رجالة في المطبخ

[Scorpion]

برررررررر

برررررد .........

كوباية الشاي ما حوقتش ...

الف في البيت ... حر طليق ..... انا الملك .... هدووووووء رائع

جونيور و أمه عند حماتي اكمنها تعبانة ... ربنا يشفيكي يا حماتي ... بس مش بسرعة يعني ....

احط شريط لأسمهان ..... و وواحد تاني لليلي مراد .... خير اللهم اجعله خير مافيش أصوات اعتراضات .. يا حلاوة

يبقي نحط فريد .. و ما حدش منهم حيتريق خصوصآ المفعوص اللي دايمآ يقوللي دي عالم عندها مغص بتغني ...

ايش فهمك في الغنا يا بتاع الهافي ميتال و تيمبرجاك و لا تيمبرلاند.....

سندوتش فينو معتبر و يتدفس فيه شوية لانشون علي جبنة رومي .. و اقعد قدام التليفزيزن و اتمطع و اتفرج علي ماتش كورة من غير ما حد يقوللي غير القناة علي مسلسل يجيب الضغط و لا فيلم كارتون ... و من غير ما حد يفتح بقه و هو بيتنطط من الغيظ من فتافيت العيش و بواقي الجبنة اللي عمالة تتنطور مني عالكنبة و عالسجادة تحت رجلي ....

"أحب عيشة الحرية" .... حلاوتك يا عبوهاب ...

بس حتة السندوتش دي ما حوقتش ... و الواحد جاع ...

تعمل ايه يا ابو سريع تعمل ايه يا بو سريع ....

خطوات مترددة و لكن ما بدهاش ...

الي المطبخ ....

ايه الحلاوة و النضافة دي .... صدق اللي قال عليه مملكة المرأة ...

و بما أنه مملكة المرأة يبقي مالناش دعوة .. يعني ما يخصنيش ... لما تبقي تيجي المرأة تبقي ترجعه مملكة زي الأول... انا حعمل اللي اقدر عليه و اللي يخلص ضميري ....

تاكل أيييه يا سكوب ... تاكل ايه يا سكوب ......

محشي

يا اخي اتلهي علي عينك ... انت تعرف حتة تشتريلك كرمبة و لا اتقور كوساية ....

و بعدين بقي في الحوسة دي ...

كل اللي في التلاجة حاجات خواجاتي ... نفسي في حاجة حرشة ...

ابص حواليا ... و بعدين ابص للتليفون .. و تلقائيآ آجي أتصل بأم جونيور بس علي آخر لحظة الاقي نفسي بتصل بأبن مصر

- خير يا سكوب

- جعان

- طب اعملك ايه يعني ؟

- ما تباصيلي اي وصفة سهلة كده لحاجة من بتوعنا...

- من بتوعنا ؟

- آه والنبي يا أحمد

- يبقي افتحلك علبة بولوبيف و اقلب عليها بيضتين .... بس ايييه مع الملح و لفلفل حط شوية كوركوم .. و ابقي ادعيلي...

- كوركوم ؟؟؟ طب يا سيدي متشكرين يا شيف عصرك ...

و قمت قافل السماعة

و بعدين بقي في الحوسة دي .. الدنيا بقت برد بجد الجوع زاد ... و فجأة ..

ازاي ما فكرتش يه

فين التليفون ... اهه .....

و من الطرف التاني من الخط يأتي صوته :

- عايز اييييه يا سكوب ؟

- جعان و بردان يا سي السيد .... السوارس يا سي السيد ... آخر مرة يا سي السيد

- اييه يا ست أمينة اللي انت عامله ده ..

- مش عارف اطبخ ايه و الواحد جاع

- هي حماتك لسه عيانة

-آه

- يعني رجعنا كلنا عزاب تاني .... أنت عارف انا بعمل ايه دلوقتي

- ايه ؟

- حلبسة

- الحلبسة بتاعتنا ... حمص الشام بتاع أيام الكورنيش .... يا ابن الأييييييه ... لايمني يا ابو السيد

- شوف يا سيدي

من عربية اخوك الصغنن سين سين ... شعارنا ( أشرب حلبسه .. وادبح لمراتك البسه )

وإليك مقادير وطريقة عمل الفودكا البلدي

- تنزل السوبر ماركو وتشتري علبة حمص جاهز .. احسن الحمص الحب بيبقى مقرف وتقعد تنقع فيه يوم كامل وكل شوية تغير له الميه وشغلانه .

