هل اتركها ....ام اتمم الزواج.....محتاج مساعده

[eryocool]

السلام عليكم ورحمة الله وبركاته

مشكلتي باختصار

لا استطيع ان احب خطيبتي وزوجتي المستقبليه بالقدر الكافي

انا طبيب شاب قمت بخطبة طبيبة علي قدر عال من الوقار والاحترام والاخلاق والاهل لا نزكيهم علي الله

هي متعلقه بي

لكني لا استطيع ان ابادلها نفس القدر من الشعور

لا احبها رغم كل صفاتها

لا اعرف ماذا اعمل هل اتركها لكني اخاف ان تنكسر لانها تعلقت بي جدا

واخاف ان اجرحها لانها طيبه جدا

ام ماذا افعل

علما اني لم اخطب من قبل والحمد لله ملتزم واصلي واصوم ولم اعرف فتاة من قبل وهي اول فتاة في حياتي

صليت استخاره اكثر من مره لكني احساسي تجاهها لا يتغير وصدري لا ينفرج

بعض الاحيان احس بشوق وبفرحه وانا احدثها

وبعض الاحيان احس باني تسرعت واتهرب من الكلام معها

وعندما احاسب اراجع نفسي لا اجد فيها اي عيب

غير ان قلبي ليس متعلق بها

مع العلم اني مقيم بالخارج وهي بمصر

هل هذا حسد ام ماذا

__________________________________

علما اني مقيم بالخارج واعود كل سنه فترة شهر اجازه

فلضيق الوقت قام اهلي باختيار اكثر من فتاة

وتم الامر في خلال ايام قليله

لكن منذ الاسبوع الاول بعد الخطبه

وانا احس بهاجس اني تسرعت وانها ليست الفتاة التي في بالي

لا اعرف ماذا افعل

ولا اريد ان اتخذ قرارا واندم عليه

ارجو الافاده

جزاكم الله خيرا وجعله في ميزان حسناتكم

_______________________________

_______________________________________

________________________________________________

الذي يؤلمني انها من عائلة طيبة وجيدة ووالدها طيب ووالدتها ايضا وهي حنونة وتحبني كثيرا... ولكن فجأة وجدت نفسي غير منجذب اليها حتي اني لا استطيع ان اقول لها كلمة جيدة فعندما تقول مثلا اشتقت اليك لا استطيع ان ارد عليها وأكتفي بقول شكرا حتي انها لاحظت ذلك ...

حاولت كثيرا ان اكون جيداً معها ولكن شيئ في داخلي يمنعني فعندما اكون غير مقتنع بشئ لا استطيع ان اخدع من أمامي فأنا صريح ...

احس ان مستقبلي ليس معها أو انها ليست النوع الذي اريد ان اكمل حياتي معة ... وهذا الأمر جعل حياتي شقاءاً وبأسا لاني ببساطة لا احب ان اجرح مشاعر من أحبني ولأنني لو تركتها اعتقد ان هذا سيترك اثرا كبيرا في نفسها وسيسبب لها عقدة نفسية ... لا اعرف فهذا ما افكر فية ويمنعني من انهاء الموضوع...

حاولت كثيرا ان اقنع نفسي بالاستمرار وأقول لنفسي مثلا لتحفيزها انك لن تجد ابدا من يحبك بهذا الشكل او انك لن تجد نسب جيد هكذا في المستقبل الا بصعوبة وأشياء أخري ولكن ايضا داخلي غير مقتنع ابداً ...

واخيرا

هل عدم راحتي للامر بعض الاستخاره به اي دلالة من الله ام ماذا

شكرا

[AbuZeyad]

بما انك خارج مصر ومش عارف تاخد قرار مصيري زي دا

طيب ما تحاول تاخد اجازة طويلة شوية شهرين تلاتة مثلا وتحاول تتعرف على خطيبتك بصورة اكبر

لو ارتحت لها خير وبركة

لكن لو لسة مش مرتاح فيها كلام تاني

تم تعديل 7 أبريل 2013 بواسطة AbuZeyad

[tarek hassan]

