الديك المتروشن على عينه

[هشام الجنيدى]

الديك ليه نايم على روحه فى الفجريه؟؟؟؟

الديك خلاص مش هيأدن

ماهو اصله بقى ديك متمدن

يا ديك يا بلدى صحى النوم .....كفياك كسل خف شويه

الديك عامل ريشه اسبايكى

ولابس الحته النايكى

ضحّك عليه الغربان والبوم....وصار مثال للسخريه

الديك مفكرها وجاهه

عبيط وسحراه النداهه

والدنيا مش فورمه ولا هدوم ....ولا فرخه حلوه وعربيه

يا ديك يا فاقس فى العشه

والقش ليك كان الفرشه

أخر ولا ملوهش لزوم.....اكشف حاجات متخبيه

الله يا ديك يرحم جدك

لو كان هنا كان فاتو مدك

تعب عشانك يوم ورا يوم....ضيعت تعبه بغشميه

يا ديك يا عيره يا متأندل

يا بو بنطلون وسطه مدلدل

حاسب لتتكعبل ما تقوم.....وتنطلى عليك الخيه

نايم نهارك وبتسهر

ومزاجك العالى مأفور

مضحوك عليك وانتا الموهوم....وهتندبح ولا ليك ديّه

هتجيب منين ولا توّدى

هتعيش يا ديك وتموت بلدى

ابوك وكان ديك مالفيوم ......وامك مهاش امريكانيه

بالراحه ويا ديك على مهلك

وعيش يا ديك عيشه اهلك

متكلش من الحب المسوم ....وان كان مسكر عسليه

طنش كمان كبر نفّض

وادى دقنى بكره هتتنفض

وتعيش عبيط وتموت مهزوم...مكسور وراسك مطاطيه

[Handicraft]

ديك ايه اللى انت جاى تقول عليه

انت عارف قبله ديكنا حصل له ايه

ديكنا كان له قلب ابيض

أصله ريفى يعنى طيب

كل همه كان فى شغله

او فى علمه او فى اهله

ومرت الأيام عليه

ومر برضه غراب عليه

والغراب كان فوق جناحه

تلفزيون فيه بنت حلوه

بنت حلوه مش غريب

الغريبه فين هدومها

اعلانات رقاصه غنوه

ديكنا تنح ...

الغراب قال جاتلى فرصه

قالوا طيب اجى بكره

وبكره جه وبعده جه

الغراب حط فى بلادهم

والخراب دق فى ولادهم

الغراب خلى الديوك متجنين

فى النهارسارحنين ... متنحين ... حالمنين ... وهامنين

وبعد فتره جاب غراب البين معاه

كام غرابه بس ايه .... آخر حلاوه

احمر اخضر ... رقص خمره ... قمار ولعب

حاجه ايه ... آخر مياعه أو صياعه

وبعد فتره ديكنا كان آخر مياعه

زى صاحبه الغراب ... العجاب

اللى شغله ان يجى دايما بالخراب

درس ايه وشغل ايه ... جنب كل الهلس ده

انت مجنون ولا اهبل لما تسأل

ديكنا يومه كان عجيب

ماتش كوره سينما مسرحيه او فى مرقص

او يعاكس ديكه ماشيه او يكركر او يلعلع

درس ايه وعلم ايه ... وبعد ايه

بعد سوسة الغر اب ما دبت فى كل القلوب

انسى ان بكره يجى على الديوك

دول خلاص لازم يروحى للفرارجى

وبكره يجى ديوك جداد

يعرفوا قيمة العلوم ... وقتهم كل جهاد

او دراسه او عمل او اهلهم

عرفت ايه اللى حصل للديك ... فى بلد اليدوك

ابقى بكره عدى يمكن الحال يتعدل

ربنا قادر يعدل كل حال

[مهيب]

الفكرة خلابة ... تعرف يا اتش ألذ حاجة فى أشعارك العامية ايه .... ان مواضيعك مينفعش تصاغ الا بالعامية ... مش عارف ليه .. ومش عارف برضه بتجيب منين أفكارك اللى تجنن دى ... بس بجد برافو عليك ...

كمان المعالجة فى منتهى الروعة ... والاسقاطات على الرغم من وضوحها و بعدها عن اللف و الدوران (واللى البعض بيعتبره مباشرة) الا انها كانت شديدة السخرية ... شديدة الوطء ...

يمكن الأبيات نفسها مش فى نفس المستوى الفنى لـ (لأ مفيش) و رائعتك المبهرة .. الفظيعة ... الـــ ... مش عارف أقول ايه .. عارفها؟؟ ... (الأمل موجود) واللى كان نفسى أثرثر عنها لكن للأسف شفتها متأخر ... والظاهر ان فى ثمة تقليد هنا ان المواضيع القديمة شوية ممنوع الكتابة فيها .. يمكن لأن الأسطر نفسها هنا كانت ثنائية ثم نهاية الشطر ... يمكن لأنى كنت عاوزها تكتر شوية ... يا أخى متبقاش بخيل كده علينا ... يعنى لو كانت رباعية هيجرى ايه يعنى ... بس على العموم انت الشاعر مش أنا ...

نيجى بقى للنقد ...

الشطر بتاع ضحك عليه الغربان و البوم .. اختل سنة فيه الايقاع الموسيقى ... حاول كده تقراه من غير الألف و اللام بتوع (الغربان) .. هتلاقيه اتوزن ...

عجبنى جدا تعبير (سحراه النداهة) ... ملائم جدا ... موفق جدا ... مناسب للجو بشكل رهيب ... و بيدل فى نفس الوقت على ان حصيلتك من التعبيرات العامية شيء يخوف بجد ....

كمان تعبير (ولا فرخة حلوة و عربية) ... السخرية اللاذعة ... وخفة الدم المصرية .. ماهو الشعر العامى مايبقاش شعر عامى من غير خفة الدم المصرية ...

" الله يا ديك يرحم جدك

لو كان هنا كان فاتو مدك

تعب عشانك يوم ورا يوم....ضيعت تعبه بغشميه "

كمان

"هتعيش يا ديك وتموت بلدى

ابوك وكان ديك مالفيوم "

واضح لكنة السخرية و خفة الدم و مش عاوزة تعليق ...

لكن بجد التعليق اللى بيقول "وتعيش عبيط وتموت مهزوم...مكسور وراسك مطاطيه" مكانش سهل يا هشام ... بجد التعليق ده حلو زيادة عن اللزوم ... يخللى الابتسامة اللى انت شكلتها على وجه القارىء تبدأ ببطء و بهدوء تختفى ... يعيش عبيط و يموت مهزوم ... يعنى لا طال دنيا ولا آخرة ... لا عرف يعيش بطل ... ولا حتى طال يموت بطل ... تعبير على قد قسوته الشديدة .. على قد تمكنه ... برافو يابنى والله

وبالنسبة لـهاندى ... رائع شعرك جدا و متمكن .. وتعبيراتك متمردة بشكل كبير ... يمكن ليا عليه شوية تعليقات ... لكن أنا ثرثرت كتير النهاردة ... و حاسس انى لو اتكلمت عن شعرك .. هنبقى حولنا الموضوع ده لما يشبه ركن الفرارجية :angry: .. بس بجد تعبيراتك حلوة قوى ... أنا بس عاوز أفكرك ان -على حد علمى الضئيل- مفيش مخلوق اسمه ديكة .. وأعتقد ان أنثى الديك ... هى الفرخة ... صح؟؟

تم تعديل 9 مارس 2005 بواسطة مهيب

[peacefulofmind]

جميل جدا يا اخ هشام

استمر فعالم الطيور مليان اسرار

كلنا نحتاج الي البسمه والخيال الواسع

[هشام الجنيدى]

اخى العزيز مهيب بعد التحيه........

ارى انك ناقد فنى مش عادى

مما يجعلنى احاسب قوى وانا بكتب عشان متمسكليش اخطاء

بالنسبه لموضوع الموسيقى فى شطره (ضّحك عليه الغربان والبوم...)

اذنا لا ارى اختلال الموسيقى الا اذكنت انت قراتها (ضحك.....) اى بلا تشديد على الضاد ......

اما لماذا لم اجعلها رباعيه

فانا اكتب فى الموضوع بعفويه شديده ولا اصنف اعمالى قبل كتابتها ويمكن كنت مستعجل شويه لان الفكره كانت ملحه عليا بشكل شديد .........

شكرا على نقدك البناء الذى يسعدنى دوما ان اجده ينير لى الطريق

وانا فعلا ملاحظ موضوع الاعمال القديمه التى توقف الكثير عن ابداء اراءهم فيها فى هذا المنتدى وادعو كل الاعضاء خصوصا الجدد منهم ان يقرؤها ويردو عليها لان القديم مليان ابداعات

وشكرا للاخت هاندى اعجبنى جدا ما كتبت فهو مثال للابداع المتالق دائما والبديهه الحاضره واحب اقلك...

الديك بايده انه يصيّح ......وبايده انه يعيش بلا صوت

وان كان غبى وعقله متنح ...اشرفله انه يموت كتكوت

وشكرا لكل الاعضاء الى نورونى بكلماتهم وردودهم...... :angry:

تم تعديل 9 مارس 2005 بواسطة هشام الجنيدى

[رعد الاسكندرانى]

حقيقى تعبير جديد لمشاكلنا يا ابو اتش واضح انك واخد خط النقد والسخريه من واقعنا المؤلم حقيقى كنا محتاجين لواحد زيك يرفه عننا متاعبنا اليوميه ويعرضلنا الحقيقه المره ببسمه حلوه تخلينا نفكر ازاى نحلها

انا فى انتظار اشعارك بفارغ الصبروخلال الاسبوع القادم حنزل الجزء الاول من قصه لحظات........

ويات ريت تقولى رايك فيها وتقولى انفع كاتب قصص ولا...........................

[رؤوف]

رائع وممتاز

القصيدتين فكرتهم ممتازة والموضوع شيق جداينقصكم الاهتمام بالوزن فالشعر ماهو الا وزن وبرغم هذا انتم اسعدتوني كثيرا اشد علي ايديكم واعملوا بنصائح الناصحين واستفيدوا من كل نقض قدمتم شعرا ساخرا يحمل نقض لاذع وانتظر منكم الكثير

مع تحياتي

مصر يامه يابهية ياأم طرحه وجلابية

الزمن شاب وانتي شابه هو رايح وانتي جايه

[هشام الجنيدى]

شكرا للاخ رعد الاسكندرانى على هذه المداخله وانتظر لحظات بفارغ الصبر

وشكرا للاخ رؤف على هذه النصيحه الغاليه