يا رايح قول للجاي كسبناهم رايح جاي

[se_ Elsyed]

لأ ومش اي مكسب ده الزمالك شال 7 في الموسم ده من الأهلي ليكون اكثر فريق نحلق له

القاكم غداً عشان مش عارف اكتب من التليفون

محبط موديست امير قرصان سكوب وهاتوا معاكم محمد ابو زيد واي ززلكاوي خايف يفصح عن هويته ، تلموا بعض كده وتستنوني قدام باب المنتدى بكره الساعة 7 الصبح شارب

[محمد شلبى]

كسبناهم ايه يا عم؟

قول طحناهم, قطعناهم,دى اقل حاجة تتقال.

اجمل ما فى المباراة هو المكسب باقل مجهود,على الواقف.

احسن لاعب/ وائل جمعة

اسوا اخلاق / محمد ابو العلا

بس بجد اشد ما احزننى هو سب الجمهور لابراهيم سعيد بأمه,فهما حدث هو انسان وبشر ولا احد يطيق ان يهتف استاد كامل ويسبه بأمه , كان يجب على الجمهور تجاهله تماما وتشجيع فريقها فقد نال جزاءه وخرج من المباراة.

[Scorpion]

ايه ده... هو الماتش كان النهارده ؟ و كمان خلص 7 مش عارف كام...

إخص...

وش بربري مصر الوحيد و هو بيقول

أُخص.. سويدتوم ووشي.. اللهي ينكد اليكم...

يا هماتي... يا موراتي....

علي العموم بكل روح رياضية .. و كزملكاوي قديم..امد ايدي ليك ياسي السيد و أقوللك

تطفحوهم بالسم الهاري ....

[theblackpirate2005]

مبروك للاهلى

بس انا ليا سوال انتوا راضين للحصل لابراهيم سعيد

ربنا بيرحم وجمهور الاهلى مش راضى يرحم

انا والهى مزعلتش على الهزيمه انا زعلت على ابراهيم سعيد بس عشان مفيش حد يستحمل اللى هو استحمله طول المباره

ده اتظلم فى الاهلى وحظه ظلمه فىا لزمالك انا عارف ان ده مش سبب الهزيمه بس انا حبيت اذكر الحكايه دى عشان عايز اسمع تعليقكم

[Tamsite]

بس بجد اشد ما احزننى هو سب الجمهور لابراهيم سعيد بأمه,فهما حدث هو انسان وبشر ولا احد يطيق ان يهتف استاد كامل ويسبه بأمه , كان يجب على الجمهور تجاهله تماما وتشجيع فريقها فقد نال جزاءه وخرج من المباراة.

لم يكن ابراهيم سعيد هو المقصود ، و انما ابراهيم يوسف ، ثم تلاه ممن نالوا السباب أحمد رمزي

و السبب في هذا الكم من السب ، هو التصريحات الاستفزازية التي أدلى بها كلامها أثناء التحضير لهذه المباراة، و قد قصدا بذلك هز معنويا ت لاعبي و جمهور الأهلي ،و هو ما تسبب بشكل غير مباشر في انهيار لاعبي الزمالك في الشوط الثاني من المباراة و الصحوة الهائلة للاعبي الأهلي، بالاضافة الى استثارة جمهور النادي الأهلي الذي رفض تماما هذه التصريحات الغريبة التي لا يجوز أن تصدر عن المدرب العام و المدير الاداري لنادي الزمالك

عموما هذا السباب و غيره في مواقف أخرى ( مثل سب اللاعب السابق و المدرب الخلوق طه بصري المدير الفني لنادي انبي أثناء مباراته مع الأهلي في الدور الأول بسبب حدوث سوء فهم لدى بعض الجماهير ) هو أشد ما يحزنني من جمهور الأهلي العظيم - و الذي أنتمي إليه - والذي يقف دائما مع فريقه في السراء و الضراء ، و أبلغ دليل على ذلك سبع سنين دوري ثم أربعة سنين عجاف ثم هذا الموسم الذي هو بحق أفضل مواسم النادي الأهلي عبر تاريخه، نجد دائما جمهور الأهلي خلف فريقه في كل المواقف

