رجالة في المطبخ

[Salwa]

بلح البحر وطريقته.

دى طريقة بسيطة ..

بعد تنظيف بلح البحر ووضعه فى حلة لمدة دقائق ...

يكون جاهز.

اللى متفتحش تترمى لأن معنى كدة انها بايظة .

وبعدين نبدأ نشيل صدفة من كل واحدة ونترك فقط واحدة فيها بلح البحر .

نحضر طماطم مقطعة صغير جداا وبصلة مقطعة صغير جداا وفلفل احمر سبق شويه مقطع صغير وممكن فلفل احمر صابح مش مشى .........ونتبل هم بملح وفلفل اسود ونضع عليهم خل وملعقة واحدة فقط زيت زيتون ...ونملأ الأصداف بهم.

وبالهناء والشفاء .

http://www.google.es/imgres?q=los+mejillones+y+como+se+hacen&um=1&hl=es&biw=1024&bih=485&tbm=isch&tbnid=R-Yi2xsJJbNahM

فيه طريقة تانية ..

اننا ننظف الأصداف وايضا يتم السلق بمياه او حتى بدون مياه ...يعنى مجرد ما نضعهم على النار ونغطى الحلة سوف تفتح القواقع لوحدها .

بس المرة دى حانعمل صلصة زى صلصة الكفتة المصرى .

يعنى كام فص ثوم مقطع صغير جدااا .....نحمره ف شوية زيت ثم نضع عليه الصلصة ونضع ملح وفلفل اسود وشوية خل .

ثم..

نضعهم شوية شوية فوق الأصداف وبالهناء والشفاء .

وعلى فكرة ..

ده طبق مشهور جدااااااااا.......فى كل انحاء اسبانيا .

ومفيش مطعم او كافتريا مفيهاش بلح البحر .

طريقة الصلصة دى خاصة بى يعنى انا بحب اعملها كدة .

فيه اكثر من عشرين طريقة ....

واللى عايز طرق زيادة يطلب .

سلام .

http://www.google.es/imgres?q=los+mejillones+con+salsa&um=1&hl=es&biw=1024&bih=485&tbm=isch&tbnid=-3T9XbpVbLnRxM:&imgrefurl=http://lacocinadelbichillo.blogspot.com/2009/07/mejillones-en-salsa.html&docid=hVtkv1VMFP-hVM&imgurl=http://2.bp.blogspot.com/_qjKxEzQk7Qk/SkunuOAI-TI/AAAAAAAABSA/82WYVi0I42o/s400/mejillones%252Ben%252Bsalsa%252Bcopia.jpg&w=400&h=346&ei=Z_X5TpKkN8HDhAf8n-i2AQ&zoom=1&iact=hc&vpx=742&vpy=143&dur=111&hovh=209&hovw=241&tx=142&ty=158&sig=116848865666452210429&page=1&tbnh=136&tbnw=143&start=0&ndsp=10&ved=1t:429,r:4,s:0

[Scorpion]

كالعادة الجأ اليكم لما اقرر اعمل مغامرة خطرة .. اللي هي استغلال تصريح المدام باني ممكن اطبخ

و النهارده هف عليا المسقعة و خلاص قلتلها اني عازمها علي المسقعة

اللي اعرفه انها بتتعمل بالبتنجان ؟؟ صح ؟؟

و لحمة مفرومة و صلصة ...

دخلت المطبخ و جيت ابتدي حوست ( من الحوسة) .. دخلت النت .. اتلخبطت ..

مونكن بقي بالتصوير البطيء حد ابن حلال يباصيلي بسرعة وصفتها بالمقادير .. تكفي لشخصين

شاكرين مهللين جعانين

[Salwa]

صباح الخيرات أخى كامل .

شوف ياسيدى .

طريقة سهلة جداااا...

احضر اتنين باذنجان وقطعهم حلقات واقليهم ف الزيت وضعهم على ورق مطبخ علشان يعنى يصفوا شوية الزيت اللى فيهم.

تكون محضر لحمة مفرومة وبصلة برضه مفرومة ........تحمر البصل شوية وتضيف له اللحة ويعنى تعملها عصاج وتضيف لها ملح وفلفل اسمر .

تعمل الصلصة ....وهى انك تقطع فصين او تلاتة ثوم رفيع وتحمرهم شوية ف الزيت ثم تضع عليهم الصلصة و...ضع شوية خل صغيرين ...وبرضه بسيط ملح وفلفل .

فيه ناس بتحب تضع ايضا بطاطس محمرة او فلفل اخضر محمر ..بس انا بعملها ببذنجان فقط واحيانا اضع بطاطس برضه محمرة .
تحضير الصينية سهل جدااا

تضع طيقة باذنجان وفوقها اللحم المفروم ثم طبقة اخرى .......ثم الصلصة اللى اتعملت .
تدخل الصينية الفرن .....عشر دقائق فقط .

