المناطق الشمالية والجنوبية vs جــــدة

[zemanova]

السلام عليكم ورحمة الله وبركاته إخواني برجــاء المساعدة في إتخاذ قرار بخصوص السفر للعمل كمهندس مدني في المملكة. الموضوع يتلخص في عرضين محتار أختار أي واحد فيهم, الأول في جدة مع مكتب إستشاري ذو مكانة ومحترم براتب أساسي حوالي 9000 ريال في الشهر بالإضافة لباقي البدلات المعروفة (مواصلات وسكن وتأمين صحي وتذاكر طيران عائلية وحوافز سنوية). مدة العقد سنتين قابلة للتجديد.

العرض التاني مع واحد من أكبر المكاتب الإستشارية ف المملكة إسمه "دار الرياض" براتب حوالي 11000 ريال في الشهر بالإضافة لباقي البدلات المعروفة (مواصلات وسكن وتأمين صحي وتذاكر طيران عائلية وحوافز سنوية) - لكن المشكلة في هذا العرض إنه هيكون في واحدة من المدن (عرعر - سكاكا - تبوك - نجران - جازان). مدة العقد برضه سنتين قابلة للتجديد.

طبعا أنا متزوج وعارف إن المعيشة في جده أحلي بكتير من المعيشة في باقي المدن السالف ذكرها, وأكيد إن شاء الله زوجتي وأولادي هيكونوا معايا (الأولاد في سن المدارس). وسؤالي هو: هل العيشة ف المناطق الشمالية والجنوبية فعلا صعبة وجافة زي م الواحد بيسمع لدرجة يصعب معها قدوم الأسرة والأولاد؟ والمدارس هناك هل مستواها فعلا لا يرقي لمستوي التعليم الخاص اللي المفروض إن أولادي هنا ف مصر متعودين عليه, لدرجة تخلليني أقلق علي مستواهم التعليمي وخاصة بعد انتهاء العقد والعودة لمصر.

طبعا أنا مش من النوع اللي بيقدر يعيش لوحده أو بعيد عن أسرته فتره طويلة, ففكرة إني أروح لوحدي ويفضلوا هم ف القاهرة وابقي اشوفهم ف الأجازات بالنسبة لي فكرة مؤلمة نفسيا جدا ولا أستطيع إني أتعايش معاها وخاصة لو كنت ف مكان ممل أو هادئ زيادة عن اللزوم زي م باسمع عن المدن اللي ذكرتها فوق. وبالتالي أنا عارف إني مش هاقدر اتحمل الوحدة في الأماكن دي ولازم هاحتاج إن أسرتي تكون معايا.

علي العموم, أرجو منكم النصيحة ومتشكر جدا علي وقتكم وجزاكم الله كل خير.

تم تعديل 21 ديسمبر 2013 بواسطة zemanova

[الفقير الى الله]

اخى العزيز

ردا على سؤال حضرتك ,,,,,

بالنسبة للشمال تقدر حضرتك تشرف فى اى منطقة سكاكا او تبوك وأبعد عن كل من عرعر وطريف والقريات حتى لو ب 30 الف ريال اساسى عيشة مستحيلة ,,,,, خدمات مفيش مدارس مفيش مطارات دولية مفيش

خروجات وفسح مفيش ,,,,, وافتراضا لو حبيت تخرج الاسرة شوية يوم الخميس تتسوق مثلا بردة مولات مفيش ولاحتى حدائق عامة وبالنسبة للجو كويس جدا فى الصيف تحت الصفر فى الشتاء .

لو نويت على الشمال يبقى سكاكا او تبوك غير كدة مترضاش .

بالنسبة للجنوب يا تروح جازان او أبها العيشة فيها نسبيا كويسة وكمان الجو كويس .

جدة مرتب أقل وعيشة اغلى بس الحياة فيها أفضل مما ذكر ,,,,,,,,,,,,, أعقلها وتوكل .

بالتوفيق وأسألك الدعاء

[zemanova]

بارك الله فيك, وشكرا ع النصيحــــة ...
طمنتني شويه, وف نفس الوقت كلامك وضحلي حاجات مهمة أهمها موضوع المدارس اللي بيشغلني ف المقام الأول.

شكرا لمرورك, وف انتظار ردود باقي الأعضاء أصحاب الخبرات والموجودين ف المملكة.

[zemanova]

حد ليه رأي تاني يا جماعة الخير ؟

مفيش حد زار المناطق المذكورة قبلا وعارف ظروف المعيشة عاملة فيها إيه؟

[AbuZeyad]

الحقيقة يا هندسة معاك حق تحتار

مكتب دار الرياض كبير فعلا والشغل فيه فرصة متتفوتش من الناحية العملية واظنهم عندهم شغل كتير لاني كنت بشوف لهم اعلانات كتير الفترة اللى فاتت

المشكلة الناحية التانية الحياة في جدة غير اي مكان في المملكة انا معشتش في اي مكان تاني من اللى ذكرتهم بس من عيشتي في جدة اقولك انك كرجل رب اسرة ومعاك اسرتك هاتعيش كويس في جدة ان شاء الله لان جدة شبة مصر الى حد كبير متحسش فيها بسفر او غربة غير ان فيها خدمات كتير مدارس ومستشفيات وترفيه غير انها قريبة من مكة والمدينة

بس خلي بالك من نقطتين

اولا الحياة في جدة مش رخيصة وخصوصا السكن حاليا الشقة الـ 3 غرف اللي مستواها معقول ايجارها حوالي 25000 في السنة يعني حوالي 2000 ريال في الشهر غير المياه والمدارس الانترناشيونال بتبدا من 8000 في السنة للكي جي انا مش عارف حضرتك عندك كام طفل ولا بتعلمهم ازاي بس انا شايف ان التعليم مهم عندك ومعاك حوالي3000- 4000 مصاريف معيشة غير قسط سيارة حوالى 1500 يعني مصاريفك حوالي 9000-10000 في الشهر بالمدارس من راتب اجمالي حوالي 12000 ريال

برضة نصيحة لازم تتاكد من مستوى التامين الصحي انه ممكن يدخلك مستشفيات مش مجرد تامين يدخلك مستوصفات! يعني التأمين على الاقل يكون Class B دا معناه تدخل مستشفى في غرفة مشتركة دا اقل شئ ولا ترضى باقل من كدا

ثانياً ان طبيعة شغلك كمهندس تفرض عليك انك التنقل باستمرار حسب ظروف المشاريع يعني حضرتك النهاردة شغال في جدة ممكن بكرة يكون شغلك في الرياض وبعده الدمام حسب طبيعة المكان اللى انت فيه لان فيه شركات او مكاتب بتتبع سياسة انها تنتشر في المملكة يعني اى مشروع في اي مكان يقدموا فيه وفيه مكاتب وشركات تانية بيفضلوا يركزوا شغلهم في مكان واحد انا مش عارف المكتب التاني اللي في جدة من النوع دا ولا لأ بس اللى انا شايفه ان دار الرياض شغلها منتشر في اماكن كتير

باختصار اللى انا عاوز اقوله انك مش ضامن انك تعيش في جدة على طول لو اخترتها لان طبيعة عملك ممكن تفرض عليك انك تنقل مع بداية كل مشروع جديد الا لو كنت في شركة بتحصر عملها في منطقة معينة وحتى دي مش مضمونة لان اي شركة لو جالها مشروع حلو في اي مكان هاتنقل موظفينها له

حاجة كمان انا مش عارف حضرتك عندك كام سنة لكن من كلام وان عندك اطفال في سن المدارس برجح انك ممكن تكون فوق الـ 35 سنة لو كدا المبالغ اللى حضرتك ذكرتها هاتكون قليلة عليك انا مش بتكلم في الحالة دي انك هاتستقر فين انا بتكلم في مبدا السفر من اصله!