اعتقادي أنك ستتركها إن عاجلا أو آجلا ... فلا تظلمها وتتزوجها وأنت كاره لها ... اتركها عساها تجد من يحبها ويقدرها .... ما ذنبها في أن تتزوج رجل لا يحبها ويعترف بذلك .... ولا تظلم نفسك أيضا وتختار لنفسك التعاسة والشقاء .... الآن رغم كل ما تقول ستكون الخسائر قليلة ودرء مفسدة زواج ليس فيه قبول مقدم على جلب مصلحة الزواج ..... إن كان ضميرك لا يسمح لك بأن تظلم إنسانة فلا تظلم إنسانا آخر هو نفسك ..... رأيي ان تتفرقا وانتما على البر عسى اأن يغن الله كلاكما من سعته فكلف من يحسن عرض الموضوع بالتدريج دون أي إهانة ومع حفظ للطرف الآخرمكانته ... والله أعلم

تم تعديل 7 أبريل 2013 بواسطة tarek hassan

[eryocool]

السلام عليكم

شكرا لكل الردود المحترمه

انا قررت اخد اجازه اسبوعين الفتره القادمه

بحيث اجلس معاها فتره اطول

واقرر بعدها

لكن المشكله القرار صعب

خايف اندم بعد كده

لان اهلي بيحبوها جدا وعلاقتهم كويسه مع بعض

وكل الناس بتقللي العيب مني انا وان الحب والعشره حتيجي بعد الزواج كده

خايف اندم وملاقيش حد بالصفات والاخلاق دي

وشوية اقول الموضوع نصيب

وكده كده نصيبي ربنا حيكتبهولي

مش عارف اعمل ايه

غير اني بدعي ربنا يفرج همي

ارجو ممن قرأ مشكلتي يدعيلي بظهر الغيب

جزاكم الله خيرا

تم تعديل 7 أبريل 2013 بواسطة eryocool

[eslam elmasre]

اتركها وتوكل على الله

ماحدش بيتجوز حد غصب عنه والمثل بيقول كله بالخناء الا الجواز بالاتفاق ودي احتياج انساني ولايمكن هاتاكل حاجة غصب عنك ولا هاتتجوز واحدة غصب عنك

ودعك من تأثير المحيطين بك فهم لن ينفعوك ولن يسعدوك ولن يعيشو معها مثلك ومهما كانت حتى لو كانت ملكة جمال وكل الصفات الحلوة فيها طالما انت مش حاببها مش هاتكمل الجوازة دي وهايحصل مشاكل ووجع قلب لانك مش حابب البنت من اساسه فكيف بالله عليك هاتكمل جوازك والمفروض ان دي شراكة معمرة وليست قابلة للنقض

اما انك تكمل شفقة عليها من الصدمة فاعرفك ان ما حدش بيموت من الحب والدنيا هاتمشي وانت هاتلاقي رفيقة حياتك وهي هاتلاقي رفيق حياتها

ووجع ساعة ولا وجع كل ساعة لانك واضح انك عايش في جحيم وتخيل برغم كل المسكنات وترغيب الاهل فيها الا انك مابتنمش الليل وحاسس انك كئيب وحياتك جحيم

اسمع كلامي انا مريت بنفس التجربة بالظبط ولما اخدت قرار بانهاء العلاقة وجدت معارضة من اهلي شديدة رغم ان البنت كانت متعلقة بي جامد وما كانش فيها حاجة تعيب خالص لكن القلب و مايريد

واخدت قراري بدون رجعة وحصل صدمة ليها لكنها لم تمت وتزوجت في ما بعد وانا مثلها

اما انك خايف تلاقي مواصفات مثل تلك فالفكرة مش فكرة مواصفات لكن فكرة القبول وده مش موجود اصلا وده يعتبر او العقبات الزوجية فلو تواجدت فلا يمكن اكمال الزيجة

تحياتي

[eryocool]

جزاكم الله كل خير

بالحديث عن القبول

انا لا اكرهها لكن لا احبها ذاك الحب

مثلا

اخي خاطب... دائما يتلهف لخطيبته وبيتكلوا بالساعات وكل يوم عند اهلهافي البيت

وبيخرجوا ويروحوا وييجوا

لكن انا مش حاسس بسعادة المخطوبين

وساعات بتهرب من الكلام في التلفون

ساعات بقول كلام حلو لكن من غير احساس

بس في نفس الوقت

كاني مريض نفسي او عندي انفصام في الشخصيه

لاني اوقات لما اقعد مع نفسي اقول انا عايز مواصفات ايه تاني اكتر من كده

يعني هي القصه بس

انا مش عارف احبها

ومش حاسسها ماليه حياتي كده

ولا سعيد سعادة المخطوبين

بس في نفس الوقت مش عايز اسيبها

ومتردد

هل حد مر بتجربة زي دي قبل كده

معلش استحملوني

[eryocool]