لو عاوز ...ممكن تضع على الوجه جبنة مبشورة ..(( ده حسب الرغبة ))

وبالهنا والشفا.

الصورة منقولة ... :flr1:

[Scorpion]

يا رب يخليكي يا مدام سلوي يا رب .. يعطيكي ما يحرمك ..

معلش بقي .. باقي التشكرات نخليها لبعدين علشان انا كده يا دوبك اعمل اللي كتبتيه ..

يا ساحة المعركة .. اني قااااااااااااااااااااااااااااادم

هللي يا ملاعق .. اصرخي يا سكاكين

أتي غاسل المواعين

عوووووووووووووووووووووووووووووووووووووووووو

[عبير يونس]

تمام يا ماما سلوى معنديش اي اضافة على الطريقة غير اني باسويها ع النار مش في الفرن

لأني بأعملها يخنة يعني زي طبيخ من غير رص في صينية :)

و باضيف بطاطس محمرة و فلفل اخضر مقليين برضه

بمناسبة المسقعة فلها معي ذكرى لا تنسى

كانت اول وحم لي في اول طفل

هفت عليا بشدة و بالحاح رهيب

و الله يكرمها سلفتي عملتهالي و كانت أحلى مسقعة كلتها في حياتي

كانت بالالوان الطبيعية و طلبتها من غير لحم ( نباتي) و طعمها كان خرافي

حاكم انا شبه نباتية

و اهي كده تنفع اكلة صيامي يا سكوب

و أطعم من اللي باللحم كمان

بالهنا و العافية على قلبك انت وام جونيور

[أبو محمد]

لزوم الكوليسترول وكده يعنى

بطلنا نقلى الباذنجان

بنرصصه فى صينية مرشوشة بشوية زيت (سبراى)

ويترش الباذنجان برضه بزيت ويدخل الفرن

بعد شوية يتقلب على الوش التانى

ده بديل عن قلى الزيت والنتيجة واحدة بس أخف بكتير

[Scorpion]

عدت علي خير .. هو يعني الطبق ما طلعش زي اللي في الصورة يا مدام سلوي .. لكن اللي يعرف ابويا يقوله ..

المشكلة كانت في الصلصة اللي ما عرفش ليه لونها طلع برتقاني و متماسكة زيادة عن اللزوم .. بمعني فضلت عالوش من غير ما تتسرسب بين المكونات .. لكن بحركة لولبية مني قلبتهم في بعض و خلاص ..

مافيش فايدة .. الظاهر احنا مالناش عيش في المطبخ فعلآ

المهم ان الطعم كان قريب من اللي فاكره عن المسقعة .. و المدام أكلت عادي و ما رحتش رجعت بعد كده ..

و احتمال ... احتمال يعني تسمحلي اطبخ مرة تانية .. بس أكيد حتعدي فترة الأول..

الف شكر يا مدام سلوي يا نصيرة حياري الطبيخ

و نفس الشكر للعزيزة مدام عبير لفكرة المسقعة الصيامي

اما بالنسبة لأبو محمد .. فشرحه في موضوع البتنجان و قليه .. لكن هنا له علاقة بالرجيم .. و عليه البتنجان بيتم تسويته مباشرة في الميكرويف علي صينية ممسوحة ريحة زيت ..

1000 جراتسي مرة تانية ..

علي فكرة انا طبعآ ما ورتلهاش اني كنت بغش من الكومبيوتر ...

[Salwa]

الحمدلله ياكامل ان الموضوع عدا على خير .

بس تعرف .

المرة الجاية كل شئ حايكون اسهل ...,حكاية الصلصة سهلة يعنى كان ممكن تضع لها نصف كوب من الماء .
وممكن تعمل الصلصة بطريقة تانية وهى انك تقشر الطماطم وتقطعها صغير جدااا ....وتحمر الثوم وتضيف الطماطم ونص كوب ماء وشوية خل وملح وفلفل .

وان شاء الله تطلع ممتازة.
على فكرة ...

ممكن تعمل تغيير وتعمل الموساكا اليونانية ....هى نفس الطريقة بس بكذا نوع خضار يعنى جزر وكوسة وبطاطس وباذنجان...ولو عاوز لحمة مفرومة ( عصاج ) ...وتضيف باشميل وممكن تضع جبنة بارميزان أو موتزاريللا .

بس بجد برافو ويارب المرة الجاية تطلع أجمل .

