ضميرى تاعبنى ونفسى فى حل .. أفتونى يا اهل المنتدى - بخصوص تسديد بعثة حكومية

[egypt2013]

السلام عليكم ورحمة الله وبركاته/

انا مواطن مصرى كنت من أوائل مصر فى الثانوية العامة والأول على دفعتى فى الجامعة من اسرة فقيرة. عينت معيد بكليتى وحدث لى مشاكل هائلة فى الماجستير فعملت سنتين باجر رمزى فى مكتب مشرف رسالة الماجستير وكل زملائى بالمثل والا مش حنخلص الماجستير وقبل المناقشة الممتحن طلب رشوة عينى عينك واضطررت لدفع مبلغ مادى كبير فى هذا الوقت رشوة للممتحن المعروف عنهم ياتدفع ياتسقط مع ان رسالتى كانت ممتازة مما دمرنى نفسيا بالرغم من وقوف زملائي المعيدين معى من الفريقين فريق اولاد الدكاترة المعينين بالكوسة و فريق ولاد البطة السودة اللى مالهمش كوسة . المهم حصلت على الماجستير وبعثة حكومية فى أمريكا. خلصت الدكتوراه فى وقت قياسى فى ٢٠٠٩ ورجعت مصر لتبدأ المشاكل وجدت معظم المعيدين تقريبا كلهم من اولاد الدكاترة وكل دكاترة القسم فى إعارات ماعدا ولاد الدكاترة. لقيت رئيس القسم معين ولاده الاتنين معيدين وواحد منهم بيدرس مادة كاملة. المهم لقيت رئيس القسم بيقولى ان مافيش مواد فاضية وممكن ادخل سكاشن لأن عدد الدكاترة أكبر من حاجة القسم -بأمارة إبنه المعيد- وبعدين قاللى انا جايبلك إعارة فى الخليج خد اجازة وتوكل على الله. جبت منحة امريكية لما بعد الدكتوراه وسافرت .. قامت الثورة قلت فرصة النظام القديم مشى وفرصة اخدم البلد قطعت منحتى من امريكا وعملت مشاكل جامدة مع المشرف الامريكي علشان انزل. رجعت للكلية وتم انتخاب دكاترة الاخوان راحوا معينين ولادهم الدكاترة فى كل المناصب الحيوية بالجامعة ولقيتهم بدأوا حرب عليه بدون اى ذنب على اساس انى مش اخوان ومراتى مش محجبه مع انى ماليش فى السياسة و لقيت واحد منهم بيقول للطلبة انى نجحت فى الماجستير برشوة ولقيت واحد منهم بيقولى طول دقنك ولبس مراتك نقاب وتبقى معانا وينوبك من التورته .. يا دكتور انا معرفش الفرق بين السلف والاخوان انا ماليش غير فى الورقة والقلم. المهم ماكنش ليه لازمه فى الجامعة والكل قاللى ايه اللى رجعك. لقيت مشرفى من امريكا متصل بيه ومعاه رئيس فرع فى شركة معروفة وعرضوا عليه وظيفة. المهم مع الإحباط عملت اجازة مرافق لانى مينفعش ليه اعارة ده الى نصحنى بيه رئيس القسم وسافرت لامريكا تالت. بدات الشغل ٦شهور والحمد لله اترقيت وسبقت الموظفين الامريكان اللى متعينين قبلى ومرتبى زاد بس الشىء اللى كان مكدرنى انى حرامى مزور لانى لا مرافق ولا حاجة وسارق فلوس البعثة. قلت اقدم استقالتى وادفع فلوس البعثة من الجامعة وأريح ضميرى. اتصلت بالبعثات لقيتهم بيقولوا عليه ٣٠٠ ألف دولار منهم تذكرة رجوع من امريكا ب٣٠ الف دولار لفردين مع انها ١٥٠٠ دولار فى وقتها. كلمت اصحابى فى امريكا لقيتهم بيقولوا ان فلوس البعثة منحة لمصر من الدول الغربية ويحللوا سرقة الفلوس. المبلغ كبير جدا وحقعد اسدده ١٠ سنين بس انا اخدته -على الاقل ١٢٥,٠٠٠ دولار منه- ومعترف بالسرقة. ممكن ساعة الجد يقولك سدده بفوايد ١٠ ولا ٢٠% محدش عارف والاقيهم بالفايدة ٦٠٠ الف دولار. ميعاد الاجازة المزورة جاى ولقيت احداث ٣٠ يونيو جت ومش عايز اكرر غلطتى تانى وانزل وحاسس انى حرامى وعايز اخلص من ذنوبى. معنديش خبرة حياتية طول عمرى بذاكر وزمايلى هنا بيقولوا انى محمل الامور زيادة ورايهم انى أجدد الاجازة زى الكل وادينا فى يوم حنرجع وبنحول فلوسنا لمصر ومصر مش محتاجانا. مش عارف أنام انصحونى لو سمحتم انا تعبت?

