رجالة في المطبخ

[إيزيس]

و حياة غلاوتك يا سي السيد عملت اتصالاتي وبعتت إيميلاتي وان شالله الخير آت آتي

تم تعديل 14 فبراير 2008 بواسطة قرنفل

[se_ Elsyed]

و حياة غلاوتك يا سي السيد عملت اتصالاتي وبعتت إيميلاتي وان شالله الخير آت آتي

عملتيها يا جرنفلة ؟

بلغت عني الحاكومه وعايزه تبعتيني ورا السمس ؟

[إيزيس]

شكلي أنا اللي رايحة في داهية إيه اللي جابني في المطبخ ؟؟؟؟؟؟؟؟؟؟

تم تعديل 5 مارس 2008 بواسطة Scorpion

[أبو محمد]

يــــــــا قــــــــــــــــــــــوم

أيها الرجاااااااااااااااااااااااااااااال

من أراد منكم شوربة سى فود ، أو سمك بورى سنجارى ، أو جمبرى مشوى فليتبعنى

[rar]

ما تقفلوا الموضوع ده بقي... جوعتونا و احنا قاعدين في الشغل زي المحابيس...

و بعدين عمو سين سين... يعني ايه زغروف؟ انا اصلي العربي بتاعي ابتدا يضعف... فيا ريت الترجمة لو سمحت...

[aimen]

مطبخ العزاب -- :roseop:

-ياه فكروتى بالذى مضى ذكريات --

اول ذكرياتى مع المطبخ العزيز لما كنا فى الكلية كنا مقضينها كشرى كل يوم لغاية ما بطننا قربت تنفجر ولا اكوام العلب اللى كانت مرمية قدام الشقة ياه المهم فى مرة قلنا لازم نتمرد على الوضع ونعمل اكل ما هو مش معقول نفضل طول عمرنا عبيد كده عن بتاع الكشرى طيب نعمل ايه يا رجاله نعمل ايه ؟ قلنا نعمل مكرونة شفتوا ازاى ؟؟؟ من كشرى لمكرونة يا قلب لا تحزن -----

بدينا نسخن المياة وكأننا داخلين حرب أو فيه حد بيولد عندنا

خلاص المياة جاهزة يبقى يا شباب ناقص ايه ؟؟؟ اه المكرونة خلاص ما علينا حطوا المكرونة يا شباب خلاص الجثة فى الحلة والمياة بتغلى يا حلاوة يبقى خلاص عدينا ووصلنا نأتى للحظة الحاسمة ؟؟؟ محتاجين نصفى المياة من المكرونة طيب وايه المشكلة

هنا السؤال يا مسلم ؟؟؟ ازاى نصفى المياة من الحلة ؟؟؟ اربع مهندسين اثنين كمبيوتر واثنين تحكم آلى ؟؟ تتوقعوا اتصرفوا ازاى ؟؟؟؟

مش عاوزين اى حلول تقليدية ؟؟؟؟

ولا واحد يتذاكى علي ويقول استخدم المصفاة ؟؟ احنا اصلا لقينا الحلة بالعافية تقولى مصفاة ماعندناش التكنولوجيا دى ؟؟؟

طيب ممكن تميل الحلة شوية وتصفى المياة ؟؟؟ عيب يا جماعه بنقول حلول مش تقليدية بصراحة ما جاش على بالنا ابدا الطريقة دى

wst::

wst::

طبعا لأننا مهندسين وكما قلنا لا نقبل بالحلول التقليدية و ضعنا المكرونة والمياة فى كيس وقعدنا نخرم الكيس علشان المياة تنزل منه يعنى مصفاة :unsure:

ايه حد عنده اعتراض ؟؟؟

طبعا زى ما قالوا وتأتى الرياح بما لا تشتهى النفس

اتخرم الكيس يا معلم ووقعت المكرونة على ارضية الحمام ورجعنا بخفى حنين الى الكشرى

تم تعديل 14 فبراير 2008 بواسطة aimen

[إيزيس]

الناس دي بتلعب بأعصابنا

من أراد منكم شوربة سى فود ، أو سمك بورى سنجارى ، أو جمبرى مشوى فليتبعنى

وبعد النداء العظيم ده اللي فكرنا بنداء الكابتن أسامة السيد على دبي الفضائية ننزل على كشري ومكرونة هنلمها من أرضية الحمام

[aimen]

كل برغوث على قد دمه

احنا نيجى حاجه جنب س السيد

[إيزيس]

هي وصلت للبراغيت

مطبخ ده واللا حمام التلات

ما تقفلوا الموضوع ده بقي... جوعتونا و احنا قاعدين في الشغل زي المحابيس...

