قهوة المحاورات

[Scorpion]

مكانك محفوظ يا ابن الأسكندرية .... بس معلش القهوة اليومين دول متأجرة لحفلة خاصة ... و مسيرنا نرجع كلنا نكتب فيها تاني ....

عالعموم ... استني .. قهوة مظبوط سريع سريع ... و المرة دي علي حساب القهوة .. ده نظامنا .. جرجرة رجل زباين .. و انت ابن سوق و بتفهم ... ارجع بقي علشان عمالين ننفخ بلالين في الحفلة ...

[MZohairy]

معانا المداخلات وخد و هات B)

معانا المحاورات واللي يقرالي في الهنا يبات B)

معانا المواضيع واللي ميقرالناش يضيع B)

محمد زهيري مفيش في القهوه غيري B)

B)

[الاسكندرنى]

بقولك ايه

سكوب بيقول القهوة متاجره

وفيها حفله باين عليك دخلت من الباب الخلفى بس لو دخلت من الشارع الرئيسى كنت شفت البللين و الد جى اللى معمول هناك تعال ياعم نروح هناك بيقولك

[الاسكندرنى]

بما اننى اجدد ضيف فى قهوة المحاورات اضيف بعض حكايتى ولكن من قهوة اخرى فى شارع اسمه السياسه

المكان مقهي كبير في الشارع السياسي المصري

الاشخاص هم اشخاص قابلتهم فى قهوه اخرى غير قهوة المحاورات

والان لنبدا الحوار الذي سيدور بين رواد المقهي

رجل علي المعاش :انتم عمالين تتكلموا تتكلموا ومافيش عمل مفيد

شاب جامعي :ازاي بس تقول كده الناس دلوقتي كلها بقي عندها وعي

رجل تلوح عليه معالم الثراء: وعي ايه يا ابني انتم عاوزين تخربوا البلد

رجل متعب ومرهق: نخرب ايه يا سيدي انت اصلا عملت ايه للبلد علشان نلاقيك من امين مخازن بسيط لصاحب شركة صرافة ونقل ومشاريع تانية

الرجل الثري : هو انتم بكسلكم ومخكم الغبي ده حتعملوا اي حاجة مفيدة البلد بخير والي عاوز يعمل فلوس محدش قاله انت بتعمل ايه

الرجل المجهد : وانت بقي الي عملت فلوس من السرقة والاختلاس والرشاوي والتهريب هو ده الي عملته للبلد

الرجل الثري : لما انت فالح كده قولي انت عملت ايه

الرجل المجهد : انا عبرت قناة السويس مع جيش مصر وحررت سينا وكنت السبب في كل ما تمتع به الشعب المصري من فخر وعزة واخرتها لقيت نفسي معاش مبكر وبسوق تاكسي وعندي اربع اولاد بجري عليهم

الرجل الي علي المعاش : روق يا اسطي طيب والله انت بطل ورفعت راسنا كلنا

الرجل الثري : ينظر له في صمت وعلي ملامحه سخرية تلوح من خلال بسمته الصفراء ويشعل في صمت سيجاره الفاخر وينظر في ساعته بقلق

الطالب الجامعي : بكرة في مظاهرة علشان الانتخابات تفتكروا البوليس حيعمل معانا ايه

الرجل الي علي المعاش : عارفين زمان كان ابويا بيحكيلي عن ثورة 19 وكان الانجليز بيضربوا شعبنا زي ما بيحصل معاكم دلوقتي

تفتكروا الشرطة دي مصريين زينا ولا انجليز برضه

يرد صاحب القهوة : انجليز ايه يا حاج دول مشيوا من زمان

يضحك القهوجي وينادي محدش عاوز يشرب حاجة بدل الكلام الي لا يودي ولا يجيب ده

شخص مثقف : يا جماعة انتم بتتكلموا بدون وعي وبدون منهج حقيقي تعالوا انا افهمكم الايدلوجية الي ورا الموضوع

طالب بالثانوي : ينظر اليه في بلاهة شديدة وانبهار يعني ايه ايدلوجية دي فرقة موسيقي ولا ايه

الثري ينظر في ساعته وينظر لهم جميعا ويبتسم علي فكرة طول ما انتم بتتكلموا كده احنا مبسوطين

ينظر اليه رجل يجلس في احد الاركان ويتابع الحوار باهتمام

وانت عاوزنا نعمل ايه يا سيدي

يرد الثري : تنتخبوا الريس لانه مافيش احسن منه

يردد القهوجي بصوت عالي : امشي يا ابن الكلب بعيد

ينظر له الثري بغضب فيجده يكلم متسول دخل المقهي

الطالب الجامعي : يدخل له اثنان من اصدقائه ويتحدثون فيما بينهم عن الكرة والافلام والعاب الكومبيوتر

ويتناسون الحوار الدائر عن السياسة

يدخل المقهي شاب له لحية كثيفة جدا وينظر للجميع في غضب وكراهية ويجلس بعيدا في احد الاركان

يتوجه له القهوجي تشرب ايه يا مولانا

يطالعه صاحب المقهي في صمت انت مستني حد يا استاذ

لا يرد عليه

وينظر له في قلق

التفت الطلبة الجامعيين للشخص المثقف وقالوا له كيف نعرف ما هي الايدلوجية

تعالوا احضروا معايا ندوة في مركز سين سين لحقوق الانسان

يطالعهم الرجل الي علي المعاش في صمت ويقول في داخله احنا بقينا ناقصين جمعيات ومراكز

يدخل المقهي شخصان ويتحدثان بصوت عالي

بكرة حنروح ونشوف حنعمل ايه في الولد الي مرمي في المستشفي ومش لاقيين له الدوا ده

يرد احدهم في ياس حنعمل ايه ادي الله وادي حكمته

يرد عليه الثاني البلد باظت الاكل ملوث والميه ملوثة والجو ملوث فاضل ايه نضيف

يضحك احد الشباب بصوت عالي جدا فاضل رئيس الوزراء اسمه نضيف

يضحك الجميع بصوت عالي

يتدخل الرجل العجوز في الحوار ماله الطفل ده

يرد احد الشخصين جاله المرض الخبيث وهو عنده سبع سنين

يقف احد الشباب لابد من محاكمة المسئولين

يرد احدهم الدولة رفضت ان يستدعي وزير الزراعة السابق للمحمكة

يطالع الجميع بعضهم البعض في صمت والم وينادي صاحب القهوة خلاص حنشطب

وفجاة يدخل مجموعة من رجال الشرطة المقهي

يفتشون عن البطاقات الشخصية ويمسكون بالشاب صاحب اللحية ويدفعونه بوحشية في البوكس بدون اسئلة وهو يصرخ ويقول انا طالب بكلية الطب وورقي كله سليم ولكن لا احد يصغي له

ويجد الظابط سائق التاكسي بدون اوراق ويقول له السائق اوراقي بالتاكسي خارج المقهي

يقول له يا روح امك سايبهم ليه في التاكسي

يقول له انا من ابطال اكتوبر وعندي وسام الشجاعة

يصفعه احد المخبرين علي قفاه صفعة مدوية

وتنهمر من عين البطل دمعة حزن والم وندم

وهو يقول لنفسه هل كنتم حقيقة تستحقون ما فعلته من اجلكم

والي امسية اخري بالمقهي

تحياتي للجميع وفي انتظار تعليقكم وتعاونكم معي فيها

واعتذر لو في اي خطأ املائي لاني اكتب الذي اشعر به وبداخلي بدون مراجعة لما اكتب

تم تعديل 9 فبراير 2006 بواسطة الاسكندرنى

[الاسكندرنى]

طالب الثانوي : ممكن تغيروا المصارعة دي شوية

عاوزين قناة ميلودي فيها روبي دلوقتي

صاحب المقهي : ادي الي انتوا فالحين فيه قوم ذاكر يا ابني انت وزمايلك دول

الي عمالين يلعبوا بالموبايل

يرد احدهم هات لنا قناة دريم اصلي بعت ماسيج عليها

طالب جامعي : يجلس في احد الاركان ينظر لهم في غضب ويقول كمان ماسيج وموبايل

طالب الثانوي : اهه وماله عاوز اتعرف علي بنات عن طريق الشات

يمر مسرعا القهوجي وهو يصرخ عندك اتنين شيشة للبهوات جنب الباب

يطالع الجميع من هؤلاء البهوات

احد البهوات : ينظر في بلادة للجميع وهو يكاد ان يغمي عليه ولا يسيطر علي نظراته

البيه التاني : يتكلم بصوت مبحوح انا مش قادر اقعد كنت خلتني اروح احسن

يرد التاني عليه تروح ازاي وانت عامل كده عاوز اهلك يموتوك

يرد عليه حد قالك اني عاوز اشد خطين دلوقتي انا قلتلك اني لسه الصبح كنت شامم مع البنت بتاعت شرم قبل ما ارجع

الفتي المثقف: يتابع الحوار في اهتمام ويقول لنفسه ما احنا كان ناقصنا البنات بتوع الموساد يدمروا الشباب دول

يدخل المقهي فجاة وبخطوات مسرعة

رجلان شكلهم متناقض

احدهم وتبدو عليه ملامح الثراء الجديدة والاخر واضح انه موظف من هيئته وملابسه

ويجلسان في احد الاركان

ويتهامسان

الرجل الثري : انا قلتلك خلص الورق بسرعة ولك الحلاوة

الموظف : وانا قلتلك طلباتي انا مش شغال لوحدي لازم ناخد فلوسنا الاول

الرجل الثري : فلوسك حتوصلك وفوقهم بوسة كمان واكتر من الي انت طلبته كمان بس الزيادة دي تكون ليك في السر

الموظف : والله انا خايف لان البضاعة منتهية تماما وممكن الناس تموت منها

الرجل الثري : يا عمي انا مش اول مرة انزلها السوق انا كل سنة بدخلها من مكان مختلف ومحدش مات ولا حاجة

الموظف : ينظر له في قلق وينظر حوله ويسرح قليلا ويري وجوه الديانة وزوجته وابناؤه

الموظف : يرتشف كوب الشاي كله دفعة واحدة ويقول اخد نص المبلغ قبل ما امضي والباقي لما تخلص اخر امضاء وقبل ما تاخد الاوراق من المصلحة

الرجل الثري : وماله انا موافق ويخرج من جيبه رزمة من الورق الاخضر ويعد 3000 دولار

الموظف : يطالع حوله في خوف يجد الجميع يطالعون الفاتنة الجديدة نانسي عجرم في شغف ولا احد منتبه

الموظف : يتنهد بصوت عالي ويدس المبلغ في جيبه

الرجل الثرى: انا حستاذن دلوقتي ويوم الاحد حجيلك اخد الورق واجيبلك الباقي

الموظف : انا كمان حقوم الحق العشا !!!!!!!!!!!!!!!!!!!!

