(أبو خليل) يتحول الي (أم خليل )!!

[ابو خليل]

أسباب تحول أبو خليل الي أم خليل

تحولي من ابو خليل الي ام خليل .... لم يكن قرار انفعالي أو نتيجة موقف ما .. الحكاية لها جذور في نفسي عميقة جدا .. ومؤلمة للغاية ... يمكن من قبل أن أولد !!

فمنذ ان وعيت علي الدنيا وانا اري اخواتي البنات جالسين في البيت يتفرجواعلي التليفزيون وانا اللي مطالب بالنزول الي الشارع كل خمس دقائق لكي اشتري طلبات المنزل ..

في المدرسة كانت البنات لا يقمن بأي عمل .. كنا نحن نكنس الفصول ونتخانق مع الفصول الاخري - من اجل البنات برضة - ونعمل كل حاجة والبنات جالسين بس للثرثرة ...

وكبرت وكبرت معي فكرة ان اتحول من أبو خليل لأم خليل !!!

في الجامعة .. كانت التقديرات المرتفعة دائما للبنات ..لا ادري لماذا .. اصل الدفعة اساسا كانت حوالي 75 طالب وطالبة ... كان الدكاترة يعرفوا اسم اسم .. اقسم بالله ان فيه دكتور كان لا يجلس في ( البينش ) المقابل له الا البنات ، ولو حصل وجلست فيه انا أوغيري من الجناشير يشخط فينا / ارجل يا عيل منك ليه ورا ... ارجو في أخر المدرج ...

وكنا لو أردنا الحصول علي اسئلة الامتحان . ارسلنا اجمل (مندوبة ) حيث كانت عادة ما تأتي بعد جلسة من الحوار البسيطة مع الدكتور بكل الأسئلة وربما بالحلول أيضا !!!

وكبرت فكرة التحول في رأسي !!!

وبعد ما اتخرجت من الجامعة ..حاولت اشتغل .. كلهم كاتبين يافطة مكتوب عليها _ مطلوب أنسة _ _ مطلوب انسة- مفيش مرة حد قال ( مطلوب أنس ) !!!

والحمد لله اتعينت واتربطت علي الدرجة الثالثة ... كل يوم احاول استأذن محدش يرضى يطلعني من الشغل .. وتيجي أي زميلة .. معلش الواد في الحضانة ، معلش رايحة اطعم البنت ... معلهش عندي غسيل .. طبيخ .. يقوولوها .خلاص ابو خليل يقوم بعملك وسلامات للواد والبنت !!!

اروح أي مصلحة حكومية اخلص اي ورقة .. البيه الموظف يلطعني ادامه ساعات واطلع ا لدور الثالث وانزل البدروم ! وروح الأرشيف .. وتيجي أي بنت تخلص اي حاجة ... وعلي حسب مستوي جمالها بقي ..فيه مستوي اقسم بالله يجعل الموظف يجلسها مكانه علي مكتبه ويهرول هو في كل اورقة المصلحة الحكومية كالثور الهائج فينهي لها كل المطلوب !!!!

رحت اوقع أجازة السفر من المدير .. رفض تماما( رغم انه رجل مثلي ) وقال لي :عجز صارخ صارخ .. ازاي اوقع لك ..ضميري .. اخلاقي .. الشغل يتبهدل ..وانا عمال اقول له : ( يهديك .. يرضيك الله يخليك ) .. مفيش فايدة ..

ثاني يوم لقيت زميلة اسمها حسناء ( وهي فعلا حسناء ) ..وفي أيديها موافقة من نفس الموجه علي السفر !!!!!!!

يا عالم دا انا رحت في يوم اعمل الكشف الطبي علشان الإعارة .. كويس ..

كانت معايا بالصدفة زميلة عزيزة في نفس المدرسة .. رحنا المستشفي طابور طويل .. من نفس عينتي ( الخناشير) المهم الزميلة ابتسمت وقالت لي : انا هاخلص لك الكشف في ثواني .

واخذت الورقة وقامت رايحد دوغري علي مكتب الطبيب .. والصراحة هيه كانت بنت حلوة .. حلوة قوى .. المهم ما اخذتش نصف دقيقة ..وخرجت معاها الورق مختوم ومتوقع اني سليم 100% ولا اعاني من أي مرض !!!!!!

بعدها صرت مطالب بالحرث في البحر لأوفر (لأنثى ) الشقة والشبكة والعفش والمهر والمؤخر والمواسم ... وتغربت في بلاد الله سنوات لأوفر لها كل هذا ...( ويا ريت عاجب ) بينما هي جالسة في بيتها .. تقوم (ربنا يعينها ) بتقليم أظافرها أمام مسلسل المساء !!!!!!!!

وغيرها الالاف من "الممارسات العنصرية" التي عانيت منها كثيرا ولا زلت اعاني !!

لذلك ولأسباب اخرى لا مجال لذكرها .. ولأسباب ثالثة خافية في نفسي قررت وبعد تفكير عميق ....

قررت بكل اسف التخلي عن ( رجولتي ) ...

أن اتحول ( وكلي حزن) من أبو خليل الي أم خليل !!!!!!!

[bentmasria]

اخى الفاضل ابو خليل

ربنا يحفظك ابو خليل من كل شر ومن انك تكون ام خليل

واسأل اختك ام محمد اللى كانت تتمنى تكون ابو محمد بس موش نافع الله يرحمه سابها واهى كل يوم شايفة من نفس العينة

المشكله زى مانت قلت كده

هناك حسناوات وموش حسناوات وانا من الفصيلة 2 وعليه

اقف ف الطابور

وانتظر التأشيره

وادفع سيارتى بنفسى عندما تتعطل

واحمل طفلى وعربيته عن طلوع الرصيف

ويرفض تعيينى فى الاماكن التى تتطلب حسن المظهر لانى ملتزمة

وامكث فى عملى بال 18 ساعة لو لزم الامر لانى شيخ غفر

وطول النهار بقول

ياريتنى ابو محمد

تبادلنى

[عصام]

هناك حسناوات وموش حسناوات وانا من الفصيلة 2 وعليه

..

..

وامكث فى عملى بال 18 ساعة لو لزم الامر لانى شيخ غفر

..

دا على أساس ان ما حدش من الزملاء شافك ؟ :blink:

ماتصدقش يابو خليل .. ام محمد بتواسيك بس rs:

[G.G]

لو الموضوع ده بجد ,,و أنت ترى ,جد ,أن حال أم خليل أسعد بكثير من حال أبو خليل ,,

انتظر لحظة قبل الإقدام على العملية,,

حتى أنقل لك نبذة مختصرة من موقعي هذا من قفص الحريم,,

قفص الحريم يا سيدي رغم انقراض كلمة "الحريم" إلا أنه لا زال قائم بنجاح شديد ,,قضبانه القوية و التي يصعب تكسيرها هي الخوف من القيل و القال,,

و سياط التعذيب فيه هو ألسنة كلام الناس و تساؤلتهم الخفية,,

و التقييم فيه ليس حسب حسن السير و السلوك أو حسب التفوق العقلي ,,و لكنه تقييم جسماني و شكلي بحت,,لذا لا تندهش أن ترى المرأة تقضي ليليها في تقليم أظافرها أو عند الكوافور,,لأن هذه هي القوانين هنا ,,لو شذت عنها العواقب كثيرة.. و الدليل هو ما سقته أنت من مواقف..

و الإستكانة في القفص هي سيدة الأخلاق ,,

و الإستكانة تكون تجاه أي نوع من أنواع التهجم ,,يعني لو تعرض لك رجل غريب بمعاكسة ,,لا يمكن الشكوى بأي حال من الأحوال..و إلا الرد (في أحسن الأحوال) "اله ما تشوفي اللي انت عاملاه في نفسك ,,ده أنا لو اختي عاملة كده كنت...."...

لو تعرضت لك سيارة لوري مثلا بأن تدوس سيارتك ,,رغم انك واقف في الإشارة في أمان الله زيك زي غيرك,,لا تنزعج ,,و أيك أن ترد سوى بمحاولة الهروب ,,لان "ما تقعدوا في بيوتكوا " هو النفسير السعيد..

أما عن عمليات النصب اليومي ,,من ميكانيكي ,,من منادي ,,من سائق تاكسي,,فحدث و لا حرج ,,

و ده لأن الإستكانة دائما هي رد الفعل المنتظر منك,,

و أي شئ أخر ستكون عواقبه وخيمة !

و أما لو كان الموضوع ده هزار ,,و أنت لا تقصد أن حال أم خليل أحسن بجد من أب خليل ..

فهذا هو تعليقي : rs:

[ابو خليل]

يا عالم يا هوه ... دا انا ساعات كنت ببقي زهقان وعايز اكلم اي مخلوق ..

ادخل علي موقع للشات باسمي ( ابو خليل ) او ابراهيم

احاول افتح حوار مع اي مخلوق ..مفيش فايدة

وفي النهاية غيرت اسمي .. لاسم بنت .. والله الناس كلهم يتخانقوا يتعرفواعليه ويكلموني ...

دا حتي الأب حرموه من العيد ... وسموه عيد الام !! والأم يجيلها هدايا .. وست الحبايب يا حبيبة ...وكأن الأب عيل من العيال ...!

وبعدين حريم ايه يا جي جي ..

اقسم بالله انا شفت ستات زي الوحوش ... يضربوا رجال المرور... وبيعاكسوا الرجاله في الشارع !!

:D أنا شخصيا اتعاكست حتي في السعودية !!

يا اختي عصر (اللي اختشوا ماتوا ) انقرض ...

ياختي ام محمد ، يا اختي جي جي ... يا بختكم !! واعرف ان كل ما قلتموه كان من بند ( الخوف من الرجالة الحسودين أمثالي ... !!

عموما انا لا زلت اطالب بما سبق أن طالب به قديما ..

وهو (رفضي الشديد لسوء معاملة الرجال ..والمطالبة بمساواتنا بالنساء ...)

تم تعديل 1 أبريل 2005 بواسطة ابو خليل

[mb14]

حقيقة الموضوع جميل ودمه خفيف وهو نقد لما يحدث من مواقف تفرقه بين الرجل والمرأة والتى غالبا هى فى صالح المرأة حاليا.

فى اختين ردوا عليك يأبو خليل انك ما تعملهاش وتخليك ابو خليل احسن وانا كمان رأى من رأيهم ليه خد عندك ياسيدى :

1- لو حصل وعملتها ويبقى عندك جمال معقول وتعليم عالى واخلاق كويسة وحبيت واحد أو اعجبت بيه ونفسك تتجوزية طبعا مش حتقدرى تفاتحيه فى الموضوع لأن دى مش ممكن أو تقوليله النهاردة جايه انا والحاج عشان نقابل والدك لأنى معجبة بيك وانا طالبة ايدك.(شفت بقى انى دى موضوع صعب وربنا رحمنا منه وانك دلوقتى ليك انتى حرية الأختيار بس ولكن هما طبعا لأ حتى لو كانوا بيحبوا واحد وميتين عليه ما يقدروش حتى يقولوله ).

2-ربنا ما يوريك بعد الجواز المسؤليات اللى حتترمى عليكى طبعا البيت مسؤليتك الطبيخ والغسيل ولو فيه عيال يبقى دى بقى قمت الأشغال الشاقه (جوزك جاى من الشغل مهدود ومش ناقص ولا كلمه ) طبعا عايز يتغدى ويريح له ساعتين ومش عايز ولا عيل يتنفس فى البيت ويا حبذا لو شويت حنان قبل ما ينام .

3-طبعا لو انتى شغاله كل بند رقم 2 حا يتعمل مع شغلك برا البيت ودى هو الطبيعى لأن جوزك مش حايطبخ ولا ...............

4-طيب لو مش بتشتغلى يبقى سيادتك حا تؤدى شغل البيت وطبعا قاعده طول النهار بين 4 حيطان وعايزة تخرجى طيب امتى دى جوزك جاى مهدود كل يوم ويدوب بيتغدى ويريح ويصحى يكون الليل ليل وعايز ينام عشان بكرة برودوا شغل.يعنى حتقعدى الأسبوع كله فى البيت يبقى مافيش غير الراحة الأسبوعية طيب مع انها لقضاء المشاوير المهمة بس يلى حايخرجك وامره لله يوم الراحة .(ياراجل دى الواحد لما ياخد له يومين اجازة يعنى يبقوا 4 أيام ويريح فى البيت بيزهق من قعدة البيت ربنا يكون فى عونهم والله الجماعة دوول ).

5-طيب فى عيل تعبان وشغال يزن طول الليل ما فيش حد حا يقعد معاه الا انتى طبعا جوزك مش حايقعد جنبه يسكته لأن عنده شغل الصبح .(تصدق ان اكتر شئ ما استحملهوش عياط العيال الصغيرة لأنك مش عارف هو عايز ايه ولا تسكته ازاى انا ما اعرفش عندهم صبر منين على الموضوع دى وعادى جدا ولا كأن فيه حاجه سبحان الله ربنا مديهم صبر فظيييييع ).

نصيحة خليك زى ما انتى يابو خليل ولا داعى لكل البهدله دى مش مشكلة يضحكوا علينا واحنا نجهز الشقة ونجيب العفش والأجهزة ونكتب بعد كدى القايمة ونمضى انى الحاجات دى بتعاعتهم وكل شهر ياخدوا فلوسنا مش مشكلة بس بلاش يا بنى بهدلة البيت دى والعيال دى حاجة صعبة قوى (ربنا رحمنا منها )وداهم هما امكانيات خارقة لعملها ما نستحملهاش احنا الخناشير (الحمد لله ) وربنا يبارك لنا فيهم هما وما يفكروش يبقوا رجاله أبدا أبدا

[ابو خليل]

والله يا زميلي في الرجولة : mb14 أنا تعبت خالص ..

دا حتى بايني مش هاقدر ابقي ام خليل ..

رحت لدكتور صاحبي .. متخصص في المسائل دي ..

ضحك وقال لي : شوف لي حد يحولنا احنا الإثنين !!

ثم ذكر لي عاقبة تلك الأمور وهي :

1- ان لو سمحت الدولة باجراء هذه التحويلات سيقدم ألاف الرجال وخاصة راغبي الوظيفة لاجراء هذه التحويلات بناء علي القاعدة المعروفة ( مطلوب أنسة للعمل )

2- ان أبو خليل لو صار أم خليل ... ستكون هذه نهايته . ، ثم قام صديقي الطبيب باخصار مرآة وقال لي انظر .. بصراحة قلت له .. بلاش احراج ، وفعلا لو اصبحت أم خليل ... سيهرب مني كل الرجال ... تخيلوا .. أم خليل برأسها الصلعاء . وشفاها الغليظة ورقبتها الطويلة ، النظارات السميكة ،وطولها الفارع 180 سم ، ومقاس حذائها 45 !!

3- قال لي صديقي الطبيب العاقل : وبعدين اساسا من علامات يوم القيامة ان يقل عدد الرجال ! ( والله اعلم ) يعني يا ابو خليل سيبها لظروفها وأدينا بننقرض شوية بشوية من غير أي عمليات تحويلية ..

انزل الشارع شوف فيه كام راجل وكام ست ..

يا راجل دول حتي ملؤا البلد ..

يعني احنا هنبقي كما عشرين خمسين مائة مئتين سنة ان شاء الله ( عملة نادرة التداول ) ، ويمكن نتخطف من الشوارع خطف ..

عموما كلامه ريحني .. رغم اني وأنا أودعه لمحت جرح طفيف في جبهته .. واعتقد والله اعلم - بحكم خبرتي - انه من أثر حذاء من نوع الـ ( كعب العالي )

وساعتها تلاشى مفعول كل كلماته البراقة .. وعرفت أن كل ما أدلى به من كلمات كان تحت تأثير التعذيب

وحينما نزلت دمعه من عيونه وهو يودعني .. عرفت أن الغرفة التي كنا نجلس فيها .. كانت تحت مراقبة دقيقة من قبل زوجته :ph34r:

ولا تزال للامور تداعيات أخرى ...

[ابو خليل]

وجدتها وجدتها ..

نعم وجدت اخيرا ( امراة ) يائسة من انوثتها قبلت ان تجري عملية بدل معي !!!

نعم صدقوني ..

انها امراة في غاية الجمال ..

وتقول ان جمالها سبب تعاستها ... فالكل يغازلونها .. يزعجونها بالهاتف و الايميلات .. يطمعون فيها ..

ولذلك قررت ان تتحول الي رجل ..

لا اصدق نفس .. ساصبح أم خليل .. وليس أي ام خليل .. بل ام خليل رشيقة بيضاء شقراء .. مليحة ..

بالطبع تعجبت من قرارها ..

ووجدتها مطلعة علي اخر أبحاث التحويل ..

( سيتم التبديل بيننا بكل هدوء .. لن يتم تغيير سوى ( المخ) فقط )بمعني انه يحتفظ ابو خليل بمخه فقط .. مع جسد هذه الحسناء الرائعة ..

بينما ستحصل هذه الحسناء علي جسد ابو خليل ( الغير حسن ) مع احتفاظها بمخها ..

لا تدقوني ؟ الم تشاهدو فيلم face off !!

لماذا صدقتم نيكولاس كيج وجون ترافولتا ولا تريدون تصديقي ..

المهم..

اتفقنا علي ان نتقابل في يوم ما في عيادة صديقي الطبيب ..علي أن تنوجه معا الي المستشفي لاجراء العملية ..

تقابلنا... للأسف تعطلت سيارتي ..

لابد من تاكسي ..

حاولت مرارا أن اوقف تاكسي .. لا يريد أحد أن تقف لي ..

ابتسمت وقالت لي : اجلس انت في الظل وسأوقف انا تاكسي ...

تواريت في الظل ورفعت يدها الجميلة ..

توقف صف تاكسيات ... تشاجروا في احقية كل منهم في الزبونة ..

ابتسمت انا في خبث وقلت : غدا سيتشاجرون من أجلي !!!

المهم ظهرت الي جوارها ...

فامتعض السائقون .. ومضوا إلا واحد ..

هممت بالركوب في الكرسي الخلفي صرخ :

يا اخي عيب تركب ورا وتسيب الست تركب جنبي .. خلي عندك نخوه .. اتفضلي يا هانم انتي في الكنبة ورا اريح لك ..

- يا ابن ال...

المهم جلست جنبه ..

نالني ما نالني من سجائره و رائحته ومطباته !

العربية وقفت ..

- لا زم ننزل نزق ..

همت الحسناء بالنزول معنا ..

صرخ السائق مرة أخرى ..

- ايه يا ست هاتزقي معانا العربية ولا ايه ؟ لا عيب .. انت تستني في العربية معززة مكرمة وانا والبيه نزق ..

ونزلنا وزقينا ... واتبهدنا تراب وقرف ..

-وصلنا المستشفي .. لا لسه شوية ..

فيه كمين ..

- بطايقكم يا بهوات ..

- وانت يا شيخ سايب دقنك ليه ..

يبدو أنه يكلمني أنا ..

- يا عم واحد شايل دقنه.. الثاني زعلان ليه ..

- نعم يا روح امك .. طيب والله لو مكانش معاك حريم كنت وريتك شغلك .. بس علشان خاطر الست اللي معاك هيسيبك ..

وصلنا المستشفي ..

- الحساب يا بيه

- حاولت هي ان تعطيه الحساب .

- صرخ السائق : عيب يا ست معقول يا بيه تخلي الست هي اللي تدفع الفلوس .. فيه الرجولة ؟؟؟

- دفعت ...

نزلت ...

لاحظت انها لم تغادر السيارة ..

- يا له يا ستي انزلي علشان نعمل العملية ونخلص ..

نظرت لي من زجاج السيارة وقالت :

انت عبيط يا ابني بعد كل اللي حصل لك ده عايزني اغير وابقي مكانك ..

وعندما فقدت اعصابي ووصفتها الخيانة ..

صرخت ..

وتجمع الناس في الشارع

وقالت لهم : النذل الجبان بيعاكسني !!

وطبعا .. فرغ الناس كل شحنات الكبت والقهر الذي يعيشونه علي وجهي وقفايا وظهري ...

وضربوني حتي تعبوا !

واكثر ما أحزنني أن اغلب من ضربني من " الرجال " !!!

حقا : مقهور يقهر مقهور !!!!!!!!

ولا تزال للتحولات .. تداعيات !!!

تم تعديل 22 أبريل 2005 بواسطة ابو خليل