انا اشتغلت ياجدعان

[bentmasria]

السلام عليكم ورحمة الله وبركاته

اخوانى الكرام

ترددت كثيرا قبل النشر حتى لا يساء الفهم ارجو التعامل مع الامر بشكل عملى تام حتى لا اندم انى نشرت هذا الامر هنا

انا حاصلة على بكالوريوس فنون جميله 1990 وماجستير نقد فنى عام 1993وكذلك مدربه لبرامج الجرافيك وكنت اعمل كمصممة اعلان قبل فترة

وابحث عن عمل فى الوقت الحالى فارجو من تتوافر امامه فرصه مناسبة ان يترك لى رسالة خاصة وسوف ارسل له السيرة الذاتيه الخاصة بى

ولا يهم التخصص فى الوقت الحالى انا اجيد الكمبيوتر والانجليزية ويمكننى القيام بالاعمال الاداريه بشكل جيد ومنظم باذن الله

اشكركم مقدما

تم تعديل 4 أبريل 2005 بواسطة bentmasria

[An Interview with The Vampire]

مافيش أي مشاكل

فكرة جميلة الناس لبعض

أول ماتيجي قدامي فرصة هقوللك

[bentmasria]

مشكور اخى الفاضل جزاك الله كل خير

ام محمد

[bentmasria]

ياولاد ياولاد اسكتواااااااااااا

موش واحد ابن حلال دق عليا الجوال

وقاللى تعالى لكى عندنا مجال

ونجربك حبه يمكن تزيدى محبة

وعطف على ابنى الغلبان لحسن نشحت ونبيع لبان

المحاوراتيه دول بصراحة جدعان

وبقى لنا يومان ويارب يبقوا سنتان يارب

بجد ادعوله وادعوا لى ربنا يخلى قلوبكم الطيبه وصدركم الحنين على ام محمد والقرد الزغنن حمودى

ويارب ننفع وما نخيبش ظنهم فينا

لوووووووووووووووووووووووووووووووووولى

البنت المصريه

[وليد صفوت]

ألــــــــــــــــــــــــــــــف مبروك يا بنت يا مصرية يا طيبة يا أصيـــــــــــلة !

و الله تستاهلى كل خير يا أم محمد , لأن الانسان الطيــــــــب يحبه الله , فيّحبّب فيه عباده أجمعين ,...... h):

حافظى على وظيفتك يا أم محمد ,.... و مش عايزين نشوفك على النت من الساعة 8 الصبح لحاد الساعة 5 بليـــل ! مفهوم ؟؟؟ mc:

و لا مانع من ان محمد يقعد عالنت مكانك لحاد لما ترجعى من الشغل ;) ,..... أهو حتى ندردش مع بعض ( و انتى عارفة كويس انى بفهم اللغة بتاعته ) و يستفيد و يفيد الاعضاء stnd::

ألف مبروك .................. خدى منى الوردة الجميــــــــــــلة دى rs:

[omtmam]

الف مبروك يا ام محمد و يارب يجعلها فاتحة خير و يثبت اقدامك انشاء الله ;) stnd:: mc: h):

[مهيب]

والله فرحتينا يا بنت يا مصرية ... ألف ألف مبروك ليكى ... ويارب تلاقى فى الشغل كل اللى عاوزاه و كل اللى بتتمنيه ... بجد أنا فرحان قوى قوى ... يارب يوفقك فى وظيفتك و تبقى فى تقدم مستمر و تسمعينا عنك خير دايما

ولو احتجتى أى استشارة أو رأى فنى فى الشغل ... حاجة كده .. حاجة كده ... احنا فى الرياض .. قصدى فى الخدمة .. ماشى يا كابتن ؟؟ ;)

أكيد محمد ماما بتوحشه فى فترة الشغل ... ولا محمد من النوع اللى (هيه .. ماما فى الشغل ... نعيش حياتنا بقى شوية )؟؟؟ stnd::

ألف ألف مبروك مرة تانية ... وفعلا زى ما قال ملك الفيولينا ... انتى تستاهلى كل خير ...

[mb14]

الف مبروك يا اخت bentmasria

وربنا يوفقك فى شغلك الجديد

بس حقيقى هما كسبوا واحدة ممتازة لفريق عملهم .

فعلا انا احترامى كل يوم بيزيد للمكان دى وللموجودين فيه .

خطوة ممتازة وهى خطوة للأمام

[se_ Elsyed]

ألف مبروك يا ام محمد وربنا يثبت أقداكم ويخضر لك اليابسة ويخبز لك العيش ويجعلها عتبة مبروكة عليكي يا قادر يا كريم ... لووووولووووولي

نتكلم بقى شوية موارد بشرية .... نصائح مهمة للمستجدين ... إجمع مستجدين هنا ... الستات ييجوا على اليمين والرجالة على الشمال والعيال ورا :

1- حاول أو نقول حاولي في بداية عملك بأن تُقيمي علاقات طيبة متوازنة مع زملاءك بالعمل ... يعني لا حيلطة ولا محلسة .. علاقات طبيعية عشان ما يخافوش منك .... وخلي بالك الإنسان بطبيعته بيخاف من كل حاجة جديدة فبالتالي الجديد ده مطالب إنه يُزيل تلك المخاوف من نفوس زملاءه ، ممكن ناس تقول آن يا عم ده جاي يعدل المايلة .. وده بقى اللي هايصلح الكون وتلاقي كل الحرس القديم اخد موقف دفاعة منه وممكن يلاقي نفسه منبوذ وسط زملاءه .

2- البعد كل البعد عن اداء كل ما يُفهم على إنه سُنن على أساس إنها فروض .. انا مش بأتكلم عن الصلاة . انا بأتكلم عن الاعمال الفرعية التي لا تندرج تحت مسئوليات الموظف الجديد لكن لكي يُثبت للجميع إنه واد شغيل يقوم يشتغل شغله وشغل غيره.. ومع تكرار أداء تلك الاعمال ستصبح فروض مفروضة عليه وفي حالة عدم اداءه لها سيُتهم بالتقصير .

3- البعد عن المغالاة في المكوث في العمل .. في ناس اول ما تتعين يكون ميعاد إنتهاء عملهم الساعة 5 وتلاقيه ينحر في نفسه وكل يوم يمشي الساعة 9 ، مرة في مرة يلاقي نفسه بيدبل يقوم لما يمشي في ميعاده الرسمي بيبان إنه مقصر وإنه كان بيعمل شوية حركات في الاول .. لذا على المستجد ان ينتبة لذلك .

4- الإبتكار وإضافة شيء جديد للعمل ... حاولي يا بنت مصرية يا بنتي على قدر الامكان ان تضيفي شيء جديد لعملك تجعلي الآخرين يرددون إعلان صابون لوكس ويقولوا " هناك فرق " وبالتالي يشعر المستجد بإنه مش كمالة عدد او زي ما راح زي ما جه .

5- الشخصية المستقلة ... حاولي ان يكون لكي في العمل شخصية مستقلة .. يعني ما تكونيش مع الرايجة .. وتجعلي عملك هو من يتكلم بالنيابة عنك .

6- الصبر والإحتمال .... بالتأكيد أي طريق جديد لن يكون مفروشاً بالورد سواء من مصاعب العمل إلى إحتياجاتك في مكتبك يعني الواحد يستحمل شويه في الاول على ما الامور تترستق والمسائل تتسأسأ وبعد كده كل حاجة هايلاقيها بتمشي بشكل اوتوماتيك .. حاكم الشغل عامل برضوا زي الجواز .. يعني في أول الحياة بين إتنين الامور ما بتكونش كلها وردية لطبيعة الإختلاف في الطباع لذلك الصبر مطلوب ..

7- الإقلال من الشكوى على قدر الإمكان والمحاولة الدائمة لإيجاد حلول لأي مشكلة ... جميع الموظفين بكل مستوياتهم يضجون من كثر شكاوى الآخرين وخصوصاً على الفاضية والمليانة وخصوصاً اكثر الشكاوى الغير مقترنة بأي مقترحات لإزالة موضوع الشكوى .. وأخيراً الشكوى لغير الله مذلة .

8- واخيراً وليس أخراً نصيبنا محجوز في عزومة من أول مرتب وإنتي لو كنتي في السعودية هنا كنت قولت لك أول عزومة لازم تشتري لنا منها خروف محشي " إسألي هاندي كرافت كده أنا عملت في إيه ... نتفت ريشه أول ما أشتغل لدرجة كان هايموت من البرد لإنه كان ماشي من غير ريش "

يا سلام بقى على العزومة البلوشي دي والواحد يبقى داخل على المعازيم وما هوش عارف مين المعزوم ومين الخروف ويقعد كده ويمسك له ورك خروف بأيد وبالأيد التانية قطف عنب بناتي ويبقى شكله ولا أبو جهل في زمانة ..... هــــــــــــيه دنيا

[mb14]

وإنتي لو كنتي في السعودية هنا كنت قولت لك أول عزومة لازم تشتري لنا منها خروف محشي "

الكلام دى عندكو هناك يا س س

اما احنا هنا بقى ناس واقعيين

كفاية علينا يا أم محمد كل واحد طبق ;) فول بالزيت من على عربية عم عبده اللى جنب قهوة المحاورات معاه رغيفين وشوية سلطةوبصله وبعدين نحبس بشوية شاى من على القهوة من ايدين حبيبك يا س س سكوب .

