قهوة المحاورات

[إبن مصر]

يادى النور يادى النور .. سيلافى هنا ... نورت يا بنتى ....

انت بقى عايزالك غيط ورد بحاله...

ما تطوليش الغيبه

[se_ Elsyed]

.. إجرى يالاه هاتلي فرع نيل .. ;)

قشطه يا سي لا في

أهي دي فايدة من فوايد الإلتحام بالقاعدة الشعبية للمؤتمرات الجماهيرية ..

واحده زي سي لا في راكنه عربيتها المرسيدس إس الـ 28 قدم وبتركب الميكروباصات وبتتشعبط في الاتوبيسات وبتزوغ من الكمساريات وكل ده عشان تلتحم بالبوليتاريا وتعيش عيشتهم وتحس بإحساسهم ..

مرحباً بالرفيقة سي لا في بين جموع الشعب العرقانة ...

وبالمناسبة دي هات يابني واحد نيكوتين هنا لـ سي لا في لو كانت بتعفر ..

[عصام]

سك يابنى ع النيكوتين ..

خليها واحد قهوة سادة بن تقيل .. عشان سى السيد .. مش المودموازيل ;)

جى جى مين يا اسطى .. stnd::

فووووووووق بقى ..

ما كنتش اعرف انك بتتسطل من الكلام عن المخدرات .. mc:

[se_ Elsyed]

جى جى مين يا اسطى ..  ;)

فووووووووق بقى ..

طب أستر عليه يا عصام والله كنت لسه قايم من النوم ولا شربت قهوة ولا ظبطت صماويل دماغي ولا شمعت الفتلة ..

تقوم تفضحني فضيحة اللحمه السوداني في جمعية زحمة والناس بتموت بعض عشان تتصور جنبها ..

ماكنش العشم ...

على العموم جي جي او سي لا في كلهم بناتنا في الخارج ومش هايشمتوا فينا .. بالعند فيك ...

[c'est la vie]

أبى إبن مصر .. من منطلق يابنتى يعنى clp:: أعترف أنى لاأجيد شكر الآخرين أو تقديرهم .. لكن من زمان وانا نفسي في غيط أكتب علية أرض فضاء ملك الحاج سيد وأولادة وليست للبيع clp::

واحده زي سي لا في راكنه عربيتها المرسيدس إس الـ 28 قدم وبتركب الميكروباصات وبتتشعبط في الاتوبيسات وبتزوغ من الكمساريات وكل ده عشان تلتحم بالبوليتاريا وتعيش عيشتهم وتحس بإحساسهم ..

أيوة صحيح هذا الكلام :ph34r: أنا ركنة عربياتى كللللها في المَـنْـوَر لأنى آثرت الإحتكاك بقوى الشعب العاملة .. فأنا قلبي مساكن شعبية ...

.. ونتيجة هذا الإحتكاك عندى كلام وكلام وحاجات .. ولكن أنا أخاف أن أتعدّى علي قوانين وضوابط المنتدى .. وأنا جبانة الصراحة.. ده لما بلاقي رسالة خاصة بابقي عاوزة أحدف الكمبيوتر من الشباك .. clp::

[Salwa]

السلام عليكم يا احباب مصر ..

هشام عبد الوهاب : ...مش عاوزين تريقة من فضلكم ؟؟ ..هى حبيبتنا آه ...احنا حبايبها لأ ؟؟ مكانتش ضللت عليهم هم وسابتنا احنا ؟؟

سى السيد : ..امسك ...انت متأثر بنانسى عجرم ؟؟ حاتقولى آه وتقوللى لأ ؟؟

سكوب : ...هو احنا فى قهوة المحاورات والا قهوة المشاكسات ؟؟

عجرم ايه وغلب ايه ؟؟ شفتوا اللى حصل امبارح ؟؟؟ طيب كنتم تعالوا شوفوا فى روما عندنا الناس كلها كانت كويسة وبس بتسمع كلمة شكرا شكرا ..

سى لا فى : ...هو انا نسيت حاجة ؟؟ والا فاتتنى حاجة ؟؟ اصلى مكنتش هنا ...وساعات كدة بيتهيألى انكم بتتكلموا فى موضوع وآجى ارد الاقيكم ابتديتوا فى موضوع تانى ..هو ايه اصله ده ؟؟

شعنونة :...لالا وانتى الصادقة ..ده يظهر البعيد عن العين بعيد عن القلب ...ده انا بعدت شوية وجيت لقيت ناس معرفهمش نازلين فية تقطيع ومحدش رد ؟؟

سلوى : ...ازاى بقى ياشانا ؟؟ طيب انا قلت ان كلمة شعنونة دى بالذات مش معناها هو المعنى القريب الغريب اللى الناس فاكرة ؟

انتى زعلانة بجد ؟؟

شعنونة :...يعنى ايه بجد ؟؟؟ انتوا عاملين زى اللى بيكتب حروف من غير النقط ......!!!

عصام :...ايه بقى النقط دى ؟؟ ليه ؟؟ بنكتب صينى ؟؟ والا هيروغليفى ؟؟

شعنونة : ...والا شفتى اللى بيقول ان مفيش ولا واحدة ست متفوقة فى اى حاجة .......حاجة تفرسسسسسسسس

انا مش عاوزة ارد .

سلوى :..ده شئ طبيعى لما حد يتكلم فى موضوع وميكونش عارف هو بيقول ايه بالضبط ...او فجأة يلاقى الموضوع كبر (( عليه )) وافضل حل لخروجه من المأزق ده ....هو ...المعلومات وان مكنتش عنده يدور عليها ..

سكوب :..الله الله هو فيه ايه ؟؟

سلوى : ..ابدا بس مسألة عدم تفوق النساء بتغيظ شوية ...طيب بس تعالى نتكلم فى موضوع (( الأدب )) ..يعنى مفيش اديبة مشهورة ومش عارف ايه ؟؟؟..طيب وراحت فين mary shelly

اللى هى من اول القرن التاسع عشر ...عملوها تاريخ يعنى يقولك ...(( قبل وبعد ))..فى الأدب الرومانتيك ( اقصد فى عصر الرومانتيك )..برائعتها ..فرانكشتين ..اللى معتقدش ان اللى مش مقتنع بتفوق النساء قرأها ...ويمكن يكون شافها فى التلفزيون والا فيلم ...!!

وفى نفس الوقت jane austen برضه كانت بتكتب روايات حب اشتهرت جدا ......والنقاد (( على فكرة كانوا كلهم رجال طبعا ))...اتأخروا خمسون عام حتى يكتشفوا ان رواياتها كانت عبارة عن اعتراض وفضح لكل النظام الاقتصادى والسياسى فى هذه الفترة من التاريخ ...وطبعا كانت هذه الحقائق موجودة فى كتبها بطريقة مستترة .........

