يا عصبي السابع !

[ابو خليل]

ارجو افادتي عن التهابات العصب السابع ؟

الحكاية اني كنت قاعد لازق في المكيف البارد ,,

وخرجت من الغرفة .. وبالطبع الجو كان في الخارج حر جدا ..

وأحسست فجأة بأن خدي الأيمن متخدر .. !!

وأنا بتوضأ للصلاة كنت تقريبا مش حاسس بيه !!

الناس قالوا لي ده التهاب العصب السابع ؟

بعد يومين خف الألم شوية ..

لكني ألاحظ أنني أحيانا قليلة وخاصة وقت الإنفعال .. أحس بألم في الخد الأيمن ..

أفيدوني أفادكم الله ؟؟ :D

[ابو خليل]

محدش راضي يرد يعني اروح اكشف بره ؟؟

[سهيلة]

الف سلامة عليك يا ابو خليل

دة فعلا التهاب ف

fascial nerve

وعلاجة كالاتى

لازم تحافط على نفسك من البرد لمدة اسبوع يعنى ممنوع تقترب من التكيف ويا ريت بلاها خالص الفترة دى

ولما تكون خارج مبكرا من البيت تضع كوفية على وجهك

العلاج بقى يا سيدى كالاتى

اولا حقن فيتامين ب 12

biovit ampoul

او

beto12 ampoul

حقنة يوم بعد يوم لمدة اسبوع واحد

وكمان تاخد مضاد للالتهاب مع مسكن زى مثلا

اقراص كيتوفان قرص 3 مرات يوميا لمدة خمس ايام

وبس هو دة العلاج

يعنى كشف ببلاش ولا تزعل يا ابو خليل ابدا

والف سلااااااااااااااااااااااااااااااااامة من اختك دكتورة سهيلة

[ابو خليل]

نعم نعم نعم !!!!

fascial nerve

و

حقن

biovit ampoul

دا انا داخل علي جواز !!!!!!!!!!!!!!!!

سهيلة ؟؟

انا حالتي خطرة ؟؟

وبعدين ازاي اعيش من غير مكيف ..

و الحرارة 40 !!

سهيلة شوفي لي أي حل

انت قلقتيني بدل ما تطمنيني !!

بجد انا قلقت !!

دكتور .. الحقني !!!

[سهيلة]

ابو خليل العزيز

قصدى العريس

انت كويس بس الارشادات اللى قولتهالك مهمة اوى

على الاقل نقلل درجة برودة التكييف على قد ما تقدر لغاية ما تتحسن او تضع كوفية على رقبتك والجزء اللى بتحس فية بتنميل من الوجة

يعنى تدفية بمعنى اصح

بس الحقن لابد منها

دى فيتامينات يا ابو خليل

ولا انت بتخاف من الحقن ولا اية النظام

امال عريس اية بس

اتمنى لك الشفاء العاجل

[ابو خليل]

دكتورة ...

لما كنت في مصر من سنة ..

قال لي دكتور الأسنان ( وهو الطبيب الوحيد الذي أزوره في حياتي )

والي الأن لا ادري كيف سألت طبيب أسنان عن شيء في الأعصاب ؟؟

وقال لي : العصب السابع اساسا في الجانب الأيسر من الوجه ..

واعطاني مسكنات ‍‍ ‍‍...

بس بصراحة انا ساعات بيجي لي ألم في الخد ا لأيمن ..

تنصحيني اكشف لما ارجع مصر عند طبيب أعصاب ‍‍‍؟

بالنسبة للحقن .. فأنا مثل كل الأطفال .. اخاف من الحقن موت !

[سهيلة]

ابوخليل العزيز

نصيحتى لك انك تبتدى تاخد فتامين ب12 سواء اقراص او حقن وصدقنى هتحس بتحسن

وكمان ممكن ما تحتاج دكتور

عارف دة ان شاء اللة التهاب بسيط وهيروح حتى لو ما اخدت ادوية بس الفترة هتكون اطول لو ما بدات العلاج

بس لو بقى التنميل موجود بعد كورس الفيتامين

يبقى تعرض نفسك على دكتور

بس يا ريت تبدا وبلاش خوف هما بس حقنتين عضل كل اسبوع لمدة شهر

[ابو خليل]

حقنتين عضل كل اسبوع لمدة شهر .. (شوية لما اجيب الالة الحاسبة )

2× 4= 8

لا بلاش احسن ..

خلينا في الفيتامين اسلم ‍

[daktara]

سلامتك يا بو خليل يا حبيب الملايين

والله لسه شايف شكوتك دلوقتى

بس اصحح معلومه فى الاول وهى ان العصب اللسابع موجود فى اليمين وفى الشمال وكمان ما بيعملشى الم فى الوش ولا حاجه لانه بيغذى عضلات الوجه يعنى يعمل ضعف فى العضلات او شلل وغالبا بيكون مؤقت وانا اعتقد ان اللى عندك مش العصب السابع ولا حاجه اللى يعمل الم فى الوش يبقى العصب الخامس وغالبا الالم بيكون نتيجة التهابات فى اللثه او الاسنان او جرح مثلا بعد الحلاقه او حبوب شباب ملتهبه ولو مفيش سبب يبقى بالبلدى كده كهربه زايده ودا بيسموه شقيقة العصب الخامس

لو لسه ما خفيتشى خد تيجريتول 100 ميللى حبه مرتين يوميا والف سلامه

[ابو خليل]

هلا يا دكتره يا عزيزي ..

لي زمن لم ارك علي الماسنجر ..

كيف حالك وحال أولادك ؟

المهم أنا قررت بمشيئة الله أن انزل مصر لعمل فحوصات طبية .. بعد 3 اسابيع إن شاءا لله ..

لأن الوضع كما قرأت اني عندما كثيرا ما أجد الم في خدي الأيمن خاصة عندما (اتنرفز )

ولان الكثير وصفوا لي الكثير من الأدوية !!

وبالفعل يا دكتور انا اعاني من التهاب في اللثة منذ حوالي سنتين ..

وطبيب الأسنان اعطاني بعض الادوية ولكني اهملت في تعاطيها ..

عموما سأفحص نفسي في مصر أفضل ..

هل تقترح علي إسم طبيب ؟ وما التخصص الذي اعرض نفسي عليه .. مخ وأعصاب .. ؟؟

شكرا لكلماتك التي طمنتني كثيرا

[daktara]

اولا روح لدكتور سنان يعالج سنانك

وثانيا ابدأ الان فى الدوا اللى كتبتهولك هيريحك جدا

[ابو خليل]

شكرا لك يا دكتوري العزيز ..

سأتبع تعليماتك وسأخبرك بالتفاصيل ..

بارك الله لك في أولادك