مبروك للنادي الأهلي و جمهوره هذا الفوز المستحق بالدوري و بالمباراة ، و حظ أوفر لنادي الزمالك و جماهيره التي أصبحت مطالبة بالوقوف بجانب فريقها لينهض مرة أخرى و يزيد من ذخيرة المنتخب الوطني من اللاعبين

--------------------------------------------------------

على فكرة يا سكوب ، الماتش خلص 3- صفر بس

[Tamsite]

مبروك للاهلى

بس انا ليا سوال انتوا راضين للحصل لابراهيم سعيد

ربنا بيرحم وجمهور الاهلى مش راضى يرحم

انا والهى مزعلتش على الهزيمه انا زعلت على ابراهيم سعيد بس عشان مفيش حد يستحمل اللى هو استحمله طول المباره 

ده اتظلم فى الاهلى وحظه ظلمه فىا لزمالك انا عارف ان ده مش سبب الهزيمه بس انا حبيت اذكر الحكايه دى عشان عايز اسمع تعليقكم

عزيزي القرصان :

أولا : الله يبارك فيك ، و هارد لك ، و هي دي الروح الرياضية اللي المفروض تبقى سائدة بين المصريين المشجعين لكرة القدم و أي رياضة أخرى ، أهلاوي و زمالكاوي و اسمعالاوي ..........الخ

ثانيا : مستحيل يكون انسان سويّ و رياضي الأخلاق و العادات و الروح راضي عن سب أي انسان في أي محفل رياضي و أكرر رياضــــــــــــــي ، و لازم احنا كمصريين نفهم كده بقى عشان الدنيا و العالم الخارجي ما يضحكش علينا

و أنا فعلا كنت حزين ، و ما زلت باحزن جدا لما بشوف الظاهرة دي في الملاعب المصرية

و دي بتحصل من أي جمهور مع الأسف الشديد ، مش عشان دول أهلاوية يبقوا قللات الأدب ، و دول زمالكاوية يبقوا ماتربوش ، و بتوع المنصورة باردين ، و المحلة معرفش ايه .......

ماهو العجينة واحدة يا صديقي ، مش هما كلهم في الآخر مصريين ، و منصهرين مع بعض و بيتعاملوا مع بعض في كافة صور و أشكال الحياة اليومية ؟؟؟؟؟

تبقى دي ظاهرة في الجمهور المصري عموما يا صديقي ، و لازم يتوضع لها حد ، ده لو عايزين ننضف نفسنا و شكلنا اللي اتمرمط قصاد الدنيا كلها

مش كده و لا ايه يا عزيزي

تحياتي و تقديري .............

[se_ Elsyed]

جميعنا يستهجن ويُنكر ما حدث من بعض الجمهور ضد إبراهيم سعيد ..

ولكن

إذا عُرف السبب بطُل العجب ..

فلم أستطيع النوم حتى شاهدت برنامج الكره مع دريم الذي إنتهى الساعة الثانية صباحاً ... وساعتها عرفت الجمهور عمل كده ليه في إبراهيم أفندي أبو ديل ... أصله بعيد عنكم اتهبش في مخه زيادة وكان نازل الماتش عامل ديل حصان ورابط شعره بأستك زي الحريم ... الأغرب من كده بقى وسبب كل البلاوي إنه أستفز الجمهور بشكل غريب قبل المباراة مباشرة بنزوله ومعاه علب إسبراي من اللي الواد عمر إبني بيجيبهم في اعياد الميلاد ويرشهم على اصحابه ... وراح نازل بملابس غريبه وخالع فانلته الزملكاوية وحاططها على الأرض ويعمل تعظيم سلام وحركات عبيطة أمام الجمهور ليُثبت ولائه لناديه الجديد ...

فليه كده ولحد أمتى هايفضل مجنون وما حدش يقول له إن كده قلة أدب ؟

وختمها ختام منيل بستين نيلة بأن فقد أعصابه بعد الاهداف الثلاثة وأعطى الولد الغلبان شادي محمد نوك آوت طرحته أرضاً فقام الحكم بطرده .. وطلع من الملعب بدون ان ينبث ببنت شفاه ( حلوه البتاعة دي كان نفسي أحشرها في أي جملة من زمان ) لإنه عارف المصيبة اللي علمها وبالتأكيد إتحاد الكوره هايظبطه ...

