لقاء "1" فبراير في القاهرة

[Lancelot]

برافو يا فايولين ... أول تقرير ليك مش بطال و الله ....

بس نسيت اهم حاجة ...

الحاضرين ...

ا/ عادل أبو زيد ..

ميتاليكا ..

فايوليوين كنج ..

لانسلوت ..

صح النوم يا باشا ...

[وليد صفوت]

سكوب يا عزيزى جدا ....

ماكانش فيه لا إسو و لا إبن مصر ( وش واحد حيطق ) و لا كليو ...... و بكده مافيش لا شيشة و لا دفع حساب و لا معمول ........... و قضيناها دردشة لحاااااااااااااااد لما الناس كلها روحت و طفوا النور ..... .... يعنى لو كنت بتدور على الإثارة و المغامرة و التشويق و الرعب ...... مش حتلاقيهم فى المقابلة دى ....... جايز فى المقابلة اللى جاية !

صديقى محمد شلبى ......

لو كنت قابلتنى فى أسبوع شباب الجامعات كنت حصعب عليك جدا من الشكل المزرى اللى انا كنت فيه ....... و مش عايز أحرق الآحداث ... تابعنى فى موضوع أسبوع شباب الجامعات و انت تعرف ...... على العموم احنا كلنا مستنيين تشريفك لينا فى المقابلة اللى جاية ..... أنت مش قلت انك جاى ( وش واحد تانى برضو حيطق ! )

[وليد صفوت]

برافو يا فايولين ... أول تقرير ليك مش بطال و الله ....

بس نسيت اهم حاجة ...

الحاضرين ...

ا/ عادل أبو زيد ..

ميتاليكا ..

فايوليوين كنج ..

لانسلوت ..

صح النوم يا باشا ...

جرى ايه يا لانس يا أخى ؟؟؟

هوا مش احنا اتفقنا اننا مانقولش على العدد عشان الناس تفتكر أنه كان مؤتمر بجد .. و اننا قفلنا جنينة مول يوم الثلاث و ان عربيات الامن المركزى كانت محاوطة المكان لحد لما المؤتمر خلص ؟؟؟؟؟ مش ده كان إتفقنا ؟؟؟

أكيد فى حد فقسنا عشان كده انت قريت و قولت على اللى فيها !

[محمد شلبى]

اهو ده اللى كنت خايف منه :P jmb-)

والله العظيم كنت جاى,لولا ان تصادف اللقاء مع يوم خروج والدتى على المعاش واقام لها زملاءها و زميلاتها فى العمل حفل لتكريمها ولم اعلم بأمر الحفل الا ليلة 31 يناير وكان ضروريا جدا ان اكون بجانب والدتى فى هذا اليوم (على الاقل لتوصيلها الى النادى).

ان شاء الله المقابلة اللى جاية لازم اكون موجود.

[عادل أبوزيد]

مجرد إضافة من جانبى هى مسألة قد تكون شخصية أو تعتبر دعاية لكن لا أستطيع أن أقاوم الرغبة فى سردها

ما سبق كان إستهلالا لابد منه

فى كل مرة ألتقى بشباب جدد فى المحارات أشعر بسعادة طاغية و أريد أن أصرخ يا مصر لك أن تسعدى بأبنائك .. وطن فيه مثل هؤلاء أكيد له مستقبل أحسن من كل ما مضى ..

أحيانا أتصور إن من عنده بنت يبحث لها عن عريس فعليه أن يشترط أن يكون من شباب محاورات المصريين.

كمية النضج و عمق النقاش و هم البلد على أكتافهم .... كلهم يحملون على ظهورهم زكيبة مثل التى يحملها الفاضل مصرى .

موضوعية و عمق الحوار لا تجدها إلا فى أوساط كبار المثقفين

هنيئا لك يا مصر بأبنائك

[se_ Elsyed]

أحيانا  أتصور  إن من عنده بنت  يبحث لها عن عريس  فعليه أن يشترط أن يكون من شباب محاورات المصريين.

روح يا شيخ .. الله يكرمك ...

دول أحلى كلمتين قرأتهم في خلال الخمسة وعشرون عاماً التي مضت من حياتي ..

طب ينفع يا أستاذ عادل الأب يدور برضوا في أوساط المتزوجين ؟... ولا لازم يكون شاب على الزيرو وما دخلش دنيا ؟

بس حلو قوي الشرط بتاع إن العريس لازم يكون من المحاورات ..

يعني أنا متصور الزمن رجع بيه 30 سنة لورا ولسه عمال ألف على البيوت عشان الأقي نص التاني ، وأخيراً قابلت تام روحي ست الحسن والجمال " جلفدان " اللي أبوها عم عماد حمدي أبو العروسه وهو دلوقت قاعد معايا في أوضة المسافرين وعمالين نتجاذب أطراف الحديث وبيسألني :

عماد حمدي : س س يا إبني كلمني عن نفسك وعن عيلتك شويه .. أولاً عندك ميكروباز ؟

س س : في الحقيقي يا عمي انا بأتشعبط فيه بس كل يوم وانا رايح في الشغل .

عماد : طب عندكوا محل فول وطعميه ؟

س س : والله يا عمي إحنا عيلة أساساً مش لاقيين ناكل لا الفول ولا الطعمية وبنسمع عنهم سمع خير .

عماد : وبعدين إنت غلبتني معاك ... طب عندك شقة ... بلاش دي ده أنت أساساً عدمان .. قصدي عندك شقة إيجار جديد ؟

س س : والله يا عمي زي ما حضرتك عارف انا لسه متخرج السنة دي .. وبأبدا حياتي من تحت الصفر ... وانا بإذن الله وبدون مقاطعة ناوي أقعد مع أبويا وامي وأخواتي ... فعقبال عند حضرتك إحنا عندنا شقة أوضتين وصاله وعفشت ميه .. والصالة ما شاء الله كبيرة 2 * 2 .. فبإذن الله انا ناوي أبيضها جير وأفرشها وهاخليها زي الفل وهانعيش فيها أنا وكريمتكم الانسة جلفدان .

عماد : اومال لما ماعندكش ده كله .. جاي ليه يا أفندي يا كحيان ؟ طب أخر سؤال هاسألهولك وأقسم بالله لو جاوبت بـ " لا " لهاقوم اجيب الكرباج الأسطنبولي من جوه وأجلدك ..... السؤال هو : هل انت عضو عامل في محاورات المصريين ؟

س س : اهي دي بقى أقدر اجاوب بنعم ونعمين كمان .. يا عمي انا بلا فخر صاحب أكثر من 500 مداخلة في المحاورات .. وبلا غرور حاصل على إنذارين حُمر وشلوت من مشرفي جميع الابواب ... وبعون الله كل بتوع السيبر كافيه بقوا حافظين سحنتي ...

عماد : عفارم عفارم ... كده أقدر أقولك إن إحنا عيله بنشتري محاوراتي يا إبني .. وممكن تقوم تدخل دلوقت تاخد جلفدان في إيدك وإنت ماشي ... وتعيشوا في تبات ونبات وتخلفوا لنا محاوريين ومحاورات ...

أستاذ عادل .. معليش ماقدرتش امسك نفسي ... إنت عارفني .