- وبعدين تاخد علبة الحمص على البيت وتغسل محتوياتها كويس من المواد الحافظة .

- وتقوم دالقها في حله صغيرة على لترين مياه بيضاء من الحنفية

- وتقوم حاطط عليهم معلقتين صلصة طوميطو ... ومقطع عليهم طوموطمينطي .. بأختصار 2 حبه طماطم عشان مش عارف أنطق الكلمة اللي فاتت ... وتحط عليهم معلقيتن خل طعام أبيض

- تسيب الخليط ده يغلي لمدة لا تقل عن نصف ساعة .( نص يا سكوب مش أقل من كده )

- وبعدين تقوم مزوده ملح طعام مُشبع باليود .

- تكون بقى سعادك جايب قزازة ميه معدنية حجم لتر بس فاضية زي مانا باعمل .. وحاطط فيها 3 ملاعق كمون مطحون ... على معلقة بهارات وتعصر عليهم قد لمونيتن تلاته ... وتزودهم نص كوباية ميه .... وتضع اهم مكون رئيسي للفودكا وهو الشطة الحراقة .. أنا بأستخدم هوت صوص اللي هو بالإيطالي يعني الشطة الجاهزة

ده يابني المشروب المُفضل لقراصنة الكاريبي ...

وتقوم قافل قزازة المية بالغطا اللي إنت حطه على جنب وما تضيعش الغطا زي كل مره يا سكوب ... وتفضل ترج ترج ترج في القزازة وأنت تطلق صيحات الفزع القرصانية اللي هي ( مين يعادينا .. واك واك ... في أراضينا ... واك واك )

وتقوم جايب كوباية كبيرة من اللي بتحطوا فيها شربات الورد للمعازيم في الأفراح وتقوم ماليها 10 % من الخليط الجبار ده على 45 % حب حُمص و45 % مية طرشي قصدي مية حُمص ... أي تغيير في النسب المئوية دي ممكن يؤدي إلى أثار جانبية خطيرة أقلها هو مرض سلس البول .. إنت حُر ...

وإشرب يا معلم واتحدى إن ما راحو جابوك من لوكسمبورج اللي جنبكو لإنك ممكن تاخدها جري من روما للكسمبورج في نص ساعة بعد ما تضرب لك شوب من الفودكا دي .

- و عهد الله انت حبيبي يا بو السيد ...

- بس ابقي طمني عليك بعد كده يا سكوب .. انا مش ناقص ذنوب في رقبتي

--------------------------------------------------------------------------------------------------------------------

دي كانت اول تجربة "رجالية" لنا في المطبخ ... و نقبل وصفات أخري ...حكايات أخري ... شيكات أخري .. و كده يعني

[shahd]

وتقوم قافل قزازة المية بالغطا اللي إنت حطه على جنب وما تضيعش الغطا زي كل مره يا سكوب ... وتفضل ترج ترج ترج في القزازة وأنت تطلق صيحات الفزع القرصانية اللي هي ( مين يعادينا .. واك واك ... في أراضينا ... واك واك )

ياخبر يا عمووووووووووو كامل حمووووووووووووت من كتر الضحك :D :D .. مستنين التجربة التانية

[Scorpion]

سي السيد : آلو

سكوب : ما لحقتش ادبح البسة لمراتي يا سي السيد .... اول ما شمت ريحة المحلول الديناميتي ده البسة ماتت لوحدها ....

و بعدين غطا الأزازة ضاع كالعادة و الشرش اتنطور في المطبخ كله ...

و بعدين من كترة ما قلت واك واك و انا برج الأزازة و عايش في دور القراصنة .. الجيران بلغوا لبوليس اني بربي طيور في بيتنا ....

ما تجيب وصفة اسهل شوية و مافيهاش دم

علي فكرة يا شهد .. الوصفة دي بتاعت سي السيد بجد مش بتاعتي أنا ... و حتة الواك الواك دي خلتني اعيط من الضحك و أنا متخيل نفسي بعملها ...

[Folana]

أنا مش فكيهة ياحضرة الناظر...انا علالالالالام الملاووووااااانى....

[إيزيس]

كبرت في دماغي وقايمة أجربها

ماحدش يمسكني

خلوا بالكوا م العيال وأبوهم

[Scorpion]

ايه ده ....

دخلوا امتي دووول ... هو مش فيه يافطة طويلة عريضة بره مكتوب عليها ممنوع دخول الفكيهات ....