سى لا فى : ...ياه......مكنتش عارفة ان جين اوستن مشهورة كدة .

ابن مصر : ...ازاى ياسى لافى ؟؟ ده هى اللى كتبت ابتسامات ودموع اللى عملوه فيلم باسم صوت الموسيقى ومثلته جولى اندروز ؟؟ وشفناه فى السينما ..

شعنونة : ..ايه ده ؟؟ ...ده انت جدو بقى ...

اخناتون : ...لالا ده انا اللى جدو ياشانا ...طيب عاوزة كمان ؟؟

ازيدك من الشعر بيت ؟؟

سى السيد : ....انا معاكم ...هات لى يابنى واحد شاى هنا ..

اخناتون :...فى القرن العشرين ...فرجينيا وولف عملت اكبر قاعدة للأدب الحديث المودرن يعنى ..جمعت حواليها دائرة كبيرة من المثقفين ...وكانوا مسميينها ..دائرة bloomsbury ..

(( على فكرة برضه كلهم كانوا رجال )) ...والشكر ليها ان بعد اربعين سنة بدأ ما يسمى ببناء الرواية ....يعنى معنى هذا انهم دمروا كل القواعد التى كانوا يسيرون عليها فى القرن التاسع عشر وبدءوا فى بناء شئ مختلف تماما ...يعنى كما تعودنا القراءة حاليا ..بنفس الطريقة ........وكل هذا بدأته (( امرأة ))..

حقيقى كان يوجد كثير من الرجال الأدباء وهذا شئ طبيعى ...

ولكن ليس معنى ذلك انهم كانوا اكثر تفوقا من النساء الأديبات !!

سلوى : ...يا استاذنا هل تتذكر مقولة ...(( ان تاريخ الحروب يكتبه المنتصرون ))..بالزيادة او بالناقص ...هو ده نفس الشئ ..

يعنى حتى الأدب المنتشر فى هذه الفترة هو ده اللى وصل لنا ..وليس معنى ذلك انه افضل من الأدب الحالى ..

ويعنى بالضبط بالضبط كما يحدث الآن فى عصرنا الحديث مازال فيه رجال يعتقدوا ان المرأة اقل من الرجل ..او ..

سكوب : ...ايه يامدام سلوى ؟؟ ماهو من كام سنة برضه كان فيه شوية علماء طلعوا علينا وقالوا ان معاهم ما يثبت وبالتجربة ان الرجل الأبيض مخه ارقى ومتقدم عن غيره ..

سلوى : ...هو ده نفسه ....يعنى الخوف من الغير معروف ...

لما حد ميعرفش بالضبط اللى قدامه بيستخدم مبدأ خير وسيلة للدفاع الهجوم ...

بس ده دواؤه سهل ....

سى السيد : ...هاها ...وفين ده يامدام سلوى ؟؟

سلوى : ....فى المكتبات .........

.تصبحوا على خير...نتقابل بكرة ..

[Scorpion]

مدام سلوي ..

بالرغم اننا في القهوة بعد الأفتتاح الأول ابتدينا نقرا اللي بيحصل فيها و نحاول نفهم الل بين السطور ... من غير تعليقات أو ابداء أراء فيما كتب .. و لكن المرة دي اسمحيلي .. مش قادر ...

بجد ... بجد ...

رائععععععععععععععععة .... cr((:

[c'est la vie]

بصراحة ... أنا لا أعرف جين أوستن ... ولكن سمعت سمع خير عن فرانكشتين ؟؟.. hypr:

يتكون لدي إعتقاد جازم أن أكثر المهن خفة دم هم السائقين , أمس في أحد السيارات كان السائق يكلم صديقة الذي بجانبة عن مشكلة حصلت بينة وبين زميل آخر ثالث , وعندما صرح زميلة أنه فهم المشكلة أو (get it )

قام الحاكى قال لة : عليك كلوووب (عليك نور بالبلدى lo::) .. ثم يستجدية ليقف بجانبة ويقولة مين سبب المشكلة هو او صديقة ..فراح قال لة .. يبقي مين السبب في الحب القلب والا العين ؟.. أنا راضي بحكمك يابرنس "

[حرفوش]

حرفوش:

سلام عليكم يا سكوب

سكوب:

وعليكم السلام يا ريس, أنت شكلك مش غريب, لكن أنت مش من الزباين الأبونيه, و إسم سيادتك إيه بقى إنشاء الله؟

حرفوش:

طبعا مش حتعرفنى بوشى الجديد, الله يجازى الناس الطيبين, إللى جم يكحاوها . غيروها.

أنا حرفوش بتاع قهوة الحرافيش, و إحنا إتقابلنا قبل كده فى المحاورات, لكن صورتى كانت غير كده خالص, و من يومين, دخلت المحاورات , لقيت وشى إللى الناس عارفينى بيه إختفى, وقعدت أدور عليه, لكن ياصاحبى, زى ما يكون : فص ملح و داب.

علشان كده, حطيت وش جديد, و قلت بالمرة أغير المهنة, من الحرفشة, إلى إللى بيسميه المسقفين " خداع البصر" لكن فى الحقيقة, الإسم المظبوط هو " الحاوى"

سكوب:

و على كده لازم يكون عندك حاجات كتيرة تقولها, لأن المثل بيقول: ياما فى الجراب يا حاوى"

حرفوش:

الحقيقة الزمن هو اللى حاوى, و اليومين دول, الزمن حاوى.. لجميع البلاوى.

سكوب:

فال الله ولا فالك ياراجل, ما كل حاجة تمام أهوه, إيه إللى مزعلك؟

حرفوش:

الحقيقة أنا مبسوط إنى مريت على قهوتكم, لأنها بتفكرنى بالقهوة اللى كان صاحبها جدى الله يرحمه, و سماها قهوة الحرافيش. و أنا أيامها كنت صغير, لكن كنت بفهم فى السياسة, لأنى بعد المدرسة, كنت آجى القهوة أساعد جدى و عمى فى خدمة الزباين,إللى كانوا كلهم ولاد بلد و جدعان, و كانوا بيناقشوا كل حاجة, و كان فيهم اللى بيفهم فى السياسة, و اللى بيفهم فى الإكتساد, و الى بيفهم فى الطب, و كما كان فيهم اللى بيفهم فى الميكانيكا, و السمكرة, و المكوى, و الكل آخر إنسجام. أيام راحت.

سكوب:

ما إحنا عندنا نفس العينة فى المحاورات, و عندنا ناس متخصخصة فى جميع المتخصخصات, يعتى الدنيا لسة بخير.

حرفوش:

يا أخويا, الزمن غير الزمن, الناس الكويسة موجودة فى كل زمان, و ما بنقولش إن الناس بقت وحشة, لكن الإلفة بتاعت زمان إتغيرت, عارف ليه؟

سكوب:

لأ مش عارف, قولى إنت.