لا اله الا انت سبحانك اني كنت من الظالمين

[eryocool]

لا اله الا انت سبحانك اني كنت من الظالمين

لا اله الا انت سبحانك اني كنت من الظالمين

[nermoo]

موضوع محير فعلا خصوصا ان المشاعر الطيبة بتكون نتيجة للاخلاق والمعاملة

حتي لو الانسان حس بقبول لشخص معين وبعدين اكتشف فيه صفات مش كويسه

بيتحول القبول ده لنفور وبعد

رأيي ان كل ما تركز علي المشاعر السلبيه والاحساس بعدم القبول للانسانه دي

كل ما الاحساس ده هيزيد عندك ركز علي صفاتها واخلاقها ومعاملتها

واترك التفكير في الاحساس ده خالص كل ما يجيلك فكر في شيء تاني

اعمل كده فترة معينه وشوف نفسك احساسك اتغير ولا لسه ذي ما هو

وخليك متأكد مدام عملت استخارة وفوضت امرك لله بصدق اكيد

اللي هيحصل اختيار ربنا ليك واكيد هو الخير

ربنا يوفقك للخير بأذن الله

[ذهبية]

ممكن اسالك شوية اسئلة

هل ليك علاقة سابقة لم تخرج من حياتك بعد ؟؟

هل هناك شىء تتمنى وجودة فى خطيبتك لم تجدة ؟؟؟

هل انت بطبيعة شخصيتك عاطفى ام عقلانى و عملى ؟؟

هل التردد سمة فى حياتك كلها ام خاصة بهذا الموضوع فقط ؟؟

لو هناك قصة سابقة فانسى انك تلاقى هذة المشاعر مع خطيبتك او غيرها حتى يلتئم الجرح بعد فترة

لو هناك شىء تاقص فى شخصية خطيبتك حدد اهمية

يعنى هات ورقة و قلم و اكتب فيها انا احب صفات زوجتى تكون اية

و شوف خطيبتك تاخد قد لية منها

لو حضرتك عاطفى يبقى افسخ خطوبتك فورا لانك لن تشعر معاها بالحب و لن ياتى بعد الزواج

لو حضرتك عقلانى جرب الورقة و القلم

لو التردد سمة فى حياتك و اى قرار بتاخدة يبقى كمل فى الزواج فورا

لانك لو فسخت الخطوبة دى لن تتزوج مرة اخرى سوف يظل المقارنة و التردد و فى حياتك الى اخر العمر

و اخيرااا صلى صلاة استخارة ربنا ينور بصيرتك للصواب

[عبير يونس]

أخي الفاضل

حضرتك خايف عليها من صدمة فسخ الخطوبة

و مش خايف عليها من صدمتها أنك مبتحبهاش ؟؟؟!!

طبعا الجوازة دي مش نافعة

أنا لو مكانها و أعرف بعد كده ان خطيبي اتجوزني عشان ما يجرحنيش حيبقى ده جرح العمر بالنسبة لي

و ده اكيد حيبان بعد الجواز يعني مهما حاولت تخبي

مش فاهمة هي ازاي متعلقة بيك و مش حاسة انك مش معاها و في دنيا تانية !!!!!!!

المواصفات مش كل حاجة في الدنيا

ما دمت مش سعيد بالانسانة نفسها ..يبقى ايه فايدة مواصفاتها ؟؟؟؟؟؟؟؟!!!!!!!!!!!!!

اوعى تستجيب للضغوط حواليك

مش همة اللي حا يعيشوا ..انت اللي حتعيش

و ان مكنتش مرتاح من البداية صدقني اللي جاي حا يبقى اسوأ و اسوأ

لو بتتمنى الحب و السعادة في الحب و عايزها بجد ..أكيد حتلاقيها و لو بعد حين

ده رأيي بكل يقين و طبعا لازم تستخير

مش عشان اه والا لا ...لكن لتيسير الأمر عليك وعليها و على الأهل والموضع ينتهي بسلام

ربنا يرزقك بزوجة تحبها وتحبك

آمين آمين آمين

تحياتي

[eryocool]

...............................