يالا يا ماما ... بيتك بيتك .. كتكت كتكت .... مش مكانكم ده .... الكوافير هناك عالناصية.......

و يا ملااااااواااني .... بلاش جر شكل ......

[إيزيس]

تبقى تقفل الباب وراك قبل ما تقفل قزازة المية

الريحة مالية المحاورات

وثم إن اليافطة مقلوبة يا معلم ............إعدل

أيوة كده لكن بردة داخلين داخلين واللا إيه يا ستات

[إيزيس]

هجوووووووووووووووووووووووووووووم

تم تعديل 6 فبراير 2008 بواسطة قرنفل

[أبو محمد]

هجوووووووووووووووووووووووووووووم

هذا يومك يا دمشقى

أرجو أن تكون لديك كميات كافية من البتاع ده اللى فى القزازة البلاستيك

[إيزيس]

آه يا عيني عيني

عملتها يا سكوربيون ..............ماما ماما انت فين يا ماما

[أسد]

لما تدخل محل كشري في مصر .

الراجل بيجيب لك الكشري .. واللوز .. والكهرمان .. والورد ... والصلصة ..

وبيبقى فيه قزازتين على الترابيزة اللي انت قاعد عليها ..

واحد فيها شطة ..

والتانية .. بيسموها (دقه) .. صح ؟؟

ممكن لو سمحتوا وصفة التركيبة السحرية التي ينتج عنها هاذين المحلولين الجبارين .. المسممين بالدقة والشطة ...

وهل نحتاج لتحضيرهما إلى نداء القرصان (واك واك) أم نكتفي فقط بالرجرجة ؟؟

وبعدين .. صحيح الموضوع ده رجالي جداً ..

حتى شوفوا نوعية الوصفاتالمقدمة ..

لا تصلح للنساء متلكاً

[مصري أصيل]

يا عم SCORPION أنا بأقرأ الموضوع من المكتب وفرجت عليا الناس من كتر الضحك وكله دلوقتي مستني دوره عشان يقرأ و يعرف أنا كنت بأضحك علي أيه . بجد لما تجتمع حضرتك مع وصفة لسين سين وتعليقات مدام قرنفل ونداء القراصنه ( واك واك ) أكيد الموضوع هيبقي كده . لما الواحد يبدأ يومه بموضوع زي كده أكيد اليوم كله هيبقي جميل . أكيد هاجرب الوصفه دي اليلادي بس هوه لازم ال واك واك دي تكون بصيحه ما ينفعش بشويش عشان الجيران بس هيقولوا علينا أيه؟؟؟؟؟؟؟؟؟

تم تعديل 7 فبراير 2008 بواسطة مصري أصيل

[se_ Elsyed]

والتانية .. بيسموها (دقه) .. صح ؟؟

ممكن لو سمحتوا وصفة التركيبة السحرية التي ينتج عنها هاذين المحلولين الجبارين .. المسممين بالدقة والشطة ...

أخص عليك يا ليون كنج ... بتروح تنفع المحلات الي جنبنا وأنا واقف عالعربية بأنش ؟

خد يا سيدي

أول حاجه وصفة دقة الكُشري

بالمناسبة الأول ...زوجتي بتدرس في مدرسة لتحفيظ القرآن والمدرسة دي بتخرج دُاعيات إسلاميات وكده ... والمدرسة كل فترة بتعمل زي سوق خيري بيعود عوائد بيعه لأعمال الخير والفقراء والمساكين ... فكل مجموعة طالبات في الفصل نقول حوالي 15 مثلاً بيبقى كل واحده عليها تعمل أكلة من اللي مشهور بها بلدها وتيجي تبيعها لطالبات المدرسة ... وعندك بقى من كل شكل ولون .. طالبات من مصر .. على سعوديات على يمينات على سودانيات .. ومعاهم ستات طالبات غربيات كمان وبيتعلموا ويحفظوا القرآن ... المهم بعون الله زوجتي بتعمل كُشري .. فشر أبو طارق أو جحا بتاع وسط البلد ... بس يا خسارة الحلو ما يكملش .. تيجي لحد الدقة دي وتضرب أخماس في أسداس ... وصاحبك سين سين غلط في مرة وتطوع وأرتدى مريلة وزعبوط الشيفات وساعدها وعملت كام قزازة مولوتوف من دول .. وأقسم بالله راجعه تقولي العيال الستات اللي أشتروا كُشري - أصغر واحده معاها هناك بتبقى قد والدتها بس عندهم عزيمة وعايزين يتعلموا علماً نافعاً - إتهبلوا من حلاوة الدقة دي .... ودي كانت نهاية فرقة جورج أبيض وعزيز عيد .. وكل مرة يكون عندهم سوق وتقرر إنها تعمل كُشري تقعد سهرانه طول الليل لحد الصبح تحضر في حلل الكُشري وتصحيني من أحلاها نومه عشان أخترع لها زجاجات حارقة من دي وأنا أبرطم وأقول - في سري طبعاً - أنا ايه اللي كان رماني الرمية السودا دي -