حرفوش:

إنت عنك وقت الإول؟

سكوب:

عندى وقت الدنيا كله, آديك شايف القهوة فاضية, و مش لاقيين واحد يوحد الله, و يظهر الشتا بدأ يعمل عمايله, غير إن زباين القهوة الأبونيه عندهم مشاكلهم و همومهم, و إلى بيجى, يخطف واحد قهوة على الواقف, و يجرى, كانه رايح الوزارة.

حرفوش:

أهو ده الكلام إللى كنت عايز أتكلم عنه, الناس بقت مشغولة, بقت عمالة تفكر فى أرتفاع البطالة, و فى البيروقراتية, و فى زحمة الشوارع, و فى وساخة الحوارى, و فى فاتورة المحمول, و فى ضريبة لم الزبالة, و فى الضرائب الخفية اللى إسمها رسوو و رسوم إضافية, و رسوم إضافية للإضافية, و فى تجديد رخص العربية, و إستخراج بطاقات تحقيق الشخصية, و الرقم القومى, و مصاريف المدارس, و الرشاوى, و الإكراميات, و الواسطة, و الكوسة, و الدروس الخصوصية, و فى مسلسلات التلفزيون, و الفضائيات, و فى جواز البنات, و أرتفاع أسعار السلع, و أزمات المرور و خاصة لما سيدنا المبارك معدى من قصر, لقصر.

كل دى هموم تهد جبل, و بعد كده تفتكر الناس الحلوين دول عندهم وقت يقعدوا على القهوة و يدردشوا زى الناس بتاعت زمان؟ أنا قلت لك الزمن غير الزمن.

أيام زمان الناس كانت عندها صبر, و خفة دم, و فهم الأصول, و كلمات زى:

تكرم

إتفضل

حقك عليا

عيب إحنا إحوات

و الله أنت متغدى عندى بكره

إللى فى جبيبى, فى جيبك

أنا سداد, بس أؤمر

دحانا واكلين عيش و ملح

رقبتى ليك

راحت فين الكلمات الحلوة دى؟

اليومين دول, لما تتلم شلة, و ينطق فيهم واحد بكلمة معجبتش التانى, تلاقى القعدة الحلوة إتقلبت إلى معركة,

الناس بقى خلقها ضيق, و اختفت الكلمة الكويسة, و الإبتسامة الدافية.

فى ناس شغلتها اليومين دول تنتقد كل رأى, و تحاول تفهم همه عايزين يقولوا إيه, تلاقى إن كلامهم عبارة عن خطب رنانة, و مواعظ فى الوطنية, و كان ما فيش حد وطنى غيرهم.

الواحد منهم تتكلم معاه بالزوق, يزقك, و يخاطبك كأنه أعرف العارفين, و لما تفنط كلامه, تلاقيه مالهوش معنى غير الرفض لأى آراء إلا آرائه.

أيام قهوة الحرافيش, ماكانش فيه الكلام ده, كنان إللى يختلف, يتكلم بهداوة, و بحب, من غير غضب, و تهديد, ووعيد, وبدون إتهام كل رواد القهوة بالجهل, و من غير ما يزعل حد.

سكوب:

لكن الناس مش زى بعضها, فى كل الأزمنة, و فى كل العصور, الناس بتختلف.

حرفوش:

الناس تختلف, ماشى, لكن بحب, و هداوة, مش بالشخط, و النطر, و التعالى, و إعتبارنا كلنا جهلة ولاد......

أنا طولت عليك, لكن كويس إن القهوة كانت فاضية, علشان نتكلم الكلمتين دول. أسيبك دلوت, و سلملى على حبايبنا رواد القهوة, أنا عارف كل أخبار القهوة, ناسها و الله العطيم سكر, علشان كده , حازور القهوة بإستمرار, و حأقول لعمى عليها, علشان هو بيموت فى كلام ولاد البلد الجدعان

سكوب:

بكره السحلب عليا يا حرفوش.

[عصام]

ينصرف حرفوش .. بينما يدخل عصام الذى يعتقد انه رأى هذا الشخص من قبل ..

عصام: سكوب .. إنت يابنى

سكوب: أهلا بالباشا .. أجيب الشيشة؟

عصام: مين اللى كان هنا دا؟

سكوب: مين؟ تقصد حرفوش؟

عصام: أيواااااااااااااااه .. حرفوش .. اسم الله عليك

سكوب: اسكت .. دا متضايق أوى .. وواخد الدنيا على صدره بزيادة

عصام: ليه؟

سكوب يحكى له ملخص الحوار

عصام: تصدق يا سكوب؟ .. انا طول عمرى اشوف الراجل دا .. واحس ان عنده كلام كتير عايز يقوله .. بس دايما كنت اسأل نفسى .. هو ليه دايما ييجى يقعد فى القهوة على جنب كدا .. يسرح .. ويشرب شوية القهوة .. وبعدين يقوم يروح .. لا سلام ولا كلام ..

سكوب: وهو حرفوش بس اللى كدا .. ما هو ياما ناس بتيجى القهوة وتعمل زيه كدا بالظبط وبعدين تروَح ..

عصام: أيوا يا سكوب .. عارف .. بس دا غلط .. والله غلط

سكوب: وأكبر غلط كمان يا كبير .. بس تقول إيه؟

عصام: إسمع يا سكوب .. الناس اللى بتقعد هنا فى القهوة دى بتتكلم فى إيه؟

سكوب: فى أحوالنا يا كبير

عصام: والناس اللى ما بتتكلمش .. بتقعد تسمع إيه؟

سكوب: بتسمع أحوالنا يا كبير

عصام: ولو الشوية اللى بيتكلموا سكتوا .. هايحصل إيه؟

سكوب: اللى بيسمعوا مش هايلاقوا حاجة يسمعوها يا كبير

عصام: وبكدا ندور بقى على حد يحل لنا مشاكلنا

سكوب: أوامرك يا كبير

عصام: تحط ورقة على الباب .. اللى هايدخل راح يكتب واللى ما يكتبشى يخرج

سكوب: طار فى الهوا شاشى وانتا ما تدراشى .. يا جدع

عصام: طرفه شاور لى شاور لى عليه ... إيييييييييييييييه .. فوق .. إنت هاتصاحبنى؟!

سكوب: ماشى يا دنيا .. هو عشان قهوجى تعاملنى كدا .. ما تنساش انا معايا إيه؟

عصام: ييييييييييييييييه .. هانبدأ بقى .. أقولك؟ .. أنا ماشى .. ماتنساش الورقة

[Salwa]

سلوى : مساء الفل ..

عصام : مساء الجمال ...مالك يامدام سلوى هو فيه ايه ؟؟

سلوى : ابدا ابدا ..انهاردة عيد ميلاد مسلمة مصرية ...وانا وعدتها نحتفل بيها هنا ..قول لسكوب وسقراط وسى لافى ..وكل الناس ان الحفلة كمان ساعتين ...

سى السيد : اما انا محضر لها مفاجأة ؟؟؟ ...شوية فلافل بيتى ومنسيتش الكاتشاب ..

سكوب : ده بدل التورتة ؟؟؟ ..انت حاتضحك علينا ؟؟؟

اخناتون : التورتة علية انا ....

الأفوكاتو : وانا علية الجاتوهات ....

عادل ابو زيد : وانا علية المشاريب ..

هشام عبد الوهاب : وانا علية الزينات ..

ابن مصر : زينات مين ياعم ؟؟ زينات صدقى ؟؟ قصدك شوية البلالين ؟؟

هشام عبد الوهاب : ياعم شيلنى من نافوخك ...انت مستنيلى على الواحدة ...طيب انت حاتجيب ايه ؟؟

ابن مصر : كفاية عليكم انى اتنازل واقعد معاكم ...

سى السيد : الله الله الله انت حاتخبط فى الحلل ليه ؟؟؟..

حرفوش : مش قلت لك ياعم سكوب ...ناس زمان غير ناس دلوقت ....دول لازم يتخانقوا كل شوية ومحدش طايق حد ....

سى السيد : لالالا ..آل على رأى المثل اقعد عوج واتكلم عدل مانا فاكرك ياحرفوش وفاكر افكارك وكنت زمان بتنكش شعرك وتقول لنا الموال اللى هو ...خليك محضر خير امال كدة زى زمان ..طيب مانا كدة بدافع عنك انت كمان يعنى عاجبك يقول انا حاتعطف عليكم واشرفكم بوجودى ؟؟؟ طيب يعنى احنا شوية فى البلد ؟؟؟

ابن مصر : انا قلت كدة ؟؟؟ انتوا على طول بتغيروا الكلام ؟؟؟ انا كنت بهرج واقول حاتنازل واقعد معاكم من باب التهريج بس والله ...

حرفوش : آهو هو ده قصدى ياعم سكوب ..........

الناس كلها مولعة وكل واحد مستنى للتانى اى غلطة علشان ينفجر فيه ....الحق مش على ده ولا ده الحق على الزمن اللى احنا فيه ...آل وجايين نحتفل ؟؟؟ روقوا ياجماعة حاتطفشوا الزباين ........بركة اللى مسلمة لسة مجاتش ...عاوزينها تهرب من الدوشة ؟

سلوى : مين حايغنى لها ؟؟

فيولين كنج : انا حعزف لها قطعة موسيقى تحفة ..

سلوى : ...الله ؟؟ ...نسينا الشمع ؟؟؟.......

اخناتون : انا وصيت على الشمع مع التورتة ...29 شمعة ..

سلوى : عقبال ما نحتفل معاها بيوم زواجها .......

المجموعة : يارب يجعل ايامنا كلها اعياد ....

[c'est la vie]

وكذلك كنت أذهب للقهوة قديماً .. لكنها لم تكن مثل قهوة المحاورات .. لكن كانت زى مانقول كدة قهوة المصريين : ) ..

كنت أذهب إليها وأنا صغيرة من جدى .. يارب يشفية يارب .. أتذكر القهوة .. بها صورة لعبد الناصر .. وصورة لأولاد مالك القهوة .. ورف خشب تقف برقة علية عدد من الجوزات ( جمع جوزة ) تنتظر أن يأتى لها عدلها ويطلبها أحد من القهوجي .. ورخامة عليها أكواب للشاى والقهوة ..

أتذكر أنى طوال زيارتي كنت طول الوقت ألعب وكأنى بلعب مع الدنيا كلها مع أنى كنت ألعب لوحدى .. وأتكلم وأضحك بصوت عالي جداً.. من غير ما أدرى .. وما أن ألحظ ضحك رواد القهوة .. آتساءل , هل فعلت شيء ؟! .. أجرى بسرعة خارج القهوة .. بسرعة .. ثم أعود مرة أخرى في نفس المكان الذى كنت ألعب بة .. في قهوة المحاورات .. نفس الموقف .. أكلم نفسي بصوت عالي.. جداً ..ثم أشعر بالخجل وأتراجع .. وأجرى .. لكن مازلت اضحك وأقرأ وأكتب وأضف رد ثم أسجل خروج وأجرى بسرعة.. برة القهوة ..: )

[se_ Elsyed]

الحمد لله جاي أعمل إقتباس من المداخلة نفسها خير اللهم ما أجعله خير القبس ضرب في وشي .. يالله حصل خير

سي لافي كتبت

ورف خشب تقف برقة علية عدد من الجوزات ( جمع جوزة )

سيادتك لو كنتي بتشوفي جِوز جمع مذكر سالم لجوزة على الأرفف يبقى كده كنتوا بتروحوا غُرزه - ولا مؤخذه - لإن الشيء ده بيوجد في الغُرز بس .. وأنا لا أعتقد ذلك البته ..

إذاً فالأمر إلتبس عليكي يا مودمازيل سي لا في وكنتي تقصدي الشيشه..

لإن زيرز بيج ديفرنت بين الجوزة والشيشة :

- الجوزة .... أصغر حجماً من الشيشة ومكونة من جزئين .. جزء معدني نُحاسي وهو القاعدة ويوضع بداخله الماء - وساعات في الأرياف بيجيبوا برطمان مخلل أو مربى قزاز وبيمشوا الحال به على أساس إن الجيش بيقول إتصرف - وموصولاً بهذا الجزء قطعة خشبية بها فتحه علوية عشان يوضع فيها الحجر اللي بيوضع فيه المعسل والفحم ،

والجزء الأخر هو قطعة من البوص ( وتُسمى في العرف - الغابة - )

- الشيشة - فهي مختلفة تماماً من حيث الحجم والشكل فهي مكونة من جزئين وهي الجزء السفلي الزجاجي والذي يوضع به الماء وبه فتحه علويه تُشبة شكمان السيارة ويُسمى " الرفاص " وبرضوا فيها الجزء اللي بيوضع فيه الحجر ، والجزء الأخر هو اللاي ( الخرطوم ) .

والناس بقى بيتفننوا في زركشة وزخزفة الشيشة بحيث تبقى عروسه في النهاية ...

كنت مره في السوق الحره في مطار الرياض ولقيت شنطة سومسونايت معروضه بشكل جذاب وشكلها فخم في الفاترينة وبأبص جواها لقيتهم مصممين شيشة " بورتابل " والشنطة متقسمة بمعلمه بحيث كل قطعه لها مكانها وتحسي إن اللي شايل الشنطة ده رجل أعمال لا يُشق له غبار ..