في الاخر رتب اولوياتك اللى هي

الراتب - العيشة مع الاسرة - مستوى المعيشة - مكان العمل والخبرة المكتسبة - المدارس والخدمات

وحاول تجمع شوية معلومات على المدن التانية اللى ذكرتها في رسالتك مقارنها باولوياتك واستخير هلاتقي الاجابة على سؤالك على طول باذن الله

وبرضة لو تقولنا سنك في حدود كام سنة وعدد اطفالك واسم مكتب جدة ممكن اساعدك بصورة اكمل

وربنا يوفقك للى فيه الخير

[zemanova]

أبو زياد

عمري 33 سنة تقريبا وعندي طفل واحد في عمره 6 سنوات والتاني لسه عمره سنة واحدة

واضح من كلام حضرتك إنك مهندس زي حالاتي وده بيعطي فرصة أكبر للنقاش ده إذا وقت حضرتك يسمح طبعا

مكتب جدة مكتب كبير برضه علي ما أسمع ومعظم شغلهم في الرياض, جده, مكة و المدينة المنورة. والمكتب إسمه Diayr Saudi Consultants

اللينك لموقعهم الرسمي

http://www.diyar.com/

بس اسمحلي الحسبة اللي حضرتك حسبتها دي (9000 - 10000 ريال ف الشهر) مش عارف ليه حاسس إنها مبالغ فيها شويه: بمعني

لو حوالي3000 ريال مصاريف معيشة - علي حد كلام حضرتك.

+ قسط السيارة - ده بند مش موجود لأني عامل حسابي اشتري سيارة مستعملة أول م اروح إن شاء الله.

+ إيجار الشقة - تقريبا يساوي بدل السكن اللي هتصرفهولي الشركة واللي تقريبا هيساوي 25000 ريال / السنة زي م حضرتك قلت.

+ التأمين الصحي ليا ولأسرتي موجود Grade A علي حسب ما هو مكتوب في العرض المقدم من المكتب.

+ تذاكر السفر العائلية ليا ولأسرتي - المكتب موفرها بواقع مرة ف السنة.

بالنسبة لمصاريف المدارس طبعا دي لازم هادفعها كده كده مرة ف السنة, لكن المكتب بيوفر أكيد حوافز سنوية بمعدل شهر كل سنة, فممكن تبقي دي قصاد دي.

يبقي كده الراتب 9000 في جده ولو كان متوسط أنا معاك لكن بيتهيألي برضه مش سئ, ولا رأيك إيه ؟

كل معلوماتي عن المدن المذكورة أعلاه لا يتعدي ما هو مكتوب علي ويكيبيديا وبعض المواقع الأخري ع النت. ولذلك قررت إني أسأل الناس هنا ف المنتدي لأن طبعا اللي التجربة العملية أحسن كتير من إنك تقرا مقال ع النت ممكن يكون معلوماته دقيقة لكن تفتقر لخبرة المكان. وده اللي كنت بادور عليه م بين الساده الأفاضل هنا واللي حضرتك طبعا واحد منهم.

عموما كلام حضرتك أكيد أفادني كتير وإن كان خلاني أميل شويه ناحية السفر لجده. لو حضرتك شايف حاجة تاني ممكن تفيدني بيها ياريت متبخلش عليا, وجزاك الله كل خير.

[حسام الغرباوي]

علي فكرة 2000 ريال مش فرق راتب كبير يخليك تروح مكان زي عرعر وسكاكا

والحسبة اللي ابوزياد حطها اعتقد مبالغ فيها كتير

بالنسبة لعرضك حسبة بسيطة اوي

انتا محتاج شقة غرفتين وصالة فقط بحدود 20 الف وانتا بدل السكن 27 الف ...يعني بدل السكن مغطي وفيه وفر كمان

عندك الانتقال , لو هتشتري سيارة مستعملة يبقي كدا موضعها انتهي ..لو هتشتري قسط فانتا عندك 900 ريال بدل انتقال من الشركة ( لو هتجيب سيارة ياريس ..قسطها 1000 ريال ) يعني يعتبر برضو بدل الانتقال مغطي

المدارس بتدفع مرة واحدة ودي هتدفعها في اي منطقة سواء شمال او جنوب او غرب ( مع استحالة وجود مدارس اصلا كويسة في عرعر والمنطقة الشمالية )

انا شخصيا افضل جدة بشكل كبير .....لسبب واحد فقط ( العرض التاني ماديا مش مغري لدرجة كبيرة يعني فرق 2000 ريال ...بس مفيش اي خدمات او مدارس او اي شيء ممكن يخلي حالتك النفسية مستريحة ) وبالتالي ال2000 ريال دول لا قيمة ليهم اصلا

حط فدماغك شيء مهم جدا وخليه ديما في اول اولوياتك وهو ((( راحتك النفسية ))) ....