الرجل الثري : يقوله ادعينا ربنا يكرمنا وتعدي علي خير

الموظف : يتمتم بكلمات ليس لها معني وينهض ويقسم انه سيدفع الحساب للباشا

تنتهي اغنية نانسي عجرم ويدور الملعم القنوات

ويتوقف عند قناة الجزيرة

يشاهد الجميع تعليق علي احداث المظاهرات التي كانت في مصر ومشهد رجال الشرطة وهم يضربون احد رجال الازهر

المعلم : ربنا يستر علي البلد

الرجل اللي علي المعاش هو وزميله : البلد باظت خلاص

الطالب الجامعي : يا عم ما انتم الي بوظتوها خلينا نخلص بس ونخرج من البلد دي قبل ما تغرق

طالب الثانوي : تغرق ليه هي تسونامي حتيجي علي مصر

ينفجر صاحب المقهي يا ابني قوم روح تسونامي ايه اللي تيجي مصر هي البلد ناقصة

يدخل المقهي رجل يرتدي ملابس راقية وملفتة للنظر

وجلس بالقرب من صاحب المقهي

وبعد قليل دخل احد رجال الاعمال

رجل الاعمال :يقول للمعلم خلي بالك يا معلم عربيتي واقفة امام القهوة اوع الونش خد بالك

يرد القهوجي بسرعة متخافش يا باشا

يجلس بجوار الرجل صاحب الملابس الراقية والذي ملامحة لاتدل سوي علي الوضاعة

ويتهامسان وفجاة يعلو الصوت المبلغ ده كتير

يرد الاخر بس البنت تستاهل يا باشا دي بنت ناس ومن عيلة

رجل الاعمال هو انا حتجوزها وولا ح .... ويسكت فجاة وكانه تذكر انه وسط ناس

يرد الرجل الثاني متنساش انك طالب واحدة مش سوابق

رجل الاعمال : طبعا انت ناسي ان المكان جديد وعاوز بنات جداد مش معروفين قبل كده مش عاوزين بتوع الاداب ينطولنا ويقرفونا كل شوية

الرجل الاخر : مختافش انا حجيبلك بنات زي الفل شياكة ولبس وجمال

رجل الاعمال : متنساش ان كل زابيني من كبار الشخصيات ومنهم ناس لينا معاهم مصالح كتير ومن برة

الرجل الاخر : طيب انا عندي موضوع مهم كنت عاوز اقولك عليه بس لو عندك حد يخلصه

رجل الاعمال : خير

الرجل الاخر: انا عندي واحد عنده حتتين اثار عاوز يصرفهم تمثال وتابوت منقوش بس فاضي

رجل الاعمال : طيب سيبلي الموضوع ده وانا اخلصه ليك ومتتصرفش في حاجة

الرجل الاخر : اوكي يا زعيم حمشي انا دلوقتي

تدخل المقهي فتاة في العشرينيات ترتدي ملابس رثة وتبيع بعض الاشياء غير ذات القيمة

وتدور بين الموائد يتابعها احد الطلبة باهتمام وهي لاحظت ذلك وتذهب له

الطالب : معاكي ايه يا ؟ هو انتي اسمك ايه

البائعة : ترد في دلع خدامتك ...... تحت امرك يا بيه

الطالب : انتي عارفة انا عاوز ايه اكيد

الباعئة : تبتسم في قلق وتطالع صاحب المقهي وتهمس حصلني خارج المقهي

الطالب :يلم اغارضه بسرعة ويخرج

الفتي المثقف : طالع الموقف وتحسر علي الاخلاق

وقال لنفسه امال لو مكاني يعمل ايه بقالي خمس سنين متخرج ومش لاقي حتة اشتغل فيها

رجل المعاش : يقول لزميله شفت الولد عمل ايه مع البياعة

يرد زميله الجيل ده مساكين زمنهم اسود ومهبب

وانت شايف التلفزيون بيجيبلهم ايه غير النت والسنيما

يصيح القهوجي بصوت عالي واحد قهوة واتنين شاي للهوانم ومعاهم تفاحة

يطالع الجميع الهوانم

السيدة الكبيرة : احنا تعبنا من اللف مافيش حاجات حلوة خالص

الفتاة الوسطي : ما انا قلتلك نروح بور سعيد

الفتاة الصغيرة : بورسعيد راحت عليها قلتلكم نجيب من حودة الي بيجيب الحاجة من دبي

الام : حودة حاجته غالية وانتي ناقصك حاجات كتير وخطيبك مستعجل

الاخت الكبيرة : اهو نخلص حاجة حاجة وربنا يسهل

يدخل الاب ويقول بسرعة علشان نروح انا اتهديت من اللف ومن المصاريف

مجنون الي يكون موظف ويجوز بنته

يضحك صاحب المقهي في اسي ويقول

هو مافيش حد مش بيشتكي ويطالع التلفزيون ليجد مشهد لجثث اخوتنا في العراق وهي ممدة ويحرسها جندي امريكي

الفتي الجامعي : شايف يا سيدي لازم نعمل مظاهرة

الفتي المثقف : مظاهرة علشان تتمسك تاني انت مش بتحرم

الفتي الجامعي : لازم ندافع عن اخوتنا

احد الجالسين : دافع عن نفسك الاول لما مسكوك واتبهدلت

الفتي المثقف : ياريت هو وبس كمان البنات والسيدات اتبهدلوا

صاحب المقهي : مش عاوزين كلام يجيب وجع القلب كفاية الي بنشوفه

يدخل المقهي في خطوات بطيئة

سائق التاكسي : وتلوح علي وجهه اثار كدمات

يقوم له صاحب المقهي ويحتضنه ويقول مرحبا يا بطل ويربت عليه في قوة انت بطل واحنا مش عارفين

سائق التاكسي : ينظر له في صمت وانكسار وتنزل دمعة من عينه تنحدر ببطء

ويجلس صامتا

رجل المعاش : يهمس لزميله الحمد لله اهو خرج لكن شكله اتبهدل جامد

زميله : مسكين ما هو برضه غلطان حد قاله يسيب البطاقة في التاكسي

صاحب المقهي مشاريبك ا لنهاردة عليا نزله بوري يا ولا

الفتي المثقف : خسارة يا مصر

الفترة الظهيرة

مجموعة من الشباب اربعة يجلسون امامهم علب الكشري وياكلون بنهم شديد

الاول : قولنا يا دكتور انت ناوي بجد تشتغل في مركز التجميل ده

الثاني : طبعا يا دكتور المركز ده هو المستقبل احسن من السفر برة

الثالث: بس الناس دي اصلا فلوسها حرام ومشكوك فيها

الرابع : ينظر للجميع ساخر

الثاني: يوجه حديثه للرابع انت يا عم مرتاح ابوك مروقك عندكم مستشفي استثماري ونازلين نهب في الناس

الرابع : انت حتقر

الاول: لا بيقر ولا حاجة بس يشغلني معاه في المستشفي ويريحني من العيادة الي فتحتها لان الناس مش معاها فلوس خلاص

الثاني : عارفين المركز ده مين بيجيي فيه كل الممثلين ودلوقتي كمان بتوع السياسة ابتدوا يهلوا

الثالث : اهه عاوزين يبقوا حلوين لكن حتعمل ايه الماشطة في الوش العكر دول علي وشهم غضب الله

الرابع : ايه المكان ده الي مقعدينا فيه مرحناش ليه النادي

الثالث : نادي ايه يا ابني خليك معانا هنا ده مكان شعبي وحلو اوي وبعدين النادي حتلاقي فيه كشري زي ده معتبر

الرابع : انت فاكر ان الجو ده اصلا عاجبني انا جيت معاكم كده بس علشان مشفتكوش من زمان

الاول : ايوة يا عم حتطلع ايه القهوة دي جنب مارينا وشرم

الثالث : مالها القهوة ناس زي الفل قاعدة اهي

صاحب المقهي ينظر للشاب الرابع شذرا وينفس كمية هائلة من الدخان وينادي يا ولا ولع النور ورش النشارة خلي المكان ينضف

الاول :تعرفوا امبارح جاتني حالة غريبة اوي شاب جاني عنده اكتئاب نفسي شديد جدا وحاولت افهم منه ايه السبب

مرضاش يتكلم خالص لكن اخوه فهمني انه متهم في ضيقة رشوة وان الحكاية كلها تلفيق لانه حاول كشف المرتشين الحقيقيين وهما طبعا ناس كبار وشالها هو

الثاني : خليه يجيي عندنا المركز وانا اخليه احلي من اي نجم سينمائي ويضحك بصوت عالي

الثالث : يا عم بيقولك متهم ظلم وانت عمال تتريق منهم لله الناس دول

الرابع : ايه رايكم نروح الهرم هناك في دي جي يجنن

الثالث : والنبي اتلهي الا صحيح بقولك انتم ايه الي نزلتوه في الجريدة ده انت وابوك وتاييد وشكر للرئيس

الرابع : طبعا لازم نشكره ونايده وبصراحة مافيش احسن منه للبلد

الاول : اهه حتقولي ما انتم الي مستفيدين من الاوضاع الحالية الي دايما تقولوا كده وعمالين تنهبوا في دم الغلابة

الرابع : احنا مالناش دعوة بالغلابة كل الي بيدخلوا عندنا ناس مليانة يبقي بننهب ازاي الغلابة

الثالث: الغلابة اصلا اتنهبت من الناس دي وانتم بتنهبوهم مش اكتر

الرابع : احنا منهبناش حد اسعارنا معروفة والناس بتتهافت علينا

الثاني : تعرف ان في ناس بتروح مخصوص المستشفيات او بتيجيي عندنا المركز بتاع التجميل لمجرد انها تبين انها غنية بيعتبروها بزنس

ينظر اليهم احد الجالسين في الاركان وهو موظف بسيط

الموظف : في تردد وعلثمة لو سمحتم يا دكاترة

يطالعه الجميع في فضول ودهشة

الثالث : خيرا يا حاج

الموظف : انا فهمت من كلامكم انكم دكاترة انا عندي حاجة كنت عاوز اقولكم عليها

الثالث : خير

الموظف : انا عندي فشل كلوي وبعمل غسيل ووبحتاج الغسيل ده كل اسبوع مرتين ولكن من كتر الناس بعمله مرة كل شهر واحيانا كل شهر ونص وعندي كوم عيال محدش منكم يقدر يساعندي بكارت او توصية

الثالث : انت بتقول ايه معانا الدكتور فلان وعاوز كارت وينظر للرابع في سخرية وتحدي

ابقي خليه يغسل عندكم في المستشفي بتاعتكم واعتبرها حسنة وعمل خير لوجه الله

الرابع : بعد تفكير عميق جدا اوكي يا حاج ابقي تعالي المستشفي بكرة الصبح وقابلني

الثالث : اديله كارت ولا فاكر ان الامن بتوعك حيدخلوه

الرابع : ينظر ايه شذرا اوكي خد الكارت بتاعي ومستنيك بكرة

الاول والثاني : يطالعان بعضهم في صمت وعيونهم ملؤها الضحك والبسمات

الموظف : ربنا يحميكم يا دكاترة ربنا يخليكم ربنا يكرمك ويتمتم مرتعشا من الفرحة ويكاد يبكي وهو يستند ليعود لمقعده

الرابع : يقول لنفسه انا اصلي الي غلطان اني جيت معاهم وينظر لهم مبتسما ويقول انا مضطر امشي دلوقتي

باي يا جماعة

يدخل المقهي مجموعة من الطبلة يتحدثون بصوت عالي

ويجلسون ويطلبون الشاي

الطالب الاول: تفتكر الندوة دي كانت مفيدة

الثانى: بقولك ايه انا مصدع ومش فايق اتكلم دلوقتي

الثالث : احمدوا ربنا اننا رجعنا علي خير ومحدش عملنا مشاكل انا كنت مرعوب

الاول : مرعوب ليه احنا كنا بنسرق

الثالث: عاوز تحضر ندون عن الانتخابات ورفض ترشيح الرئيس ومتكونش خايف

يطالعهم الشاب المثقف مهتما ويحدثهم

الندوة دي كان تفين يا شباب

يصمتون فجاة ويطالعونه في حذر وريبة

الشاب المثقف : متخافوش انا مهتم مش اكتر وانا زيكم رافض ترشيح الرئيس

الطالب الثاني : ولا خايفيين ولا حاجة كانت في مقر جمعية في وسط البلد

المثقف : وايه الي خرجتوا بيه من الندوة

الطالب الثالث : مش لازم نوافق علي اعادة انتخاب الريس

المثقف : جميل جدا هو انتم معاكم بطاقات انتخابية

الطلبة الثلاثة : يطالعون بعضهم في دهشة وحيرة ويقولون لا

المثقف : باسما عموما برضه كويس انكم مهتمين

يتدخل الرجل اللي علي المعاش في الحوار

تعرفوا كان زمان كل واحد حريص جدا علي انه يكون عنده بطاقة انتخابية غير دلوقتي

يدخل احد الجالسين في المقهي للحوار وهو تاجر بسيط

التاجر البسيط : هو في زي ايام زمان كان الراجل راجل بجد ياريتها تعود

المثقف : ودلوقتي برضه في رجالة بس خايفيين علي بيوتهم واسرهم

الرجل اللي علي المعاش : الي يخاف من حاجة ميبقاش راجل

احد الطلاب : المسئولية برضه بتخوف

التاجر : بصراحة زمنكم مهبب ومشكلتكم ان معندكوش مثل اعلي او شخصية تهزكم من داخلكم الله يرحم ايام زمان

المثقف : طول ما حانا بنتكلم عن زمان عمرنا ما حنتقدم للامام

الرجل اللي علي المعاش : انت اللي بتقول كده انت مش متخرج من الجامعة من كام سنة ولحد دلوقتي مشرف معانا هنا زي اصحاب المعاشات

المثقف : ينظر للارض ساهما ويرتشف كوب الشاي ويبلل شفتيه ويقول كل شيء بامر الله لكن اهو انا بعوض الفترة دي بالقراية

الطالب الاول : انت خريج ايه

المثقف : هندسة

التاجر : كمان مهندس ومش لاقي شغل مش بقولكم بلدنا اتغيرت

يدخل المقهي احد الرجال تبدو عليه مظاهر الاحترام ولكنه في حالة مزرية ووعصبي للغاية

الرجل المحترم : بقي دي اخلاق يا عالم

يرد صاحب المقهي خير يا استاذ

ايه الي حصلك مالك هدومك مبهدلة ليه كده هو انت كنت بتتخانق

الرجل المحترم : اهه اتخانقت مع سواق تاكسي ابن ستين في سبعين

خير يا حضرة عمل ايه بس

الرجل المحترم : كسر الاشارة وكان حيدوس راجل عجوز بيعدي وشتم الراجل العجوز ولعنه ولعن جدوده

ولما قلتله عيب يا اسطي انت غلطان وقف التاكسي ونزل وبهدلني

التاجر : مش قلتلكم الاخلاق كمان انعدمت

الراجل المحترم : عندك حق والله انا بقالي كذا سنة برة مصر ولما رجعت حسيت بالفرق الكبير ده

المثقف : معلش هدي نفسك

صاحب المقهي هو احنا جايبنا لورا غير معلش دي

عموما حصل خير يا استاذ بس كان لازم تاخد رقم التاكسي وتعمله محضر

التاجر : يضحك في صوت عالي اهه علشان يدخل القسم ويخرج متبهدل اكتر

ويضيف انا مرة رحت القسم اعمل محضر علشان بائع متجول واقف ادام المحل بتاعي وقافلي الباب

طلع قريب واحد مخبر جوة القسم وكنت حاكل ضرب لولا ستر ربنا

الطالب الثاني : اصل بلدنا دي لو لك ضهر فيها تعمل اللي انت عاوزه

المثقف : طيب لما كل واحد مننا بيدور له علي ضهر بنتهم ليه الحكومة انها مقصرة

ما الحكومة دي انا وانت وقاريبنا

الرجل اللي علي المعاش :

صحيح الحكومة مننا لكن لما بينحرف فيها حد مش بنحاسبه وبنسيبه لحد لما الفساد بيسيطر واحنا بنتفرج ومش بناخد اي رد فعل

الرجل المحترم : البلد باظت بجد اذا كان سواق التاكسي بهدلني لاني بقوله انت غلطان امال لو قلتم كده لواحد مسئول حيعمل ايه فيكم

التاجر : حياخدك انت واسرتك علي القسم ويبهدلكم ولو واصل اكتر حتختفي في معتقل او تدخل السجن

المثقف : يعني اتفقتم علي اننا احنا السبب والحكومة مالهاش ذنب

صاحب المقهي احنا والحكومة واحد لان الحكومة من عامة الشعب

الطالب: عامة شعب ايه انت بتقول ايه

الطالب الثانى: الناس المهمة في البلد معتبرينا مجرد رعاع

المثقف : صح كلامك احنا بالنسبة لهم شوية رعاع مالناش لازمة اصلا ولولا الملامة كانوا طلبوا مننا اننا نشوفلنا بلد تانية ونسبلهم مصر

الرجل المحترم : انا كنت فاكر اني راجع مصر لكن مش دي مصر الي سبتها من عشر سنين دي بلد تاني وناس تانية

انتم حصلكم ايه

المثقف : حصلنا كتير احباط وتجاهل ولا مبالاة وخوف ورعب واكل فاسد ومياه ملوثة وهواء غير نقي

التاجر : ونسيت الرشاوي وغلاء الاسعار والقوانين الي كل يوم في قانون جديد بيطلع ورسوم جديدة علي الناس

الرجل المحترم : خسارة يا مصر

حد يشجع ولا يقول كلمه يامحاورتية

تم تعديل 9 فبراير 2006 بواسطة الاسكندرنى

[الأفوكاتو]

الأفوكاتو:

إلحق يا يا معلم سكورب , زبون جديد , و فى خبطتين, لخص أوضاع البلد, ووضع صباعه على مواطن الفساد,

ممكن لما يجيى المرة الجاية تنزله أثنين جنزبيل على حسابى؟

سكورب:

أصبر عليا يا أفوكاتو لما أشوف بضاعته.

الأفوكاتو:

صناعة مصرية تستحق التشجيع, و الأدهى أنه إسكندرانى , يعنى بلدياتك.

سكورب:

خلاص يا أفوكاتو, لما ييجى, حنقعدوا معاه , و نتحدث, و نشوف ميته إيه, و نديه عضوية فى القهوة, خصوصا إن المدة اللى فاتت كان فترة بيات صيفى.

سيى السيد:

إنتو بتتوشوشوا على إيه؟

سكورب:

الأفوكاتو جايب لنا زبون جديد باين عليه حينفعنا.

سي السيد:

إذا كان ده رأيكم, يبقى نعطيه" نوط القبول بقهوة المحاورات"

الجميع:

موافقون.

[الاسكندرنى]

طالما موفقون

وفيها افوكاتو و بلديات اسكندر و سين سين و جيم جيم يعنى لقيت اللى يحمنى افتحها سياسه

اسكندرنى بس يا سين سين النوط لفظ حكومى اوى بتاع _ اللى مايتسماش __ كل يومين يمنحه مارنجوس االاول فبلاش تتشبه بيه او تقول اى لفظ شبه

سين سين _ هما كده الاسكندرنيه دول ياخى حاجه اعوذب الله

سكوب ايه بتقول ايه

سين سين بتكلمى انا يا سكوب

سكوب لا ياحبيبى مانستغناش بس بكلم الاسكندرنى بيقولك نحميه اتجن ده ولا ايه مش لما نشوف هو عاوز يكتب ايه و نحكم و بعد كده تقرر

الاسكندرنى ايوه صح يا بيه عندك حق طيب اسمع يا سيدى الفيلم اللى جاى ده عنوانه

غوصة العمر

سيناريو رقم 1

كبرياء و عظمة

ضابط أول : يا فندم العبارة هتغرق

القبطان : تغرق إزاى وأنا القبطان يلا

ضابط ثانى : يافندم كلامه صح لازم نلف ونرجع للسعودية تانى

القبطان : عشان يقولوا إنى معرفتش أطفى الحريقة ويفتكروا إنهم أحسن منى

ضابط أول : يا فندم إحنا معانا وزن فوق الحمولة والإستمرار خطر

القبطان : وإنت هتعرفنى شغلى ياض...دنا شغال قبطان من سنة 67

ضابط أول : مش دى سنة النكسة يا فندم ؟

القبطان : إخرااااااااااااااااااس...مش عايز أسمع صوتك (كل شىء تحت السيطرة)

ــــــــــــــــــــــــــــ

سيناريو رقم 2

غباء وجهل

أحد الركاب (الضحايا) : ياساتر يارب...إيه الدخان ده...إلحقونا إيه اللى بيحصل

فرد من الطاقم : مفيش حاجة يا حاج ده إبن عمى بيشوى كباب تحت

الحاج : كباب إيه يابنى دى ريحة هباب....كح كح كح....مش قادر هو إيه اللى بيحصل بالظبط

فرد أخر من الطاقم أذكى من زميله السابق : دى يا حاج حريقة عادية بتحصل فى كل السفن فى المكان ده عشان أشعة الشمس بتضرب فى البوصلة...ومتقلقش طفيناها خلاص

الحاج : دى بتزيد والدخان بيعلى إلبسى يا حاجة سترة النجاه

فرد الطاقم بغضب : إنت مش واثق فى كلامى ولا إيه...أنا المسؤول هنا ومش هتفهم أكتر منى...هات السترات دى إنتوا عايزين تفزعوا الركاب وتعملوا قلق وخلاص...خش يابا جوه كابينتك وإقفل عليك...قلتلك (كل شىء تحت السيطرة)

ــــــــــــــــــــــــــــ

سيناريو رقم 3

جشع وطمع

القبطان : أيوه يا ممدوح بيه يا مالك عباراتنا وولى نعمتنا إزيك ياباشا أخبارك إيه

ممدوح بك فى عظمة : فيه إيه ياض يا سيد بتتصل دلوقتى ليه وخلتنى أخرج من الجاكوزى

القبطان : أسف يا فندم كنت عايز أتصل فى وقت تانى بس قلت يمكن نغرق قبل ما أعرف و.....

ممدوح بك : تغرق إزاى يا قفا أمال قبطان إزاى وعاملى بتفهم...إتصرف ومتوجعش دماغى...إنت فاهم

القبطان : أرجوك طيب يا فندم قبل ما تقفل فى وشى كالعادة قلى...هل ممكن أستخدم إشارة الإستغاثة

ممدوح بك : يا ليلة قطران على دماغك إنت عارف الإستغاثة دى هتكلفنا كام يااااااااااااض

القبطان : خلاص خلاص يا فندم آسف آسف هحاول ألف وأرجع مع إنى عارف إنى هتقلب

ممدوح بك : أصل أنا معين شوية أغبيا مش عارفين يخمسوا فى البحر....سقط سرعة وجيب التانى ولف وإنت شادد الهاند بريك هتلاقى السفينة فى السعودية يا غبى

القبطان : طب سلام يا فندم دلوقتى عشان محتاج إيدى اللى ماسكة السماعة أسند بيها عشان السفينة بتميل على جنب

ممدوح بك : وإيه يعنى تميل على جنب هل ده سبب كافى عشان ندفع كام مليون بعد الإستغاثة....صحيح اللى إختشوا ماتوا........................

القبطان : إطمن يا فندم (كل شىء تحت السيطرة)

ممدوح بك بعد غلق الخط وهو يبتسم فى دهاء : ياترى لو غرقت دى كمان هاخد كام مليون بالظبط المرة دى تأمين

ــــــــــــــــــــــــــــــ

سيناريو رقم 4

فساد وكوسة متحللة

ممدوح بك : ألوووو أيوه يا فتحى بك إزى معاليك

فتحى بك : إزيك ياااااض يا ممدوح

الواد ممدوح : تمام حضرتك جنابك نور عينى والننى يا مظبطتنا يا مفطرنا يا مغدينا يا....

فتحى بك : خلص يااااااااض مش فاضيلك عايز إيه ؟

الواد ممدوح : حضرتك يا فندم سمعت إن العبارة بتاعتى بتغرق

فتحى بك: بقى هو ده اللى بتكلمنى عشانه...هى أول مرة يعنى ؟؟؟؟؟!!!!!

الواد ممدوح : يعنى مفيش قلق يا فندم !!!

فتحى بك : هو إحنا بنلعب يااااض....مهو كل مرة بتبقى دوشة يومين وبعدين النسيان بيثبت إنه أكبر نعمة وبيطلع الموضوع فشنك

الواد ممدوح : يعنى جنابك مش شايف قلق المرة دى....الركاب المرة دى كتير !!!

فتحى بك : لو إنت ممدوح قول كلمة السر

الواد ممدوح : كلمة السر (موافقة)....بس ليه يا فندم طلبتها منى ؟

فتحى موافقة : أصلك شكلك كده مش ممدوح اللى أعرفه....مش هتعرف تختفى شوية وبعدين تطلع تقول الركاب معرفوش يتبعوا وسائل السلامة وتدافعهم هو اللى أدى لميل العبارة يعنى ؟

الواد ممدوح : لأ هعرف طبعاً يا فندم وممكن نلبسها للقبطان كمان بس أنا خايف على وضعى فى.......

فتحى بك : هاهاهاهاهاهاهاها.....اللى يبقى معانا ميخافش من حاجة....اللى يخاف اللى ضدنا بس....فهمت يااااض

الواد ممدوح : فهمت يا فندم طبعاً طبعاً يا فندم ده معاليك كبيرنا وحبيبنا وحامينا و....

فتحى بك : قلى ياض المرة دى هاخد كام من التأمين لو العبارة غرقت بجد ؟

ـــــــــــــــــــــــــــــــــــ

سيناريو رقم 5

أنانية وجبن وتخاذل

مهندس من الميناء المصرى : يا فندم جتلنا إشارة إن فيه عبارة غرقت من ساعتين...نعمل إيه

المسؤول المهم : طب وإفرض إنها إشارة كدابة...مين هيبقى المسؤول عن خروج وحدات الإنقاذ من غير لازمة...إنت ؟

المهندس : لا يا فندم أنا مليش دعودة أنا بقول يمكن الكلام ده مضبوط لكن لو حضرتك شايف غير كده خلاص....

المسؤول بفخر : الحاجات دى عدت علينا كتير وإحنا بالخبرة بنعرف إيه الصح وإيه الغلط وفى نفس الوقت المسؤولية كبيرة وده قرار صعب ولازم نتأكد الأول...

المهندس : أؤمرنى يا فندم

المسؤول المهم : نستنى شوية لغاية ما نتأكد ونشوف السعودية هتقول إيه عن الموضوع ونشوف دول أوروبا هتقول إيه ونشوف أمريكا هتقول إيه...وممكن نستنى رأى اليابان دول متقدمين جداً وعندهم أقمار صناعية بتشوف كل حاجة....والدنيا مش هتطير وكده أو كده الدنيا ليل والإنقاذ صعب ونستنى أهم حاجة أوامر من الرياسة ببدء البحث والإنقاذ عشان نخلى مسؤوليتنا

المهندس : طب يا فندم ولو حد سأل عالإشارة اللى جتلنا وقال ليه متحركناش ؟

المسؤول : هو حد يعرف الإشارة دى غيرنا ؟

المهندس : لأ يا فندم

المسؤول : خلاص..................يبقى (كل شىء تحت السيطرة)

المهندس : تمام يا فندم

ــــــــــــــــــــــــــــــــــ

سيناريو رقم 6

خسه وندالة

القبطان : يلا هنستعد للدوران يمين

ضابط أول : طب يا فندم مش نشوف سرعة الرياح ونضبط......

القبطان : يلا مفيش وقت...نفذ...

ضابط ثانى : تمام يا فندم

الحاج لفرد الطاقم : هو إيه اللى بيحصل...فهمونا ولا هاتوا سترات النجاه

فرد الطاقم بزهو : أنا أخذت سترات النجاه من كل اللى حاولوا يلبسوها....وقلنا ميت مرة (كل شىء تحت السيطرة)

المركب تميل بشدة وتنقلب فى البحر...

فرد الطاقم : إجرى يا عبده هات سترتين نجاه ليا وليك...مفيش وقت

عبده : أنا جبت أهو بس فين القبطان

فرد الطاقم : أنا شفته نزل زورق نجاه ونط فيه أول واحد وبعد عن العبارة

عبده : طب يلا نلحق نخرج بسرعة

فرد الطاقم : يلا بينا مفيش وقت حتى نفتح الكباين اللى قفلناها عالناس

عبده : ناس مين يا عم إحنا الوحيدين اللى فاضلين من الطاقم يلا بلاش تخريف ده موت يابنى

ـــــــــــــــــــــــــــــــــ

سيناريو رقم 7

نفاق وتدليس

المذيعة : فخامته أمر بالبحث والإنقاذ فوراً بعد 8 ساعات من الغرق.....بس

المذيعة : فخامته بيتابع الموقف و(كل شىء تحت السيطرة)

المذيعة : فخامته مهتم بالموضوع

المذيعة : فخامته راح هناك عشان يتابع بنفسه

المذيعة : فخامته جه هنا تانى

المذيعة : فخامته بيطالب بالتحقيق

المذيعة : فخامته متضايق من الموضوع

المذيعة : فخامته راح باس واد صغير من اللى نجوا والواد قدمله ورد

المذيعة : فخامته ركب طيارة فخامته

المذيعة : فخامته بص للناس بحزن

المذيعة : فخامته حلف إن اللى عملوها مش هيفلتوا

المذيعة : فخامته هيصوم تلات أيام

المذيعة : فخامته فضل يطعم 10 مساكين عن الصيام

المذيعة : المفتى أفتى إن فخامته حالة خاصة ومش لازم يصوم أو يطعم 10 مساكين

المذيعة : فخامته رقى المفتى وبقى مفتى أول

ـــــــــــــــــــــــــــــــــ

سيناريو رقم 8

هبل و استخفاف بعقول الناس

المذيعة : ننقل إليكم الأن فيلم تسجيلى عن غرق العبارات والسفن حول العالم

المذيعة : تيتانيك اللى كان فيها جاك وروز غرقت وكلنا عارفين إن غرق السفن شىء عادى ولا يدعوا للقلق

المذيعة : سالم إكسبريس....آآآآه.....آسفه ...قصدى سلمون بك بسبس الكوالالمبورية غرقت فى بحر البقر سنة ألف و 800 ق.م وكلنا عارفين إن غرق السفن شىء عادى ولا يدعوا للقلق

المذيعة : وفى معركة ذات الصوارى وفيلم الناصر صلاح الدين غرقت عشرين.....بقول عشرين سفينة وكلنا عارفين إن غرق السفن شىء عادى ولا يدعوا للقلق

المذيعة : وقد إحترقت ناقلة نفط فى الطريق إلى إيلات وكانت متجهة لألف مسكن وضلت طريقها وكلنا عارفين إن غرق السفن شىء عادى ولا يدعوا للقلق

ثم فى سنة 1587 م غرقت مركب سيولوس برسيوس الفنلندى وغرق ما يقرب من 3000 فرد مش 1400 زى عندنا....يعنى الحمد لله على كده أوى

العين صابتنا ورب العرش نجانا

البرنس سيد................الأميرة جمالات

ترجع لنا بالسلامة يا أبو سيد ماتبصليش بعين رديه بص للدفع فيه

و

(كل شىء تحت السيطرة)

ــــــــــــــــــــــــــــ

سيناريو رقم 9

بجاحة ووقاحة

المذيع : هل العبارة السلام 98 كانت مستوفية لشروط السلامة والأمان ؟

مندوب صاحب الدمار 98 : هههههههه....أكيد يا بيه هو فيه مركب ممكن تطلع من غير فحص وتأكد من سلامتها يعنى ؟

المذيع : طب أمال فى دول أوروبية بيقولوا إنها كانت ممنوعة من الإبحار فى مجالات الدول الأوروبية عشان بإختصار خردة وعمرها الإفتراضى خلص من 15 سنة وكانت ناقلة بضائح وكانوا هيبيعوها خردة فى إيطاليا فإشترتها شركة السلام زى غيرها وزودت عليها 3 أدوار كمان ودهنتها عشان تخفى الصدا ودفعت فلوس لشركة بنمية سيئة السمعة عشان تديها وثيقة الصلاحية ؟

مندوب صاحب الدمار 98 : هو كل حاجة هنصدقها يا بيه !!! العبارة كانت عشرة على عشرة وماشية تمام التمام ولا أجدع سفينة فيكى يا بلد وكان (كل شىء تحت السيطرة)....بس الركاب لما تدافعوا ميلوها على جنبها راحت غطست فى المالح

المذيع : وهل ده طبيعى والعيب هيبقى على الركاب فى الآخر ؟

مندوب صاحب الدمار 98 : هنعمل إيه طالما مش لاقيين القبطان.....هع هع هع هع هع هيييييييييييع

ـــــــــــــــــــــــــــ

سيناريو رقم 10

حسبى الله ونعم الوكيل

فرد من الميناء معه ميكروفون وسط أهالى الضحايا : دلوقتى هنقول الأسامى الجديدة للى أنقذناهم

أحد أهالى الضحايا : يارب المرة دى يارب...ده سايب أمه وأبوه العيانين ومراته وولاده من غير حد غيرك...يارب

فرد الميناء : (كل شىء تحت السيطرة) والأسامى هى......

آخر من أهل الضحايا : حرام عليكو بقه...حرام....كل يوم تقولوا نفس الأسماء وقاعدين تزودوا عدد الناجين فى التليفزيون...بتضحكوا على مين...ربنا ينتقم منكم

آخر من أهالى الضحايا : بيقولك نقلوا الجثث الجديدة مشرحة زنهم...تخيل...يعنى نستنى هنا للى هيوصلوا والجثث ولا هناك ....هما عايزين يمشونا من المينا وخلاص ومش مهم عندهم حاجة تانية.....ربنا ينتقم منهم

صوت آخر : حرام عليكوا الشحتطة دى هو إحنا ناقصين بهدلة مش كفاية اللى حصل

صوت آخر : ربنا ينتقم منكم

ـــــــــــــــــــــــــ

سيناريو رقم 11

بعد مرور أسبوعين

المذيعة : ميدو يتشاجر مع شحاتة والشعب المصرى زعلان من ميدو ومنمنش الليل بيفكر هو ميدو عمل كده ليه......ليه كده يا ميدو ؟

المذيعة : فخامته سافر ألمانيا يتعالج من شكة دبوس مفاجأة ونتمنى له دوام الصحة والعافية

المذيعة : ممدوح بك يعين رئيس المجلس بإجماع الأصوات

المذيعة : فتحى بك يؤدى اليوم حلف اليمين الدستورية لمنصبه الجديد

المذيعة : والسلام عليكم

ـــــــــــــــــــــــ

ـــــــــــــــــــــــ

أى تشابه بين هذه الشخصيات وأى شخصيات أخرى جائز ولكن ,,,,,,,,,,,,,,,,

تم تعديل 9 فبراير 2006 بواسطة الاسكندرنى

[الاسكندرنى]

حد يقول اى حاجه وحشه مستوى هابط بس قوال

[الأفوكاتو]

الأفوكاتو:

أصبر يا أخى الإسكندرانى,

الناس كانت نايمة , و كنت أنت أول من جاء للقهوة, و قبل أكل سندوتش الشجق توصية العزيز سكورب, قدمت عرضك الشيق فى الأمور التى نعانيها.

أقترح أن تطلب سندوتس فول, و آخر طعمية, إلى أن يستيقظ بقية رواد قهوة المحاورات, و الحضور إلى القهوة لتناول الشاى و القهوة, أو الإستمتاع بسندوتش" المفتقة", الذى لا يوجد مثله فى أى قهوة أخرى سوى قهوتنا, ثم تنتظر ورود وفود الزبائن, الذين تعرفم, و الذين لم تراهم من قبل.

يا معلم سكوب,

نزل واجد جنزبيل للأخ الإسكندرانى, و حطه على النوتة بتاعتى, التى أعد بأن أدفع حسابها عندما أستلم المعاش.

[الاسكندرنى]

حاضر

الاسكندرنى بس يا افوكاتو عندك حق اصلى نسيت مواعيد مصر

سين سين قصدك ايه يا استاذ نسيت مواعيد مصر

الاسكندرانى لا ولا حاجه يابيه قصدى نسيت فرق التوقيت للصحيان المفاجى

الافوكاتو ايه ياسين سين الراجل بيسال عن مواعيد مصر للطيران

سين سين لا لا يا افوكاتو ده اسكندرانى من اسكندريه فكرين نفسيهم خارج الجمهوريه

[الاسكندرنى]

يدخل المقهي الطالب الجامعي محدثا ضجة كبيرة وينادي القهوجي هاتلي الشاي المتين ويصبح علي الجميع ويجلس يلتهم

ساندوتشات الفول الساخنة وهو يعزم علي الجميع ويتكلم بصوت عالي للغاية يادوب لسه خارج من الامتحان الحمد لله كان كويس

رجل المعاش : يبتسم في هدوء ويطالع الطالب الجماعي ويقول له بالهنا والشفا شد حيلك بقي وخلص الدراسة دي

الشاب المثقف : يضحك بصوت عالي ويقول له خلص بسرعة مكانك محجوز جنبي في ترابيزة العواطلية ثم يسكت مرة واحدة

ويعود ليوجه حديثه لصاحب المقهي

يا حاج سياسة اسرائيل مش حتتغير لانها ماشية علي نهج ثابت الي حيتغير احتمال هو الدموية الشديدة الي تعامل بها شارون مع كل الاحداث

صاحب المقهي : حتي لو كده يا باش مهندس حيكون تحسن برضه في الامور

رجل المعاش : ويمكن يكون تحول للاسوا

الطالب الجماعي : وهو يلتهم نصف الساندوتش في قطمة واحدة ازاي يا حاج تحول للاسوأ

رجل المعاش : يعني اي حد يجي بعد شارون يحاول يثبت انه لا يقل عنه قوة وشدة ويكون اكثر منه دموية لان شارون حط نهج دموي

وبني شعبيته داخل اسرائيل بناء علي الدموية في تعامله مع العرب

الشاب المثقف : كلامك صح يا حاج ووارد جدا حدوثه لكن المشكلة ان هناك حاليا ارتباك ولسه موصلتش القيادات هناك مين حيمسك مكانه

اعتقد ان الوضع هناك حيفزرلنا شخصية جديدة مش من الشخصيات القديمة

الطالب المثقف : ويمكن يكون واحد من السابقين

رجل المعاش : لا اعتقد انه حيكون من القدام شكله حيكون شخص جديد متاثر بفكر شارون ومرحلته وادائه

يدخل المقهي في خطواته السريعة الصحفي الشاب ويسلم علي الجميع في حرارة ويقول كل سنة وانتم بخير

صاحب المقهي : ايه يا استاذنا فينك من فترة مش بنشوفك

الصحفي : والله كنت مشغول للغاية بموضوعات كتير جدا ولكن والله ما نسيتكم خالص

رجل المعاش : خير موضوعات ايه

الصحفي : حقولكم واسئلكم علي انطابعكم عنها بس اشرب قهوتي

الشاب المثقف : انت رايك ايه في الي حيحصل في اسرائيل بعد شارون

الصحفي : انا ليا وجهة نظر في تعاملنا مع اسرائيل ومقتنع بيها للغاية

صاحب المقهي يطلب كوب شاي اخر بصوت عالي ويطالع الصحفي في اهتمام شديد وهو يقول ايه يا استاذ وجهة نظرك

الصحفي : يقول دايما في علاقتنا وتعاملنا مع اسرائيل احنا الي بنستني اي بنكون احنا رد الفعل مش الفعل نفسه

الا مرتين وحققنا فيهم حاجات كتير

الطالب الجامعي : ايه هما المرتين دول يا استاذ

الصحفي : يقول المرة الاولي حرب اكتوبر وانتصرنا والمرة الثانية مبادرة السلام وحققنا فيها استرداد سينا كاملة

حتي ان اسرائيل لحد النهاردة مش مصدقين انهم رجعوا لنا سينا كلها بالشكل ده

رجل المعاش : معاك حق لكن انا عاوز اعرف انت عاوز تقول ايه تحديدا

الشاب المثقف : اعتقد يا حاج انه عاوز مصر هي الي تحرك اي موقف وتحط اسرائيل في خانة الدفاع عن نفسها لانهم اساتذة في فن الهجوم وتحريك الراي العام لكن دايما معتمدين علي سلبيتنا وعدم اتخاذنا خطوات ايجابية في تحريك الامور

الصحفي : يطالعه في انبهار ويقول خسارة ان شخصية زيك لحد النهاردة مش قادرة تؤدي دورها في المجتمع

رجل المعاش : مفروض يكون دور الحكومة الان في ظل التغيرات دي هو القضاء علي مشكلة عدم تواجد فرص العمل وخلق فرص جديدة حقيقية للشباب مش دراسة قوانين المعاش المبكر والي بتقضي علي اجيال متتالية من شباب ورجال مصر

الصحفي : بالفعل يا حاج دي مشكلة لازم تتغير مش معقول رجل في الاربعين يخرجوه معاش مبكر وهناك ناس فوق الستين موجودين كقيادات مش بتتغير ابدا وثابتة فوق قلبنا

الطالب الجامعي : ايه يا استاذنا انت لو كتبت كده مش حتروح بيتكم ويضحك بصوت عالي للغاية

الصحفي مبتسما : احتمال مروحش لكن بجد ومش نفاق في حرية الان اكبر للصحافة بالفعل لكن هناك صحف مستغلة الحرية دي بشكل سئ

رجل المعاش : فعلا في حرية الان للصحافة لكن مش بتحقق لنا حاجات مفيدة

الشاب المثقف : الحرية دي مجرد مسكن للشعب علشان الناس تقرا الي بينكتب وتحس ان هناك الي بيكتب بلسانها وتصبر شوية اي استغلال لطيبة الشعب المصري

الصحفي : كلامكم كله صح لكن لازم نتمسك بكل مكسب ايجابي بنحققه للشعب ومع الوقت الصح حيفرض نفسه لان شعب مصر ذكي جدا

صاحب المقهي : انتم نسيتم موضوع اسرائيل ليه انا متفائل خير بجد

الصحفي : باذن الله لو قدرنا نشكل ضغط علي النظام الجديد في اسرائيل بشكل قوي ومؤثر حيكون مكسب ايجابي وحتكون له نتائج فورية

ويستطرد قائلا المهم عاوز اسئلكم علي موضوعين النهاردة

وقبل ان ينهي كلامه يدخل المقهي الصيدلي مسلما علي الكل مساء الخير

ويرد الكل عليه بود وحب

صاحب المقهي : خير يا استاذ ايه هما الموضوعين

الصحفى: يطالع الجميع في اهتمام ويقول لهم ايه رايكم في الي حصل بسوريا ده

الشاب المثقف : طبعا مؤامرة علي النظام هناك وصفقة مشبوهة مع خدام

رجل المعاش : مسرحية هزلية يعني واحد في قمة الحكم بقاله سنين كبيرة جدا عاوز يقول ان ضميره النهاردة صحي وبقي انسان محترم لو كلامه صح يبقي هو كمان مدان ومسئول ولا اعتقد ان اخوتنا في سوريا ينزلوا للمستوي ده في التفكير

الصحفي : كلامكم منطقي لكن تفتكروا ليه حصل دلوقتي الكلام ده

الصيدلي : احتمالين اولهم ان امريكا عاوزة تشغل الراي العام وتحول انظاره عن العراق والي بيحصل فيها

والاحتمال الثاني هو ارباك النظام السوري وشغله عن مساعدة المقاومة في العراق حسب الزعم الامريكي

صاحب المقهي : كلامك والله شكله صح

رجل المعاش : مهما كانت الاسباب التوقيت نفسه غريب جدا ومش مفهوم عاوزين يوصلوا لايه

الطالب الجامعي : لكن موقف سوريا قوي وردهم جيد وانا شايف قيادتنا بتتحرك بشكل ايجابي لمحاولة تفادي تطور الامر لحد دلوقتي

الشاب المثقف : مهما عملنا من تحركات لازم نفهم الاول المخطط الامريكي ايه هل هو مهاجمة سوريا بشكل مباشر ولا زعزعة النظام هناك وخلق نوع كبير جدا للضغط عليها يخليها تنشغل عن كل الي بيحصل حولها في العراق ولبنان وفلسطين

الصحفي : بالظبط خصوصا ان دور سوريا في هذه المنطقة كبير وحيوي وهام للغاية

الصيدلي : انا شايف الي بيحصل حيعمل كل ده يا باش مهندس امريكا حتستفيد من الوضع ده بشكل قوي للغاية ومش حتسيبه بسهولة

رجل المعاش : لكن انا واثق ان شعب سوريا حيكون له دور ايجابي ويساند النظام هناك مهما كانت العواقب

صاحب المقهي : اكيد يا معلم كله الا ان حد يجيي من برة يقول للبلد تعمل ايه وتتصرف ازاي ربنا يصلح الحال

الصحفي :الموضوع ده اخطر موضوع الان علي الساحة الدولية والعربية ولازم يكون في تصريحات للدول العربية مجتمعة

الصيدلي : ممكن يعلموا اجتماع للجامعة العربية وياخدوا موقف موحد

الشاب المثقف :لو عملوا الاجتماع ده بكرة حيختلفوا علي طريقة دبح خروف العيد امتي وازاي

الجميع يضحك بصوت عالي حتي تكاد اعينهم تدمع ويقول رجل المعاش الله يجازيك يا باش مهندس ضحكتني من القلب

الصحفي : وهو مستمر بالضحك المشكلة حتكون مين الي حيجب الخروف ومين الي حيدبحه اكيد لكن مين حياكله مش مشكلة لان محدش حياكله اصلا لان الخناقة حتخلي الخروف يعيش خمسين سنة كمان ويموت موتة ربنا

صاحب المقهي : حتي الاكلة حيضيعوها علينا خلاص ولا يهمكم تعالوا بكرة وانا ادبحلكم خروف وان مكفاش ادبحلكم الصبي بتاعي لانه قرفني

ويضحك الجميع مرة اخري وينسي الكل همومه ومشاكله في لحظات الضحك من القلب التي يتميز بها شعبنا الطيب العريق

الصحفي : طيب يا جماعة ايه رايكم في الي حصل مع اخوتنا من شعب السودان منذ ايام بسيطة هو ده الموضوع الي شغلني وغطيته

رجل المعاش : ماساه بجد باي وضع مكانش ده لازم يحصل

الشاب المثقف : دول احتموا بينا نعمل فيهم كده حتي لو غلطوا دول مالهمش حد غير مصر دلوقتي

الصيدلي : الامور اتعمالنا معاها بعصبية شديدة وبدون مبرر حتي لو غلطانين كان لازم نحميهم مش يموتوا عندنا

الطالب الجامعي : غلطانين ازاي انهم احتموا بمصر مصر بالنسبة للسودان الام والحضن الامن طوال التاريخ ازاي يحصل كده

صاحب المقهي : حرام والله الي بيحصل لهم في بلدهم وفي مصر ربنا يهدي الجميع

الصيدلي : كان ممكن يجيبوا قيادات المجموعة دي وتتحل مشكلتهم باقناع وحوار حتي لو حوار شديد مش يتعمل فيهم كده

الصحفي : المشكلة ان الي حصل حطنا برضه في موقف دفاعي واكيد شعب السودان عمره ما حينسي دي ابدا

رجل المعاش : شعب السودان عارف شعب مصر كويس جدا وبيحبه وعارف ان الشعب مالوش دور في الي حصل

الشاب المثقف : اصلا هما عارفين ان في ناس من شعبنا بيحصل فيهم زي كده برضه

الصيدلي : مفروض فعلا الامن المصري يغير فكره في التعامل وادراة الازمات اسلوب العصا ده مينفعش خلاص

الطالب الجامعي : ما هو كان في مشاكل مع المهاجرين في فرنسا وعملوا تكسير للعربيات والمحلات

ورغم كده الامن الفرنسي مموتش ولا واحد منهم

الصيدلي : صح اداروا الازمة بشكل حضاري واتحلت لكن عندنا لازم اي ازمة تنتهي بكارثة زي ما حصل

الصحفي : بالفعل لازم الفكر يتغير عارفين الامن بيدير الازمات بنفس الي نشوفه في الافلام القديمة ايام ثورة سعد زغلول لما كان الانجليز بيفتحوا النار علي المظاهرات بدون تمييز

الطالب الجامعي : وهو يضحك ما يمكن الامن ده هو الي كان بيمثل في الافلام دي ولسه عايشين

يبتسم الجميع في اسي

ويسرح كل شخص في اجابة السؤال الهام

متي يتغير فكر ادارة الازمات داخل مصر ومتي تتغير تلك الافكار البالية التي يعامل بها شعب مصر

سين سين ايه ياعم الاسكندرنى ده الله ينور عليك وعلى والديك

الاسكندرنى الله يكرمك عجبتك

سين سين اه تمام بس انت اتكلمت على موضوع قديم شويه ايه انت متعرفش ان فى ازمه بسبب الاساءة الى الرسول ولا ايه

الاسكندرنى يا سين سين بلاش بلاش لحسن عيارتها تقيل اوى و حتفصل فيها كفا المومنون شر القتال

تم تعديل 10 فبراير 2006 بواسطة الاسكندرنى

[Scorpion]

عصام : ايه ده .. سكوب ...انت رجعت يا منيل ...

سكوب : هو انا كنت مشيت عشان ارجع .. ما انا علي طول متنيل قاعد معاكم ... بس الواحد مالوش نفس حتي يعيش ...

عصام : و ايه اللي جد يا خويا ..

سكوب : العمدة يا عصام ... العمدة شخصيآ وصل لحد هنا بس لقي الباب مِتْسَكَر .. راح لبني مقالة هنا... قومت واخد ديلي في سناني و فوريرة قبل ما ييجي تاني و يلاقيها برضه مقفولة... انما قوللي يا عص.. ايه الأخبار ...

عصام : زي ما هي.. ناس بتروح و ناس بتيجي و ناس قاعدة ...

سكوب : فيه ناس جديدة ؟؟

عصام : علي بال ما تاخد الشاي بتاعك ... بص بصة و انت حتشوف بنفسك ...

سكوب يدير نظره في ارجاء المكان و فجأة يتنح ...

سكوب : هوباااااااااا مين دي يالاه ؟

عصام : مين .. فين ؟

سكوب : اللي عمالة تتكلم مع فولانة ....

عصام : آه ... دي ياسمين أحمد من المنصورة.. بت مخها يوزن بلد ... اسكت و اسمع

( ما يلي هو ما كتبته ياسمين بقلمها بتصرف )

- طب بذمتك يا فولانة مصر تحبيها أبيض و أسود و الا ألوان ؟

فولانة : حنبتدي الألغاز ؟

ياسمين : لأ بجد .. حشرحلك .. لما نص القهوة هنا بيتكلموا و بيسألوا عن الأخلاق ... أخلاق مين ؟ أخلاق الشارع؟ طب ازاي تركب الأخلاق مع الزحمة و الكلاكسات و بياع الفول و الأوتوبيسات و الميكروباصات .. و بيسألوا عن الأخلاق .. طب نبتدي منين و الا منين ...

نبتدي من الشارع نفسه ؟ طب انا حسألكم كلكم سؤال واحد ( موجهة حديثها الي من في القهوة ) كام واحد فينا بيلمع جزمته الصبح ؟ لو فينا واحد والله يتحسد .. لأن تلميعها بقي زي عدمه مالوش لازمة .. البنات خلاص شالوا الشرط ده من الشروط اللي يتطلب عدم الألتزام بيها أحكام عرفية ضد اي عريس بيتقدم ...

فولانة : ده لو فيه لسه ناس نفسها مفتوحة و بتتقدم ...

ياسمين : طب حاول بقي يا شاطر تعدي الشارع ... طبعآ لا يمكن ..

فولانة : مش بس لا يمكن .. ده مستحيل كمان .. أحنا بالنسبة لسواقين الميكروباصات عبارة عن كائنات هلامية مريخية غير مرئية .. و ما تستهلش غير أن تكون تحت كاوتش العربية ... و لو حصل ... يبقي أنت اللي عينك مش في راسك يا سعادة البيه االي فاكر ان تعدية الشارع حاجة سهلة .. مش محتاجة ختم وزارة الميكروباصات.. و توقيع عدد 2 سواقين محترفين من بتوع الحركات اياها ...

سكوب : ايه الحلاوة دي .. مين دول يا عص... طلعوا أمتي ؟

عصام ( بقرف ) : شششششششششش .. خليني اسمع

ياسمين : طب ندخل جوه شوية ..

فولانة : جوا فين ؟

ياسمين : جوا ميكروباص من دول.. مش حقوللك جوه اتوبيس ... هتلاقي ايه ؟!

فولانة باحراج : والله ماعرفش يا أختي ... انا جوزي عنده فيات قردة 2 باب مريحاني في مشاويري ..

زوهيري : اقوللك انا حتلاقي ايه يا مدام خربوطلي ... مش حتلاقي حاجة .. لأن مجال رؤيتك حيكون منغلق و منحصر في سعادة قفا من أسعده الحظ و ووقف قدامك ... مش بس كده لأ .. ده باشمهندس التخطيط البشري العمراني بتاع الميكروباص له وجهة نظر مختلفة .. اللي هي ايه ؟

سكوب : معرفش

زوهيري : انا مابسألكش أنت .. دي ايه الغلاسة دي ... انا بتكلم توتالة يا بني آدم .. وجهة نظر الباشمهندس أن بما أن فيه فتحة بين قفاك و قفا اللي وراك ... و بما أن قفاكم في قفا بعض ... فأنتم مش حتتضايقوا لو حشر قفا تالت بينكم ... و لو فرض يعني و أنكم اتضايقتم .. حنحطلكم السيخ المحمي في صرصور ودنكم و نجيبلكم ابو رجل مسلوخة ...

فولانة : علشان كده طلعت الأفيهات علينا .. بما أننا الشعب الوحيد اللي بيقدر حق قفاه حق تقدير .. من حيث الختم عليه ...

ياسمين : هو بس من ناحية الختم .. طب خدي عندك ... ايه رأيك في القفا من حيث التفرقة بين اللي عدي تحت ايد واحد من اياهم اللي علي أكتافهم شايلين طيور جارحة و نجوم اللهم احفظنا و معاه واسطة... و لا اللي عدي و هو علي فيض الكريم ؟

فولانة : طبعآ العلامة حتكون علي قفا اللي علي فيض الكريم ... و انتهاء بوريني عرض قفاك كناية عن مدي حبنا و ترحابنا بالزيارة ...

سكوب : يا عص ابوس ايدك عرفني بيهم

عصام : ياد اتهد بقي .. ما انت كنت متنيل قاعد في بيتكم .. ده ايه الهم ده ...

فولانة : سيبك من الميكرباصات .. حاولتي تدفعي فاتورة تليفون قبل كده ؟ جهاز الكومبيوتر عطلان ..و طبعآ لأننا دولة متحضرة و متقدمة و الأجهزة عندنا في مقام الصواريخ .. فالمصلحة الحكومية كلها مافيهاش غير جهاز واحد .. و مهنج ..

