اي سؤال لمرحلة مابعد الوصول لكندا عموما و فانكوفر خصوصا

[MZohairy]

السلام عليكم جميعا

عندي تساؤلات كتيرة و ياريت تفيدوني افادكم الله

ان شاء الله في نية للهجرة لكندا و عندي استفسارات بالنسبة لبعد الهجرة وفال application اللي يقدر يفيدني يبقى جزاه الله كل خير

_امتحان ielts للزوجين ولا main applicant فقط؟

_مش مطلوب لا شهادات تخرج ولا شهادات خبرة عمل مش اقل من سنة زي ماهم مشترطين طب ايه الاثبات ان دي مهنتي او اني مارستها فعلا مش اقل من سنة؟ ولا هم طالبينها وانا اللي مخدتش بالي؟

_مطلوب اسم المقاطعة هل هيجيلي الهجرة عليها ولا مش شرط؟

_fee payment مش فاهمة ازاي الباند دة يتعمل

كل معلومات ماقبل الهجره معلوماتي فيها هتكون غير قيمه لأني هاجرت من 6 سنين و الحاجات اللي بيطلبوها بتتغير كل شويه و بالتالي مش عايز اضللك

بس النصيحه انك يا إما

-تلجأي لمحامي و ده هيكلفك من 2500 الى 4000 دولار

-يا إما تدخلي موقع الهجره الكندي الرسمي و تذاكريه (يعني تاخدي فيه كام يوم قرايه بتمعن) هتلاقي نفسك عارفه بالضبط ايه المطلوب حرفيا و وفرتي اجرة المحامي اللي مابيعملش حاجه فعلا غير انه يقرا الموقع و يطلب منك المطلوب

لو حصل و هاجرت

_بالنسبة لمقاطعة BC الاحسن جوا فهل دة بيوفر مثلا ففواتير الكهربا او الغاز عن باقي المقاطعات؟

_ايه الفروق فالمصاريف الشهرية فالBCعن باقي المقاطعات بالتقريب كدة؟ متضمنة مواصلات او بنزين عربية و مصاريف تعليم

خلينا نقول ان نظرا لأن بريتش كولومبيا الأدفأ و الاجمل فهتلاقيها اغلى نسبيا من باقي المقاطعات في المعيشه في حدود 5% بشكل عام

و لو اسره من 4 افراد يبقى متوسط مصروفهم المعتدل لعيشه معقوله كالتالي

1300 ايجار سكن

700 فواتير كهربا و غاز و تليفون وانترنت و تليفزيون و مواصلات و موبايلات (لو فيه مدخنين الوضع هيختلف... العلبه ب 10 دولار)

1500 مصروف اكل و شرب و ادويه و خروج او فسح ...متطلبات الحياه عموما

يعني متوسط 3500.........ممكن ناس يعيشوا ب 2000 (طبعا عيشه متواضعه) و ممكن ناس يعيشوا ب 7000 عيشه جميله و كل واحد حسب مستواه الانفاقي عموما

_المعونة الحكومية و التغطية الطبية بتبدأ بعد اد ايه من نزولي للبلد؟

مفيش معونه حكوميه

فيه حاجه اسمها تشايلد بينيفيتس و دي بتبقى متوسطها حسب مستوى دخلكم السنوي قبل وصولكم لكندا...يعني لو دخلكم كان قليل يبقى كل طفل ياخد حوالي 300 دولار علشان اقل من 6 سنين يعني يجيلكم من الدوله 600 دولار كل شهر

اما التغطيه الطبيه تبدأ بعد اقل من 3 شهور (بتكلم على بي سي)

اما المعونه الحكوميه اللي هي معونة البطاله فدي موضوع طويل شويه و محتاج شرح تفصيلي...عموما في الاخر هيدولك كأسره حوالي 1200 دولار في الشهر و يقرفوكي لغاية ما تلاقي شغل علشان يقطعوا المعونه

و الفترة اللي منغير الدعم دي هتكلفني ماديا اد ايه بالتقريب لحسبة 4 افراد منهم فردين سن اقل من 6 سنين؟

المتوسط فوق شرحتهولك حوالي 3500 دولار و بيجيلك حوالي 600 يعني عندك عجز لازم يتوفر من المدخرات حوالي 2900 دولار في الشهر لغاية ما حد فيكم يلاقي شغل

_لو عاوزة حد من الوالدين يجوا بقدر ابعتلهم من امتى؟

بعد فتره و يكون عندك شغل و دخل واضح يمكنك من الصرف على الشخص المستقدم

_انا مسلمة و محجبة يا ترى ممكن الاقي عنصرية فالتعامل خصوصا الجيران و زملاء العمل و مديرالعمل و خصوصا جدا مدرسين وزملاء اولادي فالمدارس ؟