[MZohairy]

مابتحسبوش بند الفسح و المطاعم خالص ليه?

يعني و لو مره كل ويك اند على الاقل

مش هيخرج هو و مراته و ابنه يلفوا شويه على الكورنيش و يروحوا يتعشوا في مطعم مثلا

مابتحسبوش مشتريات الملابس مثلا

فيه بنود منسيه في الحسبه بتاعتكم

[حسام الغرباوي]

مابتحسبوش بند الفسح و المطاعم خالص ليه?

يعني و لو مره كل ويك اند على الاقل

مش هيخرج هو و مراته و ابنه يلفوا شويه على الكورنيش و يروحوا يتعشوا في مطعم مثلا

مابتحسبوش مشتريات الملابس مثلا

فيه بنود منسيه في الحسبه بتاعتكم

احنا مبنحسبش هيوفر كام ,, احنا بنقارن بين عرضين

في حاجات ثابتة سواء كان في اي منطقة ...زي الخروجات واللبس والاكل والمدارس ......دي مصاريف ثابتة ...اينعم ممكن تقل او تزيد حسب المنطقة بس ف الاخر ثابتة ومش هي اللي هتعمل معاك توفير كتير خصوصا لو عيلة

[zemanova]

مابتحسبوش بند الفسح و المطاعم خالص ليه?

يعني و لو مره كل ويك اند على الاقل

مش هيخرج هو و مراته و ابنه يلفوا شويه على الكورنيش و يروحوا يتعشوا في مطعم مثلا

مابتحسبوش مشتريات الملابس مثلا

فيه بنود منسيه في الحسبه بتاعتكم

وهو لسه في بند للفسح والمطاعم كمان ؟

يعني هاصرف 3000 ريال ف الشهر وكمان متفسحتش ؟؟

وبيتهيألي بند زي مشتريات الملابس ده مقدور عليه, لما تنزل تصرفلك مبلغ معين كل سنة ع الهدوم واللبس مش قضية. لكن المبالغ المقتطعة شهريا من الراتب زي الأكل والشرب أعتقد هي العامل الرئيسي اللي بتحدد علي أساسه هينفع تقبل بالعرض ولا مش مستاهله غربة من البداية.

[AbuZeyad]

سعودي ديار من الاماكن الممتازة طبعا احسن من دار الرياض

بس خلي بالك انا على ما اعرف انها من شركات بن لادن مش متأكد حاول تسال اذا كانوا بياخروا الرواتب ولا لأ

طبعا مجموعة بن لادن ممكن تعتبرها امبراطورية مش كل الاماكن فيها زي بعض بس اسمع كتير ان بن لادن بياخر الرواتب مش عارف الكلام دا في سعودي ديار ولا لأ

بس كدا انت اكيد محتاج سيارة لان مقرهم يعتبر في اخر جدة غير انك غالبا مش هاتعرف تسكن قريب من الشغل لان المنطقة هناك تعبر من المناطق الراقية واسعارها عالية

بس الحقيقة انا مستغرب من العرض اللي جايلك من سعودي ديار مكان زي دا المفروض يكون عرضه احسن من كدا

انت عندك 33 سنة يعني خريج 2001 او 2002 يعني عديت 10 سنين خبرة

راتبك المفروض يكون اكبر من كدا حاول تتفاوض تاني على الراتب لو وافقوا على زيادة يبقى اتكل على الله وتنور جدة

التذاكر والتأمين تمام بس الراتب محتاج يتحرك شوية يعنى يبقى زي دار الرياض على الاقل لان المبلغ المعروض دا قليل بالنسبة لسنك وخبرتك

