أجمل صفات الشعب المصرى والتى لن تتغير

[عصام]

ردا على موضوع عيوب الشعب المصرى

تم فتح هذا الموضوع ..

المصريين مر عليهم آلاف السنين .. حملت إليهم تلك السنين ثقافات من كل أنحاء الأرض ..

بعض تلك الثقافات استطاعت النفاذ إلى داخل شخصية المواطن المصرى فأثرت فيه .. والبعض الآخر لم تستطع أن تمسه رغم طول الفترة التى لازمته خلالها ..

يشهد التاريخ أن الإنسان المصرى أخذ من كل ثقافة أجمل ما فيها .. وأطيب ما فيها .. فحافظ على أصالة وشهامة .. ورجولة وجدعنة الإنسان المصرى ..

لم يزدد إلا طيبة .. ونقاء ..

صدقا .. ووفاءا ..

حاجة غريبة .. مش كدا؟

طيب نقرا التاريخ سوا ..

الإنسان المصرى (وليس الحكومة .. وأشدد على هذا) لا يخلو من العيوب مثله فى ذلك مثل كل مواطنى العالم .. لكن الأكيد أنه يتمتع بصفات جميلة جدا .. ونادرة جدا .. بل بعضها لن تجده إلا بين المصريين ..

أدعوا الجميع للمشاركة فى الموضوعين ..

ما هى عيوب المصريين؟

و ...

متى تتأكد أنك موجود بين مصريين؟

[إبن مصر]

ممكن توضيح لمعنى السؤال التانى من فضلك. بجد

[Tafshan]

المصرين بيبانوا !!!!

اولاً : من صوتهم ... نادراً لما تلاقى مصرى صوته واطى

ثانياً : من سواقته ... .. طبعاً ال Egyptian Driving اشهر ما في مصر بعد الهرم !!

ثالثاً : لما يكون في قعدة فيها جنسيات عربية مختلفه ... تعرف المصري بسهوله لأنه الوحيد اللى بيتكلم و الباقى بيسمعوا !!!

اما القنوات الفضائية ... طبعاً "القنوات المصرية " بتبان .... كرفته معوجه من مزيع مليس شعره ... او الوان الطيف على وش مزيعة غندورة هندها 60 سنه

اما المطعم اللى بيديره مصري ... تعرفه من الحمام بتاعه :P ....

[عصام]

متى تتأكد أنك بين مصريين؟

- لما ادوخ واقع من طولى والاقى أمة لا إله إلا الله حواليا نفسها تساعدنى

- لما اسأل حد فى الشارع على عنوان والاقى الناس اللى فى الشارع كلها نفسها تدلنى

- لما ألاقى نفسى فى حارة فيها قهوة بلدى ويدخل واحد يقول ان "ام فلان" جارتهم اتنقلت المستشفى وابنها مش قادر على المصاريف وتبص تلاقى المصريف اتجمعت فى خمس دقايق ..

- لما تلاقى تلاتة نازلين فى واحد عجن علشان كان بيعاكس جارتهم ..

- لما تلاقى نفسك فى أتوبيس زحمة وواحد يزعق ويقول حرامى والسواق يقفل الابواب والركاب يمسكوا الحرامى ويدوه علقة حمار فى مطلع ..

- لما تلف وتدوخ فى العالم كله بمٌعدة بايظة وماحدش قدر يلاقى لها حل .. وبالصدفة يسمعك واحد جنبك وياخد للاسطى أبو فلان اللى بقدرة قادر يرجعها زى ما كانت فى دقيقتين وتسأله عن الحساب يقولك خللى يا باشا دى حاجة بسيطة ..

كفاية وللا اقول كمان؟

[إبن مصر]

الله ....كمان والنبى يا عصام لحسن الواحد قرب ينسى ان لسه فيه حاجه حلوه ...

فكرنا بالى نسيناه والى فيه كتير تناسيناه.

[عصام]

أقولك ..

- لما تبص من البلكون ساعة المغرب فى يوم من أيام رمضان .. وتلاقى عربيات كتير فيها ناس بتوزع فطار على عساكر المرور وعمال النضافة ..