سكوب : م ..ايه ؟

عصام : مهنج يا سكوب .. مهنج ..من هنج يهنج فهو مهنج ...يعني مالوش مزاج بشتغل ... كملي يا خربطوللي هانم سيبك منه ....

فولانة : الله ينور عليك يا عصام ... مالوش مزاج يشتغل ... ساعة ... بس ساعات بيبقي عنده مزاج يشتغل عشر ساعات لما تبتدي اسطوانة انا تعبانة و رجلي بتوجعني و عندي السكر ... و كده لحد ما الحاجة توصل لأول الصف .. و لما الجهاز تعطف و تكرم علينا و اشتغل ... تلاقيها بتدفع للحبايب و القرايب و النسايب ساعة الا ربع .. لوحدها ...ما أحنا شعب طيب و الخير بيجري في عروقنا ... و مفيش داعي احكي عن طابور العيش لأن حكايته طويلة و مملة .. و لا عن المصالح الحكومية اللي من كتر ما الشغل في البلد خلصان و ميت فل و عشرة يا بيه و صباحك قشطة ...الموظفين مش لاقيين شغل يعملوه غير قراية الجرايد و المجلات و اسرار الطبيخ و كيف تسعدين زوجك ...

اخلاق !!! بلا نيلة...

[Scorpion]

ياسمين : طب ايه رأيك في الموضة الجديدة اللي أنتشرت بطريقة غير طبيعية ... تبقي واقف في حالك لا بيك و لاعليك .. يقرب منك واحد غلبان و يقوللك انه من الحتة الفلانية و ابنه عيان و حكاية طويلة عريضة تنتهي بأنك تطلعله جنيه .. و بدل ما تسمع زي الأفلام "يردهالك في صحتك و عافيتك و لا يحرمكش من حاجة أبدآ و يفتحلك الأبواب المقفولة" ... و تمشي منتعش كده و تحس انك عملت عمل خير ... لأ ... تلاقيه بيبصلك من فوق لتحت و يقوللك هو الجنيه ينفع بأيه في الزمن ده يا بيه .. حسبي الله و نعم الوكيل ... في حضرتك طبعآ...

فولانة : انا نفس القصة اتكررت معايا كذا مرة .. و ساعات الموضوع بيبقي رسمي شوية .. يعني روشتة .. فاتورة أجزخانه .. اشعة و تحاليل .. و الواحد مش فاهم حاجة.. و طبعآ الكل بيحلف أن الموقف ده اول مرة يتعرضوا ليه ... طب سيبك من ده ... حاولت توقف تاكسي ؟ طبعآ أكيد .. لكن قبل ما تركب لازم تستشير رأي سعادة فضيلة الأستاذ سواق التاكسي المبجل المحترم في رأيه بخصوص المكان اللي انت عايز تروحه ...و يبقي حماتك بتحب و امك دعيالك.. واهل بلدك راضيين عنك اذا كان المكان ملائم لمزاج سعادته ... ده بقي غير الأجرة ...أصل انت مش واخد بالك انك قاعد علي كرسي لوحدك مفيش حد علي رجلك .. لو نفكرك بالميكروباص... يعني احمد ربنا و بوس ايدك وش و ضهر .. تسيب التاكسي و ترجع البيت تلاقي البت بتقول ان المدرس بيقول انها محتاجة دروس خصوصية .. يقطع الدروس الخصوصية و سنينها ... مسخت حلاوة الدنيا و معناها جوه كل بيت ماديآ و نفسيآ وجسديآ و معنويآ ...

زوهيري:حد جنبه مقلب زبالة .. مقالب الزبالة يا ناس اللي في الشارع حرمتنا من الرؤية .. أجمل بقاع الأرض ملوثة ... يعني هو فيه أكتر من الأرض اللي فيها اطول نهر في العالم و مش عارفين نشرب كوباية ميه واحدة صحية ... و لا أرتفاع الأسعار اللي مش ملاحقين عليه .. عارفة يا ياسمين انا فهمت سؤالك بتاع الأبيض و الأسود و الألوان .. انا نفسي في مصر بتاعت زمان ... ايام الناس اللي بتحب بعضها .. و الجيران اللي بيسألوا علي بعض.. و حضرة الشاويش.. و الشوارع النضيفة .. من الآخر زي ما قولتي مصر ابيض و اسود كانت احلي مليون مرة من مصر الوان ..

تبتعد ياسمين و هي تهمهم : كده و لا كده احنا شعب بتاع افيهات .. و بنضحك غصب عن اي حاجة... و بنحبك والله يا مصر .. و بعتذرلك يا أرضي لأني سبب تعاستك .. انا اللي بدمرك كل يوم .. و بشخبط بقلمي علي حيطانك .. سامحيني يا حتة مني لأني حتة منك .. سامحيني بالنيابة عن شبابنا كله ...

سكوب : مين ديه يا عصااااام

عصام : ييييييييييه اف ... انا مِرَوَّح ...

[MZohairy]

زوهيري:حد جنبه مقلب زبالة .. مقالب الزبالة يا ناس اللي في الشارع حرمتنا من الرؤية .. أجمل بقاع الأرض ملوثة ... يعني هو فيه أكتر من الأرض اللي فيها اطول نهر في العالم و مش عارفين نشرب كوباية ميه واحدة صحية ... و لا أرتفاع الأسعار اللي مش ملاحقين عليه .. عارفة يا ياسمين انا فهمت سؤالك بتاع الأبيض و الأسود و الألوان .. انا نفسي في مصر بتاعت زمان ... ايام الناس اللي بتحب بعضها .. و الجيران اللي بيسألوا علي بعض.. و حضرة الشاويش.. و الشوارع النضيفة .. من الآخر زي ما قولتي مصر ابيض و اسود كانت احلي مليون مرة من مصر الوان ..

:wub: :)

حسستني اني انا الصباحي الراجل العجوز اوي ده اللي كان مرشح نفسه في انتخابات الرياسه و في الآخر رشح مبارك :excl:

[Folana]

السلام عليكم ورحمة الله...

سكـــــــــــوب

ايه ده :) ...ايه المفاجأة الجميلة دى....حمدلله على السلامة يابلدينا..اتارى القهوة منورة ..والله ما اخدت بالى الا دلوقت..:)

حأنزلك واحد سحلب على حسابى لحد ما ارجع ...اوووووووووووعى تمشىىىىىىىىىى انا باقولك اهو

الغدا عندنا النهاردة

:excl: :wub:

[Salwa]

اخناتون ../.انتوا فين ياجماعة ؟؟ هو ايه اللى حصل ؟؟ بقالى فترة كل مادخل القهوة دى الاقيها فاضية ؟؟

انتوا بتهربوا ؟؟ ..طيب شفتوا لما كتبت الرسالة بتاعتى للمواطن الاول ؟؟

سلوى ../..ياعمنا الفاضل احنا دلوقت يادوبك بناخد قهوتنا ونمشى من سكات ....رسالتك جت على الجرح بالجامد ..تعالى شوف مهازل السفارات .

سى السيد ./...من كام سنة كدة واحدة قريبتى هى وبنتها عايشين فى بلد اوروبى ...بعتوا يعملوا باسبوراتهم وطبعا زى مانتم عارفين بيدفعوا مبلغ كبير بيعدى ال350 دولار ..( بتعمله عن طريق ارساله بالبريد للتجديد فقط ) ..فوجئت قريبتى لما نزلت مصر بأنهم بيقولولها هى وبنتها تعالى كدة على جنب ....جواز السفر ده مزور !! ده فى خانة الميلاد مش مكتوب اى تاريخ ؟؟ والاسم مشلفط ...واقع علي الحبر ميه وممسوح ...وغيره وغيره ...قريبتى انهارت وقالت لهم انا فوجئت زيكم بالمنظر ده وكلمت السفارة ورد عليا الموظف المختص وقاللى

يامدام انا مليش ذنب دى بنت المستشار !!! بتتمرن فى السفارة وهى اللى عملت الجوازات دى ....مقدرش اعترض وحضرتك عندك حق ولو عاوزانى ادفع تمنهم من جيبى واعمل لك غيرهم ..

طبعا قريبتى كانت محددة ميعاد السفر ..........وقالت له طيب انت ذنبك ايه ؟؟ بس السفر بالجواز ده يعتبر جريمة ...قال لها لالالا مفيش مشكلة وسافرى انتى ...سافرت والمهزلة حصلت فى المطار ....ولما راجعوا ولقوا انها مواطنة ( ملهاش سوابق ) ...قالولها لو فى الرجوع حاترجعى بالجواز ده مش حاتسافرى ...وطبعا طلعت جواز سفر تانى من مصر ...

سكوب.../ ياسلام...ياسلام سلم ..دى بقى حاجة معروفة عندنا ...ده قانون ياعمنا ...يعنى يشغلوا ولادهم وولاد حبايبهم والا المكاتب التجارية ...شوف بقى دى عاوزة لها واحد شاى تمام وتيجى تقعد جانبى هنا احكى لك بينى وبينك الا حد يسمعنا ...انا مرة اول ما سافرت زمان يعنى رحت اختم فاتورة وشهادة منشأ فى السفارة ...

وبدردش مع الموظف المسئول وبقول له ...انا ببعت لمصر كام منتج من تصنيعى ...بس انا لو عاوز كشركة اجنبية اشترى من مصر ايه النظام ؟؟

وكان يوم ياعزيزى مطلعتلهوش شمس ....( اتلموا عليا تقولشى انا هندى ؟؟ ) ..

لازم تروح للمستشار التجارى وممنوع اى منتج مصرى ييجى من غير ما المكتب ياخد بيه علم ولازم تاخد شهادة معرفش ايه ؟؟.......يعنى نصب علنى ...( كله كان كذب عاوزين يبيعوا لى الترماى ) ....

ويقوللى ملكش دعوة هنا حتى التخليص الجمركى المكتب بيقوم بيه ....( الله ؟؟ هو فيه ايه ؟؟ ده مكانش سؤال يتيم )

مش كفاية كنت بدفع فى ختم الورقة الواحدة اكتر من مائة دولار .....مع ان ايامها كان يقولك ممكن تختمها من اى سفارة عربية .....واكتشفت بعد سنين ان سفارة الاردن بنختم الشهادات بأقل من ربع التمن ...

يعنى كانت سرقة علنى ...

رجعوا من كام سنة يجبروك تختمها من السفارة المصرية ...ودلوقت تدفع باليورو .........وبرضه الاختام كلها على بعضها بملاليم وتدفعلك ربعمائة يورو جدعنة ...والا اكتر ...رسوم تسجيل ..

سلوى .../ بتفكرنى ياسكوب باللى حصل عندنا برضه من ييجى عشر سنين ...

اتصل بيهم مريض مصرى .يقول لهم انه ميعرفش حد وعنده ظروف وهو طريح المستشفى ...تفتكر عملوا ايه ؟؟

دوروا ( فى دفاترهم ) ...واتصلوا بمواطن مصرى معروف فى المدينة اللى هو فيها ...وقالوا له ممكن خدمة ؟؟

فيه مواطن مصرى( آخر ) طريح الفراش ....روح شوفه ...آهو ثواب ...من فضلك يعنى لو ميضايقش...اصل محدش فاضى .

