قهوة المحاورات

[Scorpion]

بينما كنت منهمك في أكل سندوتش سجق بالعسل الأسود و الطحينة في واحد من أحلي أحلامي.. اذا بصياح أم جونيور يهاجم أذني ليفيقني من نوم عميق و يجعلني أقفز واقفآ في ظرف ربع ثانية ...

- Che cavolo... svegliati mio lione .. prendi questo bidone e vai a riempire l'acqua.. siamo senza e non posso lavare

( ترجمة انيس عبيد قررت أن معني هذا الكلام هو : يا دي النيلة.. أصحي يا سبعي.. قوم خد جركن الميه ده و روح أملاه.. مافيش ميه و مش عارفة أغسل...)

بشعر منكوش .. و جاكيتة فوق البيجامة .. أخذت الجركن .. و نزلت الي الشارع حيث حنفية المياه العمومية و التي وجدت أمامها طابور لا ينتهي... فبدون شعور وجدت نفسي أترك هذا الطابور الثعباني و أتوجه الي قهوة "مصر 90" حيث لم أجد غير سي السيد وحيدآ يقرأ بكل تركيز في صحيفة "الوفد"... بينما أمشير يقدم له القهوة..

( عزيزي القاريء.. حتي تستطيع فهم طبيعة هذا الحوار يجب أن تكون تابعت مغامرة سرقة الحمير التي قامت بها سابقآ عصابة "حساس" و تستطيع الحصول عليها من مكتبة مدبولي أو مكتبة الشروق .. أو في هذا الرابط :سرقة الحمير) .... و الآن نعود الي احداث القصة ...

سكوب : صباح الخيييييير يا سي السيد...

سي السيد( بدون أن يرفع نظره من الجريدة ) : أنت جيت ياندل .. إيه .. هي اللحمة خلصت و الا أيه ؟

سكوب : يا عم لحمة ايه .. و حمير ايه .. أنت لسه فاكر .. المحل ما أتشمع بقاله شهرين.. و لحقت نفسي و رجعت بالجماعة علي مصر قبل ما العملية تتنيل فوق دماغي... الشاي يا أمشير وحياة أبوك... أومال فين الباقي ؟

سي السيد : باقي ايه و هباب ايه.. أيام سودة .. حشيش و هاجر و مين عارف حيرجع و الا لأ ... أبن مصر سحبه الواد الجديد ده اللي أسمه عصام ذا جريب فروت علي قهوة المحاورات .. و أنا شكلي كده لو لينوكس ما رجعش حنقل قعدتي هناك معاهم..

سكوب : ليه ... هو لينوكس هاجر هو راخر ...

أمشير : لأ يا خواجة ... بابا فتح محل تصليح أدوات منزلية و كومبيوتارات قدام الجنينة اللي هناك.. و سابللي أنا القهوة .. إتفضل الشاي..

سكوب : جدع يا أمشير .. من شابه أباه فما ظلم .. و أنت واد جدع و قد المسئولية و أبوك شربك الصنعة علي أصولها .. بس بما أني ندل زي ما الأشاعة بتقول... فأحنا مش حنبقي نيجي هنا كتير زي الأول.. خلص قهوتك يا سي السيد و بينا علي قهوة المحاورات..

أمشير : بجد.. بجد يا خواجة حتغو.. حتمشوا من هنا .. يا ألف نهار أبيض..

سي السيد : بقي كده يا أمشير .. ما كنش العشم .. بينا يا سكوب..

و أتجهنا الي باب القهوة...

أمشير : و حساب المشاريب...

سي السيد : أبقي أكتبهم علي حساب سكوب..

أمشير : سكوب .. الله يخرب بيوتكم .. الحمدلله أنكم مش حتعتبوها تاني..

سكوب ( من بعيد ) : يا ابني بنقوللك حنروح نشوف حبايبنا و راجعينلك تاني...

( هذه الجملة حتي لا أتخلي عن مكاننا المفضل في حالة حدوث مغامرة جديدة لعصابة "حساس"..)

دخلت أنا و سي السيد قهوة المحاورات .. قهوة منظمة و روادها خليط من جميع الوظائف و التيارات .. يغلب فيها لعب الشطرنج علي الطاولة و الدومينو... أكاد أعرف جميع روادها .. و تصاعدت عبارات الترحيب بنا.. بينما أتي صوت ابن مصر من ركن بجانب الشباك صائحآ..

