هذا المنتدى

[optimistic]

بسم الله الرحمن الرحيم

طبعا انا مش متوقع من ناس كتير تفتكرني

انا واحد كده كان شارك في المنتدى ده فترة

و بعدين مشي

وبطل يكتب و قال نتفرج

و بعدين بطل يتفرج حتى

و النهاردة و يمكن بعد 10 شهور كده

هفني الشوق

و قلت ادخل

و قبل ما اتكلم معاكو كلمتين

نفسي اشكر الناس اللي افتكرتني وسألت عليا و اعتذر ليهم

و نفسي اقولهم و لغيرهم

ان بعض من اوقاتي معاهم في المنتدى

كانت من افضل اوقاتي على الاطلاق

طيب

انا باكتب تاني ليه

و عاوز اقول ليكم ايه

ببساطة انا زعلان على المنتدى

و المنتدى ايه غير ناسه

و القدامى على وجه الخصوص

المحاورات

بقى صورة شبيهة

او مطابقة

لحالنا و حياتنا

حوار طرشان

اتهامات متبادلة

حاكم و محكوم

تعصب

تسطيح

و المحزن اكتر

اغلبية صامتة حزينة

:::

لما ابتديت اكتب في المنتدى

كان له شخصية

مستقلة عن شخصيات اعضائه

كان شبه شخص حكيم ودود

بيحب كل الناس

و بيخاف عليهم

و على بلده

و كان عنده حماس

و أمل

:::

كان واخد من كل واحد مننا حاجه

مرح شانا و رقتها

لطف كليو و كروس فيلد و شقاوتهم

خفة دم فيروز و حشيش

غيرة سيفود و عمق داروين و سقراط المصري و فاكت ريسيرشر

حضن عادل ابوزيد و وايت هارت و رجب

جدعنة لانس و براود مسلم و كاتاماندو و جورج و لينوكس و واحد

دقة سكوربيون وهشام و ثقافة ابن مصر و محبط

وطنية الطفشان و سي السيد و اخناتون و الافوكاتو و اسد و مصراوي ابرود

طبطبة ابوحلاوة و سلوى

حنية فريدة و لايت هاوس و ست امينة

مثابرة فريفرير و شريف عبد الوهاب و الكباريتي

طيبة مسلمة مصرية و متسائل

انسانية شرقية و سيد مرزوق و مكسوف وصعيدي

و ناس كتير غيرهم

او على الاقل انا كنت باشوف المنتدى كده

انا ماليش دعوة بعدد الاعضاء

و كمية المداخلات

انا باتكلم على روح المنتدى

يمكن اكون غلطان

بس انا حاسس ان في حاجة غلط

المنتدى بقى مفتعل

حاطط ميك اب

صحيح شكله بقى احلى

بس فقد وقود تميزه و تفرده

بقى شبه واحد من اللي قاعدين في قهوة الموظفين بتاعة مصطفى حسين لو حد منكم فاكرها

انا فاكر في يوم من الايام كنت باطبع ورق للكلية و كنت باكتب عليه الادريس بتاع المحاورات

كنت حابب ان غيري يشاركني شيء انا بحبه و فرحان بيه

ده راح

و انضمت علاقتي بالمنتدى

لقائمة احباطاتي المطولة

زي حاجات كتير

مش عارف اوصف لكم دي اوي

بس زي جنينة جميلة و نظيفة كده كنت باعدي عليها

اتحولت لمكان غريب وفتحو فيها كافيتريا من ام كراسي بلاستيك

و مشغلين كاسيت عالي مزعج

و ناس لزقت صور مرشحين مجلس الشعب على السور

و اللي ماسك شباك التذاكر زهقان و مش عاوز حد يشتكيله من اي حاجة

حاجة زي كده

أو زي بيت قديم جميل

اتهد و بقت مكانه عمارة عالية بتطلع لسانها لأي معنى للذوق و الجمال

مش عارف

حد فاهمني؟

[emmyyy]

Optimisticقلت بالظبط الي كان نفسي اقوله بس انا باجي كل يوم علي امل ان كل حاجه ترجع زي الاول اني افتح المنتدي الاقي اكترمن 100 مداخله زي زمان وما يبقاش عندي و قت اقراهم كلهم لكن اصمم اني هاقراهم و الاقي يجي 20 موضوع لازم ارد عليهم انا هفضل مستنيه و برده هاجي كل يوم انشاء الله

[هشام عبد الوهاب]

optimistic \ emmyyy

حمد الله على السلامه

كلام كتير قوى صح ..... لكن لكم دور فيه ... لما كل واحد يقول هاتفرج واستنى واغيب .... مين اللى هايكتب ...

الجنينة لوفيها كاسيت عالى وكراسى بلاستيك ..ممكن تتغير وترجع احسن علشان حاجه واحده بس .

اننا نحاول ونحاول ..........................يمكن وهو ده المهم .

صوتنا يوصل .............................

[أسد]

optimistic

ألف حمد لله على السلامة ..

ياللا .. معانا ...

وإيدك على أيادينا ... بمداخلات الأعضاء يكون المنتدى ..

مداخلاتك القيمة ستساهم في إثرائه...

تم تعديل 26 فبراير 2005 بواسطة أسد

[الأفوكاتو]

أسعدنى ظهورك على هذه الصفحة.

حمد الله بالسلامة,

لعل ما قلت سيكون بداية لعودة الأيام الخوالى . البركة فيك و فى أمثالك الذين أثروا المحاورات فى الماضى, و نامل فى الحاضر, و المستقبل.

مرحبا مرة أخرى.

تم تعديل 26 فبراير 2005 بواسطة الأفوكاتو

[achnaton]

اهلا بك .. والف سهلا .. نورت وعقبال اللى ذكرتهم ..

بالذمة فيه حد ينسى التفاؤل ؟؟؟ دى ما تبقاش عيشه ..!!

شوف الكل متفائل ازى

مرة حمد الله بالسلامه :)

[بنت شعنونة]

اوبتيييييييييييييي

ازييييييييييييك وحشتني جداااااااااااا

فينك من زماااااااااان؟

ولا حس ولا خبر و حتى ادب ولا شعر :)

كدا كدا يعني؟.

ماشي ماشي

[أسد]

ولا تزال محاورات المصريين ..

هي المكان الأنشط ..

والمداخلات أكثر وأفضل وأجود ...

والأعضاء .. من خيرة الناس ...

[se_ Elsyed]

أشاركك الرأي في بعض ما ذكرته يا أوبتي ..

لكن ( إوعى وشك بقى من لكن دي )

التغيير هو سنة الحياة سواء للأسوأ او للأحسن ...

وبالتالي إذا أنفصلنا عن هذا الواقع فيبقى نستاهل اللي يجرى لنا

حد فاهم حاجة ؟

إوعى حد يقول آه .. إذا كنت انا نفسي مش فاهم :)

اللي أقصده إن مستحيل حد يتخيل ان يظل منتدى محاورات المصريين بنفس أعضاءه وبنفس مواضيعه الشيقة وبنفس روحه ....بدون مشاركة وتكاتف من الجميع ...

ما فيش حاجة بتمشي بالدفع الذاتي إلا الاحجار التي تسقط من اعالي الجبال لتهوي إلى القاع ...

ولكن إذا تشاركنا وتكاتفنا جميعاً في إستمرارية وجود المكان ومحافظته على روحه وحدث تغييرات سلبيه ..عندئذ يبقى في حاجة غلط ولازم نقعد مع بعض ونتناقش ونتلاوم ... مش عيب ..

وما تزعلش مني لما أقولك

أنا بأزعل جداً من ناس بتغب تغيب وترجع تقول هو في إيه .. وحصل كده ليه .. وإنتوا بقيتوا وحشين ليه ؟

فإذا كنا إحنا كده يبقى ليه اللي بيخاف على مكان ما يقعدش ويصلح ويثابر ويقاوم لحد ما التغيير يحصل ؟

على سبيل المثال ما انفعش اكون بره مصر طول عمري وأقعد اهاجم النظام وألعن الظروف والجوابات واطالب بالتغيير وانا نفسي قاعد في برج عاجي ومنفصل تماماً عن واقع بلدي ...

كذلك الحال لمنتدانا الذي يُمثل لنا الكثير .. وخصوصاً نحن المغتربين ...

[Cleo]

ألف حمدلله عالسلامة يا أوبتى....!!!! tot::

ليك وحشة كبيرة بجد... و صدقنى أنا كنت مت

أكدة إن غيابك ده مؤقت وإنك لازم هترجع تكتب هنا تانى... mc:

[optimistic]

ربنا يكرمكم يا جماعة

شكلكو كده هتضطرو تستحملوني تاني

معلش

قضا اخف من قضا

بحبكم طبعا

[مصرى]

أهلا بعودتك ..

التفاؤل والاحباط دورة عادية فى حياة الانسان .. المهم أن نعرف أنفسنا فلا نأخذ قرارات ومواقف فى لحظات الاحباط ..