نجيلة صناعية لملاعبنا..ده معقول!!

[Masrawy Abroad]

قرأت مؤخراً خبر ان الاستادات التي ستقام عليها بطولة كأس الأمم ها تتفرش بالنجيلة الصناعية نظراً لرخص تكاليف صيانتها عن النجيل الطبيعي!

ولحد هنا ما كملتش عشان ما يجيليش ضغط يموتني

معقول الكلام ده؟؟؟؟

مصر بلد الطينة السوداء والطمي وحتى الرملة الصفرا والنيل والميه مش عارفه تزرع نجيلة استاد وتحافظ عليها؟؟

وهل القرار ده مدروس ولا قرروها في قعدة عشاء مع صاحب شركة لاستيراد النجيل الصناعي في مصر؟؟؟

طيب وبعد كده فرق الدوري ها تلعب عليه بقى ولا ايه؟

طيب ازاي الكلام ده؟؟ دا الأهلي راح يلاعب اتحاد العاصمة في الجزئر على نجيلة كانوا مرعوبين جدا وصدعوا دماغنا بالنجيلة الصناعي واننا مش متعودين عليها ويبعتوا جاسوس يعاين ارض الملعب في الجزائر ويروحوا ملعب الهوكي بتاع الاستاد...وييجوا من ملعب الهوكي .... وفي الاخر لعبوا الماتش وكسبوا وقالك برضه النجيلة اثرت على أدائنا كتير.....

أنا مش فاهم حاجة الصراحة...

[se_ Elsyed]

معقول الكلام ده؟؟؟؟

مصر بلد الطينة السوداء والطمي وحتى الرملة الصفرا والنيل والميه  مش عارفه تزرع نجيلة استاد وتحافظ عليها؟؟

وهل القرار ده مدروس ولا قرروها في قعدة عشاء مع صاحب شركة لاستيراد النجيل الصناعي في مصر؟؟؟

طيب وبعد كده فرق الدوري ها تلعب عليه بقى ولا ايه؟

لأ يا مصراوي إنت فاهم الموضوع غلط يا ولدي ...

تعالى جعمز إهنيه وانا أفهمك ...

النجيل الصناعي يختلف تماماً عن ما في ذهنك ..

اللي لعب عليه الاهلي هو ترتان وده عامل زي السجاجيد اللي داخل فيها بوليستر وحاجات من دي يعني زي الموكيت كده .. وما بيتلعبش عليه أصلاً إلا مباريات الهوكي بس الجزايريين وشعب المغرب العربي الأذى بيجري في دمهم .. مع ان البتاع ه يكاد يكون إنقرض تماماً من ملاعب كرة القدم في العالم .. لكن المؤذيين قالوا إحنا نستدرج الاهلي ونلبوا 5 زي ما عملوا في نادي الاوليمبي الليبي لكن السحر إتقلب على الساحر والأهلي لبهم على قفاهم ...

اما النجيل الصناعي فهو اللي بيتزرع في المشاتل وبييجي على هيئة رولز ملفوفة وبيفردوها على قد الإستاد ... زي إستادات أوروبا كده، هما فاضيين يابا يجيبوا عم حنفي الجنايني ويقعد يحط سباخ ويسقيه ميه .. وبعدين النجيل الصناعي بتبقى صيانته سهلة جداً والحتة اللي بتتقطع او بتدوب بيجيبوا بدالها بسهوله..

الاعجب من كده واللي ماكناش مفاجأة بالنسبة لي بصراحة هو إن مصر كلها كانت عارفه إننا هاننظم كأس الامم الأفريقية في يناير 2006 من كذا سنة من ساعة ما وقع علينا الإختيار ، وكالعادة وحيث إن الصفر يجري في أجسادنا مجرى الدم في العروق فلحد شهر فات ماكانوش عملوا لجان للإشراف على البطولة أو تجهيز الإستادات ..... أرجوك صدقني وماتعملش في نفسك حاجة ...

والإستاد اليتيم اللي عندنا صرفوا عليه لحد دلوقت 80 مليون ج ومقفول من يناير 2004 علشان الإصلاحات :) :) .. وده بالظبط عامل زي لا مؤخذه الست العجوزة اللي عندها 90سنة وباعتينها مراكز التجميل اللي في فرنسا عشان يصلحوا فيها ما أفسده الزمن ( زي الصبوحة كده ) ... لكن الرك على الأساس فطالما الأساس بايظ يبقى والله لما تصرف عليها مليار مش 80 مليون .. وكان اولى بالفلوس دي إنهم يبنوا إستاد جديد على ميه بيضا في الصحراء المترامية الاطراف اللي عندنا ( 95 % ) من مساحة مصر

المهم انا جايلك في الكلام ( قول تعالى ؟ ) نعمل إيه ونروح فين ونيجي منين إذا كان كل يوم وزير الشباب بيتغير وإجري يا جدع وحلق يا عم ده البطولة فاضل عليها أقل من 9 شهور ...

بس لقيناها يا واد إنت وهو ، إحنا نستعين بجنودنا الأشاوس ونسحبهم من الخطوط الامامية عشان ينظموا كأس الأمم ..

وراحوا من كام يوم أسندوا تصليح الإستادات اللي تكسف وبقت أشبه بأرضيات ملاعب رواندا ودارفور وام درمان للقوات المُسلحة وسلموهم الإستادات بالفعل... وعظيمة يا مصر يا أرض النِعم

في حين إني ذكرت قبل كده إن النادي الأهلي هايحتفل سنة 2007 بمرور 100 عام على تأسيسه وبدأ بالفعل من بداية السنة دي في توضيب كل شيء وعدم ترك أي حاجة للظروف والجوابات والمراسيل ...

يا عزيزي إحنا كبيرنا ننظم كأس الدورة الرمضانية لمركز شباب عزبة النخل ... ويا عالم هاننجح ولا لأ ؟

طول ما في عقول بتفكر على طريقة أمنحتب الثالث والبشوات العثمانليين ...

طب اتحدى مسئول مش مسئول في وزارة الشباب إنه يقولي البعثات اللي جايه من كل فج عميق تحضر البطولة بعد كام شهر هاتنزل في أنهي فنادق عندنا ؟

تعرف يا مصراوي كام عدد سكان الكرة الارضية اللي هاتتنقل لهم تلك البطولة حية على الهواء ؟

4 مليار مشاهد .....

طبعاً تلاقي المسئولين عندنا فاكرين إن اللي هايشاهدوا المباريات دي هم سكان محافظتي القاهرة والجيزة والحدود الشمالية لمحافظة القليوبية ...

يا راجل دول عالم متخلفة وما يستاهلوش أي خير وكل همهم النهب والتهليب لو في سبوبه كده ولا كده بامارة ال 40 مليون بتوع ملف الصفر ..

اما إنهم يعملوا حاجة لمصر فهياهات هيهات ..

هما بس يوضبوا الإستاذ على أحسن ما يكون لو الريس رايح يحضر أسبوع شباب الجامعات ( فينك يا فيولين )

او لو كان في إحتفالات نصر السادس من اكتوبر العاشر من رمضان ..

غير كده يبقى كتير عليهم ..

[kotoz9]

كلام صحيح ....لا أحد يهمه سمعة مصر ولا أحد قادر على تحمل المسئولية...بس اللى يغيظك كل شوية يقولوا كل حاجة تمام واحنا فى عهد حسنى مبارك راعى الرياضة والرياضيين......الى اخر الكلام الاهبل ده.

ربنا يستر وينجى مصر من ايديهم

[Masrawy Abroad]

الله يكرمك يا معلم إس إس يا دولي يا فاهم....اسمح لي أقولك يا عمي (الله يرحمك يا حشو) :)

إنت صححتلي المعلومة كده....تصدق بالله إن على كده بقه الجنينة اللي تحت العمارة اللي ساكن فيها جابولها النجيل الصناعي ده من فترة فعلا وانا ماعرفش انه هو ده النجيل الصناعي ...وكان رولات فعلا وفرشوه وخلاها يابا بقت جنينة في نص ساعة زمن واشتغل زي النار وبقى اخضر مزهزه كمان..بس للاسف حتة حتة برضه...شوطة واحدة ممكن تطير رول.... :)

أخر اخبار الاستاد الحزين انهم لسه ماركبوش ولا كرسي من أصل 79 الف كرسي ها يتركبوا...!!! ولسه فيه شغل في الحمامات وغرف التعليق والمراسلين ومازالت على المحارة... والعهدة على موقع (في الجول) وكمان الموقع مدعم كلامه بالصور.

[se_ Elsyed]

....تصدق بالله إن على كده بقه الجنينة اللي تحت العمارة اللي ساكن فيها جابولها النجيل الصناعي ده من فترة فعلا وانا ماعرفش انه هو ده النجيل الصناعي ...

يا عم مصراوي الدنيا كلها بتعمل كده دلوقت ... بس إحنا لسه عايشين في العصر الحجري .

أخر اخبار الاستاد الحزين انهم لسه ماركبوش ولا كرسي من أصل 79 الف كرسي ها يتركبوا...!!! ولسه فيه شغل في الحمامات وغرف التعليق والمراسلين ومازالت على المحارة

مش عايزين حجج وكلام مالوش لازمه ..

اللي بيحب الكوره ممكن يشجع وهو واقف على قدميه لحد ما يجيلوا دوالي ..

وإن كان على الحمامات مش لازم يا سيدي يشربوا سوايل ... وبعدين محلوله .. ممكن يصرفوا واحدة بامبرز لكل مشجع مع التذكرة ومنها تبقى دعاية للشركة المُنتجة ومنها توفير للحمامات والميه والصابون .

غرف التعليق ... مالهاش لازمه .. كُرسي بشمسية جنب خط الوسط وعيش والكوره مع احمد واحمد معاه الكوره ...

اما المراسلين ماهو طول عمرهم بيقفوا ورا الجون أهو منها يبقوا قريبين من الاحداث ومنها صورهم تطلع في التلفازيون ...

وعاشت مصر حلوه مستقره .

[Sherief AbdelWahab]

أضف:

في النقل التليفزيوني تلاقي حاجات تنرفز ، كل وحدة تصوير تتصرف كأنها وحدة فيديو أفراح بلدي ، شكل الإخراج يتغير تماماً من مخرج لآخر ومن وحدة لأخرى .. وهذا لا يليق ببطولة محترمة..

إن كنت محظوط اتفرج على ماتش مصر وليبيا ، كان فيه إحصائيات صح ، وحاجات حلوة بالكمبيوتر على الشاشة مش زي الباور بوينت بتاع بعض المخرجين التانيين..

وبمناسبة الصفر وشر البلية ما يضحك..

المجلس الشعبي المحلي لمدينة الإسكندرية احتج على عدم إقامة المباريات على ستاد الإسكندرية القديم في الشاطبي في وسط البلد وإقامة المباريات في ستاد حرس الحدود البعيد عن وسط البلد..

والغريب إن الاستاد اللي جنبهم في وسط البلد في حالة مزرية من كذا سنة ، من قبل ومن بعد 2010 ، وما حدش من المجلس الموقر طلب من مجلس الشعب تحسين حالة الاستاد التعبان طحن ، والأكادة إنهم اصطحبوا لجنة تفتيش 2010 للاستاد اللي في وسط البلد مش حرس الحدود ، وكل خلق الله في اسكندرية وغيرها ما كانش ليهم كلام إلا عن ستاد برج العرب اللي مش في وسط البلد على أساس إنه ح يستضيف نصف نهائي كأس العالم!.. ومش مهم ستاد اسكندرية..

hypr:

خلص الكلام

[mnman]

الموضوع بيفكرني بواحد عندة طفل عمرة خمس سنين غاوي شخبطة علي الحيط!! والاب والام يابني ياحبيبي !! ياحبيبي يابني!!! مفيش فايدة!! يمين شمال مفيش فايدة!!! ضرب مفيش فايد!! الواد نازل شخبطة!!! الاب يدفع دم قلبة للنقاشين !! ومفيش فايدة!! في الاخر زهق الاهل وتركوا الحبل علي الغارب!! طبعا صاحبنا الفنان الصغير قام بالواجب وزيادة!!!! وهوب في ضيوف مهمين جايين!! الاب يأجل ويأجل وياجل لحد مخلاص مفيش وقت ولازم يوضب البيت الضيوف جايين!!! السؤال هنا!!!

الواد المدوحس حيحترم نفسة قدام الضيوف ويسيب الحيطان في حالها!! طيب لو احترم حالة قدام الضيوف بعد مايمشوا حيحترم نفسة!!!! طبعا لا!!!

دة حالنا حاليا !!البلد مفلسة و الحكومة بتسرق !!! وفي نفس الوقت غير مهتمة بنظافة او تطوير اي مرفق عام لآن الشعب في نظرهم هو الطفل ذو الخمس اعوام!!! و لية اصرف علي شعب همجي حيخرب الحيطان ويكتب " حودة الشرس" و "حمو يحب الاهلي اوي" و " الزمالك مدرسة" !!!!

رهان ياسادة ان الملاعب والمدرجات بعد البطولة حتكون ولا سوق الكانتوا!!! طيب دة انا في اخر زيارة لمصر السنة الماضية شوفت خير الله ام اجعلة خير "كبري" شكلة قديم وعفا علية الزمن!! بس المكان دة مكنش في كوبري!! قلت في عقل بالي جايز مش فاكر!! سألت قالولي دة كبري مكملش سنة!! مصدقتش نفسي سنة واصبح بالمنظر دة فين الصيانة غلطة الحكومة!!! طيب لية الناس بترمي علية وتحتة الزبالة !! لية بيكتبوا علي الجدران!! لية بيكسروا اغطية العمدان!! ولية ولية ولية!!طيب ولية الحكومة تدفع للصيانة لو النتيجة حتكون كدة!!

السبب ان مصر مليانة بشر لايهتمون غير بمكان اقامتهم فقط!! دة اذا اهتموا بية اصلا!!! ومفيش توجية!! تلاقي الام تبص للابن شزرا وتقولة لية ماسك الورقة في ايدك ارميها يالة!! يقوم الطفل رامي الورقة في الشارع!! وتثني علية الام بكلمة "شاطر يابابا!!!!

الموضوع مش الحكومة بس!! الشعب ايضا مشترك في المصيبة!!

ياسادة الاغلبية عندنا شعب غير حضاري!!!

منمان المهموم!!

[se_ Elsyed]

إن كنت محظوط اتفرج على ماتش مصر وليبيا ، كان فيه إحصائيات صح ، وحاجات حلوة بالكمبيوتر على الشاشة مش زي الباور بوينت بتاع بعض المخرجين التانيين..

إنت تقصد الماتش اللي كان في طرابلس ....

إوعى تقول إللى كان في مصر أحسن قلبي يغضب عليك ..

إيه اللي كان صح ...

الجون التاني اللي أحرزه عماد متعب والمُخرج مُصور الأفراح عمال يعيد ويزيد في الهدف الأول والدنيا مولعه وهو ولا هنا ؟

ولا مناظر الأمن المركز وهما بيعجنوا في جماهير ليبيا بعد ما أحرزوا الهدف وحاولوا المساكين يعبروا عن فرختهم وده ذنب نعتبره خروج عن القانون ولازم نسحلهم ...

يا عزيزي شريف كل الجيل الموجود من المخرجين وأولهم محمد نصر والمذيعين وأولهم أحمد شوبير زي ما قلت قبل كده عايزين يترموا في أقرب بلاعه جنب الإستاد .

باتمان كتب

البلد مفلسة و الحكومة بتسرق

ُأي بُني .... بالتأكيد أنت لا تقصد مصر

فهل هناك بلد مفلسه يتسرق من بنوكها أكثر من 12 مليار جنيه تحت سمع وبصر الحكومة ؟

وهل هناك بلد مفلسه يسمحوا لحاجة إسمها شركات نهب الأموال ( توظيف الأموال سابقاً ) وتستولى على مليارات وتحويشة عمر الشعب ويخلعوا ؟

وهل هناك بلد مفلسه فيها كمية الشاليهات والقرى السياحية اللي موجودة عندنا ؟

وهل هناك بلد مفلسه تبيع شركات ومصانع القطاع العام بمليارات وحكومتها تضرب على الفلوس دي العوافي ولا تُعلن هما باعوها بكام ولمين وعملوا بالفلوس إيه ؟

السبب ان مصر مليانة بشر لايهتمون غير بمكان اقامتهم فقط

مش صحيح يا عزيزي ... فالحكومة هي السبب ... إذا كان رب البيت بالدف ضارباً ... فأهل البيت هاتلاقيهم ماسكين صاجات ... إذا كانت الحكومة مستهترة وحراميه ( بالبلدي ) فلا تتوقع أن يكون الشعب ملائكة ...

وإذا كنت نادراً ( في الإحلام ) لما تلاقي شارع سليم في مصر ومافيهوش مطبات ولا حفر ولا بلاعات مفتوحة .. يبقى متوقع من الشعب إن يكون قلبه على البلد ؟

وإذا كنت ممكن يصل بك الأمر إنك تلف وتدور وتبحث في بلدنا العزيزة شمالاً وجنوباً ولا تجد سلة مهملات في الشوارع صالحة للإستخدام وده ببركة الحكومة النظيفة ... يبقى متوقع إيه من الشعوب ؟

يا أخي إنت عايش معانا في دول الخليج وشايف إن عندهم زي عندنا شركات نظافة محترمة مخليه الشوارع تبرق وبيندفع لهم مبالغ مقابل عقود الصيانة ...لكن شركات شغاله صح وتُحاسب حساب الملكين فبالتأكيد تلك الشركات بتحافظ على أكل عيشها ... فالناس بتتكسف على دمها وما بتلاقيش واحد يستجرى يرمي عقب سيجاره عشان الحكومة قدوه له ...

عزيزي باتمان ... بعد التحية ... إحمد ربنا إننا لسه عايشين ببركة ربنا وببركة دعا الوالدين ...

تصبح على خير ...

[mnman]

حبيبي سي السيد : اختلف معك في الرأي تماما!!! فالنظافة و احترام الناس شئ ينبع من الانسان نفسة وليس لة علاقة بالحكومة!!! بمعني لو ان واحد مصري في دول الخليج لا يرمي ورقة في الارض لكن في مصر لايجد حرج حتي لو الشارع في اشد حالت القذارة!! يكون الفعل غير نابع من نظافة شخصية بل نابع من خوفة من ان حد يشوفة ويمكن يئنبة او حتي شرطي يحكي معاة او غرامة يدفعها !! يعني محتاج رقيب !! لان في مصر زي انت مقلت الحكومة مش فرقة معاها فالناس مش فارقة معاها!! وهذا لايعني ان الشعب بطبعة محافظ علي النظام والنظافة!!!

وكما يقول المثل المنامني::: النظيف نظيف ولو كان في عايش علي الرصيف!!!

عمي وحبيبي: انا بتكلم عن ام زنوبة و ام فتكات وعبدة السنكري و سعيد فلة!! هل تعتقد ان هذة الانماط من الشعب تفرق معاها الشارع نظيف ام لا!! في صفيحة قمامة ام لا!!! سواقين الميكروباسات و العربجية و البائعين المتجولين ووووووووووووووووووووووووووووو.......... تعتقد تفرق معاهم!!!

النظافة شئ تتعلمة من اهلك و مدرستك!! انظر الي المدرس ووضعة الاجتماعي المزري هل تعتقد انة حيركز علي النظافة ولا الدروس الخصوصية الي بالطبع حتنضف منزلة!!!!

وكما يقول المثل المنامني الثاني: لقد دب العطب في كل قفص البرتقال!!! ابوسرة و سكري وبلدي و شعب وحكومة!!!

القضية ياابوالسيد: قضية خصال وطباع متأصلة فينا من قديم الزمان!! لن يغيرها شارع نظيف او صندوق قمامة!!!!

المثل المنامني الثالث: لما جذر الشجرة بيموت.. الافرع لا يضرها الوقوع علي الارض!!!!

منمان المهموم!!!

[عبد الرحمن الداخل صقر قريش]

السلام عليكم و رحمة الله و بركاته

أستاذ / Se ELsyed هل يمكنك مساعدتي أو تدلني على مواقع إلكترونية أو شركات متخصصة في صناعة النجيلة الصناعي لأنني عايز أشتري نجيلة صناعي لعمل ملعب نجيلة صناعي فهل يمكنك مساعدتي في هذا الموضوع بشكل ضروري جداً .

و هذا بريدي الإلكتروني لتخاطبني عليه و أنتظر منك الرد سريعاً : ahmedvamp@hotmail.com :lol: :lol:

و لك جزيل الشكر :rolleyes: B)

عبد الرحمن الداخل ( صقر قريش )

[kokowawa1979]

إنت مكانك فين يا أخ عبد الرحمن ؟؟؟

لك إن شاء الله في السبوبة دي يا سي السيد - ماتقلقش - إحنا جدعان برضه

[عبد الرحمن الداخل صقر قريش]

السلام عليكم

أنا من مصر من المهندسين و أعمل في النادي الأهلي في التنسيق لكرة القدم و أرجو أن يساعدني أحد في هذا الموضوع بسرعة كبيرة

عبد الرحمن الداخل ( صقر قريش )

[kokowawa1979]

أنا من مصر من المهندسين و أعمل في النادي الأهلي في التنسيق لكرة القدم

شفت يا سي السيد الحظ !!! لأ وفي النادي الأهلي !!!!!

أخي الفاضل عبد الرحمن - إسأل على سعر المتر المربع في مصر كم أولا - لإن مصدري من الإمارات - وبمقارنة الأسعار ببعضها - يمكنني إمدادك بكافة المعلومات - هناك شركات متخصصة أيضا بالسعودية . وأستطيع أن امدك بالمصدر الخاص ببذور الباس بلم الخاص بنجيلة الملاعب - حيث يمكنك تربيتها عندك - ونقلها وقتما تريد .

المشكلة الكبيرة بس يا أخي عبد الرحمن : كيف يساهم كوكو واوا في تحسين مواصفات ملاعب الأهلي - وهو عايزها كلها تبقى نقر نقر :lol:

[عبد الرحمن الداخل صقر قريش]

السلام عليكم يا أستاذ كوكو واوا

خذ هذه الأسعار التي توصلت لها : أو ل حاجة إحنا عايزين النجيلة إلي سمكها 6 سم لأنها أنظف حاجة في النجيلة الصناعي سعر المتر المربع بتعها بالمصري 23 يورو أي تساوي بالمصري 178 جنيه ده النجيلة أما الأرضية التي توضع تحتها سعر المتر المربع بتعها 40 جنيه

بس رد عليا بسرعة جداً لو سمحت

عبد الرحمن الداخل صقر قريش

[م الغزالى]

السلام عليكم يا أستاذ كوكو واوا

خذ هذه الأسعار التي توصلت لها : أو ل حاجة إحنا عايزين النجيلة إلي سمكها 6 سم لأنها أنظف حاجة في النجيلة الصناعي سعر المتر المربع بتعها بالمصري 23 يورو أي تساوي بالمصري 178 جنيه ده النجيلة أما الأرضية التي توضع تحتها سعر المتر المربع بتعها 40 جنيه

بس رد عليا بسرعة جداً لو سمحت

عبد الرحمن الداخل صقر قريش

سؤال للأخ عبد الرحمن

هل لدينا متخصصيين فى تركيب مثل هذا النجيل الصناعى ؟

حسب معلوماتى أن كل نوغ من الإستخدام له نوع الحشيشة و تقنية الطبقة التى تحته و عدد الثقوب لصرف المياه وخلافه ! بمعنى أن أرضية الجولف غير أرضية ملعب كرة قدم

أيضاُ لون النجيلة و نوعها بيختلف فى الإستخدام الواحد وفى حالتنا هذه كرة القدم أعتقد أنه بيتحسب معدل الإستحدام السنوى للنجيل بالساعات و غالبا ما تكون 2000 ساعة غلى الأقل سنوياُ فى المتوسط

عموما فيه أنواع أوصى بها الفيا أعتقد أنها :

وهذا هو أفضل نوع فى الملاعب الأوروبية DD Challenge Pro²

DD Challenge Pro

DD GrassMaster

DD SoccerGrass TD60

DD SoccerGrass TD50

DD SoccerGrass 3/8

DD Soccrilan

DD Crown Soccer

تقبل تحياتى

تم تعديل 7 مايو 2007 بواسطة م الغزالى

[kokowawa1979]

أخونا م. الغزالي أعطاك الخلاصة أخي عبد الرحمن - أذكر جميع المعلومات الوافيه - التي تفضل بها الأخ غزالي - وإن شاء الله سيكون السعر ارخص بكثير بعد شحنه إلى مصر من الإمارات . فقط أذكر المواصفات المطلوبة وكما حددها أخونا غزالي - وإن شاء الله قد أساعدك كثيرا في هذا الموضوع .

سببوتك إنت كمان محفوظة يا أستاذ غزالي :rolleyes:

[م الغزالى]

,والله أخى العزيز كوكو إن كان على عاوز ألغى الكورة المصرية دى من على الخريطة بس علشان خاطرك بلاش !

الحقيقة إن الموضوع ده مش سهل بالفغل لآن أحياناُ تجد من يقول لك ياعمى هى كيميا وعلى طريقى الفهلوة المصرية وفتح الصدر رغم إن الموضوع ده صناعة ودراسات بالفعل كبيرة لذا تجد ملعب كرة القدم هنا يتكلف 340 الف يورو على الأقل وتقوم به شركات متخصصة ولكن فى المقابل هناك ضمان وصيانة و أى مشكلة تطرأ تكون على حساب الشركة مع دفع التعويض فى حالة أى أخطاء

لو تخيلنا أن العامل الذى يقوم بتخطيط أرض الملعب بيكون دارس هنا حاجة زى دبلوم صنايع ولكن يقضى 75 بالمائة من دراسنه عملى حتى يسمح له بممارسة مثل هده المهنة وقس على هذا باقى العملية

خلص إنت بقى فى العملية ... !!! شئ عجيب زملكاوى ماله ومال أرضية الملعب للنادى الأهلى إلا إذا كان عاوز يحط سحر أفريقى تحت النجيل !!!

:rolleyes:

تقبل تحياتى

[عبد الرحمن الداخل صقر قريش]

جزاك الله خيراً يا أستاذ م. الغزالي

و لكني أسأل عن شئ محدد : و هو ما سعر المتر المربع من النجيلة الصناعي التي سمكها 6 سم لأن هذا أفضل نوع

و أريد أن أعرف الأسعار الخارجية لأنني أعرف أسعار مصر و قد وضحت ذلك و أنتظر ردودكم و رد كوكو واوا

عبد الرحمن الداخل

[م الغزالى]

جزاك الله خيراً يا أستاذ م. الغزالي

و لكني أسأل عن شئ محدد : و هو ما سعر المتر المربع من النجيلة الصناعي التي سمكها 6 سم لأن هذا أفضل نوع

و أريد أن أعرف الأسعار الخارجية لأنني أعرف أسعار مصر و قد وضحت ذلك و أنتظر ردودكم و رد كوكو واوا

عبد الرحمن الداخل

تقصد طولها 6 سم

طيب إنت غاوز كام متر علشان لما أسأل عن عرض يأخ عبد الرحمن هو مش محل قماش بكام المتر

كام منر مربع عاوز

[عبد الرحمن الداخل صقر قريش]

إرتفاعها 6 سم و ليس طولها

أنا محتاج 16 ألف متر مربع