مفيش عنصريه ظاهره طبعا اطلاقا بس بكل تأكيد اللي من اصل صيني هيفضل يشغل اللي زيه و الهندي كذلك ...يعني عنصريه غير ظاهره انما مستحيل حد يقدر يكلمك في حجابك

_بالنسبة للحوم هل بتذبح او في اماكن معروفة ان الحيوانات بتذبح فيها؟ ولا ناكل نباتي؟

فيه دبح المسلمين بيقوموا بيه ...بس انا لا اثق فيهم لكثرة الاعيبهم و ارتفاع اسعارهم بحجة ان بضاعتهم اسلاميه

فيه ناس حسب الافتاء بياكلوا اللحمه العاديه طالما مصرح للمسلم انه ياكل من اكل اهل الكتاب

و فيه ناس بتاكل المدبوح اسلاميا بس و بيتحملوا فرق السعر و الجوده احيانا

_هل في احياء بيبقى غالبيتها مصريين او فيها مصريين كتير عشان نحس بالفة؟

عندنا في فانكوفر لأ لأن المصريين عموما قليلين جدا لكن يمكن تلاقي ده في تورونتو او كالجاري

_اولادي مش بيعرفوا انجليزي كويس هل اعالج المشكلة دي من وانا فمصر ولا عادي هيتعلموا هناك؟

عادي جدا

_طبعا مش هتكلم عن النفسية فالغربة بس الكبير بيقدر يواسي نفسه طيب و بالنسبة للاطفال هيتعودوا بسرعة ولا ايه اللي ممكن نواجهه ؟

هيتعودوا جدا و هيبقوا مش مبسوطين لما تنزلي بيهم مصر في اجازه لأنهم هيقارنوا كل شيئ...و المقارنه مش في مصلحة بلادنا طبعا

مشكورييييييييييييييين جدااااااااااااااااااااااااا و اسفة بجد اني طولت بس مصدقت الاقي حد ممكن يفهمني من خلال تجربة واقعية و عملية بحتة

[Sally lolo]

شاكرة جدا لحضرتك MZohairy و اسفة كمان مرة علاطالة

[MZohairy]

العفو يا ستي و بالتوفيق دايما

[tassneem]

السلام عليكم يا استاذ زوهيرى

انا ليه استفسار عن اسعار المعيشه فى فانكوفر يعنى السكن لاسره من خمس افراد يتكلف كام وهل الطابع السائد فى البلد هو العمارات يعنى شقق متاحه للتأجير ام بيوت ام تون هومز , كمان بالنسبه مصاريف الاكل و الشرب - سياره تمشى الحال - مدارس الاولاد.... الباسز الحكومه بتوفرها زى كيبيك ولا بتدفع زى البرتا - يعنى عاوزه شويه تفاصيل عن المصاريف و طبيعه الحياه- ايه اكتر الجاليات الموجوده افارقه.... ..صينيين .؟؟؟؟؟؟؟؟؟؟؟ سمعت ان على طول فى امطار صيف شتاء حقيقى الكلام ده و لو صحيح هل بطريقه مزعجه ام يمكن التأقلم معاها

انا عارفه اسئلتى كتير شكرا مقدما و جزاك الله خيرأ .

[tassneem]

وبالنسبه لتأمين السياره كام بالشهر و هل تامين البيت او الشقه الايجارضروري ولا مش مطلوب و لوضرورى بيكون حوالى كام (مثلا فى كيبيك المالك لايفرض عليك دفع تامين لكن فى البرتا بتدفع حوالى 30 دولار شهريا تامين الشقه)

[MZohairy]

السلام عليكم يا استاذ زوهيرى

عليكم السلام و الرحمه

انا ليه استفسار عن اسعار المعيشه فى فانكوفر يعنى السكن لاسره من خمس افراد يتكلف كام

من 1200 الى 1500 في المتوسط

وهل الطابع السائد فى البلد هو العمارات يعنى شقق متاحه للتأجير ام بيوت ام تون هومز

كل الانواع موجوده هاي رايزس و تاون هاوسز و كل شيئ

, كمان بالنسبه مصاريف الاكل و الشرب

يختلف من اسره لاخرى طبعا بس في المتوسط نقول حوالي من 300 الى 500 دولار في الاسبوع (بخلاف ايجار البيت و بخلاف الفواتير الشهريه)