نيجي لموضوع المصاريف

المصاريف اللى ذكرتها لحضرتك دي طبعا تتفاوت من واحد للتاني

انت بس عرفت توفر من بند قسط السيارة بس المعيشة صعب تقل عن الـ 3000 ريال ان ماكنش اكتر يكفي انك تعرف ان كيلو اللحمة البلدي في السوبر ماركت بـ 50 ريال وان الطماطم سعرها بيوصل احيانا الى 12 ريال

غير كدا المدارس زي ما ذكرت لك وعندك طفل عمره سنة احب اعرفك ان البامبرز بـ 70 ريال الحجم الكبير لو مفيش عليه عروض!

يعني 2000 - 2500 سكن + 3000 - 4000 معيشة + مدرسة مش عارف بكام + 500 ريال مصاريف صيانة سيارتك المستعملة مش لازم طبعا تدفعهم بشكل شهري

حوالي 6000- 7000 في الشهر

خلي بالك من نقطة مظهرك في مكان زي سعودي ديار مهم جداً وفي اي مكان

يعني لازم تلبس كويس ويكون معاك سيارة حلوة

مظهرك مهم جدا بقولهالك مرة كمان يعني حتى السيارة المستعملة اللى ناوي تشتريها مينفعش تكون سيارة مستعملة تقضي الغرض والسلام لازم تكون حاجة كويسة مش اقل من كامري مثلاً.

وحاجة كمان حضرتك كتبت

المكتب بيوفر اكيد حوفز سنوية

حوافز سنوية دي يعني بونس سنوي مبلغ مقطوع كمكافئة ولا زيادة سنوية في الراتب؟ وكلمة اكيد دي يعنى هما قالولك كدا ولا انت اللى بتستنتج؟

دا لو مش مكتب في العقد او العرض مش هاتعرف تطالب بيها.

طبعا فيه بند للفسح وبند مهم كمان لانك هنا معندكش الحياة الاجتماعية اللى في مصر يعني لازم تخرج اسرتك وتفستحهم لانك في السعودية بابا وماما وكل حاجة

انا محبتش احبطك علشان كدا قلت لك مصاريف معيشة 3000 - 4000 ريال متضمنة السكن والفسح

وازيدك من الشعر بيت عندك مصاريف في حدود الـ 10000 ريال علشان تأسس حياتك في السعودية وتستقدم اسرتك

واخيرا زي ما قلت لك العرض يعتبر قليل بالنسبة لخبرتك وخصوصا لو هاتشتغل في الموقع الجو في جدة في الصيف صعب جدا

حاول مع سعودي ديار في الزيادة

حااااول

[zemanova]

أستاذ حسام الغرباوي

كلام حضرتك معقول. 2000 ريال فرق م بين العرضين مش هو اللي يخللي الواحد يعيش نفسيا قرفان, وخصوصا إن الواحد مش طالع يحوش وبس. ده غير إني عرفت مؤخرا من خلال تصفحي لبعض المواضيع هنا ع المنتدي إن بعض من المدن المذكورة ف بداية الموضوع الحياة فيها بدائية وقبلية لحد كبير (علي سبيل المثال عرعر دي هى بلد صغير جدا تبعد عن العراق 55 كيلو متر لها شارعين رئيسيين فقط هما الشارع العام والشارع الاصفر. ولا توجد اماكن للترفيه نهائيا بعرعر)

الكلام اللي جي من علي ويكيبيديا:

النشاط الاقتصادي[عدل]

الرعي[عدل]

يتصدر الرعي جميع الأنشطة الاقتصادية في المنطقة، وقد ساعد على ذلك توافر المراعي الطبيعية من النباتات التي تزدهر في فترة الربيع والأخرى التي تتوافر في زمن الصيف. ويرعى السكان الإبل والأغنام. وقد أنشئ في عرعر مكتب لتحسين المراعي وإرشاد الرعاة، إضافة إلى القسم البيطري الذي يسهم في رعاية الحيوانات وحمايتها من الأمراض.

تم تعديل 22 ديسمبر 2013 بواسطة zemanova

[AbuZeyad]

خلي بالك من نقطة كمان

ان فيه 2000 ريال فرق لصالح دار الرياض يعني سعر حضرتك في السوق السعودي يوصل للمبلغ دا

اللى انا عاوز اقوله انك لما تطلب زيادة الراتب انت مش بتطلب حاجة كبيرة انت سعرك فعلا اكبر من المعروض عليك من سعودي ديار

حاول تاني معاهم وخليك صريح وقولهم انك فعلا عندك عرض من مكتب تاني بمبلغ كذا كوسيلة للضغط عليهم وانت بتقول الحقيقة مش بتكذب

[zemanova]

خلي بالك من نقطة كمان

ان فيه 2000 ريال فرق لصالح دار الرياض يعني سعر حضرتك في السوق السعودي يوصل للمبلغ دا

اللى انا عاوز اقوله انك لما تطلب زيادة الراتب انت مش بتطلب حاجة كبيرة انت سعرك فعلا اكبر من المعروض عليك من سعودي ديار

حاول تاني معاهم وخليك صريح وقولهم انك فعلا عندك عرض من مكتب تاني بمبلغ كذا كوسيلة للضغط عليهم وانت بتقول الحقيقة مش بتكذب

الحقيقة إنت كلامك صح 100%

أنا عارف إن المعروض من مكتب ديار هو قليل بالنسبة لدفعة تخرجي وخبرتي. لكن السبب ف كده هو أنا مش هم, لأن ده المبلغ اللي أنا طلبته ف المقابلة وهم وافقوا طبعا (ساعتها مكنتش أعرف رينج المرتبات ف السعودية كام ودي غلطة أنا عارف إني السبب فيها. المفروض كان قبل م اطلب رقم أعرف الطبيعي والأصول قبل م اتكلم ف فلوس).

موضوع الحوافز السنوية مذكور صراحة ف العرض: شهر أساسي عن كل سنة كاملة من العقد.

طبعا المصاريف اللازمة لتأسيس حياة للأسرة واستقدام الزوجة دي طبعا معاك حق فيها وهي شر لابد منه.

بخصوص التفاوض بأه علي المرتب, ف بيني وبينك ده كان علي بالي وفكرت فيه: ليه م اطلبش منهم تعديل المرتب المكتوب ف العرض ؟ بس الحقيقة اللي مخوفني إنهم لو رفضوا, فأنا برضه مش ميال للعمل ف المناطق الشمالية والجنوبية بسبب كل ما ذكره السادة الأفاضل فوق من أسباب تجعلني ميال أكثر للعمل ف جدة. ف ساعتها هيبقي شكلي وحش ويمكن ساعتها أضطر أقبل بعرضهم علي ما هو عليه. ده إذا م حصلش مشاكل وسحبوا العرض من أساسه (ولا مبيحصلش ؟ مش عارف)

طبعا شكرا ليك ولكل الردود من باقي السادة الأفاضل. وف انتظار باقي النصايح.

[zemanova]

وعندك طفل عمره سنة احب اعرفك ان البامبرز بـ 70 ريال الحجم الكبير لو مفيش عليه عروض!

كده المصاريف المحتملة للمعيشة ضمنت إني هاوفر منها إن شاء الله ع الأقل 70 ريال

إبني الصغير الحمد لله سنة ونص بس معودينه علي دخول الحمام. يعني مفيش بامبرز :)

[AbuZeyad]

طبعا انت طلبت المبلغ دا وهما فرحوا بيك قوي

حاول تلاقي اي سبب انك تعيد التفاوض معاهم

يعني اسال على مدة العقد لو لقيتها سنتين قولهم بس انا كنت فاكرها سنة واحدة طيب تعالوا نتفاوض

ممكن تقولهم انا عندى عرض من دار الرياض بمبلغ كذا وانك سالت على رواتب اللى زيك في السعودية وعرفت انها غير اللى انت طلبته خالص وانك حابب الشغل معاهم والكلام دا

