رباعيات هشام (الجزء الثانى........)

[هشام الجنيدى]

العلم زى الشمس بتضوى فى الافلاك

والدنيا من غير شمس تبقى ظلام وهلاك

اسمع كلام العقل بلاش تكون جاهل

وقوم وبطل عبط روح افتح الشباك

فى من يشوف الخدوم علبه وعصير فيها

وشاليموه على جنبها وبيتشرب بيها

يفضل ماسكها فى اديه وهيه مليانه

ولما يخلص عصيرها عالارض يرميها

حكمه وقالها اسمه ايه وقولو كان على حق

مقبلش اعيش مسمار وفوق دماغى اندق

لو حد عنده البجاحه يستولى على حقى

انا برده عندى البجاحه انى اقول ميت لأ

فى من يعيش الحياه حاسس كده بنفسه

زى اللى وسط الضباب ميشفش غير نفسه

ماشى على القضبان وهوه مش دارى

وفجأه يظهر وراه قطر ويكون دايسه

ومن يعيش الحياه شايل هموم الناس

مع ان همه كافيه شايل عليه اكداس

تشوفه زى الازاز من بره مش باين

لكن لو توزنه تلاقيه فى تقل الماس

صدق بجد اسمه ايه فى اللى كان قاله

وهوه ماسك ربابه وبيغنى مواله

قال فى الحياه من البشر يجى الف صنف ولون

واللى يشوف حمل غيره بتخف احماله

ارجو انها تعجبكم وفى انتظار النقد.......... :ph34r:

[mohamed]

رائع يا أستاذ هشام بجد رائع

بس مفهمتش دي :ph34r: اول شطر مغلبني مش عارف افهمه

فى من يشوف الخدوم علبه وعصير فيها

وشاليموه على جنبها وبيتشرب بيها

يفضل ماسكها فى اديه وهيه مليانه

ولما يخلص عصيرها عالارض يرميها

[Cleo]

مش آن الأوان بأة نحط أيكون بيرفع القبعة ولا أنا يعنى أرد على مداخلات هشام إزاى...!!!! :ph34r:

clp::

[هشام الجنيدى]

اشكركم جدا على اطرائكم

وبقول حمد الله على السلامه يا كليو انتى اللى لازم يترفع ليكى القبعه لانك نورتيناا تانى.............

اما يا استاذ محمد معنى الرباعيه الاولى....

ان هناك من ينظر الى الشخص الخدوم نظره استغلال فقط عندما يحتاجه فى امر من الامور مثلما ينظر العطشان لعلبه من العصير

وعندما ياخذ منه ما يريد يمضى ويتركه بلا ادنى اهتمام او كلمه شكر كمن يرمى علبه العصير الفارغه بعدما يرتوى بما كان فيها........

ارجو ان تكون الفكره واضحه

وشكرا لكم جميعااا.................. cr((:

[mohamed]

شكرا للتوضيح يا استاذ هشام

cr((:

فى انتظار الجزء الثالث

[مهيب]

هشام ... رباعياتك حلوة قوى ... قوى .. جدا ...

العلم زى الشمس بتضوى فى الافلاك

والدنيا من غير شمس تبقى ظلام وهلاك

اسمع كلام العقل بلاش تكون جاهل

وقوم وبطل عبط روح افتح الشباك

روعة بجد .. فكرتها و السياق .. حتى انتقاء الكلمات ...

حكمه وقالها اسمه ايه وقولو كان على حق

مقبلش اعيش مسمار وفوق دماغى اندق

لو حد عنده البجاحه يستولى على حقى

انا برده عندى البجاحه انى اقول ميت لأ

ملكة متوجة بلا شك .... هنا فعلا الدليل على اننا قصاد واحد محترف عامية ... تعبيره عن فكرة الاعتراض بالبجاحة جاء موفقا الى أبعد الحدود ...

فى من يعيش الحياه حاسس كده بنفسه

زى اللى وسط الضباب ميشفش غير نفسه

ماشى على القضبان وهوه مش دارى

وفجأه يظهر وراه قطر ويكون دايسه

بصراحة معجبتنيش قوى .. يعنى مش على نفس المستوى .. بيتهيألى انها محتاجة لاعادة صياغة مش أكتر ... خصوصا ان الشطرين الأول و التانى كانت النهاية كلمة واحدة هى (نفسه) .. و الرابع كلمة (دايسه) ... مش عارف بس موسيقتها مش واضحة قوى

لكن بجد يا هشام ... انت فعلا ملك العامية هنا ... خصوصا انى عارف قد ايه صعب كتابة الرباعيات ... يمكن الواضح جدا غير امتلاكك للعامية ... هو الأفكار .. أفكارك روعة

[هشام الجنيدى]

اشكرك جدا يا اخ مهيب على اعجابك بما اكتب

اما بالنسبه للرباعيه اللى مش عجباك انا متفق معاك لابعد حد فى انها عازه صياغه وانى كتبتها فعلا بسرعه ولم انظر لها مره اخرى..........

وعاجبنى جدا ملاحظتك الدقيقه لتلك الاشياء التى قد يغفل عنها البعض........

وفى انتظار جديدك ........

وشكرااااااا........ :)

[رعد الاسكندرانى]

وعجبى.........

وكمان ..........عجبى حاسس انى واقف قدامك يا هشام جاهين

واتمنى تكون زى شاعرنا المحبوب صلاح جاهين الله يرحمه...

وفى انتظار الجزء التالت والرابع والخامس..............والخ

[Salwa]

تعرف ياسيد جنيدى سر نجاح رباعياتك ايه ؟؟

مش علشان مكتوبة بكلام لايق على بعضه وفيه سجع او غيره ...

لالالا.ولا حتى ان فيه فكرة وبتقول حاجة ...مع انها كدة ..

سر انتظارنا للرباعيات ونجاحها هو انك بتكتبها بحب ..بتكتبها وانت حاسس بيها .

حتى لو الكتابة دى صنعتك ....فيه فرق انك تكتب علشان تاكل وفرق انك تكتب علشان بتستمتع .وانت بتكتب ...بتكتب الكلام بس اللى انت حاسس بيه مش اللى انت بتفكر فيه ..

وعلشان انت بتكتب بحب برضه الكلام بيوصلنا بكل الحب ..

انا مش حنقولك .......خيام...ولا حنقولك... جاهين...

حنقول .....كمل ياجنيدى ....

[هشام الجنيدى]

بجد انتى رائعه يا مدام سلوى

كلامك بيحملنى مسؤليه كبيره جدا وفى نفس الوقت بيشجعنى على الاستمرار ..................

وفعلا انا كل كلمه كتبتها فى الرباعيات دى نتيجه شعور يلح عليه انى اكتبها

لانى بتستفزنى مواقف وطبائع بعض البشر اللى بتعامل معاهم

وفعلا انا قابلت اصناف البشر دى كلها فى حياتى واتعاملت معاهم

اتمنى ان اظل اكتب بحب وان يظل شعرى موجها للقلب دائما وابدا

وانا شرفنى اننضمامى للمنتدى ده حقيقى ...........

وشكراااااااااااااااااا...................... lo:: hypr:

[amr_elnagi]

هشام الجنيدى

جميل جدا ما نثرته اناملك الذهبية واغلب الظن ساكون من متابعيك

لك منى خالص ود وتقدير

عمرو الناجى

[هشام الجنيدى]

من دواعى سرورى ان تكون من متابعى اعمالى المتواضعه

يا اخ عمرو

واتمنى ان ارى اعمالك الجديده قريبا.......... hypr:

[shahd]

بجد راااااائع فعلا استااااااااذ

[هشام الجنيدى]

اشكر لك اهتمامك بمتابعه اجزاء رباعياتى يا اخت شهد واتمنى ان يعجبك كل ما اكتب

وشكرااااااااا :)