لماذا يفشل الزواج كثيرا

[هشام عبد الوهاب]

حبايببى الحلوين بايت وفرى ....ممكن مانخرجش عن الموضوع لوسمحتم

:inlove:

[zigzag]

شهدت مدينة السويس ملاحم رائعة من البطولة للدفاع عن المصريين

ففي حرب 73 استطاع رجال المقاومة الذود عن مدينتهم ضد السفاح شارون إثناء الثغرة وقد سقط منهم الشهداء في سبيل تأدية ذلك الواجب القومي

ثم شهدت المدينة لاحقا ، ملحمة بطولة رائعة للدفاع عن الرجل المصري ، انتهت بتقطيع الشهيد اربأ اربأ في أكياس بلاستيك والقائة في مقلب زبالة علي يد سفاح من الجنس الذي كان ناعما  قالت التقارير عنة  أنة اشد خطرا وفتكا من السفاح شارون

وبتلك البطولة النادرة والتضحية بالذات تم إنقاذ العديد من رجال  مصر ، بقيامهم بتنظيف البيوت أول بأول من أكياس البلاستيك .

[freefreer]

أنا بقول نستخدم القنابل الأستشهادية ..  :cry:

[zigzag]

تحذير

فتحت الاخت اتس مي موضوع خاص بالاستنساخ ، وتريد تحويل الاستنساخ ليكون من خلايا المرأة فقط  مخالفة بذلك كل الاعراف الدولية .

وحرصا علي مستقبل اطفالنا في حالة حدوث هذا الاستنساخ المشبوة ، وحتي نجنبهم ما عانيناة ندعو لتنظيم مؤتمر في دمشق لتفعيل المقاطعة  لتغير ذلك المخطط ، وفي حالة عدم الاستجابة  ندعو الاخر فري فرير لأتخاذ الاجراءات اللازمة  لتكوين منظمة شهداء بلا حدود للقيام بما يلزم من العمليات الاستشهادية  .

[itsme_1666]

هاهاهاهااااا :P  :P  :P  :P  :P

صباح الخير الاول :cry:

اخ zigzag

انا فى موضوع الاستنساخ ده اسمحلى اتحيز فيه للراجل....وخصوصا الراجل المصرى... :lookaround:  لان الزوجة المصرية يمكنها الحصول على نسخة  معدلة منه  من غير تحكمات سى السيد ولا تقلبات مزاجية ولا نرفزة   ولا عصبية ولا بصبصة للسكرتيرات  ..مش بس كده ده ممكن تطلب نسخة من غير نضارة ولا كرش ولا قرعة ....انا حقيقى مش عارفة ليه 90% من الرجالة  المصريين ليهم  المواصفات ده  إن ما كنش قبل الجواز فحتما قطعا هتكون عندهم بعد  الجواز  

المهم ... :sneaky:  الست المصرية ممكن تطلب نسخة ب عضلات زيادة عن النسخة الاصلية لزوم شغل البيت..........اما الاطفال بقه فهيكون فيه مشكلة  فى الاهتمام بيهم وإرضاعهم :th:  بس العلم كل يوم فيه جديد وممكن يحل كل المشاكل  :colgate:

لأ بجد  موضوع استنساخ البشر ده لو حصل هيكون إعجاز علمى والحمدلله إن احنا مش فى زمن المعجزات... :lookaround:  :lookaround:

الاخ هشام يعنى عاوزة اسأل حضرتك سؤال ممكن ؟؟؟ هى الحلقات الجميلة ده عن الزوجة المفترية كلها من النوع ده؟؟ ما فيش زوجة كده فلته حنينة ومش مستقوية؟؟ و بصراحة هى شكلها هى وجوزها فى الصور الى انت  علقت  عليها شكلهم كده  زى الشاويش عطية..والراجل يا عينى غلبان خاص....ده انا قلبلى بيتقطع  و عزائى الوحيد انه غير واقعىى بالمرة الى بيحصل ده ...وإذا كان كل الزوجات بالشكل الفظيع الى فى الصور ده ..اسمحلى اقول لهم تستاهلوا...لانهم على الاقل مش مهتمميين بمنظرهم إيه ما عندهمش مشط فى بيتهم؟؟؟؟؟ :sneaky2:  :sneaky2:  ???  :music:

اخى زجزاج انا ا اشكرك على تحيتى فى مداخلتك وانا حقيقى مش عارفة ليه الاخوات العضوات مش بيشتركوا معايا فى النضال والكفاح فى المنتدى ده .....ده لسة بدرى على ال11 صفحة .. وده مشوار طويلللللللل هأمشيه لوحدى وإلا حاجة؟؟؟؟؟؟؟؟

اخ  freefreer

انتم لا مهزومين ولا حاجة...  انتم بس الى بتشتكوا كتير لكن إحنا سلمنا امرنا لربنا   وربنا شايف وعارف

...  انا بس بأوضح ان اى مشاكل بيكون سببها الطرفين مش طرف واحد ...وعموما المشاكل الزوجية زى الفلفل والشتة فى الاكل بس اهم حاجة ما تزيدش علشان الدنيا ما تولعش...

:devil:  :devil:  :devil:  :devil:  :devil:  :devil:

[Ragaai]

يا خوانا

انتو عايزين ايه بالضبط عايزين تقولو ان الستات هن السبب طب ماحنا كلنا عارفين

عايزينهن يقتنعوا ؟ يبقى بتنفخوا في قربة مقطوعة لأنه من المؤكد انه لم تولد إلى الآن المرأة التي تقتنع انها مخطئة دي بتقتل الراجل وتقول هو السبب تبقو عايزين ايه

المؤكد اننا ح نوصل لآخر صفحة والكلام هو هو

صدقوني مافيش فايدة

[freefreer]

اما الاطفال بقه فهيكون فيه مشكلة  فى الاهتمام بيهم وإرضاعهم   بس العلم كل يوم فيه جديد وممكن يحل كل المشاكل    

اتس مى ..  :nervous: .. عايزة تعملى فينا أيه ..  :D

:sneaky2:  :sneaky2:  :sneaky2:  :sneaky2:

[Byte]

فتحت الاخت اتس مي موضوع خاص بالاستنساخ ، وتريد تحويل الاستنساخ ليكون من خلايا المرأة فقط  مخالفة بذلك كل الاعراف الدولية

تصدقوا ان هوليود عملت الحكاية دي فيلم؟

القصة بدأت بحرب في افغانستان {وشنب العمدة خليل انا ماقصدش آجي ناحية نظرية المؤامرة}

ولكسب الحرب ، القت امريكا قنبلة جينومية علي البلد لقتل الرجال فقط .

ولكن لسوء الحظ ، تحول الفيروس المعالج الي فيروس معدي، وقضي علي كل الرجال علي كوكب الارض في مدة بسيطة.

الستات عجبهم الحال بعد الجو ماخليلهم ، وقرروا عدم استنساخ رجالة ، او كما اطلقوا عليهم في الفيلم ، ال Y

... الي آخر الفيلم

:alien:  :lookaround:   :D

[هشام عبد الوهاب]

ما فيش زوجة كده فلته حنينة ومش مستقوية؟؟

يا اتس مى  ،،،، طبعا فيه فلتات لكن زى ما انتى قولتى  ف ل ا ت ا ت

تفتكرى ممكن واحد يعمل موضوع عن فلته

=============================

رجائى

يا صديقى اعلم تماما ان مافيش واحده ست ممكن تقتنع بس اعمل ايه  ،، مش لازم برضه نعمل موضوع ظريف كده علشان كل واحد يقول اللى فى نفسه

=============================

استنوا ماتستعجلوش المسلسل فيه شوية مفاجئات

تفتكروا وبصراحه الحلقه اللى فاتت كام فى المائة صح وزى اللى بيحصل فعلا

ايه ،،،، مافيش حد قادر يرد ،،،، طيب استنوا لما المدام تنام  

:D  :)  :angry:

[freefreer]

حكاية الفلتات دى فكرتنى بأعنية محرم فؤاد .. أبحث عن فلتاء  قامتها هايفاء ..  :D

الموضوع كان 100% زى اللى بيحصل يا هش .. بس مش عندى ..  :)  :angry:

أحنا دبحنا الديناصور من زمااااااااااان ..  :inlove:

[itsme_1666]

صباح الخير  :D

يا اخ رجائى  حضرتك نفسك قصير ليه.....إنت بتقول

انتو عايزين ايه بالضبط عايزين تقولو ان الستات هن السبب طب ماحنا كلنا عارفين

عايزينهن يقتنعوا ؟ يبقى بتنفخوا في قربة مقطوعة لأنه من المؤكد انه لم تولد إلى الآن المرأة التي تقتنع انها مخطئة دي بتقتل الراجل وتقول هو السبب تبقو عايزين ايه

المؤكد اننا ح نوصل لآخر صفحة والكلام هو هو

صدقوني مافيش فايدة

..........

ما تستعجلش يا اخ رجائى وبالهداوة كده جاوبنى  من فضلك :lookaround: وإنت بتجاوب فى سرك تذكر دائما ان لكل فعل  رد فعل ................

لماذا الاصرار على ان الزوجة هى اساس المشاكل والنكد فى البيت ؟؟هل يعامل الزوج زوجته بنفس طريقة معاملته لزميلته او سكرتيرته فى العمل والتى لا تخلو من كل انواع المجاملة والصبر والإبتسامات والتشكرات وعرض الخدمات والمدح وخفة الدم والكرم  ؟؟؟؟

هل يحافظ على شياكته فى مظهره فى البيت كما يحافظ عليها خارج البيت  من دقن محلوقة وبرفانات   وملابس متناسقة وإلا فى البيت مش مشكلة لو لبس جلابية اخوه شلبى أو بيجامة كستور او حتى شورت ما هو مافيش حد غريب ..؟؟     :sneaky:

لماذا لا يعامل الزوج زوجته بشىء من الحكمة  التى تقوم على التمييز  فيتجاهل بعض الكلمات الخاطئة أو التصرفات الخاطئة  التى ربما انطلقت عنها عفوا بسبب تكابل مسؤليات البيت والعمل والاولاد عليها؟؟

يعنى لازم تكون سكرتيرة حلوة علشان يغفر لها اخطاءها؟؟ :sneaky2:  :sneaky2:

وبعدينننننننن فى حاجة مهمة خالص بخصوص موضوع القربة المقطوعة  وأن مافيش فايدة ...تقبلوا بقه  شريك الحياة  على عيبه  فأنتم ناس مؤمنين وتؤمنون بالقضاء والقدر  خيره وشره  .. :th:  فلا يوجد انسان كامل  ولكل عيوبه فما امكن تغيره من هذه العيوب بمحبة وروح جميلة فأهلا وسهلا  و أن كان عيب فى الخلقة والطبع والدم  فيجب التغاضى عنه وإهمال وجوده  وجربوا المقولة الجميلة ده: احبه رغم عيوبه ...والاجمل منها احبه بكل عيوبه ....

اخ هشام  فيه فلتات كتير والله بس احنا دايما كده  نبص  للمساوىء  قبل الحسنات  ...

يعنى انت بتسأل الحلقة الى فاتت كام حاجة فيها بتحصل حقيقى ....انا ارد عليك بكل صدق و امانة ....هو الزوج كان بيقوم الصبح على  تغريد مراته فى بداية الزواج  والعصير والافطار ييجى لغاية عنده  ليه لان ما فيش على الحجر غيره ..طيب لما يكون بقه فيه عدد لا بأس بيه من الاولاد على الحجر ..المفروض انها تفضل تغرد برده وتروح لغاية عنده بالاكل والعصير وتأكله فى بقه والا تأكل االاطفال  الى مابيعرفوش ياكلوا لوحدهم  هو صحيح الزوج طفل كبير  بس لازم يجيلوا وقت يتفطم فيه  علشان الزوجة تلاحق على بقية الاطفال :lookaround:  :lookaround:  :sneaky:  :sneaky2:

يبقى لازم التغريد ينقلب صياح ونعير غصب عنهااااااااااااااا :devil: اما موضوع مساعدته لها فى البيت فى اعتقادى ان الزوج  بيعمل كده متطوعا وليس مرغما  على رأى المثل الى مابيشفوش من الغربال......لكن لو عاوز يريح دماغه ممكن يجيب لها شغالة تساعدها وساعتها هيلاقى  عصفورة جميلة فى البيت مستنياه  وانا قصدى مراته طبعا مش الشغالة :sneaky2:  ..العصفورة ده اصبح عندها الوقت الكافى للظهور بمظهر جميل والاهتمام به على اكمل وجه ...

موضوع السكرتيرات وعلاقاتهم بالزوج ... فده شىء معروف طبعا لان الرجل   بطبعه  باب ا الحب لديه مفتوح ولا يوجد عليه يافطة كامل العدد ولا ممنوع للدخول بل عليه يافطة طويلة عريضة مكتوب عليها اهلا وسهلا بالقادمة الجديدة  وكمان يافطة تانية عليها هل من مزيد ..اصل له يا عينى متجوز دايناصور :devil:  :sneaky2:  :sneaky2:

اخ  freefreer

انا مش ناوية اعمل فيكم حاجة والله ده انا غلبااااااان..... :lookaround:  :lookaround:  بس استنوا عليا لما اخلص آخر تجاربى فى استنساخ رجل حسب الطلب  هتشوفوا العجب...... المشكلة انها معجزة معايا بكام مليون لكن انا عملت جمعية وهأقبضها الاول  :lookaround:  :)

اخ byte

شفت بقه ان فى الافلام الغربية الستات كمان قرروا عدم  استنساخ الرجل بعد ان انتهوا منه نهائيا ؟؟يعنى انا ماجبتش حاجة من عندى  والحمدلله ........

كفاية كده عليكم النهارده  بس والله ماحدش يزعل من  الكلام ده ...خلى عنكم روح رياضيةةةةة

اعتذر  عن الاطالة  :lookaround:

[Ragaai]

البناء الفسيولوجي للمرأة وما خلقها الله عليه يجعلها المسئول الأول عن اضفاء العاطفية والرومانسية على الحياة فالله خلقها رقيقة وعاطفية وزرع فيها الحنان ولهذا اختصها بالحمل والرضاعة لا عن قوة جسمانية كما تتوهم الجاهلات من ضيفات فريدة الزمرولا سيدات المجتمعات والصالونات وإنما عن قوة عاطفة تجعلها تذوب عشقا وحبا في وليدها الجديد والله جعلها سكنا للرجل وأما للطفل لا اضطهادا لها ولا تقليلا من شأنها وإنما لأنه الخالق الذي يعلم كل شيئ عن خلقه

إنما جيل النساء الجديدات -إلا من رحم ربي-فمعظمهن من المسترجلات اللاتي لا يليق حتى مداعبتهن فكيف اداعب رجلا مثلي يناطحني في كل شيئ ويقول بالفم المليان :أنا زيي زيك !!طب إزاي راجل زيي زيه أخده اعزمه على العشاء واحملق في عيونه وشعره واتغزل فيه وانا اراه من داخلي رجلا مهما امتلأ أنوثه

الأنوثه خلقا وطباعا لا شعرا وعيونا

وللأسف معظم النساء نسين انهن نساءا وانشغلن بمعركتهن مع الرجال حتى تحولن إلى رجال مؤنثه ثم -وهذا المضحك حقا-يبحث هذا الرجل المؤنث....عفوا...المتنكر في صورة المرأة يبحث عن العطف والرومانسية !!!طب إزاي بذمتكم

المرأة تريد كل شيئ ...تريد ان تكون رجلا مع الأحتفاظ بكل حقوقها الأنثوية

وتريد أن تظل امرأة مع التمتع بكافة حقوق الرجل

حاجه تحير

[ragab2]

أخونا الفاضل الدكتور رجائى

لا تكن متشائما الى هذه الدرجة

مازالت الدنيا بخير

فقد رأيت بنفسى زوجات كثيرة  نساءا وبهم شيئا من الأنوثة

[zigzag]

في اليومين دول

يتم تشبية المرأة بالجبل ، ويتم تشبية الرجل بالريح

لذا نجد الرئيس عرفات دائما ما يردد مقولة ياجبل ما يهزك ريح

تلعثم الرئيس بوش في خطاب لة بعد احداث الحادي عشر من سبتمبر اثناء حديثة عن الارهاب

فقال  : من ليس معنا فهو مع الزوجات .

عندما يضيق الحال بالرجال اثناء فرض الحصار عليهم داخل المنزل بواسطة شارونهم ، يقومون بسب كونداليزا رايز .

افضل من مثل النساء عالميا  :الانسة مادلين اولبرايت

وافضل من مثلهم مصريا    : ريا وسكينة

[ragab2]

فيه

واحد صاحبى كان سعيد فى حياته الزوجية

وخاصة بعد أن أصبح يقوم بشغل البيت تطوعا

[Byte]

إنما جيل النساء الجديدات -إلا من رحم ربي-فمعظمهن من المسترجلات اللاتي لا يليق حتى مداعبتهن فكيف اداعب رجلا مثلي يناطحني في كل شيئ ويقول بالفم المليان :أنا زيي زيك !!طب إزاي راجل زيي زيه أخده اعزمه على العشاء واحملق في عيونه وشعره واتغزل فيه

بيحصل ، وبيحصل العكس كمان ، والنسبة اصبحت مخيفة لدرجة اني متخيل ان الكلام عن العلاقة بين الرجل والمرأة هايفقد معناه عن قريب :nervous:

يعنى لازم تكون سكرتيرة حلوة علشان يغفر لها اخطاءها؟؟

وهو لازم يعني ان اللي في البيت تبقي وحشة؟

لكن لو عاوز يريح دماغه ممكن يجيب لها شغالة تساعدها وساعتها هيلاقى  عصفورة جميلة فى البيت مستنياه  

مين ده اللي قال اي حاجة عن ستاتنا؟ اقفلوا الموضوع ده ربنا يخليكم علشان الميزانية مش مستحملة وكفاية علينا ضرايب المبيعات، مش عايزين "ضريبة حلاوة" كمان  :cry:

[ســيد مرزوق]

أولا مساء الخير عليكم جميعا

ثانيا الموضوع ده عسل وسكر وضحكني جدا وفرفشني وحسيت إني قاعد مع حبايبي على قهوة في الحي بتاعنا

ثالثا الأخت اتس مي ... بطلة وشجاعة وجامدة أوي  ... والجماعة مستقليينها قدام العدد الكبير ده من الرجالة ... دي ست بميت راجل ... هو حد قادر يغلبها؟؟؟ ماشاء الله ... ردودها في الجون كلها ... الله يكون في عون ... الرجالة ياخويا

رابعا ... بجد بقى .. عن تجربة ... فيه حاجة مهمة جدا لو الزوجين اتفقوا عليها وطبقوها باستمرار ونظام هايكون للحياة معنى تاني خالص ... ألا وهي الحوار المستمر الهاديء المحترم المنطقي

كل يوم .. كل مناسبة .. حوار .. تبادل آراء وإحترام لآراء الطرف الآخر لأن الجواز في البداية والنهاية شراكة فعلية وتعاون وليس خناقة ولا مين هايغلب ومين هايسوق ومين هايبقى سي السيد؟؟

ومفيش حد كامل .. كلنا عيوب .. قبل ما الراجل يفكر في عيوب الست بتاعته يبص لنفسه  الأول ...

بس ياريت يكون بصوت واطي شوية عشان مفيش داعي الجيران يشتركوا معاكم في الحوار ده ... دي برضه أسرار بيوت

خامسا ... (محدش يزعل مني ) وبمناسبة

إن القول أن الراجل بكرش وأصلع وعصبي هاسألك ... بذمتك يا شيخة ... حد  يشوف اللي إحنا بنشوفه ده ومايصلعش؟؟؟؟

حد يعيش زينا كده وما يتجننش؟؟؟

وبعدين ... الكرش .... أولا دي جريمة من تخطيط وتنفيذ الزوجة العزيزة

لأن هي اللي بتقعد تظغط فيه وتحطله الحاجات اللي بتتخن وتغريه ... طب عشان خاطري ... والنبي لاتاكلها من إيدي ... طب خد الفرخة دي ... قايم ليه هو انت لحقت تشبع ... ده حتى حلة المحشي زي ماهي .... وهكذا ياسادة ياكرام ليس حبا في سيادته بل تخطيطا لتشويه قوامه ورشاقته ليتحول إلى حاجة مكعبرة ماحدش يبص له .... صح وللا لأ ؟؟؟؟ و للا الصلع .... تفضل تنحل في شعره بدعوى أنها بتملس على راسه ... قال إيه حب!!!! وتنحل .. وتنحل لغاية ماتغني له أغنية شادية ( شفت القمر على صلعتك ) وترجع تعايره وتذل في أنفاسه وهاتك يا طلبات .. ومعايرات

شفتوش ظلم أكتر من كده يا خواتي؟؟؟؟

:notify:  :notify:  ???  ???  ???

[zigzag]

في عصر الاستنساخ ستستفيد المرآة في العالم بصورة مختلفة  :

في الصين والفلبين ستقوم المرآة بزيادة طولها

في الهند ستقوم بزيادة دلالها

في امريكا ستقوم بزيادة ذكائها

في فرنسا ستقوم بزيادة انوثتها

في بريطانيا ستقوم بزيادة هدوئها

في مصر ستقوم المرآة بتربية  عضلاتها

[zigzag]

سيمر علي الرجل  المصري طورين  خلال عصر الاستنساخ

الطور  الاول

سيتم اضافة سمة اخري لسمات الرجل المصري بالاضافة للصلع والكرش والنظارة وهي سمة العـاهـات المستديمـــــــــــــــــــــة ( من المتوقع وصولها الي اكثر من  99 % )

الطور الثاني

ستنخفض تلك النسبة الي اقل من 30 %  ويرجع سبب ذلك الي :

هجرة  الرجل المصري للخارج للتمتع بحسنات الاستنساخ خارجياً ( وذلك بالنسبة للفرع السائد )

زواج  ال 30 %   الباقين (  زواج بالاكراة )  وذلك للفرع المتنحي

[هشام عبد الوهاب]

حذفت حلقة ليلة الجمعه لطولها وسيفتح لها موضوع مستقل فيما بعد واستبدلت بهذة الحلقة

الحلقة الرابعة

نكدية  لأ  نكدى  استغلالى  لأ  مستبده

----------------------------

اتهام متبادل ودائم ومستمر ولن يحسم ابدا لمصلحة اى من الطرفين

د انتى نكديه بشكل

انا هاها د انت يابنى اكبر نكدى فى التاريخ

وهكذا دائما ،، طيب ماهو الزوج بيرجع من الشغل مقهور مش المفروض يلاقى ابتسامه حلوه

فى اغلب الاحيان بيلاقى سرد لسيناريو المشاكل التى حدثت طوال فترة غيابه لا وايه اول ما يفتح الباب

طيب ماتستنى عليا لما اخد نفسى م السلم

طبعا وانت هامك حاجه م انا طول النهار طالع عينى وانت بلا بلا بلا كذا كذا

وتتفتح الماسوره ولا ماسورة شبرا لما تغرق البلد ولوفتح بقه معترضا يبقى نهاره مش فايت ولو زودها تبدأ تحضر الاكياس البلاستيك والساطور

                                       

---------------------------------------------------------------

اما هو فأحيانا يجلس فى المنزل ولا يعنيه اى مما يحدث حوله ،، الولاد تتخانق  ،، فازه اتكسرت ،، المدام بتصرخ  الحقونى ،، التليفون يرن  ،، انا مش موجود وهكذا  ،، يتسمر على كرسى ولابس مبهدل والسيجارة فى بقة وزجاجة الحاجة الساقعة فى ايده واخر طناش

                                             

----------------------------------------------------------------

هو انت ايه اشترتنى ،، انت فاكرنى جارية  ،، ولا شغالة فى البيت ،،حس بيه شويه يا مستبد

انا ،، حرام عليكى ،، د انا ماحبتش حد ادك ولا هاحب بعدك  - توبه ابقى عيل - قدرى تعبى

                                             

-----------------------------------------------------------------

لو سمحت لما تيجى صاحبتى الساعه خمسة خليك لطيف  

ممممممم دلوقتى عاوزانى ابقى لطيف مش كده

علشان خاطرى ،، خليك لطيف ولما تمشى هاعمل كل اللى انت عاوزه ،، ماشى ياحبيييبى

-------

حبيبى  - هى شاربه حاجه ولا ايه - يمكن ربنا هداها  اعمل بأصلى واما نشوف

                                           

----------------------------------------------------------------

انصرفت صاحبتها

بقولك ايه  ، هى مشيت بسرعه كده ليه

اما انت غريب قوى لازم تتدخل فى كل حاجه

انتى هاتقلبى تااااااااانى

ولا هاقبل ولا زفت انا نازله رايحه لماما علشان تعبانه ،، الاكل عندك فى التلاجه

                                           

والى اللقاء فى الحلقة القادمة