لماذا تعاملنا السعودية بهذه القسوة

[هادي]

الخبر نقلا عن جريدة الوفد

http://www.alwafd.org/front/detail.php?id=...ea2391cb6a547c1

عدد الثلاثاء 8 فبراير

احتجزت السلطات السعودية 25 سائقاً مصرياً بسبب نشوب خلاف بين شركتين لتأجير الأتوبيسات السياحية إحداهما مصرية والأخرى سعودية. منعت السلطات السعودية السائقين من مغادرة المملكة لحين الفصل في النزاع بين الشركتين. اضطر السائقون الي افتراش حديقة القنصلية المصرية بجدة منذ 27 يناير الماضي بعد سحب جوازات سفرهم. وقامت السفارة المصرية بالسعودية باستخراج وثائق سفر للسائقين بدلاً من الجوازات دون جدوي.

طالبت أسر السائقين المحتجزين أحمد أبو الغيط وزير الخارجية بالتدخل لإنقاذ السائقين وعودتهم الي مصر في أسرع وقت. وكان الخلاف قد اندلع بين رئيس حملة قافلة المنار السعودي الجنسية وشركة السبعين تورز حول تنفيذ بنود التعاقد. ويتضمن الاتفاق قيام الشركة المصرية بتأمين 40 أتوبيساً ذات مواصفات متفق عليها لنقل الحجاج. وتبين عدم توفير الشركة المصرية سوي 16 أتوبيساً فقط. واضطرت الشركة السعودية الي استئجار سيارات بأسعار عالية من شركات أخري.

سؤالي :

هل هو قدر ومكتوب أن يعامل العربي أخاه العربي وكأنه العدو الأول والأوحد ..

يطرد زعيم ليبيا الفسطينيين بعد توقيع اتفاق السلام بحجة أن لهم دولة ، ويرتمي في احضان افريقيا ويتآمر لاغتيال زغيم آخر ، ويدفع مليارات من جيوب بسطاء الشعب الليبي تعويض عن تفجير خمارة وطائرة !!!

نزاعات حدودية بين السعودية وقطر .. قطر والبحرين .. السعودية واليمن .. مصر والسودان .. تمر بفترات شد وجذب ، على طريقة أسد علي وفي الحروب فرختووون.

كفيل وعويل وزمبيل من أجل الذهاب الى رحلة شقاء لأي دولة عربية (شقيقة)

من يأتي من دول عربية ليتزوج بناتنا لابد أن يكون اعور واقرع واخرس وفيه كل أمراض الشيخوخة والجديري حتى توافق سلطات بلده ان يشتري جارية مصرية فقيرة بأمواله ، والاسم الشرعي (زواج) !!! بين صاحب 70 وفتاة في عمر الزهور !!!

كلهم يلعن اسارائيل في (الصف المحلية) ولكنه يلبس قميص النوم البمبي لشارون عندما يأتي المساء .. كلهم بلا استثناء ..

أين العدو و أين الصديق ؟

هل ضاعت البوصلة الوطنية من الجميع

وهل نجحوا ان يورثوا تلك العداءات للشعوب نفسها ؟

سؤال محيرني

[se_ Elsyed]

أين العدو و أين الصديق ؟

هل ضاعت البوصلة الوطنية من الجميع

وهل نجحوا ان يورثوا تلك العداءات للشعوب نفسها ؟

سؤال محيرني

الموضوع بمنتهى البساطه يا هادي يتلخص في جملة واحده " لقد هانت أنفسنا علينا ... فتجرأ علينا الأخرون واهانونا بمناسبة وغير مناسبة"

فكيف إذاً بتطالب دولة تانية بإحترام ادميتنا في حين دولتنا لا تحترمنا من الأساس سواء بره أو جوه ؟