وميزة الجوزة عن الشيشة إنها أخف في الحركة وتلاقيها منتشرة جداً في الأرياف والفلاحين رايحين وجايين من الغيط وكل واحد شايل جوزته في إيده والفاس في الإيد التانية تحت شعار " يد تبني ويد تحمل الجوزه "

أما الشيشة فداهيه ومكانها الوحيد يا إما في البيوت أو المقاهي لصعوبة حملها إلا في الشنطة السموسونايت :angry2:

وعلى فكرة دلوقت بيعملوا شيش صغيرة وبيعملوا حاجة كده يولعوا بها الفحم وبتشتغل على ولاعه السيارة ( العلم في خدمة الشيشة ) بحيث الواحد لو مسافر ولا حاجة والكيف حبك يضرب شيشه في الطريق يُمكنه أن يركن في جنب على الهاي واي ويعيش حياته ..

وهذا يحدث في سيارات النقل الثقيل في مصر فقط .. فممكن سعادتك تبقي ماشية في طريف مصر - إسكندرية الصحراوي وتلاقي في فحم مولع بيتطاير على كبوت سيارتك من التريلا اللي ماشية قدامك وده ليه .. لإن السواق بيعمل دماغ شيشه والتباع ( المُساعد ) اللي معاه عمال يرص له وهات يا شد أنفاس وليذهب الأخرون اللي ماشيين على الطريق إلى الجحيم وغالباً ما بتبقى الشيشة مغمسه ( بمخدرات ) فتلاقيه بعدين نفسين تلاتة حاسس نفسة إنه سايق عربية بورش وطاير بها وعمال يعمل غرز وخمسات امريكاني بالعند في س س بتاع معايير السلامه ..

وبأنتهز الفرصة بإني أتقدم بإعتذار لإبن مصر وعصام ملوك الشيشة وذلك لإني أعتديت على تخصصهم :D

على كفرة قبل إنتهائي من كتابة هذه المداخلة جاءتني مكالمة هاتفية من إبن مصر وعصام ومعاهم محمد جرمون ليقولا لي بإنهم إستدرجوه االموجود حالياً في مصر في زيارة سريعة وشربوه

شربوه

شربوه

إيه يا عم شيشة ؟

ياريت

والعياذ بالله كابتشينو

وسيقوموا بنشر تلك الصور على مواقع النت المختلفة لإبتزازه .....

كان معكم س س مراسل المحاورات من أمام مقهى نجيب محفوظ بالعباسية

[حرفوش]

سكورب:

ما شاء الله, القهوة النهاردة عمرانة, ترش الملح ماينزلش على الأرض, يابختك يا محاورات , يا صاحبة القهوة يا أصيلة. أنا لازم أطالب بعلاوة إستثنائية , و مش لازم تكون فلوس, و لكن زباين أكثر.

عصام:

أنا شايف صاحبك حرفوش قاعد على جنب, و مش بيكلم حد.

سكورب:

يا عصام يا خويا, لو خدت بالك, حتلاقيه بيحرك شفايفه, مع إنه مش قاعد مع حد.

عصام:

يبقى بقى صاحبك إتجنن, هو فيه حد عاقل و يكلم نفسه؟

سكورب:

إنت غلطان فى دى يا عصام باشا, إللى بيعمله حرفوش هو إللى بنعمله كلنا, بس إحنا بنفكر فى سرنا, وهو بيفكر بصوت عالى, كلنا بنكلم نفسنا, فهل كلنا مجانين؟

عصام:

معاك حق فى دى يا سكوب.

مدام سلوى:

صباح الخير عليكم جميعا.

الكل:

صباح الخير عليكى يا سلوى هانم.

مدام سلوى:

أمال فين إخناتون, و إبن مصر, و س س , و احمد سعد, و أسرة أبو زيد, و مصرى, و سى لا فى, ؟

سكورب:

همه فى أودة التليفزيون, بيتفرجوا على آخر أخبار السياسة الداخلية.

مدام سلوى:

أنا شايفة إيقاع سريع فى الأحداث الجارية, و عدوى الإصلاح الحمد لله إنتقلت إلى القضاة, و مستنيين الأفوكاتو يرجع لنا من الأجازة علشان يشرح لنا أسباب الصحوة, بعد ما شرحلنا أسباب الوكسة.

حرفوش:

صباح الخير يا ست سلوى, لا مؤاخذة , أنا سمعت آخر كلمتين, و قبل كده كنت بأكلم نفسى.

سكورب:

مش قلتلكم إنه كان بيكلم نفسه؟ و ده معناه إن فيه حاجة شغلاه.

حرفوش:

صدقت كالمعتاد يا سيد سكوربيون, آخر مرة كنت هنا كنت زعلان على أحوال القهاوى اليومين دول, أقصد الحديت و المناقشة, إلى إتغيرت عن أيام قهوة جدى الله يرحمه صاحب قهوة الحرافيش.

لكن كل إللى قلته وقتها كوم, و إللى شفته فى جولة على قهاوى أخرى اليومين إللى فاتوا, كوم تانى.

سى السيد:

إنت يا حرفوش يا خويا بتقضى عمرك تلف على قهاوى؟

حرفوش:

أنا بلف على القهاوى علشان أعرف الناس بتقول إيه, و بتفكر إزاى, و آخر قهوة زرتها هى كفاتيريا حديثة( زمنيا), قلت أشوف القهاوى المودرن إللى بتعلن عن بضاعة جديدة, و " أفكار مبتكرة" , و بعد عشر دقائق كان نفسى أرفع قضية عليهم لترويجهم بضاعة تحت شعارات مزيفة, و إتهامهم بالغش التجارى.حيث وصفوا كفاتيريتهم بإنها:" مقهى.. جميــــــــل", و هى لا جميل ولا حاجة.

عادل أبو زيد:

قول لنا إيه إللى شفته, و لا داعى لأى إستهلال, خش على الموضوع على طول.

حرفوش:

دخلت الكافتريا, طلعت غرزة, و كل ما يدور بها هو أفكار مخدرة, و زباين مخدرين, بيهلوسوا.

كنت حزين على أسلوب النقاش فى القهاوى العادية المحترمة, بالمقارنة للى كان عليه أسلوب الحوار أيام قهوة الحرافيش, لكن كل إللى بيتقال فى الكفاتيريا بيتعارض مع الأغراض المعلنة كأسباب لفتحها.

كل واحد فيهم عمال يكتب حاجات مجعلصة, و لما حد تانى من خارج " دائرة الفكر" يكتب كلام معقول, تهجم عليه الألسنة المسعورة, و تسفه كلامه, و تعارض آراءه, بدون حتى مناقشتها.

واحد يا ولداه, دخل, و كتب بأدب جم, محترما الجميع, و أنا شخصيا إحترمت كلامه, لكن لقيت ردود لا تمت بلب الموضوع, تتهم الغلبان بالعمالة, و السطحية, و التخلف, و كل ما هو موجود فى قاموس اللسان الزفر,

و بعدين لقيت فى الكفاتيريا حجرة مكتوب عليها " سيكسولوجى" أى " علم الجنس"

دخلت فيها علشان أشوف مين إللى بيديرها, لقيت واحد مسمى نفسه" دكتور إيروتيكا".