متهيألي كده نفسك اتسدت أسبوعين

[zizetta]

rar .. أظن الزغروف ده يقرب للسمسون وهو من نفس عيلة الجوين .. مامتهم اسمها اصطباحه وساكنين في الغرزة ..

بالمناسبة سمعت مرة نشيد وطني للعيلة دي بيقولوا فيه علي وزن جايز ظلام الليل يبعدنا يوم إنما .....ألخ:

جايز بربع زبيب نعمل دماغ إنما ..

نقدر بقرش حشيش نوصل لأبعد سما

ده حلمنا .. طول عمرنا .. غرزة تلمنا .. كلنا .. كلنا ..

.. وبعدين يا ماما إنتي مش عارفة ان الزعل وحش علشانك .. إيه اللي دخلك المغارة دي .. أنا داخلة أخدك وخارجة تاني .. ما تروحيش حتت زي دي تاني ..

سكوب .. كلامك بيعمللي دماغ ولا أجدع زغروف من سي السيد .. بجد أنت روائي ممناز.. تحياتي.

مش عارفة ليه بدأت أعرف سر الفيران اللي كتب عنها سي السيد وآخرون...

تحياتي

زيزيتا

[إيزيس]

وبعدين يا ماما إنتي مش عارفة ان الزعل وحش علشانك .. إيه اللي دخلك المغارة دي .. أنا داخلة أخدك وخارجة تاني .. ما تروحيش حتت زي دي تاني

..

وحياتك يا ززة ماعرف مين اللي زقني

مش ده برده كان مطبخ انتوا فتحتوه على قسم المنيل ؟؟

الحمد لله ربنا بتعك لي في الوقت المناسب

أشكرك يارب

[Scorpion]

أحنا كمان حنتأّمَر .... مش كفاية داخلين تفليتة في موضوع رجالي بحت .... شوف يا اخي الفضول النسوي .. لأ و كمان عايزينا نقفله ... هو احنا لسه كتبنا حاجة .....

بلاش انتي يا قرنفلة هانم .. احنا محتاجين سعادتك في موضوع الكتاب ..

يا استاذ ايمن ...

اولآ سي السيد من حزب البراغيت زينا كده ... اللي فتح صدره و عزم الكل عالحاجات الأمبريالية الرأسمالية طحن دي بتاعت الكابوريا و السيفول و السنجاري فده الريس ابو محمد ... ربنا يسامحه بقي ....

و بمناسبة المكرونة و اللي عملتوه ... خلتني افتكر زمان ايام اسوان ... لما كنت حموت علي أكلة محشي ... و اتصلت بالوالدة ربنا يخليهالي دايمآ يا رب علشان اعرف طريقة الخلطة .. و بكل صبر شرحتلي الوصفة بالمقادير .. و حاجة غريبة فهمت كل حاجة من أول مرة ... و نزلت و استنضفتلي حتة كورومباية بنت حلال كده علي كل مكونات الخلطة .. و قبل ما اروح عديت علي العيال في الشركة اعزمهم اخيرآ علي اكلة من صنع ايديا...المهم علشان ما اطولش .. قول طول يا خواجا .... رجعت البيت ... و بكل ذمة و ضمير ابتديت اقرطف .. لأ ... أقشر ... ابتديت افك الكورومباية ورقة ورقة زي الكتاب... و بعدين الخلطة اتعملت برضه زي الكتاب .. و كل دقيقة تمر اكتسب ثقة أكتر في نفسي ... و العملية كان شكلها حينجح و حعمل اخير سوكسيه في المطبخ ..

لحدالخطوة الأخيرة .. لف صوابع المحشي ...

امسك ورقة المحشي ... و احط الخلطة جواها .. آجي الفها ... تتفرد تاني

الفها ... تتفرد تاني ...

الفها ... تتفرد تاني ...

ازنق صباع جنب صباع .. احشرهم ... الصوابع تتفك تاني لما زهقت ...