تم تعديل 9 أبريل 2013 بواسطة eryocool

[eryocool]

ممكن اسالك شوية اسئلة

هل ليك علاقة سابقة لم تخرج من حياتك بعد ؟؟

ليس لي علاقة مطلقا

ولم اعرف حد لا نت لا قرايب ولا صحبات ولا حبيت حد قبل كده خالص

وعمر ما كان ليا شاعر تجاه حد خالص

هل هناك شىء تتمنى وجودة فى خطيبتك لم تجدة ؟؟؟

_______________

بس قاعد احسبها بالعقل شويه اليوم

احلل المزايا والعيوب بنظره مستقبليه

انا عايز ايه من زوجتي

هي كزوجه احسبها ان شاء الله تكون طيبه وصالحه ومسؤله يعني

وبتحاول ترضيني

وكل الناس بتشكر فيها لانها جارة اخويا

ملهاش طلبات كتير ولا طماعه

بتحترم اهلي وواخده عليهم لظروف سفري ودي في حد ذاته حاجه كبيره

اهلي بيحبوها ومتمسكين بيها وده في حد زاته اكبر ادام ومستقبلا

_____________

بس بحلل عيوبها برده

ويا ريت لو تقولولي العيوب دي كافيه للفسخ

ولا ممكن تتعدل بالوقت

مع العلم اني عمري ما عرفت بنت ولا كلمت بنت ولا نت ولا غير نت ولا قرايب حتي ولا حبيت حد قبل كده

1_هي طيبه زياده لدرجة السلبيه ومعندهاش خبره كبيره في الحياه زي اهالينا كده

بقلها مثلا نقي البياض السيراميك

ايه رايك في كذا....تقول اللي تشوفه اللي تجيبه اللي تعمله وكده يعني مش مشاركاني كده

انا عارف انها طيبه بس ساعات بحس اني عايز احس انها شريكتي كده

حتي لما خرجنا نجيب الدهب منقتش ولا طلبت

ساعات انا بكون عايز احس اني جبتلها حاجه تفرحها يعني لكن هي ملها راي في اي حاجه ساعات ببقي عايز احس احساس الخطاب

يعني كشخصيه كده مش ماليه عيني اوي

او مش شداني بشخصيتها واراءها وكده

هل ده يتغير مع الوقت

وازاي اغيره

ولا صعب يتغير

ولا هل ده افضل بعد الجواز

انا مش عارف

2_انا الصراحه كنت راسم صوره في خيالي لجمال مراتي زي اي شاب الصراحه

هيا كل الناس بتقول عليها جميله حتي اهلي واخواتي وقرايبي وانا اول نظره ليها عجبتني يعني