وحتى الخبر اللي حضرتك نشرته متضمن سبب ذلك الهوان ... فسببه الغش والفهلوة والحنجلة بتاعت بعض المصريين اللي عايزين يكسبوا من الهوا حتى لو على أشلاء حجاج بيت الله الحرام اللي ممكن دعوة من مظلوم فيهم تخسف بصاحب شركة السياحة الأرض هو واهله ... فإذا كانوا متفقين على 40 اتوبيس .. إي إنهم لما وقعوا العقد كانوا حاسبين نسبة أرباحهم والسبوبة اللي هايعملوها ... يبقى ليه الأروطة والفهلوة ومحاولة توفير التكاليف على حساب الغير ؟

- وبعدين لا مؤخذه ليه السائقين يفترشوا حديقة القنصلية ؟ هي الدولة متمثلة في قنصليتها مش قادرة تنزلهم في فندق إن شالله نجمة واحده معززين مُكرمين لحد ما النزاع يخلص وكل ده مش هايكلفهم ثمن عشوة من عشوات سيادة السفير ؟ يا أخي السودان اللي عندهم حروب أهلية ومجاعات مستحيل تلاقي فيهم حد قاعد في الشارع او في حديقة قنصليته .. وتمتلك سفارتهم هنا عماير عاملينها شقق للمحتاجين والباحثين عن العمل من أبناء جاليتهم وما حدش بيحسابه إن شالله يقعد مبلطج عندهم سنين عواطلي ...

يا سيدي الفاضل شوف السفارة الهندية اللي عدد سكان شعبهم تجاوز المليار او الفلبين اللي بنقول عليهم خدامين ... أقسم بالله أقف لهم تجليلاً وإحتراماً لناس بتحترم شعبها ... فعندما ندخل في نزاع عمل مع احد الهنود او الفلبينيين ويلجأ لسفارته ترى العجب ... ناس بتقوم محاميين يدافعوا عن رعايها ومترجمين يقوموا بالترجمة .. وكل ده مجاناً من غير ما حد يستغلهم او يمن عليهم بخدمة مفروضة عليهم ومن واجبهم أن يفعلوها إتجاه رعاياهم .... في حين لو أضطر أي مصري أن يلجأ لسفارته على مستوى العالم .. وبأقولها وأنا عارف ومتأكد لإن كل سفاراتنا كده .. لا يجد فرق بينها وبين الجمعية الإستهلاكية اللي الوظف فيها بينظر للمواطن على إنه متسول جاء ليقف أمامه ويتجرع ذُل السؤال .. هل رأيت يا سيدي رئيسة الفلبين " جلوريا أرويو " وهي بتحتضن زوجة العامل الفلبيني اللي كان مختطف وأطلق سراحه من شهور والست كانت بتبكي وتولول وهي بتحضن زوجة الراجل وتواسيها وأخدت قرار فوري بعدم إرسال قوات او عمال فلبينيين إلى العراق بعد تلك اللحظة ... عشان كده بيحققوا دلوقت معدلات تنمية وتقدم بسرعة الصاروخ .. وهايوصلوا وإحنا هانرجع كمان وكمان لحد ما هاننقرض بسبب الظلم ... فكما قال الشيخ إبن تيمية " إن الله يرفع دولة الكفر إذا حققت العدل ... ويمحق دولة الإيمان لو ظلمت " فالإيمان والكفر دي حاجة بين العبد وربه .. أما العدل بين البشر فده أساس الحياة ...

- يا سيدي الفاضل نقرأ الان يومياً عن إختفاء سُفن مصرية للصيد وتمر الأيام والاسابيع ونكتشف إنها محتجزة في ليبيا وإن الصيادين ممكن تكون جرفتهم الامواج إلى الشواطيء الليبية بالخطأ فبتوع ليبيا طبعاً ما بيصدقوا ويقبضوا عليهم وينكلوا بهم ويحتجزوهم في السجون الليبية والدبان الازرق ما يعرفلهومش طريق ... في حين ريسنا اللي رافع راسنا بيستقبل العقيد الليبي من الحين والاخر ويقعدوا ياكلوا ويتسامروا مع بعض من غير ما يدافع عن كرامتنا وكرامة الناس الغلابة أو يحذر المجنون الليبي من التعرض للمصريين أسياده وأسياد بلده كلها ...

وغيره وغيره من ملايين الامثلة اللي إحنا السبب فيها .... فلا تلوم السعودية او جزر الواق واق لما تعاملنا بهذا الشكل الذي هو بكل حال من الاحوال أفضل من معاملة بلدنا لنا ......

بتتكلم عن نظام الكفيل والكفولة والعبودية المُقنعة ... أوكي يا عزيزي ... هل لو دولتنا محترمة وعارفه إن الحمد لله المصريين اللي موجودين هنا كفاءات ومعظمهم اعمدة رئيسية في مؤسساتهم ومنشأتهم .. هل لو دولتنا أشترطت على السعودية او غيرها معاملة المصريين كما تعامل الأمريكان أو الغربيين من حيث إنه شايل جوازه في جيبه طوال الوقت .. وما حدش يقدر ينطق قدامه كلمة كفيل او يقول له سيب جوازك في خزنة الشركة وإمشي بالإقامة ... ولو واحد غلط وقالها بيرد عليه الأمريكي او الغربي ويقوله pooooooooool shit

عمرك شفت حد ظابط أو عسكري سعودي أو كويتي أو إماراتي سب الدين لمواطن مصري او هجم على بيته في الفجر وأقتاده واهل بيته بملابس النوم لقسم شرطة وهناك أنتهكوا عرض زوجته إن لم يكن بالفعل يبقى بالقول ؟طبعاً مُستحيل يا سيدي الفاضل ... لكن في مصر بيحصل كده ......... ملاييييييييييييييين الحالات ...

هاحكيلك على مثل صغير جداً جداً جداً شوفته أمام عيني من زممممممممممممممان قوي يمكن من 14 سنة ...

كنت احضر احد الأفراح وصادفت إن كان فيه قلق في البلد عشان الإرهاب والكباب والكلام ده ... المهم واحد من اللي في الفرح كان صعيدي فعلى قد ثقافته وفهمه جاب بندقية يملكها وضرب كام عيار كفي الجو ... ثاني يوم لقى الشرطة عنده يسألوه عن البندقية فأنكر إنه يملك هذا النوع من الاسلحة .. فما كان منهم إلا أن تركوه ومشيوا ... بش ما مشيوش فاضيين ... خدوا معاهم زوجته وبناته العرايس الكبار ... وهناك في قسم الشرطة المصري الموجود في مصر مش في إسرائيل او معتقل النقب جاءوا ببناته وزوجته امامه وهددوه بإغتصابهن جميعاً أمام عينيه إذا لم يحضر السلاح ....

لا تعليق وكل سنة وإنت طيب .

[هادي]

أخي الفاضل والكريم

سي السيد

لقد أثرت لدي الشجون و الله بكلماتك الصادقة

فعلا عندك كل الحق استاذي الحبيب

نحن من هنا على أنفسنا ، فهنا على الآخرين

والله لقد عشت سنوات في السعودية قبل كندا

وكنت في الاجازة أؤكد نفس المعاني لزملائي واصدقائي

يا شباب السعودية اللي فاكرينهم متخلفين ، سبقونا في النظام

شوف المرور وشوف سهولة قضاء المصالح

في حين انه عندنا لايتفق موظف وزميله على المطلوب منك لقضاء مصلحة معينة

فقد يفتي بشيء وزميلة او زميلته في نفس المكتب يفتي بشيء آخر في زيارتك القادمة

وبالتالي تحتاج إلى مئات الاوراق والاختام والتواقيع والاعتمادات

فلا نسأل لماذا يطفش منا المستثمر !! ولماذا نتراجع وننزل كل يوم

لغاية ما أصبحت دوله مثل تايلاند والفلبين تحقق معدلات تنمية حقيقية أفضل من قاهرة المعز ذات الاربع الاف سنة حضارة ..

المشكلة الحقيقية ياسيدي تكمن فينا فعلا

ولكن كيف نصلح حال شعب استمرأ الفهلوة

في حين ان كندا تطلب منك دراسة وشهادة لتمارس الحلاقة والله

السباكة بشهادة .. المحامي بشهادة .. كل شيء يسبقه دراسة واعتماد

انا معترف باختلاف الهيكلة الاقتصادية في تلك الدول مقارنة بمصر التي لا تزال تعتمد نظام الترقيع الاقتصادي منذ سنوات طوال .. فلا نحن اقتصاد اسلامي ولا راسمالي ولا اشتراكي ولا أي نيلة .. والترقيع اصبح هو القاعدة بالفعل في كل مجال .. ومداخلات الاخوة حول زيارة (جدو) الاخيرة إلى المنصورة خير دليل على الترقيع والفهلوة.

سؤالي .. كيف نتخلص من الفهلوة ونعلي من قيمة الامانة

فلا نصدر شحنة بطاطس وترجع من الاتحاد الاوربي

لا اتفق على عينات بذور في كندا واشربها عشان المصدر افندي باعني وشحن بضاعه مضروبه .. كيف نعلي من قيمة التخصص ونغلق باب (بتاع كله)

كيف ؟!!!!!

نفسي اعرف

[se_ Elsyed]

سؤالي .. كيف نتخلص من الفهلوة ونعلي من قيمة الامانة

فلا نصدر شحنة بطاطس وترجع من الاتحاد الاوربي

لا اتفق على عينات بذور في كندا واشربها عشان المصدر افندي باعني وشحن بضاعه مضروبه .. كيف نعلي من قيمة التخصص ونغلق باب (بتاع كله)

كيف ؟!!!!!

نفسي اعرف

الحل في منتهى البساطة ..

فالحكمة تقو : إذا صلُحت الرأس صلح باقي الجسد ..

والرأس في مصر هي السلطة الفاسدة ... التي بالتالي تؤثر على باقي الجسد وهو الشعب المصري ..

يا راجل ده لو على مثال الفهلوة بس .. هاتلاقي الحكومات المتعاقية بتاعتنا أساتذه في الفهلوة والكذب والنصب ... يبقى عايز الشعب يبقى قديسيين ؟..

وإذا جت على بتاع كله ... فما تقوليش وما تعيدليش ... ده ما شاء الله عليه رئيسنا القائد بيفهم في كله .. إقتصاد تلاقي .... مناهج ثانوية عامه تلاقي .... مواسير مياه ضاربه في مدينة نصر برضوا تلاقي ...

[مهيب]

... القضية التى نحن بصددها سهلة وواضحة على رأى حسن سبانخ زعيم الحياة الطبيعية ...

الموضوع ببساطة أعزائى ان مفيش حاجة اسمها أشقاءنا العرب ... الكلام اللى أوجده عبد الناصر ده مالوش أساس من الصحة ... المنطقة العربية كما يدعونها برمتها ثقافات مختلفة ... أفريقية على بربرية على حضارية على بدوية على قبلية على يمنية على زراعية ... كان زمان فى دولة اسلامية موحدة ... لكن مش دولة عربية ...

أما بالنسبة لمن يقارن السعودية بمصر ... المقارنة هنا تبقى مجحفة نوعا سيدى الفاضل ... لو كان عدد سكان مصر ضعف عدد سكان السعودية.. بس ضعفها ... كانت الأمور اختلفت ... مايغركش الشوارع النضيفة و الكلام ده .. مهما كان فالسعودية بلد بتعانى من مشاكل معادش حد بيعانى منها دلوقتى ... مفيش بنية تحتية علشان طبيعتها ... كل فئة الحرفيين و العاملين اللى عمالين يشغلوا فلوس البلد مش من مواطنيها .... عمرك سمعت عن خليجى ميكانيكى ولا كهربائى و لا عامل بناء و مهندس زراعى ولا خبير مياه ولا نجار ولا مكوجى و لا حلاق و لا ولا ولا ...

