نداء إلى شعراء المُنتدى الجُدد

[se_ Elsyed]

والله العظيم بنحبكم .. والواحد بيدخل قسم الأدب والشعر وهو حاطط إيده على قلبه وحاسس إنه قزم من الحاجات الجميلة اللي بيقرأها سواء كانت إبداع شخصي أو قصائد وأعمال أدبيه منقولة ..

ولكن لي عتاب عليكوا وهو إني شخصياً بأحس إن معظمكم داخل المحاورات على طمع وكل همه بيبقى إنه يلطع القصيدة أو العمل الأدبي لمجرد الإنتشار وخلاص ومش مهم بقى عنده المكان اللي هو موجود فيه أو ناسه ..

يعني كل اللي أرجوه إننا نتعرف على الأديب أو الشعار أو حتى صاحب الأحاسيس صاحب هذا العمل ..

على سبيل المثال لا الحصر .. مشاركات بنت شعنونة - زمان دلوقت من ساعة ماراحت إسكندرية لقت اللي أحسن مننا - وأختنا الأديبة مي زيادة قصدة بنت مصرية وإبننا أبو خليل .. إحنا أو أنا بأحس بكلماتهم أكثر لإني أعرفهم من خلال كلماتهم ومداخلاتهم وأراءهم في مواضيع أخرى .. مع العلم بأنني لم أتشرف بالإلتقاء بهم إلا من خلال شاشة محاورات المصريين ...

معذرة على تلك الكلمات العفوية ولكن ده من العشم ولكنني لا أعقد بإن هناك شاعر أوأديب قاعد في صومعه أو برج عاجي ومالوش لا في السياسة ولا الموضوعات العامه ولا الرياضة وشغال طول النهار عمال يقرقض الشعر وخلاص وده دوره فقط في الحياه ...

[bentmasria]

سى السيد طبعا موش احمد عبد الجواد

بشكل ما عندك حق وبرضه معندكش حق

بمعنى

انا اجد نفسى فى الكتابه وفى المطبخ هذا لا يعنى انى لا اشارك فى السياسة لكن لكبر سنى شويه اقولك انى زمان فى الجامعه اتظاهرت وعملت مشاكل كتيره وبرضه لم يتغير شىء هذا لا يعنى انى يئست لكن مضى من عمرى عشرون عاما وكل شىء كما هو ربما لا تخمد ثورات قلمى امام موقف انسانى بحت لكننى اصبحت لا انفعل بقوة الحدث فيم يتعلق بالسياسة كنت قديما اتمنى ان اغير صورة العالم الآن اتمنى ان نمر انا وطفلى بسلام فى هذه الغوغاء والضوضاء

كم اتمنى ان لا تزور عالمه سحب الغزو الفكرى الغربى كم اتمنى ان يعشق كل ماهو اصيل وجميل

فى زمن واقعى جدا انا حالمة بالمستقبل وحلمى الصغير هو محمد

لا استطيع ان اعى كل المتغيرات حولى ببساطة رغم وعيى بها

لا اعتبر هذا عذرا فقط توضيح واعدك انى ساشارك فى كل الاماكن والاتجاهات ماعدا قهوة المحاورات فلها خصوصية افرادها الذين احبهم واعلم ان حروفى لن ترقى لجمعكم الطيب

المهم

طولت عليك

يارب نقدر نكون دايما عند حسن ظنكم

وبلاش حكاية مى زيادة دى لاصدق نفسى

دمت بكل خير