تاتا تاتا بعد الهجرة الي كندا

[arabiccanada]

السلام علكيم ورحمة الله وبركاته
انا عضوة جديدة ووصلت كندا من ٥ شهور. دخلت المنتدي علشان اكتب تجربتي واستفيد من تجارب العرب في كندا علشان بصراحة العزلة قاتلة,,,,فهبدا احكي هنا ,,,كل ما الاقي حاجة تستحق التعليق هتكلم عليها وياريت الاعضاء يتفاعلو معايا

[MZohairy]

ياللا مستنيينك

[alikhedr]

ياريت لو تحكيلنا على خطوات الهجرة والاوراق المطلوبه فى البدايه لعلنا نستفيد من تجربتك

[أدهم الشرقاوى]

أهلاً بيكى و مبروك اللاندنج...

بالرغم من إنى لسه ماوصلتش كندا و لكنى بعكس ناس كتير مش خايف من المشاكل المعروفة لدى المهاجرين الجدد، أنا أكتر شىء راعبنى من الهجرة هى الوحدة، أنا لا خايف من البطالة ولا البرد ولا الشعور بالغربة أبداً لأن كل دول مقدور عليهم أما الوحد بالنسبة لى شىء غاية فى الصعوبة.

أنا بحثت فى حل للموضوع دة و لقيت إنك لازم تشتغلى عشان تحتكى بالناس و تعملى أصحاب و لازم تزورى مراكز مساعدة المهاجرين حتى لو مش محتاجة مساعدة لأن هناك هتقابلى ناس فى نفس وضعك و فاهمين مشاكلك و ممكن تنخرطى فى العمل التطوعى و ممكن تدرسى و و ممكن تزورى الجالية المصرية مثلاً، كل الحاجات دى هتوسع شبكة علاقاتك الإجتماعية بشكل كبير.

لا تتركى نفسك أبداً للوحدة.

[عبير يونس]

تسجيل متابعة عزيزتي و أهلا بيكي في مجتمعنا الجميل و بيت العيلة

محاورات المصريين

:)

[jamalpody]

نفس الوضع لكن في امريكا ...الحياه صعبه بشكل لم اكن اتوقعه ...اجمل ما في الموضوع الطبيعه الخلابه ومدارس الاولاد

[arabiccanada]

انا بعتذر للاعضاء اني كتبت البوست ده واختفيت. اصلي بدرس والامتحانات شغالة.

ازيك يازهيري!! انا عارفاك من منتدي المطاريد,,,انا اسمي هناك كندا دراي لو تفتكرني,,,,,

ماشي هنبدأ اول موضوع وهو اختيار المدينة الافضل للاندنج؟ تفتكرو ايه احسن مدينة للمهاجر اللي مش عايز يصرف فلوس كتير ونفسه يلاقي شغل علي طول؟ انا اخترت هاليفاكس وندمت لان اتضح ان مقاطعة نوفاسوشيا فقيرة وضرايبها عالية والشغل فيها قليل,,,ناس كتير بنصحوني اروح الغرب البرتا خصوصا ,,,بس خايفة اعزل وارجع مالقيش شغل,,,,

انا جوزي تخصص زراعة وهو اللي بيدور علي شغل حاليا ,,,فتفتكرو نعزل ولا نفضل في نوفا سكوشيا؟ اصل العزال هيتكلف 2000 دولار علي الاقل فقرار كبير طبعا

تم تعديل 11 ديسمبر 2013 بواسطة arabiccanada

[arabiccanada]

ادهم الشرقاوي: اصعب حاجة في الغربة هي البطالة والازمة المادية ,,,,,لو تعرف اد ايه الواحد بيعاني لما يكون في الغربة ومافيش فلوس :(

[arabiccanada]

عندي بكرة امتحانين منهم واحد معرفشي فيه البطيخ وقاعدة علي الفيس .بصراحة تعبت من المذاكرة وزهقت من الدراسة,,,,,هو انا هفضل طول عمري اذاكر ياربي!!!

