كفر الصنايده

[daktara]

كفر الصنايده

أهل الكفر ملتفين حول احد الافراد و هو ينشد

عم شمروخ قام و قال يا ولاد بلدنا

الوزير فى الانتخاب طالب ودادنا

لو ساندناه واديناه اصوات ولادنا

قال حيبنى لنا مصليه بمادنه

ياللا ندعى له ف ركوعنا و ف سجودنا

واحد: ربنا يعلى مراتبك يا وزير

ربنا يخليك وتترقى مدير

آخر: بسى عايزين للمصليه حصير

وابقى عينِى على المادنه غفير

شمروخ: ياللا قوموا يا شباب كفر الصنايده

ابدءوا الحمله و هاتوا البت عايده

واحبسوها فى الدّرَك من النهارده

اصلها بتعمل دعايه للمعارضه

الجميع:المعارضه المعارضه

ياللا قوموا يا شباب كفر الصنايده

افتحى الباب يام عايده

افتحى الباب يام عايده

أم عايده: دهده دهده ايه جرى ياهل الصنايده

واحد: هى فين البت عايده

الجميع:أيوه فين البت عايده

أم عايده:عايده نايمه...اصلها بعافيه النهارده

إيه الحكايه؟ مالها بنتى؟ مالها عايده؟

واحد:احنا مش ناقصين مناكفه او مناهده

أم عايده: لازم اعرف انتوا ليه عايزينها عايده

واحد: عايده بنتك عضو بارز فى المعارضه

أم عايده: المعارضه؟ طب وايه هىَ المعارضه؟

واحد: لما شعبان كان حيتقدم لعايده

عايده وافقت ولا قالت يومها لأ؟

أم عايده: الحقيقه عايده قالت الف لأه

واحد: طب وايه الفرق بين لأ و معارضه

أم عايده: طب وايه دخل الجوازه فى المعارضه

آخر: فى السياسه لأ معناها المعارضه

أم عايده: ليه كده بسى يا عايده

ليه كده بسى يا عايده

واحد: كتّفوها ياللا يا شباب الصنايده

سكُّوا ياللا الباب ده ما بقاش منُّه فايده

أم عايدهاه يا خيبتك يام عايده

اه يا خيبتك يام عايده

---------------------

المشهد لشمروخ بين مجموعه من اهل الكفر

------------------------

شمروخ: قوم يا منسى و بيع فى سوق الكفر بطّه

وانزل البندر و هات كام متر بفته

وابقى عدِى وانت راجع م المحطه

قول لسيّدنا يسيب شغله ويفضى

لاجل ما يخطط بايده الحلوه يافطه

وابقى قول له يحط بالخط الكبير

يا رفاق الحاج شمروخ الخُضير

بايعوا بالدم مولانا الوزيــــر

صاحب المبدأ وابو القلب الكبير

واوعى تنسى تحط جنب اليافطه زير

واللى يشرب يدعى لىَّ و للوزير

----------------------

المشهد فى كُتّاب القريه

----------------------

سيّّدنا: شَ .. فَ .. طَ ( شفط)

الأولاد: شَ .. فَ .. طَ ( شفط)

سيّّدنا: زَ .. لَ .. طَ ( زلط)

الأولاد: زَ .. لَ .. طَ ( زلط)

منسى: يا سيّدنا يا سيّدنا ليك رساله م الخُضير

سيّّدنا: واد يا منسى .. مال كلامك ليه كتير؟

منسى: انت بتكسّر كلام الحاج شمروخ الخضير؟

سيّّدنا: انت بتغلطنى ليه؟ .. حطها لى ع الحصير

انصراف ... بعد بُكره وقفه العيد الكبير

واد يا صابر ... هات معاك بكره الفطير

وانت يا مرعى .... ما تنساس العصير

اما زنوبه ..... حسابها عند سيدنا عسير

وهم يهرعون خارج الكتّاب

الأولاد: الدبه وقعت فى البير .. وصاحبها راجل خنزير

سيدنا قزعه وقصير.. وبيلبس فى الصّيف كشمير

سيّّدنا: آه يا بلد عمدتها كان سلاّخ حمير

آه يا بلد ... آه يا بلد ملهاش كبير

ثم ينادى على زوجته:

يام كسّاب .... يام كسّاب

هاتى حبة زهره من فوق الدولاب

ام كسّاب: ختّ من منسى الحساب؟

سيّّدنا: الحساب يوم الحساب

ام كسّاب: انت هاتجيب لى الخراب

سيّّدنا: الله خد الله جاب

ام كسّاب: طب ما تكتبها بهباب

سيّّدنا: تبقى آخرتنا هباب

ياللا هاتى الزهره من فوق الدولاب

ثم يقرب الورقه من عينيه لقراءة ما بها ويشرع فى كتابه اليافطه وأمامه كوبا من الشاى .....ثم يدخل منسى

منسى: يا سيدنا ....فين اليافطه

سيّّدنا: اقعد بسى وخد لك شفطه

منسى: مش فاضى وعندى اشغال

سيّّدنا: طب مانا فى اليافطه شغال

منسى: طب حاخبط مشوار وآجيلك

سيّّدنا: ما تفك يا منسى منديلك

منسى: لما تخلص راح اديلك

سيّّدنا: وانا برضو يا منسى هادعيلك

ويستمر سيدنا فى الكتابه ويمضى منسى خارجا فيبلغ شمروخ بان سيدنا يريد اتعابه فى كتابه اليافطه وبعد قليل ياتى شمروخ ومعه الحاج مختار

شمروخ: افتح يا سيدنا الباب

سيّّدنا: اهلا اهلا نورت يا حاج الكتّاب

شمروخ: عايز فى اليافطه أتعاب؟

سيّّدنا: منسى يا عمدتنا كداب

شمروخ: دانا باعتبرك م الاحباب

سيّّدنا: والله كلامك ع الطبطاب

شمروخ: ياللابنا يا ريس مختار

سيّّدنا: ودى تيجى دا الشاى ع النار

شمروخ: ماحنا برضو صحاب الدار

سيّّدنا: طب علشان الشيخ مختار

مختار: تشكر يا سيدنا تشكر

سيّّدنا: وانتوا كلامكم زى السكر

ثم يستأنف سيدنا الكتابه وبعد فتره تدخل زوجته

ام كسّاب: خزقت عينيك يا بو كساب

سيّّدنا: شوفى مين بس انتى ع الباب

ام كسّاب: الله مين منسى الكداب؟

سيّّدنا: هاكسر راسك بالقبقاب

منسى: اتحقق قبل ما تغتاب

سيّّدنا: اسكت اسكت يا نصاب

منسى: تشكر برضو يا بو كساب

ثم ياخذ منسى اليافطه بعد الانتهاء من كتابتها ويذهب بها الى شمروخ وقد التف حوله الكثير من اطفال القريه و رجالها

شمروخ: حبذا لو كانت اليافطه على كوبرى البلد

لاجل ما تشوفها أمم مالهاش عدد

والوزير لما يزورنا فى البلد

يعرف ان الكفر كله متحد

خد يا منسى معاك كده عشرين ولد

علقوا اليافطه على كوبرى البلد

وياخذ منسى اليافطه ويمضى ومعه مجموعة من شباب الكفر حاملين سلما وقوائم خشبيه وما ان وصلوا الموقع حتى صعد منسى السلم بعد تثبيت احد القوائم الخشبيه وبه طرف اللافته

منسى: هات يا سيّد خيط دوباره

سيّد: خد يابو الذّوق والشطاره

واحد: يافطه إنما إيه ... إداره

آخر: يسلموا إيدين اللى خطّطها بمهاره

منسى: واللى علاّها وعلقها بشطاره

الله .. الله .. الوزير ويّا الوزاره

الجميع: الوزير .. الوزاره؟

قول لنا إيه العباره

منسى: واد يا مسعف .. خد معاك الواد شباره

بلّغ الحاج شمروخ والأهالى بالزياره

ويهرول مسعف وشباره ممسكين بأسنانهم أّذيال سراويلهم لإبلاغ الحاج شمروخ

-----------------------------------

المشهد لاهل الكفر ملتفين حول شمروخ

------------------------------------

شمروخ: واعملوا حسابكم فى الانتخابات اللى جايّه

إنّى هاترشّح فى نفس الدايره ديّه

برضو شمروخ فى البلد دى مش شويّه

طب دا نص اخواننا فى المجلس هفيّه

الجميع: عاش شمروخ الخضير

واحد: شيخ الغُفر

الجميع: عاش نصير الفلاحين

واحد: نَفَر نَفَر

مسعف: حاج شمروخ .. حاج شمروخ

الوزير ع الكوبرى جاى

شمروخ: الوزير .. الوزير

ياللا يا مسعف ياللا يا دردير

ياللا يا صابر ياللا يا منير

ويهرع الاهالى خلف شمروخ لمقابلة الوزير

الجميع: ربنا يعلّى مراتبك يا وزير

ربنا يخلّيك وتترقى مدير

الوزير: أهلا أهلا يا شمروخ .. أهلا يا شباب

الجميع: قلبنا لسيادتك مفتوح يا بو الأحباب

الوزير: هابنى لكم معهد دينى بدل الكُتّاب

الجميع: منصور منصور يا وزير منصور

ناجح يا وزير يابو قلب كبير

الوزير: وكمان قهوه تشربوا فيها ما لذَّ وطاب

الجميع: منصور منصور يا وزير منصور

ناجح يا وزير يابو قلب كبير

الوزير: واعمل لكوا نادى تلعبوا فيه كل الألعاب

الجميع: منصور منصور يا وزير منصور

ناجح يا وزير يابو قلب كبير

الوزير: وابنى حنفيه وهاوصّلها بالمواسير

الجميع: ربنا يعلّى مراتبك يا وزير

ربنا يخلّيك وتترقى مدير

الوزير: واعمل لكوا فى الكفر ميدان زى التحرير

الجميع: ربنا يعلّى مراتبك يا وزير

ربنا يخلّيك وتترقى مدير

الوزير: وكمان تلاجه تشربوا منها بدل الزير

الجميع: منصور منصور يا وزير منصور

ناجح يا وزير يابو قلب كبير

الوزير: وهاخلّيكوا أفنديّه لابسين طراطير

الجميع: ربنا يعلّى مراتبك يا وزير

ربنا يخلّيك وتترقّى مدير

الوزير: وهأكلكم بدل الحاف فينو وفطير

الجميع: ربنا يعلّى مراتبك يا وزير

ربنا يخلّيك وتترقى مدير

ثم يتجمع الأهالى حول الوزير للفوز بتوقيعاته

واحد: والنّبى عيِّنّى يا وزير

الوزير: (ممسكا بالطلب) يُعيَّن صحفى.لا. رئيس تحرير

آخر: وانا بدِّى وظيفه

الوزير: وآدى إمضا ظريفه

آخر: وانا عاوز شغلانه تكفِّى مصاريف لعيال

الوزير: دا انا هافتح لك شركة توظيف أموال

آخر: وانا يا بيه دمِّى اتصفَّى م البيلهاريسيا

الوزير: أوافق على كونصلتو من أمريكا وروسيا

آخر: وانا يعنى عايز حتِّة صوبه زراعيه

الوزير: لامانع من عشرين صوبه فى النوباريه

آخر: عاوزين عربيه لأهل الكفر

الوزير: عشرين أوتوبيس ماركة نصر

آخر: كنَّا يا باشا عاوزين لنا وحده صحيّه

الوزير: الله .. هىَّ بلدكم مفيهاش وحده صحيّه

آخر: لمّا بنعيا بنروح مِشتِشفا الموديريَّه

الوزير: يُبنى مستشفى استثمارى ع الزراعيّه

شمروخ: يا معالى الوزير

يعنى لو تعيِّنِّى رئيس للكفر كُلاَّتُه

الوزير: وكمان سيدة الكفر تبقى مراته

ثم يغادر موكب الوزير ويتجمّع الأهالى فى ساحة الكفر ليتغنّوا بهذه الأغنيه

الجميع: السَّعد هلّ علينا ... والكفر هيبقى مدينه

والباشا هيورِّينا ... اللى ما عمرنا شفناه

فُرجت يا أهل الكفر

طول ما أصواتنا معانا ... ندِّيها للى ادَّانا

والباشا جاب وادَّانا ... كل اللى بنتمنَّاه

دايما يا أهل الكفر

دى حياتنا كانت ضنك ... ورصاصنا كُلّه فشنك

والباشا وعدنا ببنك ... الخير جاىّ لْنا معاه

بالجمله يا أهل الكفر

ياللا يا اهل الصّنايده ... نبعت له كارت معايده

دى إرادة ربّنا رايده ... يبقى سعدنا ويَّاه

ياللا يا أهل الكفر

ثم يقترب أحدهم من شمروخ

هندى: حاج شمروخ

شمروخ: إيه يا فِتِك

هندى: تشترى المعزه اللى عندى

شمروخ: طب وليه عاوز تبيع لى معزتك

هندى: هاشترى بدله تليق بمقام أفندى

شمروخ: طب يا هندى ... هاحترم لك رغبتك

هندى: ما الوزير قال لى هتتوظَّف يا هندى

شمروخ: طب وعاوز كام يا هندى فى معزتك

هندى: اللى يرضى ذمِّتك

شمروخ: خد يا هندى ... مش خساره فى جتّتك

-----------------------

مشهد فى أحد بيوت الكفر

-----------------------

مختار: يا ظريفه

ظريفه: إيه يا مختار

مختار: ليه هدومك مش نضيفه

ظريفه: يا راجل بطَّل هزار

مختار: إنتى ناسيه ان الوزير جاب لى الوظيفه

ظريفه: يعنى هتكون مشتشار؟

مختار: خلِّى ألفاظك لطيفه

ظريفه: قوم يا راجل حُط برسيم للحمار

مختار: يظهر ان الجهل خلاّكى خفيفه

ظريفه: دانت اللى مُخَّك طقّ يابن ست الدّار

مختار: إنتى طالق بالتلاته يا ظريفه

ظريفه: هانت عليك العشره يا مختار؟

مختار: وكمان من بُكره هاتجوِّز مُضيفه

ظريفه: آه يا خاين ... أه يا غدَّار

آه يا خاين ... أه يا غدَّار

ثم يغادر مختارالمنزل

(صوره أخرى فى منزل آخر)

سعديّه: قوم يا عب محسن بقينا الضُّهر

محسن: دانا ياوليّه ما نمتش من ييجى شهر

سعديّه: قوم يا راجل روح ع الغيط

محسن: واللا يا سعديه انا ملِّيت

سعديّه: الفطار جاهز يا راجل

محسن: حد قال لك انِّى هاكُل

قلت يا سعديه مش عاوز مشاكل

ثم إنِّى مش هاروح الغيط ده تانى

سعديّه: ليه بقى ... إللى عطاك يعطينا

محسن: أصلى ناوى اكتب أغانى

سعديّه: إفرحى يا حزينه

محسن: بطَّلى زنّ ف ودانى

سعديّه: إبقى هات وادِّينا

محسن: ما الوزير قال لى هتتعين مِأَلِّف للأغانى

( وهو يغطى وجهه باللحاف)

سعديّه: ما حنا اللى بنجيبه بإيدينا

إحنا اللى بنجيبه بإيدينا

( وهى تغادر الغرفه)

-------------------

مشهد آخر لجارتين

------------------

يام اسماعين

إيه يا ضنايا

والنَّبى تساعدينى فى شويِّة عجين

إنتى مش من مستوايا

راح يا بت ادِّيكى من عندى رغيفين

كفايه زنّ بقى .. كفايه

كده .. يام اربعه واربعين

أنا ولاّ انتى يا حربايه

قال عجين قال

هى ناسيه ان الوزير هزَّر معايا

هأ هأ هأ هأ

ثم يجرى شمروخ بعض التجديدات فى مقهى الكفر بعد شرائه

--------------------

المشهد الآن فى المقهى

----------------------

يقترب نادل المقهى من منضده حاملا صينية الشاى

عنتر: اللا .. اللا .. إشّ إشّ

مُسعد: خش يا واد فى عبِّى خش

عنتر: بدله بالطربوش كمان

مُسعد: ليه بقى طولة اللسان

عنتر: طب وإيه يعنى يا مسعد

مُسعد: برضو بيقول لى يا مسعد

من زمان كان إسمى مسعد

أما دلوقتى فإسمى الحاج مسعد

عنتر: حاج مسعد حتَّه واحده .. طب يا عم الحاج مسعد

إنت تُأمر

مُسعد: هات لى شيشه وهات حبة شاى و سَكَّر

عنتر: بسّى إيَّاك بسّ يطمر

مُسعد: تقصد ايه يا واد يا عنتر

عنتر: يعنى عايزين المأخر

مُسعد: ما انت فاتح لىَّ دفتر

عنتر: ما احنا عارفين ان محفظتك نضيفه

مُسعد: بكره تتقل لما نستلم الوظيفه

عنتر: الوظيفه .. لأْ ظريفه

مُسعد: مش مصدَّق‘ طب تعالى بُصّ ع الإمضا اللطيفه

(ويخرج من جيبه طلب وظيفه موقَّع من الوزير)

عنتر: اللى ما يشوفشى م الغربال

مُسعد: طب بلاش حركات عيال

مكرم: وانت ليه دمَّك يفور؟

مُسعد: ياللا غور من وشِّى غور

مكرم: لا .. دا انت لازم تترِقى بشبَّه وبخور

هدِّى أعصابك يا شيخ

مُسعد: انت مش سامع كلامه ازَّاى قبيح

مكرم: بس عنتر برضو بيطالب بحقُّه

مُسعد: كّسر حُقَّك ويَّا حُقُّه

مكرم: لا .. دانت متشقلب كيانك

مُسعد: طب وليه بقى طولة لسانك

مكرم: هىَّ دى برضو الأخوَّه والشهامه

مُسعد: اعمل ايه .. أصلكوا شويِّة لمامه

مكرم: طيب يا مسعد بكره تندم ( ويغادر)

مُسعد: ابقى فرَّجنى هتعمل إيه يا مكرم

(وعلى منضدة أخرى)

ابوالأفكار: بالك يا واد يا عب محسن احنا ايه ناقصنا

محسن: ايه يابو الأفكار .. قول وخلَّصنا

ابوالأفكار: احنا ناقصنا كام طاوله وكام ضومَنَه وحتة تليفزيون بالألوان لزوم السكافه والتنوير

محسن: حتَّه واحده كده م الفول والشّعير للثقافه والتنوير؟

سمعتوا آخر نكته؟

واحد: قول .. مانت متغدِّى كباب وكفته

محسن: مهندس زراعى كتب كتابُه فى الزريبه وشهدوا عليه اتنين معيز

الجميع: هأ هأ هأ

واحد: لازم تقصد الباشمِهندز عزيز

ابوالأفكار: لأ .. الباشمهندز عزيز راجل كُبَّاره ومحدّش يقدر يقول فى حقُّه كلمه

دا راجل متجوز وعنده خمس عيال

محسن: يعنى انت واخدها جَد كده عمَّال على بطَّال

يا راجل احنا بنتفكَّه

ابوالأفكار: نتفكَّه آه .. بس برضو لازم نفتَّح

انت عارف عزيز افندى يحتكم على كام فدَّان

واحد: الراجل لا يقصد فلان ولا علاَّن

وعموما يا سيدى حقَّك علينا انت والباشمهندز معيز .. قصدى عزيز

هأ هأ هأ

(وعلى منضده أخرى)

وبعدين جانى فى المنام خير والصَّلاتو على النبى راجل لابس أبيض ف ابيض وبيقدم لى صينيه كبيره قوى عليها من خيرات الله .. إشى لحمه .. وإشى فراخ .. وإشى حمام

الجميع: (ببلاهه) يا سلام

هو: شفتوا بقى .. واهو حلمى ابتدا يتفسَّر

الجميع: اللهُ أكبر .. الله أكبر

هو: بالكُم .. إحنا يا ولاد لما نستلم الوظيفه وكل واحد فينا كده يبقى أفندى حابقى أفطر أنا والعيال

جبنه رومى ونتغدَّى خُشاف

واحد: الله يرحم العيش الحاف

هو: حاف إيه بقى .. ماهى الدّنيا بتتغير

آخر: واللا خايف نكون احنا بس اللى بنتغيّر

هو: يا راجل خلَِّينا نشوف لنا يومين حلوين

آخر: على رأيك .. خدنا إيه م الفلاحه غير تشقيق الإيدين

واحد: بُكره ياولاد نلعب بالدورار لعب

آخر: آه .. كفايانا شقى ووجع قلب

هو: دورار؟ .. يعنى إيه دورار؟

واحد: آه .. ما انت ما تعرفشى غير البرسيم والحمار

هو: انتوا يعنى بتمهزءونى عشان لسَّه صغار

واحد: هأ هأ هأ .. يا راجل دا كله هزار فى هزار

الدورار يا سيدى اللى ماهو انت ورقه خضره تطلع لها كده سته جنيه وشوية برايز

هو: يا سيدى عبد الرّحيم .. سته جنيه وكمان شويّة برايز .. يعنى الواحد يبقى عنده نقديه زى اللى عند الحاج احمه ابو عب عظيم

واحد: كلام سليم

هو: يا سلام يا ناس .. دا الوزير ده طلع راجل كريم

(ثم يمر شمروخ ومعه سندى فيرحبون به)

الجميع: شايك عندنا يا حاج شمروخ

شمروخ: تعيشوا ( وبصوت خفيض) شاى إيه يا لطوخ

واحد: والله لا انت جاى يابو الذّوق والشطاره

شمروخ: متشكرين يا رجّاله( وبصوت خفيض) بلد كل يوم فى حاله‘ ثم يميل على مجموعه من الناس

شمروخ: مبسوطين ياولاد

المجموعه: بوجودك يا حاج أيامنا كلها أعياد

يدخل المقهى فى هذه الأثناء حمّوده الأهبل بملابسه المهلهله وشعره المنكوش ولحيته المبلله بلعابه فيتّجه صوب شمروخ

حموده: والنبى يا حاج سملوخ تكيب كنيه استلى بدله واقعد ع القهوه واسوف السّيما ... هأ هأ هأ

شمروخ: إجرى العب بعيد .. إجرى يابن اللئيمه

ثم يعاود الحاحه فيهمس شمروخ فى أذنه

شمروخ: انت يا واد مش عندك خمستاشر قيراط طين وارثهم عن عمك شاكر؟

حموده: مس فاكل .. مس فاكل

شمروخ: لأ بقى عندك .. وانا اقدر أخلّيك افندى أحسن من الناس دى كُلاَّتها

حموده: لبِّنا يخلِّى لك مِلاَتك وولاتها

شمروخ: هاظرفك يا واد بميت جنيه حتَّه واحده بس انت تبصم هنا

ويخرج من جيبه ورقه وفى نفس اللحظه يخرج سندى (الجاهز دائما) الختّامه من جيبُه

حموده: ياتى الهنا ياولات ياتى الهنا

ثم يخرج شمروخ من حافظة نقوده أوراقا مالية يداعبها بين أصابعه ويقرّبها من عينى حمّوده فيزداد لعابه سيولة ويمسك بالورقه ويقرّب سندى الختامه من أصابعه فيبصم على الفور

وهو يصفّق بيده لعامل المقهى

شمروخ: طلبات حمّوده بيه على حسابى

واحد: شمروخ دا راجل إرهابى

شمروخ: خد يا حمّوده بيه خمسين جنيه أهُم وانا هاشترى لك بالباقى بنطلون وزاكتّه وزعبوط

حموده: لبِّنا يخلِّيك .. أنا مبسوط .. أنا مبسوط

ثم يجلس حموده بملابسه الرثَّه على مقعد فى المقهى منتظرا (الشاى الكشرى) وهو ممسكا بالنقود التى أخذها من شمروخ .. يقرّبها من عينه تارة .. وتارة أخرى يمسحها بشعر صدره ثم يبعثرها فى الهواء وتعيد التقاطها فيضعها فى حجره ويبدأ فى العد على أصابعه كنيه .. إتنين .. ستّه ... ويصفِّق بهستيريه مرة ثم يصمت للحظه كأنّه يفكر فيعاود التصفيق مرّة أخرى ويغادر المقهى قبل أن يأتيه الشاى الذى تمنّاه فيتبعه اثنان من رواد المقهى كانا يراقبانه وما ان ابتعد عن الأنظار..

أحدهما: حمّوده بيه

حموده: عاوزين إيه منّى .. عاوزين إيه

(ويحمى وجهه بكلتا يديه خوفا منهم)

الثانى: ما تخافشى يا حموده بيه إحنا عاوزين ننوّرك علشان فلوسك ما تضيعشى

حموده: إمسى إنت وهو .. إمسى

أحدهما: إيه رأيك تشاركنا فى مشروع إنما إيه

حموده: مسلوع .. يعنى إيه ( وهو يضحك بهستيريه)

الثانى: يعنى انت تدِّينا الفلوس اللى معاك واحنا نشغّلها لك وكل يوم تيجى هنا تقعد ع القهوه تشرب شاى وقرفه وتتفرّج ع التليفزيون من غير ما تدفع مليم

حموده: قول واللهِ العظيم؟

أحدهما: وبعد كام شهر كده .. نبنى لك بيت كبير بالطوب لاحمر ونجيب لك فزبه زى بتاعة الواد سندى

حموده: هيه .. هيه .. يعنى هابقى أفندى؟

لأ .. انتوا بتضحكوا علىَّ

محتس هياخت الفلوس منِّى

الثانى: انت يا حموده بتخوِّننى؟

حموده: طب ختوا الفلوس اهيه .. وانا هالوح ع القهوه فيأخذونها ويجر أقدامه الى المقهى

فى المقهى يتجه شمروخ ناحيه النصبه

عنتر: أهلا أهلا .. كبير الصنايده

شمروخ: يا واد بطَّل لؤم الصّعايده

قول لى يا عنتر؟

عنتر: انت تأمر

شمروخ: إيه الأخبار

عنتر: عال العال

شمروخ: مش عاوز يبقى فى جيب واحد منهم مليم أحمر

عنتر: عيب يا حاج .. دا انا عنتر

شمروخ: إسمع يا عنتر جبت لهم التليفزيون؟

عنتر: ودفعت ميتين جنيه عربون

بما فيهم عربون الفيديو

شمروخ: فيديو كمان

آه ماهو أهل الكفر فضيوا

خلِّيهم يتفرّجوا ع الأفلام

عنتر: إحنا بنرمى لقدّام

شمروخ: مفهوم مفهوم كده تمام التمام

( ويغادر شمروخ ومعه سندى وأثناء مغادرتهم يأتى فصيح وهو رجل مسن وقور ومعروف بين أهل الكفر بحكمته)

فصيح: يا أهل الكفر إيه اللى جرى لكم

سايبين ليه غيطانكم ومالكم

الزرع نشف من قلِّة الميَّه

كل واحد فيكوا عنده عقل يفكّر شويّه

واحد: الراجل ده اتجنّ ميه الميَّه

آخر: بالك .. الحاج فصيح بيقول كلام مظبوط

واحد: يا راجل اشرب شايك

دى صماويل مخُّه عاوزه تربيط

فصيح: كده يا كفر الصنايده؟

ما بقاش حواليكم فايده

يا ترى إيه اللى نابكوا

قادر ربنا يرجّعكوا لصوابكوا

وفى أثناء حديثه يدخل المقهى حموده الأهبل فينادى عليه فصيح

فصيح: ياللا يا حموده يابنى انت اللى فيك الرَّجا

حموده: لكا .. يعنى إيه لكا؟

فصيح: يعنى انت اللى بيقولوا عليك أهبل

هبلك خلقة ربنا

أمّا هبلهم .. فخلقة عقولهم

وهم على اعتاب المقهى يقابلهم احد رجال شمروخ بيده عصا وفى الأخرى الطرف الأخر للحبل المربوط فى عنق حمار يحمل فوق ظهره التليفويزن والفيديو

وسَّع وسَّع ... حا يا حمار الهنا

فصيح: حمار الهنا؟

كان زمان إسمه حمار القنا

عليه العوض ومنّه العوض

ويقابل رواد المقهى الزائر الجديد ببشاشه وترحيب وصياح وتصفيق

وتمضى الأيام وأهل الكفر لآ يتغير حالهم إلاّ للأسوأ .. تبخَّرت ما لديهم من نقود على الشاى والسحلب والقرفه وهم فى انتظار الوظيفه التى لا يبدو أنها ستاتى

------------------

مشهد فى أحد أزقَّة الكَفر

-------------------

شمروخ يمتطى حمارا يسير على جانبيه اثنان من أعوانه

واحد: حاج شمروخ؟

عاوز خمسه جنيه سلف

شمروخ: السلف ردُّه تلف

( وهو يثيرحماره بقدميه ليسرع الخطى)

واحد: لكن أنا مفيش فى دارى ولا لقمه

شمروخ: أعمل لك ايه .. هىَّ دى القسمه

واحد: يا حاج ماحنا لسَّه ما توظفناش

شمروخ: يعنى عاوز تاكلها بلاش؟

واحد: طيب إدِّينى واعمل اللى انت عايزه

شمروخ: عجيبه يا ناس

جاى يعبِّى منِّى بعد ما فضيت قزايزُه

حا ... حا يا حمار

محروس: حاج شمروخ

إيه رأيك فى الزاكتَّه والطربوش دول؟

شمروخ: عايز إيه .. خلَّصنى قول

محروس: خدهم وادِّينى رُبع غلَّه وربع فول

شمروخ: يا راجل ما تبقاش مسطول

محروس: طب أعمل ايه يا حاج شمروخ؟

شمروخ: واللهِ السوق قدَّام الناس مفتوح

محروس: مش فاهم كلامك بالمرَّه

شمروخ: انت مش لسَّه عندك بقره؟

محروس: يعنى ابيع البقره اللى بتجيب لنا بق اللبن؟

شمروخ: ما هو برضو الغلَّه والفول ليهم تمن

محروس: يعنى دا آخر كلام عندك؟

شمروخ: إن كان عاجبك

محروس: حتدفع كام فى البقره؟

شمروخ: ست ورقات من ام عشره

محروس: ستِّين جنيه يا حاج؟

دا يرضى مين بسّ يا ناس

شمروخ: خلاص.. لو مش عاجبك بلاش

محروس: زىّ بعضُه .. هات الفلوس

شمروخ: ابعت البقره الأول يا محروس

حا ... حا يا حمار

ويزداد ضيق الحال ويصبح أملهم فى الوظيفة محالا فيتجمعون فى ساحة الكفر وينعتون حالهم بهذه الأغنيه

الجميع: كنَّا بنزرع أرضنا .. خيرنا كافى شرِّنا

حسره علينا كلِّنا

دلوقتى مفيش لقمه حاف

***

فاتت دلوقتى سنه .. لما البيه جالنا هنا

ومفيش لقمه فى بطننا

ولا هدمه ولا طرف لحاف

***

يا رب ليه حظِّنا .. الناس تاكل وشِّنا

احنا غلطنا كلِّنا

لطفك يا ناصر الضِّعاف

***

فصيح: بدال ما انتوا قاعدين تنعوا همّكوا كده قوموا ازرعوا الأرض ولاّ حتى روحوا للبيه الوزير

الجميع: الوزير .. الوزير

ياللاّ بينا ع الوزير

وتاتى سياره نصف نقل يمتلكها شمروخ

السائق: اسمعونى م البدايه

اللى راح يركب معايا

العيِّل بجنيه ونص

والراجل بالخمسايه

واحد: شمروخ خلَّص ع اللى معايا

آخر: واللى معايا

آخر: واللى معايا

ويندفع الجميع لتمتلىء بهم السياره فينطلق السائق خوفا من بطشهم حتى وصل الموكب وتجمَّع الأهالى أمام مكتب الوزير

الجميع: إحنا شباب كفر الصنايده

جينا نقدِّم كارت معايده

السكرتيره: النّور لاخضر مش منقاد

انتوا ما خدتوش منه معاد؟

واحد: موضوعنا يا هانم حسّاس

آخر: هتروح فيه كده أرواح ناس

آخر: وما يستحملشى التاخير

الجميع: وأملنا يا ست فى الوزير

السكرتيره: لحظه أستأذن الوزير

السكرتيره: معاليه عاوزكوا تفضلوا

برَّه وخمسه يدخلوا

واحد: خمسة إيه اللى يدخلوا

آخر: دا كلام مين بس يقبله

آخر: ياللا جميعا تفضَّلوا

( فى مكتب الوزير)

الجميع: جينا (معاليك) عشان نهنِّى

الوزير: الذاكره دايما تخوننى ( متجاهلا)

مجموعه: إحنا شباب كفر الصَّنايده

الوزير: مانتوش فى الجدول النهارده (متجهما)

واحد: دا باينّْ مفيش منُّه فايده ( متهجّما عليه)

الوزير: آه الصّنايده مش تقولوا؟ (مبتسما)

واحد: مال البيه بيهز طوله؟

الوزير: إخرسه ولسانه قصّهوله (مخاطبا أحد مساعديه)

آخر: الراجل ده ماكنشى يقصد

الوزير: لازم يعنى الواحد يهدِّد؟ (بخُيلاء)

إيه سرّ هذهِ الزياره؟

واحد: ما انت يا بيه فاهم العباره

الوزير: طريقتكم دىَّ مش لطيفه

آخر: فين وعدك لينا بالوظيفه؟

الوزير: مفهوم .. مفهوم .. الوظيفه

طب ما حنا خلاص يا ناس نجحنا

واحد: انت اللى نجحت .. طب وإحنا؟

الوزير: كان كلُّه دعايه فى الهجايص

واحد: معقوله البيه كدَّاب ومايص؟

الوزير: على برَّه ياولاد الَّذينَ

الجميع: احنا نستاهل ان جينا

الوزير: ياللا يا بيئه .. ورِّى قفاك

السكرتيره: وخد الباب ده يا تُحفه وراك

ويجرُّون أذيال الهزيمة الى كفرهم فيجدون فصيح فى انتظارهم فيلتقط بيده حفنة من التراب

ثم ينثرها فى الهواء هاتفا:

فصيح: الأرض بتناديكم .. لبُّوا نداء الأرض

والرزق بين إيديكم .. اسعوا له قبل الفرض

فيستفيقون من سباتهم ويتغنّون بهذه الأغنيه عاقدين العزم على فتح صفحة جديدة مع أنفسهم

الجميع: يا أرضنا يا جنّه .. من غيرك اتبهدلنا

وازّاى بقى نستنّى

متأسّفين يا أرض

***

دانتى ترابك حنَّه .. يا شاربه ميِّة نيلنا

وان قلنا مهما قلنا

حبِّك علينا فرض

***

يا أرض يا طيِّبه .. سبناكى متعذِّبه

راجعين نقول لك مرحبا

مااحلى اللقا يا أرض

***

[G.G]

مش عارفة أقول ايه غير :

بجد "دكترة"

و رئاسة جامعة بحالها..

رائعة بجد

:blink:

[هشام الجنيدى]

الله عليك يا دكتره ......... بسم الله ما شاء الله

ايه الجمال ده .........

ايوه كده يا راجل كنت مستانيك من زمااااااااااااااااااااااان

نفسى فعلا اهل الكفر يرجعو .......ينزلو تانى الغطان ويزرعو

:blink:

[bentmasria]

صمت دهراااااااااااااااااا

ونطق فخراااااااااااااااااا

رائع يا دكترة بجد ماشاء الله

ف الجوووووووووووووووووووووووووووون :blink:

[mohamed]

إيه الجمال ده

بجد حاجة روعة يا دكترة

[daktara]

الاخت جى جى

شكرا لمرورك الكريم ولاطرائك العظيم ولو ان رئاسه جامعه مش هدفى

انا بارسم على رئاسة بلد

[daktara]

اخى هشام

اسف لتاخرى فى الرد على كلامك وكلامكم الحلو بس انا قاصد كده عشان ارجع الموضوع على السطح وتبقى فرصه لزياده القراء

الصفحه هنا بتتملى كل ساعتين وكلهم عاوزين تصفيق وبس ومفيش فرصه للظهور غير كده

وطبعا لقله الابداع خصوصا ان معظم قديمى اتنشر قبل كده

شكرا على ايه ولا ايه انت بصراحه شغال منفاخ وكرمك مغطى الكل فمش عارف اصدق ان كلامى حلو ولا بتجاملنى

تحياتى

[daktara]

الاخت العزيزه ام حماده

اعملى لى قهوه ساده قبل ما نتكلم

دهرا ايه ده بقى دانا اخر حاجه نشرتها من ييجى سبع سنين

يا رب تكون عجبتك بجد

تحياتى

[daktara]

الاخ محمد

والله انت اجمل واروع

انا شايفك بتقرا تقريبا كل اللى بيتكتب وده شىء باشكرك عليه

تحياتى

[shahd]

بجد راااااائعة ومنكم نستفيد( منتدى جميل ومواضيع راقية)

[مى محمد]

فعلا فعلا دكترة

كفر صنايدة هو صورة غنائية للحقيقة المصرية

فكرة رائعة وكاتب فى غاية الابداع

ونحن فى انتظار المزيد

[amr_elnagi]

شكرا على ايه ولا ايه انت بصراحه شغال منفاخ وكرمك مغطى الكل فمش عارف اصدق ان كلامى حلو ولا بتجاملنى

معلش يا عم دكترة بس يا ريت تتعلم منه اسلوب الرد والمجاملة والنقد ..(انتبه يا عمر)(المشرف)

على العموم عف الله عما سلف

انا دخلت وحبيت اسجل حضورى

تحياتى وتقديرى

اخيك عمرو الناجى

[daktara]

الاخت شهد

واضح انك جديده فى المنتدى فاهلا بيكى

وشكرا على كلامك الحلو

الاخت مى محمد

مش اوى كده احسن اصدق نفسى واتمرع عليكم

شكرا جزيلا لك

اعتذر عن تاخرى بالرد لانشغالى