يا ألف اخص يا ألف عيب الشوم

[عبير يونس]

ناس رايحين يطالبوا بقوت العيال
انبح صوتهم لما نادوا بصلاح الحال
ولما اتهرسوا بالدبابات هاجوا
و نادوا ارحل ارحل في الحال
بلا قائد و بلا هدف و لا أي توجه
انطلق شعب تعبان و بيتوجع
وبعد يومين تلاتة في الميدان
نزلوا و ركبوا الموجة الاخوان
و بعد موقعة ملفقة بالجمال
كبرت في دماغي و والله
ما انتي بايته فيها يا اعتدال
رمى اليمين على اعتدال
اتشردوا و اتبهدلوا العيال
ناس اتوسطوا اسف يا اعتدال
بس اعتدال كان مشيها بطال
و ما ينفعش يرجعها محال
دور على واحدة تراعي العيال
جالنا واحد بهلول على قد الحال
ركب ع الراس والكرسي به مال
ويلي على العيال اتفرقوا
اتشتتوا و الحال بيهم مال
شوية نادوا تاني ارحل في الحال
و شوية الغضب صال فيهم وجال
و الاخ وقف لاخوه يفهمه و يعلمه
كل فريق شايفين نفسهم أبطال
يهزأ اخوه و يدبحه كمان لو طال
شوية على حسبي الله ونعم الوكيل
و شوية والنعمة لنصور لكم فيها قتيل
ناس من يومها مبطلت صراخ و عويل
و ناس فوق الكوبري منورين القناديل
و القلب بينهم صبح سقيم و عليل
و سؤال صرخته تشق الليل الطويل
على فين واخدينا يا عروس النيل
عاديتوا اخواتكم يا وشوش البوم
يا ألف اخص يا ألف عيب الشوم