- لما تعدى على ناس ماسكة ف خناق بعض .. وتقول "سلامو عليكو" تقوم الاتنين اللى ماسكين فى خناق بعض بيردوا يقولوا "وعليكم السلام .. إتفضل"

- لما تكون ساكن فى عمارة .. وجارك اتخانق مع مراته .. وتلاقى رجالة العمارة كلهم اجتمعوا عند "كبير العمارة" وعملوا "قعدة صلح"

- لما تركب اتوبيس زحمة .. وتطلع ست عجوزة او مشلولة .. وتلاقى اللى بيسندها يطلعها السلم .. واللى بيشخط فى عيل صغير قاعد فى أول صف وما قامش من نفسه .. واللى بيسألها هاتنزلى فين يا حاجة ..

- لما يكون من بين اصحابك واحد زى "سى السيد" :P (باتكلم بجد)

أقول كمان؟

[Ahmed Mohsen]

أقولك ..

- لما تبص من البلكون ساعة المغرب فى يوم من أيام رمضان .. وتلاقى عربيات كتير فيها ناس بتوزع فطار على عساكر المرور وعمال النضافة ..

- لما تعدى على ناس ماسكة ف خناق بعض .. وتقول "سلامو عليكو" تقوم الاتنين اللى ماسكين فى خناق بعض بيردوا يقولوا "وعليكم السلام .. إتفضل"

- لما تكون ساكن فى عمارة .. وجارك اتخانق مع مراته .. وتلاقى رجالة العمارة كلهم اجتمعوا عند "كبير العمارة" وعملوا "قعدة صلح"

- لما تركب اتوبيس زحمة .. وتطلع ست عجوزة او مشلولة .. وتلاقى اللى بيسندها يطلعها السلم .. واللى بيشخط فى عيل صغير قاعد فى أول صف وما قامش من نفسه .. واللى بيسألها هاتنزلى فين يا حاجة ..

- لما يكون من بين اصحابك واحد زى "سى السيد"  :P  (باتكلم بجد)

أقول كمان؟

صح صح صح صح صح جدا .......

الله ينور عليك يا عصام ....

سي السيد فعلا وبجد وبحق وحقيقي مثال للمواطن المصري ابن البلد الجدع ......

ومش سي السيد بس ...... معظم أعضاء المحاورات كده .... وانت أولهم ..

تم تعديل 14 فبراير 2005 بواسطة Ahmed Mohsen

[عصام]

الله يجبر بخاطرك يا ابو حميد .. دا بس من ذوقك ..

أقولك على حاجة كمان؟

أقولك ..

لما اتنين يمسكوا فى خناق بعض ويقطعوا بعض من الضرب والشتيمة .. وييجى واحد معدى يقول "صلوا على النبى يا جماعة .. وحدوا الله" يقوما الاتنين يردوا ويقولوا .. "عليه الصلاة والسلام .. لا إله إلا الله" وينسوا فورا هما كانوا بيتخانقوا ليه .. ويتسابق كلا منهم فى تقبيل رأس الآخر ..

وحشتنا يا ابو حميد :P

[مهيب]

ياااااااه ... كلامك حلو قوى يا عصام ... ليه العين تتدمع بجد ... خصوصا لما تكون فى الغربة زيى ....

بيتهيألى مفيش شعب بيحب بلده و مرتبط بيها قد المصريين ... يمكن لأنها أكتر بلد فيها روح فى كل بلدان العالم ... الروح اللى مش بنحسها غير لما بنبعد عنها ... يمكن لأن بيتهيألنا ان باقى البلدان زى مصر ... بس أنضف و أجمل و أكثر رقيا ...

ولما بنسافر بنعرف قد ايه كنا سذج ...

مفيش بلد غير مصر ممكن تبقى ماشى فى الشارع ... تقول تعليق .. تلاقى واحد تانى ماتعرفوش بيضحك و بيرد عليك ... والناس بالرغم من الحر و الزحمة .. و العادم بتبتسم ...

مفيش زى المصريين فى تقفيل دماغهم ... آه والله ... لما قفلوا دماغهم علشان ياخدوا سينا أخدوها ... بالعافية بقى .. بالذوق .. بالأدب .. بالغباء ... واخدينها واخدينا ... لا شعارات و لا اتحاد اشتراكى ...

مفيش غير المصريين ممكن عنيهم تدمع من الضحك ... و من الحزن و من القهر و من تقشير البصل و من التعاطف ...

المصرى الناصح الأروبة ... اللى لو راح أكتر البلاد تقدما و حضارة ... وهو لسه منسيش أصوله الريفية ... تلاقيه بيرقبهم و يتعلم منهم و هو بيقول فى نفسه .. هم ايه يعنى ... فلل ؟؟؟ (جمع فلة)

المصرى اللى لما يحب يتتريق ... يموتك من الضحك ... على الحكومة و الاوضاع و البلد ... لكن لو سمع التريقة من حد تانى ... عاديك ...

