توريث الحكم بين مؤيد ومعارض

[Guest Mohd Gramoun]

ولا أعلم كيف تقول أنه قد فرض علينا... كيف تم فرضه؟؟ و علي من فرض؟..

الرجل تم إختياره من قبل الحزب الوطني..ليكون رئيسا للجنة السياسات به... و لم يتم إختياره من قبل البرلمان ليكون رئيسا للوزراء...

بالمناسبة هو لا يتولي أي منصب حكومي..(حاسس ان الناس فاكراه أن لقب جمال ولي العهد حفظه الله)

تصدق بالله يا جرمون ...

والله العظيم إمبارح جالي إعتقاد إن في حد أخترق جهازك وبقى يكتب الكلام ده باليوزر نيم بتاعك ....

إنت مقتنع بالكلام اللي إنت بتقوله ده وفيه شبه كبير من سمير رجب ؟

بقى الراجل ما أتفرضش علينا يا مؤمن ياللي عارف ربنا ؟

أومال ظروفه إيه ؟ كانوا معلنين عن وظايف خالية وهو اتقدم تحت إسم مستعار وأظهر عبقرية ونبوغ غير مسبوقين وتم إختياره لهذا المنصب بدون النظر مين والده ولا مين والدته ؟

وبعدين هو ما بيتولاش منصب حكومي ؟

والله ... ده مين قال لك كده ؟... اومال أمين عام لجنة السياسات دي إيه ؟ عمل تطوعي إجتماعي خيري ... لله وللوطن يعني ؟

ولما بيقعد أعضاء الحكومة اللي قده في السن مرتين وفي ناس اطول منه مرتين زي أحمد نظيف كده .. لما بيقعدهم زي تلامذة الكي جي ون قدامه ... ده بيبقى بمناسبة إيه ؟

من حقك تشجع الحزب الوطني .. وكمان من حقك تكتب فيهم شعر وزجل وقصص قصيرة .... وبدل ما تكتب موضوع بعنوان " جرمونيات " عدلها وخليها " وطنيات ديمقراطية " وإشجينا يا سيدي وأتغزل فيهم ...( بس مش هانسمح لك بنشر أي قصيدة من دول لإن إنت عارف مكانها الحقيقي فين ha) :blink: )

يخرب مطنك يا عمدتنا....

طبعا هيكون مكانها.... mfb:

stnd:: :D

يا بو عمر باشا...

هو لما بينظر و بيتمنظر علي رجالة الحكومة دول ...موش هم برضه حكومة الحزب ولا بيجيب الولاد دول..بتوووع أ أ أ المعارضة و بيمدهم علي رجليهم...

وبعدين أمين السياسات في الحزب يا أستاذي..موش في الدولة..

الله يخرب بيت السياسة اللي هتخليني عضو في معسكر سمير رجب...

بس أحلي حاجة أنك فكرتني بموضوع جرامونيات ده....نفتحه من جديد

[New]

إقتباس 

1-  جمال مبارك موجود فى الساحة السياسية مش علشان خاطر يقزز لب. ده موجود لسبب...  ايه هوه ايه حلم اى واحد سياسي...تفتكر ايه؟؟  

لأنه مواطن مصري و يريد أن يتمتع بحقوق المواطنة من عمل حزبي يكفله له القانون و الدستور...

لا يا راااجل تصور انا كنت ظالمه!!! مكنتش اعرف انه انسان بسيط عايز يمارس حقوقه السياسية ويقضى عمره لخدمتى وخدمة بقية الرعية!! تعرف انا احيي فيه هذة التضحية العظيمة واحيي فيك فهمك وتفهمك.

إقتباس 

2- سيادتك قلت بالحرف الواحد...

إقتباس 

بصراحة أنا سأؤيد جمال لو ترشح...لكنه قالها لن اترشح و نحترم رغبته و وجهة نظره فهو يعلم تماما أنه سيخسر الرهان لا لشخصه او لبرنامجه ولكن لأن اسمه جمال مبارك

يعنى محطش شرط ولا شرطتين والا سقط سهوا.. خلى بالك لان المعنى بيتغير كتير.  

حضرتك فهمت غلط و بالتالي حكمت غلط...

أنا اللي إفترضت و فرضي كان مشروط موش هو..

من الاخر الاعتراف بالحق فضيلة. واللى انت كتبته واضح. انا لو بصحح ورقة امتحانك حديلك صفر لانك لم تضع اى شرط فى جملتك. يبقى ازاى انا فهمتها غلط؟ وفين شروطك فى الجملة دى.

إقتباس 

السبب التانى اعتقاد بعض الناس ان الرئيس المفروض يكون عارف كل شئ عن اى شئ وده غلط لان الرئيس المفروض يكون رجل اتخاذ قرار والمستشارين ورئيس الوزراء هما اللى بيقدموله الخيارات المتاحة. السببين دول بيخلوك تعتقد ان اما مبارك او ابنه هما اللى يعرفوا احسن من 70 مليون. يعنى يا تختار الملك او الكتابة. وجهين لعملة واحدة.

همشي و وأتفق معاك. مع انه اللي قلته حاجة بديهية بس كأني أول مرة أسمع عنها......ممكن بقي تقدملنا عملة جيدة صالحة للإستعمال بعيدا عن عملة مبارك؟؟؟

لا ... سيادتك ما فهمتش ايه اللى انا عايز اوصلهولك بدليل سؤالك عن البديل. تانى رئيس الجمهورية رجل اتخاذ قرار. يعنى اى حد مؤهل لاتخاذ قرارات هامة ممكن يكون البديل. حتقوللى مين... عمرو موسي ممكن يكون بديل. المحجوب ممكن يكون بديل. وغيرهم كتير.

4

إقتباس 

- انا اتفق معاك ان الشعب عليه جزء من المسؤلية بس النصيب الاكبر يرجع للرئيس فى تخلف البلد بس خلال اكتر من عقدين ايه انجازاته والا انجازات حزبه ؟؟ وايه الاجراءات اللى الحكومة عملتها من ساعة التوقيع على الجات؟؟

معاملش أي حاجة خالص..قاعد طول النهار في شرم... و بالليل بيطل علينا في التلفزيون يفقعنا كلمتين و خلاص..

اسمى ده اعتراف بفشل الحكومة؟؟ ولو كان ده اعتراف بالفشل مش يبقى التغيير واجب.

5

إقتباس 

- عدم وجود دليل على نهب وسرقة البلد من علاء مبارك. كل اللى فى بالى مثالين. ماهر الجندى محافظ الغربية والجيزة السابق. كانت سمعتة زى الطبل والكل يعرف انه حرامى ولما كان فيه دليل ضده قالوله معلش اللى مش شاطر زينا بيدخل السجن. والمثال التانى يوسف والى وصبيانه وبرضة سمعته معروفة وبدأت شلتة تقع. وعلى فكرة ممكن ترجع لواحدة من اوائل مداخلاتى فى الرد على الاخ جرجاوي وانت تعرف مين سبب ترك الجنزورى للوزارة وكمان موضوع شركة انتل.

هات دليل واحد الأول علي أن علاء أستغل اسمه و أنه أبن الرئيس في أي عمل غير مشروع و بعدين نفتح موضوع عن علاء...

مفيش دخان من غير نار. وتانى اتمنى فهم ما اكتبه قبل الرد عليه. لو فيه دليل بيتمسك على حد فى شلة الحرامية دول بيقولوله مع السلامه زى الامثلة اللى قلتها لك قبل كده. علاء مابيتعاملش مع مواطنين عاديين زى وزيك. ده بيتعامل مع الحاشية اللى هم برضه حرامية زيه. بس بكره افكرك واتمنى انه يكون قريب.

إقتباس 

فى النهاية اتمنى ان تكون قد توصلت الى ان مبارك فـــاسد وليس هناك اى تعبير اخر ولن انظر اليه بافضل من كده.

لم تقدم ما يدعم نظريتك...

دى مش نظرية ده استنتاج. اذا كنت موافق ان حكومة مبارك فشلت فى ادارة البلد لمدة 24 سنة ولم تفسح المجال لغيرهم للقيام بما فشلوا فى القيام به معناه شئ واحد. انه حااااكم فاااا سد.

[Guest Mohd Gramoun]

لا يا راااجل تصور انا كنت ظالمه!!! مكنتش اعرف انه انسان بسيط عايز يمارس حقوقه السياسية ويقضى عمره لخدمتى وخدمة بقية الرعية!! تعرف انا احيي فيه هذة التضحية العظيمة واحيي فيك فهمك وتفهمك.

وهذا هو جوهر العمل العام و التطوعي... و التضحية يقابلها طموح مشروع.

من الاخر الاعتراف بالحق فضيلة. واللى انت كتبته واضح. انا لو بصحح ورقة امتحانك حديلك صفر لانك لم تضع اى شرط فى جملتك. يبقى ازاى انا فهمتها غلط؟ وفين شروطك فى الجملة دى.

لو ..شرطية ..أشترطت الترشيح....النتيجة ..سأنتخبه...و مقبول منك الصفر برضه...هعتبرك استاذ جامعة بيصحح أوراق الإجابات علي الشاطئ و الهوا طير الورق..إدي كل الطلاب صفر...

لا ... سيادتك ما فهمتش ايه اللى انا عايز اوصلهولك بدليل سؤالك عن البديل. تانى رئيس الجمهورية رجل اتخاذ قرار. يعنى اى حد مؤهل لاتخاذ قرارات هامة ممكن يكون البديل. حتقوللى مين... عمرو موسي ممكن يكون بديل. المحجوب ممكن يكون بديل. وغيرهم كتير.

ماهو كل إنسان حتي الطفل بيقدر يتخذ قرارات... حتي أبو الطفل ممكن يقول لأبنه تحب المصاصة أحمره ولا أصفره..يختار الطفل الاحمره... يبقي قرار ناجح و صح طبعا لأن الطفل أهلاوي...

ثم ما علاقة عمرو موسي أو المحجوب بهذا الموضوع... لو رغب أحدهما في الترشح لترشح..بدلا من نقول فلان او علان و كلاهما لا يعنيه الأمر...

اسمى ده اعتراف بفشل الحكومة؟؟ ولو كان ده اعتراف بالفشل مش يبقى التغيير واجب.

وأنا أسميه ريلاكسنج...

لو فيه دليل بيتمسك على حد فى شلة الحرامية دول بيقولوله مع السلامه زى الامثلة اللى قلتها لك قبل كده.

الأمثلة التي سقتها لا تدل علي أي شئ و لم يرد ذكر الرئيس وأبنائه في أية مرحلة من مراحل أية قضية فساد.. رغم أنك تناقض نفسك و تقول:

علاء مابيتعاملش مع مواطنين عاديين زى وزيك. ده بيتعامل مع الحاشية اللى هم برضه حرامية زيه.

بس بكره افكرك واتمنى انه يكون قريب.

إن غدا لناظره لقريب...و ماتدري نفس ماذا تكسب غدا و ما تدري نفس بأي أرض تموت..

[New]

وهذا هو جوهر العمل العام و التطوعي... و التضحية يقابلها طموح مشروع.

طب المفروض انى اعتبر ان دى نكتة ؟  ha)

لو ..شرطية ..أشترطت الترشيح....النتيجة ..سأنتخبه...و مقبول منك الصفر برضه...هعتبرك استاذ جامعة بيصحح أوراق الإجابات علي الشاطئ و الهوا طير الورق..إدي كل الطلاب صفر...

لا انا مش حصحح اوراق الطلبة على الشط. المفروض انك تاخد صفر لانك فهمت السؤال غلط انا بأسئلك ازاى تجزم انك حترشح واحد و بدون اى شرط مالهوش برنامج ويتبع حزب فاشل!!!! وسيادتك بترد وتقول اذا رشح نفسه حرشحه

stnd::

:blink:

ماهو كل إنسان حتي الطفل بيقدر يتخذ قرارات... حتي أبو الطفل ممكن يقول لأبنه تحب المصاصة أحمره ولا أصفره..يختار الطفل الاحمره... يبقي قرار ناجح و صح طبعا لأن الطفل أهلاوي

...

يا عمنا ارجوك افهم اللى بأكتبه قبل ما ترد عليه حرام عليك. انا كاتب (يعنى اى حد مؤهل لاتخاذ قرارات هامة ممكن يكون البديل)

ثم ما علاقة عمرو موسي أو المحجوب بهذا الموضوع... لو رغب أحدهما في الترشح لترشح..بدلا من نقول فلان او علان و كلاهما لا يعنيه الأمر...

مش انت قلت ايه البديل لمبارك وبرد عليك بالشروط المفروض توافرها فى هذا البديل و كمان باديلك امثلة بعمرو موسى والمحجوب.

وأنا أسميه ريلاكسنج...

ده مش رد ده هروب من الرد.

ربنا يسهل و يديني القدرة علي فهم معادلاتك

الأمثلة التي سقتها لا تدل علي أي شئ و لم يرد ذكر الرئيس وأبنائه في أية مرحلة من مراحل أية قضية فساد.. رغم أنك تناقض نفسك و تقول:

كلامى واضح ولعل غيرك فهمه واستفاد. وبعدين فين التناقض ده؟؟؟؟

تحياتى. mfb:

[MS7555]

السلام عليكم

كان مفيش حد مواطن مصري غير جمال مبارك هو اللي حقوق و باقي ال75 مليون عليه الواجبات

[Guest Mohd Gramoun]

السلام عليكم

كان مفيش حد مواطن مصري غير جمال مبارك هو اللي حقوق و باقي ال75 مليون عليه الواجبات

وعليكم السلام ورحمة الله..

بالطبع لا.... الجميع له حقوق وعليه واجبات..

والباب فتح للجميع

[Guest Mohd Gramoun]

أثناء بحثي المتواصل عما يخص التوريث وجدت برنامجا بث علي قناة الجزيرة عام 1999(الحكام العرب ومن يرثهم)..

ومما ذكر فيه هذ البرنامج:

ان هناك أنظمة انتخب فيها أبناء و أحفاد و لم يتم إتهامها أبدا بالتوريث السياسي...منها علي سبيل المثال:

إنديرا غاندي

راجيف غاندي

جورج بوش الإبن

رئيسة أندونيسيا (أبنة سوكارنو)

بي نظير بوتو

وغيرهم ..

والمهم ان احد لم يتهمهم بالتوريث السياسي أو بإستغلال دولهم أو الضحك علي الشعوب و إستغفالها..وهذا هو الفارق بين المجتمع العربي و المجتمعات الأخري.. سيطرة نظرية المؤامرة علي كل شئ حتي وإن كان خيالا يداعب البعض في واقع إفتراضي و يقلبه البعض الآخر لحقيقة يتعامل معها في الواقع العملي.

وفي اللقاء أيضا تذكير بالنماذج الديموقراطية العربية الوحيدة التي مرت علي تاريخ العرب الحديث: سوار الذهب و اللأمين زروال.. تلك النماذج التي تخلت عن الحكم بإرادة مسبقة و لم تتشبث بالكرسي نتاج لضغوط شعبية او برلمانية أو حتي برغبة ديكتاتورية.

نريد الديموقراطية و الديموقراطية تعطي الحق للجميع في الترشح و الإنتخاب..و في النهاية سيفوز من يريده الشعب لا الحاكم ولا الأقلية.

[se_ Elsyed]

ما تضحكش على نفسك يا محمد .. إنت عارف ومتاكد كويس إن الناس اللي إنت ذكرت أساميهم دول وصولوا للسلطة بطريقة ديمقراطية سليمة وإن معظم هؤلاء كانوا رؤساء لأحزاب قوية على الساحة لاسياسية في بلادهم ولم يصلوا إلى مناصبهم لمجرد إنه إبن فلان أو قريب علان ..

وعارف كويس إن الشعوب دي ما بينضحكش عليها .. ولو تلاحظ إن الناس دي زي ما تولت السلطة زي ما خرجوا منها بإنتخابات ديمقراطية أيضاً ومنهم اللي خرج بفضيحة بغض النظر عن تاريخ عائلته او تاريخ والده ...

اما أحنا فحدث ولا حرج ...

زعمائنا ملائكة بأجنحة لا يخطئون وكل أحلامهم اوامر وكل قراراتهم حتى لو كان بيكح هي تخطيط لمستقبل شعوبهم ...

هنيالك يا عم بالحزب الوطني ورجاله الشهداء الأبرار ...

[Mohammad Abouzied]

علشان كدا يا سي السيد احنا بنطالب بتغيير الية اختيار الحاكم ومش مهم هنا يكون زيد ولا عبيد

لان مش معقول اننا بنطالب بأسم شخص معين يحل محل شخص اخر وبعدها الى احطناه ما نقدرشي نشيلة

تغيير النظام نفسه الى نظام ديمقراطي صريح ومبني على شفافيه تامه هو الهدف الاصلي ثم بعد كدا سواء مبارك ولا جمال مبارك ولا ايمن نور ولا حتى شارون مفيش اي مشكلة طالما ممكن نشيلة عن طريق الانتخاب الحر

[Guest Mohd Gramoun]

ما تضحكش على نفسك يا محمد .. إنت عارف ومتاكد كويس إن الناس اللي إنت ذكرت أساميهم دول وصولوا للسلطة بطريقة ديمقراطية سليمة وإن معظم هؤلاء كانوا رؤساء لأحزاب قوية على الساحة لاسياسية في بلادهم ولم يصلوا إلى مناصبهم لمجرد إنه إبن فلان أو قريب علان ..

بنفس المنطق الذي تتحدث به و تحت رداء الحجة التي دفعتها لتؤكد أنهم وصلوا لما وصلوا إليه نتيجة كونهم رؤساء أحزاب قوية علي الساحة السياسية في بلادهم..أقول لك:

لا يزال الحزب الوطني في مصر أقوي الأحزاب .. حتي و إن بدأت علامات الترهل تظهر عليه إلا أنه لا يزال يتمتع بقاعدة كبيرة تشهد عليها إنتخابات المحليات و أيضا هو صاحب الأغلبية في البرلمان، وكون البعض يفترض خيالا ترشيح الحزب لجمال فهذا ينطوي علي نفس الدفوع التي سقتها.

أما قولك لأنه إبن فلان او قريب علان.. أسألك... وهل كان لا يوجد في الهند سوي راجيف غاندي من وسط مليار و 100 مليون شخص؟؟؟ 000 000 100 1 شوف الرقم كبير أد ايه!!!!!

أو حتي بي نظير بوتو من بين 160 مليون باكستاني؟؟!!!!

ما الموضوع هو هو... لكن يبقي الإختلاف في وجود حرية الترشيح و نزاهة الإنتخاب... و صدقني لن توجد ديموقراطية في مصر إلا مع وجود هاتين الضمانتين.

وعارف كويس إن الشعوب دي ما بينضحكش عليها .. ولو تلاحظ إن الناس دي زي ما تولت السلطة زي ما خرجوا منها بإنتخابات ديمقراطية أيضاً ومنهم اللي خرج بفضيحة بغض النظر عن تاريخ عائلته او تاريخ والده ...

ماهو إحدي علامات التقدم و التحضر إنهم لما بيحاسبوا الناس اللي بتكلم عليها ..بيحاسبوها علي أفعالها هي وبس... موش علي أفعال أهليها او كونهم أبن او بنت فلان...لكن أحنا هنا بنحاسب الراجل مقدما و قبل ما يبقي أي حاجة لمجرد أنه أبن الرئيس.. و كأنها إحدي جرائم الإرهاب!!

اما أحنا فحدث ولا حرج ...

يبقي العيب في مين بالضبط؟

زعمائنا ملائكة بأجنحة لا يخطئون وكل أحلامهم اوامر وكل قراراتهم حتى لو كان بيكح هي تخطيط لمستقبل شعوبهم ...

مين اللي قال كده... الجميع يخطئ بما فيهم الرئيس ولكن إن أخطأ لا يجعلنا خطأه أن نتناسي إيجابياته و مواقفه و نجعله في خانة الديكتاتورية مع هتلر و صدام..أو في خانة الفساد مع ماتوسي تونج و بيرون... أو في خانة المجانين مع القذافي و علي عبدالله صالح.

هنيالك يا عم بالحزب الوطني ورجاله الشهداء الأبرار ...

:lol:

يا سيدي ....وطني :D ...وداد :P ... إهي كلها أحزاب lo::

[se_ Elsyed]

إلا أنه لا يزال يتمتع بقاعدة كبيرة تشهد عليها إنتخابات المحليات و أيضا هو صاحب الأغلبية في البرلمان،

إنتخابات .... بات بات بات

محليات ..... يات يات يات

قوم طُس وشك بشوية ميه يا محمد يابني ربنا يهديك ..

آه صحيح ده انت ساكن في مدينة نصر والميه عندكوا قطعه بقى لها شهرين وزيادة ..

طب قوم إتيمم بشوية تراب من قدام البيت ...

شوف بقى عشان انا تعبت وانا أساساً راجل صحتي على قدي ..

طالما انت معتقد إن عندنا محليات وإنتخابات وإن الحزب الوطني قوي وله شعبية وجماهيرية عظمى ... يبقى ما فيش فايدة يا جرمون ( حلوه دي انا بقيت سعد زغلول )

والظاهر إن حصلك غسيل مخ او غسيل معده ..

لكن أنا مش هالومك أنا بألوم هنا أبا الحاج زُهيري اللي سابك تنجرف لهذا التيار ....

تصبح على خير .

[se_ Elsyed]

علشان كدا يا سي السيد احنا بنطالب بتغيير الية اختيار الحاكم ومش مهم هنا يكون زيد ولا عبيد

لان مش معقول اننا بنطالب بأسم شخص معين يحل محل شخص اخر وبعدها الى احطناه ما نقدرشي نشيلة

تغيير النظام نفسه الى نظام ديمقراطي صريح ومبني على شفافيه تامه هو الهدف الاصلي ثم بعد كدا سواء مبارك ولا جمال مبارك ولا ايمن نور ولا حتى شارون مفيش اي مشكلة طالما ممكن نشيلة عن طريق الانتخاب الحر

هو ده الكلام اللي زي الدرر ...

أبا الحاج محمد ... ألقف الوردة دي :lol:

[Mohammad Abouzied]

علشان كدا يا سي السيد احنا بنطالب بتغيير الية اختيار الحاكم ومش مهم هنا يكون زيد ولا عبيد

لان مش معقول اننا بنطالب بأسم شخص معين يحل محل شخص اخر وبعدها الى احطناه ما نقدرشي نشيلة

تغيير النظام نفسه الى نظام ديمقراطي صريح ومبني على شفافيه تامه هو الهدف الاصلي ثم بعد كدا سواء مبارك ولا جمال مبارك ولا ايمن نور ولا حتى شارون مفيش اي مشكلة طالما ممكن نشيلة عن طريق الانتخاب الحر

هو ده الكلام اللي زي الدرر ...

أبا الحاج محمد ... ألقف الوردة دي :lol:

طيب ما هي نفس فكرة محمد جرامون

اذا كدا احنا متفقين مفيش مشكلة عندنا غير كل واحد ماسك جانب واحد فقط ومصر عليه

يعني سيبنا الجوهر وممسكنا في الفرعيات

[se_ Elsyed]

طيب ما هي نفس فكرة محمد جرامون

لأ مش نفس الكلام ... ولو كنت مؤمن بنفس أفكار جرمون يبقى هاسحب منك الوردة ومالكش عندي غير حزمة بصل أخضر :lol: ...

يا حاج محمد .. الحاج جرمون بيحاول وضع العربة أمام الحصان ...

يعني بالبلدي كده ... جمال مبارك أو غيره يتفرض علينا زي شربة زيت الخروع وكل ما نفتح جريدة او قناة تليفزيونية أو حتى الصنبور ( يعني الحنفية ) نلاقيه طالع لنا منها زي العمل الردي ... وبعد كده يقولك هاننزله الإنتخابات وزيه زي أي واحد وإحنا في بلد ديمقراطي ، وخلاص بقى عندنا إنتخابات حره نزيهه شريفه عفيفة أم إبراهيم ..

وبكده يبقى إتساوى المُرشح الغلبان اللي بينحت في الصخر مع المرشح الذي يمتلك جميع وسائل إعلام الدولة ويصرف من جيب اهالينا تحت شعار إنه من الحزب الحاكم ...

[New]

محمد جرامون فشل فى:

1- اعطاء ولو سبب واحد لاحقية جمال مبارك فى منصب الرئيس (فى حال ترشحه).

2- اعطاء اى مبرر لفشل الحكومة فى الحد من الفقر والمعاناة التى يعانيها الشعب خلال ال24 سنة الماضية

3- توضيح ما قامت الحكومة بعمله بعد توقيع اتفاقية الجات.

[Mohammad Abouzied]

طيب ما هي نفس فكرة محمد جرامون

لأ مش نفس الكلام ... ولو كنت مؤمن بنفس أفكار جرمون يبقى هاسحب منك الوردة ومالكش عندي غير حزمة بصل أخضر :angry: ...

يا حاج محمد .. الحاج جرمون بيحاول وضع العربة أمام الحصان ...

يعني بالبلدي كده ... جمال مبارك أو غيره يتفرض علينا زي شربة زيت الخروع وكل ما نفتح جريدة او قناة تليفزيونية أو حتى الصنبور ( يعني الحنفية ) نلاقيه طالع لنا منها زي العمل الردي ... وبعد كده يقولك هاننزله الإنتخابات وزيه زي أي واحد وإحنا في بلد ديمقراطي ، وخلاص بقى عندنا إنتخابات حره نزيهه شريفه عفيفة أم إبراهيم ..

وبكده يبقى إتساوى المُرشح الغلبان اللي بينحت في الصخر مع المرشح الذي يمتلك جميع وسائل إعلام الدولة ويصرف من جيب اهالينا تحت شعار إنه من الحزب الحاكم ...

يا عم بصلة المحب خروف هات انت بس واي حاجة مقبولة منك بس احنا مشفناش حاجة اصلا

شوف يا سيدي عملية الدعاية دي اصلا زادت قوي ولكن هل جمال مبارك نفسه قابل دا

اعتقد لا وانت شايف عمو صفوت اتشاط فين

نيجي للدعاية

ودي فن يعني في يوم من الايام استاذ الاعلام رشح واحد من عنده غير مقبول طلابيا على مستوى القاعدة لكنه ضامن نظرا لتفوقه الفني انه ها يكون امين عام لجنة الفنون على مستوى الجامعة

فبحث معنا ليه غير مقبول وكل واحد فينا عمل بحث من وجهة نظره ولكن في الاخر اكتشفنا كلنا انه غير مقبول من كثرة الدعاية له من اسر جماعات مكروهه من المجتمع الطلابي وتم وضع برنامج انتخابي بقطع بل معاداه كل الاسر التي متزعمة الدعاية له

فقلت دعايته بل اصبح شهيد في نظر الطلاب لما هذه الاسر بدأت في تنزيل النكت عليه ومهاجمته

وبعد فترة وجيزة اخذت انا وعدد من الزملاء في الدعاية له بأسلوب مقنع ومتزن لان الدعاية الكتير تضر ولا تفيد وتكتر الاعداء وكذلك عدم وجود دعاية اصلا ممكن تمحيه من الصورة

وفعلا نجح وتولى امانة اللجنة وبدأت صورتة الحقيقية تظهر للطلبه

واعتقد ان جمال مبارك مش ها يرشح نفسه لانه عارف انه لو رشح نفسه لن يفوز في ظل هذا التخبط الاعلامي عنه ومن جهة اخرى فوز اي شخص انتهازي مكانه سوف يضر بنا وبمصلحة البلد وبصراحة احنا خيفين من الي بيصتادو في الميه العكرة حتى لا نندم حيث لا ينفع الندم

[أشرف حليم]

بالرغم من أني من المؤيدين للسياسة التي يتبعها جمال مبارك في لجنة السياسات لكن دخوله الانتخبات بعد والده مباشرة مما سوف يؤخذ عن هذه الخطوة من توريث برغم انتخابات حرة

انا مع ان جمال من أفضل من يستطيع ان يدير البلد في ظل تعقيدات كثيرة

منها عدم استعداد الكتيرين للحرية الفورية و أيضا ممكن أن تصبح فوضى

[Guest Mohd Gramoun]

عمدتنا س س ...

الحمد لله الحزب أرسل لإعضاؤه SMS من فترة قبل إنقطاع المياه و نقلنا المعادي..

وبعت ما قريت مشاركتك اللذيذه..خدت بنصيحتك بس بدل الطش عملت ساونا و ختمتها بالجاكوزي عشان الواحد ينام و ضميره مستريح...

بس خلينا منطقيين شوية.. لما قلتلك اتفرج علي الأستاذ خالد أمس ..كنت عارف أنه هيقول الحقيقة اللي أنت موش قادر تستوعبها و غيرك كتير برضه موش قادرين.. زعيم المعارضة في مجلس الشعب قالها أمبارح.. الحزب الوطني يسيطر علي معظم الحياة السياسية في مصر و بدءا من المحليات و إنتهاءا بمجلس الشعب، يعني المعارضة لازم تشتغل و هو قال عشان تبقي فيه فرصة للمعارضة موش هتكون قبل 6 سنوات يعني علي إنتخابات الرئاسة بعد القادمة و يامين يدينا عمر...

لأ مش نفس الكلام ... ولو كنت مؤمن بنفس أفكار جرمون يبقى هاسحب منك الوردة ومالكش عندي غير حزمة بصل أخضر  ...

يا حاج محمد .. الحاج جرمون بيحاول وضع العربة أمام الحصان ...

ليه كده يا حاج احمد.. الموضوع لا عربية ولا حصان ولا غيره.. إنت فاكر إن في الإنتخابات وسائل الإعلام هتقف في صف مرشح دون الآخر؟؟؟! لو عملوا كده حتي مع الريس الناس هتعدي الشارع و تروح للأتجاه المعاكس... الإنتخابات حرية و إختيار.. موش إملاء و إجبار.

المهم شفت رأي أستاذنا محمد ...صح ولا غلط يا سي السيد يا بيه؟!!!

الراجل قال مثال من الحياة ..يعني حاجة حقيقية تبرهن صحة ما نقوله..

أشرف حليم  Mar 28 2005, 04:28 PM

  بالرغم من أني من المؤيدين للسياسة التي يتبعها جمال مبارك في لجنة السياسات لكن دخوله الانتخبات بعد والده مباشرة مما سوف يؤخذ عن هذه الخطوة من توريث برغم انتخابات حرة

انا مع ان جمال من أفضل من يستطيع ان يدير البلد في ظل تعقيدات كثيرة

منها عدم استعداد الكتيرين للحرية الفورية و أيضا ممكن أن تصبح فوضى

راي مواطن مصري جدير بالإحترام ...قد يتفق مع البعض و يختلف مع البعض ولكن له ما يبرره من وجهة نظر الكاتب... أهلا و سهلا بك و بأول مشاركة.

[عصام]

تم إجراء بعض التعديلات على بعض المداخلات بما لا يخل بمضمون او سياق الموضوع .. فقط التعديلات شملت خروج عن آداب الحوار أو خروج عن الموضوع ذاته ..

أعتذر عن أى لبس قد تسبب لبعض الزملاء الذين تصفحوا الموضوع أثناء إجراء عملية التعديل كما أتمنى ألا يعيق هذا استرسال الأخوة الزملاء بأى حال ..

تحياتى

[peacefulofmind]

يا اخي محمد نفسي اشوف رءيس تاني قبل ما اموت نفسي اسمع عن 2 رؤساء عايشين في نفس الوقت في مصر ربنا ما

يحرمنا من هده الامنيه ياشيخ. طول ما النظام ده ماشي عمرك ما حتشوف حد ينفع للرءاسه لانه بيتردم عليه احنا نختار اي حد بس نختار وبعدين حنقدر نشوف كتير بلطريقه دي حيفضل الحزن الوطني مسيطر علي كل شئ لا نافع 6 سنين ولا 30 سنه

وبكره كل شئ يبان والناس تعرف قد ايه كان مضحوك علينا وعلي الجيران .

سلام