنا و تناقشنا فى العديد من الموضوعات , السياسية و الثقافية و إلقاء الضوء على بعض الاحداث التاريخية و تأثيرها على مجتمعنا و حتى المجتمعات الاخرى .

بدأ النقاش أولا يدور حول نقطة فى غاية الاهمية , و هى دور النقابات فى تطوير المهن , و دور الافراد فى دفع النقابات للأهتمام بهذا الدور الهام ,

كما تفضل الفاضل عادل أبو زيد بطرح فكرة كانت بالفعل غائبة عن العقول ... ألا و هى فكرة إنشاء شعبة للطلبة فى النقابات . بحيث تساعد بشكل فعّال على توعية الشباب الخريجين بمجالات عملهم و مساعدتهم فى الحصول على فرصة عمل تناسب مجالاتهم ....

ثم تحول النقاش الى قضية هامة و خطيرة تهم كل فرد يحب مصر . و هى الحرية .... و تحديداً قضية أيمن نور , و تلك الاحداث الخطيرة و التطورات الهامة التى حدثت فى تلك القضية , و ما تحمل من مدلولات خطيرة ....

ثم تطرقنا الى مشكلة كل سكان مدينة نصر , مشكلة قطع المياة بحجة عقيمة يلقيها السيد الوزير أمام مجلس الشعب , و هى كسر ماسورة المياة بسبب عمليات حفر!!

نظام التعليم فى مصر كان له معنا مناقشة جيدة جدا لما له من تأثير شامل و كبير جدا على الفرد و تكوين شخصيته و بالتالى المجتمع ككل .

مازلنا فى موضوع التعليم ,حيث تحول حديثنا الى تطوير المناهج التعليمية لخدمة سوق العمل , و كانت لنا مع هذا الموضوع مناقشة طويلة التهمت معظم الوقت المتبقى ,...

ثم القيت أنا الضوء على بعض الاحداث التاريخية على الصعيد العالمى و الداخلى و التى كان لها تأثير عظيم على تشكيل ايديولوجية الشعب المصرى , و قريباً بعون الله سوف أفتح لها موضوعاً .

ثم أنهينا المناقشات الممتعة بطرح مشكلة الاستبداد بالسُلطة بشكل أوسع من مفهومه المتعارف عليه , فنتاقشنا فى مشكلة إختذال السُلطة ( أى سُلطة ) فى فرد واحد , و إعتباره هو رمز للسُلطة ,

كانت هذة المقابلة من أجمل المقابلات التى شارك فيها أعضاء المحاورات , و برغم ان العدد كان قليلاً , إلا أننا تحدثنا كما لم نتحدث من قبل .. و تصارحنا كما لم نتصارح من قبل , و تحدثنا ايضاً عن بعض النقاط الادارية فى المحاورات و تقبلناها بصدر رحب و تناقشنا فيها .. حتى خفتت أضواء المكان إستعداداً لغلقه , فلم نشعر بالوقت , و إذا بها تشير الى الواحدة صباحاً ! و نحن مازلنا نرغب فى البقاء سوياً .

على مضض قبلنا أن نفترق على وعد بأن نعيد الكرّة ....و نعيد المناقشة .....و نعيد و الحوار البنّاء الهادف, .......

أرق تحياتى ,.... jmb-)

[Scorpion]

ايه يا فايولين التقارير الوزارية دي.... فين التحابيش... مين دفع؟.. حد جاب معمول ؟.... ( اللي هموت قبل ما اعرف كان ايه )... حد قعد يدخن في الشيشة لحد لما جاب سعال ديكي للتانيين... كام قفشة... كام قرار فعلي...

كده يعني....

بذمتك.. ايه الفرق بين اللي كتبته و بين خبر في الأهرام بلقاء وزاري او رئاسي...

طلبة آخر زمن...

[محمد شلبى]

العزيز فيولين

رغم عدم تحاورنا مع بعضنا من قبل ,الا ان هذا لا يمنع اعجابى وتقديرى لشخصك المحترم من ايام مصراوى وحتى الآن,لهذا فانا الآن شديد الحزن عندما علمت بانك كنت فى اسبوع شباب الجامعات,فقد ضاعت منى فرصة لمدة اسبوع كامل للتعرف على شخصك واعتب عليك انك لم تعلن هذا قبل السفر.

يا خسارة cbyb: