شفتوا المنصورة كانت عاملة ازاى؟

[محمد شلبى]

شفتوا المنصورة النهاردة فى التليفزيون؟

كانت جميلة ونظيفة والشوارع مرصوفة صح ومتتخططة وبتبرق,مش كده؟

طبعا اللى زار المنصورة اوكان من اهلها عارف كويس قوى ان المنصورة عمرها ما كانت كده.

المنصورة شوارعها زى الزفت مليانة حفر ومطبات وفى شوارع اساسا مش مرصوفة والزبالة فى الشوارع .

المنصورة اللى كانت عروس الدلتا اصبحت من اسوأ المدن فى مصر فى كل شئ.

طب ايه اللى حصل؟

اللى حصل ان السيد الرئيس هيزور المنصورة,طبعا هرولت القيادات كلها لتجميل المدينة ورصف الطرق وتزيينها.طب يا جماعة مش الكلام ده هو الطبيعى اللى لازم يكون موجود؟

المصيبة انهم رصفوا الطريق اللى سيادته هيعدى من عليه بس وبقية المدينة زبالة الزبالة(انا مضطر استعمل الالفاظ دى مع انها بلدى بس دى الحقيقة).

ولكم ان تتخيلوا من حوالى 10 ايام وهما بيغسلوا الرصيف كل يوم بخراطيم المياه العملاقة(آه والله العظيم) وقافلين الطرق ومبهدلينا آخر بهدلة.

اما الميدان اللى ظهر امام مجمع المحاكم فده بيشتغلوا فيه بقالهم سنة كاملة وده المكان الوحيد النظيف اللى فى المنصورة.

حاجة تقرف prt:

[achnaton]

شوف يا ابو شلبى ...

كتب التراث بها كم هائل من الصفحات عن المنصورة .. وشعب المنصورة .. والمراجع العلمية تصف طبيعة شعب تلك المنطقة بانهم ثوار بالطبيعة .. مخلصين جدا لعملهم .. ولا أدرى سبب واحد لتتحول عاصمتهم المنصورة الى مزبلة .. وهى فى الأصل بستان التاريخ المصرى .. ولعلمك .. كانت المنصورة من اوائل المناطق التى زارها محمد نجيب ومعه عصابة المماليك مجتمعة .. ومعظم من أدى واجبه الوطنى لحماية ثورة الشعب فى بدايه الحركة المملوكية الشهيرة بحركة الكاكى كانوا من الدقهلية .. وكثير من علماء مصر الذى ورد ذكرهم فى المراجع كانوا من الدقهلية ولا يوجد سبب واحد يفسر تخلفها عن الركب الحضارى الا الكبت المفروض .. والحزم الظالم .. وغياب العدالة .. صحيح افتقدتهم كل بقاع المحروسة فغرقت كاملة فى التخلف .. ولكن فى محافظة مثل الدقهلية لما عرف عنها يتملك المرء الألم الشديد لإنها كانت معمل تفريخ الساسة والمجاهدين ولذلك افهم قرفك الذى تختم به مداخلاتك ولكن تأكد لن ينظف المنضورة الا اهلها .. ولن يحررها من الحبس الأنفرادى الا اهلها وياريت يكتب كل بيت وشارع فيها على واجهته جملة واحدة ..

" محافظنا منافق .. ومش عاوزينه " ويومها سيعرف الجميع انهم ارسلوا اليكم والى قفل .. يعمل بالريمود .. وطول ما انتم تحت الماء يعنى غرقانين .. لن تصل استغاتكم الى آى اذن .. وليس امامكم الا التجديف بقوة .. لتحققوا ما تريدون .. وليسقط الارهاب فى كل صوره ..

prt: taz:: taz:: taz::

[Sherief AbdelWahab]

أهل مكة أدرى بشعابها..

وعليه ..إليكم لقطات من المنصورة:

1-تم ضرب معظم الأبنية في شارع المحافظة (الرئيسي) بوية بيضاء بما فيها مسجد النصر ذي المئذنتين العاليتين ..معرفوش يكملوا المئذنتين!

الطريف والروش إن الجزء اللي بيتدهن هو الجزء المواجه لشارع المحافظة..بس!

2-شارع المحافظة اترصف ، وكل الشوارع اللي سار فيها الموكب..

3-أعمدة النور تم تضبيطها وبقت مية فل وعشرتاشر!

4-عربات الشرطة تواجدت بكثرة في الشوارع الرئيسية بشكل غير مسبوق ، وبعض الضباط بيتوا في المدارس اللي لسة معطلة لحد النهاردة!

5-المشهد المعتاد: شوارع متقفلة ومحدش عارف يروح ولا ييجي!!

فيه كلمة لواحد بلدياتي يعرفه الزملاء في الكويت بحكم أنه كاتب في مجلة العربي الكويتية وهو القاص الدكتور محمد المخزنجي..واللي قال ما معناه أن المنصورة انتصرت على حملتين وانهزمت الآن!..الكلام في تحقيق عمله المخزنجي في المنصورة في بدايات عهد فخر الدين خالد الذي يحسب له تحريك المياه الراكدة في عروس الدلتا سابقاً..

الآن..معنديش إلا حاجتين يتقالوا:

آه يا بلد ، على رأي الدقهلاوي سعد الدين وهبة ..

و..طبعاً:

خلص الكلام

[alnoobi]

السلام عليكم ...

ياجماعه .. سيبكوا من ده كله .. شفتوا مانشيت الأهرام النهارده :

5 ملايين مواطن فى الدقهليه يطالبون مبارك بالترشيح لفتره جديده

prt: :D

[Sherief AbdelWahab]

نستكمل اللقطات الغريبة والعجيبة لعروس الدلتا..

6-فاصل من الفشر اللذيذي للسادة مسئولي الصندوق الاجتماعي عن التصدير ، كل المنتجات بتتصدر لجميع أنحاء العالم ، وجايز يقول إننا بنصدر للصين!..

في البيت كانوا مستغربين جداً من الأرقام الغريبة اللي بيقولها عن فرص العمل اللي بيوفرها الصندوق الاجتماعي للتنمية.. لعبة المشروعات الصغيرة على الطريقة الصندوقية قتلناها بحثاً..يكفي أن أشير أن بعض المعارض الصغيرة في نادي الشبان المسلمين وشارع الدراسات تضم -إن لم أكن مخطئاً- عدداً كبيراً من تلك المنتجات لايباع..(فمعظم تلك المنتجات ملابس جاهزة وللأسف لم يملك منتجوها الخبرة ولا التسويق الكافي ، فهم ببساطة ما كلفوهاش كويس بسبب الضغوط المادية العنيفة للبنوك والصندوق)..

7-حمدت الله أن الرئيس لم يزر ملعب كرة القدم الرئيسي بالاستاد..ففضلاً عن سوء أرضيته المعلوم ، إلا أننا كمنصوراوية لم ننس أن هذا الملعب أبعد عن المدينة تنظيم بطولة الأندية العربية أبطال الكأس عام 1997 بسبب سوء حال مدرجاته!

8-الشيء الوحيد الذي لم يتم تزويقه في المنصورة هو ملعب الجامعة..لقد حضرته وحالته أفضل بكثير من الحالة الحالية ، إلا أنهم تذكروا حاجة الملعب الماسة إلى ..مدرجات!..

9-من الغريب أن تنشر الأهرام ، ويقول المحافظ أن عدد سكان الدقهلية خمسة ملايين فقط!

خلص الكلام

[ســيد مرزوق]

بصفتي من أبناء المنصورة المخلصين

المغتربين عن الوطن كله وليس عنها فقط

أحزنني جدا ما قرأته من ترهات ومهازل النفاق التي وردت على لسان المسؤولين , أنا تركت المنصورة من 23 سنة لغربة حتى الآن , وآخر عهدي بها كانت زيارة الرئيس الراحل أنور السادات قبل وفاته بأسبوع وقد شاهدته مرتين في هذا اليوم ولم يحدث أيامها ما سمعنا عنه الآن من نفاق وتزوير

وقبلها بحوالي 4 سنوات كانت زيارة السيدة جيهان السادات لإفتتاح مستشفى وبعض المؤسسات الأخرى في الجامعة على ما أذكر , وقابلها طلبة جامعة المنصورة بمظاهرات إحتجاج وقذفوها بالطماطم وذبحوا عجلا كتبوا عليه كلام لا أريد ذكره , ومن هم من جيلي في المنتدى من المنصورة ربما يذكرون ذلك , والمهم أن مقابلة أهل المنصورة لأي مسؤل كانت لها خصوصية ولها يرضخون أبدا بل يعبرون بشجاعة عن موقفهم , أما الآن فلا أستطيع أن اصدق ما أقرأه , فأهل المنصورة معروفون بالشجاعة ولا أنسى مواقف عديدة عشتها شخصيا بنفسي في أحداث فترة نهاية السبعينات , وما لمسته من تميز أهل المنصورة بشدة بأسهم ووطنيتهم , أما الآن فياللأسف .... يبدو أن العفن قد وصل إلى أرض الكفاح التاريخي ... عروس النيل ... جزيرة الورد .... ولا أعيب على المسؤول قدر ما أعيب على الشباب الذي يسكت على تلك المهازل ... لقد كنا شبابا صغارا في المنصورة وكانت لنا أنشطتنا الإجتماعية والسياسية , ولم نخف أو نهتز ولو أحببت السرد لسردت كثيرا من المواقف ولكني لا أريد الإطالة عليكم .. أين الشباب الآن ؟ هل أصبحت إهتمامتهم محصورة في التفاهات المعلومة للجميع؟ أين ابناء المنصورة؟ وهل أهل المنصورة 5 ملايين فقط؟ وأموت وأعرف كيف تأكد السيد الغير محافظ من أن 5 ملايين يستحلفون الريس بالله مايسيبهومش لا يضيعوا , ده لو قعد يعد من واحد لخمسة مليون عايزله شهرين متواصلين ... مش في خمس دقايق؟

مش عارف الناس دي فاهمة إنها بتضحك على مين؟؟؟؟؟ وفاهمين إحنا في سنة كام ؟ وللا إيه الحكاية ؟ حد يفوقهم ..... حد يعمل حاجة قبل الفاس ماتيجي في الراس

وحشتني المنصورة جدا

ورغم إقامتي في القاهرة ( بحكم الزواج فقط ) إلا أنني في الإجازات أفتقدها جدا ولا أنتظر إلا يوما أو إثنين وجري على هناك رغم ما أراه من تشويه وتدمير لكل ما عشقته فيها وعشقه غيري

ماحدث في المنصورة هو نموذج لحال البلد كلها وليس للمنصورة فقط , ولا أتعصب لها كونها مدينتي ولكني أغضب من هذا النفاق العلني والناس ساكتة .

[محمد شلبى]

1-تم ضرب معظم الأبنية في شارع المحافظة (الرئيسي) بوية بيضاء بما فيها مسجد النصر ذي المئذنتين العاليتين ..معرفوش يكملوا المئذنتين!

الله يمسيك بالخير يا اخ هشام

انا النهارده كنت ميت من الضحك لما عديت على جامع النصر ولقيتهم شالوا الاوناش اللى كانت بتدهن وسابوا نص المئذنتين من غير دهان,تقريبا الاوامر صدرت متاخرة بدهان الجامع ويا عينى ما لحقوش يكملوه,وطبعا مالوش لازمة يكملوه لان خلاص الريس مشى

حاجة تفقع prt:

[مصر عشقى]

تصادف امس انى كنت فى زيارة لابنتى فى المنصورة وطبعا كعاداتنا منقدرش نروح بايدنا فاضية ولسوء حظى فكرت انى اشترى فاكهة وحلويات لاحفادى ولقيت سوبر ماركت مشهور جنب جامع الفتح وحبيت اركن لقيت الامن جة جرى وممنوع وادخل يمين والمحل مغلق ودخلت بالعربية لكفر بدماص واحاول اعدى للجنب التانى علشان اروح لبنتى فى قلب المنصورة استحالة ولقيت نفسى محاصر فركنت السيارة امام اول قهوة بعد ما تعبت من اللف والدوران وزى ما بيقولوا هم يبكى وهم يضحك

السيد المحافظ اللى بيناشد الريس باسم خمسة مليون محملينة امانة انة يتعطف ويتنازل ويستمر فى الحكم ولقيت واحد من اللى على القهوة قام وبصوت عالى بيسأل حد فيكم قال للمحافظ حاجة ؟ واللى كمل السيد عضو سيد قرارة ممدوح الشهير بممدوح حوارى هوة كمان بيناشد باستمرار الريس فى الحكم

المبكى بقى

بعد ما دهنوا جامع الفتح من الوش منسيوش يفتحوا شنيشتين فى المأذنة علشان بتوع الامن يستخبوا وراهم ولا استاد الجامعة اللى بقدرة قادر بقى اسمة القرية الاولمبية وطبعا يومها فضلت محاصر لغاية ما ربنا فرجها الساعة واحدة ونص والحمد لله وصلت فى الوقت المناسب لانى لقيت جوز بنتى جايب تاكسى وعلية ميكروفون وناوى ينادى على حماة اللى تاه فى المنصورة

تم تعديل 6 فبراير 2005 بواسطة مصر عشقى

[achnaton]

هم يبكى وهم يضحك

السيد المحافظ اللى بيناشد الريس باسم خمسة مليون محملينة امانة انة يتعطف ويتنازل ويستمر فى الحكم  ولقيت واحد من اللى على القهوة قام وبصوت عالى بيسأل حد فيكم قال للمحافظ حاجة ؟ واللى كمل السيد عضو سيد قرارة ممدوح الشهير بممدوح حوارى هوة كمان بيناشد باستمرار الريس فى الحكم

المبكى بقى

بعد ما دهنوا جامع الفتح من الوش  منسيوش يفتحوا شنيشتين فى المأذنة علشان بتوع الامن يستخبوا وراهم  ولا استاد الجامعة اللى بقدرة قادر بقى اسمة القرية الاولمبية  وطبعا يومها فضلت محاصر لغاية ما ربنا فرجها الساعة  واحدة ونص  والحمد لله وصلت فى الوقت المناسب لانى لقيت جوز بنتى جايب تاكسى وعلية ميكروفون وناوى ينادى على حماة اللى تاه فى المنصورة

والله يا اخى انا كنت فاكر ان اللى شار على المحافظ بدهان واجهة الجامع المطلة على شارع التشريفة .. كان " سمارة ابو زمارة " عشان ينزل بمانشيت فى الجرائد اللى ورثها عن جده " رحمة الله عليه " يقول فيه أن السيد الرئيس فاته الظهر ومن معه لأن الجامع اللى جنب المحافظة كان مغلق للتحسينات .. وقد افاد معالى الوزير المحافظ أنه سيتحمل وحده الوزر .. وحيكتب للشيخ سيد آمين .. ليصدر فتوى أن من يعيقة اصلاح جامع عن اداء الفريضة يعتبر كما لو كان آداها خاصة ان خمسه مليون كانوا بيدعوا له ..

ودهان واجهة وترك الواجهة التانية .. دا مرجعه الى العادة التى انتشرت فى المنصورة عند الحلاقيين .. بيحلقوا الدقن جنب واحد لأن الزبون مفلس .. وعلى قد فلوسه .. وهذا ما تؤكده مداخلة ابو شلبى ان المقاول فك السقالات فور مغادرة الرئيس المنصورة وهو يغنى للمحافظ ظلموه .. على قد فلوسهم يا هوه ..

والنبى حاجة تثير الغثيان .. من المعلم المستشار صوان .. مش ده برضه اسم محافظكم ؟؟

حسبنا الله ونعم الوكيل

prt: taz:: taz::

[Sherief AbdelWahab]

العزيز محمد شلبي:

التفريق بيني وبين العزيز هشام عبد الوهاب سهل ، نحن لسنا أشقاء وإن كانت أخوته تشرفني ..لكنه قاهري وأنا من المنصورة!

العزيز مصر عشقي:

تقصد "جامع النصر" وهو الجامع الرئيسي في مدينة المنصورة والذي أنشئ قبل احدى وثلاثين عاماً..أم جامع هيئة التدريس القريب من استاد الجامعة ..بالمناسبة لم أزر الجامعة منذ نحو العام..

ما هو أكثر قرفاً هو زفة اليفط في شوارع المنصورة لنواب أو نوام الشعب ما تفرقش كتير ، واللي مش معظمهم حزب وطني وصححوا لي لو أخطأت!

خلص الكلام

[Sherief AbdelWahab]

أعرف أن معظمكم مصاب بدرجات متفاوتة من الاكتئاب والإحباط ، ولذا فلدي خبر من توابع الزيارة كفيل بإخراجكم من هذه الحالة بعون الله تعالى وتوفيقه..

صفحة كاملة إعلانية عن "إنجازات" الصندوق الاجتماعي في الدقهلية..

أمر عادي.. مش كدة؟

بس عارفين الصفحة دي كانت فين؟

في صوت الأمة!

عدد 20 فبراير 2005!

خلص الكلام

[الأفوكاتو]

أخى إخناتون,

أسلوبك كان دائما يطربنى, و لكن تعليقاتك الأخيرة جعلتى أؤمن أنك أصبحت الفليسوف الساخر للمحاورات.

إتحفنا بهذه العبارات المميزة, و التى تعكس نبض الشارع المصرى.

تحياتى و تقديرى.

[بنت شعنونة]

نسيتوااهمحاجا ياجماعاودي قالهالي قرايبي اللي ساكنين هناك

ان كللللللللللللللل الناس اللي ساكنين في مواجهة المكان اللي ها يزوره الريس "اجبرووووووووووووووووووا"انهم يسيبوا بيوتهم طول مدة تواجد الريس

ولما سألوا طب احنا مالناش مكان تاني؟

نروح فين بس

كان الرد والله زي ما اتقال بالضبط

السجون ماليانا اماكن فاضية ممكن نستقبلكم هناك لحد ما الزيارة تعدي

و ان المنصورة اتقفلت على نفسها والكوبري اصبح اكنه مش موجود ممنوع حد يعدي من البر للبر التاني الا بعد نهاية الزيارة

ايه رايكممممممممممممم بقىىىىىىىىى

[Shams100]

ربنا موجود ولابد ان يكون هناك نهايه لهذا الظلم لانهم يتعاملون كان هذه البلد ملكهم ويمكن السجون تكون ماوي لهم مستقبلا مش بعيد

[nouve]

معلش فى حاجة عايزة اقولها ولو انها متاخرة

الا ان بمناسبة زيارة بابا حسنى للدقهلية

اخدوا ناس زمايلنا فى جامعة المنصورة فى امن الدولة فى دكرنس

وبعد الزيارة .. نسيوهم tot::

بجد مش بهرج نسيوهم محبوسين فى امن الدولة

ولما عملنا دوشة mc:

بعدها بكام يوم سابوهم

ادى نظام بابا حسنى

حاجة تغيظ

[Sherief AbdelWahab]

بعض أصحاب نظرية التآمر يحاولون الربط بين زيارة السيد الرئيس وبين قصة المياه في المنصورة التي ظهرت فيما بعد..

تفتكروا دة حقيقي؟

خلص الكلام

[بنت شعنونة]

ايه موضوع المية دا؟

اوعى تقول ان المية معفنة؟

عشان مية اسكندرية بقالها يجي 3 ايام غير صالحة للشرب نهائي

اسكندرييييييييييية كلهااااااااااا مش حي واحد او مجموعة احياء

لآلآلآلآلآلآلآلآلآلآلآ

كل البلد فعلا!!