وبما اني كنت علمي علوم .... بعد فترة صغيرة من التركيز .. رحت جبت بكرة خيط اسود ( ما كانش عندي غير لونين ابيض و اسود ) و الأسود كان لايق اكتر عالكورومباية

و بقيت الف الصباع و اربطه بالخيط و اعمل عقدة و ارص ... و فضلت كده صباع صباع لما جالي احباط بحق و حقيقي ....

طبعآ ساعة العشا الشباب بكل قرف كانوا بياكلوا في محشي ني و الفتل متدلدلة من كل صباع ...

حتي الوز اللي كان عند ام طارق اللي في اول دور ... الوز اللي بياكل كل حاجة .. مارضاش ييجي جنب المحشي ده ....

تاني يوم الوالدة بتتصل بي علشان تتطمن عملت ايه ...

فلما شرحتلها خيبتي ... سكتت شوية ... واضح انها كانت بتفكر ....

لكن لما سألتني انت سلقت ورق الكرومب الأول

قلتلها لأ .. انتي ما قلتليش ....

سمعتها علي ذكائي الناحية التانية ....

[aimen]

طيب الناس كلها سمعت عن عشاء على ضوء الشموع ؟؟ لكن عشانا كان غير

من يومين الكهرباء قطعت عندنا فى الروضه - دى حاجه نادرة جدا ومش بتحصل الإ كل سنتين مرة المهم احنا للأسف كنا بنجهز الأكل علشان العشاء طيب نأكل على نور ايه ؟ مافيش كشافات ولا شموع - عزاب ياعالم نعمل ايه نستخدم الجوالات لأ صعبة دى

كل واحد جاب اللاب توب الخاص بيه و استمتعنا بعشاء ظريف على ضوء اجهزة اللاب توب

[أبو محمد]

من أراد منكم شوربة سى فود ، أو سمك بورى سنجارى ، أو جمبرى مشوى فليتبعنى

أنا فضلت باصص ورايا ساعة ونص لحد رقبتى ما تلوحت .. مالقيتش حد فلتبعنى ..

رحت نازل على مطعم أسماك الكتعة اللى فى ميامى .. لقيته مقفول عشان معندهوش رخصة ..

حودت على حسنى فى المندرة جبت سمكتين بلطى مشوى بالردة لفهم لى فى ورقة أصفرة .. وروحت البيت بقى وهيصت .. فتحت الورقة ألاقيلك إيشى شربة سيفود مشوى بالردة (السيفول دى محترمة قوى عند ابو ربيع يا سكوب) .. وايشى جمبرى مشوى بالردة برضه .. وايشى بورى سنجارى من عند سنجر .. ده بقى كان مشوى بالردة

بسم الله يا جماعة

بصوا بقى ..

إحنا ضحكنا كتير .. ولعبنا كتير .. والسنة قربت تخلص .. والناظر شديد (هى كانت سلسلة بتتقال كده على بعضها)

دلوقتى بقى إليكم النبأ العظيم .. قنبلة الموسم - شوربة فواكه البحر Sea food soup

المجادير يا جلب العنا

- تجيب ربع كيلو جمبرى

- واحدة سبيط حلوة كده .. لازم لونها يكون أبيض مش مايل للصفرة .. تخلى بتاع السمك ينضفها أحسن ليلتك تبقى كحلى .. ويقطعهالك مكعبات

- سمكاية حلوة كده قد الكف .. لو ما تعرفش تخليها من الشوك خلى السماك يخليهالك وتقطع لحمها مكعبات برضه

- كابورياية نتاية مزغلطة وتقيلة كده .. لو ماتعرفش تطلع لحمها خلى السماك يطلعهولك .. واذا كان زهق منك إقسمها انت نصين من غير ما تقشرها بعد ما تغسلها

- كوبشة جندوفلى تفصصهم وتطلع لحمهم .. أظن دى تقدر تعملها لوحدك

- معلقتين كبار دقيق

- معلقة كبيرة زيت

- نص كوباية لبن حليب

- بصلاية وسط أو صغيرة حسب مزاجك

طريقة تحضير القنبلة

نسيت أقولك فى المجادير حلة واحدة وَسَط تملى تلاتربعها مية .. نخش بقى على طريقة التحضير

1) تحط الحلة على النار لغاية المية ما تغلى

2) تحط السبيط والبصل وتسيبهم قيمة خمس دقايق

3)حط الجمبرى والكابوريا والجندوفلى وتقلبهم برضه قيمة خمس دقايق

4) آخر حاجة تحطها هى السمك .. وتسيبهم على النار لحد السمك (اللى هو آخر حاجة) ما يستوى

5) طلَّع فواكه البحر وصفيها (خلى بالك من كيس النايلون المرة دى ما تضحكش علينا أبلة فكيهة) وخلى المرقة فى الحلة زى ما هى

6)حط الزيت والدقيق فى وعاء (كزرولة أو حلة زقنططة) وحطهم على النار وقلِّب لغاية لما لونهم يبقى أصفر فاتح

7)تاخد كوبايتين من المرقة وتدلقهم بسرعة على الدقيق مع التقليب (ماتنساش تشهق علشان العين) وبعدين تضيف اللبن

8) حط فواكه البحر إللى انت كنت مصفيها على الشوربة البيضة دى وتقلب كويس وتضيف الملح حسب رغبتك

9) توطى النار وتسيب الشوربة على نار هادية لغاية لما تتقل شوية صغيرة (بس إوعى تسيبها لحد ما تبقى مهلبية)

ممكن بقى تدلَّع نفسك بتنتوفة زعفران ، تنتوفة كرفس واللى عاوز يعصر لمون ويحط فلفل ابيض هو ومزاجه (أنا باعمل كده) واللى مش عاوز براحته يعنى

واشرب وادعيلى وماتقولش لعدوك

لو عجبتكم .. حقولكم على صينية البورى السنجارى بالبطاطس

[zizetta]

بصراحة يا بو محمد .. دي وصفة سهلة ودي وصفة هايلة .. بحب أكلها بس أول مرة أعرف ان بيتحطلها لبن سمك تمر هندي ...

أنا لي أخت فزيعة في المطبخ .. وبتعمل الشوربة دي حكاية حبقي أسألهالكم عليها بتتعمل ازاي ونشوف بقى كيد النسا والا اكل الرجال..

تحياتي

زيزيتا

[~Heba~]

مطبخ العزاب --

-ياه فكروتى بالذى مضى ذكريات --

اول ذكرياتى مع المطبخ العزيز لما كنا فى الكلية كنا مقضينها كشرى كل يوم لغاية ما بطننا قربت تنفجر ولا اكوام العلب اللى كانت مرمية قدام الشقة ياه المهم فى مرة قلنا لازم نتمرد على الوضع ونعمل اكل ما هو مش معقول نفضل طول عمرنا عبيد كده عن بتاع الكشرى طيب نعمل ايه يا رجاله نعمل ايه ؟ قلنا نعمل مكرونة شفتوا ازاى ؟؟؟ من كشرى لمكرونة يا قلب لا تحزن -----

بدينا نسخن المياة وكأننا داخلين حرب أو فيه حد بيولد عندنا

خلاص المياة جاهزة يبقى يا شباب ناقص ايه ؟؟؟ اه المكرونة خلاص ما علينا حطوا المكرونة يا شباب خلاص الجثة فى الحلة والمياة بتغلى يا حلاوة يبقى خلاص عدينا ووصلنا نأتى للحظة الحاسمة ؟؟؟ محتاجين نصفى المياة من المكرونة طيب وايه المشكلة

هنا السؤال يا مسلم ؟؟؟ ازاى نصفى المياة من الحلة ؟؟؟ اربع مهندسين اثنين كمبيوتر واثنين تحكم آلى ؟؟ تتوقعوا اتصرفوا ازاى ؟؟؟؟

مش عاوزين اى حلول تقليدية ؟؟؟؟

ولا واحد يتذاكى علي ويقول استخدم المصفاة ؟؟ احنا اصلا لقينا الحلة بالعافية تقولى مصفاة ماعندناش التكنولوجيا دى ؟؟؟

طيب ممكن تميل الحلة شوية وتصفى المياة ؟؟؟ عيب يا جماعه بنقول حلول مش تقليدية بصراحة ما جاش على بالنا ابدا الطريقة دى

