كيف نحصل على الصفر في عيون الاخرين

[drhusseinali]

كلنا نعلم كم هو صعب للحصول على وظيفة في السلك الدبلوماسي

و الذي يعتبر واجهة و عنوان البلد في عيون الاخرين

انقل لكم هذه القصة كما وقعت تماما

مع عدم ذكر البلد و لا اسماء و ذلك لعدم الاستدلال على اشخاص.

منذ عامين و بعد حوالي 6 اشهر من وصولي لبلد اجنبي حيث ادرس

علمت ان الملحق الثقافي اتي لزيارة الجامعة و يريد مقابلة استاذي على وجه الخصوص.

بصراحة استبشرت خير حيث اني اعلم الانتشار الكبير لامراض الكبد في مصر و استاذي يعتبر احد الاعلام في مجال زراعة الكبد

بصراحة قلت اخيرا فاقوا و اهتموا بصحة المواطنين.

المهم في اليوم المنشود قابلت السيدة الملحقة الثقافية في ذلك الوقت.

و اذا بي افاجاء ان جعبتها خاوية من اي شئ وليس لها علم باي اتفاقيات او عروض للتعاون.

بصراحة ابتديت احس بالقلق.

و قلت استعنا على الشقى بالله.

المهم كنت انا في الوقت ده بحاول اعمل اتفاقية معاه و مع احد الجامعات.

فطلبت منها تتكلم عليها.

دخلت تقابل الاستاذ و معها 6 طلبة في كليات اخرى وابتدت تتكلم مع الراجل واتكلمت على الجامعة التي اخبرتها بها.

ثم لمعت في عقلها فكرة جهنمية.

و قالتلنا ياللا يا ولاد كل اللي يعرف كلية طب في مصر يكتبها في الورقة و نديها للراجل على انها كليات قابلة للتعامل معاه.

ده بغض النظر عن الامكانات الرهيبة التي تحتاج لها عمليات زراعة الكبد و بغض النظر عن استعداد هذه الجامعات لهذه العمليات

و اذ بالقاعة اصبحت كبرامج الفوازير في رمضان وكل اللي تهف عليه كلية يكتبها

كل ده و الراجل عمال يبصلي.

المهم الورقة اتملت و قدمتها له.

وانا عمال اكل في نفسي و ايقنت ان الموضوع كله سداد خانة.

و ليس له اي قيمة.

المهم

بعد كام يوم اذ بالسيدة الفاضلة تقوم بالاتصال بي و تخبرني انها بعثت بخطاب للاستاذ وان هذا الخطاب مهم جدا لاتمام التعاون معه و طلبت مني ان اتابع سرعة الرد عليه.

بصراحة و الله استبشرت خير تاني و قلت ظلمتها.

و لضيق الوقت بعثت خطاب لالسكرتيرة احثها على الرد السريع على هذا الخطاب المهم.

فاذا بها تبعث بصورة الخطاب لي.

و اذا بالخطاب المهم عبارة عن طلب من الهانم للاستاذ ان يقوم بمخاطبة السفير و وزير الخارجية المصري و ذلك لتمديد فترتها حيث ان فترتها للعمل قد انتهت و تريد مدها باعتبار انها من الاعمدة الهامة جدا للتعاون معه و مع مصر من اجل زراعة الكبد.

يعني الموضوع كله من الاول للاخر علشان المد للهانم.

بصراحة انا قرات من هنا و جتلي صدمة.

و من ساعتها بقول اللهم لا تؤاخذنا بما فعله السفهاء منا.

و دي كانت اخر علاقتي بالقنصلية المصرية.

و عرفت كويس اوي احنا ليه بناخد صفر.

[الأفوكاتو]

كم كنت ساذجا يا صديقى عندما تعشمت خيرا فى قوم يتم تعينهم بالمحسوبية, و ليس بالكفاءة.

عسى أن تتعظ من هذا الدرس, و تبتعدعن البرويقراطية المصرية, القاتلة للإبداع و التفوق, اينما كان موقعها.

[drhusseinali]

الاخ الكبير الافوكاتو

شكرا جزيلا لمرورك الكريم على موضوعي

ديه كانت اول و اخر مرة اتعامل مع القنصلية

لا يلدغ المؤمن من جحر مرتين

[مهيب]

اللهم أعوذ بك من السخف ... ايه ده ... يا نهار أبيض ... للدرجة دى ... والله الواحد مش عارف يقول ايه ... عمرى ما كنت أتخيل ان ممكن يكون فى موظف كبير بيمثل واجهة البلد و يكون تفكيره و تصرفه كده ...

عارف يا دكتور .. طول عمرى كنت مؤمن بان أى واحد بيرتكب الفساد لازم يكون عنده اللى يبرر بيه تصرفاته قدام نفسه .... الموظف اللى بيرتشى مثلا .. أكيد بيفرك فى انه لو عاش طيب هياكلوه ... وان الكل بيعمل كده ... ولو هو مرضيش هيمشوه و يجيبوا واحد مكانه يرضى ... و هكذا ... على نفس نظرية جلاد المعتقل اللى بيعذب الناس وهو مقتنع انه بكده بيخدم مصر ...

لكن مكنتش أتخيل ان اللى موجودين فى الوظايف الحساسة أو المرموقة أو اللى بتمثل واجهة ممكن يبقى تفكيرهم بالسخف ده ... الناس دى معندهاش أى مبرر انها تكره البلد ... بالعكس البلد خلتهم وهم من مفتقدى الموهبة ... واجهات بالشكل ده .... يبقى ازاى يفكروا كده ؟؟؟

بس تعرف .. خطابها ده بيجمع كل البلاوى اللى احنا عايشين فيها فى جعبة واحدة .... اللامبالاة و الاستخفاف بالعمل ... و محاولة الفهلوة لمداراة الجهل ... الاهمال و عدم استحقاق المنصب ... الأنانية المطلقة .. وبرضه الغباء و السخافة ... عارف دى عاملة بالظبط زى الشحاذ المتسول اللى أول مايلاقى أجنبى يفكر انه لازم يطلع منه بحاجة .. ولو قلتله صورة البلد ... يقولك ... هأو .. ابقى سلملى على البلد و صورتها !!!!!