مش هاطول عليك

خد يا سيدي

وصفة الدقة البلدي اللي بتخلي محلات الكُشري تُعلن الحرب على سلطنة بورنجا

تكون بقى سعادك جايب قزازة ميه معدنية حجم لتر بس فاضية زي مانا باعمل .. وحاطط فيها 3 ملاعق كمون مطحون ... على معلقة بهارات وتعصر عليهم قد لمونيتن تلاته ... وتزودهم نص كوباية ميه على ربع كوباية خل ... على معلقة ثوم مطحون ... على معلقتين ملح

الوصفة دي ممكن تكفيك شهر ... ويا سلام لو أخدت لك كل يوم بؤ على الريق قبل ما تروح الشغل .... يا مزاجو العالي قوي لا تقولي نسكافية ولا سبرتو إيطالي ( إكسبريسو ) .

وصفة الشطة مختلفة شوية عند محلات الكشري لإنهم بيعتمدوا على إنهم بيجيبوا صلصة مخففة بالمية ويحطوها في القزايز ... وبيجيبوا نوع من الشطة السوداني اللي Made in Hell يعني صُنع في جهنم .... ويخلطوه بالقزازة دي ... عارف ليه ؟

دول ولاد ناصحه .. عشان لو جاب شطة عادية الناس هاتشربها شُرب ومش هايلاحقوا ... فبيجيبوا النوع ده اللي يادوب تشم ريحته بس كده تحس إن إنت محتاج قوات المطافي العمومية اللي في ميدان العتبة الخضرا ...

وإلى أن نلتقي في محاولات وتجارب رجالية مطبخية خزعبلية ..

[Folana]

السلام عليكم ورحمة الله....

ايوه يابهوات...نونكن كمان تضربوا قرنيين فلفل اخضر حامى مع الدقة...وادعوا للملاوانى.....

حاضر..حاضر...انا خارجة من الموضوع اهو...بس ماتشخطوش...

[أسد]

ما نتحرمش ياسي السيد ...

هو ده الشغل ...

ممكن رغيفين حواوشي من عند الراجل اللي مش عارف اسمه ايه ده اللي في التوفيقية !!!

[se_ Elsyed]

ممكن رغيفين حواوشي من عند الراجل اللي مش عارف اسمه ايه ده اللي في التوفيقية

شلبي سعادتك يا فندم .... الراجل إسمه شلبي

طب والله العظيم يا عم وقدام الرجالة المترجلين دول - ما عدا فلانه طبعاً اللي داخله بتبص علينا من خرم باب المطبخ - لو منتخبنا فاز النهاردة لأعزمك على أكلة حواوشي من عمايل المعلم سين سين تحكي بها وتتحاكى قدام أعضاء المنتدى الأفاضل وهالف لك رغيفين لأدهم ومامته وخلى الغلابة تاكل ...

أما لو أتغلبنا يبقى مع نفسك بقى .. مش هايبقى موت وخراب ديار :unsure:

يا اخواننا أنا عايز أعترف بحاجه

الاخ أسد المماثل أمامك ده طلع ذوقه حلو في الأكل ... وعزمني من أسبوعين في أحد المطاعم المكسيكية بالرياض .. إنما حكايه ... أي نعم من ساعتها بيتي إتخرب وروحته ييجي 10 مرات .. إنما يستاهل ..

فيا ترى ذوقه حلو في الهاندي ميد فوود ؟ .... ده اللي هانعرفه لما يلبس المريلة وزعبوط الطباخين في الحلقة الجاية ويقولنا طريقة عمل البيكاتا بالشامبينيون آلا جريك ... وذلك من خلال برنامجكو الإسبوعي " أحلي فوود ... من إيد الشيف أبو الأسوود "

[أسد]

شوف يا سي السيد ياخويا ..

أنا باحب الأكل .. لكن ماباعرفش أعمله

مش ما باعرفش ..

ما باحبش أعمل أي حاجة في المطبخ ...