طبعا لأننا مهندسين وكما قلنا لا نقبل بالحلول التقليدية و ضعنا المكرونة والمياة فى كيس وقعدنا نخرم الكيس علشان المياة تنزل منه يعنى مصفاة

ايه حد عنده اعتراض ؟؟؟

طبعا زى ما قالوا وتأتى الرياح بما لا تشتهى النفس

اتخرم الكيس يا معلم ووقعت المكرونة على ارضية الحمام ورجعنا بخفى حنين الى الكشرى

تم تحرير المشاركة بواسطة aimen: أمس, 09:43 PM

اذا كنت اخدت بالك هم مش عزاب هم بس بيفكوا شوية عن نفسهم من زوجاتهم و اولادهم لكن ملقيوش مكان غير المطبخ :unsure:

[أبو محمد]

بصراحة يا بو محمد .. دي وصفة سهلة ودي وصفة هايلة .. بحب أكلها بس أول مرة أعرف ان بيتحطلها لبن سمك تمر هندي ...أنا لي أخت فزيعة في المطبخ .. وبتعمل الشوربة دي حكاية حبقي أسألهالكم عليها بتتعمل ازاي ونشوف بقى كيد النسا والا اكل الرجال..

تحياتي

زيزيتا

ماهو علشان كده طعمها يجنننننننننن :unsure:

[Alshiekh]

ممكن بقى تدلَّع نفسك بتنتوفة زعفران ، تنتوفة كرفس واللى عاوز يعصر لمون ويحط

فلفل ابيض هو ومزاجه (أنا باعمل كده) واللى مش عاوز براحته يعنى

واشرب وادعيلى وماتقولش لعدوك

لو عجبتكم .. حقولكم على صينية البورى السنجارى بالبطاطس

شكلها كده أكلة تجنن ( طعمها حلو مش قصدى حاتجيب جنان يعنى ) بس والنبى الأول قولى منين نجيب

فلفل ابيض ده علشان أعرف ادلع نفسى بجد؟

[se_ Elsyed]

شكلها كده أكلة تجنن ( طعمها حلو مش قصدى حاتجيب جنان يعنى ) بس والنبى الأول قولى منين نجيب <span style='color:#000000;background:#000000'>فلفل ابيض</span> ده علشان أعرف ادلع نفسى بجد؟

بعد إذنك يابو محمد سيب لي أنا الطلعة الجوية دي ..

- بص يا محمد ... في ناس كتير مش بتحتب شكل الفلفل الإسود في الأكل .. زي ما حصل من لينا مرات مسعود في مسرحية المتزوجون لما حطت الفلفل الإسود في الملوخية وهو صاحي وبيمشي ... عشان كده بيفضلوا الفلفل الأبيض لإنه ما بيغيرش لون الطعام إلى الإسود كما يفعل الفلف الإسود ... وروح إنت بس للعطار وقول له : إوزن لي نصف أوقيةٌ من الفولفول الأبيض وزد عليه ولا تبخس الميزان .

-----------

أما أنت يا عم أبو محمد فطلعت شقي بحر كبير ... وجميلك بتاع الشوربة ده مش هانسهولك طول العمر ...

لإن اخوك سين سين غاوي اكل صيني ( لدرجة ساعات بأبقى عايز أغير إسمي إلى صين صين ) وكنت هاموت أوعرف سر الخلطة بتاعت الشوربة دي لإن العيال الصينيين هنا بيتفننوا فيها وبأبقى نفسي أروح المطعم أخد بؤين شوربة وأتني راجع ومش شرط أكل أي حاجه .

بس بعذ إذنك لي إضافتين تلاتة صغيرين على الشوربة عشان تعطيط الطاقة الكهرومغناطيسية اللازمة لتشغيل محطات الوقود البيولوجية .

1- يا حبذا لو اضفنا ورقة او ورقتين من ورق اللوري اللي زي ده ... يا عيني يا عيني ... زمان كنت باحسب الجرسون وهو جايب لي سلطانية الشوربة عدى تحت شجرة في فصل الخريف فتساقطت بضعة وريقات في الطبق وما كنتش بأرضى أحرجه وكنت بأشيلها من سُكات .