- سي السييييييييد .. هنا .. إحنا هنا ...

كان يلعب عشرة طاولة مع عصام ذا جريب فروت .. و لا تكاد تراهم من دخان الشيشة الذي يتصاعد حولهم...

سي السيد : شفتوا جايب معايا مين ... سكوب

أبن مصر : يا ما جاب الغراب لأمه .. انت جيت من ايطاليا أمتي يا نهيق أفندي...

سكوب : اللهم ما يطولك يا روح .. لموا الدور منك له.. انتم ظالمني و عهد الله...

عصام : يا جدع دول بيهزروا .. دول دايمآ كانوا جايبين في سيرتك بالخير... أقعد أقعد ... شاي و سحلب هنا ياد يا متولي..

سكوب : تعيش يا جريب فروت .. شكلك كده ابن ناس .. بس معلهش.. شيلوا الهباب اللي بتدخنوه ده علشان ريحة المعسل بتبقي ملياني لما برجع البيت .. و مراتي بتجبرني أني استحمي .. و أنتم عارفين ايه العلاقة اللي بيني و بين الحموم...

أبن مصر : وحياة الجركن اللي في ايدك .. و الا الزمزمية اللي مخايلنا بيها رايح جاي... أتنيل أقعد من غير دوشة .. و بعدين تستحمي أزاي و المنطقة كلها مافيهاش ميه بقالها يومين.. انا امبارح غسلت رجلي بأزازة ببس... دو ياك.. نحس دكر..

سكوب : أآآآه صحييييح .. يا حلاوة مافيش ميه ..يبقي ما فيش حموم.. بس مافيش أخبار حترجع أمتي .. انا نفسي أتقطع من طلوع السلم و نزوله بجركن الميه...

عصام : َدَبش.. قشطة.. شوف آخر الأخبار .. كلها خوازيق..

ابن مصر ناظرآ الي عصام بقلق : خوازيق .. خوازيييييييق اييييه.. فسر ... أرمي الزهرو اخلص..

عصام : هو انا حرميه كام مرة .. الدور عليك يا مولانا.. ( لحظة صمت ) .. آه خوازيق.. فيه ماسورة ضاربة و علشان يغيروها وزير الأسكان حيدعم المنطقة كلها بالخوازيق .. و يا ويله اللي حيعترض أو حتي يفتح بقه .. حينوبه واحد...

سكوب : انشالله الواحد ما استحمي و لا طفح الميه من أساسه...

أبن مصر : اتحجج يا خويا أتحجج .. آهي جاتلك عالطبطاب ..

سكوب : أنتو فطرتوا و الا لسه... الواحد خارج من بيته علي لحم بطنه...

يفتح سي السيد شنطة جلدية صغيرة معه و يخرج منها ورقة ملفوفة بها نصف رغيف بلدي به طعمية و سلطة و يعطيه لي بدون أن ينطق بكلمة..

سكوب ( متوجسآ ) : مافيش في الشنطة شوية طرشي..

يرمقه سي السيد بنظرة نارية و لكن دائمآ بدون أن يتكلم..

سكوب : خلاص يا اسطي .. ماشي السندوتش كده .. نعمة .. بس مالك يا جدع .. انت مش عاجبني النهاردة .. من ساعة ما شفتك و انت مسهم و بتفكر .. و لا بتزعق و لا بتشتم و لا بتبرطم زي عوايدك.. انت عيان يا خويا ؟؟

سي السيد : حد قرا الوفد النهارده ؟

ابن مصر : ما انت عارف .. انا من زمان مقاطعهم و مقاطع أخبارهم ... هوباااااااااااا دورجي ... وريني حتطلع من الخشبة ازاي يا فالح... ايه... ايه اللي مكتوب فيه النهارده ؟

سي السيد : فكرة بمليون جنيه.. استني و اتفرج...

و فجأة وجدنا سي السيد يشمر بنطلونه حتي ظهر شرابه المقلم.. و ربط جميع زراير جاكتته... ثم أخرج كرافتة حمراء بها كمية من البقع لا بأس بها و ارتداها فوق الجاكيتة.. و لكن ما أدهشنا حقآ و هذا الطربوش بدون زر الذي وضعه فوق رأسه ... ثم أزاح الكرسي و ووسط صيحات أبن مصر و عصام الغاضبة أغلق الطاولة و صعد فوق المائدة ..