وشارك في تلك المهزلة وساعد على هزيمة الزمالك قبل المباراة تصريحات غير مسئولة من إثنين مسئولين المفروض إنهم كبار في جهاز نادي الزمالك وهما أحمد رمزي وإبراهيم يوسف اللي فاكرين نفسهم لسه لعيبه وبالتالي من حقهم يهلفطوا في الكلام ويُثيروا الجماهير بتصريحات عبيطه لا تصدر إلا عن رواد المقاهي ..

فبعد ما قالوا هما الأثنين إن إحنا هانلقن الأهلي درساً لن ينساه .. وموعدنا يوم 12 ومش عارف إيه وأديهم أتغلبوا شر غلبان أهم ... إزي الحال بقى ؟

إذا كان الاهلي في عز تألقه مستحيل تصدُر حتى عن عامل غرف الملابس مثل تلك التصريحات العبيطة ... لإن كرة القدم كل شيء فيها وارد وممكن تبقى في قمة مجدك وتنهزم ... إيه المشكلة في كده ؟

الزمالك زي ما قلنا أتهزم قبل المباراة وتحديداً من القلق والمهاترات اللي حصلت في معسكر الإسماعيلية وتغيير المعسكر وبعدين الإستقرار في المعسكر والشكوى إن ما فيهوش صالة جمنزيوم كويسه .. مع انه عسكر هناك عشروميت مره .. ثم إصرار كابرال على تعيين الدكتور عبد العزيز النمر كمدرب احمال ولياقه بدنية ... ثم إتهام الكثيرين له بانه عميل للأسرة السادسة الاهلاوية وإنه جاي يبوظ اللعيبة ... ثم وقوف كابرال في وجه المتآمرين وإصراراه على الدكتور النمر الذي يشهد له الجميع بالكفاءة ...

ومش عارف برضوا ليه نادي الزمالك هو اللي بيحصل فيه كده ؟ كل الدنيا بيحصل فيها معسكرات للإبتعاد عن أي مؤثرات خارجية يُمكن أن تُخرِج اللاعيبين عن تركيزهم ... فإشمعنى نادي الزمالك ؟ ومين الجواسيس اللي جوه النادي وبينقلوا كل نفس بيحصل جواه حتى لو أكل اللعيبة رز وبسلة تلاقي الجرايد خرجت في الطبعة المسائية تنقل الخبر وتذيعه على الملأ ؟..

[se_ Elsyed]

الغريب بقى إن مسئولي الرياضة الأشاوس أصروا على إقامة مبارة القمة بين الاهلي والزمالك بس في كره السلة إمبارح برضوا وفي نفس الميعاد ويا ريت ماتش واحد دول ماتشين الفريق الأول وفريق الناشئين اللي بيلعب قبل مباراة الكبار ..

وبرضوا الاهلي اكتسح ففرقتي الزمالك بنتيجة كبيرة

أستطاع فريقا الأهلى كبار و ناشئون الفوز على الزمالك فى الدورى العام لكرة السلة ففاز الفريق الأول 74-70 و فاز الفريق المرتبط بنتيجة كبيرة 85-49 ليواصل الأهلى تربعه على قمة دورى السلة

يا مسئولي نادي الزمالك مطلوب منكم وقفة جادة إذا كنتم تريدون حقاً مصلحة نادي الزمالك ...

[kotoz9]

يسلم فمك يا سى السيد....ابراهيم سعيد عمل حركات استفزازية لجماهير الاهلى وقل ادبه....لو هو عايز يبقى محترم من الجماهير كان لازم يعامل الجماهير باحترام....

حكاية الشتيمة دى متوقعة من قبل الماتش ومسؤلى الزمالك قاعدين يسكبوا عليها بنزين بتصريحاتهم الاستفزازية.بس انا برضه بقول كان لازم الجمهور يلتزم ويتجاهلهم علشان حتى شكلنا ما يبقاش وحش....

