تصنيف محافظات مصر لاوصاف واكاذيب وهمية

[Guest النسر المصري]

السلام عليكم يا جماعة

طبعا كلكم اكيد مريتوا بواحد وكنت مختلف معاه في رأي ما..... وسأل سؤال سخيف

انت منين؟ انت تقوله انا من مصر

يقولك لا انا عايز اعرف انت منين من مصر

انت تقوله انا من العريش مثلا... يقوم آآآ لامؤاخذة اصل احنا نعرف عنكم انكم خونة وعملاء لاسرائيل

وفي اللي يبصلك من فوق وتحت ويتجاهلك

واذا قلتله انا من دمايط.. يقول : مممم تحب تتعشى ولا انت بتنام بعد ماتتمشى(في اشارة الى البخل

او لو قلت ان منوفي تبقى ليلتك نيلة

وهكذا لو كنت صعيدي او بورسعيدي او اسكندراني او او او او ......

بل لو اصريت لواحد اني من مصر من القاهرة

راسه والف شوز لازم يعرف انا منين من مصر

اذا قلتله من مدينة نصر يقولي ياااي انتم بتوع البونبون

واذا شبراوي هبقى صايع

واذا من عين شمس يبقى مش عارف اية وذا واذا واذا...

وبعدين ... وأخرتها ... اية المفروض يحصل بعد كدة

نقسم مصر الى ?? دويلة ونفك راسنا

ولانلغي حاجة اسمها محافظات

ولا نبدل برمجة الشعب

انا اذكر وانا طالب في الفنون الجميلة وكنت وقتها أمين اللجنة الثقافية

وكانت في ندوة للأمناء والمدرسين والدكاترة مع الطلبة لحوار مفتوح بمناسبة مرور ?? عاما على انشاء الكلية

وطرحت القضية دي

واكتشفت مدى تعمق المصري في الاشاعات وسهولة تصديقها

وكاد في اول الامر ان يتحول النقاش الى حرب أهلية

ولكني تعمدت طرح كل سلبية عن اي وافد او قاهري يقال ان كذاو كذا عشان اعرف اصل الحكاية اية

وبعديها بدأت أسرد رأي ديننا الاسلامي الحنيف في هذا الأمر السخيف والذي يصنف تحت اسم الساخرين

يقول الله تعالى : " قول الله تعالى : "ياأيها الذين آمنوا لايسخر قوم من قوم عسى أن يكونوا خيراً منهم ولانساءٌ من نساءٍ عسى أن يكن خيراً منهن ولاتلمزوا أنفسكم ولاتنابزوا بالألقاب بئس الإسم الفسوق بعد الإيمان ومن لم يتب فأولئك هم الظالمون"

في الحديث : (يامن آمن بلسانه ولم يفض الإيمان إلي قلبه لاتغتابوا المسلمين ولاتتبعوا عوراتهم،فإنه من يتبع عورة أخيه يتبع الله عورته ومن يتبع الله عورته يفضحه ولو في جوف بيته) أخرجه الحافظ 

ويكتمل بنا الحديث والكل كان في صمت رهيب وكأنهم لأول مرة يسمعون بتلك الآيات والأحاديث

وننتقل إلى النتائج السلبية الرهيبة التي قد تحدث والتي حدثت بالفعل .. مثل التفكك الجتماعي والأسري وضمور الشعور بالوحدة الوطنية ثم مايترتب عليه من انقسامات حادة في الرأي تصل إلى حال التقسيم كما حدث في الدول العربية وقد يستمر التقسيم إلى داخل مصر أيضاً

وكل ذلك بسبب تفاهات مغرضة لاتستند الى اي نوع من الواقع

والآن... وبعد ماسمعتوا اللي حصل اقدر اعرف رأيكم ايه في الموضوع دة؟

والاهم ازاي نقدر نواجه هذا الأمر؟ وازاي نقدر نحل المشكلة دي؟

حد عنده حل ؟

حد عنده بنادول كمان عشان انا دماغي صدعت؟

آآآ ه يانافوخي

[وليد صفوت]

موضوع جميل يا نسر ,.......