يتبع

[yasovinas]

الله عليك يا سكوب استاذ والله كمل كمل

[omtmam]

مش ممكن يا سكوب الراجل و العيال افتكرونى اتجننت من كتر الضحك اللى ضحكته انت فظيع كمل كمل واحنا سامعين :angry: :angry: :angry:

[Scorpion]

أدار سي السيد نظره بين الحاضرين الذين بهتوا من منظره .. و خيم صمت شديد علي المكان .. و توقف الجميع عن فعل ما كانوا يقومون به .. بينما وقعت طابية و فيل من فوق لوحة شطرنج قريبة...

في منتهي الهدوء فتح سي السيد الشنطة الجلدية التي يحملها و أخرج منها زجاجة صغيرة سوداء تشبه زجاجات أدوية الزكام..ثم بصوت جمهوري جعل الذين يمرون أيضآ في الشارع يتكالبون للدخول الي المقهي صاح :

لا تقول اليابان و لا لبنان...

روشتة قديمة نزلت من السحاب...

كتبتها فهيمة .. اللي كان مكشوف عنها الحجاب...

داوت بيها أجيال .. و خبتها فوق عمود ...

و شيء زي الخيال ... وقعت في ايد جدي محمود...

شَربة الحاج محمود ... شربة الحاج محمود ..

تنزل الدود ... و تعالج وجع السنان...

تفك المعقود ... و تنعش اللسان ...

تورد الخدود ... و تخليك حصان...

شربة الحاج محود .. مطلوبة في امريكا و استراليا و اوربا..

و لكن علشانكم يا أهلي .. يا ناسي .. يا جيراني ..انا عايز آخدكم في أحضاني .. و حنبيعها لأهل المحاورات بخمسين ساغ .. نص جنيه .. يا بلاش .. مين عايز .. مين يشيل ...

كل هذا الوقت كنا في محاولة مستميتة لجعله يرجع الي مكانه مرة أخري .. ما بين شد و جذب .. و خبط فوق رأسه.. حتي تمكننا أخيرآ من أجباره علي الجلوس.. بين نظرات الأسف التي رمقنا بها رواد القهوة ... و التي قابلتها نظرات أعتذار من جانبنا..

أبن مصر : معلهش يا جماعة .. سي السيد بعافية شوية .. أصل حماته نازلة عندهم بقالها اسبوع ..و الميه مش مكفية عندهم..

سي السيد : ميه ايه يا عالم .. آه يا بلد .. آه يا بلد.. و قام مرة أخري محاولآ الصعود فوق المائدة ...

أبن مصر : الواد أتجنن .. و عهد الله أتجنن.. شده يا عصام .. شدوه الله يخرب بيوتكم .. حيلم علينا القهوة ... أنا ايه الي خلاني انسي شنطة القلل .. كنت لبسته واحدة و خلصنا ..

سكوب : مالك يا سي السيد يا حبيبي .. مالك يا بابا .. ما تقلقنيش أبوس أيدك .. أقعد و سمي كده ... مش عايز الساندوتش .. و الله ما أنا طافحه .. خده .. خده و كله انت يا خويا ...إرجع لعقلك أبوس أيدك ...

عصام : أنا نفسي أفهم ايه العلاقة بين الوفد و اللي بتهببه دلوقتي ..

سي السيد ( بصوت متهدج ) : ما هو لو قريتوا المكتوب .. حتعملوا أكتر من كده ... ليه .. و علشان أيه .. هما أحسن مني في ايه .. اكمنه بيدرس طب ... طب ما أنا خريج تجارة و عطارة.. و أفهم في الأمواس و المقصات كمان ..

سكوب : يا عم كلمنا كلام مفهوم .. يقطعك و يقطع عيشتك يا شيخ

سي السيد : اقرا انت يا عصام الخبر ده اللي كاتبه فواز باشا ..

و ناول عصام جريد الوفد وأبتدأ عصام في القراءة :

الحمد لله أنه مازال في شعبنا من يفكر ويبتكر ويخترع.. الحمد لله أن شبابنا مازال بخير.. وان المخروب الموبايل لم يتلف آمالهم.. ولم يستغرقهم الاعجاب والانبهار والدهشة والتطلع طوال اليوم إلي هذا الجهاز الذي انفقنا عليه اكثر من خمسة مليارات جنيه في ظروف صعبة نأكل فيها بالدين!! المهم ان اسبوع شباب الجامعات بالمنصورة كان فرصة عظيمة وثمينة للتوصل لاختراعات علماء المستقبل..