- سياره تمشى الحال

يعني ب 4000 تجيبي عربيه كويسه

- مدارس الاولاد.... الباسز الحكومه بتوفرها زى كيبيك ولا بتدفع زى البرتا

الهاي سكول كلهم بياخدوا بص باس من المدارس

- يعنى عاوزه شويه تفاصيل عن المصاريف و طبيعه الحياه

حدديلي و انا ارد عليكي فورا

- ايه اكتر الجاليات الموجوده افارقه.... ..صينيين .؟؟؟؟؟؟؟؟؟؟؟

صينيين يليهم الهنود يليهم الفلبينيين و الاوروبيين او الكنديين الاصلاء

سمعت ان على طول فى امطار صيف شتاء حقيقى الكلام ده

لأ طبعا ...مفيش مطر في الصيف....و في الشتا المطر كتير بس مش معيق و لا يمنع التحرك

و لو صحيح هل بطريقه مزعجه ام يمكن التأقلم معاها

اطلاقا....الناس كلها عايشه عادي جدا

انا عارفه اسئلتى كتير شكرا مقدما و جزاك الله خيرأ .

[tassneem]

متشكره جدا على الرد ويا ريت لو تجاوبنى على المشاركه اللى تلتها اكون شاكره

كمان كنت حابه اعرف عن افضل المناطق السكنيه من وجهة نظرك وليه بتفضلها.

[MZohairy]

وبالنسبه لتأمين السياره كام بالشهر و هل تامين البيت او الشقه الايجارضروري ولا مش مطلوب و لوضرورى بيكون حوالى كام (مثلا فى كيبيك المالك لايفرض عليك دفع تامين لكن فى البرتا بتدفع حوالى 30 دولار شهريا تامين الشقه)

تامين العربيه من 100 الى 300 دولار في المتوسط شهريا حسب موديل العربيه و حسب الخصم اللي عندك من 5% الى 40% بخلاف طبعا بنود التأمين اللي بتغطيكي و بتغطي الطرف الاخر

اما تأمين البيت فمفيش حد بيأمن هنا تقريبا الا قليل جدا من الناس المحتاطه زياده عن اللزوم

[MZohairy]

كل ماتقربي في السكن من وسط البلد بيكون افضل لأن غالبا معظم الاشغال هناك

و بالتالي الاحياء الحلوه هي

فانكوفر

بيرنابي

نيوويست

ريتشموند

نورثفانكوفر

[MZohairy]

خريطه توضح الموضوع اكتر للكلام اللي فوق

[tassneem]

شرح كافى ووافى ما شاء الله عليك , و ألف شكر

[MZohairy]

العفو تحت امرك

ملحوظه

وسط البلد في الخريطه هي الحته اللي طالعه من فانكوفر دي في اعلاها ...عامله زي الايد كده شويه

دي الداون تاون علشان تعرفوا المكان بعيد او قريب منها

[egyptawy]

استاذ زهيرى

سوال لو سمحت

هل الحياة فى كندا حياة قاحلة ودايما الاسرة عايشة مزنوقة لانى ده الا باحسه من تعليقات المهاجرين وان ده سببه قلت المربتات وكثرة الضرائب وده خلانى احس انى المهاجر مش هيبقى معاه تمن التذكرة الا يرجع بها بلده كل سنة

ولكن فى نفس الوقت اسمع انى اقل تاون هاوس ب 300 الف دولار وفيه ناس مهاجرين بتشترى

ممكن توصفلنا الحياه لو سمحت ومستواها

[MZohairy]

استاذ زهيرى

سوال لو سمحت

هل الحياة فى كندا حياة قاحلة ودايما الاسرة عايشة مزنوقة لانى ده الا باحسه من تعليقات المهاجرين وان ده سببه قلت المربتات وكثرة الضرائب وده خلانى احس انى المهاجر مش هيبقى معاه تمن التذكرة الا يرجع بها بلده كل سنة

ولكن فى نفس الوقت اسمع انى اقل تاون هاوس ب 300 الف دولار وفيه ناس مهاجرين بتشترى

ممكن توصفلنا الحياه لو سمحت ومستواها

المشكله ان المهاجر الجديد مابيقدرش يلاقي شغل بسرعه الا اذا كان محظوظ جدا

غير كده لازم يدرس اي حاجه تخليه مطلوب في سوق العمل الكندي

و طبعا هيبقى بيدرس حاجه تخليه يشتغل في اول السلم الوظيفي

يعني مش زي ما كان في بلدهلذلك الدخل بيكون ضعيف نسبيا و بيتم تعويضه بشغل الزوجه او الصرف من المدخرات

نمره اتنين اللي بيروحوا لمصر كل سنه قليلين جدا لأن فيه فرق ضخم بين حياتك في الخليج مثلا و حياتك في كندا....انت مفروض هاجرت يعني حكاية كل سنه دي صعبه شويه...الا اذا كنت غني او عندك مدخرات كويسه

اما موضوع اسعار التملك فدي معظمها بالرهن العقاري او المورجدج...يعني بتدفع 10 او 15% و تاخد الشقه و الباقي على اقساط شهريه....قليل لما حد بيشتري كاش مره واحده