يقوللك التعليم فى البلد بايظ ... و هبل فى هبل ... تسافر لأى دولة عربية ... تلاقى أشطر دكاترة المصريين .. أشطر مهندسين المصريين ... أشطر مدرسين المصريين .. أشطر تلامذة المصريين .... أشطر أى حد ... المصريين

هو فى زى المصريين ... بلد كثافتها السكانية تخض ... احتلت من ناس كتير مالهمش عدد ... بتتسرق كل يوم و تتنهب من فجر التاريخ لحد دلوقتى ... أوضاع غريبة و فساد .... لكنها لسه باقية .. ولسه الناس بتيجى تقضى أجازتها فيها

اقرأو هذا المقال ... كاتب سعودى يكتب عن القاهرة

http://www.akhbarelyom.org.eg/adab/issues/597/0300.html

تم تعديل 14 فبراير 2005 بواسطة مهيب

[drhusseinali]

يا استاذ عصام بصراحة مش عارف اقولك ايه?

انت قلت كلام حلو قوي شكل الواحد نسيه

بس بيني و بينك يا اخي السلبيات بتخنق

[لما تعدى على ناس ماسكة ف خناق بعض .. وتقول "سلامو عليكو" تقوم الاتنين اللى ماسكين فى خناق بعض بيردوا يقولوا "وعليكم السلام .. إتفضل"

- لما تكون ساكن فى عمارة .. وجارك اتخانق مع مراته .. وتلاقى رجالة العمارة كلهم اجتمعوا عند "كبير العمارة" وعملوا "قعدة صلح"]

ده فعلا بيحصل?

[عصام]

الله يا مهيب ..

هو دا الكلام اللى لازم يتقال ..

أنا امبارح كنت ع القهوة ..

جه واحد قعد جنبى .. الولد قال له "أجيب لحضرتك قهوة؟"

رد عليه ضاحكا وقاله "لأ القهوة بتسهرنى جامد" ونظر لى مبتسما

رجدت وجهه بشوشا ضاحكا فقلت "تصدق إن آخر فنجان قهوة أشربه لازم يبقى قبل الساعة واحد الضهر" .. وكلمة فى حدوتة نقل كرسيه ليجلس بجانبى .. بعد أن أصبحنا أصدقاء !!!

المصريين ..

والله .. أجمل وأطيب وأنقى شعب على وجه الأرض ..

[Ahmed Mohsen]

الله يجبر بخاطرك يا ابو حميد .. دا بس من ذوقك ..

أقولك على حاجة كمان؟

أقولك ..

لما اتنين يمسكوا فى خناق بعض ويقطعوا بعض من الضرب والشتيمة .. وييجى واحد معدى يقول "صلوا على النبى يا جماعة .. وحدوا الله" يقوما الاتنين يردوا ويقولوا .. "عليه الصلاة والسلام .. لا إله إلا الله" وينسوا فورا هما كانوا بيتخانقوا ليه .. ويتسابق كلا منهم فى تقبيل رأس الآخر ..

وحشتنا يا ابو حميد  :P

ربنا يخليك يا عصام ..... إنتو اللي وحشتوني كلكم وبالمناسبة دي بأعتذر عن فترة غيابي اللي طولت بس كنت مشغول جدا في الشغل (بصراحة مش هو ده السبب الوحيد إنما هو السبب الأساسي)

أعتذر مرة تانية بس المرة دي بسبب خروجي عن الموضوع ....

أتفق مع كل ما قاله الإخوة عاليه .......

وأزيد عليه .....

يتمتع الشعب المصري بكمية كبيرة جدا من الإيمان الداخلي بالله ..... علي الرغم مما يظهر خارجيا علي الشعب المصري من عدم إتباعه لتعاليم وشعائر الإسلام .... إلا أنه داخليا يؤمن بالله بشدة وعنده إستعداد فطري طبيعي لطاعة الله وذكره دائما

[mb14]

ردا على موضوع عيوب الشعب المصرى

الأستاذ الفاضل/ عصام شوقى

انا لم افتح الموضوع لكى اعيب على الشعب المصرى على عيوبه ولكن لمعرفة هذه العيوب وامكانية ازالتها منا (على الأقل كل واحد منا نحن هنا ) ومحاولة نقل نفس التفكير للوسط المحيط بنا .

واكيد هذه العيوب سوف تكون منى انا ايضا بصفتى واحد من هذا الشعب .