نهائي ...

في الصيف باقعد هنا لوحدي لمدة 3 شهور كاملة ...

كل أكلي من المطاعم .. وما باعملش حاجة في البيت إلا الشاي والقهوة بس ..

بس أنا باعرف أعمل سندوتشات كويس ..

بس لازم يكون فيه حد ينضف المطبخ ورايا ...

وحد يناولني كل حاجة أحتاجها ...

يعني مشكلة كبيرة ..

قلتي أحسن

[Scorpion]

قرنفل كتبت :

هجوووووووووووووووووووووووووووووم

ما بلاش يا قرنفل ... بلاش انتم يا ماما ... تاريخ الكلمة دي في المحاورات ماهوش في مصلحتكم ابدآ .... الله يمسيكي بالخير يا شعنونة انتي و كل فكيهات الرعيل الأول.... الله يرحمهم بقي ...

الي المطبخ ....

ايه الحلاوة و النضافة دي .... صدق اللي قال عليه مملكة المرأة ...

و بما أنه مملكة المرأة يبقي مالناش دعوة .. يعني ما يخصنيش ... لما تبقي تيجي المرأة تبقي ترجعه مملكة زي الأول... انا حعمل اللي اقدر عليه و اللي يخلص ضميري ....

مش عارف ليه بعد ما قريت تاني مرة الجملة دي رجعت في خيالي لأيام العزوبية .. و علاقة العزاب بوجه عام بالمطبخ ...

حاجات كتيرة جات في بالي ... و أولها بدون مبالغة كانت ...

الريحة ..

ريحة صندوق خشب مقفول بقاله سنين و سنين … مخلوط بريحة اطعمة انتهي عمرها الإفتراضي من بعد ما اتخرجت بسنتين ... و لكن ده ما كانش بيأثر في اي حاجة .. ريحة اكتر من عادية الواحد متعود عليها … قدام باب البيت كان فيه مقلب زبالة دائم ريحته ما تختلفش كتير …

تاني حاجة .. أرضية المطبخ نفسه ...

الأرضية بقي … تلاحظ بعد فترة ان فيه طبقة شفافة غطت البلاط .. مش موكيت أو باركيه ... انا بقول طبقة شفافة .... الطبقة دي كانت المرحلة التانية بعد التراب ... التراب اللي كل اسبوع او اتنين الواحد كان يمسك المقشة و يقنع نفسه انه بيكنسه ... تؤ .. الموجود دلوقتي مش تراب .. و ان كان التراب هو أحد مكوناته ... الحاجة الظاهرة في الطبقة دي انها بتلزق في الشبشب ...

و مع الوقت الطبقة دي تبتدي تشعر بأنها مصدر خطر ...

لأن اللزق بتشتد درجته .... و لو عايز تعيش في البيت ده من غير ما تعزل .. يبقي لحماية نفسك الطريقة الوحيدة انك تدخل حدود المطبخ و أنت بتتحرك بكل سرعة .. لأن مع أول تباطيء في سرعتك ... او انك تقف دقيقة زيادة قدام التلاجة .. حتلاقي نفسك اتلزقت في ارضية الطبخ للأبد ... زي ورقة الصمغ اللي بتصطاد الدبان و الحشرات ... و بالنسبة لك حتكون النهاية ..جيم أوفر يا حلو ....ما فيش اي وسيلة انك تتخلص من اللزقة دي ... و حيكون آخر اثر يلاقوه بعديك وصيتك اللي كتبتها بعود الكبريت علي حتة جبنة نستو بتاعت كارفور ...

لكن الشيء المشترك في كل مطابخنا ... ايام العزوبية يعني .. هي كيس الزبالة اللي متعلق علي أكرة شباك المطبخ و لا ورا بابه .... دايمآ موجودة هناك .. نفس الكيس من فترة ... فترة طويلة جدآ جدآ ... هو هو .. الفرق الوحيد انه كل يوم بيتنفخ زيادة .. و يتنفخ .. و يتنفخ ... ..افتكر واحد صاحبي زمان كان كيس الزبالة عنده اتملا و ما كانش لسه عنده اي استعداد انه يرميه لدرجة انه كان بيحشر الحاجات فيه مستخدمآ مفك صليبة ...

