بشاير الكويز - وصول أول شحنة منسوجات صهيونية لمصر

[se_ Elsyed]

الأهرام 15/4/2005م

وصول شحنة منسوجات إسرائيلية

إلي مصر طبقا لاتفاقية الكويز

رفح ـ من أحمد سليم

عبرت أمس منفذ العوجة البري شحنة من المنسوجات وإكسسوارات الملابس من إسرائيل في طريقها إلي مصر لتصنيعها وإعادة تصديرها طبقا لاتفاقية الكويز‏,‏ ليتم تصديرها مرة أخري إلي البلاد الموقعة علي الاتفاقية‏,‏ وتضم الشحنة‏393‏ طنا من المنسوجات الصوفية‏,‏ وثلاث شاحنات إكسسوارات ملابس‏,‏ وتوجهت هذه الرسائل إلي المصانع المصرية بالمناطق الحرة بمحافظتي الإسكندرية‏,‏ وبورسعيد‏

- مره أخرى نقول " تموت الحُره ولا تأكل بثدييها "

يا عم س س ما تحبكهاش وتبقى حنبلي ..

شوف أول شحنة قد إيه ؟ 393 طن يا ريس .. يعني الأشيه هاتبقى معدن والبليه هاتلعب مع الإقتصاد المصري وسبابيب رزق هاتتفتح قدام الناس بالعبيط وهانقب على وش الدنيا .. واللي تكسبوا إلعبوا ...ولكي يرضى عنك البيت الأبيض لازم تطاطي تطاطي تطاطي ... والإقتصاد يا عزيزي لا دين له ولا مله .. وحاول تفصل السياسة عن الإقتصاد .. وإنسى خالص حكاية فلسطين المُحتلة وذبح الفلسطينين حسب الشريعة الصهيونية ... وعيش بقى بدل ما تلاقي نفسك زي السودان والعراق ولبنان وخليك جنب الحيط ... أي نعم هما بيحاولوا يدفنوا صرح عملاق أو كان عملاقاً زي المحلة الكبرى .. لكن مش إشكال ربك بيقطع من هنا وبيوصل من هنا وأهو عندك إسكندرية وبورسعيد وبتوع المحله لهم ربنا وممكن نسرح عمال النسيج اللي هناك ونخليهم يشتغلوا أنفار يلموا الدودة من مزارع القطن ..

للأسف أمثالك يا س س كتير وأمامهم الكثير لكن يفهموا ... ولكي يستوعبوا بأن ما ينطبق على الأفراد ليس بالضرورة أن ينطبق على الدول والحكومات ، فأنت تقول تموت الحره ومش عارف ما تاكلش همبورجر ولا مش عارف إيه ... يا عزيزي المثل ده قالته واحده واخداها الكرامة وأهي ماتت من الجوع وماحدش عبرها .. لكن الدول حاجة تانية ... الدول يُمكن في بعض الفترات تتخلى عن مبادئها بل عن دينها إذا تطلب الأمر وممكن تتحدث عن توحيد الأديان وعن أحبوا أعداءكم اللي مازالوا أعداءكم ويقتلون أبناءكم ويستحييون نساءكم ويحتلون أرضكم ...

يالله قوم طُس وشك بشوية ميه علشان تقف عند مدخل نفق الشهيد أحمد حمدي تستنى الدبابات قصدي الشاحنات الصهيونية اللي جايه وجاي معاها وفد سلام من الصهاينة وتسمك علم مصر في إيد وعلم الصهاينة في الأيد الآخرى وتلبس طاقيه شبيكه صهيونية ( نفسي أعرف بيشبوكوها إزاي في اليأفوخ اللي ورا الراس ده !! ) وإمسك ببؤك غصن زينون دليلاً على محبتك للسلام وردد نشيد " عاشت الصداقة المصرية الصهيونية " يمكن يحنوا عليك ويرموا لك مترين قماش دمور تفصلهم جلابيه بدل الجلابية الوحيده اللي حيلتك واللي دابت من كتر اللبس ...

وليكن شعارنا في المرحلة القادمة " أنا أُحب شارون .. إذاً أنا إنسان متعولم وأستحق أن أعيش في الشرق الأوسط الجديد " ...