عموم الاهلى كالعادة طحن الزمالك المسكين رايحج جاى ....تعيشوا وتخدوا غيرها

[moody00x]

fsh:: fsh:: :D ;)

[moody00x]

ازاي اصلا ممكن جماهير تثق بواحد زي احمد رمزي باخلاقه دي

وازاي واحد زي ابراهيم يوسف يكون محل ثقة

الناس دي اصلا حولو المباراة لحرب من حوالي اسبوعين

وعصبونا جدا وصدقوا كلامهم كمان

وانا مش بقول ان احنا كنا ضامنين الماتش

مافيش حاجة مضمونة والشوط الاول كان ممكن جدا

يغير نتيجة المباراة كلها

لكن الى انا عايز اسئله بس

ليه حركات العيال دي؟

والتحدي وهانمسح بيكم الارض

وانتم اقزام زي ما واحد مسجل امبارح نرفزنى

وبيقولك بكره نشوف مين اقزام

والبيه رمزي الى قالك فريقي احسن فريق فى مصر فى كل ا لمراكز

والاهلي فريق ضعيف

وعمال يغلط فى الكبير والصغير

طيب ازاي؟

دا انتم مغلوبين من طوب الارض فى الدوري؟

فشئ طبيعي جدا لما واحد زي احمد رمزي

وابراهيم يوسف يعملوا كدة ويمشوا

هما اصلا نفسهم الاهلي يتغلب

مش الزمالك يغلب

ملحوظة بئا

سمعت صوت الاخ مقرئ المياتم حماده امام

ايه الارف دا

حرام يعنى والله العظيم كده

يعنى اذا مكانش قادر يمارس عمله كمذيع محايد علشان انتمائه خلاص

نجيب اى حد تانى

لكن مايكونش التعليق بالطريقة دي

والله العظيم حسسنى انى فى ميتم او ان مصر بتلعب ضد اسرائيل

مش معقول ولا جول من الثلاثة مرة واحدة يقول حتى جول بفرح

كل مرة يقول جول وتحس بالالم والحزن والكئابة تعتصر قلبه

انا عارف ان جماهير الزمالك بتكره مدحت شلبي

خلاص نجيب اى مذيع تانى

لكن مش معقول نحرق دم ملايين علشان يتقال محايديين وبتاع

يا يمارس عمله بحيادية

يا يبطل تعليق خالص ويريحنا

مش ممكن الكأبة الي فى صوته دي

مبروك مرة اخرى

ودايما فوز ان شاء الله

تم تعديل 13 فبراير 2005 بواسطة moody00x

[se_ Elsyed]

مودي حمد الله عالسلامه ...

- تعليق على موضوع حماده إمام .... الراجل يا جماعة تعبان جداً وكل شويه في العناية المركزة ... ربنا يشفيه .. فمش معقول بعد ده كله أخليه يذيع ماتش زي ده وعندي واحد عملاق حمض من الراكنه إسمه ميمي الشربيني وأظن الزملكاوية قبل الأهلاوية يتفقوا على إنه موسوعة وراجل محترم بغض النظر عن إنتماءه .. وأبوا حازم جابلي زغطه أمبارح لما رفض رفضاً قاطعاً إنه يقول إن الهدف الأولاني صحيح مع إنه المفروض إنه كان بيذيع من الملعب وشايف الحكم شاور على منتصف الملعب ولا لأ وأخونا يسري مرزوق الله لا يبارك له ... خلى عماد متعب جاب الجون وراح بالكاميرا مش عارف فين .. وعمنا أبو حازم عمال يقول أما نشوف الحكم حسبها إيه وتركونا في دائرة الشك ماحناش عارفين حاجة ..

فيا جماعة الوسطية حلوه .. فلا مدحت شنبي المتعصب سليط اللسان ينفع ... ولا أبو حازم ربنا يطول في عمره ينفع .. ولا الجمهور ولا الأهلي ولا الزمالك نافع .. وأحسن بقى نروح نشجع مصارعة نسائية ..

حاجة تقرف بجد ..

وهاموت وأفهم الجملة اللي بيرددوها قبل كل ماتش قمة ويقولك " بس يا جدع إنت وهو .. إحنا بالصلاتو عالنبي هاننقل المباراة بثمانية كاميرات !!!!!! بتقول كام يا عم ؟ 8 كاميرات ... يعني هانلعب بالكاميرات لعب ... يعني هاشوف ماتش أوروبي أو حتى سعودي وأتمتع بالنقل الحي ؟ ..

