إعلانات من الثمانينيات..

[Sherief AbdelWahab]

حقبة الثمانينيات..

موسيقى الثمانينيات ، أغاني الثمانينيات ، وإعلانات الثمانينيات أيضاً!

تيجوا نفتكر مع بعض أغرب لزمات الإعلانات التليفزيونية في فترة الثمانينيات..

خلص الكلام

[عصام]

كارمن حلو وزى الفل ..

تلاقيها موجودة عند الكل ..

أكبر حجم وأحسن لون ..

واصفر واحمر واخضر وازرق ..

واحد اتنين تلاتة كاروليت كاروليتة :angry:

صقفى لى صقفة وانا انط نطة ..

rs:

[Abood]

بيلعبوا بيلعبوا فى الشمس بيلعبوا

لعبوا شوى وتعبوا ماعادوا يلعبوا

جابوا تانك ودوبوا وصاروا يشربوا

ورجعوا يلعبوا

ماعادوا يتبعوا

تانك تانك تانك غنى بالفيتامين

تانك من انتاج جنرال فوود

ياكلوا حلاوة ياكلوا جاتوه ياكلوا كل اللى يحبوه

والتسويس والتسويس

انا معجون مخصوص علشانكوا

انا معجون يحفظ اسنانكم ...... اسمك ايه

معجوت المعاجين آرتف بالفلورين

الوان اللخبطة بتشخبط شخبطة وبترسم بنت حلوة وجنبها ولد

انا وديكسان لايمكن نجتمع ابدا فى مكان .. ده مبيد خطير ليا ولأخوانى المناشير

الشمعدان زى مابتحبه بيحبك كمان

حسنين ومحمدين زينة الرجال الاتنين

بصوا وشوفوا يابوى حسنين ومحمدين

اه يابوى يابوى يابوى يااااااابووووى

تم تعديل 21 فبراير 2005 بواسطة Abood

[عبدوس الوزير]

مكتوب عليا الشجا والراحة فين يا زمان

....

كتر العيال يا زمن وروني ويل الويل

بيدفعوني التمن طول النهار والليل

اتنين على كتافي

وتلاتة فوج راسي

والباجي بيجروني

من ديلي وانا بجري

لو رحتى الوحدة الصحية

وسمعتي كلامي يا شلبية ...

[G.G]

Gravena ... ax:

إنسف حمامك القديم .

[yasovinas]

جبت الشقه ،،،،، لسه

بوم fsh::

جبت الشبكة ،،،،،، لسه

بوم fsh::

جبت الملبس ،،،،،، ايوه :angry:

من كوفرتينا ،،،،،، من كوفرتينا

[Katamando]

في ناس لخبطت اثمانينات على الستينات والسبعينات

كوفرتينا من السبعينات وقبل البث الملون

أرتف بالفلورين من السبعينات

جرافينا من الثمانينات

كان هذا تصحيح لا بد منه

:angry: rs: :D :D

[Ahmed Mohsen]

هاتلنا ريري ..... هاتلنا ريري

هاتلنا منه باكو واتنين

الصلاة عالزين الصلاة عالزين

[عادل أبوزيد]

من الستينات و أظن لن يصحح لى إلا شخص أو إثنين:

عن معجون أسنان بالنيومايسين و الست إستمرت فى الغناء

ياكلوا حلاوة ياكلوا جاتوه ياكلوا كل اللى يحبوه

إستمر الإعلان بكثافة ما يزيد على الست شهور ... و توقف بعدها المنتج لأنه ثبت إن إضافة النيومايسين ضار لا أذكر إن كان ضار بالصحة العامة أم بالأسنان فقط و أذكر أن صاحبة الأغنية أصيبت بالإكتئاب بعدها (أو هكذا قيل لنا)

إعلان ثانى كان خطير و نفسى أشوفه تانى كان تكون الست تعمل أى شئ ثم تفاجأ بأرنب رابسو يقولها أنا إسمى المسحوق رابسو و إنتشر هذا الإعلان بجنون

هل من يذكر أنا الميلامين جامد و متين

أو إعلان ياللا يا بابا على الشرق للتأمين

[Scorpion]

أنا الميلامين .... أنا الميلامين

أنا جامد و متين

انا بدل الصين...صحون مواعين...

ماحدش يكسرني ... ماحدش يقدر يجرحني...

زينة البيت ... لما تشوفني تقول

كنت فين من زمان ...

طبق و صينية و فنجان..

أنا الميلامين أنا الميلامين

أنا جامد و متين

[عادل أبوزيد]

أستاذ كامل .... يبدو أننا دفعة واحدة

سأعصر "مخى" حتى أجد شئ أنفرد به

أطيب تحياتى ... الحق يقال خدمة متميزة خمس نجوم

هل تذكر إعلان:

الست سنية الست سنية سايبة المية تخر من الحنفية

حراااااااااام يا ست سنية

[Scorpion]

يالله يا بابا.. يالله يا بابا ..

دانت شباب مافيهاش غرابة ..

و بتجرى على رزق العيلة بعزيمة و قوة وطيابة ..يا الله يا بابا ..

واد ده عفريت ..

لأ .. واد متنور ..

و تسع تشهر جوه بفكر ..

حعمل ايه بعدين لما اكبر ؟

دبرنى و دينى اجابة ؟

يا الله يا بابا .. يا الله يا بابا .. يا الله يا بابا ..

يا سلام

لأ .. قول يا سلام سلم ..

م المصاريف لما راح اتعلم

ثانوى و جامعة و اقولك كلم .. أبو بنت أنا حبيتها يا بابا ..

مظبوط ..

طيب احميلى ظهرى ..

و بقرشين حوشهم شهرى ..

أمن لى تعليمى و مهرى ..