ومتخافش انك تكلمهم في تعديل العرض خليك واثق من نفسك وافرض انهم رفضوا دا مش معناه انهم لغوا العرض هما بس سابولك الاختيار يا تقبل يا ترفض

وشكلك مش هايكون وحش ولا حاجة لو قبلت بالعرض لو مقبلوش بالتفاوض شكلك هايكون وحش لو انت قلت لهم انا هارفض العرض دا لو الراتب متعدلش لمبلغ كذا وهما رفضوا وانت بعدها رجعت في كلامك

قاعدة اساسية عند السفر للسعودية

"لما تدخل لازم تدخل صح"

اتفاوض معاهم تاني وربنا يوفقك

[zemanova]

طبعا انت طلبت المبلغ دا وهما فرحوا بيك قوي

حاول تلاقي اي سبب انك تعيد التفاوض معاهم

يعني اسال على مدة العقد لو لقيتها سنتين قولهم بس انا كنت فاكرها سنة واحدة طيب تعالوا نتفاوض

ممكن تقولهم انا عندى عرض من دار الرياض بمبلغ كذا وانك سالت على رواتب اللى زيك في السعودية وعرفت انها غير اللى انت طلبته خالص وانك حابب الشغل معاهم والكلام دا

ومتخافش انك تكلمهم في تعديل العرض خليك واثق من نفسك وافرض انهم رفضوا دا مش معناه انهم لغوا العرض هما بس سابولك الاختيار يا تقبل يا ترفض

وشكلك مش هايكون وحش ولا حاجة لو قبلت بالعرض لو مقبلوش بالتفاوض شكلك هايكون وحش لو انت قلت لهم انا هارفض العرض دا لو الراتب متعدلش لمبلغ كذا وهما رفضوا وانت بعدها رجعت في كلامك

قاعدة اساسية عند السفر للسعودية

"لما تدخل لازم تدخل صح"

اتفاوض معاهم تاني وربنا يوفقك

حبيبي والله يا أبوزياد

ربنا هيجازيك خير إن شاء الله, وجاري العمل بالنصيحة

بس احنا كده متفقين إنهم لو وافقوا يعدلولي العرض يبقي أكيد فرصة العمل ف جده هتكون أحسن من فرصة العمل مع دار الرياض ف الأماكن التانية, مش كده ولا إيه؟

برضه معرفتش حضرتك مهندس ولا حاجة تانية, لأن سابق معرفتك بالمكاتب الإستشارية ف المملكة يوحي إن حضرتك مهندس.

عموما تشرفت بمعرفتك, و أتشرف أكتر بأي عضو حابب إنه يفيدني أكتر بمعلومات بخصوص نفس الموضوع.

[AbuZeyad]

احبك الله يا سيدي

انا مهندس ليا 8 سنين في المملكة بين جدة ومكة علشان كدا عارف المنطقة دي كويس ومعنديش خبرة براها في الاماكن التانية اللى ذكرتها

طبعا لو وافقوا يعدلوا العرض اتكل على الله وتعالى على جدة لكن لو موافقوش محتاج تفكر مرة تانية مع نفسك يا بطل لان العرض فعلا قليل عليك

وربنا يهديك للي فيه الخير

تم تعديل 22 ديسمبر 2013 بواسطة AbuZeyad

[MZohairy]

المطعم المعقول مش هيبقى اقل من 50 ريال للفرد في المتوسط

و لو بتشيش ده موضوع تاني...كل جده بتشيش

[MZohairy]

عموما موضوع هيصرف 3 الاف او 4 او 5 (كمصروف اكل و شرب) دي حاجه تختلف من شخص لشخص

فلو قولنا ان المتوسط المعقول لأسره من 4 اشخاص هو 4000 ريال في الشهر (بخلاف الايجار و المدارس و الملابس و الفسح)

فممكن جدا تلاقي عائلات عايشه ب 2000 ريال عيشة ضنكا بهدف التوفير

و عائله تانيه عايشه ب 6000 ريال و مش مكفيينهم

دي حسب المستوى اللي متعود يعيش عليه في بلده الأم و اللي هيحاول يعيش زيه تقريبا في بلد المهجر