[yasovinas]

الف مبروك يا ام محمد يا مصريه يا اصيله

وزي ما قلنا قبل كده اللي رامي همومه على الله ربنا بيكرمه اخر كرم

خللي شوية النصايح بتوع سي السيد في وداني لانهم شوية كلام فيهم الشفا

انا عايز حلاوتي طبقب رز بلبن وواحد محشي خيار ;)

[bentmasria]

;) stnd:: mc: h):

ربنا يسعدكم ويبارك فيكم يارب كلكم اهلى واخوانى واولادى وحبايبى

كنت متأكده انكم حتفرحوا لى وسى السيد نصايحك حلقة ف ودانى وربنا يكتب الخير الناس وشوشهم طيبة ومريحة وده شىء مخلينى متفائلة بالخير ان شاء الله

فيولين كنج

الواد عاوز رجالة يلاعبوه تعالى لطنطو ملك امى وقم بدور الاخ الكبير شويه بس انت واى من المتبرعين بملاعبة اظرف واجمل ابن ف الدنيا

اول مادخل

يحصل ضرائب (جيلى كولا وكادبورى) وياكلنى المين بحنية وبعدين نغنى سوا ويفضل يحضن فيا

برضه لسه فاكرنى

كنت خايفة ينسانى من كثر البعاد

ياسووووووووووووو

ام بى

مهيب

ابوتمام

فيولين كنج

ربنا يجعلكم فى فرح وخير وسعادة دايما يارب

وافتكروا محمد بالدعاء دايما

ويارب اقدر اسعدكم زى ما بتسعدونا بوجودكم فى حياتنا انتم وكل القلوب الطيبه

انا برضه موجوده اصلى مدمنة نت وصلحه

البنت المصريه

[ابو خليل]

السلام عليكم

عذرا فتأخر ردي ..

ولكن اسمحي لي يا ام محمد أن اقول لك ..

أجمل ما في الدنيا ان يجد الإنسان نفسه محاطا بالأصدقاء الأوفياء ..

وبعد النصائح الرائعة التي ذكرها لك سي السيد ..

لا يمكنني أن اقدم لك أي نصيحة أخري .. إلا تحرى الضمير والأمانة في العمل ... وأن لا يشغلك العمل عن العبادة والصلاة .. و أنا متأكد أنك صليت الإستخارة قبل البدء في العمل .. ولو كنت نسيتي .فأنصحك بصلاة الاستخارة عسي الله ان يوفقك في هذا العمل لو كان خير ، او يبعده عندك لو كان فيه شر ...

وأدعو الله لك أن يوفقك في عملك .. ويسدد خطاكي .. ويرشدك للخير ... وأن يكون عملا طيبا صالحا ، ويرزقك منه الزرق الحلال المبارك إن شاء الله ...

وأرجو ألا تنسي أن توزعي علينا (الحلاوة ) من أول مرتب .. !!:ph34r:

---

واحييك علي (شجاعتك ) في طلب العمل من الأصدقاء ,,

فأنا اخيب منك بكثير ..

فأنا ايضا ابحث عن عمل .. فلقد وصلت بيني وبين من أعمل (عندهم ) لمرحلة صعبة ... ولكني (استحيت ) و لا زلت استحي ان اطلب ذلك حتى من أصدقاء طفولتي !!!

عموما .. اسأل الله ان يلهمنا الصواب

تم تعديل 7 أبريل 2005 بواسطة ابو خليل

[c'est la vie]

ألف مبروك يا طانتى ( على وزن يا خالتى :blink: ) بنت مصرية وأم مُحمد :blink:

بارك الله لكِ في عملك الجديد .. ورزقك العافية والعفو والعيشة الهنية :ph34r:

تم تعديل 7 أبريل 2005 بواسطة c'est la vie

[se_ Elsyed]

كفاية علينا يا أم محمد كل واحد طبق :ph34r:  فول بالزيت من على عربية عم عبده اللى جنب قهوة المحاورات معاه رغيفين وشوية سلطةوبصله وبعدين نحبس بشوية شاى من على القهوة من ايدين حبيبك يا س س سكوب .

إنت بتقول فيها يا إف 16... طب والله العظيم كسرة خبز مع من تحب .. اطعم من اكل المحمر والمشمر وإنت حاسس إنك غريب ..

وبالذات إحنا ياللي في الغربة ... إسأل أي واحد كده وقول له إسرح بخيالك وحلق بجناحاتك وتخيل نفسك في مصر وسط حبايبك وأصدقائك في عزومة سفلقة ( بلوشي يعني ) وقدامك طبق فول بالزيت الحار مع لمون وبصل أخضر في يوم جمعة بعد الصلاة وبعدها تحبس بواحد شاي إن شالله يكون مخلوط بنشارة الخشب ... وشوف هايقولك إيه ..... ويا سلام بقى لو ربنا كان فاتح علينا فتوح العارفين وكان جنب الفول ده طعميه سخن محشية وملهلبة ومعاها بتنجان مخلل ولمون معصفر ..... إوعى بقى .. ده كده ولا في الأحلام يا جدع ..

طب عندك واحد زي هاندي كرافت عمال يحنسني كل شويه بإنه مرابط في احد الفنادق بقى له 3 أيام بحجة إن عنده ترينينج وهو عمال يلغ ... بس هل للاكل طعم يا هاندي وإنت بعيد عن حبيبك س س ؟ ... وإيه رأيك في عزومات الفول اللي كنا بنطلعها أيام العزوبية في اجازت العائلات الصيفية :blink: ؟