قلت يانهار إسود؟ دى الترجمة الحرفية للكلمة دى معناها قبيح قوى و يودى فى داهية, و لكن بعد ما شفت كيف يرحب صاحب الكفاتيريا, و زبائنها الدائمين, بالزباين الجدد, صعب علىّ كام واحد كل عيبهم أنهم زينا, "متخلفين, و دقة قديمة, و عملاء, و جهلة, و غير متجعلصين, و غير معقدين"

عرفتم ليه بأكلم نفسى؟

سكورب:

ليك حق يا حرفوش, بس يمكن إنت حساس شوية, و فهمتهم غلط؟

حرفوش:

الحل بسيط, شوف بنفسك, لكن ماتسألنيش فين عنوان الكافتيريا, أو الغرزة دى, لأنى إذا إديتك لك عنوانها, أبقى بأروّج عن بضاعتها, و أبقى إرتكبت معصية.

سي السيد:

ماهى غلطتك من الأول, أيه إللى يوديك فى أماكن زى كده؟

حرفوش:

هو لو ماكنتش زرتها, كنت حأعرف شكلها إيه إزاى؟ أمال أنا بقول لكم ليه؟ علشان تعرفوا بنفسكم, و تكلموا نفسكم زى العبد لله.

أبو حلاوة:

أنا لازم أزور الكفاتيريا دى, بس ماتفهمونيش غلط, أنا مش رايح هناك علشان أخش قاعة " اليكسولوجى", و أشوف إيه إللى بيحصل فى عيادة " إيروتيكا", كل إللى حأعمله إنى حأحضر "بروفيل" لصحاب الكافاتيريا, و نشوف ما هى العقد النفسية إللى مسيطرة على هذه العقليات, مثل بارانويا, سكيتسوفرينيا, و ناراسيسم, و شوية جنون عظمة.

سي السيد:

أيوه يا خويا, أديك لقيتلك حجة علشان تخش فى أماكن " فور إكس" للبالغين فقط.

أنا بس بأهزر يا دكتور أبو حلاوة يا آخر سكّرة.

مدام سلوى:

يا سكوب, من فضلك واحد جنزبيل على حسابى, علشان حرفوش يروق دمه.

حرفوش:

الله يكرمك يا ست يا طيبة, و يجعل لك فى كل خطوة سلامة, بعيدا عن كفتريات الفكر الملتوى.

و أنفضت القعدة لتأخر الوقت.

تم تعديل 18 أبريل 2005 بواسطة حرفوش

[Scorpion]

سكوب : الله لا يسيئك يا حرفوش يا خويا ... مالناش دعوة باللي بيحصل في القهاوي التانية ...

حرفوش : بس انت ما شفتش اللي انا شفته يا سكوب ... ديه حاجات....

سكوب (مقاطعا) : يا عم حاجات و الا محتاجات ... كل فولة و ليها كيال.... وكل قهوة و ليها زباينها ... احنا بقي قهوة المحاورات و زبايننا بيحبوا يتكلموا في مواضيع تانية خالص.... و عمرنا ما جيبنا سيرة اي قهوة تانية لا بالخير و لا بالشر... يعني عارف ساعة لما قالوا ان القهوة ديه مش بتاعتنا و سارقينها ... الواحد زعل شوية... بس سكت ... و مارحش حتي عاتب من عشمه .... اشتري دماغك يا حرفوش... و خلينا في الجد.... اخبار القضية بتاعت محكمة زنانيري ايه ???

حرفوش: اجلوها للمرة العشرتاشر... ربنا ياخدهم....

محمد : ازاي الفكرة ديه كانت غايبة عليا ......... وجدتها... وجدتها يا بشرية...

فايولين كينج : فكرة.... هو انت بقيت تفكر كمان.... بينا يالاه من القهوة اللي حتفقدنا ديه....

محمد : اقعد يا سي فايولين كينج و اسمع السيمفونية ديه .... مش تقوللي الفور سيزونس و دوق الدندورمة بتاعتك اللي مش حتاكلنا عيش ناشف...

فايولين كينج : سمعنا يا ريس حنتيرة ....

محمد : شوف....

[حرفوش]

حرفوش:

كلامك مضبوط يا ياسكوب , و مكانش فيه لازمة إنى أفتح الموضوع ده هنا, لكن إللى شفته خلانى أكلم نفسى, و أتحسر على الأخلاق. و على رأى ياسمو.... ما علينا.

سكوب:

أهو ده الكلام المفيد, نسب كل واحد فى حاله. و الصواب و العقاب من عند الله.

حرفوش:

نتكلم فى حاجة تانية بدل من سد النفس ده, تفتكر ثورة القضاة دى حتنجح؟ أنا سمعت إن واحد منهم فى مكان مهم نفى أن هناك ثورة, و إن كل شيئ على ما يرام, و عسل.

عادل أبو زيد:

لازم نتحرى الدقة فى الموضوعات المنشورة فى الصحف, و هذا إستهلال لا بد منه, و سوف تكشف الأحداث عن نفسها.

سى السيد:

تكشف إيه و نفسها إيه؟ دى نفسها مسدودة, و يظهر إن الحكومة شدت ودن المستشار إللى نفى تذمر القضاة, راح ضارب إسفين.

احمد سعد:

أهو ده كل إللى واخدينه منكم, أنتم ضد أى شيئ إيجابى, و تريدون قلبها ضلمة, مالها الحكومة؟ ماهى ماشية زى الفل أهوه, كفاية سلبية, و يمكن تفتكروا أنى بأهرج, و لكنى فى حب مصر مستعد أعمل أى حاجة.

ياسو:

تعالى يا ملك الكمنجة إضرب لنا حتة سيمفونية بعد الكلام الحلو ده.

حرفوش:

أنا حأستأذن, لأن عندى صداع, حروح آخدلى إسبرينتين, و اشرب فنجان قهوة محوجة تعدل المزاج, الله يمسيكم بالخير, و أشوفكم بكرة بإذن الله.

سكوب:

آهو كده الكلام المعقول, هدى نفسك, تاكل ملبن.

حرفوش:

سلمولى على الغايبين لما تشفوهم.

تم تعديل 18 أبريل 2005 بواسطة حرفوش

[Salwa]

مساء الخير ياجماعة الخير ..

G.G..: .مساء النور يامدام سلوى ..انتى فين من الصبح ؟؟

سلوى: ابدا ..الصبح كنت مشغولة وبعد الظهر برضه ...لسة يادوب راجعة حالا من عند الدكتورة .

عصام :..خير فيه ايه يامدام سلوى ؟؟

سلوى : ابدا ..كشف دورى مفيش مشاكل ...بس اجمل حاجة انى اول ما وصلت ..من حوالى ساعتين كدة ...بصيت لماكينة القهوة ..وعينية زغللت ...شاورت عقلى اروح وآخد واحد قهوة من الماكينة ؟؟...لقيت واحدة كانت فى انتظار دورها قالت لى بضحك ...ماتشاوريش عقلك القهوة دى تحفة وجربى كدة ...وعنها وماكدبتش خبر ...وبصراحة بصراحة ...الحق ياسكوب الحق ...دى طلعت من الكافيه دى روما ..

سكوب :..هى جت على البن ؟؟..ده فى اى حتة ...اى حد يلاقى حد فالح فى حاجة على طول ياخدها ويعمل زيها وكمان يحط عليها اسمه ...على الأقل يامدام سلوى دول سابوا الاسم مغيرهوش ..

سلوى :..عارف المفاجأة ياسكوب ...ان فى الأماكن دى وانت فى انتظار دورك بتتصاحب على الناس (( صحوبية مؤقتة كدة ..ماهى الناس فى البلد دى عشرية يعنى ))..وجت سيرة اليورو والغلاء والعيشة ..وقعدنا نتريق على الوزيرة اللى اقترحت ان تتعمل شقق للشباب

عبارة عن 30 متر مربع ...واجمل حاجة ان المشاريع دى حاتتنفذ ....يعنى فضلنا نضحك ان لو واحد اتجوز ميقدرش يعزم امه وابوه يباتوا عنده ؟؟ حايناموا فى المطبخ ؟؟ ده لو فيه مطبخ ....30 متر مربع ؟؟ بس آهو على الأقل حاتحل مشكلة الاسكان ...

ابن مصر : ...طيب دول بيحلوا مشاكلهم منهم فيهم تعالوا بقى شوفوا الخيبة التقيلة اللى فيها البلد العربى المشهور ...وقال ايه عندهم ( بوق يقول الحقيقة ) سلم لى على الحقيقة ..

عصام : ..انت حاتشتغل لنا تانى ؟؟

سى السيد : ..هو عاوز يقولك من غير كدة لف ولا دوران انهم اتعاقدوا مع اربعين الف اسرة المانية للاعاشة مش عارف كام سنة الى حين انتهاء بعض المشاريع الصناعية الهامة بالاتفاق والا بالتعاون مع المانيا ..

سكوب :..ده احتلال ياجدع ...اربعين الف ؟؟؟ واسرة كمان ؟؟؟ آه ..ماهو طالما كام سنة قول عشرة يبقوا لازم ييجوا بأسرهم ..

G.G.:...انا مش قادرة اصدق ...يمكن دى اشاعة ياسى السيد ؟؟؟

معقول ؟؟؟...ده واحد قريبى كان لسة جاى من هناك وبيقوللى ان كلهم هنود وباكستانيين

والكل بيتكلم انجليزى وفين وفين على ماتلاقى واحد من سكان البلد الأصليين ...شئ لايصدقه عقل ..

داروين : هو انا طفشت منكم من شئ شوية ؟؟؟

كل كلامكم يوجع القلب ...واخباركم ماتسرش عدو ولا حبيب ....

طيب مايروحوا يتعاقدوا مع مهندسين مصريين زى الورد ...وهم مالهم المصريين ؟؟

طيب شفتوا العرب عملوا ايه فى معرض جنيف......اكتسحوا الجوائز ياعمنا ... ؟؟ بس احنا ملناش بخت ...ويقولك العروبة .

حرفوش : ..ياعم داروين انت بتنفخ فى قربة مقطوعة ...ياعم دى عقدة الخواجة ...طيب تعالى هنا ........انت خواجة ؟؟؟

داروين :...لالا طبعا ...انت بتسمعنى ياسى حرفوش علشان مسمى نفسى داروين ؟؟؟...لالا ياحلو ...مانا فاهم العقد دى ومخصوص سميت نفسى داروين علشان اجذبهم ناحيتى ....

مانا لو قلت محمود ....حايقولك يبقى مسلم ....يبقى ارهابى ...يبقى ابعدنا عنه ..ومحدش حايسمعنى ..خلينى كدة كويس ...

سى لافى : ..حلوة قوى دى ......زى تجار الصين ..الواحد من دول يبقى اسمه ..لى ينج .ويسمى نفسه ريتشارد والا دانيال ....برضه اسهل ( علشان الزباين ) ...قصدى التجار اللى بيشتروا منه ..

اخناتون : ..الصين الصين ....حاتوجعوا قلبنا بالصين ...وسور الصين العظيم ..

ده احنا اول شعب عظيم فكر فى بناء سور .

هم عندهم سور عظيم .

واحنا عندنا شعب عظيم ..

مين يكسب ؟؟؟

سى السيد : ...احنا ياعمنا اللى لازم نكسب ....خصوصا بعد ثورة القضاة ..

سكوب : ..عن اذنكم ....رايح مشوار وراجع بعد ساعة ...

[Salwa]

سلوى : ...... مساء الخير ياجماعة .

عادل ابو زيد : ..... مساء النور يامدام سلوى ....مالك ؟؟ سرحانة فى ايه ؟؟

سلوى : .....من صباحة ربنا وانا عاملة زى ام العروسة يعنى فاضية ومشبوكة ...مش عارفة ليه

افتكرت المقولة المشهورة اللى اطلقها ..heraclito ..لن نستطيع السباحة فى نفس النهر مرتين .

ومع ان ده كلام قديم من ايام اليونانيين القدماء لكنه منطبق علينا اليومين دول ...

ابن مصر : .....ماهو كمان قالك يامدام سلوى ...لا انت حاتبقى انت ولا النهر حايبقى النهر ..

سى السيد :....والا يمكن من مياه النهر الساقعة ...ماهى على طول بتتغير ..وهو فيه حد مجنون

يرمى نفسه مرتين ؟؟ ..طيب ماهو تانى مرة حايحس بنفس الغلب الأولانى ...انما ايه مناسبة الحديث ده ؟؟؟

سلوى :....ابدا ...مجموعة رؤساء الأحزاب..والحركات التانية اللى عمالين يوعدونا انهم حايصلحوا الأخطاء اللى فاتت وعمالين يقنعونا بضرورة تصديقهم هم المرة دى ...وكل مرة نكتشف انهم ..

اخناتون :...متكمليش ..متكمليش يامدام ...

لفوا لفوا وخبزوا عند عبد الله ...

سكوب :.....انهاردة حصل لى فصل ظريف قوى ...كنت املأ شهادة منشأ certificado de

origen ....وجيت عند حتة بلد المنشأ و تنحت لها كدة وكأنى فى عالم تانى وجت لى هستيريا

الضحك ..

سقراط :...ليه ياعمنا مانت كنت بعقلك ...

سكوب :....ابدا ابدا ....بس شر البلية ما يضحك ...اصلى افتكرت حاجة و....