فمثلا توصل الطالب ابراهيم عيد ابراهيم بطب المنصورة إلي دواء جديد فعال تمت تجربته علي اكثر من 55 مريضا بأمراض مختلفة وكانت نسبة نجاحه اكثر من 98% من المرضي حيث حصلوا علي الشفاء التام والسريع من امراضهم.

يتكون العلاج من مكونات طبيعية وآمنة ويفيد في إذابة حصوات الكلي والحالب والمثانة ويذيب الاملاح بأنواعها ومدر للبول وموسع للحالب..

كما يخلص الجسم من املاح اليوريك.. ويفيد كثيرا في علاج الضغط.. ويزيل الازمة المصاحبة لمرض السكر.. المهم ان العقار ليس له اعراض جانبية ولا توجد موانع لاستخدامه..

دوس هنا

سكوب : الله أكبر .. طول عمرك ولادة يا مصر .. حاجة آخر جمال .. الكلام ده لو صح حتبقي حاجة جميلة جدآ..

سي السيد : اههههههههههههههههههه.. اه.. اهههههههه شيلوه من قصادي .. شيلوه لا أدبحه البني آدم ده ..

سكوب : حلمك يا جدع .. الله .. هو فيه ايه يا جدعان.. حد يفهمني..

أبن مصر : يفهمك ايه بس يا سكوب .. ما تشغل مرة الأسلاك اللي ملفوفة تحت فروة دماغك دي ... طالب .. طااااالب .. يعني لسه تلميذ بيدرس .. اللي ما بيشوفوش ريحة عيان من اساسه و دراستهم في مصر كلها نظري .. خلاص .. شوية أعشاب علي شوية طحالب علي هباب أزرق و هوباااا عمللك دوا سحري .. و هوباااااا ادوله عنبر عيانين بحاله يجرب فيهم .. اشي كلي ... و اشي امراض عفشة الميه بأنواعها .. و اشي ضغط .. و اشي سكر.. و اشي أملاح البوريك و السميط .. و بالدوا ده قفل عنبر كامل وشفاهم كلهم بالصلاة عالنبي .. وكلهم روحوا بيوتهم بالفيل الأبيض اللي راكنه البني آدم اللي بيقرا المقالات دي ..

عصام : يعني وزارة الصحة .. و المعامل .. و شركات الأدوية كلها يا سكوب ممكن يقفلوا من بكره الصبح .. مادام ما شاء الله عندنا نوابغ مش محتاجة للكلام ده... و سلام عشان خضر العطار...

سكوب : آآآآآآآآآه صحيح ... الواحد ما فكرش في الناحية دي خالص..

سي السيد : مش حرد عليك ... عادتك و الا حتشتريها ... بس يا اخي ما عرفش ليه .. بحبك لله في لله... ايه رأيكم بقي .. عندي حق و الا لأ أعمل كده في بلد زي اللي احنا عايشين فيها دي..

عصام : عندك حق ونص...

متولي القهوجي : يا سي السيد..

سي السيد : خير..

متولي : اعمل ايه في الناس دي...

سي السيد : ناس مين..

متولي : اللي واقفين طابور بره علشان يشتروا الدوا السحري بتاعك...

تمت

( فكرة مستوحاة من حوار مع الأستاذ عادل أبو زيد )

[seastar44]

الله على الحاجات الحلوة دى ياأستاذ سكوربيون ....

بتوع السيما تايهين عنك فين ... إنت ممكن تكتب سيناريو وحوار ... ولا أجدع سيناريست فى بر مصر ...

حقيقى إنت موهوب ... ربنا يسعدك ..

[عصام]

:blink: :blink: :blink:

الجديد .. والجميل فى نفس الوقت .. هو احتكاك القصة بالواقع الذى نعيشه .. من خلال حوار كوميدى مكتوب بحرفية شديدة ..

فكرة عبقرية .. من إنسان بنحبه .. وبنحترمه

:blink:

[إبن مصر]

مبروك افتتاح قهوه المحاورات!!!!!

الان اشد على يد اخى سكوب واستأذنك فى الى جايه !!ممكن؟؟؟؟؟؟؟؟؟؟؟؟

[Scorpion]

اشكر من ساهم في تشجيع افتتاح قهوة المحاورات ...بكلمة او تعليق... العزيز جدا ياسو ... مدام abotmam .. ابو جزمة كاوتش باتا seastar44 الشهير ب "فلسع قبل ما تتمسك" ... و العزيز عصام اللي محجوزله حتة دين زومبة .. بس قدام شوية.. لما رجلنا تاخد علي القهوة الجديدة ....

