شغلانة امين مخزن فى مطعم بجدة

[الحمد لله]

السلام عليكم ورحمة الله وبركاتة

انا لسة واصل جدة من 5أيام وجى على شغل فى مطعم امين مستودع بس المطعم اللى انا جى علية لسة فى الافتتاح التجريبى

ولسة الدنيا مش واضحة حتى للناس المسئولة عن المكان ولا لسة فى مخزن ولا اى حاجة فهما دلوقتى طالبين منى انى اظبط المطعم واجردة

فطلبت منهم ورق بالاصناف الموجوجة بالمطعم فقالولى مش عندنا

فأنا بصراحة تعبان نفسيا جدا جدا وفكرت النزول لمصر وانى اعتذر لهم مع العلم ان مرتبى محترم بالنسبة للى كنت باخدة فى مصر

وكمان مديرى راجل امريكى وانا فى الانجليش مش قد كدة ومش معايا غير 2 مصريين فقط والباقى جنسيات اجنبية

فانا كلمت الراجل المسئول عن المطعم فنصحنى انى اصبر وانى شغلانة امين المستودع أحسن من المشتريات

لانى قلتلة انى حابب اشتغل فى المشتريات مكان زميلى اللى انا وهوا جيين مع بعض من مصر

فأنا بصراحة مش عارف اعمل اية

حالتى النفسية تعبانة جدا جدا وكل شوية ببكى على حالى خاصة ان شكل الغرفة (اللى هما مسمينة مخزن) حاجة استغفر اللة

وكمان المطعم شغال شفت واحد من الساعة3 حتى الساعة12 فأنا باجى الساعة2.30 وبمشى الساعة1.00صباحا

ومش عايز اتكلم فى موضوع الساعات او شفتى هيبقى امتى او حتى يوم اجازتى هيبقى امتى لان لسة فى الاول

ومش عايز حد يأخد عنى انطباع انى متسرع

باللة عليكم انصحونى فالله لانى والله تعبان لاقصى حد

وشكرا

[egyptawy]

بالنسبة للشغل انا ما اقدرش افيدك فيه

اما بالنسبة لسفرك

معلش كل حاجة فى الاول بتبقى صعبة

واضح انى احساس الغرية مقصر عليك

اوعدك انى بكرة هيبقى احلى ان شاء الله لانى انت بتتاقلم بمرور الوقت

وممكن بعد سنة تيجة تقرا الموضوع ده وتضحك كمان

[AbuZeyad]

خليك جامد

دا انت لسه في الاول

البداية دايما بتكون صعبة وخصوصا لو انت اول مرة بتسافر

قرار العودة قرار خطير مينفعش تاخده بعد 5 ايام شغل بس اصبر على الاقل 3 شهور علشان تعرف تقرر صح

واذا كان لسه المطعم في الافتتاح التجريبي دا معناه في الغالب انه لسه مفيش نظام للمكان بمرور الوقت ان شاء الله الامور هاتتظبط وبالنسبة لمديريك الامريكي اهي فرصة تحسن لغتك شوية

انت من حقك تسال اجازتك امتى دا مش تسرع ولا حاجة انت بشر ومن حقك ترتاح وتقضي مصالحك يوم اجازتك

اقولك على فكرة؟؟ يوم الاجازة خد بعضك واطلع على مكة روح الحرم وان شاء الله ترجع مبسوط

مرة كمان خليك جامد

[Hossam Siyam]

نصحيتي مستعجلش القرار وخد وقتك جدة مدينة جميلة وقريبة قوي من مصر وبعدين بينك وبين الحرم ساعة وبعدين الغربة في بدايتها صعبة لاي حد نصيحتي متستسلمش للمشاعر السلبية وحاول تعمل علاقات وتخرج شوية ولو علوز تفتكر مصر انزل اتمشى في البلد

[الحمد لله]

جزاكم اللة كل خير

بجد واللة كلامكم هون عليا كتير وادينى صابر

وان شاء اللة هصبر وربنا يوفقنى ان شاء الله ويوفق كل اللى زيى

هوا انا بس كل خوفى انى افشل فى الشغلانة دى وانا عمرى ما فشلت فغى حياتى

لانى اول مرة اشتغل الشغلانة دية

باللة عليكم ادعولى واسال كل من يقرأ هذا الموضوع بالدعاء لى

وشكرا تانى لكل واحد رد عليا