[MZohairy]

ازيك يا كندا دراي

حللت اهلا و نزلتي سهلا

انتي في اول بلد كندي تصادف القادم من الشرق

ياللا احكيلنا بقى

[MZohairy]

لو لقيتي الامور مش ماشيه و مش واضحه بعد المجهود المعقول في البحث عن عمل (شهاده كنديه و ريزومي قويه و بحث مضني يومي على النت)

يبقى تتكلي على الله و على كالجاري فورا

[أدهم الشرقاوى]

أهلا كندا دراى :) أنا فاكرك على فكرة من أيام المطاريد و متابع المدونة بتاعتك.

على فكرة اللى أنتى فيه دة عادى، تقريباً كل المهاجرين - اللى عاوزين يبقوا حاجة - فى الطاحونة اللى أنتى فيها، كندا محتاجة 5 سنين مذاكرة و معادلة و شغل و عمل تطوعى و فحت و ردم، كندا محتاجة مجهود مضنى عشان تبقى حاجة ذات قيمه فيها للأسف شهادتنا غير معترف بيها فى العالم المتحضر و عشان نكبر فى كندا لازم نرميها فى الزبالة و نبدأ من أول و نضيف.....تحلى بالصبر و دايماً خلى فى بالك إن اللى رماكى على المر اللى أمر منه، أقولهالك و بكل صدق إن معظم المصريين يتمنوا حياتك بما فيها المشاكل فى مقابل إنهم يسيبوا مصر، البلد أصبحت مرتع للصراعات السياسية و الدموية فماتندميش على قرارك ولا تحسى للحظه إنه كان غلط لأنك ببساطة ماكانش فى أى حل تانى قدامك.

مصر كانت لازم تتساب و كندا كانت لازم نروحها و عشان تنبى مستقبل لنفسك فى كندا لازم تدرس، مفيش حل تانى فالعمل دلوقتى إن لو الوضع إستمر على تلك الوتيرة من بطاله و خلافه شدى الرحال على الغرب و إبدأى هناك بجد لأن ببساطة نوفاسكوشيا مش أحسن مكان للبدء كمهاجر جديد بس عادى محدش بيتعلم ببلاش و محدش بياكلها بالساهل.

إن شاء الله خير و أهلاً بيكى فى المحاورات.

[arabiccanada]

شكرا يازهيري ويا أدهم علي ردودكم
بالنسبة ليك ياأدهم حماسك بيفكرني بشعوري لما كنت في مصر. كان عندي استعداد اعمل اي حاجة علشان امشي من كتر خوفي من المستقبل,,,,بس صدقني الحياة هنا اصعب مما اي مهاجر جديد يتخيل,,,,قريت موضوعي عن الاحوال المادية للمهاجر الجديد?

http://immigrant2hope.blogspot.ca/2013/11/blog-post_16.html

هوا الوضع كدة بالظبط .

[أدهم الشرقاوى]

شكرا يازهيري ويا أدهم علي ردودكم

بالنسبة ليك ياأدهم حماسك بيفكرني بشعوري لما كنت في مصر. كان عندي استعداد اعمل اي حاجة علشان امشي من كتر خوفي من المستقبل,,,,بس صدقني الحياة هنا اصعب مما اي مهاجر جديد يتخيل,,,,قريت موضوعي عن الاحوال المادية للمهاجر الجديد?

http://immigrant2hope.blogspot.ca/2013/11/blog-post_16.html

هوا الوضع كدة بالظبط .

بصراحة الكلام كويس و واقعى بس فى حاجة أنا لازم أعقب عليها، حقيقي معظم المهاجرين فى تلك الأزمة المادية بلا شك بس جزء كبير من الأزمة دى هو المكان، المقاطعة ممكن تكون ضرايبها عالية و الخدمات فيها مش على المستوى أو المقاطعة نفسها فقيرة الموارد. نوفاسكوشيا زى برنس إدوارد زى نيوفوندلاند ليسوا أبداً المكان الأنسب للبداية كمهاجر جديد.

لى أصدقاء فى مونتريال و فى كالجرى و هى المدن الأشهر فى أوساط المهاجرين الجدد، اللى فى مونتريال فى الغالب بيدرس و فلوس القرض الدراسى على فلوس معونة الأطفال على المرتجع الضريبى بتاع آخر السنة و المصاريف قليلة أصلاً لأن البلد رخيصة ف الدنيا ماشية معاه أما اللى فى كالجرى بيدرس و بيشتغل سيكيوريتى بارت تايم و دخلة 1200 دولار و فلوس الشغل على فلوس القرض و بالرغم من غلو المعيشة بس الدنيا بردو ماشية.

أنا رأيي الشخصى إن مادام فى أطفال و زوج و زوجة، لازم حد يشتغل (حتى و لو كاجوال و مش عيب أبداً على فكرة) و التانى يدرس. اللى بيشتغل هيجيب دخل 1600 دولار على الأقل و اللى بيدرس هيجيب 1000 و على معونة الأطفال كل طفل 300 مثلاً يعنى 3000 دولار زى الفل. صدقينى الـ 3000 دولار فى إدمونتون أو كالجرى أو فورت ماكمرى لأسرة من 3 أفراد كويسين.

بالنسبة للشغل الكاجوال، فى أشغال مرهقة و مهينة للآمية فعلاَ بس فى نفس الوقت فى وظايف مرتبها معقول و مش بهدلة على سبيل المثال و ليس الحصر: سيكيوريتى، كاشير، عامل فى سوبر ماركت.

كل الكلام اللى فوق دة أنا ماعشتوش بس سمعته كذا مرة من كذا صديق عايشين فى كذا مدينة

[arabiccanada]

تمام يا ادهم عندك حق,,,,المفروض واحد يدرس والتاني يشتغل. لان الاعتماد علي دخل واحد في الاسرة صعب جدا,,,,,الكنديين نفسهم اللي في الوظائف الكاجوال بيعانو لو الاب بس هو اللي بيشتغل. بالنسبة للمقاطعة والله ماعارفة,,,,سمعت كتير بعد ماجيت انها فقيرة وضرايبها عالية,,بس مش عارفة امشي منها لان انا مرتبطة بالدراسة حاليا,,,,وخايفة اضحي واسب الدراسة والقرض الدراسي اللي هنا وبعدين اقع في مشكلة البطالة بردو في اي مقاطعة تانية,,,ده غير اني خلاص مش هينفع اخد اي قرض دراسي من مقاطعة تانية قبل ما اقضي سنة فيها,,,,,,يعني هكون اتورطت لا شغل ولا قرض دراسي,,,والمعونة الاجتماعية ماتأكلشي عيش حاف.

[arabiccanada]

بالمناسبة الناس اللي عايشة في كندا, ياريت تقرو الكلام ده عن المعونة الاجتماعية وتقولولي اذا كان صحيح ولا لأ,,,اصل بصراحة انا جبته من مصادر قليلية لأن اللي بياخد مساعدة اجتماعية مش بيقول ابدا هو بياخد كام:

http://immigrant2hope.blogspot.ca/2013/12/blog-post.html

[MZohairy]

في بريتش كولومبيا و اعتقد في كل الولايات الشخص الاعزب بياخد 600 دولار ول فير بحد اقصى شهريا

و الأسره من 4 اشخاص فما فوق بياخدوا 1200 دولار شهريا بحد اقصى ول فير

[أدهم الشرقاوى]

تمام يا ادهم عندك حق,,,,المفروض واحد يدرس والتاني يشتغل. لان الاعتماد علي دخل واحد في الاسرة صعب جدا,,,,,الكنديين نفسهم اللي في الوظائف الكاجوال بيعانو لو الاب بس هو اللي بيشتغل. بالنسبة للمقاطعة والله ماعارفة,,,,سمعت كتير بعد ماجيت انها فقيرة وضرايبها عالية,,بس مش عارفة امشي منها لان انا مرتبطة بالدراسة حاليا,,,,وخايفة اضحي واسب الدراسة والقرض الدراسي اللي هنا وبعدين اقع في مشكلة البطالة بردو في اي مقاطعة تانية,,,ده غير اني خلاص مش هينفع اخد اي قرض دراسي من مقاطعة تانية قبل ما اقضي سنة فيها,,,,,,يعني هكون اتورطت لا شغل ولا قرض دراسي,,,والمعونة الاجتماعية ماتأكلشي عيش حاف.

بصى عشان نبقى واضحين و صرحاء لازم نقر و نعترف بإن البطالة فى الفترة الأولى للإستقرار هى مشكلة 80% من المهاجرين بس لازم نحط فى الإعتبار إن كثير منهم عاطل بمزاجة بالذات فى المقاطعات المليئة بالوظايف الكاجوال زى أونتاريو و ألبرتا بمعنى آخر إن فى ناس و بالذات المصريين - البعض و ليس الكل - اللى كانوا أطباء أو مهندسين أو محاسبين و ماسكين وظايف محترمة كمدراء و رؤساء أقسام فى بلدهم مش قادرين يقبلوا بالوضع الجديد و مش قادرين يفهموا إن الشغل الكاجوال مرحلة إنتقالية لازم كله يعدى بيها و مش قادرين يفهموا إن تعليمك و خبرتك و شهاداتك المصرية للأسف فى الغالب قيمتها صفر عند الغرب و لابد إن معظم المهاجرين يمروا بالمرحلة دى مهما كانت معاك شهادات و مهما كنت متفوق فى مجالك طول ما أنت مالكش ريفيرنس فى البلد يقول فيك كلمتين كويسين لما يتسأل عنك و طول ما أنت مالكش جذور قوية و شبكة علاقات و مالكش أى دليل على إكتسابك للخبرة الكندية يبقى أنت بتضيع وقت و بتعند مع نظام البلد كلها و هتبقى خسران فى الأغلب.

الحل فى مشكلتك إنك تستنى لحد ما تخلصى دراسة لأنك مربوطة بالقرض الدراسى و كملى فى البحث عن عمل بارت تايم فى أجازة الصيف مثلاً أو فى الويك إند لو ظروفك تسمح و حاولى لو تقدرى تضغطى فى مصاريفك، ناس كتيرة أجمعت إن الشراء بكميات فى المواسم و الأوكازيونات ممكن يوفر لحد 50% من المصاريف، تابعى العروض و الفلايرز اللى بيتجى فى البريد، ممكن تستغنى عن إشتراك التليفزيون و تشترى أونلاين ريسيفر بيشتغل على الإنترنت و ممكن تستغنى عن التليفون الأرضى و ممكن تقللى الأوبشنز اللى فى بلان الموبايل بتاعك يعنى اللى أقصده فى سكك لتوفير الفلوس لأن ناس كتيرة فى نفس ظروفك و أنا أحسبهم و الله أعلم أقل معاناه لأنهم بيوفروا قدر إستطاعتهم.

[arabiccanada]

هو الاون لاين ريسيفر ده نجيبه منين؟ ده ممكن يوفر شوية . بالنسبة لتليفون المنزل مستحيل الاستغناء عنه لان فيه مصالح هنا كتير بالتليفون,,

انا واخدة اقل بلان موبايل ,,,ده انا حتي وقفت الاشتراك لمدة شهرين علشان عايزة اوفر,,,بس مافيش فايدة المصاريف بردو 3000 دولار شهريا.

[arabiccanada]

الوظائف الكاجوال في نوفاسكوشيا مس سهل تلاقيها,,,ولو لاقيتها هيبقي بارت تايم وفي اوقات صعبة يعني ويك اند وشيفت الليل,,,,,

والشغل مع دراستي انا مستحيل لان كمية الواجب والمشاريع خرافية ,,,ده انا كدة يادوب هنجح.

بالنسبة لزوجي هو حاليا بيحضر علشان يقدم ابليكشن المعادلة في نقابة المهندسين,,,ودي لوحدها شغلانة,,,تخيل الابلكيشن حوالي 100 صفحة!!! بقاله شهرين مش بيعمل حاجة الا كدة زائد كورسات التوظيف بتاعة مركز المهاجرين والتقديم المستمر علي الوظائف اون لاين ودي بردو بتاخد وقت كتير جدا.

المشكلة في الشغل الكاجوال انه بيحرمك من فرصة تطوير نفسك,,,يعني الدراسة او البحث عن وظيفة افضل في حد ذاتها عايزة وقت وتفرغ....

عامة انت واضح ان عندك فكرة كويسة عن الحياة في كندا , فمش هتتصدم لما تيجي,,,,رغم اني ارجع واقول انك تعرف حاجة وانك تعيش الوضع حاجة تانية خالص