تم تعديل 31 يوليو 2013 بواسطة egypt2013

[حسين امبابي]

بسم الله الرحمن الرحيم

دكتورنا الكريم /

سلام الله عليكم ورحمته وبركاته

سعادتك استفضت في سرد المشكلة وطبعا دا كان للايضاح وسؤالي لسعادتكم

ما هي الجهة التي انت مدين لها ؟ وسبب الدين ؟

تقبل تقديري واحترامي لشخصكم الكريم

[Alshiekh]

بعض الأسئلة للتوضيح

ماهي امكانية بقائك في أمريكا وما هي المدة التي يمكنك ان تبقى فيها في الخارج وماهي امكانية سفرك رايح جاي؟

ماهي قيمة المبلغ الذي تشعر انك مدين به لمصر؟ علما بأن أسعار الفائدة هنا في امريكا في حدود نصف في المائة.

هل كانت بعثتك على حساب مصر بالكامل أم أنها كانت من خلال منحة دراسية مقدمة من منظمة دولية سواء تمويل كلي أو جزئي.

[egypt2013]

بسم الله الرحمن الرحيم

دكتورنا الكريم /

سلام الله عليكم ورحمته وبركاته

سعادتك استفضت في سرد المشكلة وطبعا دا كان للايضاح وسؤالي لسعادتكم

ما هي الجهة التي انت مدين لها ؟ وسبب الدين ؟

تقبل تقديري واحترامي لشخصكم الكريم

شكرا اخى الفاضل : مدين لإدارة البعثات. سبب الدين: بعثة حكومية للدكتوراة بامريكا ثلاثة سنوات وشهر.

تم تعديل 31 يوليو 2013 بواسطة egypt2013

[egypt2013]

بعض الأسئلة للتوضيح

ماهي امكانية بقائك في أمريكا وما هي المدة التي يمكنك ان تبقى فيها في الخارج وماهي امكانية سفرك رايح جاي؟

ماهي قيمة المبلغ الذي تشعر انك مدين به لمصر؟ علما بأن أسعار الفائدة هنا في امريكا في حدود نصف في المائة.

هل كانت بعثتك على حساب مصر بالكامل أم أنها كانت من خلال منحة دراسية مقدمة من منظمة دولية سواء تمويل كلي أو جزئي.

شكرا اخى الفاضل : يمكننى البقاء فى امريكا طوال العمر و لكن مد الاجازة لغاية ٨ - ١٠ سنوات للهروب من مصر. لا يوجد امكانية للنزول حاليا الا لو استقيل. المبلغ الفعلى ١٢٥,٠٠٠ دولار. البعثات قالت ٣٠٠,٠٠٠ دولار بحوش ٥٠,٠٠٠دولار سنويا يعنى محتاج اشتغل ٥ -٦ سنين علشان اسدد ال٣٠٠,٠٠٠ دولار .. ناس اصحابى قالوا الفايدة ٦% من ٢٠٠٦ وحيوصلوا المبلغ ل ٥٠٠,٠٠٠دولار ده يخلينى ١٠-١٢ سنة علشان اسدد.بعثتى كانت على حساب مصر بالكامل.

تم تعديل 31 يوليو 2013 بواسطة egypt2013

[حسين امبابي]

بسم الله الرحمن الرحيم

عن أبي هريرة ـ رضي الله عنه ـ عن النبي صلى الله عليه وسلم قال: « من أخذ أموال الناس يريـد أداءهـا أدى الله عنـه، ومـن أخذها يـريـد إتلافها أتلفه الله »

فأبشـر يا صاحب الضمير الحي واعلم ان الله لا يخفى عليه شئ في الارض ولا في السماء .

وهذا رأي وليس بفتوى وحاشا لله أن أفتي بغير علم ولست بأهله

حضرتك تسدد المبلغ الذي تراه مستحق ( لتبرأ أمام الله ) وليس المطالب به من ادارة البعثات وخاطبهم بما ستدفعه اولاً فإن قبلوا فأدي الامانة وأن رفضوا فما عليك الا ايداع المبلغ لحسابهم بالطرق المتعارف عليها .

تم تعديل 31 يوليو 2013 بواسطة حسين امبابي