طائفة من الوظائف التى تمثل قلب أى بلد غير موجودة ... يعنى لو حصلت شوية مشاكل سياسية ... لاقدر الله فى السعودية أو الكويت أو البحرين ... و الناس اللى بيشتغلوا فبها خافوا على نفسهم و روحوا بلدانهم ... البلد هتمشى ازاى ...؟؟؟

لكن فى النهاية أقول ان زمان وانا صغير كنت فاكر ان المشاكل اللى بين العرب سببها الحكام و الحكومات ,,.. لكن الشعوب مش كده ... لما كبرت وسافرت عرفت انى كنت ساذج جدا ...

خد عندك مثلا الرياضة .... ماتشات الكورة اللى بين فرق عربية ممكن تحصل فيها مدابح ... لكن لو كانت مع فرقة غربية ... ولا حد يفتح بقه حتى لو الحكم جاب بنفسه جون فينا ...

مش كده و بس ... ده تلاقى مثلا واحد من دولة عربية شقيقة ... السعودية ... الأردن ... أى بلد تانى لو حاول ينتقد مصر مثلا قدام واحد مصرى .. تلاقيه هب فيه زى وابور الجاز ... (طبعا لو مكانش كفيله) .. لكن لو انتقد مصر واحد أجنبى مش عربى ... عادى جدا ....

غرف الدردشة و المناقشات اللى العرب فيها بيتقابلوا بتبقى مهازل و كلام يندى له جبين الشيطان ... و مبارزات فى الوصول الى أقصى حدود الاسفاف و الاهانة بين الأشقاء العرب

ده يوصلنا لنتيجة مؤسفة و مؤسية للغاية ... نتيجة لو تأملناها هنلاقيها كارثة

المصريين فاكرين انهم أفضل أهل الأرض ... أذكاهم ...أكثرهم حضارة ... وان باقى العرب كويس عليهم الهوا اللى بيتنفسوه وانهم مايستحقوش فلس أو هللة أو نكلة من اللى معاهم لكن ارادة ربنا بقى ...

وهتلاقى كل شعب (عربى) آخر ليه برضه نظرته اللى مش قد كده للباقيين ... للأسف الشعوب هى اللى بتكره بعضها ... مش وضع مفروض من الحكومات ... الشعوب العربية بتمقت بعضها بشكل بشع ... و أنا مانساش كلمة كان قالها واحد لا داعى لذكر جنسيته ... لما كان صديق بيكلمه عن الوحدة العربية و امكانية حدوثها فكان بيدافع و يقول ممكن ... فرد عليه الصديق قاله يعنى انت ترضى يحكمك واحد جنسيته كذا ؟؟ وذكر جنسية عربية أخرى ... رد عليه بدون تفكير ... ده يحكمنا شارون ولا يحكمنا واحد كذا ....

المنطقة العربية كلها بتعانى من مشكلة سوء التوزيع ... الفلوس فى حتة ... والامكانيات العقلية فى حتة تانية ... المصادر الطبيعية فى حتة ... و التعليم فى منطقة تانى خالص ... و هكذا .... وبدل ماندخل فى مشاحنات مع من أعلنوا و لم يتوقفوا عن اعلان العداء لنا فى كل محفل ... دخلنا فى مشاحنات مع أنفسنا ....

تم تعديل 12 فبراير 2005 بواسطة مهيب

[se_ Elsyed]

لكن فى النهاية أقول ان زمان وانا صغير كنت فاكر ان المشاكل اللى بين العرب سببها الحكام و الحكومات ,,.. لكن الشعوب مش كده ... لما كبرت وسافرت عرفت انى كنت ساذج جدا ...

إزيك يا عم مهيب ...

اتفق معاك في بعض كلامك .. والباقي لأ وخصوصاً لما بتقول إن العيب في الشعب ..

طب أقولك على مثل صغير ... أيام عبد الناصر - الله يسامحه مطرح ما راح - كانت النعرة القومية سائدة وتقريباً معظم العرب كانوا سمنه على عسل .. و ما كنتش تلاقي الضغائن اللي بين الشعوب العربية منتشرة زي اليومين دول ...

فيا عزيزي الركن المهيب ... لإن حكامنا بينهم ما صنع الحداد وتلاقيهم في إجتماعات القمة العربية بيردحوا لبعض وكل واحد بيخبط اللي قدامه بطبق الاكل الفاضي ... فلا تستبعد أن ينعكس ذلك على الشعوب ..

فلو تلاحظ إن في بدايات عصر مبارك المبارك كانت جرايدنا شده السلخ على ليبيا ونظامها وقذافيها وشعبها وكل يوم هاتك يا تريقه في الجرانين ... يبقى متوقع إن لما واحد مصري يشوف واحد ليبي او العكس ياخده بالحضن ولا يديله بالشلوت ؟ فالصحف ووسائل الإعلام عملت اللازم وشحنت الطرفين تمام التمام وبقوا جاهزين للإنفجار ..

قس على ذلك باقي الدول .... وأركز هنا على مشكلة الإعلام وخصوصاً الصحف بتاعتنا اللي لا محصله صفرا ولا خضرا ...

فالنهاردة الصحف تصور لك العلاقة بين السعودية ومصر على إنها أحسن ما يكون ... ويا دوب يحصل طاطش صغير تلاقي المواقف إتقلبت 193 درجة وهاتك يا شتيمة ومن المنقي خيار ...

ومين طبعاً بيقرا الصحف دي ؟

الشعوب طبعاً ...

[Sherief AbdelWahab]

أنا أختلف كلية مع ما قاله الزملاء ..

الفيليبينيون والباكستانيون والبنغال جاءوا من دول ديمقراطية وبها ديمقراطية حقيقية أكثر من أكثر الدول العربية ديمقراطية..

المسألة ببساطة نظرة الدولة لمواطنيها مقارنة بمواطني الآخرين ، أياً كان نوع الخانة التي تضع فيها الدولة هؤلاء الآخرين : مقيمين أو وافدين أو حتى غزاة محتلين!

المشكلة بنسبة كبيرة فيهم قبل أن تكون فينا..مهما كان لدينا من سلبيات لا ننكرها أبداً..

خلص الكلام

[هادي]

الاخوة الكرام الاحباب

كعادتي احب أن اتفق واختلف

واحب ايضا ان نؤكد على جوانب الاتفاق ، وهي كثيرة ، ونناقش بصدر وقلب وعقل مفتوح جوانب الاختلاف ، فهو السبيل الوحيد نحو أي بناء أو عمل ايجابي في حياتنا

فأتفق طبعا مع أخي الكبير (سي السيد) عندما قال

إذا صلُحت الرأس صلح باقي الجسد

واختلف لو اعتبرنا أن ذلك مبرر لنا للقعود أو تقليد فهلوة الحكومة وفسادها ، أنا اعرف ان اخي (سي السيد) لا يقصد أنه مبرر طبعا ، لكن يقول أنه أكبر عائق لنا هو حكوماتنا نفسها .. وهذا ما اتفق فيه في كثير من الاحيان ، ولكن اعود وأقول .. الحكومة كم شخص .. الريس يملك التأثير في كم شخص من حوله ويمارس بهم ما يريد في المحروسة طولا وعرضاً .. سنجدهم في الاخير لو نسبناهم الى مجموعه عدد الشعوب – نسبة ضئيلة – فنحن الشعوب ينتظر منا الكثير من الفعل ، لو توفرت النية القوية للفعل ، فلسنا أقل من الفلبين التي وضعت رئيسها خلف القضبان وحاكمته بتهم فساد.

وطبعا اتفق مع اخي الكريم (مهيب) عندما قال

ده يوصلنا لنتيجة مؤسفة و مؤسية للغاية ... نتيجة لو تأملناها هنلاقيها كارثة

المصريين فاكرين انهم أفضل أهل الأرض ... أذكاهم ...أكثرهم حضارة ... وان باقى العرب كويس عليهم الهوا اللى بيتنفسوه وانهم مايستحقوش فلس أو هللة أو نكلة من اللى معاهم لكن ارادة ربنا بقى ... وهتلاقى كل شعب (عربى) آخر ليه برضه نظرته اللى مش قد كده للباقيين

فنحن نرضع- أننا متفوقين وليس بالامكان أفضل مما كان، واحنا اغلب من الغلب والله

يحشونا الاعلام يوميا بأننا أذكى طفل واعظم شعب واحنا بناخد على قفانا ف كل الدنيا من اليونان للعراق ياقلبي لاتحزن..

وهنا نعود للنقطة السابقة ، أقصد ما يمكن أن نلوم فيه الشعب وما يمكن أن نلوم فيه الحكومة ، فالفرق بينهما يجعلنا نخرج من منطقة جلد الذات الى منطقة تحليل الاسباب لنعرف كيف المخرج والسبيل.

ولكن اختلف مع اخي الكريم عندما قال

مفيش بنية تحتية علشان طبيعتها ... كل فئة الحرفيين و العاملين اللى عمالين يشغلوا فلوس البلد مش من مواطنيها .... عمرك سمعت عن خليجى ميكانيكى ولا كهربائى و لا عامل بناء و مهندس زراعى ولا خبير مياه ولا نجار ولا مكوجى و لا حلاق

فأنا عشت هناك وشاهدت بنية تحتية قوية ، وكذلك شاهدت في الامارات بنية تحتية غير موجوده هنا في كندا مثلاً .. طبعا بسبب اقتصاد قوي ، لا أختلف معك ، لكن نفس الاموال موجوده في سلطنة بروناي ، ولم نسمع عن قفزة تكنولوجية واستقطاب لكبرى شركات التقنية مثلما رأيت في مدينة دبي للانترنت .. ومطار دبي عندي افضل نظاما من مطار نيويورك بالفعل.

أما الخلاق والميكانيكي ، فهذا بالفعل كان من سنوات بسيطة، ولكن اليوم الوضع اختلف تحت ضغط الحاجة، والحكومة السعودية تدفع الشباب ليعملوا ويكسبوا من كدهم ، وتم سعودة قطاع الذهب مثلا ، وسعودية بيع الخضار والفاكهة !!! وسعودة حرف كثيرة مؤخراً.

وبالتأكيد اتفق مع اخي الكريم (شريف عبد الوهاب) عندما قال

المسألة ببساطة نظرة الدولة لمواطنيها مقارنة بمواطني الآخرين

صدقت والله ، فنظرة الحكومات لمواطنيها هي مربط الفرس في احترام الاخرين لنا ، فلما هنا على انفسنا وعلى حكوماتنا ، كانت طبيعي أننا هنا على الاخرين ، الاشقاء منهم وغير الاشقاء !!

واختلف معك اخي الحبيب في جزئية بسيطة

خلص الكلام

بالطبع الكلام موصول

وليس امتع من حوار جميل مثل هذا مع اصدقاء يجمعنا بهم هذا المنتدى الرائع

اشكر لكم جميعا وجهات النظر التي اثرت الموضوع

وفي انتظار وضع تصور – ممكن – للخروج من منطقة ال 50%

كأننا شعب مجابش مجموع يدخله العالم الجديد

الذي بدأ يتشكل بالفعل واحنا لسه ف الطحينة

ربنا يسترها من الكويز ومن الشرق الاوسط الكبير ومن الفرقان الجديد

ويل لمجتمع لو تمهيص العالم وتفهيص المثقفون

(( فين تروح الشمس من على قفا الغلبان ))

نهاركم فل الفل