ابن مصر كتب :

واستأذنك فى الى جايه !!ممكن؟؟؟؟؟؟؟؟؟؟؟؟

اسمها قهوة المحاورات يا اخي العزيز.... يعني قهوتنا كلنا ... و انت مش محتاج اي اذن انك تكتب... بالعكس ده انت لازم تكتب.. بس من غير قلل وحياة الغالي عندك.. احسن نافوخي مش ناقص... fsh::

ملحوظة شخصية : بجد بجد افتقد تعليقات ناس بعزهم جدا.. كنت متوقع الاقي ردودهم المشجعة و التي كانت ترسم ابتسامة كبيرة فوق وشي و جوا قلبي... بس نسيت انهم مشيوا...

[عصام]

و العزيز عصام اللي محجوزله حتة دين زومبة .. بس قدام شوية.. لما رجلنا تاخد علي القهوة الجديدة ....

:blink:

:blink:

:blink:

:blink:

[mb14]

أستاذ سكوربيون

:blink: :blink: :blink:

[G.G]

ملحوظة شخصية : بجد بجد افتقد تعليقات ناس بعزهم جدا.. كنت متوقع الاقي ردودهم المشجعة و التي كانت ترسم ابتسامة كبيرة فوق وشي و جوا قلبي... بس نسيت انهم مشيوا...

و اخيرا ,, ا كتشفت.. جانب مضئ في حكاية رحيل الأعضاء دي !

ax: أنه كان حافز لناس طيبين أوي ,أوي ,,أوي.. للكتابة و للإبداع و للإشراف ..

بجد أشكر الظروف!!

و كمان ,,بجد,

,موضوع جميل أوي .. :blink:

ذكاء ,,و خفة دم ,,و جمال روح ..في مجمله و كل تفاصيله!

يللا,,كمان,,زيدنا ابداع .. :blink:

[Ahmed Mohsen]

وددت أن أقول الكثير .... :blink:

ولكن ..... mfb:

ماذا أقول بعد كل ما قيل .... :blink:

أي قول لن يقول أي قول أزيد مما قيل .... :blink: :blink:

ولكني أقول أني يجب أن أقول .... :blink:

فلأقول : :blink:

"وحياتك يا سكوب تتوصي بسي السيد قوي" s-: me0: :huh:

[Salwa]

ياجماعة من فضلكم ...عاوزين واحد شاى تمام ...

آهو احلى شاى بس تلاقيه هنا فى قهوة المحاورات ......شاى مخصوص ..فى القهوة المصرية الأصيلة مش تقوللى كافتيريات آخر الزمن اللى يعمل لك الشاى ويقدم لك صينية مليانة حاجات ومحتاجات وديكورات وشاى ملهوش اى طعم ..

المهم الشاى ........

مبروك عليكم افتتاح القهوة المصرية الأصيلة ...بادارة ابن حتتنا سكوب ...آهو مننا فينا ...وعارف طبعنا .

بس فين الربابة ؟؟

عاوزين عم فهمان ييجى يحكى لنا الملاحم بتاعة زمان ...وابو زيد الهلالى والشاطر حسن ....وادهم الشرقاوى ..

ياجماعة محدش يقرب للترابيزة اللى فى الركن دى بتاعتى ....

مالكم ؟؟؟

اصلنا بنتفرج على جلسة فى مجلس الشعب ...متذاعة على الهواء

مالك ياسكوب ؟ بتقرب كدة ليه من التلفزيون ؟؟؟

- حاسلم عليهم ....سلام الله على الأغنام ...

مفيش فايدة فيك ياسكوب اوعى حد يسمعك ....؟؟

- هو انا قلت حاجة غلط ....انتوا واخدين بالكم منى ليه ...ما تتشطروا عليهم .....حكم ..

[yasovinas]

الله عليك يا سكوب

بس ممكن وحياة الواد جونيور

ربنا يتم فرحته

ممكن اطلب منك طلب

معلش بعد اذنك ده بس من العشم

ممكن توصي سي السيد يحجز لي زجاجتين من الدوا ده احسن مفاصلي واجعاني :angry:

[Scorpion]

عزيزي mb14

اشكرك علي التشجيع .. فهو ما نحتاجه نحن معشر المؤلفين الملسوعين .. بس من فضلك بلاش كلمة استاذ دي .. بتجيبلي ارتوكاريا...