يبدأ الماتش وأُجيب زوجتي وعيالي جنبي ونفضل طول الماتش نعد في الكاميرات وألاقيهم إتنين عُمي زي ما هما ... واحده في مدرجات الدرجة الأولى والثانية تحت على الأرض جنب الإحتياطي .... واعتقد إن الستة الباقيين المخرج بياخدهم البيت يصور عياله وعيال الجيران ..

مش بأقولكم حاجة تقرف ...

[se_ Elsyed]

الوصف التفصيلي للمباراة من وجه نظري ..

- تعرفوا يا جماعة بجد ماتش إمبارح فكرني بإيه ؟

قولوا بإيه ؟

- طبعاً غالبيتنا أتفرج على فيلم " البحث عن نيمو " أو Finding Nemo وشاف الحتة لما أسماك القرش قررت تتوب وتبطل إفترا على مخلوقات الله وصاحبت شويه سمك بساريه صغير على جمبري وبقوا رايحين جايين مع بعض وفجأه أتهفت في عقلها ورجعت لطبيعتها المتوحشة وقررت تاخد السمك على خوانه وتفترسه بدون رحمه ...

أهو ده بالظبط اللي حصل أمبارح .. الفريقين نازلين ومتفقين على إن " يا نحله لا تقرصيني ولا عايز عسل منك " وإحنا يابا نضحك على الجمهور وناخد فلوسهم ونهمبك شويه وكفى الله المؤمنين القتال ... وكانوا بدون أي دوافع تخليهم يقدموا كره حلوه .. قعدوا الشوط الاولاني كله مقضينها عك كروي وتشليت وكإنه فريق سلاح القذف العشوائي بالقوات المسلحة ، وغلطات من عمك عصام الحضري ودفاعه .. وعبد الواحد السيد ورجالته والكوره قعدت دقائق محصورة في نص الملعب واللعيبه بتوع الفريقين عمالين يباصوها لبعض بالراس في منظر عجيب وجت الكاميرا على الجمهور اللي حس إنه أتلزق على قفاه واتنصب عليه ... لدرجة في نهاية الماتش نفسي ماعت عليه وقولت لأم عمر أعملي لي كوباية لمون مغلي بنعناع - والله العظيم بأتكلم جد -

شربت الكوكتيل العجيب ده وبدأ الشوط الثاني وأبتدى تأثير الكوكتيل يشتغل والفريقين بقوا شويه عايزين يعملوا حاجة .. وهوب الفك المفترس إفتكر إنه مرعب وزنق نيمو في الكورنر وفين يوجعك وخلص عليه في 10 دقائق بالتمام والكمال وكيل له 3 ضربات قاضية .. وكل ما نيمو ييجي يقوم عشان يقول له إحنا ما اتفقناش على كده يا فك يا مفترس يروح مشنكله ومكمل عليه وقايل له أنا ماعرفكش ياه ..

قام نيمو بعد الثلاث ضربات وحاول يتحنجل شويه في الحلبه عشان يضيع وقت وراح مسلط واحد من السُبيط بتوعه عشان يبوظ الماتش وراح السبيط أبو ديل عاضض راجل من رجالة الفك وبعدها انطرد شر طرده ...

وخلصت المعركة وزادت جراح نيمو ومابقاش في حته في جتته تتخيط وبقى مخربأ زي المُنخل ... ووقف الفك المفترس وسط الحلبه ليزأر ويقول " هل من مبارز " .

[محمود الأهلاوى]

أنا عضو جديد و أكتر حاجة أقولها : أووه..... أووه الزمالك مرماطوه

[se_ Elsyed]

أنا عضو جديد و أكتر حاجة أقولها : أووه..... أووه الزمالك مرماطوه

إزيك يا حوده ...

يا عم إهدا شويه مش من أولها داخل شايط كده ...

وخلي بالك الضرب في الميت حرام .. وكفاية عليهم اللي هما فيه ..

معليش أنا أسف يا زملكاوية ... الكابتن محمود لسه ناشيء وإنتوا عارفين حماس الشباب :blink: