حد هنا من سكان الزاوية الحمرا ؟

[se_ Elsyed]

النهاردة الظهر كده كنت بأشاهد القناة الفضائية المصرية وقرأت خبر غريب على شريط العناوين أسفل الشاشة بيقول إن " محافظة القاهرة بتحب تطمئن السادة ساكني حي الزاوية الحمراء وبتقولهم ما تخافوش إذا سمعوا أصوات فرقعة عالية تزداد على فترات خلال اليوم .. وده هايبقى نتيجة التجديدات التي تحدث في محطة الكهرباء الرئيسية بالحي .. وستستمر هذه الأصوات لمدة شهر والأصوات ستُسمع يومياً "

أنا بصراحة تخيلت نفسي عايش في القرون الوسطى وإن في ناس بتلف دماغنا وبتضحك علينا بحكايات عن الجن والعفاريت وأبو رجل مسلوخة .... فهل تطوير او إنشاء محطة كهرباء في أحد الأحياء في القرن الواحد والعشرين لابد أن يصحبه فرقعات وإنفجارات وذعر وكلام من ده ؟..

طب والله العظيم أنا للوهلة الأولى قولت أخدهم على قد عقلهم يمكن يقولوا لنا في أخر الخبر إنهم بيستخدموا الطاقة النووية في توليد الكهرباء في محطة الزاوية الحمرا عشان كده أصوات الفرقعة دي هي نتجية التجارب النويوة التي يجرونها في صحراء نيفادا اللي تبع الزاوية ...وقولت قشطة .. جت لك على الطبطاب يا بردعي وبكره نلاقيك نازل بطيارتك فوق حي الزاوية الحمراء ومشمع المنطقة بحثاً عن مفاعلات نووية هناك وفي الأخر توصي أمريكا وحلفاءها الأشرار بضرب الحي وبالمرة يُبيدوا حي الوايلي المجاور .. أصلهم الأثنين زحمة قوي وعاملين لنا مشاكل كثيرة .

[G.G]

فهل تطوير او إنشاء محطة كهرباء في أحد الأحياء في القرن الواحد والعشرين لابد أن يصحبه فرقعات وإنفجارات وذعر وكلام من ده ؟..

ايه المانع؟

زي ما ليلة العيد,عندما تجتمع السيدات في المناطق الشعبية لعمل الكحك ,,تجدهم يتعمدن الخبط و الرقع في الصاجات ,,

عشان يسمعوا باقي الحتة ,,من منتلق المنظرة على باقي ستات الحارة يعني ..

و بما إن محطة الكهرباء دي في الزاوية الحمراء.. و الجيران العوازل هم الوايلي و كده..

لذا غير مستبعد أن تكون استراتيجية التطوير تتبنى نفس الفكر ..

مع إبدال خبط ورقع الصاجات..

بالإنفجار و الفراقيع..

[se_ Elsyed]

المشكلة يا GG إن الاوت بوت بتاع الكحك بيبقى كويس وطِعم .. لكن الكهربا لأ .. عشان كده كله يهون في سبيل الكحك والغريبة ..

لكن أنا خايف إن الحكومة تُصدر بيان تاني وتقول فيه إنها بتطمن مواطني الزاوية الحمرا وبتقولهم ما تخافوش لو أحسستم بالتيار الكهربائي يسري في اوصالكم او لو لقيت راسك بتنور وتطفي زي لمبات الفرح .. فده يا أبنائي المواطنين نتيجة التطوير اللي بيحصل في محطتكم وبعون الله هانخليكم خلال شهر مواطنين 220 فولت ...