بس معلش انا اعترض عالعنوان ,.... العنوان عنيف جداً و شكله وحش اوى فى قائمة الموضوعات الجديدة

يا ريت تغيّره للأحسن ,... عشان العنوان فى حد ذاته شتيمة :angry:

و لا انت شايف ايه ؟

[se_ Elsyed]

تم نقل الموضوع إلى باب المناقسات العامة " موضوعات خفيفة " وتم تعديل العنوان ليتناسب مع الموضوع .

سي السيد

الإدارة

[mb14]

فعلا يا نسر زى ما قال فيولين كنج الموضوع جميل

ودى من اكبر مناطق ضعفنا فى مصر سهولة انتشار الأشاعات والأكاذيب بين الشعب المصرى ودى يرجع ان الناس ما عندهاش فكرة الرفض او التفكير قبل القبول ولكن عندنا سرعة الأستقبال عالية قوى وتصديق كل مايسمع كل اللى يدخل من ودننا على الذاكرة عدل بدون مرور على مركز التفكير والدراسة وفصل المنطقى عن غير المنطقى .

ومن الحاجات المنتشرة عن مناطق مصر المختلفة الحاجات اللى انتى قلتها كأنها مسلمات مع انى اغلب الناس ما بيتعاملش مع اناس من كل محافظات مصر عشان يحكم عليهم ودى صعب قوى انى يكون اهل بلد كلهم فيهم نفس الميزة أو العيب (دى احيانا الأخوات ما بيكونوش متطابقين ممكن واحد كويس أخوة يكون العكس ).

متهيألى( ومش عايز أؤكد) ان دى كان من نتائج ايام الأحتلال انى الجماعة الأنجليز عرفوا الموضوع دى فى المصريين فبدأوا ينشروا الحاجات دى زى مثلا ما انهم كانوا عاوزين يعملوا تفريق بين المسلمين والمسيحين فى مصر (ولكن طبعا فشلوا ).

وطبعا من الحاجات المشهورة وبتزعل كانت انتشار النكت على الصعايدة .

وهذا يسبب نوع كبير من الضيق للأخوة الصعايدة اللى انا منهم .

عشان نحاول نلغى الموضوع دى لازم الشعب يتعلم ثقافة المناقشة وربما الرفض وعدم قبول كل مايقال يعنى التلميذ فى الفصل مش لازم يبقى كل اللى يقوله المدرس صح ولازم يتحفظ ولكن يجب ان يكون هناك نقاش واخذ ورد وبذلك يكون اقتناع اكثر .

حققية اول مرة كنت اتعامل مع غربيين فوجئت بجرأتهم فى التعامل مع رؤسائهم ولكن باحترام وكان كل ما يقولى نعمل حاجة أقوله لأ يقولى?Why not أو why ليه لأ؟ او ليه ؟ الكلمة نفسها مش متعودين عليها كتير فى التعامل مع رؤسائنا هنا ولكن نعرف كلمة حاضر وماشى لكن لأ صعبة والنقاش بيتعب الواحد يريح دماغة ويقول حاضر وخلاص مع انى النتيجة فى حالة النقاش بتكون افضل لأنك لما بتعمل نفس الحاجة بتعملها وانتى مقتنع وبتأديها بكل اخلاص واكتمال .

[Guest النسر المصري]

أولاً أعتذر للسي سيد ولإدارة الموقع ولفيولين كينج عن العنوان

فعلا كان شكله بايخ ولو انه بيعبر عن الواقع فعلا من ناحية الأكاذيب الوهمية

ثانيا انا معاك فعلا يا mb14 في اللي بتقوله عن ان الانجليز ممكن يكونوا هم السبب في هذا الموضوع

ولكن القضية الخطيرة دي مسببة أزمة نفسية لمعظم المصريين ومن بينهم انت وانا

انا ايضاً من العريش وبستغرب ان مجرد ماأنطقها ألاقي اللي قدامي كأن عفريت ركبه وياخد مني جنب

ورغم اني مدير في موقع عمل مرموق إلا إن دة مايمنعش الاعتقادات السخيفة دي

فأصريت إن أسأل وأعرف سبب إطلاق لفظ الخونة عل العرايشية

وهات يامليون رأي ورأي ... اللي يقول أصلهم كانوا بيبيعوا الميه للجنود مقابل السلاح...وفي اللي قال اصلهم كانو بيتعاونوا مع اليهود ضدنا..

وفي اللي قال أصلهم ماكانوش بيحاربوا مع المصريين.. وفي وفي وفي...

وهاااات ياقصص وحكايات زي مانت عايز....همال احنا بقينا الأوائل في الأدب القصصي من قليل.. ولا حتى في المسرح والسيما..والسبب ان احنا بنعرف ازاي نفبرك الاشاعة...

وطبعا انا هرد على الكلام الخايب دة

كلنا عارفين حلقة بتيجي بقالها سنتين لبرنامج اسمه بطل من العرش .. واللي كان بتكلم في عن بطولات عملها الراجل دة وفقد فيها نص عيلته الرجالة... واذكركم بالبدوي السواركة اللي حارب مع عشيرته مع المصريين وفضل في السجون الاسرائيلية ?? عاما ..وكلنا شفناه في برنامج هذا المساء...بل وللعلم يمكن ماتعرفوش معظم المجازر اللي قامت بها اسرائيل بحق اهل سيناء...دفن جماعي وهم أحياء..ألاف الاهالي والجنود قتلوا وهم مجردين من السلاح .. وطبعا دة شيء عادي ان احنا نسمع عنه عن الاسرائليين... أذكر إن في قصة عن موشيه ديان وكان مقر اقامته في العريش

ووقتها خرجت أهالي العريش بكل أعمارها للاحتجاج ووتنظيم مظاهرة غاضبة...فقام موشية القذر باصطحاب الأهالي إلى ميدان الفواخرية..وهناك قام بتصفية كل الشباب والكثير من الرجال..وكان ذلك اليوم من الأيام السوداء الكثيرة التي مرت على أهالي مصر وسيناء... القضية كانت أرض مصر بيتمس شرفها بتدنيس اليهود لأرضها... واحنا قاعدين بننتظر إختراعات وإشاعات مغرضة الهدف منها إنشاء تفرقة بين أهالي مصر

وتعال معايا نشوف الكلام الفاضي اللي طالع عن حبايبنا الدمايطة...انا اعرف ان أرخص وأحسن صناعات الأثاث موجودة في دمياط..ولما تروح هناك سواء اشتريت ولا لأ الراجل بيستقبلك احسن استقبال

ونيجي على الناس الجدعان والرجالة الصعايدة واللي بلادهم تمثل نصف مصر .. أنا أعرف إن الشطار والأمين من التجار هم في الأصل صعايدة

وبيقدروا من كام جنية يعملوا مشاريع تعملك ألافات الجنيهات..وأحيانا ملاين.. مما يدل على ذكائهم الشديد...وماننساش الزعيم عبدالناصر وقوة شخصيته...

ولما أتذكر المنوفي هاتذكر زكتر من عشرة أصحاب لي من أصحاب الشهامة والأدب والأخلاق ...بل والبنت الوحيدة اللي لهلبت قلبي وحبيتها ومن أعماق جوفي كانت من المنوفية.. ولن أنساها طالما حييت

والبورسعيدية والاسماعلاوية والشبراوية واهل النوبة الكرام ووووو

وهخرج لبرة كمان حيث ان عملي في الخارج وهلاقي اصحاب سوريين ولبنانيين وكويتيين وسعوديين وكلنا أصحاب ويد واحدة مسيحي ومسلم

بل إن كان من أكثر الناس إيمانا بقدراتي ووقوفهم بجانبي كانوا هنود .. انا لي صديقين اسمهما جورج و ولسون هنديين مسيحيين وأنا وصديقي الصعيدي نحن الأربعة أصحاب ويد واحدة نعمل معا وكاننا من بطن ام واحدة

هذا ان دل فانه يدل على العبرة بالاخلاق الراقية....

امتى بقى نتعلم الرقي والتحضر في التعامل

وننسى الهيافات