وبالهنا والشفا مقدما أى شئ تعمله .
كل التحايا.. :flr1:

[MZohairy]

اولا انا مابحبش احط لحمه في المسقعه لان طعمها بيضيع طعم الباذنجان

ثانيا لما تعمل طبخه لاول مره ماتقولش للناس على اسمها الحقيقي....قولهم انها اكله جديده و اخترع اي اسم منعا للاحراج

[Scorpion]

ثانيا لما تعمل طبخه لاول مره ماتقولش للناس على اسمها الحقيقي....قولهم انها اكله جديده و اخترع اي اسم منعا للاحراج

حريف يا زهيري .. و فكرة ميه ميه .. نلجأ اليها المرة اللي جاية ..

و من دلوقتي ابتدي افكر في اسماء حركية ..

يعني البامية الويكا نسميها ... ممم .... نسميها .. آيا كاسكيليا

طاجن الرز المعمر نسميه .. آآآآآ ... ظرب عثمانلي .. و كده يعني

:FN:

[MZohairy]

عملت مسقعه لاخواتي سنة 86 و قولتلهم دي اكله مكسيكي اسمها X12

و عجبتهم جدا

و هي مالهاش علاقه بالمسقعه خالص

[أبو محمد]

أنا مرة فى الكويت فى الصيف والولاد وامهم فى أجازة

عزمت صحابى عندى وطلبت الأكل كله من مطعم الشركة

ونسيت أطلب حاجة حلوة

تعمل ايه يعبرحيم .. تعمل ايه عبرحيم .. تعمل ايه ياعبرحيم

بابص فى دواليب المطبخ لقيت علب جيلى

أنا بقى مش دؤرم زى زوهيرى

قلت لهم بالفم المليان حاعملكم جيلى .. جيلى يا غجر (ولحنتها)

طلع له اسم تانى .. مش انا اللى سميته .. دا صحابى اللى سموه

:)

هيلى .. هيلى يا عبده (ولحنوها)

[ابو حودة]

هي دي الموضوعات اللي شدتني للمحاورات وموضوعات

المغتربين المصريين ( الان انا مغترب في مصر )

مش تقوللي سيسي واخوان

[Scorpion]

عندك حق يا استاذ ابوحودة .. الجو العام خنق الضحكة الصافية جوانا .. حتي ضحكنا دلوقتي بقي سياسي .. ساعات كتير اقرر اني اكتب قصة كوميدية من بتوع زمان .. و افكر و اعصر دماغي و في الاخر و لا الهوا .. أنا اللي كان اول تعيين ليا في المحاورات مخزنجي و مشرف باب الأبتسامات .. يااااه

عالعموم دعوة للجميع اننا نخف الشد شوية ... نسيب نفسنا من فترة للتانية لضحكة صافية .. لفرد الوش .. و ربنا يسهلها ان شاء الله ..

علي جنب بقي .. الواحد لازم يعمل طلب رسمي لمشرفين المحاورات بضم الموضوع ده بما يحوي من وصفات هامة للمسقعة الرجالي و الهيلي هيلي بتاع عبده .. الي أخواته في الموسوعة المطبخية المتواجدة في موضوع " رجالة في المطبخ" شاكرين اهتمامكم ..

صوت عم سيد الفراش : ما تنساش الدمغة و الختم .. و خلي اتنين موظفين يمضوا عالطلب ... و الشاي بتاعي

- يادي النيلة يا دي النيلة ... حتي هنا ..

آدي الدمغة

و آدي الختم

و آدي امضا اتنين موظفين ما يقلش مرتبهم عن 67 جنية و ستة ساغ

أما نشوف طلب النقل حيوافقوا عليه و الا لأ ..

[عبير يونس]

روح يا افندي على مكتبك دلوقت

و حندرس الطلب و نبقى نبلغك في يوم 31 منه

[Salwa]

صباح الخيرات ياكامل باشا.

انت بس اطبخ اللى يخطر على بالك وصدقنى الأكل حايطلع تحفة .

وأكييييد كل اللى حاتعمله حايتاكل ف ثوانى ......من جماله يعنى ..

سوف اضع لك صورة هى عبارة عن عينة من محبى .عمايل ايديك.

كل التحايا.

[Salwa]

[Scorpion]

روح يا افندي على مكتبك دلوقت

و حندرس الطلب و نبقى نبلغك في يوم 31 منه

31 منه عدا يا حاجة عبير و بقينا 6 من اللي بعده .. فيه اخبار عن الطلب بتاعي ؟؟ هه

[Scorpion]

ماحدش ييجي في باله اني حطيت اي مبلغ في درج الحاجة عبير .. انا بس قمعت كام بامياية من الكيس اللي قصادها ...

[عبير يونس]

دي بسلة يا سكوب

يا نهار اسود

أقول للافندي بتاعي ايه

بسلة مقمعة

:cry1: :cry: