مع السلامة يا قلم

[عابر سبيل]

مع السلامة يا قلم

صه يا قلم ..

ماشي حزين فوق الشطوط

تبكي اللي حاصل والزمن

فجأة عليت بالصوت غريق

والكل سادين الودان

سمعك صعيدي نط بهدومه الخليج ..

وغرق معاه

مين العبيط .. لما الغريق كان الوطن

صه يا قلم ..

ماشي على خطوط الورق .. دايما صراخ

مين فز قام غاث الوطن ؟!!..

غير اللي داق لبن الخيام

صرخت يمناة بالحجر .. فلق النهار

غنت عيون الانبهار ..

تسلم يمينك ياولد

أه يا قلم .. مين منه غار ؟!!

صه يا قلم ..

ماشي علي خطوط العفاف

مين اللي رايد سكتك ؟!!

بتغني في طول البلاد ..

مين اللى ردد غنوتك ؟!!

وتطوف وتشعر في السواق ..

إيه تشتري ولمين تبيع ؟!!

طب خش في دروب الإشي ..

ما تـختشي تربح وتعلا ع الكتاف

أبح وغناها الجميع

صه يا قلم ..

نازل صراخ في كل الساحات

جات العوالم أرضنا طرحت صاجات

أصل عندنا فيهم نقص عمالات

وحاجات بتسري ف دمنا .. نرقص وهات

سرطان كلي .. تكسير عظام .. سكر وجات

عصر التقدم قلبنا .. اللي بنصبح فيه نبات

أه يا زمن الهلف عامل سبعنا ..

باعنا لمين ؟ دي القدس هالها رخصنا

نزلت دموعها والحجيج فوق (عرفات)

صه يا قلم ..

تعبتني طب وليه أنا بامسكك؟!!

وامشي معاك كل السكك.. نجني الندامة

علمتني عشق القمر ..

وزرعت في عيوني السهر .. وده ليل ديابة

أه يا قلم .. الكيل طفح .. صوتي اندبح

صدق اللي قال إنك ألم

حانسى الكتابه ياقلم .. ومع السلامة

أحمد سلطان

[هشام الجنيدى]

بسم الله ما شاء الله

كنت فين من زمان يا راجل انتا نورت المنتدى بجد

انا معرفش انقد كويس بس كل الى انتا كتبته انا حسيته فى قلبى

وانصحك متنساش الكتابه احسن تموت من الكابه

لانى بعتبر القلم والورق هم طبيبى النفسى الذى ابوح له بكل اسرارى واحاسيسى التى ان لم تخرج خنقتنى ..........

احيك على ما كتبت واتمنى لك التوفيق

وشكراااااااااا................. rs: