احنا شعب و انتوا شعب

[Alshiekh]

بعد أن ظن المتأسلمون أنهم تمكنوا من مصر،
بدأوا في وصف من لاينتمي إلى تنظيماتهم وجماعاتهم بأوصاف سخيفة تنم عن جهل وحقد في صدور الغالبية منهم.
وكانت أولى تلك الأقوال العنصرية هي وصف من لاينتمون اليهم بأنهم:
علمانيين كفرة
ليبراليين كفرة
شواذ
سينشرون الشذوذ في مصر
حيقلع امي الحجاب
الرجالة حتتجوز بعضها
الى آخر تلك التفاهات والسخافات،
وبعد الاستفتاء على التعديلات الدستورية في مارس 2011 خرج علينا واحدا من كبارهم ليقول قولته المشهورة فيما سمي "بغزوة الصناديق" ويطلب من المعارضين "للتعديلات الدستورية" ان يهاجروا ويتركوا البلد.
وبعد أن عصر المصريون أطنانا من الليمون على أنفسهم وانتخبوا "محمد مرسي" بنسبة أعلى من النصف بقليل (51.5%) حتي لايعطوا فرصة للمرشح الأخر الذي حسبوه على النظام القديم، فلم يعي تنظيم الاخوان المسألة وظنوا كما يظن كل الأغبياء أنهم قد استلموا مفاتيح مصر وقد شبهه بعض شيوخهم بـ "سيدنا يوسف"،
وبدلا من لملمة الصف المصري وتقريب النصف الأخر الذي لم يختر "محمد مرسي" من النصف الذي إختاره، قاموا بغباء بتقسيم من وقف معهم ووسعوا الخلاف معهم -وهو بالمناسبة كان خلافا قائما من قبل 25 يناير ولكنهم كانوا دائما يخفونه كعادة التنظيمات السرية- فاصبحوا وحيدين على الساحة.
وبعد ان ظهرت فكرة تمرد في جمع استمارات تطالب "محمد مرسي" باجراء انتخابات رئاسية مبكرة، وهو عمل سبق ان قام به تنظيم الاخوان لتأييد مبادة "البرادعي" والمطالب السبعة، ولكن التنظيم أصم أذنيه وتعنت وعاند، وقام أعوانه من الارهابيين والمكفراتية بتهديد شعب مصر بالحرق والسحق والحرب الأهلية، ليخرج "وزير الدفاع" عن صمته وصمت الجيش وينذر بأن الجيش لن يقف متفرجا حال حدوث حرب داخلية أو أهلية تأتي على الأخضر واليابس وأعطى مهلة الاسبوع التي نعرفها جميعا، وبالغباء المعهود خرج مندوب مكتب الارشاد "محمد مرسي" بنفسه لينذر ويهدد ويتوعد الى ان جاء يوم 30 يونيو وزلزل الارض تحت ارجل التنظيم ومكتب الارشاد، ومع عدم الاستجابة من قبل التنظيم ومندوبه وازدياد حدة التهديد، خرج "وزير الدفاع" للمرة الثانية ليطلب من "الرئاسة" أن تتخذ موقفا إيجابيا خلال 48 ساعة والا ستضطر القوات المسلحة للتدخل وتنفيذ إرادة أغلبية الشعب التي خرجت في 30 يونيو.
الى أن جاء يوم الفصل وتم عزل محمد مرسي، ليخرج الشعب المصري ليعبر عن فرحته التي لايريد تنظيم الاخوان والمتحالفون معه أن يصدقوها، ويبدوا في سلسلة جديدة من قلة الادب ووصف الشعب المصري والجيش المصري والداخلية المصرية بصفات أقل مايقال فيها انها لايصح أن تصدر من اناس سمعوا عن الاسلام من قبل ناهيك عن ادعائهم بأنهم "الأعلون" وأن الاسلام هو حكرا عليهم وانهم انما مصلحون ويدافعون عن الاسلام وكانت اقل تلك الاتهامات هي "عبيد البيادة".

في مقابل هذا كان هناك شاعر "مدحت العدل" يرد لهم الهجاء على طريقة الفرذدق وجرير،
فكتب الكلمات التالية والتي أعلم أنها ستوجعهم إن كان لايزال لديهم مشاعر انسانية.

مدحت العدل : احنا شعب ... وانتوا شعب

إحنا شعب وإنتو شعب

واللى هز القلب منا

عمره ماهزلكو قلب

رغم إن الرب واحد..

لينا رب... وليكو رب

......................

وردة برية وبراءة..

إحنا بنشوف الطفولة

وإنتو شايفينها سبايا

تثبتوا بيها الفحولة

إحنا يسعدنا خيالها..

لما ترسم ف الكتاب

وإنتو لو عدى خيالها

يطلعلكوا فى ثانية ناب

إنتو بتحبوا الجهامة

وإحنا بنحب ابتسامة

إحنا حرية وكرامة

وإنتو سجن وشرع غاب

إحنا شعب وإنتو شعب

........................

مصر بالنسبه لنا ثومة

والا ناصر.. أو حليم

مصر بالنسبه لكو خيمة

أو إمارة أو حريم

إحنا نفديها بحياتنا

ونحبها ونرضى بقليلها

وإنتو عايزين تنهبوها

وتسرقوا خيرها ونيلها

إحنا يسقط منا شهدا

زينة الدنيا وشبابها

وإنتوا قلتوا كنتوا سعدا

لما داسوا فوق ترابها

إحنا أقرب وإنتوا بعدا

إحنا ثورة وإنتو ردة

ياطابور خامس وقاعدة

للعدو الواقف ببابها

إحنا شعب وإنتو شعب

.............................

إحنا بنشوف ربنا

رحمة للعبد اللى تاه

عفو عن مخطئ مسىء

توبة أو طوق للنجاة

وإنتو تِعبان القبور

والمقارع للحريم

سد باب الرحمة غية

واللى يغلط ف الجحيم

واللى يضحك يبقى كافر

والعبوس آخره النعيم

إحنا بنحب الحياة

وإنتو أعداء الحياة

إحنا شعب وإنتو شعب

............................

إحنا بنشوف الحقيقة

والعقيدة ف أى دين

كنت قبطى أو يهودى

والا ضمن المسلمين

رب واحد... معنى واحد

الرسالة يا مؤمنين

ماتكدبوش ماتغيروش

ف النوايا والوشوش

حب جارك زى أهلك

احفظه ولا تخونوش

وإنتو تيجو تخونوه

يختلف ف الرأى عنكو

تحلوا دمه وتقتلوه

وتقولوا ديننا قالنا

أى دين يا أدعيا

والا نبى م الأنبيا

يأمر بكافر تصلبوه

والا بوذى تبهدلوه

والا شيعى تكفروه

واللى بيفكر دا ضال

وتحرموا حتى الحلال

وتحللوا فكر الضلال

وتحكمونا يا أغبيا

إحنا شعب وإنتو شعب

...........................

إحنا شايفين الرسول

رحمة مهداة للبشر

سعى من أجل الوصول

للكمال المنتظر

إحنا شايفين إن ديننا

دعوة للنور والحضارة

وإنتوا حاصرينه ف حكاية

توب قصير أو ستارة

إحنا شايفين ابن سينا

وابن رشد والحسين

وإنتوا شايفين ابن لادن

والكهوف المظلمين

إحنا عشاق الإرادة

والحقيقة واليقين

وإنتو تجار المنابر

والبخور والمجذوبين

الخادعين للخاضعين

والآكلين الشاربين

النازلين الصاعدين

للمصالح والمناصب

وأما أمريكا بتأمر

تصرخوا بقولة آمين

إحنا شعب وإنتو شعب

.............................

إحنا مصرى بسيط وراضى

عسكري جاى م النجوع

يسمع الراديو الصغير

الأدان يملاه خشوع

يدعى ف الليل للى خلقه

يحمى عيلته يزيد ف رزقه

ف الدعا تنزل دموع

عند رب العالمين

صادقة من غير فلسفة

لا صوت جهورى ف ميكروفون

يصرخ يهدد بالوعيد

وكأنه واخد م السما

توكيل يكفر بعضنا

يهدينا نرجع مسلمين

يا عم مااحنا مسلمين

ومؤمنين وموحدين

من قبل حتى ما تتولد

وإحنا اللى وحدنا الإله

قبل الديانة ما تتوجد

ولإن مصر المؤمنة

قبل التاريخ فى دمنا

عمرنا ما حنبقى زيك

ولا أنت حتكون زينا

لِمّ غنمك أو جمالك

أو مباخرك أو عيالك

والمشانق من حبالك

والعشيرة والخيام

خد زعيقك خد صريخك

خد فتاويك واللجام

خد حرام حرام حرام

حلال عليك يا مسيلمة

اللى سرقته مننا

وإبعد بعيد عن أرضنا

لأنكوا... ولإننا

إحنا شعب......وإنتو شعب

------------

على الحجار ... احنا شعب وانتوا شعب

http://www.youtube.com/watch?v=C3ILiv66Gio

[أبو محمد]

مش من بلدنا اللى باع الأمان

مش من ولادنا اللى اشتراه الشيطان

براء منه كلنا

براء منه أمِّنا

براء منه مصرنا

مش من بلدنا ولا من ولادنا

مش من بلدنا ياللى تهدر دمى

ولا من ولادنا ياللى تقهر أمى

ولاتعرف مدى حبنا

وقلوبنا على بعضنا

مش من بلدنا ولا من ولادنا

مش من بلدنا ولا انت ابدا ابن مصر

ولا من ولادنا حاربت يوم من اجل مصر

ولا فرحت لفرحنا

ولا حزنت لحزننا

مش من بلدنا ولا من ولادنا

مش من بلدنا ياللى تجرح بلدى

ولا من ولادنا ياللى تقتل ولدى

طالت جروح مصرنا

وصبر على جرحنا

مش من بلدنا ولا من ولادنا

مش من بلدنا اللى باع الأمان

ولا من ولادنا اللى اشتراه الشيطان

براء منه كلنا

براء منه أمنا

براء منه مصرنا

مش من بلدنا ولا من ولادنا

http://www.youtube.com/watch?v=zk_Be4fzOew

[أبو محمد]

إنهم يقتلون الجَمال

إنهم لا يطيقونه

إنهم يكرهونه

http://www.youtube.com/watch?v=LbESN8fxlvE&feature=youtu.be

[محمود تركى]

إنهم يقتلون الجَمال

إنهم لا يطيقونه

إنهم يكرهونه

http://www.youtube.com/watch?v=LbESN8fxlvE&feature=youtu.be

تاريخهم أثبت ذلك

[أبو محمد]

طال غيابك يا دكتورمحمود

طال غيابك يا أستاذ محمد

لعل المانع خير ان شاء الله

تذكرت هذا الموضوع عندما قرات إحدى روائع جمال بخيت

دين أبوهم إسمه إيه

دين أبونا يا مسلمين
في يقيني أعز دين
كلمة النور الأمين
كلمة الحق المبين
حكمة يكتبها الإله
فوق جبين الطيبين
دين أبونا يا محمد
انت سره ومبتداه
انت إحساسه ومداه
دقة عارفينها في قلوبنا
لما نخشع للإله
لما نطلب يوم رضاه
لما نركع لما نسجد
لما نفرح بالحياة

دين أبونا إبراهيم
رش جمر النار حنين
ع الخرايط والأماكن
اتولدنا طوافين
ذاكرين

دين أبويا لو مسيحي

رحمة لاجل العالمين
نصرة لاجل المظلومين
كلمة الحب اللي بايس
الصليب جوه الكنايس
ندهة الأجراس لمريم
والأمان للمجدلية
رحمة ليكو ورحمة ليا
المسيح شايل آلامنا

لاجل يهدينا السلامة
خد أيمن خد أيسر
العبادة مهيش كلام
عيش بإسم الإنسانية
وانسى نية ، تدفعك للانتقام

دين أبويا دين إلهي
أينما كان اتجاهي
حتى لو كان دين يهودي
احنا مش ضد اليهود
موسى في القرآن وليد
يحضنه نيل الخلود
بين إيديه تسعى عصاته
حية وجدودنا شهود
سحرة آمنوا برب موسى
انقسم له بحر عاتي

والجبل عرف السجود
رجعت الحية عصاية
حضنت التوراة وصايا
إوعى تقتل إوعى تسرق
إوعى تزني إوعى تقبل بالخضوع
بحر خير االكون يواتي
لما نفرد له القلوع
والجحيم ياكل سنينكم
لو فقير فيكم يجوع
الوصايا هي هي
أرتضيها زي ما هي
في ضميري وفوق شفاهي

دين أبويا دين إلهي
أينما كان اتجاهي
حتى لو كان مش إلهي
المجوسي يترعب من النار ويعبد
الإله اللي في خياله
ليه حرامه وليه حلاله
تسمعه في معبد دعاء
تلهمه رعشة رجاء
للبقر ناس يعبدوه
ويدينوله بالولاء
مش غباء
تعرفوا في البقرة إيه بيقدسوا ؟
العطاء

دين أبويا أي دين
فيه عصاة أو مخطئين
بس في نهاية المطاف
فيه ملايكة ومؤمنين
والرضا للصالحين
والهنا للصابرين
فيه ملاذ للعابدين الشاكرين
المشتاقين رغم الضياع لليقين

دين أبويا أي دين

اللي انا بقى معرفوش
الوحوش
الكروش
اللي لو طالوا رقابينا
بينهشوا مبيرحموش
دين أبوهم إسمه إيه ؟
اللي داسوا فوق رؤوسنا بالبيادة
اللي مشيوا بالبلاد للبلادة
اللي فتاويهم فساد للعقل
يقضى ع العبادة
اللي مسحوا من الآيات معنى الشهادة
دين أبوهم اسمه إيه؟

لوثوا الدم في عروقنا

سدوا عين الشمس فوقنا
سرقوا ضوءنا
صادروا نيلنا
ودفعونا تمن وضوءنا
دين أبوهم اسمه إيه؟
اللي باع وطن بحاله
خضرته وصفرة رماله
نسوته وشهوة رجاله
بهجته ودمه وعياله
خطوته وسنين نضاله
ثورته ضد احتلاله
دين أبوهم اسمه إيه؟

مين إلهه ؟
مين رسوله؟
فين كتابه؟
فيه ملايكة وللا غابوا؟
فيه شياطين وللا تابوا ؟
لما شافوا التابعين
شرهم زاد عن جهنم شر لا يمكن حسابه
دين أبوهم اسمه إيه؟

حتى فرعون اللي صدق
انه من نسل الإله
واللي قال انه الإله
كان بيبني الأهرامات للمات قبل الحياة
كان له بعث ويوم حساب
كان له دولة ، حضور ، إدارة
كان منارة ترشد الكون للحضارة
كان له جيش فارض وجوده
كان محارب بين جنود
واما يتجاوز حدوده
كان له رب يغرقه وينقذ يهوده
حتى فرعون اللي صدق
انه من نسل الإله
واللي قال انه الإله
كان له كهنة في العلوم
يقروا في كتاب الكواكب
يرصدوا سير النجوم
يفتحوا له سكك بيبان
في سراديب الزمان
ويقولولو ازاي يدوم
حنطوه
خلدوه
بالمعاني والمباني والرسوم
كانوا كهنة مؤمنين
خلوا كلمة مصر دين
حاضرة في العهد القديم
حاضرة في العهد الجديد
حاضرة في القرآن حضور
الآيات فيها تدور
مفردة عز وجلال
معلنة وبين السطور
تخترع
ثانية وشهور
تخترع شعر وبحور
حتى فلاحها الفصيح
شكوته بتشع نور

إيه يا مصر
إيه يا أرض الطبيبين
اللي حكموا في الزمان ده يبقوا مين ؟
دين أبوهم اسمه إيه؟
حد يعرف فيكوا دين
كل أتباعه لصوص أو قوادين ؟
في المعاصي مولودين
في الكراسي مأبدين
في التفاهة معدودين
في السفاهة مفرودين
ع البلاهة مسنودين
للشراهة مجندين
ع القرف متعودين
ع الشرف متمردين
ع الوطن متنمردين
بالخيانة موحدين
اللي يعرف دين كده يقوللي عليه
دين أبوهم اسمه إيه؟

[أبو محمد]

عرفتم ليه بنقول إحنا شعب وانتو شعب ؟

http://www.youtube.com/watch?v=N3G6vu1Y-vc&feature=player_embedded

[Salwa]

الجيش المصرى وهو يصلى .

الجيش المصرى هو الشعب المصرى .