[egyptawy]

المشكله ان المهاجر الجديد مابيقدرش يلاقي شغل بسرعه الا اذا كان محظوظ جدا

غير كده لازم يدرس اي حاجه تخليه مطلوب في سوق العمل الكندي

و طبعا هيبقى بيدرس حاجه تخليه يشتغل في اول السلم الوظيفي

يعني مش زي ما كان في بلدهلذلك الدخل بيكون ضعيف نسبيا و بيتم تعويضه بشغل الزوجه او الصرف من المدخرات

نمره اتنين اللي بيروحوا لمصر كل سنه قليلين جدا لأن فيه فرق ضخم بين حياتك في الخليج مثلا و حياتك في كندا....انت مفروض هاجرت يعني حكاية كل سنه دي صعبه شويه...الا اذا كنت غني او عندك مدخرات كويسه

اما موضوع اسعار التملك فدي معظمها بالرهن العقاري او المورجدج...يعني بتدفع 10 او 15% و تاخد الشقه و الباقي على اقساط شهريه....قليل لما حد بيشتري كاش مره واحده

افهم من كده انى اى مهاجر هيهعيش فقير

[MZohairy]

الا لو

1- درس و عادل شهادته بشهادات كنديه و بقى رسميا محامي او طبيب او محاسب او مهندس......................كل دول بيعيشوا اغنياء ....و اغنياء جدا كمان

او

2- اشتغل هو و مراته شغل متوسط فبيعيشوا بدخلهم مع بعض عيشه كويسه طبعا متوسط 45 الف دولار لكل واحد فيهم سنويا...يعني 90 الف الاتنين

او

3- عمل مشروع و نجح فيه (ماعرفش ايه المشاريع الكويسه لاني مابفهمش فيها خالص)

غير كده هتبقى العيشه ماديا نص نص

تم تعديل 31 أغسطس 2014 بواسطة MZohairy

[egyptawy]

الا لو

1- درس و عادل شهادته بشهادات كنديه و بقى رسميا محامي او طبيب او محاسب او مهندس......................كل دول بيعيشوا اغنياء ....و اغنياء جدا كمان

او

2- اشتغل هو و مراته شغل متوسط فبيعيشوا بدخلهم مع بعض عيشه كويسه طبعا متوسط 45 الف دولار لكل واحد فيهم سنويا...يعني 90 الف الاتنين

او

3- عمل مشروع و نجح فيه (ماعرفش ايه المشاريع الكويسه لاني مابفهمش فيها خالص)

غير كده هتبقى العيشه ماديا نص نص

الف شكر يازوهيرى باشا

الله يخليك ممكن تقولنا اخبار بتوع ال IT حوالك ايه

وهل بيلاقوا شغل بسهولة وعايشين كويش ولا ايه

واخبار المرتبات

الف شكرا

[MZohairy]

الف شكر يازوهيرى باشا

الله يخليك ممكن تقولنا اخبار بتوع ال IT حوالك ايه

وهل بيلاقوا شغل بسهولة وعايشين كويش ولا ايه

واخبار المرتبات

الف شكرا

اهو من ضمن المهن اللي مش محتاجه معادله لدخول سوق العمل الكندي بتوع الاي تي

و ان كان كل ما تحصل على شهادات كنديه و خبراتك تكون مناسبه و لغتك الانجليزيه كويسه هتلاقي نفسك بتكبر بسرعه اكتر

ماعرفش الحقيقه رواتب الاي تي كام خصوصا انهم هيراركي كبيره عندنا مثلا في الشركه الهرم بتاع قسم الايتي مكون من 7 درجات وظيفيه يعني الموضوع بيختلف حسب مستواك الوظيفي و حسب مستوى و حجم الشركه

[MZohairy]

سمعت ان على طول فى امطار صيف شتاء حقيقى الكلام ده

لأ طبعا ...مفيش مطر في الصيف....و في الشتا المطر كتير بس مش معيق و لا يمنع التحرك

و لو صحيح هل بطريقه مزعجه ام يمكن التأقلم معاها

اطلاقا....الناس كلها عايشه عادي جدا

انا عارفه اسئلتى كتير شكرا مقدما و جزاك الله خيرأ .

الدنيا بتمطر من امبارح بدون انقطاع رغم اننا نعتبر لسه في الصيف او اوائل الخريف .....بس اهو ساعات بتعملها :welcome:

[Sally lolo]

بعد اذنكم اللي يقدر يفيدني فال application

اترجم شهادات الميلاد والبطايق فين و وثيقة الزواج فين؟

Fund settlement لازم فلوس كاش ولا ممكن اصل عقاري بنفس القيمة؟

اللي عنده معلومة لا يبخل جزاكم الله كل خير