وراح المواطن ده ....قابل المواطن المريض....واتضح انه دكتور مشهور ...( بس لم يشرح شئ للسفارة ...هو فقط قال لهم انه مجرد مواطن مصرى ) ...هو فقط كان محتاج لزيارة اى مصرى وكان خايف الا يحصل له حاجة ومحدش يشعر بيه ..يعنى عملية انسانية فقط ....ليس لها اى دخل بالمادة ..

هى كانت بداية لصداقة جميلة جدا جدا بين الاثنين ..ولوقتنا هذا يقدر الدكتور الموقف الجميل لبلدياته...

المشكلة هنا .....هل المواطنين فى البلد الغريب هم المسئولين عن مواطنين آخرين ؟؟ وبأى حق تطلب السفارة ان يقوم مواطن بعملها ؟؟ ونفرض لاقدر الله ان الدكتور ده كان محتاج لاى شئ ...هل هم يجبروا الناس ويضعوهم فى موقف حرج ؟ والا ايه بالضبط ؟؟ ..

بنت مصرية .../..ياساتر....ياساتر على دى سيرة .

متفكرونيش بالسفارات ...متفكرونيش باللى حصل معايا ..

دى متاهات وعالم داخل عالم....يعنى دنيا جوة دنياهم ....طيب انا فاكرة لما كنت فى بلد اوروبى ...وبالصدفة اتفرجت فى التلفزيون على برنامج بيتكلم على اكلات الشعوب ....واستضاف حرم السفير المصرى ..

كان يوم ...كان يوم...

الهانم قدمت طبق الكشرى الشهير ....و مش عاوزة افتكر ..مش عاوزة افتكر ...

يعنى كأنها رايحة سهرة ...ده اولا ...ويعنى يعنى ملقتش الا الكشرى ؟؟ وياريتها عارفة تعمله ؟؟ (( ببساطة يعنى ))...يعنى باينة واحدة اول مرة فى حياتها تسمع عن اختراع اسمه ((( مطبخ ))) ...

وكفاية كدة الا سيرة السفارات بتنرفزنى ..

نانو ..../..الله يخليكم ..كدة ريحتوا قلبى .الحمدلله انى بفهم بس فى الصيدلة ..

كدة ضمنت انى مش حاشتغل فى سفارة ولا قنصلية ...وآل انا كنت فاكرة انه كله تمام وبتوع سفارات اوروبا حايتعلموا النظام الصح هناك ...يعنى عندكم برضه ...( ابجنى تجدنى ؟؟ ) ..فى المكاتب التجارية ؟؟ معنى كدة بقى انها مكاتب خاصة ؟؟

استنتاج سليم ؟؟

اخناتون .../ ...الحمدلله اخيرا وضحت الرؤية ..

الافوكاتو .../ انا عن نفسى وبصفتى غير القانونية ....افضل عدم التدخل فى امر شائك مثل هذا الامر ...

لكن بصفتى القانونية اقترح فى حال وجود اى اعتراض على اى تصرف ان يقوم المجنى عليه بتقديم دعوة او اعتراض على المدعو عليه ..

سى السيد .../ قصدك يااستاذنا ....المدعى عليه ....علشان كلنا بندعى على اى ظالم ...وآهو كل المسئولين دلوقت فى كل بقاع الارض بقوا من الظالمين ...

احمد محمود.../ انا لى تعليق واحد ونفسى اوقفهم كلهم كدة على بعضهم قدامى واقول لهم ...

ارحموا من فى الارض يرحمكم من فى السماء ...

سلام عليكم ...

[الأفوكاتو]

الأفوكاتو:

يا ريت با سكوب تشوف لنا طريقة نرجع بيها رواد القهوة للعودة إلى ماضيها الزاهر الوطنى, ما رأيك؟

سكوب:

يا متر, أنا مستعد أولع صوابعى شمع علشان ألم الحبايب مرة تانية فى القهوة, دى بيتنا كلنا, و كل واحد ممنا كان عنده حاجة, أو سؤال, كا ييجى هنا, و كلنا نشوف حل.

دى هيه الجدعنة المصرية, و لكن نعمل إيه؟

سلوى:

نعمل حملة إعلانية, فى صحف النت, ندعوا فيها زباين القهوة القدامى إلى العودة إلى قعدتنا االقديمة, بحيث نفضفض, و ناخد راحتنا, و نحن مطمئنون أننا أسرة واحدة, يخاف كل منا على الآخر, و يحميه بآخر نقطة من دمه.

الأفوكاتو:

أوافق.

سكوربيون:

موافق:

بقية الرواد: موافق.... موافق... موافق......

حان وقت إعلاق القهوة, نراكم غدا على خير.( إدارة القهوة)

[عصام]

لو حد عنده شوية وقت ..

يقرا الموضوع دا .. لكن من أوله ..

ولو معندوش وقت .. يبقى يرجع له بعدين .. :happy:

منك لله ياللى ف بالى :lol:

[Scorpion]

بقالنا سنتين ما نزلناش القهوة ... نروح ناخدلنا كوباية شاي و نشوف اللي بيجري في مصر اليومين دول :

سكوب : هي ايه حكاية التمويل ده ؟

عبير : قطع .. داهية تاخد التموين و سنينه ... 3 ساعات واقفة علشان آخد في الآخر ازازة زيت و البيه يقوللي الرز لسه ما جاش ..

ابو محمد : تموين ايه بس يا مدام عبير .. بيقول لك التمويل ... وأنا يا سكوب يا أخويا مالياش في التمويلِ ... عمري ما أخدت اي تمويل في حياتي ... حتى ولا تمويل عقاري وخلينا بعيد أحسن

سكوب : طب والناس اللي طالعة تشتم في الحكومة لأنها سمحت بسفر الجماعة بتوع التمويل وتقول إنها فضيحة

ابو محمد : دي ناس و لا مؤاخذة مش فاهمة حاجة... لأن الست هيلاري مسكت المعونة في إيد والجنزوري مسك المتهمين الأمريكان في إيد ولعبوا "سيب وانا اسيب". وبعدين حكومتنا نزيهة والحمد لله... والجنزوري قال بدال ما الست هيلاري تجيب بالمعونة "أقنعة فانديتا" وتوزعهم على العيال بتوع التحرير... نجيب إحنا بالمعونة طراطير ونوزعها على المصريين والشعب كله "يلبس" وينبسط .... وكمان الناس قاعدين يقولوا الجنزوري كان معرضها وطلع في البرلمان يقول مصر لن تخضع ولن تركع لأمريكا في قضية التمويل... وميعرفوش إن الست هيلاري "زغرتله" بعنيها وقالتله: جنزوووري ... رد عليها بطريقة عبد الفتاح القصري: خلاص هتركع المرة دي بس يكون في معلومك المرة اللي جاية لا ممكن تركع أبداً... وبعدين فضيحة ليه ده الموضوع ما إتعرفش غير في مصر ... وهي مصر كلها قد إيه يعني؟.

سي السيد : علي رأيك يا أبو محمد ...إذا كان "أرشميدس" اليوناني اخترع قانون الإزاحة... و"نيوتن" الإنجليزي اكتشف قانون الجاذبية... فإن المصريين هم اللي اكتشفوا قانون "الطرمخة" ومحدش أحسن من حد ... وسلم لي على سيادة القانون... ولو سيادته سأل علينا قوله إن إحنا مش هنا.

سكوب : طب هو يعني فيها إيه لما نركع لأمريكا... ما إحنا كان عندنا فريق "الساجدين" ومفيش حد زعل... ولا هي حلال على اللي بيلعبوا كورة وحرام على اللي بيلعبوا في السياسة... وبعدين لعلمكم الحكومة ركعت لأمريكا بموافقة البرلمان وبما لا يخالف شرع الله ... والأرض "كرويةٌ" وكل حاجة في مصر بتتغير... والمتهمين طلعوا مش متهمين وسافروا... والبلكيمي طلع عامل عملية تجميل وهيترفد... وواحد صاحبي كان عامل جدع قوي طلع قطة... حتى اسألوا مروى اللي كرموها في حفلة شهداء الشرطة.

صوت من آخر القهوة : جري يا سيد .. احنا حنتريق علي الشريعة و الا ايه ؟ خد بالك من كلامك و ما تتعداش حدودك

سكوب : يعني من كووووووووووووول للي قولته ما خدتش بالك الا من دي ... ماشي .. حقك عليا يا مولانا .. انا آسف يا جماعة ما كانش قصدي .. لا تتعمللي قضية ازدراء اديان و الا حاجة و دي مش اقل من ستة سنين ..

فولانة : زمان سافرت المغرب و كانوا بيقولوا "وأنت في المغرب ... لا تستغرب".... والحمد لله رجعت مصر وبرضه ما بقيتش استغرب .... طب إنتوا "على إيه مستغربين؟!!" على رأي المرحومة فايزة أحمد.. ما طول عمر القضاء في مصر بيتعمل فيه كده لحد ما تحول من قضاء إلى ... قضاء وقدر.

محمد : في وطن يقف الناس فيه طوابير علشان رغيف عيش أوأنبوبة البوتاجاز.. و عالناحية التانية من الرصيف الأسلحة بتتباع عيني عينك .. ويوزعوا على بطاقة التموين بلطجي لكل مواطن... ما تستغربش إن الحكومة تصدر قرار "بالليل" بسفر متهمين أجانب والقضية لسه شغالة .. وتدفعهم كفالة وهما مفروج عنهم .. وتنزل طيارة عسكرية أمريكية من غير تصريح في مطار القاهرة تاخدهم وتفك..

أسد : بيفكرني بأغنية سهير الباروني و هي بتغني أغنية الحرامي .. دلوقتي الحكومة لسه بتغنى "دخل الطيار الأمريكاني وأنا نايمة ... شوفوا قلة أدبه"

وصديقي الباشمهندس حسن لما راح لحماه وقال له "إزاي تسمح لبنتك وهي زعلانة عندكم في البيت ترجع الساعة 2 بالليل وتشترطوا عليها إنها ما تكونش مع جوزها" رد حماه: "طب شغلها بالليل بيجيب فلوس ... لكن جوزها ما بيجيبش فلوس".

أمشير : الحساب يا سي سكوب .. عايزين الفلوس اللي عليكم

سكوب : ليه شايفني بشتغل بالليل .. قيدهم عالنوتة يا حبيبي ...

الكيلاني بتصرف

[عبير يونس]

بقالنا سنتين ما نزلناش القهوة ... نروح ناخدلنا كوباية شاي و نشوف اللي بيجري في مصر اليومين دول :

سكوب : هي ايه حكاية التمويل ده ؟

عبير : قطع .. داهية تاخد التموين و سنينه ... 3 ساعات واقفة علشان آخد في الآخر ازازة زيت و البيه يقوللي الرز لسه ما جاش ..

ابو محمد : تموين ايه بس يا مدام عبير .. بيقول لك التمويل ... وأنا يا سكوب يا أخويا مالياش في التمويلِ ... عمري ما أخدت اي تمويل في حياتي ... حتى ولا تمويل عقاري وخلينا بعيد أحسن

افهم من كده ان مفيش رز خلاص ؟؟؟!!!!

:unsure: