تغيير وزير الشباب

[theblackpirate2005]

تم يوم الثلاثاء تغيير وزير الشباب والرياضه انس الفقى بوزير الاعلام والسياحه السابق ممدوح البلتاجى وتولى انس الفقى منصب وزير الاعلام

انا عايز اعرف ايه السبب فى الكلام ده وفى الوقت ده بالذات يمكن عشان المشاكل اللى عملها مع الفيفا انس بيه الفقى

انا نفسى يكون اول قرارات الوزير الجديد هى حل مجلس اداره الزمالك وبكده يبقى فى امل فى اصلاح الكره المصريه

[theblackpirate2005]

من واجتنا الصحفيه ان نذكر المصدر الذى اتينا بالخبر منه

[http://www.filgoal.com/News.asp?NewsID=13718]

تم تعديل 15 فبراير 2005 بواسطة theblackpirate2005

[عصام]

مش عارف ليه تصورت واحد "مرهوق" بيجرى شمال ويمين وشايل حاجة بين إيديه الاتنين ومش عارف يرميها فين .. :rolleyes:

الحاجة دى هى ممدوح البلتاجى :rolleyes:

[alnoobi]

و الله ياعم القرصان ماحد عارف المشكله فين !!

أنس الفقى مع الفيفا ولا البلتاجى مع عش الدبابير اللى فى التليفزيون .. انما فيه هنا حاجه عاوز أفهمها .. اذا كان الفقى و البلتاجى لازم يتغيروا يبقى الصح انهم يروحوا و ييجى اتنين غيرهم .. انما لبس طاقية ده لده .. و ده لده !!

ياللا ما هى خربانه خربانه ... حسبنا الله و نعم الوكيل .

[se_ Elsyed]

إيه الفشل اللي إحنا فيه ده ؟

وإيه التخريف والخرفجه دي ؟

هو في إيه والراجل الكبير بيعمل إيه ؟

البلتاجي عمال يحركه زي طابية الشطرنج من الهيئة العام للإستعلامات للسياحة للإعلام والأخيرة ما قعدش فيها 7 أو 8 شهور ..

وانس الفقي اللي من ساعة ما مسك وزارة الشباب وكتبنا عنه عشرات المرات بإنه عامل زي اللي كان ماشي في الشارع في حاله وواحد جه من وراه وزقه في بلاعه ...

والكرسي طلع واسع عليه وعمال يخبط ويهترش ومش لايقه عليه بدلة الوزارة لإن كبيره قوي يقعد في قصر ثقافة الزقازيق ويقبض أخر كل شهر ..

بس أنا بقى أموت وأقرأ وأشوف وأسمع شلة المنافقين من اول احمد شوبير ومحمود معروف وغالبية الكتاب الرياضيين المرتوقة اللي هتفوا بحياة الفقي أول ما علي الدين هلال إندبح وجابوه بداله .. وكلهم قالوا في نفس واحد " هو ده الراجل المناسب في المكان المناسب وده اللي هايعمل ثورة شبابية رياضية مصرية بيضاء "

تعرفوا يا جماعة أنا حاسس إن الفقي كان زملكاوي .. قوم الريس لما لقى الزمالك عمال بيتبهدل في عصره واتغلب مرتين من الاهلي غلوبيه نكراء راح مغيرة بالبلتاجي اللي هايعدل المايلة :rolleyes: ...

هذا وقد صرح احمد شوبير ورفاقه بإن تعيين البلتاجي جاء في الوقت السليم وحسب الميعاد يا حبيبي حسب الميعاد .. وبإنه سيُعطي عصارة خبرته في الحياة بإمارة شعره الابيض اللي زي الثلج ده للرياضة .. وهايرجع مصر بقى لعصر الضظوي والفناجيلي وصالح سليم وخضر التوني وإبراهيم مصطفى وأبو أشرف .. ( الخبر ده من عندي لإني جايبه من الكنترول )

بس يا خسار يا بلتاجي إنت والفقي مش هاتلحقوا تتهنوا بمناصبكم او تفصلوا بدل للصيف لإن هناك تغيير هايتم بعد الإستفتا بتاع أكتوبر وهاتاخدوا بعض وتقعدوا على قهوة المعاشات اللي في شارع سليمان باشا قبل سيما كوزموس 1 ...