وأسألك سؤال هل يوجد شعب لا يتغير؟ كيف ذلك يأخى

الشعب المصرى حصلت له تحولات رهيبه خلال القرن الماضى

يعنى تصرفات الشعب لمصرى تغيرت منذ بداية القرن الماضى غير بعد الثورة غير بعد 73 الى الآن .

تحولات فى السلوك العام والخاص رهيبه قد رصدها الدكتور جلال امين فى كتابه "ماذا حدث للمصريين ".

ما ذكرته انت من صفات للشعب المصرى جميله ولكن فى المقابل هناك عيوب يجب ان ندركها لكى نقوم بتغييرها لأنها اصبحت ملازمه لنا .

بعض الأجانب بدأوا يتندروا علينا اننا الشعب المصرى اصحاب الثلاث الحروف الشهيرة IBM

I ان شاء الله (للأسف الشديد تستخدم للتسويف)

B بكره

M معلهش

هناك فارق كبير بين سلوك الشعوب الأوربيه والشعب المصرى فى التصرفات الحضارية وايضا بعض الشعوب العربيه تغيرت سلوكياتها للأفضل وذلك بعد الطفرة النفطية لكن للأسف حدث تحول عكسى عند المصريين بعد 73 رغم المردود المادى على المصريين نتيجة نفس الطفرة.

هذا ما يحز فى النفس يأخى الفاضل وتقبل تحياتى وشكرى

[عصام]

ده فعلا بيحصل?

بيحصل يا دكتور ..

وعلى مسئولية ناظرى الاتنين ..

مصر بخير يا دكتور ..

[مهيب]

اقولكم على موقف حصللى ... كل ما بفتكره بحس يعنى ايه مصريين ...

راجل كبير .. محترم ... شكله موظف أو حاجة كده ... راجع من شغله و شايل شوية حاجات فى أكياس ... واحد معدى بعجلة مش واخد باله راح خبط فيه و مشى .. حاجات الراجل وقعت ... كنت أنا وواحد صاحبى قريبين منه جدا .. المهم الراجل الظاهر ان يومه كان مش ولابد ... لما وقعت الحاجات فوجئنا بيه بيقول لا حول ولا قوة الا بالله .. وبيكررها بشكل مؤثر جدا .. صاحبى بدأ يلم الحاجات من على الأرض .. وأنا بطبطب على كتف الراجل وبقوله معلش يا حج ,, ولا يهمك ... تخيلوا الراجل عيط ... عيط والله .. لقيته بيدفن وشه فى حضنى وبيعيط ... زى مايكون بيفضى شحنة اليوم بالعياط ...

فجأة متفهمش الناس جت منين ... اللى جابله كرسى فى الشارع ... واللى بيساعد صاحبى فى لملمة الحاجات ... واللى بيحاول يضحك فى الراجل وهو عينيه بتدمع .. ولاقينا آنسة كده راحت جابتله عصير ... والناس عمالة تهديه

والراجل بيقول بتأثر .. دى تالت مرة واحد يخبطنى النهاردة .. لا حول ولا قوة الا بالله ... وواحد ابن بلد دمه زى السكر بيرد عليه و بيقوله ... لا يبقى العيب فيك يا حج .... وبيضحك ... و الراجل بيضحك من وسط دموعه

الناس مسابتوش غير لما الراجل ضحك و بقى كويس ... وبالعافية أقنعهم ان بيته قريب و مش عاوز حد معاه ... بالعافية فعلا ...

فين ممكن تلاقى حاجة زى كده غير فى مصر .... غير وسط مصريين .... أنا كل مابفتكر الموقف ده ... و الراجل الطيب ... لا شتم ولا قال كلمة واحدة وحشة .. مكانش بيقول غير لا حول ولا قوة الا بالله .... و الناس و تصرفها .. كل ما افتكره عنيا بتدمع

تم تعديل 14 فبراير 2005 بواسطة مهيب

[عصام]

الأستاذ الفاضل/ عصام شوقى

انا لم افتح الموضوع لكى اعيب على الشعب المصرى على عيوبه ولكن لمعرفة هذه العيوب وامكانية ازالتها منا (على الأقل كل واحد منا نحن هنا ) ومحاولة نقل نفس التفكير للوسط المحيط بنا .

واكيد هذه العيوب سوف تكون منى انا ايضا بصفتى واحد من هذا

الأخ العزيز ..MB14

أنا عندما قررت فتح هذا الموضوع لم ينتابنى لحظة شك فى مقصدك .. أخى العزيز أنا أذكر أنك كنت صاحب اقتراح إنشاء باب "إنجازات المصريين" ..!

إنما فقط أحببت أن أضع بقعة بيضاء على الثوب الأسود .. وذلك نظرا لحالة الاكتئاب الشاملة التى تمر بكلل المصريين فى الوقت الحاضر ..

رأيت أن طرحك لموضوعك بدون موضوع آخر موازى له ومعاكس لمضمونه لن يزيدنا إلا اكتئابا بشكل سيلهينا بالتأكيد عن التفكير فى حلول .. فنتفرغ للنحيب والسخرية كما تعودنا ..

ولاحظ أننى أوردت رابطا لموضوعك فى البداية .. كما طلبت من الزملاء المشاركة فى كلا الموضوعين وليس هذا فقط .. مما يعنى أننى فعلا أرغب فى مناقشة موضوعك لكن بقليل من الأمل ..

تحياتى ..

[عصام]

نكمل ..

لما تلاقى واحد عربيته عطلانة وبيحاول يزقها لوحده علشان يركنها على جنب .. وشوية ناس معديين جنبه يقولوا له "إركب انت .. ويبدأوا زق العربية لحد ما يطمنوا إنها دارت أو إنه ركنها .. (لسه من يومين زاقق لما انقطع نفسى :P )

مين يقول كمان؟

[bentmasria]

انا ومحمد ابنى يا استاذ عصام ممكن نقول مجلدات رغم انى كتبت ف العيوب الاول لكن ولا لحظة وانا بحمد ربى واشكر فضله على نجاة ابنى محمد نسيت جدعنة المصريين ولاد البلد من اول وقفة سكوب معايا ورده على الموضوع اللى حصل لغاية اتصال مئات البشر بيا يسألونى على ابنى ويتبرعوا له بفلوس ويعمل عمليه بميت الف جنيه ما كانش معايا منهم الا 20000 تصدقوا انا شفت قايمة المتبرعين معرفش منهم الا عدد اصابع ايدى واللى بعتوا لى انا شخصيا واودعت باسمائهم وائتمونى على مالهم اسمحوا لى اخلى الموضوع ده قائمة شرف وشكر للقلوب المصريه الجدعة ولاد البلد اللى وقفوا جنب واحدة غريبه عنهم بقلوبهم ودعائهم ومشاركاتهم وفلوسهم كمان هم دول اولاد مصر بجد يا عصام ويا استاذ ام بى ورغم اننا ساعات بنشيل من بعض لكن كلمة صغننه بتمسح كل الجراح ونرجع نضحك ف وش بعض بقلب صافى

ربنا يخلى لى اولاد بلدى ف المحاورات وف كل مكان ف الدنيا

اغنونى عن سؤال اللئيم

وحفظوا لمحمد وامه ماء وجههم

وربنا اكرمنا بالشفاء الحمد والشكر لله

وكل عيد حب وانتم طيبين

محمد ومامى

[theblackpirate2005]

استاذ عصام

انا ارى ان كل الامثله التى قدمت كلها تدورحول ميزه رئيسيه وتكاد تكون تلك الميزه هى الاساس فى كل الامثله التى قدمت

الميزه هى الشهامه

فالذين يضربون شخص من اجل معاكسه فتاه تلك شهامه

سائق الاتوبيس الذى يغلق الباب لكى يقبض على اللص فتلك شهامه

لما الشخض المريض يتم جمع المال من اجل علاجه فتلك شهامه

لما شخص يسقط على الارض والجميع يسرع لمسعدته فتلك شهامه

انا لا اريد ان اطيل معظم الامثله تدور حول صفه واحده وهى الشهامه

[مهيب]

الى الأستاذ ؟ القرصان الأسود (مش لايقة أستاذ دى أنا عارف)

الشهامة فى حد ذاتها صفة جامعة لكتير من الصفات ... أصلك مش هتلاقى واحد شهم و جبان ... أو شهم و مش جرىء .. أو شهم و مش حقانى ... مش هتلاقى واحد شهم و أحمق ...

بالاضافة ان اللى قاله العزيز عصام واللى قلناه كلنا فيه كتير غير الشهامة بس ... فيه الطيبة ... فيه الانسانية ... فيه الحضارة بمعناها اللى شبه اندثر ...

يمكن كلام البنت المصرية (جدا) يوضح أكتر كلامى ... اللى حصل معاها ده مش شهامة ... اللى حصل معاها ده يتألف عنه كتب ...