وللاخلاق موضه

[إثار]

بسم الله الرحمن الرحيم

ليه كل ماتعدي السنين الناس بتزيد بشاعه

يعني لو اتكلمنا عن اليومين دول

ليه الطيبه والبساطه والحب والصدق والوفاء والشهامه وصفات كتير اصبحت تقريبا صفات نادره

يعني اصبحت صفات للاهبل والهايف واللي مش عارف مصلحته

يعني لو شخص ساعد حد في حاجه ونجحت مساعدته يبقى عبيط عشان ضيع وقته او لانه ساعد غيره في انه يتفوق في حاجه معينه ............

واللي يتقال عليه جدع هو اللي يعرف يمشي مصالحه حتى لو بالغلط او على حساب حد تاني (والصداقه)لاتكون الا بوجود المصلحه وبعد انتهاء المصلحه واخذ المنفعه خلاص ولا كانهم يعرفوا بعض!!!!!

واصبحت (الصياعه)كلمه بيتباهى بيها الشباب!!!!

ومابقاش في حاجه اسمها صداقه ولا وفاء ولااااااااااا .........

يعني يعمل ايه الانسان اللى عايش مابيحبش التعقيد وبيحب الناس رغم انه علطول الخط واخد مقالب وبتكون سعادته في انه يشوف غيره مبسوط !!

هل الحل في انه يتاقلم بانه يغير من صفاته بدل ما يكون وفي وحبوب و........... يكون مصلحجي لئيم و.........؟؟؟!!!

تم تعديل 9 فبراير 2005 بواسطة إثار

[goold]

عزيزتى إثار

فعلا الاخلاق بتتغير اوافقك الرأى يعنى زمن الوفاء والا خلاص بس عارفة الواحد ميغير من طباعه الحلوة وكمان ميتصدمش لو وجد كثير من الناس ال حوله بيخدعوه او بيدوروا على مصالحهم وبس ممكن يجي يوم تلاقى صداقة وافيه وتلاقى عادات طيبة قصدى زى ما فى الوحش هتلاقى الحلو حتى لو نادر لكن بردوا موجود بس الكويس المفروض يحافظ على الصفات الحلوة ال فيه ومش يتنازل عنها ويخسرها لانها هتميزة عن ناس كثير كفاية ان الواحد لما يكون بيقدر يساعد غيره ولو قال لنفسة ان المقابل من عند الله هيكون انجز وهيحس براحه داخلية وبقيمة لنفسه - ولازم هيلاقى مردود للخير ال بيعمله لو مش من الناس هيكون من الله

ازاى يعنى ال بيعمل خير - بيلاقي فى وقت من الاوقات حصله حاجة حلوة من غير مايدرى ده نتيجة رضى الله عنه -

كمان كويس ان الواحد يقدر يساعد او يعامل ال حوله كويس وانه مكتفى .

[محمود تركى]

تتغير عادات و سلوكيات الأفراد نمشيا مع التغيير الذى يحدث فى متغيرات أخرى, فالحروب مثلا لها تأثير على سلوكيات الأفراد, و تجعل الشعب المنتصر فخورا, و الشعب المنهزم محبطا.

و تغيير الأوضاع الإقتصادية, بالإزدهار, أو بالكساد لا شك سوف يؤثر على سلوك الشخص.

و لكن التغيير فى الالمناخ السياسى الداخلى, هو أكبر عامل مؤثر فى سلوك المواطن.

فمن يعيش فى ظل نظام ديكتاتورى, ستختلف سلوكياته عمن يعيش فى مناخ أكثر حرية.

هذا بعض من كل, و لعل بقية الأخوة يمكنهم الإدلاء بدلوهم فى هذا الموضع الذى أعتبره موضوع الساعة.

[mohamed]

و لكن التغيير فى الالمناخ السياسى الداخلى, هو أكبر عامل مؤثر فى سلوك المواطن.

فمن يعيش فى ظل نظام ديكتاتورى, ستختلف سلوكياته عمن يعيش فى مناخ أكثر حرية.

اوافقك الراى اخى الكريم

لكن هذا المناخ السياسي لم يأت من فراغ وانما من سلوكيات الافراد أنفسهم بمعنى اننا نجد شعوبنا العربية تطالب بقدر من الحرية والمساواة والديمقراطية ... الخ في حين انهم لا يمارسون هذه المطالب فيما بينهم او على المستوى الشخصى او فى محيط الاسرة

واسف اذا كنت خرجت عن الموضوع

[mohamed]

هل الحل في انه يتاقلم بانه يغير من صفاته بدل ما يكون وفي وحبوب و........... يكون مصلحجي لئيم و.........؟؟؟!!!

لست بالخب ولا الخب يخدعنى

مقولة الفاروق رضي الله عنه

نعم اختى الفاضلة فى زماننا هذا يجب ان تأقلم نفسك كي تتعامل مع شخصيات ممن تفضلتي بذكرهم

ليس معنى ذلك ان تصبح مثلهم وتنحدر الى مثل اخلاقياتهم لان الاصيل دائما يظل أصيلا

ولكن يجب ان تكون لك وقفات حازمة ومعاملات فيها نوع من الخشونة او حتى الالتواء حتى تستطيع التعامل مع مجتمع اصبحت لا تسطيع ان تحصل فيه على حقك عبر القنوات الطبيعية

( يعنى مش هتعرف تجيب حق ولا باطل مع الصايع ده فلازم تبقى صايع زيه )

ايضا هناك اشخاص يتلونون فى تعاملاتهم فنجد ظاهرهم غير باطنهم ومظهرهم يوحى مثلا بالتدين واقوالهم كذلك لكن بعد مرور الوقت تكتشف العكس ، فيجب الحذر ايضا من هؤلاء

لان هذا هو زماننا رضينا أم لم نرضى هو كذلك وعلى من يريد ان يعيش فيه دون ان يجور عليه احد ان يتبع نفس الاسلوب فى اضيق الحدود من اجل رد اعتداء عليه

باختصار ( لست بالخب ولا الخب يخدعنى )

يعنى بمطلح اليومين دول ( خليك صايع بأدب )

ملحوظة : الصياعة فى عرف الشباب معناها أنك شخص فاهم الدنيا ومحدش بيضحك عليك

[Sherief AbdelWahab]

العزيزة إثار:

عود أحمد.. هذا أولاً..

ثانياً: نحن الآن في العام الخامس بعد الألفين ، المشكلة في المصطلحات ..

اقتصادنا اقتصاد بقالة ، دلعناه وقلنا عليه اقتصاد!

ولأن التجارة شطارة ، انعدم لدينا الفرق بين "الصناعة" و "الصياعة"!..

وكلمة "رشوة" دمها تقيل طحن موت طوبة ..فيه ألف كلمة أروش ودمها أخف!..

السرقة من البنوك مش مخلة بالشرف ..زي ما عمو حازم الببلاوي قال في التليفزيون!..

أيها المصريون : عيشوا حياتكم وخلوا الدماغ لارج!

خلص الكلام

[Salwa]

موضوع طازج دائما ...

بما انى..انسان...عاصر اكثر من جيل .

يسعدنى ان ادلى برأيى ..

من تلاتين سنة كان ..الكبار ...يقولوا لنا ياحسرة على الأخلاق ..

الآن اصبح الشاب يدخن امام والده...

اصبح الزوج لا يسرع بفتح باب السيارة لزوجته...

اصبح الصغير لايقبل يد والده قبل الذهاب للمدرسة ..

اصبحت البنت تقول ...اريد ولا اريد ..

اصبح الشباب بدلا من سماع الأحاديث الدينية والتربوية يعشقون سماع البيتلز..

الشباب يطيل شعره وسوالفه ...ياحسرة على الشباب ..

وياللمهزلة ....يرتدون بنطلونات موضة رجل الفيل ...

الآن التعامل بالشيكات ....وزمان كان الرجل يتربط من لسانه وكلمة الرجل هى صك معترف به ...

الآن الجار يقفل بابه عليه وزمان كانت كل الأبواب تفتح اذا قال جار ...آه.

جيلكم جيل مايص...

جيلكم جيل فارغ....

جيلكم جيل لايتحمل المسئولية ...

يجب عليكم ان تساعدوا بكل ما معكم وليس بنصف ما معكم ...

الجودة من الموجود وربنا بيرزق ويبارك فيما رزق ..

هو انتم كل حاجة حاتقولوا لنا ...المنطق...

عيشوا زى ماعاش اهاليكم..

هو انتم بتعترضوا ليه ؟؟؟ احنا عملنا اللى علينا وجه دوركم ..

تسلحوا بالأخلاق والعلم ....وليس العلم ثم الأخلاق ..

راعوا ربنا فى كل شئ ...لو احنا مش شايفين بتعملوا ايه تذكروا ان ربنا شايف...

اعملوا كل حاجة باتقان زى ما احنا عملنا .....مش ..ب..لهوجة .

اتعلموا الصبر ...انتوا جيل خلقه ضيق..

انتوا اتعلمتم معسول الكلام ده فين ؟؟؟؟؟؟؟؟؟.

ورحل الجيل الأول ..تاركا فى بعض عقول وضمائر الجيل الثانى

انهم افضل حظا...والبعض الآخر ظل على معتقداته انه افضل من السابقين فى كل شئ ..

النوع الأول ........تطلع للأفضل وحسن الأحسن ..

النوع الثانى .....ظل كما هو وطور السلبيات التى كانت فى اعتقاده ايجابيات ..

وبالتالى اصبحت شئ بشع......لاقانون له ..

لم يقم على اى ثوابت ...بل كان عبارة عن شئ اتى من لاشئ وتفرع ..

ونتيجة لهذه التفرعات نشأت عادات جديدة غريبة ...حاولوا ومازالوا ...يجعلوها اسس للنجاح ..

الفهلوة اساس النجاح...

التجارة شطارة ...

الاخلاص فى الحياة الزوجية ......عجز ..(( آه والله بيعتبروه قصر ديل ))..

الاخلاص والوفاء فى الحياة للأصدقاء والأقارب ...هبل وعالم فاضية عايشة فى الأوهام ..

اساس المعاملات اصبح ....ابجنى تجدنى ..

النفاق اصبح العملة المتعارف عليها .....وقول الحق اصبح عملة نادرة ..

لكن ؟؟؟

بلاش ياجماعة ننسى مجموعة .........النوع الأول ..

بمعنى ....

الخير موجود....ومش لازم هذه الفئة مهما (( توحشت كحشائش برية )) ..تطغى على الفئة الصالحة ...والصالحة جدا ..

الصبر...

الصبر....

ومع الأيام الصحية القادمة سوف تقتلع كل هذه الجذور الرديئة .

لأن المجتمع المصرى الحق ليس بيئة صالحة دائما لهم ..

اهم اسس الدستور هنا ...

حق كل مواطن فى الحصول على مسكن لائق..

حق كل مواطن فى المعاملة اللائقة ......وغيره كتير .

عندما يتم تعديل الدستور فى بلدنا ...سوف تتغير طبائع ناس كثيرة وسوف يعود الجميع مرة اخرى الى اسس المجتمع المصرى السليمة ..

مجرد دردشة حبيت ادردشها معاكم .........تحياتى ..

[mohamed]

حق كل مواطن فى المعاملة اللائقة ......وغيره كتير .

عندما يتم تعديل الدستور فى بلدنا ...سوف تتغير طبائع ناس كثيرة وسوف يعود الجميع مرة اخرى الى اسس المجتمع المصرى السليمة ..

الفاضلة سلوى

اسمحي لى ان اختلف مع حضرتك فى هذه النقطة

وجود دستور ممتاز من عدمه لن يجبر احد على التصرف بشكل سليم

وجود القانون وحده مهما كانت صياغته لا يكفل ضمان سيره بطريقة طبيعية

ولنأخذ على ذلك مثلا

نحن المسلمين عندنا القران والسنة المطهرة ورغم ذلك اخلاقيتنا ابتعدت عن كل هذا رغم اننا نقرا القران كل يوم

ليس المطلوب هو تعديل الدستور فقط لكن الاولى بنا تغيير طريقة التربية وتغيير طريقة التفكير

تقبلي تحياتي

[Salwa]

انا اقصد انه سيكون عامل مساعد ...بشكل اكيد.

مثلا....فى احيان قليلة يضطر البعض الى تغيير بعض عادتهم الأخلاقية المثالية ..بحجة الحاجة ..(( رأينا ذلك فى افلام كثيرة مثلا اب يريد ان يستر بناته اومضطر لذلك لاطعام اولاده او ..او..او..))...ابسط شئ يضطر للنفاق حتى يعيش .

اذا تم تعديل مواد كثيرة فى الدستور وأمن الفرد (( السوى )) احتياجاته الضرورية ...فبالتالى سوف يرتفع صوته وسوف يدافع عن حقوقه وسوف يتفرغ لتربية اولاده وسوف يكون لديه متسع من الوقت ان يعيش كانسان لايلهث وراء لقمة لاتسد حتى جوعه .

سيعلم اولاده اخلاقيات اجداده ...اخلاقيات تنتسب فقط لصفة الأخلاق الأصلية وليست اخلاقيات مكتسبة فى مجتمع الحاجة ..

بمعنى .........

ماذا تتوقع من انسان يجد نفسه مجبر او مضطر ان يعيش داخل وطنه فى خوف دائم ؟؟

الم تسمع عن فترة كان يتجسس فيها الأخ على أخاه ؟؟؟

الم تسمع عن الرشوة ؟؟؟...او عن ترقية موظف لايستحق الترقية لمجرد انه يتجسس على زملاؤه ؟؟

اذن.........

عندما لايستطيع الفرد كفرد ان يغير مجتمع ..فشئ من ثلاثة ..اما ان يقبل المجتمع كما هو ...او...يسخط عليه ....او....يتعلم التسلق.

اذن....

الحكم السائد ..هو الذى اجبر المواطن على اتخاذ موقف معين ..

وبالتالى ...ممكن تتغير أخلاقه ..

وانا مرة اخرى اقول ....ومقتنعة ...رغم كل القيم الدينية السليمة .

ان اخلاق افراد مجتمع دولة ما ...يتأثر لحد كبير بنظام الحكم والحرية وكل شئ ...

مع كل الاحترام لكل الآراء ..