إمتى ممكن نرتاح ؟

[se_ Elsyed]

دار حديثاً بيني وبين أحد الأصدقاء على خلفية تعييننا لمدير عام لأحد أقسام الشركة وما شاء الله الرجل يبلغ من العمر 63 عاماً وخرج على المعاش قريباً وهو وكيل وزارة بأحد المؤسسات الحكومية الهامة ...

ولقد سألته : هو إمتى الواحد ممكن يرتاح ويجني ثمار عمله ؟ يعني ده راجل ما شاء الله بياخد معاش يعيشه ملك ولأني اعرفه فهو ميسور الحال للغاية ... طب بتشتغل ليه يا عم ؟

فرد علي صديقي وهو محموق قوي وقال لي : يا أخي الإنسان جاي الدنيا دي عشان يعبد ربنا ويعمل مش عشان يقعد في البيت يطقطق صوابعه .

فقلت له : لحد إمتى ؟ !!! هو حد قال الإنسان يبلطج ويقعد في البيت ... لكن انا بأتكلم عن الحالات اللي قضى الإنسان فيها عمره كله في العمل وتربية الأبناء وتحقيق اهدافه في الحياة ... إيه بقى مش هاييجي وقت يرتاح فيه ؟.. والواحد كده يصحى الصبح يسقي الزرع اللي في الجنينة ويربي له كام عصفورة على جوزين حمام .. كده يعني .... أو بلاش دي .... يا اخي يستغل وقت فراغه بعد الخروج على المعاش ويمارس هوايات اتحرم منها أيام العمل .... كالسفر والترحال وزيارة أماكن جديدة وتعلم شيء جديد في الحياة غن شاء الله تريكو او الرسم على ورق اللحمه ...

وعلى فكرة صديقي ده هو نسيبي ... ووالده ( حمايا العزيز ) ظابط جيش متقاعد من ييجي 15 سنة ... بس خرج لظروف صحية والحمد لله مش محتاج .. ومع ذلك ممرمط نفسه في الشغل ويوم ما بيفكر يقعد ويرتاح تركبه امراض الدنيا وفعلاً صحته بتتدهور ... في احد المرات من حوالي 4 سنوات كده لقيته في ساعة صفا بيقولي : تعرف يا س س أنا خلاص مش هاشتغل تاني وهاضرب الدنيا طبنجه .. واعيش بقى بالطول والعرض بعد ما جوزت العيال ( أصل زوجتي هي اخر العنقود ) واخد حماتك بقى ونتفسح كل يوم في حته ونعيش الدنيا الجميلة .. وأصحى من النوم براحتي ولا يهمني أي حاجة ... فرديت عليه بكل بساطة وقولت له : إبقى قابلني وأفلح إن صدق :) :lol: .... وقد كان ... فلم تمر عدة أيام وراحت حماتي هي اللي بقت تتوسل إليه إنه ينزل الشغل تاني بعد ما قلب لهم البيت جحيم في التعليق على كل شيء حتى الطبيخ اللي ناقص ملح والكراسي اللي مش محطوطة في مكانها .... إلخ

طب ليه كده ؟

وليه كتبنا على انفسنا الشقا شباباً وشيباناً والواحد يفضل في شقى ويوم ما يطلع معاش بتبقى أيام سودا ويُفاجيء الإنسان بإنه خلاص بقى خالي شغل .. وكإنه عمره ما فكر في اليوم ده ... أو لماذا ينتابنا إحساس بإن المعاش هو حالة " خيل الحكومة " وإن الإنسان بقى عديم النفع ... مع إن العكس كذلك فالإنسان اللي أفنى عمره في العمل هو أكثر نفعاً من واحد لسه المستقبل امامه ويا ترى هايعمل حاجة مفيدة ام لا ؟

إوعوا تفتكروا إني باتكلم عن طبقة معينه عندهم جنينة في البيت ويقدروا يسافروا شرقاً وغرباً ...

أبداً ... أنا أتكلم عن تلك المرحلة السنية بالذات إن شا الله الواحد كان بيشتغل عامله نظافة ...

ومن عجائب الصدف إن حمايا له صديق وجار برضوا كان معاه ظابط وخرجوا معاش يمكن في فترة متقاربة ... ولكن الراجل ما شاء الله عليه مسخر وقته لخدمة أولاده واحفادة وقضاء مصالح البيت وما بيهمدش وماعندوش وقت فراغ وعايش بيعمل حاجات هو بيحبها ... ومن ضمن أولاده بنت متزوجه وعايشة في مدينة الزقازيق ولو أقولكم إنه ممكن يسافر من القاهرة للزقازيق والعكس مرتين في اليوم مش هاتصدقوني .... إللى الواحد فينا لو عمل مشوار زي ده بيرجع يرقد ويقول ده أنا اتغربت واتبهدلت في السفر ...

فعايز أسمع أراءكم ... ويا ترى كلامي ده من قبيل اللي إيده في الميه ؟

[Salwa]

اقولك ايه ؟؟ يعنى تقريبا انت لخصت المشكلة ..ده لو فيه مشكلة اصلا ..

يعنى اللى بيطلع على المعاش ومقتنع بكدة ...ورغم اننا بنقول ياترى حايعمل ايه بعد المعاش ؟؟...بيكون رتب نفسه او بمعنى اصح (( اقلم نفسه )) انه كبر وآن الآوان انه يرتاح ويتفسح ويلف الدنيا ويعمل اللى كان نفسه يعمله لكن قلة الوقت وزحمة العمل كانت منعاه ......لكن اللى ميقدرش (( ميشتغلش )) ..ده تعمل معاه ايه ؟؟؟

واقرب مثل......زوجى .(( ربنا يحفظه ويخليه ..ويفضل زى ماهو ))..