أختي العزيزة .G.G

يا رب يخليكي يا رب .. كلام كبير ما استحقهوش بجد...

عزيزي أحمد محسن ...

قل ما تقول .. بس وصي انت سي السيد عليا .. آخر مرة لبسني قضية حمير.. مين عارف لو اتزربن بجد حيعمل فيا ايه ؟؟؟

مدام سلوي :

الترابيزة اللي حضرتك أخترتيها .. ما حدش حيهوب جنبها .. و لما حتيجي انشاءالله أحلي شاي .. بنعناع مقطوف من جنينتنا ... حيوصللك علي صينية نحاس مشغولة بايد مصرية ..

بس بجد .. سلام الله علي الأغنام .. كان تعليق حرفي في منتهي البساطة و لكنه في "الجون" ...

ياسو...

بصراحة ... بصراحة... ما كنتش متوقعها... زي العسل :angry:

[سقراط المصري]

جميله وفيها فكره جديده يا سكوب.

للأمام سر

تا تا تارار ، بيب بيب (بحاول اقلد موسيقى المارش )

:angry:

سقراط

[Salwa]

هو فيه ايه ياجماعة ؟؟

الساعة بقت داخلة على خامسة ومفيش حد يعنى ؟؟

- اصل الكل مشغول اليومين دول ...

- ف.ايه ياسى السيد ؟؟

- فى المستقبل اللى عمالين يطبخوه فوق ؟؟

- ياه ..ده انت انهاردة فايق ورايق ...

- ماهو خلاص .....انا قررت اريح دماغى ...وعينية كمان ..لاعاوز اسمع ولا اشوف اخبار ..

- طيب وباقى المجموعة فين ؟؟؟

- اللى راح ينام ....واللى راح يسجل اسمه معرفش فين ؟؟واللى راح المسرح العائم ..

- المسرح العائم ؟؟؟

- قصدى حزب الحكومة يامدام سلوى ..

- الله ؟؟ مين دول اللى هناك ؟؟ مش دول مجموعة الشعراء بتوعنا .

- ايوة ياستى ....دول بقى اللى بيصرخوا على الورق ..

- طيب ما تناديهم يقعدوا معانا ؟...الله ...ده ابن مصر وصل ..

- كيف حالكم ؟؟؟؟؟؟؟؟؟

- اهلا اهلا ابن مصر ...عامل ايه معاك الصيام ؟؟

- يادوبك فطرت وقلت آجى اشرب الشاى معاكم ...ايه اللى فى ايدك ده يامدام سلوى ؟؟

- استنى بس لما اسلم على الجماعة ...اهلا مهيب ..اهلا جنيدى

كيف حالك اسامة ..ازيك يابنت يامصرية ...ازيك ياشانا ...منور يادكترة ...ازيكم كلكم ......اقولك ايه ده يابن مصر ....

- دى مقتطفات من كتابات خوسيه ساراماجو ...تعرفوا ياجماعة حال البلد بيفكرنى بايه ؟؟؟ ...ربنا يجعل كلامنا خفيف عليهم ..

لما مرة بيقدموا ساراماجو كحائز على جائزة نوبل وبيتكلموا وووو وووو ...لوزيرة الثقافة ايام الحزب الشعبى .....هناك عندنا فى اسبانيا ...قالت بسرعة قبل ما تشوفه ..ايوة ايوة انا عارفاها سارة - ماجو .دى وقرأت لها كثير وبتعجبنى !!!!!

يعنى تخيلوا ياجماعة ؟؟؟ وزيرة الثقافة بجلالة قدرها بتحسب ساراماجو واحدة ست واسمها سارة ؟؟

ويظهر هنا زى هناك ..........كله بيتعين بالواسطة ..

- يعنى يامدام سلوى نطيتى من موضوع لموضوع كعادتك دايما ..ماتقولى كنتى بتقرئى ايه ؟؟؟

- ايه ياسكوب ؟؟؟؟؟؟ مش تقول مساء الخير ؟؟؟

- لأ بقى انا حقول بونجور...اشمعنى بس المسا اللى يبقى خير ؟؟

كل اليوم يكون خير ...

- كنت ياسيدى بنقرأ احدى كتابات سراماجو ولسة معملهاش كتاب ..هو لسة فيه طبعة صغيرة للجيب لحد دلوقت ..

هى زى حكاية فيها حكمة رائعة اسمها الجزيرة المجهولة ..

انا حترجم لكم الحكاية كلها اللى تتاقل بالدهب ...بس ده بعدين على رواقة فى يوم كدة فى باب الشعر عندنا فى المحاورات ..

- ايه ياستى يعنى انتى تشوقينا وتسكتى ؟؟؟

- لالالا ياسى السيد .....ححكى لك الخلاصة .

- زى مانتم عارفين ان ساراماجو برتغالى فالحكاية دى من وحى

ايام ماكانت البرتغال مسيطرة على البحر ...

- يقال ان كان فيه ملك يعيش فى قصر ضخم وهذا القصر له ابواب كثيرة لكن اهم بابين كان باب المطالب وباب الهدايا التى تهدى للملك ...وكان الملك دائما يظل عند هذا الباب وكان لا يهتم كثيرا بباب المطالب ( مش عاوز وجع دماغ ) ..

وحتى تقابل الملك يجب ان تمر على اكثر من وزير واكثر من عامل ...والمهم فى يوم حضر احد النبلاء ...( يعنى اللى ممعمهش فلوس قوى ) ..وطلب مقابلة الملك وذهب لباب المطالب ....طبعا الملك مرضيش يقوم من مكانه وظل الرجل واقفا بالباب ولا من مجيب .....وعندما الح كثيرا ...خرج عليه الوزير فقال له اريد مقابلة الملك وسأله لماذا ؟؟؟ قال اريد ان يعطينى مركبا ......( وعلشان الوزير يريح دماغه ) ..ارسله الى مساعده ....والمساعد ارسله الى مساعده ...وهكذا وهكذا ...حتى استقر به المقام امام ........احدى عاملات النظافة فى القصر ..

قالت له ياسيدى العزيز لن تستطيع مقابلة الملك ...صرخ الرجل ...صمم على مقابلة الملك ....صمم وصمم ...

بعد صراع عنيف قرر الملك الذهاب لرؤية الرجل عند باب المطالبات ...طلب الملك كرسى ليجلس عليه واحضروا له كرسى من الخشب ...غير مريح لجسده المرفه ...ليس ككرسى العرش ..

بدأ الملك يسخر من مطلب الرجل ؟؟

لماذا تريد المركب ؟؟

لأنى اريد ان ابحث عن الجزيرة المجهولة ...

وهل توجد جزيرة مجهولة ؟؟؟؟ ان كل الجزائر موجودة على الخرائط ...

يامولاى ...انها ليست موجودة على اى خريطة ولهذا هى مجهولة وانا اريد ان ابحث عنها ..

اذن ....اذا وجدتها انت فهى لن تكون مجهولة ...اذن ستكون من حقى لأنها ليست مجهولة ...

كيف ستكون من حقك ؟؟؟...انك لاتعلم بوجودها ؟؟

انا لااعلم بوجودها لأنها غير موجودة لكن فى حالة عثورك عليها ستكون موجودة وستكون من حقى .........

ياجماعة انا اتأخرت وبكرة حكمل لكم باقى الحكاية ..

- مفيش فايدة فيكى .....

- ليه بس يابن مصر ...والله حكمل لكم باقى الحكاية بكرة

- سلام عليكم .......

[Scorpion]

يا الف نهار ابيض .... مدام سلوي نورت القهوة عندنا ... شفتي .. مكانك كان دايمآ محجوز ما حدش هوب جنبه .. و آدي الشاي بالنعناع بتاع حضرتك اجيبه بنفسي .. و ابن مصر هو اللي قاطف النعناع من الجنينة الل جنبنا ...

و بعد ما تشربيه في رواقة .. تكمللنا حكاية المركب بتاعت الكاتبة الكبيرة سارة مانجو ... و الا يعني وزيرة السقافة الأسبانيولية أحسن مني ...

انتي لسه ما خلصتيش الشاي ....

[Salwa]

ايه الحلاوة دى ؟؟..ده انهاردة كلكم هنا ...ياريتنى جيت من بدرى .

- ابدا يامدام ياسلوى ...اصل سكوب كان بيكلمنا على برلسكونى ويحكى لنا على نوادره ..الراجل ده كل ساعة فى حال آل لازم يسأل الأول بوش وبلير ...ناس معندهاش مبدأ ..حاجة تحرق الدم.

- كام مرة قلت لك ياهاندى متتكلمش وتتحمق وتحرق دمك ...شوف صاحبك سى السيد اخد قرار يريح دماغه ...

- آه ..وآل ايه دلوقت بس بيفكر يخاوى الولاد وعمال كل شوية يتفرج على صور الأطفال .

- لا ياهاندى هو بيقصد يقول لنا بطريق غير مباشر ان مفيش براءة وصدق الا عند الأطفال ..

- ايه يامحمد ياجرمون ....هو انا كل ما اقول حاجة لازم تحللها وتفلسفها ؟؟ ..بقى هو بقى قصده كدة ؟؟ ده سى السيد بسيط وعلى بلاطة كل حاجة عنده ..

- ايه بلاطة دى ياخى انت وهو ؟؟

- ياجماعة روقوا هو حصل ايه ؟؟ هو انتوا جايين تتلككوا ؟؟

ماكل واحد يفهم اى حاجة زى ماهو عاوز ...

- سمعتوا آخر نكتة ؟؟

- لالا قول ياسكوب ..

- بيقولك واحد اميركانى وواحد بلدياتنا اتقابلوا فى مؤتمر ...راح الاميركانى قال احنا السنة اللى فاتت طلعنا عشرة القمر ..

راح بلدياتنا قال له وايه يعنى ؟؟ ماحنا الشهر الجاى حانطلع مية الشمس ...راح الاميركانى بص له باستغراب قوى وسأله ..الشمس ؟؟ دول يتحرقوا فى ربع الطريق ...

راح بلدياتنا ضحك وقال له ..هو انت فاكرنا اغبياء ؟؟؟ ماحنا حانطلعهم بالليل ...

- حلوة ياسكوب ....

- ايه يامدام سلوى فين بقيت الحكاية ؟؟

- ماشى ياعابر سبيل حكملها لكم بس بشرط ..

- ايه هو ؟؟

- بلاش كلمة ...مع السلامة ياقلم ...قول دايما معايا ياقلم .

- ماشى الكلام ....كملى الحكاية .

- اسمعوا بقيت الحكاية ..احنا وصلنا لحد فين ؟؟ آه افتكرت ..

[Salwa]

قال الملك ...

- لماذا تصر على وجود هذه الجزيرة ؟؟ ومن انت حتى اعطيك مركبا ؟؟

- ومن انت حتى لا تعطينى مركبا ؟؟

- انا الملك ..وكل هذه الأرض ارضى وكل المراكب فى البحر مراكبى .

- لالا..انت تنتسب لهذه الأرض وما عليها ..وما فى البحر ومراكبه .........وليس العكس .

- ما معنى كلامك ايها البحار ؟؟ ماذا تقصد ؟؟

- انت بدونهم لاتساوى شيئا ..لكن من على هذه الأرض بدونك يستطيعون الابحار .

- آه...يبحرون بأوامر منى ببحارتى وبقبطانى .

-سوف نرى .....وسوف تعطينى مركبا عند سماعك هذه الكلمات ..

- اى كلمات ؟؟

(( كانت فئة كبيرة من عامة الشعب تقف بباب المطالب وتستمع للحديث بين الملك والرجل الذى يطلب مركبا ..كل ينتظر دوره حتى يقدم مطالبه ))...زهق الناس من الانتظار ...

صرخ الناس ...اعطه مركبا ....اعطه مركبا ..

فتح الملك فاه ليأمر عاملة النظافة ان تسرع وتنادى الحراس ..لكن ؟؟ استمر الناس يصرخون ...اعطه مركبا ودعه يرحل ....

رفع الملك يده يأمر الناس بالصمت ....( وجد ان هذه هى افضل طريقة لاسكاتهم ) ..

- سوف اعطيه مركبا ...لكن لن اعطيه بحارة ولا قبطان فليبحث هو عن بحارة ...ليس لدى بحارة لجزر مجهولة ...اذهب الى رئيس الميناء واعطه هذا الكارت (( قال هذا وهو يستند على كتف المرأة العاملة ويكتب كلمة فى ظهر الكارت )) ..

- قرأ الرجل ما خطه الملك ...اعط لحامل هذا الكارت مركبا لا يكون كبيرا لكن يجب ان يكون متينا ومضمونا ويبحر سريعا ..

عندما رفع الرجل عينيه لم يجد الملك امامه ...لكنه وجد فقط عاملة النظافة ..