سلوى :....ايه ياعم سكوب ؟؟؟.......بمناسبة شهادة المنشأ ؟؟؟...الا صحيح لو انا مت وطلبت

اتدفن فى مصر ...وشحنونى ؟؟؟ ...لازم يحطوا علية تيكيت ؟؟؟ ..بلد المنشأ يعنى ؟؟

حرفوش :...وربى... انتم عالم تقهر ..يعنى بتلخبطونا ؟؟ طيب نضحك والا نبكى ؟؟؟

عصام :....اصل مدام سلوى خايفة يكتبوا عليها ....تايوانى والا حاجة ؟؟..يعنى مش عاوزة غش (( انسانى )) ...

هشام عبد الوهاب :...آهو انتم كدة ...كل حاجة بتاخدوها بتهريج ..مع ان ده موضوع حيوى ومهم جدا جدا ..

سى السيد :....حيوى ؟؟ ..انت اكلت ايه انهاردة ياهشام ؟؟؟

هشام عبد الوهاب :...صحيح ...من حق كل انسان يعرف مصيره حتى بعد موته ...واللى حكت لنا عليه مدام سلوى قبل كدة ..واللى اتعمل مع مواطنين مصريين قبل كدة ...يخلينا نفكر بدون تهريج فى كل ده ؟؟

عادل ابو زيد :...انا شخصيا مش بشك فى حد ...وكل الناس بريئة حتى تثبت ادانتها .

يعنى حتى السفارة حاتعاكس اهل الأموات ؟؟ ده شئ غير حقيقى ولا اصدقه ..اين الاثبات ؟؟

احمد سعد :.....هو ايه الظلم ده ؟؟؟ اعترفوا ان كل شئ تمام ...انتم بس شايفين عيوب ؟؟؟

ثم ؟؟ قولوا لنا اسماء ؟؟ ...ايه يعنى لما يعطوهم التصريح بعد ستة ايام ؟؟؟

ده ربنا خلق الدنيا فى ستة ايام ؟؟ هو فيه كدة ؟؟؟ انتوا ناس ما بتقدروش ...

اخناتون :....ياعم هات لنا القهوة ...

سلوى :....هات لنا اسبرين معاك ...

[Salwa]

سلوى : ..مساء الخير ياجماعة .

مصرى :..مساء النور يامدام سلوى ..هى ايه حكايتكم ؟؟؟ هو محدش بييجى والا ايه ؟؟ هو انتم خايفين ؟؟؟ تلاقيكم خايفين من يوم الأربعاء اياه ؟؟؟

سى السيد : ياعمنا احنا هنا بعيد عن النقابات ...

سكوب : ..بتقول النفايات ؟؟؟...نفايات ايه بقى ؟؟؟ النفايات الذرية ؟؟ والا ...

ابن مصر : ...اسكت ياسى السيد اسكت ...خليه كدة فاكرها نفايات آهى ارحم من النقابات ...

سقراط :...صح كدة ...دى النقابات بقت شبهة ياجدع ...ربنا ينتقم منهم ..وجعوا دماغى وقلبى ..هاتولى القهوة خلينا نشربها ونمشى ....آهو نشربها والسلام ...

سكوب : ..ايه ياعم انت ....هى شربة ؟؟؟...انت بتسمعنى يعنى ؟؟؟ مش عاجبك البن ؟

سقراط :..لا وانت الصادق ..........مش عاجبنى الفناجين ....هه بقى .

اخناتون : ..ليه بس هو حصل حاجة كفى الله الشر ؟؟؟ ...حصل لك تلوث والا حاجة من الفناجين ؟ اصل بعد حادثة البنت اللى ساكنة قرب مطروح اللى ماتت متسممة بسبب انها ياعينى اكلت خوخة .........(( خوخة خوخة خوخة ))..

الافوكاتو :..ياعمنا ..انت حاتغنى ؟؟ ما تكمل لنا حكاية الخوخة دى ؟؟ بجد ماتت؟؟

اخناتون :..اسكت ياافوكاتو ياخويا اسكت .....بكل بجاحة الوزير بيقول تلاقيها ماتت متسممة من اكلة سمك لأن الفواكه المرشوشة ما بتموتش ...

حايجننونى ياخويا ...اعمل ايه ؟؟؟...فضحتهم ومفيش فايدة ...آل ...وانت مايل وايه يعدلك ؟؟؟..طيب ماشى ...الاسماك من عند الترعة مسممة علشان مياه المجارى والبلاوى المتلتلة التانية لكن فيه فاكهة مرشوشة بالمبيدات ...والمبيدات السرطانية بتاعتهم ....ومتموتش ؟؟؟

سقراط : ..اصلى آخر مرة كنت هنا جالى برد والدكتور قاللى اتعديت وشربت مطرح حد مريض ...وانا مبشربش مطرح حد ...تبقى الفناجين مبتتغسلش كويس ؟

سكوب :...لأ بقى ....ده انت جاى ناويه انهاردة ....وانا ...

سلوى : ...على فكرة ياجماعة ...انهاردة ابنى قاللى حاجة ظريفة قوى قوى ...

قاللى ان فيه نوع من انواع الفخار اللى بتتعمل منه الفناجين (( طبعا متقولوش ان الفناجين بتاعة القهوة فناجين صينى اصلية ))...دى مخلوطة طبعا ..

مهما اتغسلت برضه بيبقى فيها آثار عالقة ...من اى نوع من الجراثيم ...الا اذا كان القهوجى من وقت للتانى بيضعها فى الكلور ...

وسالت ابنى ..طيب ايه الحل ؟؟ نبطل نشرب قهوة ؟؟؟...قاللى لالالالالا..حقولك خدعة حلوة ...

كل الناس بتستعمل ايدها اليمين ؟؟ صح ...فبالتالى بتمسك الفنجان من ودن الفنجان ..كلهم بيشربوا من نفس المكان ...حتى لو اتغسل الفنجان ..

قليل بقى لو لقينا واحد (( اشول )) ..

آهو الأشول ده صعب انه ياخد عدوى ....لأنه بيشرب من الناحية التانية من الفنجان ..

سكوب :...ابسط ياعم ....بس اوعى تدلق القهوة ..

جى جى :...دلق القهوة خير ....انا بقى هات لى ليمون ..وشفاطة ..مش عاوزة اشرب مباشرة من الكوباية ...

مصرى :...مساء الفل....

[سقراط المصري]

:D :D

قصه :صغيره سريعه لطيفه بنت ناس.

اشكرا على تذكري ضمن شخصيات القصه.

في الغالب لما بقرأ قصه او موضوع بحب اقوم بلعبه ظريفه

وهي اني اقرأ اول جمله مع اخر جمله مع بعض.

سلوى : ..مساء الخير ياجماعة .

مصرى :...مساء الفل....

نهاره فل ان شاء الله :D :blink:

سقراط