>أرجو النصيحة من كل مسلم

[الحمد لله]

السلام عليكم ورحمه الله

انا متابع المحاورات من ما يقرب من سنتين بس كنت متابعة كواحد عايز يشارك ابناء بلدة المغتربين نفس مشاعرهم وأحساسهم

لكن دلوقتى انا جالى عرض سفر الى السعودية (جـــــــدة) فعندى بعض الاستفسارات والاسئلة اتمنى اجد اجابة ليها عندكم:

1/العرض اللى جيلى بوظيفة أستور كيبر وانا معايا ليسانس حقوق2009,وخبرة 3سنوات وانجلش واوفيس مش بطال

وكنت شغال فى احدى شركات التجزئة الكبيرة داخل مصر(مشرف مبيعات)

فمش عارف اقبل ولا لآ مع العلم ان الراتب كويس والسكن على الشغل وانا عازب وكمان هية شركة محترمة,

بس انا حاسس ان الوظيفة ملهاش مستقبل وخايف اوى

فياترا افضل فمصر واكبر فيها ولا اسافر واكون نفسى واجبلى شقة واجوز صغير ولا عمل اية بس,

خايف انى ما اكبرش فيها وميكونش ليها تدرج وظيفى

2/انا عارف السؤال دة متكرر كتير بس معلش سمحونى لانى بجد خايف اوى,كنت عايز اعرف المعيشة فى جدة

(أكل وشرب ونت ومواصلات وكدة يعنى...)

3/هل فى اماكن ترفيهية فى جدة زى مصر كدة مع العلم انا قاهراوى

4/انا من دلوقتى شايل هم انى لو سافرت امتى هرجع وهل اقضى بقيت حياتى فالغربة وخلاص كدة مصر خلاص

وامى كدة مش هشوفها غير كل سنة..

ولو نزلت هشتغل اية وبكام.,,انا مش عارف خايف اوى عايز حد يطمنى او ينصحنى

5/انا معايا رخصة قيادة مصرية بس بسوق على قدى خالص,,,فهل ممكن فجدة اشترى عربية صغيرة زى ال28 او الماروتى واتعلم هناك واظبط حالى ولا صعب والعربيات دى بتبقى فى رينج كام

اخر سؤال اية الحاجات الضرورية اللى محتاج اخدها من مصر واللبس كمان اجيب شتوى كتير ولا حاجات بسيطة

لانى بسمع ان جدة مفهاش شتاء

...ربنا يجازيكم كل خير وانا واللة بحبكم جدا فى الله

ولكم منى جزيل الشكر

[suma]

بسم الله الرحمن الرحيم

ليس عندي اجابة لجميع اسئلتك ولكن عندي تجربة السفردي وقد افيدك في بعض الاشياء.

اولا جده مدينة جميلة جدا جدا مثل عروس البحر عندنا.

ثانيا عن المدة انت وحدك الذي تحددها ضع لنفسك هدف معين تريد الوصول اليه وبعدين قول ستوب....اما عنممكن تجد عملا من تاني هنا لا ادري لم لا تؤسس عملا خاصا بك مادام عند رأس مال؟؟ووظيفتك السابقه هنا تقول انك تستطيع.

ثالثا عن القيادة كثيرون سافروا ولم يكونوا سائقين ولا معاهم رخصة ولكن العلام هناك سهل الشباب بيعلمون بعضهم وده في البر حتى الاطفال بترجع هنا تجيد القيادة وممكن تأخذ رخصة من هناك فتعليم القيادة هناك يكون على اصوله زي ما قال الكتاب

رابعا احذر جده بها مغريات كثير مولات واسواق لا تعد ولال تحصى فلا يكن همك الشراء حتى توفر من الراتب الكثير --افتح لك حسابا في بنك هنا وخذ رقم حسابك وحول الراتب اول ما تأخذه مع رفع جزء يكفييك لآخر الشهر .

فكر انها تجربة جميلة وقد تنال أداء فريضة الحج

ولك تحياتي

سومه

[AbuZeyad]

جدة من احسن الاماكن اللي ممكن تعيش فيها في السعودية

بلد روحها قريبة من مصر بشكل كبير

فيها بحر وان كان مش حلو زي بحر اسكندرية مثلا وقريبة من مكة والمدينة ودي ميزة هايلة وان كان دا هايخليك لازم تشوف اي حد جاي يعمل عمرة من اسرتكم وتعمل معاه الواجب

جوها حلو معظم السنة بس في الصيف رطوبة عالية بشكل يخنق وصعب تخرج اي مكان مفتوح وخصوصا الكورنيش ممكن تلاقي نفسك بتعصر هدومك من العرق وتقريبا مفيهاش شتا

الترفيه الوحيد في جدة هو المولات بشكل اساسي وفيه حدائق مفتوحة وكورنيش معقول للفسح متقلقش من الترفيه صعب تزهق في جدة

الشتا في جدة شبة ايام الصيف الحلوة في مصر يعني ممكن بس تلبس قميص بكم لو بردان بس طبعا دا ميمنعش انك تخلى معاك جاكت علشان لو سافرت اي مكان بعيد زي المدينة مثلا بيكون فيها الشتا شديد

حقيقي مش عارف مستقبل وظيفة الستور كيبر بس اللى انا شايفه انك في مصر مش شغال في مجالك وشغال مبيعات برضه فاظن مش فارقة انك تشتغلها في مصر او السعودية كلها مبيعات واهو في السعودية بفلوس احسن

بشكل عام انت ممكن تفكر في السفر لو المبلغ المعروض عليك في السعودية لا يقل عن 3 اضعاف دخلك في مصر غير التأمين الصحي لا يقل عن Class B ودا مهم جدا وتذاكر الطيران غير كدا الموضوع مش جايب همه

بالنسبة لمصاريفك ممكن 1000-1500 ريال يكفوك طبعا دا متوقف على انك مدخن او لا او انك بتعرف تطبخ ولا هاتقضيها من بره

بالنسبة لموضوع الشقة اللى عاوز تسافر علشان تجيبها انا مش عاوز احبطك بس موضوع الشقة دا يمكن حلم 90% من المصريين الى في السعودية وبيسعوا وراها لسنيييين وتقسيط ومقدم فلو هدفك انك تجيب شقة اعمل حسابك على مدة في حدود 5 سنين على الاقل لو كنت سعيد الحظ وعرفت تظبط ميزانيتك وتلاقي حاجة بسعر معقول في مصر وانت لو قعدت في السعودية المدة دي صدقني في الغالب مش هاتكون عاوز ترجع بعدها

وامي مش هاشوفها غير كل سنة

بالنسبة للنقطة دي معاك حق علشان كدا لازم تسال مهنتك في التأشيرة مسموح له زيارة ولا لأ لو مهنتك بيها زيارة ممكن تجيب والدتك زيارة مرة او مرتين في السنة وكمان لازم تعرف مهنتك ليها استقدام ولا لأ علشان لما تتجوز تعرف تجيب زوجتك ودا مهم جدا

بالنسبة للقيادة طبعا احسن لك انك يكون معاك سيارتك علشان جدة مفيهاش مواصلات عامة تقريبا معندكش غير التاكسي واقل مشوار 10 ريال يعني ميزانية لوحده وطالما انك معاك رخصة مصرية حاول تقوي نفسك في السواقة قبل ما تيجي متغلطش وتيجي تتعلم السواقة في السعودية هاتتكلف كتيييير واحتمالات فشل في اختبار الرخصة عالية اتعلم كويس في مصر وطالما معاك رخصة مصرية بتسهل كتير الحصول على الرخصة السعودية

السعودية مش هاتلاقي فيها الـ 28!! دا لو واحد ساقها في السعودية ممكن الناس تتعامل معاه كانه من كوكب اخر وحتى الماروتي قليله بيستعملوها في الديليفري

السيارة الصغيرة ممكن تقول الكيا بيكانتو او الكيا ريو دي قسطها الشهري او هاتشتريها جديد من 800 - 1000 ريال ممكن كمان الدايهاتسو سيريون بس كل السيارات دي ملهاش سعر عند اعادة البيع

لو حابب تشتري مستعمل يبقى حاول تحوش 20000 - 25000 ريال علشان تشتري حاجة معقولة مبلغ زي دا ممكن يجيلك يارس او اوبترا بحالة متوسطة

بس بشكل عام السيارة ضرورة ومهمة بس خلى القرار فيها لما تيجي وتشوف الدنيا فيها ايه

اخيرا لما تيجي من مصر متكترش اهم حاجة هات معاك صور من كل شهاداتك وصور شخصية ليك وفلوس طبعا علشان متضمنش الظروف اول ما تيجي هاتكون ايه

واستخير وتوكل على الله

وبالتوفيق

[الحمد لله]

اولا: انا بشكر الاستاذ/ابو زياد والاستاذة/سومة بجد من قلبى وجزاكم اللة كل خير على المعلومات الجميلة دى

ثانيا: انا مهنتى فى التاشيرة عامل فبالتالى ممكن اعمل زيارة لوالدتى ان شاء اللة وانا امنية حياتى احججها لانها بتحلم بالموضوع دة ,فها الموضوع دة سهل ولا صعب؟

وانا من خلال بحثى فى المنتدى شوفت ان ممكن اغير مهنتى لاى مهنة تانية لما اجى اجوز علشان الاستقدام..فياريت حد يدلنى اية هية المهن المتاحة لية؟

ثالثا:والاستا/ابو زياد بيقولى انك لو انت قعدت في السعودية المدة دي صدقني في الغالب

مش هاتكون عاوز ترجع بعدها (5سنوات) لية ؟

رابعا:انا نفسى اعرف أراء الناس العظماء مع حفظ الالقاب طبعا:

1:سى السيد

2:عبير الشرقاوى

3:خالد شحاتة

وغيرهم من الناس اللى على مدار سنين ياما سعدوا ناس ووقفوا جمبهم بدون مقابل وذلك كان لوجة اللة فقط

اتمنى اسمع اراء الناس كلها وباللة عليكم يا مصريين متبخلوش علية بخبرتكم

وشكرا

تم تعديل 8 ديسمبر 2013 بواسطة الحمد لله

[AbuZeyad]

شوف يا سيدي

لو كملت الخمس سنين في السعودية في الغالب هاتكون ظبطت حياتك على الحياة في السعودية وهايكون أصحابك ومعارفك في مصر نسيوك فهتلاقي ان العودة والبدء من جديد في مصر صعبة جدا وانت مالكش مكان فيها خصوصا ان سنك هايكون في حدود التلاتين وبالعكس هتلاقي علاقاتك ومعارفك في السعودية اقوى وممكن تنقل لعمل تاني افضل بعلاقاتك

دا غير انك لما تشوف مصر من برة بتخاف ترجع لها! وبتحس ان الحياة فيها مستحيلة غير ان كل اللي في مصر هتلاقيهم في الغالب بيقولوا لك العبارة الشهيرة "خليك عندك واوعى ترجع"

حقيقى لما تروح مصر اجازة تستغرب الناس عايشين ازاي من السواد اللى بتشوفه في التلفزيون وتندهش ان الناس بتواصل حياتها

بالتدريج بتلاقي نفسك خايف ترجع بلدك وتستسهل الحياة في السعودية

هو الموضوع اشبة ببحر الرمال المتحركة كل ما تطول فيه تغطس اكتر! هي دي حقيقة الغربة يا صديقي

بالنسبة للمهنة انا مش عاوز احبطك بس مهنة العامل في الغالب ملهاش حتى الزيارة غير بصعوبة طبعا انسى الاستقدام تماماً طول ما انت بالمهنة دي ومش عارف المهن اللى ممكن تحول ليها كخريج حقوق

في موسم الحج اللى فات ناس كتير كانوا عاملين زيارة زمعرفوش يجددوها بعد رمضان واضطروا يسفروا اهلهم مصر قبل الحج لانهم كانوا مشددين السنة اللى فاتت انا شخصيا خالتي كانت عند بنتها ومعرفوش يجددولها الزيارة قبل الحج بس دي حاجة حسب ظروف كل واحد فيه ناس ظبطت معاهم وعرفوا يجددوا كل واحد ونصيبه

وبالتوفيق

[الحمد لله]

شكرا ليك ابو زياد

وربنا يجعل نصايحك دى فى ميزان حسناتك يوم القيامة

وانا فى انتظار مشاركة كل المصريين اللى يحبوا يساعدونى ويعطونى خبراتهم

وشكرا

[الحمد لله]

177 مشاهدة و2 بس هما اللى ردوا علية

^{فين المشاركة يا جماعة؟}

[خالد شحاته]

المهم انك انت تكون مقتنع مش للازم الكل يرد عليك ممكن رد واحد يكفي عن الكل واهم شي انت صاحب الشي