بس الامر تم بسرعه و

الخطوبه تاني يوم شفتها علي طول

بس انا ساعات بحس انها اقل من اللي كان في دماغي

هي حلوه برده لكن مش اللي كان في دماغي

ساعات مش بحس بالرضا ولا النجزاب كده

الشباب ممكن يفهموا اكتر الموضوع ده

3_انا لما بتكلم ساعات بكون حاسس بانكسار نفسي وعاطفي كده

مبتتكلمش كتير ولا بتحكي حاجه

وهي شخصيتها ممله شويه بعيدا عن الادب

وبستتقل المكالمه

وهما في بيتهم طبعهم غير طبعنا

هاديين اوي ومملين ومش اجتماعيين ولا بيخرجوا هنا ولا هنا بعيدا برده عن الالتزام

عكس شخصيتي خااالص

فانا خايف حياتي تكون ممله وكئيبه بعد الزواج

خصوصا اني مسافر وحتكون معايا لوحدها

4_ انا الصراحه كنت راسم صوري لخطيبتي وشريكتي واهلها

ان انا اكون مقبل علي تجربه جديده وحياة جديده

فكنت مستني حد يضيف ليا اي جديد او يغير حياتي كده واسره وعيله جديده

بس مش لاقي كده او مش حاسس بكده لسه

مش عارف اشرحها ازاي

بس يا ريت تفهموما او تتفهموها

يعني مش عارف اقولها ازاي

بس اهلها مش ماليين عيني كده

رغم انهم اجتماعيا وماديا اعلي مننا

بس انا مش حاسس كده تجاههم اني جزء من اسرتهم

اخويا مثلا بيقول لحماته وحماه بابا ماما

انا مش حاسس تجاههم الموضوع ده مع انهم محترمين جدا جدا واهلي بيحبوهم جدا

مش عارف هل ده سبب اصلا ولا ايه

5_ انا اخي خاطب ربنا يهنيه هو وخطيبته

ساعات بقارن حالي بحاله وليس البنات

اقارن حالي بحاله

هو من وقت ما خطب وهو حاله اتغير وكل يوم عند خطيبته ومكالمات بالساعات

انا علي العكس

من ساعة ما خطبت

وانا مش حاسس بالفرحه اللي المفروض يفرحها اي خاطب

ده حتي بيبها رغم انه بيتشكي من طباعها واهلي مش بيحبوها اوي

بس رغم كده هو متعلق بيها جدا

هل ده عيب فيا بقي ولا شئ نفسي من الاقبال علي حياة جديده ومسؤليه وكده

ولا دي علامه علي عدم القبول

واخيرا

يعني رغم المميزات اللي فوق

بس اكتر العيوب

هو عدم انجزابي لها وفرحتي بالخطوبه

لكن احساس كده مش حب بمعني حب

بس مش عايز اقول شفقه

بس باقول اهي طيبه وكده وخلاص

فاهمني يعني

بس خايف اعلقها بيا واجي في خطوه ادام مقدرش واضطر اسيبها وتنجرح

ولا انتوا شايفين اتوكل علي الله وكل ده حيزول بالايام

معلش طولت عليكم

ممكن ناس تقول انا سطحي وبرفس النعمه

بس ده يا جماعه مشروع زواج

وكده وعمر وحرام اظلم حد معايا ولا اظلم نفسي

والصراحه برده من كلامي

حتلاحظوا اني مش عارف انا عايز ايه

ولا احكم ولا اقرر ازاي

وجزاكم الله خير

ونور طريقكم وبصيرتكم

واسالم ليا الدعاء بظهر الغيب ربنا يرشدني لما فيه الخير

هل انت بطبيعة شخصيتك عاطفى ام عقلانى و عملى ؟؟

انا صراحه عاطفي جدا

بس مش لدرجة مش بفكر بعقلي

بس انا برده عاطفي الي حد ما

او نفسي اعيش في حااله مش لاقيها

لن بطبيعة شغلنا وحياتنا

بنكون ناس عمليين بس العاطفه لسه موجوده

وتنصحيني بايه

هل التردد سمة فى حياتك كلها ام خاصة بهذا الموضوع فقط ؟؟

الترد في الموضوع ده بس

اول مره اكون مش عارف اقرر كده

لكن عموما في حياتنا في امور كتير بنفكر فيها اكتر من مره

وبنحتاج ونستشير الغير

لكن انا مش متردد بطبعي

علي العكس

انا سريع في معظم قراراتي لدرجه التسرع

لو هناك قصة سابقة فانسى انك تلاقى هذة المشاعر مع خطيبتك او غيرها حتى يلتئم الجرح بعد فترة

لو هناك شىء تاقص فى شخصية خطيبتك حدد اهمية

يعنى هات ورقة و قلم و اكتب فيها انا احب صفات زوجتى تكون اية

و شوف خطيبتك تاخد قد لية منها

لو حضرتك عاطفى يبقى افسخ خطوبتك فورا لانك لن تشعر معاها بالحب و لن ياتى بعد الزواج

مش فاهم النقطه دي

لو حضرتك عقلانى جرب الورقة و القلم

لو التردد سمة فى حياتك و اى قرار بتاخدة يبقى كمل فى الزواج فورا

لانك لو فسخت الخطوبة دى لن تتزوج مرة اخرى سوف يظل المقارنة و التردد و فى حياتك الى اخر العمر

و اخيرااا صلى صلاة استخارة ربنا ينور بصيرتك للصواب

الرد في الاقتباس

جزاكم الله خيرا ورزقكم الذريه الطيبه ونور بصيرتك

تم تعديل 9 أبريل 2013 بواسطة eryocool

[ذهبية]