وإرفع يا عم شعار " ليس يطلع كويس " و " قول يا باسط تلاقيها هاصط "

[bodi]

الاذاعة المصرية لم تذع الخبر فهل هو صحيح

عموما اذا كان صحيح يظهر ان البلد تدار بنظام محل الكشري حيث يساعد الابن الننوس ابوه في ادارة المحل ويقوم الصنايعية بدورهم في العمل و لا مانع ان الواد بليه يقوم بدور الواد حمو

[محمد شلبى]

قرات فى جريدة الاسبوع بالامس ان هناك نية لتولى انس الفقى منصب هام للغاية.حيث اخذه مبارك معه الى ابوجا وشرم الشيخ.

[Shams100]

ما هذا الذى يحدث اين التخصصات هل الاعلام والشباب يحتاجوا نفس المهارات ام العمليه كلها مجاملات وتحريك قطع شطرنج فقط لسد خانه وشغل فراغ والتمتع بالحوافز

[Shams100]

الان وضحت اللعبه من هو الاكثر ولاء للسد فى المرحله القادمه ليكون بوق التجديد

[عادل أبوزيد]

الوزير عبارة عن دور سياسى بالدرجة الأولى كما أن دور المدير دور إدارى بالدرجة ببساطة أحسن خباز ليس بالضرورة أحسن من يدير المخبز.

ما سبق كان إستهلالا لابد منه

فى مصر منذ بداية عهد الثورة الميمون - ربما بالتدريج - إنتهى الدور السياسى للوزير أو قل إنتهى الدور السياسى بالكامل اللهم إلا لل "جوقة" ...

ستسألنى ما دليل فشل الفقى فى الشباب أو فشل البلتاجى فى الإعلام ... لا يجود دليل أو مؤشر نجاح لأى من الإثنين ... حتى الآن لا توجد طريقة - نعرفها نحن على الأقل - للحكم على النجاح و الفشل و لعلهم يسترشدون برأى " الشيخة صباح العمشة صديقة الفاضل حشيش "

الأصل للوزير و غير الوزير طالما فى منصب عام أن تكون مؤشرات النجاح معرفة جيدا وواضحة لعموم الناس

[seastar44]

مين أنسى الفقى ... ده ياجماعة ... ؟؟

والنبى اللى يعرف أى معلومات أو تاريخ له ... ينورنا ...

أصل احنا بقالنا سنين طويله بنسمع أسماء ما بتتغيرش .. أبدا ...

طيب البلتاجى وعارفين تاريخه من أيام مصلحة الاستعلامات ... وجريدة مصر الناطقة وخلافه ... الى أن وصل الى وزير السياحه والانس .. وبعدين وزير الاعلام والبهججة ... بس ياحسره دبابير ماسبيرو وعصابات الليثى والشريف إخوان .. المسكين ماقدرشى عليهم ... ومخه ضرب ... وسافر عدة مرات للخارج للعلاج ... على نفقة صاحب المحل .. وصرفوا عليه كام مليون .. ولكن يبدوا أن صلاحية بطاقته قد نفذت ... ولما كان منصب وزير الاعلام يحتاج الى واحد مخه صاحى ومفنجل للكبيره والصغيره وجاهز بالقرع الاسطنبولى .. لذا وجب التغيير ...

وربنا يشفى البلتاجى ويستعيد عافيته بإذن الله ....

وعقبال باقى عجول وعواجيز الفرح ما يفهيصوا ...

[seastar44]

الأخ العزيز .. عادل ...

منصب الوزير فى بلادنا ... حدث له نفس ماحدث لكل شيىء فى البلاد ... من تقدم للخلف ( التقهقر والتقزم وفقدان القيمه )...

فمنذ أن فرض الزعيم الخالد ( أستاذ فن الهزائم والنكبات) وأرسى مبادىء حكمه التى تعتمد على أن الولاء أولا ثم بعد ذلك تأتى الكفاءة .. واعتبار أن الكفاءة يمكن أن تكتسب عند تولى المنصب ...

ثم أطلق العنان لفلول الامن لتعيث وتنشر الهلع بين الشعب .. ثم تطورت الامور بعد ذلك الى أن أصبحنا يطلق علينا دولة الأمن ... أما الأمان فهو للحاكم وليس للشعب ...