من الكيس ده في اغلب الأحيان .. تلاقي خليط من زيوت أو دهون او اي سوائل تانية من صلصة او بواقي سوائل الغسيل بينقط منه نقطة .. نقطة ... و تحت الكيس تلاقي اشكال مختلفة بتتكون مع الوقت ... ممكن ياخدوا فورمة حيوانات او عساكر .. و ده بيسعد الطفل اللي موجود جواك فما بيكونش ليها اي تأثير سلبي ... حاجات بتفكرك بطفولتك ... مش قرف و جراثيم لازم تتشال لا سمح الله... بالنسبة لي (زمان ) كيس الزبالة ده كانت بتتكون عشرة بيني و بينه ... لأنه ساعات بيبقاله زمن هنا لدرجة اني ما اتخيلش المطبخ من غيره .. ده انا حتي فاكر كبس زبالة معين و تحديدآ في أواخر 4 شهور من سنة 88 ... اتكونت عشرة بيننا لدرجة اني سميته "مهران" و كان الحاجة الوحيدة اللي شاركتني عيد ميلادي في نوفمبر من نفس السنة ...و يوم ما اضطريت اني اخيرآ ارميه لأني فعلآ كنت لآزم أرميه رفقآ علي جيراني من قنبلة بيولوجية ... من غير ما احس عينيا رغرغرت لثواني من الم الفراق ...

الحاجة الوحيدة اللي ممكن يعملها الأعزب في المطبخ .. بخلاف انه يفتح التلاجة علشان يقربع مباشرة من ازازة المية ( بلا كوبايات بلا قرف ) او يعمله سندوتش جبنة او حلاوة ... الحاجة الوحيدة انه يحط عقلتين ميه في الطاسة بعد ما أكل منها مباشرة البولوبيف اللي سخنه ... و بعدين يحرك الطاسة دي شوية يمين و شوية شمال .. و بعدين يسيبها مايلة علي طرف الحوض ... و بس ... و مباشرة زي الأخطبوط يتسحب بخفة للكنبة قدام التليفزيون و يبتدي ابهامه يدوس علي زرار تغيير القنوات في الريموت كونترول 99 مرة و بعدين يبتدي من أول و جديد ....

اثناء الفترة دي .. نقطة الزيت اللي فاضلة مايلة في الطاسة اللي جوا الحوض .. تلاقيها بتتزحلق بالسلوموشون و بهدوء شديد ناحية قاع الحوض ... في سكتها تقف تلعب شوية مع عود بقدونس مزنوق في المصفاية .. يلفوا مع بعض و الناحية التانية يلاقوا بواقي بصلاية فاضلة من اكلة العجة بتاعت الأسبوع اللي فات ... و بعدين يلاحظوا كلهم ان ازازة الصابون السائل بتبصلهم بكل قرف .. فمن سكات ياخدوا كلهم بعض و يتحشروا جوا ماسورة المية في انتظار يوم الأنفجار العظيم ...

كل ده ...الجنة الرائعة دي .. الركن المحمي ده ... الدماغ الفاضية من اي مشاكل .. كل ده حينتهي اليوم اللي يقرر صاحبنا حاجة بعد ما وقف يريل قدام جوز ... جوز ... جوز عيون عسلية .. و هي تبصله بكل مكر و تقوله ... يا سم !!!

[Folana]

السلام عليكم ورحمة الله...

أنا داخلة أضحك بس ياحضرة الناظر...نونكن؟

انت فزيع...فزيع بجد...

[se_ Elsyed]

ده انا حتي فاكر كبس زبالة معين و تحديدآ في أواخر 4 شهور من سنة 88 ... اتكونت عشرة بيننا لدرجة اني سميته "مهران" و كان الحاجة الوحيدة اللي شاركتني عيد ميلادي في نوفمبر من نفس السنة

ولالالالالالالالالالالالالالالا ... الحته دي إنت سارقها من فيلم cast away بتاع توم هانكس لما وقعت به الطيارة في الجزيرة وما كانش له اصحاب غير كورة أديدس كان بيتكلم معاها ويحكي لها حكايات ... بالمناسبة الفيلم ده بأحس إنه متمول من شركة " فيديكس " من كتر الشُهرة اللي اخدوها لما وقع مع توم هانكس عالجزيرة الطرود والرسائل اللي كانت مبعوته عالطيارة وكلها من خلال فيديكس..

ما علينا ... ده تخاطر توارد

بس بجد يا سكوب ... رووووووووووووعة وأعلى أصطباحه ... أنا كده مش محتاج الزغروف بتاع النهاردة ..

عايزين نكتب الكتاب بقى ياخواننا .... فين الناسسسسسسسسسسسسسسس .