اتركها يا اخى و لا تكمل الخطوبة رحمة بيها هى

حضرتك و بدون زعل طلبت النصيحة و بدون زعل هاقولك

حضرتك بطعك متردد جدااا

و حضرتك باصص لاخوك و حاطة مثل ليك و عايز خطيبك و اهلها يكونوا زيى اهل و خطيبة اخوك

بالرغم ان مميزات انت الشخصية مختلفة تماما عنة

لو اتقدمت لواحدة زى خطيبة اخوك ممكن هى الى ترفضك و متحسش بالسعادة معاك

علشان خطيبتك مش علشان حضرتك بدون زعل افسخ الخطوبة

لانها مهما عملت مش هترضيك

و اتوقع ان حضرتك هتلف كتير

و تتفرج كتير

و عايز واحدة نسخة من خطيبة اخوك و اهلها و ممكن جدااا يعدها هما اللى يرفضوك

هتفضل حاسس بعدم الرضا من اى موضع ماشى فية

لان المقارنة مستمرة مع اخوك

بالتالى اترك الموضوع باسرع وقت لان البنت كويسة و ارحمها من طول الخطوبة لانها هتتحسب عليها

ارجو ان تتقبل راى بصدر رحب

لانك من طلبت ان النصحية بصراحة

[eryocool]

شكرا يا دكتوره وجزاكي الله خير

بس انتي علقتي علي نقطه الاخ انا زكرتها كمثال فقط

ولا تشغل تفكيري طول الوقت

بالعكس كمثال بس

وجزاكي الله خير علي النصيحه

اسالك الدعاء بظهر الغيب

[buhana]

شكرا يا دكتوره وجزاكي الله خير

بس انتي علقتي علي نقطه الاخ انا زكرتها كمثال فقط

ولا تشغل تفكيري طول الوقت

بالعكس كمثال بس

وجزاكي الله خير علي النصيحه

اسالك الدعاء بظهر الغيب

للاسف اهلك لم يخطبوا لك زوجه مستقبل ولكن خطبولك طبيبه زيك يعنى بصراحه اختاروا شهاده ومهنه وهنا مربط الفرس

[eryocool]

شكرا يا دكتوره وجزاكي الله خير

بس انتي علقتي علي نقطه الاخ انا زكرتها كمثال فقط

ولا تشغل تفكيري طول الوقت

بالعكس كمثال بس

وجزاكي الله خير علي النصيحه

اسالك الدعاء بظهر الغيب

للاسف اهلك لم يخطبوا لك زوجه مستقبل ولكن خطبولك طبيبه زيك يعنى بصراحه اختاروا شهاده ومهنه وهنا مربط الفرس

شكرا

جزاك الله خير

[محمد خليل]

ماذا فعلت في موضوعك أخي الفاضل ؟

[ســيد مرزوق]

نصيحتي لك إبني العزيز ... خذ إجازة من التفكير في الموضوع ده تماما ، وليكن أسبوع أو أكثر ، وحط نفسك خارج الخدمة بأي تبرير معقول أمامها وأمام أهلك وإمنع أي إتصال مع أي شخص أيا كان ، وخد نفس عمييييق ( معنويا ) وصمم إنك تخرج بره الدائرة وحاول تنسى الموضوع برمته ، بالبلدي كده إعمل ريستارت لنفسك من حيث العقل والعاطفة ، ( من رأيي أنك بحكم عدم وجود تجارب عاطفية سابقة فهذا مؤشر على ضعف النضج العاطفي الكافي لأن تشعر بعاطفة تجاهها أو تجاه أي بنت أخرى وبالتالي القدرة على أتخاذ قرار عاطفي عقلاني .... سامحني لأن هذا ليس عيبا في شخصك ولكنه نتيجة لظروف خاصة بك ) ، وشوف نفسك خلال تلك الفترة ... هاتقدر تسيطر على تفكيرك في الموضوع وللا لأ . بعد الفترة دي أنظر للموضوع من زوايا متعددة ومختلفة عما سبق بالنسبة لك ، لو وجدت نفسك متقبل الفكرة نوكل على الله ، لو لقييت نفسك هديت والموضوع عادي وماتفرقش معاك برغم كل إيجابياتها يبقى إنسى الموضوع وإنهيه بأسرع وقت ممكن حتى لا يطول وكما قال بعض الأخوة هي محسوبة عليك وإنت محسوب عليها طوال مدة خطوبتكما ، حاجة تانية من تجاربي وتجارب من أعرفهم ... في بداية كل إرتباط بيكون الكل جميل وطيب وأمور وحنين ولطيف جدا ، ولكن بعد كده في علم ربنا سبحانه وتعالى يعني في البداية كل واحد بيكون حاطط أقنعة لكي يظهر في أفضل صورة ، بعد ذلك ... تسقط الأقنعة ويظهر المستخبي ، وهذا ليس سوء ظن بأحد بعينه ولكنها تجارب الحياة يابني ، وكونك مغترب وبعيد عن أرض التجربة فتلك مشكلة أخرى ، فلن تستطيع لا أنت ولا أهلك هناك إكتشاف حقيقة كل فرد لأن المعايشة بكل مافيها من مواقف ومشاكل لم تحدث بعد والكل حريص على نقاء وجمال صورته أمام الآخر ، طول ما أنت حاطط نفسك جوة الدائرة وبتفكر بتركيز بهذا الشكل فلن تستطيع إتخاذ القرار الصحيح . أخرج بره الدائرة زي ما قلت لك وبعدين شوف نفسك وقلبك وعقلك ، وبالنسبة لمسألة مستوى الجمال والمواصفات الجسدية ، كلنا حلمنا مثلك وفي النهاية هناك مثل جميل بيقول : ربنا بيحلي لك من كان زاده بشرط الرضا . يعني مستحيل يابني هتلاقي واحدة كاملة من مجاميعه يعني جمال وأدب وأخلاق وتعليم وعائلة ودين .... مستحيل هاتلاقي المرأة الكاملة لأن كلا منا ليس بالرجل الكامل ، ولو أعملت عقلك وكتبت مثلا في ورقة زي ماقال أحد الأخوة الأفاضل .. تكتب الصفات التي تحبها بالتفصيل وتعطيها درجة على كل صفة وتشوف النتيجة النهائية ، أنا شخصيا عملت كده في يوم من الأيام وطلعت حساباتي كلها غلط لأني وضعت الدرجات تحت تأثير الأقنعة التي ذكرتها لك ، وكانت النتيجة بعد سنوات طويلة وأولاد في غير صالح حياتي إطلاق لأنها بنيت على بيانات ومعلومات غير دقيقة وغير صحيحة . أنا باكلمك على أنك إبني وياريت يكون كلامي ووجهة نظري وتحليلي واضحين بالنسبة لك . وأدعو الله سبحانه وتعالى أن يوفقك في الإختيار الصحيح لك ولها . أنا مقدر جدا ما أنت فيه من حيرة خاصة مع تأِثير أهلك ورأيهم فيها والضغوط النفسية التي تعيشها من حولك ، نصيحة أخيرة .. إخلو بنفسك في الليل قبل الفجر بساعة أو ساعتين وصلي ركعتين خالصتين لله الكريم ، وإدعو الله في سجود طويل بإخلاص أن يلهمك القرار الصحيح ، وبعد إنتهائك من صلاتك ناجي ربك وأدعوه بكل ما أوتيت من خشوع وإستكانه ووأشكو له همك وهو أعلم منك به ، إدعوه بقلبك وكل جوارحك أن يلهمك الصواب ولا تتوقف عن الدعاء حتى تشعر بالراحة النفسية والهدوء ثم صلي الفجر ونم على وضوء ، وعند إستيقاظك بإذن الله ستجد في نفسك مايرضيك بعون الله تعالى . وفقك الله لمافيه الخير لكم جميعا . مع خالص تمنياتي .

[ســيد مرزوق]

تصحيح للمثل المذكور في مداخلتي السابقة:

ربنا بيحلي لكل من كان زاده

طبعا بشرط الرضا

يعني لو الواحد رضي بما قسمه الله له ربنا سبحانه وتعالى بيخلي طعم الزاد ( طعام .... زوجة ... أو أي نوع من الرزق ) حلو في نظره سواء أكل أو نظر أو ماشابه.

ومعذرة على بعض الأخطاء المطبعية الواردة في المداخلة لأني حاولت أعدلها ولم أستطع .