عملية اختيار الوزراء أصبحت أيضا تخضع لمعايير الولاء أولا ثم الكفاءة ...وعند التغيير الوزارى بتبقى العمليه عباره عن ترشيحات الجهات الامنية للمناصب الوزارية ( وكل واحد من المرشحين موجود فى ملفه تكه علشان لو ورب كده والا كده فطريقه الى قرميدان أخضر ) وعلى الرئيس أن يختار .... يعنى بالضبط زى االباشا ماينزل سوق البهايم ويشترى ويشوف ايه اللى القرعجيه والسماسره والمنتفعين يقولوله عليه وهو يختار .. لكن لاهو بيفهم فى البهايم ولا دياولو ...

ومنصب الوزير حاليا لا يزيد عن كونه شماشيرجى ( منفذ تعليمات وتوجيهات ) لا يضع سياسه ولا منهج كله يعمل بالتوجيهات ... و90% من عمله يقضيه فى تنفيذ التعليمات والتوجيهات والتوصيات .. وتوقيع التأشيرات لاعضاء سيد قراره وكلها بلا استثناء مخالفه للقانون ومعظمها مدفوع الاجر مقدما لصاحب المصلحة ... أضف الى هذا مهمة الوزير فى الهروله الى المطار رايح جاى حسب اللزوم لزوم الوجاهة وممارسة تمرينات تقوية الظهر فى الانحناءات .. المهم يطلع فى الصوره ... ولذلك أطلت علينا شخصية عبده مشتاق التى أطلقها المبدعان .. أحمد رجب ومصطفى حسين ... يعنى الشخصية لم تأتى من فراغ ولكنها أصبحت تعبر عن شخصية وطريق اختيار الوزراء فى مصر ...

يعنى الحياه فى مصر لا تتأثر بسياسة وزراء ... وليس لأى منهم دور فى توجيه سياسة الدوله ... وأصبح زيد زى عبيد .. مافيش فرق كلهم طبعة واحده ومنهج واحد ... وكلهم خريجى كلية الولاء التام ....

ورئيسنا أيضا هو خريج هذه الكلية ... ولذلك ليست له ابداعات .. وهو يدير دفة الامور بالوجوه الموجوده .. ومدام ماشيه والامن قوى والامان موجود فلا شيىء يقلقه ... وتجمدت الامور عند هذه المرحلة ولا جديد حتى امتلأت حياة الناس بالملل وأصبحوا مشتاقين للتغيير .... المراقب جيدا للأمور سيجد أن كل ما أنجز فى العشرة سنين الاولى من حكم الرئيس مبارك .. هى أمور تم تخطيطها وتقريرها فى عهد الرئيس السادات ...ونسبها الاعلام الموجه الى مبارك ... ثم بدأ منحنى الهبوط فى التسعينات وانفلتت الامور بعد التخلص من وزارة الجنزورى ..وهوت الامور الى ماهى عليه الآن بفضل عبقرية جهبذ الجهل عاطف عبيد ...أما نظيف فلن يلومه أحد على الخراب لأنه مستلمها خربانه جاهزه ..

الخلاصة أصبح منصب الوزير ..درجه وظيفيه ... ولو عملت احصائية فى مصر لعدد من يحملون درجة وزير فقد يحتاج الامر لافاقتك فى الانعاش ... العدد مهول .. وفوق التصور .

إن مقياس نجاح أو فشل أى وزير لا تحدده أعماله ومنجزاته بقدر ما يحققه له الاعلام ... واعلامنا قادر على تلميع واضفاء بريق يضاهى بريق النجوم على أى شخص ويحيله الى صانع معجزات .... وفى نفس الوقت يمكن أن يحيله بدلا من ذلك الى تاجر مخدرات .... طالما كان فيه من أمثال سمير رجب .. ونافع .. وغيرهم من كتاب السلطه ..

إن الوزير فى رقعة الشطرنج .. من أقوى القطع .. ومن يجيد اللعب به .. يكسب دائما .. وهو طبعا أقوى من أى وزير عندنا ... لأن وزارئنا لا يلعبوا على رقعة شطرنج تحكمها قوانين وخطط وحيل .. وعقول صاحية .. بل وزرائنا يلعبون لعبة الكراسى الموسيقية ...

ودمتم للمحاورات ......

[أسد]

لماذا ؟؟؟؟

فلما سأل المتحدث باسم رئاسة الجمهورية .. أجاب لا فض فوه ....

رفض الفقي الادلاء بتصريحات عقب أداء اليمين، كما رفض المتحدث باسم رئاسة الجمهورية التعليق علي أسباب وأسس التغيير وقال ان هذا السؤال يوجه لرئيس الوزراء.

إيه الحلاوة دي

الوفد 16 فبراير 2005

[seastar44]

يأستاذ أسد ....

الوزير لسه صغنون ... والمنصب ده كبير أوى ... عليه ..

مش هايبتدى يتكلم الا لما يركبوا له الدسك بتاع التصريحات ...

انت عارف الوزراء عندنا .. كله نظام أكتب أو اقرأ ما يملى عليك... وهو يامسكين لسه ماخدش الاذن من آبيه نظيف ...

أصبر عليه شويه وبكره هايلعلع ...

[عصام]

أستأذن الجميع فى دمج الموضوعين "تغيير وزير الشباب" و"تحريك قطع الشطرنج" لتناولهما نفس المحتوى

عصام شوقى

الإدارة

[Sherief AbdelWahab]

حذرت من ما حدث في موضوع مستقل اسمه "مسمار جحا"..ومن الواضح أن البلتاجي صرخ من تلك المسامير..

ومسمار جحا ، لمن لا يتذكر ، يطلق على الرجال الذين يزرعهم الوزير المعمر السابق للوزير الجديد بهدف حماية مصالح سيدهم - الوزير السابق- وتحويل حياة الوزير اللاحق في الوزارة إلى جحيم..

وقد حقق رجال صفوت الشريف ، والذي لا أشك لحظة أنه وراء التغيير- نقاط عديدة على البلتاجي ، في أشياء صغيرة وكبيرة ، وكانت فرائص رجال صفوت الشريف في قطاع الأخبار والنيل للأخبار ترتعد بسبب ثورة التصحيح التي كان يعتزم الوزير السابق القيام بها.. وها قد خرج من التشكيل .. ليثبت أن مصر لن تتغير .. وأن المسامير في كل يوم تزداد طولاً وعرضاً عن ذي قبل..

عليه العوض ومنه العوض..

خلص الكلام

[Shams100]

[sha3ooor]

[se_ Elsyed]

البلتاجي : لا أعرف شيئا عن الرياضة المصرية .. وسننظم بطولة رائعة لأمم أفريقيا

الصلاة عالنبي ... الصلاة عالزين .. وخمسة في عين اللي ما يصلي عالنبي

تعالي يا حاجة يا ام س س إرقعي زغروطة ..

باقي كام شهر على بطولة الامم الأفريقية .. والوزير إسم الله عليه بيقول ماعرفش حاجة في البطاطس ..

طبعاً لو إحنا زي الدولة المتقدمة إن شالله لو الوزير إتغير صباحية البطولة ما بتفرقش معاهم لإن الترس شغال سواء جه البتاجي أو مشي الفقي ..

لكن اخونا لسه بيقولك انا هاقعد وأسهر على الملفات أو أخدها معايا البيت عشان أدرسها ...

وحليني يابا .. إذا كان الفقي قعد 8 شهور راح مطخمس فيهم الدنيا مع الفيفا وخلاص هم على وشك أن يضعونا بلاك ليستد وهايخلونا نلعب كورة شراب ..يبقى البلتاجي المريض - شفاه الله وعافاه - هايقدر او يلحق يعمل حاجة في الأيام اللي باقية ...

للأسف دلوقتي أقدر أقوله " المستقبل مظلم يا سُعاد ... قومي لمي هدومنا وياللا نهاجر على موزمبيق .. يمكن قلب موبوتو سيسيسيكو يبقى احن علينا من قلب مارينجوس "

[سقراط المصري]

تعقيبا على كلام ابو السيد ، اوضح ان المذكور لم يتقصى الحقائق.

على المذكور (ايوه انت يالي عمال تشاور على نفسك وتقول انا) ان يتعلم طريقة عملنا.

نحن نعمل في مسطمط ، اقصد في صمت

وشعارنا

قول ياباسط تلاقيها هاصت.

تحياتي

سقراط

وزير مفوض