غطينى يا أمه وصوتى .. خلاص انا كرهت ثورتى !!

[achnaton]

بسم الله الرحمن الرحيم

فى زحمة الأقدار .. يمضى بنا التيار .. للعالم الثانى

لم ألقى فى الدنيا .. شيئا يحببنى .. فى العالم الفانى

..............................

أنظر هنا ياصاح .. ولمح كؤوس الراح .. تنبى عن الأفراح !!

وانظر بقرب الدار .. هذا الفقير الجار .. من جوعه قد ناح !!؟

قالها لى مدرس التاريخ كمال أبوطربوش عام 1950 - كما دونت فى مذكراتى .. - وأيامها لم تنكر الصحف وصفه .. بل كانت أشد منه .. نقدا وصراحة .. !! ولم يخرج علينا وزيرا بتصريح وردى ولم يؤلف رئيس الوزاراء قصه عن خير لا يراه الشعب .. خير الكترونى محجوب رؤيته .. الا على صفحات جرائد النفاق القومية .. والنهاردة تواجه الأمم المتحدة أكاذيب الوزارة .. ومقالات سمارة أبو زمارة.. وليس بعيد .. أن يقف غدا الوزير إياه .. بتاع المشاريع إياها .. اللى بتبلع المليارات .. والشعب دايخ على رغيف أو ربع كيلو لحمه السبع دوخات .. ليقول لنا ماء الشرب وصل النجوع .. او محطات رفع المجارى بتاكل إيرادنا ولا حد دارى .. او عندنا عشرون مليون مسكن إنفرادى .. عشاء فقراء بلادى .. وشوفوا معايا تقرير الأمم المتحده التى أشارت اليه جريدة الوفد النعمانى .. وتعليق معالى وزير التخطيط .. اللى بيبشرنا إن شاء الله بأن كل شئ حيبقى تمام .. بعد عشرة أعوام .. !!؟؟ يعنى الشعب يخلى الحزام ..على بطنه .. ويشده شويه كمان .. .. قالت الجريدة فى صفحتها الأولى :

الأمم المتحدة: ثلثا سكان الصعيد.. جوعي!

قرار الحكومة بتعويم الجنيه رفع أعداد الفقراء

أسيوط أكثر المحافظات فقراً ودمياط أقلها..

ومصر تعاني من نقص الغذاء

كشف التقرير المشترك للأمم المتحدة ومصر حول أهداف الالفية الثانية عن ارتفاع أعداد الفقراء في مصر. أكد التقرير ان ثلثي المواطنين في الصعيد جوعي ولا يجدون الغذاء. أشار التقرير الي وجود 10،7 مليون مواطن لا يحصلون علي الطعام وتعد محافظة أسيوط أكثر المحافظات فقراً وأقلها محافظة دمياط. وقال التقرير ان 34،2% من جملة السكان يعيشون تحت خط الفقر في الوجه القبلي وأن 16،7% من السكان يعيشون بأقل من دولار يومياً.

وأكد التقرير الذي استعرضه الدكتور عثمان محمد عثمان وزير التخطيط وأنطونيو فيجلانتي الممثل المقيم للامم المتحدة بالقاهرة ان أعلي مستويات الفقر تتركز في قري محافظات الصعيد وأن مستوي الانفاق في مناطق الوجه القبلي دون مستوي خط الفقر. وأوضح التقرير ارتفاع نسبة الفقراء بالوجه القبلي الي 63،49% من السكان. وتوقع التقرير استمرار مستويات الفقر كأعلي نسبة لها في محافظات أسيوط وبني سويف وسوهاج حتي عام 2015. وأشار التقرير الي أن مصر تعاني من نقص الغذاء، كما ان هناك مؤشراً واضحاً علي سوء التغذية في مناطق صعيد مصر وتبلغ نسبة انتشاره 21،8% بالمناطق الريفية حيث تنخفض الانشطة التنموية لاقل مستوي لها.

واعترف وزير التخطيط بأن مصر في موقع و،سط بين مبادرة الاهداف التنموية للالفية وأعلن الوزير التزام الحكومة المصرية بالمضي في تحقيق هذه الاهداف بحلول عام 2015.

وطالب ممثل الامم المتحدة بالقاهرة الحكومة بوضع أولويات لخفض معدلات الفقر خاصة في محافظات وريف الوجه القبلي. ووصف المسئول الأوضاع بأنها خطيرة. وأشار الي تقديم تقرير لأهداف التنمية في الدول النامية الي كوفي عنان الامين العام للامم المتحدة في 17 يناير الماضي. ومن المنتظر عقد اجتماع في سبتمبر القادم لمناقشة ما تحقق من أهداف.

وأكد التقرير انخفاض مستوي حصول الفقراء علي التعليم وأشار التقرير الي احتواء الصعيد علي أعلي معدل للامية بين الفقراء وبلغ 52،7% وبين نير الفقر 46،27% وكشف التقرير اصابة ما بين 7% الي 9% من سكان مصر بالالتهاب الكبدي الوبائي من نوع »سي« وانه ينتشر في محافظات قنا والشرقية والاقصر بنسب تتراوح بين 50% الي 57% في بعض القري.

http://www.alwafd.org/front/detail.php?id=6819

وهاتى يا أمه ملاية السرير وغطينى .. وصوتى ... !!!

ونكمل التعليق .. لما يبان الطريق ..

:) taz:: taz:: taz::

تم تعديل 10 مارس 2005 بواسطة achnaton

[الأفوكاتو]

الفقر هو أحد مظاهر الديكتاتورية, فالجائع يبحث عن لقمة العيش التى لا يجدها, فكيف يهتم بالسياسة على معدة خاوية؟

و من جهة أخرى, تستعذب الحكومات الديكتاتورية الفقر, و تشجعه, لأنه سلاح رخيص تقتل به إرادة الشعب.

تم تعديل 10 مارس 2005 بواسطة الأفوكاتو

[احمد سعد]

للأسف التقرير مجهول المصدر حتى من الوفد

وللعلم الطفل اللي بيلم روبابيكيا في مصر بيكسب

ولا داعي للمبالغة

ولا داعي

لاستعمال الفاظ يحاول مجتمعنا ان يهجرها

ونتكلم في المفيد

[الأفوكاتو]

و ما هو المفيد يا أخ أحمد سعد؟

تم تعديل 11 مارس 2005 بواسطة الأفوكاتو

[achnaton]

تانى .. يا سيد سعد !!!!!!!!!!

برضه مش حنرد عليك .. الا عندما تنفذ ما طلبه منك أخونا الاستاذ أفوكاتو المنتدى وتكتب لنا المفيد ..

تم تعديل 11 مارس 2005 بواسطة achnaton

[احمد سعد]

المفيد زميلي العزيز

ان نفكر في حملة للامتناع عن شراء المنتجات الامريكية

المفيد ان نتذكر ان اي شئ في الساحة العربية سيتم بإرادة اميريكية

بصرف النظر عن طموحاتننا كشعب وكوطنيين

لك فائق تحياتي

[احمد سعد]

الاخ العزيز ( لا اعرف من انت )

واشكر كل من اعلنوا اسمائهم الحقيقية اليوم

تاني..... سواء رددت ام لم ترد هذا يرجع لك شخصيا

والمفيد هو تصفح مقالة اليوم لي بعنوان لبنان الوهم والجرح لتعرف ماذا اريد بالتحديد

ولا أدري هل تأثر حوارك بالنبرة الاوروبية المتعنترة لتحادثني بهذا الأسلوب

على الرغم من ان هدفنا واحد

لك تحياتي

[مصر عشقى]

الاخ العزيز ( لا اعرف من انت )

واشكر كل من اعلنوا اسمائهم الحقيقية اليوم

الاخ العزيز احمد سعد

معلش بجد انت عايش فى مصر ؟

ولا قصدك باطفال الروبيبكيا تجار وكالة البلح وعبد الغفور البرعى قبل مايعيش حياتة وبعدين اسامى اية اللى عاوز تعرفها مش جايز دة اسمة دة زى مجرمون اللى طلع دة اسمة الحقيقى

وبعدين مش لاقى الا صخرتين من صخور المنتدى علشان ......

وبعدين انت شايف ان المفيد نتكلم عن احداث لبنان ونسيب احداث بلدنا

[New]

الاخوة الاعزاء

التقرير مش مجهول المصدر ولا حاجة يا استاذ احمد. المقال بيقول انه تابع الامم المتحدة. انا شخصيا دخلت على موقع الامم المتحدة ولقيت التقرير ده. عنوانه تقرير التنمية البشريه المصري 2004

Egypt Human Development Report 2004 وممكن سيادتكم تطلعوا عليه. هو التقرير طويل شوية حوالى 208 صفحة وده الرابط ليه:

http://www.undp.org.eg/publications/HDP-2004-E%20.pdf

من ضمن الحاجات اللى تخلى جريدة الوفد تفقد مصداقيتها على الاقل معى هو عدم التدقيق فى ترجمة التقرير. انا طبعا ما اطلعتش على التقرير بما فيه الكفاية بس النسب المذكورة فى الجريدة غلط. ففى الصفحة 39 من التقرير جزء بيقول ان نسبة السكان ذات دخل اقل من دولار يوميا هى 3.1% فى الفترة من 1990 الى 2000. و نسبة السكان ذات دخل اقل من 2 دولار يوميا هى 44%. والنسبة تحت خط الفقر هى 16.7% .

النسب دى طبعا غير مفرحة ولا حتى ترضى حد. المفروض مناقشة التقرير ده و نشره علشان نعرف فين التقصير وازاى ممكن نواجهه. وبعدين يااخ احمد اخناتون بيبكى على الحالة اللى وصلت اليها طبقات الشعب المطحونه تقوم تقولنا نبطل نشترى منتجات امريكيه!!! الناس اللى بيتكلم عليهم اخناتون والافكاتو ممعاهمش فلوس يشتروا منتجات موزمبيقية مش امريكيه. اخناتون والافكاتو بيتكلموا على ناس تحت خط الفقر واوضاع اقتصادية تعبانة وانتشار امراض وحضرتك بتتكلم عل ان اى شئ في الساحة العربية سيتم بإرادة اميريكية !!!!!!!

طب نناقش التقرير اللى فى ايدينا دا الاول وبعدين نناقش البضاعة الامريكية والارادة الامريكية.

تحياتى للجميع

[رؤوف]

السلام عليكم يارواد الموقع--- الاخ نيو ميمبر انا كتبت اسمك بالعربي علشان انا هاتكلم بالعربي انت اسلوبك جميل وممتاز وكلاللي انت كتبته حصل والاخ احمد سعد انا واثق انه يعلم هذا احنا المصريين فينا عيب خطير وهو الكلام من وراء الستار احنا لما اتكلمنا وجها لوجه من خلال الندوات والمؤتمرات ماحصلناش حاجة يعني عايشين وبنشتغل وبنكسب انا لاانكر ان في مصر فقراء وايضا في امريكا واوروبا فقراء مستوى معيشة الفرد في مصر هابط جدا ويستحق لوقفة ومناقشة المسئوليين بس ازاى الورقة المفقودة اللي تعبنا كتير واحنا بنادي بيها ( البطاقة الانتخابية ) تعرف اذا كل واحد اهتم ان يضع صوته لمن يصلح كل واحد فينا يقدر يناقش اى ازمة مع اى مسئول يااخي انت عليك واجبات اديها واطلب حقوقك وتمسك بيها ولا تخف واللهي هاتخد حقك ولا يضيع حق وراه مطالب علشان نكون صح لازم نحيي الانتماء لمصر اغلي بلاد الارض مصر مش ريس ووزير مصر هي المصريين كل المصريين وده بيفكرني ( قوم يامصرى مصر دايما بتناديك قوم يامصري نصرى دين واجب عليك )

[احمد سعد]

الاخ الدي لا أعرف اسمه

كفى سخرية

انت تجلس في اميركا ولا تعرف شيئاا عن الشعب المصري

الدي تقول انه لايسطيع شراء المنتجات الامريكي وبالكاد يستطيع شاء الموزمبيقية ومع احترامي لموزمبيق

لابد ان تعرف اننا لسنا كما تظن ويبدوا انك تعيش خارج المجتمع المصري مند زمن ولا تعرف ان الانسان المصري على درجة من الرقي وليس لنا الشرف في التعامل مع المنتجات الامبريالية ولكن لابد ان تعلم انه ادا تمت المقاطعة الفعلية ستخسر اميركا الكثير والكثير وممكن انت ماعندكش علم بلجنة المقاطعة للمنتجات الامريكية وسجل شرف المقاطعة ... اسال في وزارة الاقتصاد يقولوا لك ...

فلا داعي للتحدث مثل مضيفيك بالتفرد بالرأي واحتقار العالم الثالث

وبعدين التقرير بتاعك مازال مجهولا إلى ان تخبرنا عن مصدر موثوق به بخلاف الامم الامريكية المتحدة ( الامم المتحدة سابقا))

للأسف لازالت نظرتنا للامور سطحية والدليل الردود المتسرعة فحديثي عن لبنان لفائدة مصرنا

ومصرنا ولبنان امة واحدة

والا احنا وامريكا امة واحدة

وحاقولها انا للأسف....غطيني ياما وصوتي .... قلنا الحقيقة ... قالوا علينا شحاتين

وسلامي للجماهير

[free_egypt]

أنا عميل أمريكاني

إذا كانت مطالبتي بالديمقراطية و بوجود إنتخابات حرة و مطالبتي بتحديد فترة ولاية رئيس الجمهورية بفترتين و و و و غيرها من المطالب التي يتمناها كل فرد يعيش على أرض مصر .

إذا كانت تلك المطالب سوف تجعل البعض يتهمني بأنني عميل أمريكاني ...فأنا عميل ...

للاسف الشديد كل مواطن يهتم بمسألة الديمقراطية و ضرورة تفعيلها ... يتم إتهامه من النظام و غير النظام بأنه عميل أمريكاني ... سعد الدين إبراهيم عميل ... ايمن نور عقد صفقة مع أولبرايت ... و حركة كفاية تتلقي تمويل من أمريكا ...

الظاهر لو عم بطاطا قعد على القهوة و قال إنه ناوي يشارك في الإنتخابات اللي جاية و إنه ها يختار من يجده الأصلح سوف نجد من يتهمه بأنه باع صوته مقابل دولارات أمريكية.

يا جماعة خلونا في المفيد

[New]

للمرة الثانية خلال نفس اليوم حاكتب تعليقي على اللى بيتقال فى الموضوع ده. الاخ العزيز رؤوف شكرا جزيلا على اطرائك. كلامك بخصوص اصدار بطاقة انتخابية مهم جدا وفعال والمشاركة فى الانتخابات من اهم الطرق للتعبير عن الرفض للوضع الحالى والتطلع لمستقبل افضل.

الاخ الدي لا أعرف اسمه

كفى سخرية

سخرية من مين?

انت تجلس في اميركا ولا تعرف شيئاا عن الشعب المصري

انا فعلا موجود فى امريكا بس اعتقد انى حاسس بالشعب المصرى اكتر منك بدليل ان الاخ مصر عشقى هو اللى بيسال حضرتك اذا كنت فعلا عايش فى مصر

الدي تقول انه لايسطيع شراء المنتجات الامريكي وبالكاد يستطيع شاء الموزمبيقية ومع احترامي لموزمبيق

كلامى معناه واضح احنا بنناقش حالة الفقر يعنى بالعربي انعدام مقدرة شرائية فمش معقول نتكلم على مقاطعة منتجات :)

لابد ان تعرف اننا لسنا كما تظن ويبدوا انك تعيش خارج المجتمع المصري مند زمن ولا تعرف ان الانسان المصري على درجة من الرقي

ظنى فى الشعب المصرى افضل بكثير مما تتخيل. ولا اعتقد ان هناك من يسئ الظن باهله. انا فعلا عايش خارج مصر بقالى فترة بس مش معزول عنهم واحس بالامهم مش زي حضرتك متخيل ان الحالة الاقتصادية فى مصر زى الفل.

انا اعرف ان الانسان الصري على اعلى درجة من الرقى. واظن ان حضرتك لو فكرت ثوانى كنت حتستنتج ان لو انا شايف غير كدة حاكون باشتم نفسى قبل ما تكون اساءة لك او لغيرك

الاخ احمد سعد. يعلم الله انى حذفت باقى ردودى على بقية مداخلتك حرصا على ان يكون المنتدي خالى من المهاترات والمزايدات الغير نافعه. واذا كانت مداخلاتى بتسبب اى ضيق لك سامتنع تماما عن الرد على اى شئ تكتبه.

التقرير معظمه مكتوب بايدى مصرية ومطبوع فى مصر وكاتب المقدمة وزير التخطيط نفسه وممكن الرجوع للتقرير للتاكد من الكلام ده.

و اخيرا اتمنى يا اخ احمد ان مداخلتك القادمة تكون موضوعية وخاليه من الاتهامات .