2- لو واحد شوربجي بقى وبحق وحقيق وحب يشرب سلطانية شوربة من اللي وصى عليها داود في تذكرته ... يبقى يقطع حتتين تلاتة صغننين من نبات الزنجبيل الطازج اللي هو ده ... العيال بتوع الهند وشرق أسيا بيشفطوا البتاع ده شفط وبيستخدموه في كل أكلاتهم ...

3- ولتزيين الطبق شكلاً وموضعاً يُفضل وضع بضعة قطرات من صبغة اليود دي اللي بيسموها " صوص الصويا " بس أنا مسميها صبغة يود ...

وبالهنا والشفا

مع تحيات

محلات إسماك المحاورات ( شعارنا : من الشبكة رأساً إليك ... صاحي وبيلعب )

[nash]

صباح الخير علي كل راجل دخل المطبخ من غير ما يتصل بالمطافي والأمن المركزي.... :)

بمناسبه التشينيز فوود واللي هاعملها النهارده ياريت بس تدوني ودانكم وتنفذوا اللي هاقوله...والله طريقه سهله وجميله وعلي ضمانتي يا سي السيد...

طبعا بعد أذن أخونا أسكوب....اصلها خلاصه تجاربي في المطبخ ...

الطريقه بتمشي مع اللحمه والفراخ والجمبري علي فكرة ....

إذا باللحمه واللي هاطبخها النهارده ...تكون اللحمه شرائح طوليه رفيعه...

المطلوب ...قطعه زنجبيل مبشورة ومعاها 3 فصوص ثوم مبشور ورشه فلفل ابيض يتخلطوا مع بعض ويتقلبوا في اللحمه ونسيبها شويه صغيرين علي مانخلص الخلطه التانيه..ممكن لم يريد يضع قليل من النشا علي اللحمه المتبله

في طاسه مفلطحه ...يعني كبيرة ...للناطقين باللغه الألمانيه...

نضع برضه شويه جنزبيل مبشور وثوم مبشور وشويه فلفل أبيض ونقلبهم في معلقتين زيت ذرة ( عافيه ممتاز ) يصفر الخليط قليلا نسكب فوقه اللحمه الشرائح المتبله سابقا...ونحمرها

ثم نترك اللحمه علي نار هادئه حتي تتشب ميتها وتستوي...

ننشلها من الطاسه علي جنب شويه يعني مش علي طول...ونضع في نفس الطاسه التي استوت فيها اللحمه من قبل.. نفس الخليط السابق شويه جنزبيل مع ثوم مبشورين مع ملعقه سكر ونتركهم يصفروا ثم نضع فوقهم ربع فنجان عصير ليمون وخل أبيض ثم قليل من الصويا صوص الحلو والمالح ..انا بستعمل النوعين الموضحين في الصورة ونلاحظ الصويا المالحه بتكون قوامها أخف من الحلوة..

ثم نضع اللحمه مرة ثانيه مع الخليط الجديد ونتركها قليلا...وممكن عند هذه الخطوة نضع شرائح بصل أخضر ويتشوح قليلا مع اللحمه ..أنا شخصيا باضع البصل في الخطوة النهائيه وعند التقديم...ثم نضع فوق كل اللي فات كوب إلا ربع ميه محلول فيها ملعقه نشا ونتركها حتي يغلظ القوام ونطفي عليها وهنا أصبحت اللحمه جاهزة للتقديم...

في طاسه أخري نضع شرائح فلفل رومي ملون ( أصفر واحمر وأخضر وبرتقالي وجزر مقطع بالطول وبصل اخضر شرائح ولو حبيتوا بسله أو عرانيص الذرة ) ويتشوحوا في ملعقه زيت مع قليل من الصويا الحلوة والمالحه ثم يسكبوا فوق اللحمه

لو كنا أخر الشهر والقشيه معدن يا سلام لو شويه كاجو يتحمرو ويخلطوا مع اللحمه طبعا في الاخر خالص...

ونسكب اللحمه في طبق التقديم وبالهنا والشفا...

ممكن عن تناول اللحمه نضع لمن يريد ( تشيلي صوص ) بتكون حارة محلاة ..لكن مش حارة جدا خفيفه يعني

الخطوات السابقه بنعملها مع مكعبات دجاج ولكن فقط نضيف قليل من الكمون والكسبرة الناشفه فقط

يارب تعجبكم

تم تعديل 16 فبراير 2008 بواسطة nash