عكاشة .. يكسب ..تزايد أعداد المواطنين المشاركين فى مليونية مساندة الجيش بالأنفوشى

[tarek hassan]

شعورك اية يا ثورجي وانت شايف ميدان التحرير بتاع الثورة فيه 500واحد وان عكاشة الفلول لوحده واقف في وسط عشرات الآلاف انا لو منك مفتحش بقي تاني!!

[التونسى]

الثوار اصلا متعرفش هما عايزين ايه .. ولا عايزين الاخوان(مرسى) ولا عايزين العسكر(طنطاوى) ولا عايزين الفلول(شفيق) .. وهما اصلا كيان اعتبارى وملوش قاده معينين .. يعنى مينفعش حد منهم محدد يمسك الحكم اصلا .. بجد العمليه بوخت اوى .. والثوره دخلت فى مرحله اشبه بثغرة الدفرسوار

[إمحوتب]

الثورة الحمدلله نجحت بامتياز وحققت الهدف الرئيسي

و جبنا ريس بإنتخابات نزيهه

وكل شيء هيتحسن مع الوقت كلها 3 سنين

وتحصل إنتخابات تانية والشعب ينزل ويختار وإن شاء الله الساسة يكونو اتعلموا من اخطائهم

ولو اني شايف ان لحد النهردة محدش له حس على الارض

مفيش معارضة ومفيش احزاب حقيقية على الارض

سنتين واكتر مستنين ! ايه تاني ؟ امتى بقى ؟

وشباب الثورة معدلهمش حس ليه ؟

شفت تعليق لوائل غنيم بينتقد المعارضة وتقريبا نفس الفكرة بيرددها كل مواطن

ليه الأحزاب والقوى السياسية المعارضة مكتفية بمشهد المتفرج الرافض؟ فين خطة الانتخابات القادمة؟ فين الأجندة التشريعية اللي هيشتغلوا على تمريرها لعلاج المشاكل الاقتصادية والسياسية والاجتماعية والأمنية؟ فين التعديلات اللي ناويين يطالبوا بيها لإصلاح العطب الموجود في الدستور؟ طيب في حالة وصولهم للأكثرية، مين هيكون رئيس الوزراء اللي هيرشحوه للوزارة؟ فين خطتهم ببعض أسماء الترشيحات الخاصة بفريق الوزراء القادرين على إدارة رشيدة للحكومة؟ فين أسماء مرشحين مجلس الشعب اللي هينزلوا الانتخابات؟ .. في أي دولة في العالم المعارضة دورها السعي للسلطة لأن المعارض يرى في نفسه أنه أقدر على إدارة موارد ومؤسسات الدولة بشكل أفضل من الحزب الحاكم .. الأحزاب السياسية التي بتكتفي بالاعتراض عبر وسائل الإعلام وتنظيم مظاهرات واعتصامات فقط هي مجموعات اعتراض وضغط وليست أحزاب سياسية معارضة تسعى للوصول للسلطة!

وهييجي هنا سؤال عبر التعليقات (وغالبا هيتكتب كده كده برغم ردي): يعني إنت سايب السلطة وبتنتقد المعارضة؟ لا أنا مش سايب السلطة بس آه هانتقد المعارضة! لأن عدم نقد المعارضة مخليها مكتفية بالاعتراض معانا من مقاعد الجماهير .. زي الطالب اللي مش مذاكر وسعيد جدا إن المدرس مركز مع زميله اللي جنبه وقاعد بيدعي ربنا إن المدرس ميسألوش!

محتاجين ناس في المعارضة يكون عندها رؤية وبتخطط مش هاقول خمس سنين (مع إن ده الكلام المنطقي) ولا حتى سنتين أو سنة! .. محتاجين المعارضة تفكر وتخطط لعدة شهور ويبقى أساس تحركاتها قائم على الفعل وليس رد الفعل والإجابة عن الأسئلة اللي فوق (بعيدا عن الإفيه المسجل تاريخيا باسم وزير الإعلام) هي استحقاق على المعارضة للشعب لنيل الثقة .. المعارضة لازم تقدم نموذج مقنع للشعب بأنهم قادرون على حكم البلاد.

وأخيرا: يا ريت حد يسأل الرئيس مرسي أو الدكتور هشام قنديل: حضرتك قلت إن عنصر الكفاءة والخير هو المعيار الذي يتم الاختيار على أساسه، طيب هل من تم إسنادهم مهماتهم الجديدة هم الأكفأ والأكثر خبرة؟

وانا بقول انت فين من الحياة السياسية ؟!

[الترجمـان]

مش شرط يا اخ طارق ....

مش شرط ان كل واحد قرر ياكل من صفيحة زباله وشبع وحمد ربه يبقى نقيس عليه ونقعد نقول الثوره نجحت على حسابات الإخوانجية او فشلت من وجهة نظر محاسيب الحزب الوطني ...

وبالمناسبة موضوع الثوار داه ان شلت ايدي منه من زمان من قبل موضوع عصر اللمون والإقبال على عربية العرقسوس الرئاسية ...

واعطاء لقب مرشح الثوره لشخص اعترف شخصيا بانه لا يمت للثوره بصله في الكليب المشهور الذي يخصه..

وعن نفسي اعول كثيرا على عامل الزمن والتاريخ وقدرتهما على إسعاف هذا الوطن في الوقت المناسب ..

تم تعديل 19 مايو 2013 بواسطة الترجمـان