يادى الخيبة .. مش احنا وبس !!؟

[achnaton]

حتى صباح اليوم كنت فاكر إنى واخوتى ابناء الوطن الحبيب الذى شملهم الخالق القادر العادل برعايته وشرفهم بذكر مسقط رأسهم فى كتابه الكريم .. بل واختاره دون بقاع الأرض ليكون مأوى للمظلومين .. وملاذا للفارين من الأستبداد والظلم والأستعباد .. فأوحى الى أم موسى أن تلقيه فى يم المحرسة .. ولجأت اليه العائلة المقدسة هربا من البغى والطغيان .. وكنت أمس فرحا سعيدا للحفل الملوكى الذى أقامه الألمان لرأس الملكة الجميلة حينما نقلوه الى مقر معرض جديد يبعد عن القديم بحوالى سته كيلومترات .. لتذكر الجميع سياح والمان بعظمة مصر من وراء سكن زجاجى ارتفاعة اربعة أمتار .. تفنن فيه كل العلماء - كل فيما يخصه - .

كنت فاكر اننا وحدنا العالمين بالأمور .. وحقائق الأوضاع .. والأمل اللى ضاع .. فى ديمقراطية حقيقية .. وقطع الطريق نهائيا عن سالبى اموال الشعب و مواكب النفاق.. الذى فاق .. فاق كل التوقعات !! وخاصة عندما إستهبلت شلة الفساد .. برسم خطة تعديل مادة للدستور .. عشان نقع فى المحظور ونشترى الترماى اللى خربوه .. وعليه فوق البيعة العتبة الخضراء ..

أنا كنت متصور كده .. ومستحمل غصب عنى أرتفاع ضغط الدم .. حتى كان هذا الصباح .. لمحنى وانا اشرب قهوة الصباح فيما يسمونه " حديقة الشتاء " وهى فعلا حديقة جميله لكن داخل غرفة زجاجية كبيرة .. لمحنى جارى " ابو مناخير كبيرة " ولى معه أكثر من ثلاثين عام جيره .. أستخدم فيها كل الطرق والوسائل لإثبات صفات الجيرة الفضولية .. فكان يدس أنفه فى شئون الجيران .. وكان دائما يذكرنى وهو يحكى حكاوى عن الجيران .. بالمثل المصرى القائل .. " التاريخ يعيد نفسه .. أما تاريخك أنت فيستعيدة الجيران .. " يضاف الى ذلك انه صحفى قديم يتمتع بكل صفات " الشمشمه " وتقصى الحقائق والأحداث ..

وما كدت أسأله هل سيوافينى كالعادة بأخبار ركن مصر الحبيبة فى معرض السياحة الدولى الذى يقام فى مارس من كل عام فى برلين .. وكأنى فتحت حنفية أخبار .. عن أخبارنا الداخلية .. وجهود الحركة الوطنية للأنتقال الى عهد الديمقراطية .. وعملت أهبل .. وما أعرفش ايه اللى حاصل .. !! فكاد يأكلنى بعينيه .. ألم تسمع بحكاية مد فترة حكم الرئيس بتاعكم لفترة جديدة بطرق الإنتخاب .. بورث بعدها الحكم لإبنه وايضا بالانتخاب ؟؟ فقلت له يعنى إيه .. ؟؟ هو مين اللى حينتخبه .. الراجل حيعدل الدستور .. ويخلى الشعب يختار رئيسه !! واذا به يصرخ فى متسائلا .. أنت ما بتقراش جرايد ؟؟ قلت بأقرأ .. الأهرام وجريدة حزب الوفد _ النعمانى - على النت وجريد المعرضة بتاعة الحزب الناصرى ويضحك مكررا سؤاله .. لآ الجرايد الألمانية ؟؟ فقلت له كفاية اللى بينقله لنا قسم الإعلام فى السفارة المصرية .. وده مكتب حكومى وفيه موظفين ومترجمين وهلمه .. بيجيبوا كل يوم الصبح الجرائد ويفلوها ويترجموها والى وزارة الإعلام فى ماسبيرو يبعتوها .. وللجرائد مراسلين ومترجمين .. زى الإذاعة والتلفزيون .. وكلهم آذان صاغية وعيون ودماغ واعية.. بيختاروا الأخبار اللى تخص بلدنا .. وتشيد بتحركات رئيستا ووزرائنا ..!! ده مش كفايه .. وكل الأخبار مطمئنه .. أحنا أحسن دول العالم فى تطبيق الديمقراطية .. ومشروعات الحكومة زى الفل .. وعلى التقدم تدل .. مفيش عندنا بطالة زيكم .. أنتم عندكم خمسة مليون عاطل فى المانيا .. احنا عندنا يتعدوا بالآلاف .. طبقا لما ردده السيد رئيس الوزرا من التصريحات .. !!

الراجل جارى كان حيتجن .. وخبط كف على كف .. وزعق بأعلى صوته .. " يبقى الصحفيين اللى عندنا دول كذابين .. بيفبركوا الأخبار .. دا البلد عندكم على وشك انفجار !! ما تصحى شوية يا جارى .. وتقرأ فى جرائدنا اللى حاصل واللى جارى .. دول لفقوا تهمة لرئيس حزب معارض .. وحبسوه على ذمة التحقيق .. فى وقائع كلها تلفيق .. واذا حصل عندكم هوجة .. زى هوجة الأمن المركزى زمان .. يبقى عليكم العوض فى السياحة كمان .. واعترضت .. وقلت له .. البلد عندنا والحمد لله أمان .. والسياحة تمام التمام .. وزاد دخلنا منها .. ومنتظر يتضاعف عدد السياح .. فيعوضونا على فى توشكى راح .. ضحك وقال .. ده رأيك أنت .. لكن المواطن الألمانى وهو يعلم تماما وضع الغليان فى بلدكم لن يجازف ويختارها لقضاء أجازته .. مش جايز تقوم ثورة وما يعرفش يرجع .. ولكن لأن لسانى مسحوب منى .. ومصر مزروعه تحت جلدى .. قلت له فال الله ولا فالك .. الناس هادية فى كل مكان .. وراضية باللى حاصل وحيحصل واللى كان .. ومش حنلاقى رئيس زى مبارك .. وخاصة بعد تحديد النسل فى البلاد .. وإضراب المصريات .. عن خلف الصبيان .. وبيرحبوا بالبنات .. وبقالنا نص قرن عايشين فى سلام ..

أقولكم الحقيقة .. ولو انها مره .. جارى .. لسانه طويل شوية .. وواخد على ... قالها لى كده بعد ما زهق منى .. روح يا بعيد جاتك نيله .. إذا كنت مش عارف اللى بيحصل فى بلدكم .. تبقى تستحق تتحط فى متحف مع الأنتيكه .. وسابنى وجرى .. !!

الراجل ده معاه حق يا أخوانا .. ولا بيدعى على بلدنا .. دلونى يا ولاد الحلال ..

brd:: :rolleyes: :angry: taz:: taz::