انقطاع المياه .. الى متى ؟؟؟

[ابو الفنان]

واضح ان مشكلة المياه مش هتنحل لان الساده اصحاب شركات المياه المعدنية ليهم مصلحه في ان المياه متنحلش علشان الناس تشترى المياه المعدنية وتشرب منها طيب يقولم لنا واحنا نشتري مياه معدنية على فاتورة الزباله بس على الله المياه متكرفش من الزباله ويسبولنا الحنفيات تشتغل علشان نستخدم المياه في الاستخدامات الاخرى وبارك الله في مصر هبة النيل ويبعد عن نيلنا اصحاب المياه المعدنية اصل العمليه نقصه.

[Guest Mohd Gramoun]

بس كده ممكن الناس يجيلهم فشل كلوي يا مجرمون لإن المياه دي بتبقى ملوثة ..

يا سي السيد...يا بيه.... الطرمبه لغاية دلوقت في بيت العيلة في البلد... و الكل بيشرب منها خصوصا في الصيف.. ولا حد فشل و لا حاجة..ولا هي عقدة الكوبانية!!!!

طب لماذا أغفلت حل فعال جداً وهو إننا نعمل حنفية مياه عمومية في الشوارع الرئيسية والناس تجيب حلل وجرادل وبستلات وتملى منهما...

عشان الواد كتكت الفتوة يجي و يحط إتاوة علي اللي جاي يعبي و عصابة ابو قطيط بتاعة الزبالة تغير المجال و تشيل الميه علي الكارو بدل الزبالة..

فعلى سبيل المثال ممكن نييجي جنب محطة بنزين كالتكس اللي في عباس العقاد اللي قدام محل جاد بتاع الفول ونقوم دقين حنفية جنب طرمبة  البنزين الـ 92....

هما فعلا داقينها بس عشان خلط البنزين بالميه..وعلي فكرة حقيقة هم بيخلطوا البنزين في الميه بالمحطة دي بالذات و انا حصلي مقلب بسبب الموضوع ده و الجماعة بتوع تويوتا إيجبت عارفينهم كويس و لما وديت لهم عربية المدام.. قبل ما يبصوا عليها قلتلهم مافيش عزم قالي ..الموضوع كذا كذا..ومونت من عندهم...

مكرم عبيد... موش محتاج يا ريس.. عندهم حديقة الطفل يشربوا من القنايات اللي فيها...

أما في جسر السويس فعشان يبقى شكلنا حلو قدام الأجانب ونفكرهم بالفلكلور الأفريقي ودارفور ومجاعات اثيبوبيا ممكن نيجي قدام فندق السلام ونروح حطين حنفية عمومية برضوا بس بشكل شيك يعني نعملها في كشك لونه ظريف كده ونوقف حواليه بنتين حلوين ينظموا طوابير ملي المياه ونلبسهم تي شيرتات فوشيه مكتوب عليها " إنتجبوا مبارك وعائلته.. من اجل مستقبل أفضل " وعلى ضهر الفانلة نكتب " نقطة مياه = حياة .. لو سمحت إديني بؤ  "

جسر السويس.... فكرني بالمالح....

أما التي شيرت... يكتبوا عليه إعطيني هذا الدواء..

يا ناس أنا لما كنت ساكن هناك كان أسبوعيا بشتري 4 كراتين ميه بركة.. قبل ما الميه تقطع ..لأن الميه هناك من زمان ملوثه جدا و لها رائحة و أحيانا بتنزل من الحنفيه لونها أبيض و بتفور...

يعني ميه للغسيل و للحمي و بس

[achnaton]

أنصح الجميع بدق طرمبات يدوية أسفل كل منزل... ولا حاجة للحكومة و ماءها

بس كده ممكن الناس يجيلهم فشل كلوي يا مجرمون لإن المياه دي بتبقى ملوثة ..

طب لماذا أغفلت حل فعال جداً وهو إننا نعمل حنفية مياه عمومية في الشوارع الرئيسية والناس تجيب حلل وجرادل وبستلات وتملى منهما...

فعلى سبيل المثال ممكن نييجي جنب محطة بنزين كالتكس اللي في عباس العقاد اللي قدام محل جاد بتاع الفول ونقوم دقين حنفية جنب طرمبة البنزين الـ 92....

ممكن برضوا نييجي في مكرم عبيد قدام معرض احمد بهجت ونروح رازعين واحده تاني ...

أما في جسر السويس فعشان يبقى شكلنا حلو قدام الأجانب ونفكرهم بالفلكلور الأفريقي ودارفور ومجاعات اثيبوبيا ممكن نيجي قدام فندق السلام ونروح حطين حنفية عمومية برضوا بس بشكل شيك يعني نعملها في كشك لونه ظريف كده ونوقف حواليه بنتين حلوين ينظموا طوابير ملي المياه ونلبسهم تي شيرتات فوشيه مكتوب عليها " إنتجبوا مبارك وعائلته.. من اجل مستقبل أفضل " وعلى ضهر الفانلة نكتب " نقطة مياه = حياة .. لو سمحت إديني بؤ "

<span style='font-family:arial'></span>وحياة النبى إنت عسل .. يا ابو عمر ..

ولنتكلم فنيا عن هذه المشكلة .. ومعذرة ..

فى البداية لازم نوضح أن كل المنطقة من العباسية وانت طالع لغاية الحدود الجنوبية لحى مصر الجديدة كانت على يمين شارع صلاح سالم صحراء على مدد العين .. وكان شارع صلاح سالم مدق صحراوى بيستخدمه فى الأغلب الجيش .. لإنتشار المعسكرات فى هذه المنطقة حتى أستولى مماليك الكاكى على الحكم وبدأت كما قالوا عصا البغدادى تعمل فى إعمار الصحراء .. وهذه احد حسنات الحركة .. التى لم تستمر حين حولوا الأراضى الزراعية فى حزام القاهرة الكبرى الى كتل خرسانية للسكن واستغنوا عن الزرع .. والمساكن التى انشئت بحذاء شارع صلاح سالم لن تجد فيها مشاكل .. منها مثلا مدينة التوفيق ومساكن الجيش حتى الطريق الجديد اللى أسمه طريق النصر .. وانا اتفرجت على عملية إنشاء مدينة التوفيق لأن أيامها استعان الحاج عثمان بخبراء من عدة دول أوربية وكان بينهم المانيا وطلب منى مهندس المانى زميل أن ارافقه لأنه داخل بعطاء للمسهمة فى تلك المدن .. فى الحقيقة راعت شركة المقاولون العرب أيامها كل الأسس الفنية الممكنه .. بالإضافة الى جهد مهندسى سلاح المهندسين بأوامر من السادات لبناء البلد .. وفعلا بذلوا جهدا وعلما وفنا .. نيجى بعد كده .. فى الأمتدادات .. داخل الصحراء .. كان عثمان مشى .. وأنطفأت حمية نار الغيرة على البلد .. ولم تراعى الأصول الفنية والهندسية ..ومنها شبكة الصرف الصحى التى إنشئت بلا خبرة الا فى جمع العمولات .. ومن منطلق .. إنه مشروع ومش حيتكرر ولن يتوسع كانت اقطار المواسير صغيرة .. وتفضل العالم الجهبذ ابراهيم سليمان واسرته بوضع الرسومات واستيراد الموسير من الخارج ( انظر الموضوع المثبت فى باب مكافحة الفساد عن شركة المسبوكات .. ( والفضل يرجع للأخ مصرى ) المواسير دى لم تتحمل لا قوة الصرف ولا قوة طلمبات الشفط .. ضربت تحت الأرض .. وتسللت المياه الى الرمال .. فالتربة كله رمل .. وحصل فيها انكماشات وهبوط أخذت معاها الشبكات العلوية مثل شبكة تغذية مياه الشرب .. فرقعت لسببين أولهم انهيار التربة الرميلة تحتها ورداءة نوعية المواسير .. يضاف الى ذلك انعدام او قلة الخبرة الفنية فى توصيل الموسير ببعضها .. فالماسورة التى لم تظهر عيوبها الصناعية .." ملصت "( آى خلعت ) من التى تليها .. دى مصيبة يا حاج سيد يا أخويا وعملها ابرهيم سليمان ومكاتبه الأستشارية .. ومش معقول حيطلع هو العيب فى شغله .. أمال إيه الحل ؟؟

وزير عنده ضمير يمسك مكانه .. ويصلح ما افسده الدهر ومحمد ابراهيم سليمان واعوانه ..

أما حكاية طلمبات المياه فى تلك المناطق .. فلازم توصل الى أعماق بعيدة .. فالمياه الجوفية فى هذه المناطق على بعد على مش أقل 600-700 متر فى افضل حال .. وحتى نصل الى ماء جيد صالح للشرب لازم ننزل اعمق على الأقل 100 متر كمان .. هى الطلمبات دى تنفع فى القرى فى وادى النيل لأن المياه الجوفية اولا مش بعيده .. ثانيا بيعاد ملئها من مياه مصارف الزراعة وبتصل الى العمق بعد فلترة طبيعية من طبقات الأرض والله يرحمه جدى الشيخ حسن " رحمه الله عليه كان داقق اربعة طلمبات عندنا فى الدوار ثلاثة فى الدورا الكبير وواحدة فى المضيفه وكانت مياه عجب .. تروى العطشان لما تأخذها من تحت الزير ..ولا تقولى شبه او كلور ..

مع تحيا :blink: تى ..

تم تعديل 8 مارس 2005 بواسطة achnaton

[se_ Elsyed]

إمبارح قرأت خبر في القناة الفضائية يقول " يعتذر مرفق مياه القاهرة لساكني مدينة نصر عن ضعف المياه في الأيام المقبلة نتيجة لإنكسار مفاجيء في أحد مواسير المياه الرئيسية بالحي "

والظاهر إنكتب على ساكني مدينة نصر إنهم يكونوا كالبدو الرُحل الذين يتواجدون حيث تتواجد الآبار والعُشب والكلأ ...

- يقولون أن بني العقاد أتوا بقافلة من الموسكي مُحملة بما لذ وطاب من الخيرات .. فخرج لهم بنو النحاس وكمنوا لهم في طريق صلاح سالم أمام معرض القاهرة الدولي وأوسعوهم ضرباً وأستولوا على قافلتهم ثم عادوا إلى مضاربهم "

لكم الويل يا نحاس ... في عز الليل يا نحاس ....

وصباح الخير يا حكومة ...

[se_ Elsyed]

مرة أخري

انفجار خط المياه الرئيسي .. لمدينة نصر

عمليات الشفط وإصلاح الماسورة .. استغرقت 3 ساعات

كتب رمضان حنضل:

مرة أخري.. انفجر خط المياه الرئيسي المغذي لمدينة نصر الليلة الماضية.. مما أدي إلي ضعف في ضخ المياه إلي سكان الأدوار العليا.. وإعاقة حركة المرور علي الطريق الدائري "القطامية العين السخنة". حيث ارتفعت المياه إلي حوالي مترين.

بدأ انفجار ماسورة المياه في حوالي الساعة السابعة مساء أمس.. وانتقل إلي الموقع اللواء نبيل العزبي مدير الأمن واللواء عبدالوهاب معوض رئيس حي الخليفة والمقطم واللواء كامل ياسين مدير الطرق والعمليات بالإدارة العامة للمرور..تم الاستعانة بماكينات شفط المياه لرفع المياه التي أغرقت الطريق الدائري بعد الماسورة بحوالي كيلومتر.. واستغرق إصلاح العطل حوالي ثلاث ساعات حتي عادت الأوضاع إلي طبيعتها.

كانت الماسورة البديلة بشارع رياض شمس بالمنطقة الثامنة بمدينة نصر قد انكسرت في السادسة صباح أمس. مما أدي إلي انقطاع المياه لمدة 7 ساعات حتي تم إصلاح الماسورة وعادت المياه إلي المنطقة بالكامل

أعتقد إن مدينة نصر دي لو كانت تقع في قلب صحرء نيفاداد التي تُجري فيها أمريكا تجاربها النووية ماكنتش مواسير الميه تقعد تتكسر بالمنظر ده :D

إيه يا جدعان إنتوا بتركبوا مواسير حديد ولا شاليمو ؟

[se_ Elsyed]

بجد لا تعليق .. فقد أستشرى الفساد وخرجت الأمور عن السيطرة تماماً :

الجمهورية النهاردة الصبح

كلاكيت 100 مرة

شبح العطش.. يطارد الحي الراقي

لودر يكسر الماسورة الرئيسية..ويحرم مدينة نصر من المياه 20 ساعة

الأهالي: حياتنا تحولت إلي جحيم.. ومصالحنا توقفت تماماً

وزير الإسكان:المحافظة سلمتنا الشبكات متهالكة.. والوزارة بريئة!

عادت من جديد أعطال المياه في مدينة نصر.. خلال 48 ساعة فقط انقطعت المياه مرتين ولأكثر من 20 ساعة متواصلة مما يؤكد وجود خطأ ما.. فالأعطال غريبة ومتكررة وتطرح علامات استفهام كثيرة.. المسئولون هل لا يملكون خريطة للشبكات ومفاتيح المحابس كما يقال أو أن المواسير أصبحت قديمة ومتهالكة وتحتاج لإحلال سريع ينقذ سكان هذه المدينة المعذبة.. ثم لماذا مدينة نصر بالذات.. تلك المنطقة حديثة الإنشاء والمفروض أن تكون حالة مرافقها أفضل من ذلك بكثير؟!.

الغريب أنه وبمجرد حدوث الأعطال وتوالي الاستغاثات عبر "139 جمهورية" أغلق المسئولون في شركة مياه القاهرة تليفوناتهم هروبا من المواجهة وعندما اتصلت ثريا عبدالرسول بوزير الإسكان طلب منها التحدث مع د. عبدالقوي خليفة رئيس الشركة القابضة لمياه الشرب الذي أغلق هو الآخر تليفونه تاركا الوضع كما هو ولساعات طويلة!!.

من السادسة من مساء أول أمس انهالت الاتصالات والاستغاثات من سكان مدينة نصر والقطامية من انقطاع المياه لنكتشف كسر ماسورة المياه بالمنطقة الثامنة وبعدها بساعتين انفجرت الماسورة الرئيسية بطريق القطامية - العين السخنة وارتفع منسوب المياه لأكثر من 10 أمتار وتوقفت حركة المرور بالكوبري الدائري لساعات طويلة.

من جانبه أكد الدكتور محمد إبراهيم سليمان وزير الإسكان أن الوزارة بريئة من أزمة انكسار مواسير المياه ومعاناة سكان مدينة نصر من الانقطاع المستمر مشيرا إلي أن الوزارة استلمت الشبكات متهالكة من المحافظة وتحتاج لوقت كاف لإحلالها وتجديدها حتي تتحسن الخدمة ووعد بانتهاء المشكلة نهائيا في مدينة نصر الشهر القادم.

وقال إنه علم بالعطل من المسئولين في الموقع وتفاصيل المشكلة بكاملها مع رئيس الشركة القابضة ولا يملك أي تقرير عن الوضع في مدينة نصر!.

[عادل أبوزيد]

للذكري بمناسبة إنقطاع المياه عن مدينة نصر اليوم السبت ٢٧ سبتمبر منذ ما قبل الفجر و لا يوجد حس و لا خبر

[Scorpion]

مثلما انقطعت الكهرباء في الخميس المظلم، انقطعت المياه بدون سابق إنذار... اتابع في الغربة معاناة اصدقاء عمر يعيشون بجوارك يا استاذ عادل .. يستغربون من مسؤولين يرون ما لا يراه الناس ..أعطوا تحذيرًا بانقطاع المياه حتى يتدبر السكان .. وأعلنوا أن الاتصال برقم 125 يتيح سيارات مياه لمن يطلبها... وأيضًا المياه على وشك الرجوع إن لم تكن قد عادت بالفعل!! كله كذب!!

أسلوب حكومة؟ أسلوب إدارة؟ أسلوب حياة؟ للأسف كله على بعضه في الخلاط.

مشاريع كبرى.. لكن المشاريع "الصغرى" مثل المياه والكهرباء ليست على البال!!

اتسائل كيف ننجح في المشاريع العملاقة والدولة عاجزة كسيحة عن توفير الأساسيات؟

هل أصبح أكثر امانينا ان يفرح المواطن لمجرد عودة الكهرباء والمياه؟!

هل يسعد لحصوله على أبسط حقوق الإنسان؟ هل وصلنا إلى هذا القدر من التردي؟!

[herohero]

مثلما انقطعت الكهرباء في الخميس المظلم، انقطعت المياه بدون سابق إنذار... اتابع في الغربة معاناة اصدقاء عمر يعيشون بجوارك يا استاذ عادل .. يستغربون من مسؤولين يرون ما لا يراه الناس ..أعطوا تحذيرًا بانقطاع المياه حتى يتدبر السكان .. وأعلنوا أن الاتصال برقم 125 يتيح سيارات مياه لمن يطلبها... وأيضًا المياه على وشك الرجوع إن لم تكن قد عادت بالفعل!! كله كذب!!

أسلوب حكومة؟ أسلوب إدارة؟ أسلوب حياة؟ للأسف كله على بعضه في الخلاط.

مشاريع كبرى.. لكن المشاريع "الصغرى" مثل المياه والكهرباء ليست على البال!!

اتسائل كيف ننجح في المشاريع العملاقة والدولة عاجزة كسيحة عن توفير الأساسيات؟

هل أصبح أكثر امانينا ان يفرح المواطن لمجرد عودة الكهرباء والمياه؟!

هل يسعد لحصوله على أبسط حقوق الإنسان؟ هل وصلنا إلى هذا القدر من التردي؟!

لااعلم كيف لك يا استاذي الفاضل ان تتعجب ، الم يكن لدينا علاج لفيروس سي بالكفتة !!! وزعلنا اووووووووووي لما حد كان بيطلع ينتقده وطلعنا الكل خائن وعميل

وانا بقولك لو حد اتكلم بصوت عالي ووجه اي نقد لانقطاع الكهرباء او المياه سيجد الرد بكيل من تهم العمالة والخيانة

:Laie: استاذي مش احسن مانبقى زي سوريا وليبيا واليمن والعراق

[شيدوان]

ومازال الانقطاع مستمرا متواصلا فى بعض مناطق مدينة نصرالى هذه اللحظة . واقول بعض المناطق لانها فى نظر الحكومة ليست من مناطق الناس اللى فوق ، فالمياه فى مناطق الناس اللى فوق كانت تزورهم بالامس كل فترة مدة ساعة ثم تنقطع ، واليوم نفس الحال ...

كيف تعرف ان الدولة متخلفة؟

اذا كانت المياه والكهرباء فى القرن 21 رفاهية يمكن للحكومه الطناش عن انقطاعها وتكفى محاولة توفير رغيف العيش واللحم البرازيلى

[التونسى]

مش دى البنيه التحتيه اللى كان مبارك بيذل ويعاير بيها الشعب وبيقولك انها من اعظم إنجازاته!!!!؟ .. عامة وللانصاف .. لا الحكومه دى ولا اجعص حكومه فى العالم تقدر تحل المشكله دى بين يوم وليله .. خصوصا انها تحتاج تضافر جهود الحكومه مع جهود الشعب ((المبذر المسرف فى استهلاك المياه)) .. انا رايى ان اول حل متاح لاجبار الناس على ترشيد استهلاكهم للمياه هو رفع سعر المياه .. وفى النهايه دى ظروف البلد ولازم الناس تستحمل وانتقاد الحكومه دى لا يجدى الصراحه لانها استلمت تركه رهيبه ضخمه من الفساد المترسب الذى يحتاج لمجابهته ما هو فوق طاقة البشر

