لماذا ننتخبهم؟

[Sherief AbdelWahab]

أعضاء مجلس الشعب ..

أخصائيو التماثيل والكلام الحنجوري والفيديو كليب وخبراء كرة القدم المغاوير..

بطريقة أو بأخرى أسهمنا بتوصيلهم إلى أماكنهم..

بإرادتنا أو بإرادة غيرنا ، بأصواتنا أو بأصوات من توفي من أهالينا..وصلناهم والسلام..

لماذا انتخبناهم؟

هل نحن في مصر على دراية بالدور الذي ينبغي على النائب أن يلعبه؟

هل انتخبنا هؤلاء طمعاً في مزيد من الخدمات؟

انتخبناهم ليه؟

خلص الكلام

[محمود تركى]

نحن لم ننتخبهم,

لقد فرضوا على الشعب كما فرض علينا ريس الدولة مؤبدا.

فى انتخاب حر نزيه, سيصبحوا جزء من أسوأ صفحات تاريخ مصر, أو فى سلة المهملات.

[alnoobi]

السلام عليكم .

أخوانى الأعزاء ....

مجلس الشعب ده شئ لزوم الشئ على رأى شحاته أفندى !! .

دوله ... رئيس جمهوريه لزوم حكم الدوله .. مجلس وزراء لمساعدة الرئيس فى ادارة شئون الدوله .. مجلس شعب لزوم مش عارف ايه علشان مش عارف ايه علشان الدوله !!!

وبعد كده مش تكتب اتنين و تسعين جنيه ده انت تكتب ميه و اتنين و تسعين جنيه !!

مجلس الشعب و قبله مجلس الأمه زى كومبارس السيما فى الفيلم الذى يعرض فى مصر من خمسين سنه و مش مهم لو كان بنجاح كبير أو بفشل أكبر أهو بيعرض و خلاص .. فيلم خيال علمى و سياسى و كل خيال يخطر على بالك .. و الكومبارس بتوع مجلس الشعب وجودهم مهم جدا .. هم مش مهمين ولا حاجه انما وجودهم مهم .. وفيه منهم كومبارس ناطق و كومبارس صامت و كل كومبارس و ليه سعر.. و كل كومبارس و ليه دور .. الطيبين بتوع الحزب الوطنى و الأشرار بتوع المعارضه.. يعملوا الشويتين بتوعهم و ياخدوا اللى فيه النصيب و يروحوا يكملوا اليوم على قهوة بعره .

انما علشان حد يتخيل اننا بننتخبهم .. لأ .. ده مابيحصلش و الا كان ولاء البيه العضو بقى لى أنا مش للحكومه و الا فى أول مناسبه حأنتخب غيره .

و بعدين فيه فى الدنيا مرشح يغير انتمائه الحزبى فور نجاحه فى الانتخابات ؟؟ .. آه عندنا .. يبقى داخل مستقل و بأعجوبه يكسب مرشح الوطنى .. يقوم متلون حزب و طنى علشان الانتخابات اللى بعد كده يدخلها على قوائم الحزب و لامؤاخذه طظ فى الناس اللى انتخبته .

أنا دائرتى الانتخابيه المعادى و البساتين و الطروات ( طره البلد وطره الأسمنت و طره الحجاره ) و يمثلها فى المجلس الحالى :

- السيد حسين مجاور .. من قيادات الحزب الوطنى و كان أمين العاصمه ومش عارف لو كان لسه أمين ولا بطل .. ليس له أى وجود على مستوى شكاوى أهل الدائره .. انحصرت اهتماماته فى نادى أسمنت السويس ( هو رئيس النادى و ربما يكون رئيس الشركه أيضا ) .. البيه نائب مخضرم .. من زمان قوى !!

- المهندس محمد المرشدى .. بدأ انجازاته فى الدائره بمنع ميكروباص البساتين- ثكنات المعادى من المرور فى الشارع الذى يسكن فيه و تحويل مساره لينتهى أمام محطة مترو المعادى فى شارع 7 !! ... مطالب و شكاوى أهل الدائره ليست ضمن اهتمامات السيد النائب المهندس المرشدى و التى تركزت فى مشاريعه من مبانى و مولات فى زهراء المعادى كما هو واضح من اعلاناته المستمره فى الجرائد . البيه نائب جديد .. أول دوره !

وبما أنى معداوى ( من المعادى ) و بالميلاد فأنى أترحم على معادى الستينيات معادى الحى الهادئ الجميل .... المعادى اليوم شوارع لو شاهدتها مساء لتخيلت أننا نتوقع غاره جويه .. الظلام يلف جميع الشوارع لا للنور رغم وجود الأعمده .. ولو رأيتها نهارا لتخيلت أن الغاره قد حدثت .. آثار الدمار على الأسفلت و الأرصفه .. حفر .. مطبات .

شارع 9 كان يمر به اتوبيس هيئة النقل العام فى الستينيات .. و اليوم لاتقدر على السير فيه بنصر 128 .. أعمال المجارى لم تنقطع منذ مايزيد على ثلاثين سنه ( كده الشارع ممكن يدخل موسوعة جينيس للأرقام القياسيه )

حالة شارع 9 أخذته كمثال لأنه الشارع الرئيس فى المعادى و لن أتحدث عن شارع أحمد زكى و لكنى أكاد أجزم بأنه أسوأ شارع فى القاهره ..... من جميع النواحى .. يكفى أنه يبدأ فى المعادى و يمر بحدائق المعادى و البساتين منتهيا فى دار السلام و لا وجود لعسكرى مرور واحد فيه !!

كان نيل المعادى من أحب الأماكن لنا فى طفولتنا .. نسبح دون علم أهلنا .. نصطاد السمك .. نقضى الساعات فى الحدائق الملاصقه له ... حتى النيل صادروه .. مشاتل و كازينوهات و مناطق ممنوعه .. و لا مكان واحد مفتوح لخلق الله !!

لو كان لينا نواب بجد و فيه مجلس بجد ماكانتش المعادى اتهانت و ماكانتش القاهره اتهانت و بالتالى ماكانتش مصر اتهانت بالشكل ده .

تم تعديل 30 يناير 2005 بواسطة alnoobi