النقاش خد فلوسه كامله وبعد كدا مشفتش وشه تاني - أعمل إيه يا أهل الخبره؟

[masrymasry]

السلام عليكم أخواني الكرام

ربنا قدرني والحمد لله وأشتريت شقه وجبت واحد يعمل (المحاره والنقاشه) بعد ما قرفني كل شويه وصعبانيات وحاجات زي دي

جه قبل العيد وقالي معلش هأخد الباقي لحسن ممعايش فلوس أعيد أنا وعيالي والكلام إللي فيه صعبانيات دا - أديته كل الفلوس على أساس أنه هيجيي يخلص الشغل بعد العيد

وبعد كدا ولا حس ولا خبر أتصل بيه مبيردش أو مغلق تليفونه فأتصلت بنسيبه

كل إللي أعرفه أنه ساكن في إمبابه ومعايا رقم تليفونه ومبيردش

وأعرف نسيبه وأتصلت بيه وكل يوم يقولي بكره بعده وهكذا

الواحد يعمل إيه في الموضوع دا

لأني قرفت

وأشكركم جزيل الشكر

[متعب]

يعنى ايه خد فلوسه كامله

معروف انه بيشتغل بالمتر

هو متر الشقه وقال حسابها كذا وخده قبل ما يشتغل . ولا خد فلوس على اى اساس

[مروان]

صدق من قال شرا العبد ولا تربيته

ارف الصنايعية ومواعيدهم التعبانة خلى ناس كتير تشتري الشقق جاهزة ومتوضبة

المعروف ان محدش بيدي الصنايعي كل فلوسه الا لما يخلص يعني تقضل رابطه بمبيلغ علشان ييجي لانه لو خد كل فلوسه مش هتشوف وشه الا لو كان عنده ضمير

عموما مفيش قدامك غير نسيبه

روح له ةقوله يديك ميعاد اكيد يا اما ييجي يشتغل او يجيب لك الفلوس

وحاول تتصل عليه من رقم مجهول يعني مش متسجل عنده

كان الله في عونك

ابقى طمنا عملت ايه

والاخوة هنا مش هيقصروا في افادتك

[masrymasry]

يعنى ايه خد فلوسه كامله

معروف انه بيشتغل بالمتر

هو متر الشقه وقال حسابها كذا وخده قبل ما يشتغل . ولا خد فلوس على اى اساس

هو متر الشقه وقال حسابها وبقيت أديله منها على دفعات بس آخر دفعتين قال أنا عندي ظروف والعيد داخل وممعيش فلوس علشان العيد وحاجات زي كدا

فأديته بحسن نيه بقية حسابه على أساس أنه جاي بعد العيد وهيخلص بقية الشقه كان آخر وش - وقفل تليفونه ولاحس ولا خبر

حاليا باتصل على نسيبه - وربنا يسهل الأمور

بس أنا كنت عاوز أعرف هل فيه طريقه تانيه ممكن أضغط عليه بيها علشان يجي يخلص تشطيب الشقه ؟

[masrymasry]

الجديد في الموضوع

أتصلت بنسيب النقاش كتير لحد ما زهقته في عشته وهددته أني هأعملهم مشكله كبيره -
تاني يوم بأتصلت بالنقاش الصبح لقيته بيرد عليا وبيقولي أنه رايح دلوقتي لشقتي وجه زي ال؟؟؟؟؟؟؟ عمل حاجات كتيره من الشغل والحمد لله عملي أكتر من 90 % من الشغل والباقي حاجات بسيطه قلت مفيش مشكله بس خلصلي حاجات كتير الحمد لله
وعرفت منه أنه راح يشتغل في شقة ، صاحب الشقه نصب عليه بعد ما خلص الشغل كله وأداه ثلث المبلغ المتفق عليه. " سبحان الله يمهل ولايهمل "

ودي كانت نهاية الموضوع

أشكر كل من رد عليا