عنده 62 سنة ...

مش حكاية انه يعمل لحسابه .....ولهذا لايرتبط بسن معاش ..لكن؟؟

حتى لو فى يوم مرض ...وقال له الطبيب لابد من راحة لمدة اسبوع ....يقوللى (( الراجل ده مجنون وعاوز يموتنى )) هو انا مريض ؟؟........للآن لايقتنع بأى سن للمعاش !!!

مازال ......كما كان من عشرين سنة ...نفس نظام العمل ..(( فقط قلت نسبة السفريات بعض الشئ )) ..مازال يحضر كل المعارض التى تقام (( فى مجال عمله )) ..فى كل انحاء العالم (( طبعا فاهم يعنى ايه تفضل فى معرض ))....

مازال يبدأ يومه (( العملى )) فى الثامنة صباحا ...مع انه( مدير )نفسه ...محدش حايحاسبه ..

يقول ان العمل عبادة ...وطالما ربنا عاطيك صحة ليه تفضل فى البيت ؟؟؟...مصمم انه مازال كل يوم بيتعلم حاجة جديدة ..

ربما لهذا دائما روحه مرحة ....يعنى مفيش حتة الزهق فى حياتنا ..

مشوار العمل اليومى يجعله على اتصال دائم بكل ما يدور حوله .

فلسفته ...(( عاوزانى اقعد فى البيت كل يوم اخترع اكلة جديدة ؟؟

تكنولوجيا المكرونة ؟؟ )) ....

يمكن علشان كدة انا ايضا اعيش سعيدة ....(( مش بيبطل يحلم ))

مش لأى مكسب مادى .......

ده حتى بيحلم لاولاده .........(( لو ان هم زيه برضه ))...

يعنى يقول بلاش تعتمدوا على الوظيفة لازم تعملوا حاجة لحسابكو بجانب الوظيفة ...لازم تفضلوا فى الشغل ده بعد منى ....احنا عاوزين نشترى مكن جديد و.و.و..و.

وانا اتفرج من بعيد .......(( كنت الأول بحلم معاه كدة والآخر قررت اسمع واتفرج واسكت ))..

ورغم السنين التى تفرق بيننا فهو لديه قدرة على الحلم اكثر منى .

راحته فى شغله ....مملكته ....مملكته فعلا ...

يعنى بصراحة بصراحة بصراحة ............................

مفروض اللى بيحبوا الحياة ..........ميطلعوش على المعاش ..

اما الرياضة فحدث ولا حرج ...

سباحة وكرة طائرة وفوتبول ...حتى..لو لعب راكيت على البحر فمازال هو الملك (( والله العظيم من اللعب بحماس يغير كرة او اتنين ....الكرة بتتمزق ))..

وهنا المشكلة .........ازاى تقول لانسان مثله ...حرام عليك نفسك

مرة من دول حايحصل لك حاجة .....انت كبرت (( شوية ))..

يعنى ممكن احنا نكون بنتفرج وحاطين ايدنا على قلوبنا وهو بيتعجب احنا بنهول الامور ليه ؟؟؟

خللى كل واحد يعيش حياته بالكيفية التى تروق له ......

[بنت شعنونة]

مش ممكن نرتاح..

وحتى لما ها نموت.. مش ها نرتاح برضة....

خلق الأنسان في كبد..

ما تحاولش

[c'est la vie]

متاعب العمل ماهى إلا جزء من متاعب الحياة .. فكم من الناس يعمل لينسي ..ليس بالضرورة ينسي متاعب أخرى ولكن التفكير في حد ذاته مشكلة عويصة تجعل الكثير يهرب منها..

وقد يكون الخوف من المستقبل والرغبة في تأمين حياة الأولاد أكثر .فأتخيل مثلاً سيدة أو رجل طلعت ع المعاش يعنى امتحنت ونجحت واشتغلت ونجحت في العمل وتزوجت وكبر الاولاد وتزوجوا و اولادهم ماشاء الله بيتنططوا وتم تحقيق كل ما الأمنيات والحمد لله ..ففي أى شيء سيفكران ؟.

ليس أصعب من تنتظر لاشيء ؟ سوى حياة افضل لأولادى الذين بالطبع ستأخذهم الحياة مهما كانوا و ويبقي الجد والجدة يعيشان ما يتبقي من العمر ..

فالراحة ليست بالضرورة في عدم العمل .. ولكن يكون بداخلنا رغبة حقيقية في الراحة من متاعب العمل ولكن لا تلبث ان تظهر متاعب اخرى أكبر .. نستهون عنها متاعب العمل ..

تم تعديل 5 أبريل 2005 بواسطة c'est la vie

[yasovinas]

اي واحد فينا لو جرب يقعد يوم كامل بدون اي ءعمل يقوم به سوف يصاب بالملل جايز يعدي يوم نستحمله لكن لو اسبوع مثلاً اجازة اجبارية من العمل بسبب الحداد العام مثلا ومافيش شغل وما فيش خروج حتبتدي بعد اول يوم تزهق وتبقى عايز تعمل اي حاجه في واحد بتكون له ملكة الاختراع او مهارة استغلال الوقت وايجاد ما يشغله وهناك من لايمكلك هذه المهاره

هل يمكن ان يقبل الشخص اجازة اكثر من شهر او بالكثيييييير قوي شهرين اوكى هتفسح والف العالم كله بس هل سوف تقضي باقي عمرك من سن الستين مثلاً الى ماشاء الله وعلى فرض انك وصلت للخمسة وستون سعني خمس ينوات هل يمكن اننا نقضيهم في الشمس نتشمس ونتفسح ونلف الدنيا صعب