[عادل أبوزيد]

خبر من اليوم السابع تم عرضه الساعة العاشرة مساء اليوم ( الأحد ٢٨ سبتمبر ٢٠١٤ ) رغم شكواي و سكان مدينة نصر فإن هذا الخبر أسعدني نسبيا

ما سبق كان إستهلالا لابد منه

ما حدث معي بالأمس هو إحتراق موتور رفع المياه ليس عندي فقط و لكن عند عدد من العمارات حولي و إستتبع ذلك ضرورة شراء مواتير جديدة و في هذه المرة إشترينا مع الموتور جهاز آخر يقوم بدور "حساس" يستشعر إنقطاع المياه فيقطع التيار عن الموتور ( نفس دور البالونات التقليدية ) ، حتى هذه اللحظة المياه منقطعة عني و فريق من السباكين و الكهرائية يقوم بمحاولة تشغيل الموتور و معهم جيراننا الذين قاموا بتغيير الموتور و شراء الجهاز الجديد الذي يقوم باستشعار إنقطاع المياه حماية للموتور ، فريق العمل هذا و الجيران يتجمعون حول السباكين أثناء عملهم ، و عن السباكين لي كثير من التعليق و لكن هذا في موضوع مستقل.

نص الخبر من جريدة اليوم السابع :

قام المهندس إبراهيم محلب، رئيس مجلس الوزراء، يرافقه وزير الإسكان، فى التاسعة من مساء اليوم، بزيارة رافع مياه زهراء المعادى، الذى حدث به عطل أمس، تسبب فى قطع المياه عن مدينة نصر، وعزبة الهجانة، ومنطقة الزلزال بالمقطم، وبعض المناطق الأخرى. وتجول رئيس الوزراء بالرافع، وشاهد الطلمبات التى حدثت بها أعطال وتوقفت عن العمل، نتيجة ارتفاع منسوب المياه بالرافع، وقال: "من الواضح أن هناك إهمالا جسيما، بل لم يكن هناك أحد موجود فى الوردية بالرافع، واللى أهمل يتقطع رقبته، فخدمة مياه الشرب لا تحتمل إهمالا أو تقصيرا". وأمر رئيس الوزراء بتحويل المتسببين عن ذلك إلى النيابة، على الفور، مشددا على أنه لا مهادنة مع الإهمال أو الفساد، واستطرد: "مثلما قمنا بتحويل ملف مشروع مياه القاهرة الجديدة منذ يومين للنائب العام، يجب أن يحاسب من أهمل هنا أيضا". وعقّب وزير الإسكان:" الطقم كله هيروح النيابة، محدش هيقعد، ليكونوا عبرة لغيرهم حتى لا يهمل أحد فى خدمات المواطنين، نحن جميعا نسابق الزمن لانجاز الخدمات للناس، ومن يهمل سيحاسب". وذكر المهندس إبراهيم محلب: "اللى عاوز ينام مش هينفع نوم اليومين دول نحن فى مرحلة تحول، ولن نسمح بأى إهمال، ولن ندارى على أخطاء، أو إهمال، أو فساد". وقدم رئيس مجلس الوزراء اعتذارا لجميع المواطنين الذين انقطعت عنهم الخدمة، مشيرا إلى أن هناك فرق عمل تقوم حاليا بإصلاح الأعطال، وبالفعل بدأت الخدمة تعود تباعا لمختلف المناطق، وسنحاسب المتسببين عن هذه الأعطال. كما طلب رئيس الوزراء إعداد تقرير كامل عما حدث، وعرضه بوضوح على الرأى العام. وأثناء خروجه من الرافع، توجه الى رئيس الوزراء مواطن قائلا: أنا رئيس محطة الأتوبيس المجاورة للرافع، ولا توجد هنا إنارة، أو مظلة للركاب، أو دورة مياه، فكلف رئيس الوزراء رئيس الحى بتنفيذ هذه المطالب وتقديم تقرير يفيد بذلك.