و الله دى فكره جذابه ..

يالله يا بابا ..

عالشرق للتأمين و مشروعها العظيم .. هاتلى يا بابا وثيقة المهر و التعليم ..

علي فكرةالإعلانات دى كانت فى الستينيات ..

[Hammer]

لا كتويل ... أي لايك إت

إعلان من فجر التاريخ و حتي ال 900 سنه اللي جايه

----------------------------

ليسيكو .. لمسه جمال في مصر .

--------------------------

حسنين و محمدين ... زينه الشباب الاتنين -_-

--------------------------

عبد الهادي الحلواني .. في باب اللوق و السيده زينب ( هرتله .. مش فاكر اللحن :) )

---------------------------

خضر , خضر , خضر العطار ( برضه تبع الهرتله اللي فوق ) B) B)

[MZohairy]

سلام عشان خضر العطار

معروف كمان وزباينه كتار

والجار يقول للجار

اسعاره

ارخص اسعار

من اسوان لراس التين

عارفين طبعا عارفين

فيه عنده قمر الدين

وافزدق ويا التين

واشمر والينسون

والفلفل والكمون

وعرفنا

العنوان فين

في الصاغه

والحسين

خضر خضر خضر العطار

خضر العطار

[MZohairy]

زجمار ياما عنده حاجات

وكمان الموتيسيكلات

وعنده هوندا

وعنده تشاوا

كمان سكوتر آخر حلاوه

ابعت ياد شغل بلادنا

عجل اطفال لجل ولادنا

ومهاود في الأسعار

زجمار زجمار زجمااااااااار

[MZohairy]

الصلا عالزين

الصلا عالزين

ياورد مفتح عالخدين

جبت الجمال ده ياحلوه منين

البركه فريري ياضي العين البركه فريري

انا جيت اهني بشكل جديد

ومعايا فيتامين كله حديد

من رضعه واحده ابنك حيزيد

غير مشيه بدري ده بالتأكيد

ريري جه هل هلاله

والكل هيصله وقالو

جانا ريري جانا

سقفوله معانا

يامشبعنا

يامقوينا

يامكبرنا

ومغزينا

البركه في ريري

هاتلنا ريري

هاتلنا منه باكو اتنين

الصلى علزين الصلى عالزين

[Reham]

اولا احب اكمل اعلاني المفضل :)

انا جيت اهني بشكل جديد

ومعايا فيتامين كله حديد

من رضعه واحدة ابنك هيزيد

غير مشيه بدري ده بالتأكيد

جانا ريري جانا

سأفوله معانا

يامكبرنا يامغذينا يامشبعنا يامقوينا

البركه في ريري

هات لنا ريري هات لنا ريري

هات لنا منه باكو واتنين

الصلاه عالزين الصلاه عالزين B)

طب فاكرين اعلان كاراتيه متهيألي الشباب الصغيرهنا مش هيفتكره...

كاراتيه كاراتيه

طعمك حلو كده ليه

كل الدنيا بتجري عليه كاراتيييييييييييييييييييييه -_-

هاللو B)

كيمو اذيك يا

كيمو وحشتني انت فينك من زمان

فراوله او شيكولاته

فسدق بندق جوه كاساتا

كيمو انا مش هنسااااااااااااااك

مم ..غني ولذيذ

فاكرين:

مصانع الشريف يامصانع يامصانع الشريييييف

بابا جاب لي شنطة

جميلة وذوقها جمييييل

شماعه مساطر امشاط

واطقم للحمام

جميله وذوقها تمام

...........مش فاكره الباقي

[Reham]

معلش يازهيري

انا شكلي جيت معاك في نفس التوقيت -_-

بس انت شكلك موسوعة

طلع اللي في جعبتك بقي وفكرنا

[MZohairy]

ولا يهمك ياريهام

الاتفاق في الرأي لا يصلح للود قضيه :)

حديلك رؤوس مواضيع وعلى ما افتكرها يمكن حد فيكم يفتكرها

حسن شحاته ...طاهر الشيخ.....مصطفى عبده......والخطيب

انجرام

بيريحني

انجرام

اهي دقني اهه

وكمان كان في

جيزافيلا وات ايز زيس

اتس مام

يس اتز مام

مام

و طبعا مجموعة اعلانات شويبس لحسن عابدين

و سبورت كولا تزيدك مرحا

آآآه

كان في

1

2

8

حجيبلك عربيه

تسألني ايه

اقولك لأ مش هيه

تسألني ايه اقولك اهيه

اسمها ميتسوبيشي الدودج الأمريكيه

سقف سقف

ميتسوبيشي

دودج ميتسوبيشي

فراملها سيرفو

تشيل بضاعه

500 كيلو

ايد عامله ياباني

خبره امريكاني

لا تقولي كارو -_-

[Reham]

ايه ياشعب نسيتوا تراثكم ولا ايييييييييييييييييييه

فين اعلاناتكم

فاكرين ....

محمود ايه ده يامحمود

فاكرين..... شوف الوبر شوف العقد شوف الشراشييييييييييييييييييب

سجاد وموكيت كاربت سيتي لما تشوفه تشييييييييييييب

فاكرين واحد

اتنين

تلاته

كارولين ...كارولته

سقفولي سقفه وانا انط نطه

كارمن دي عشان العربيه

وقد كدهه عائليه

كارمين دي للي في الجيب.......

وباك بتاعي باك بتاعك باك بتاعنا كلنا

فيه كمان اعلان just one makaroooooonaaaa

مكروناااااااااااا نووووووووووور

قولو انتوا بقي انا خلاص علي كده

مش لاقيه

واعلاناتك يازهيري مش فاكراها....انا اسفه فعلا بس يمكن نلاقي حد هنا فاكرها