طواف في البلاد

[عابر سبيل]

طواف في البلاد

وطواف في البلاد يا حب .. لكنا ما شايفينك

برغم انك كده هفهاف

ساعات أبيض ساعات شفاف

ساعات أخضر كما الصفصاف

ورغم انك علينا تخاف

لشيء تاني القلوب مالت

عيون زاغت للون باهت

ومساحيق ايه .. ما حايقاشي

وريشتنا .. ما رسماشي

غير الشخابيط

وناجي نزيل .. نهد الحيط

وهدينا كتير قَبْله

بكتنا في الصلاة القِبْلة

بنهدي ألف ميت قُبْلة

علي إيدين اللي قاتلنا

وفوق الراس

ولساك في البلاد طواف

يا حب انسي ..

مادام الخيل بتجهلنا ..

ما عاد بين الرجال عنتر ..

ولا بين النسا عبله

وقيس مجنون بدنانيره

وليلي ف ملهى بتديره

ودايرة شعرها حانة

ودايرة لدايرة واخدانا

بتقسمنا ..... نقط ....

لا حرف .. لا حرفة

ترصصنا ساعات طوابير ..

ونجني اليأس

ساعات قواشيط

وتحبسنا في خانة اليك

ويوم ننفك تحدفنا ..

في قهوة سادة تدمعنا

ولساك في البلاد طواف يا حب انسي ..

مدام فيك إحنا مش سائلين

و لاهيانا حياة فيها وخلاص عايشين

دة عرق الوسط خمرتنا و راسمالنا

ومل النجم كترتنا.. بلا معني

وكان يا حب لينا دروع

وكان يا حب لينا شموع ..

مدن ونجوع

نجوع ما نجوع ..

في عز الشدة ما هــِّناه .. ولا هانـــَّـا

ياريت تاني يكون طوعنا

نضم حقولة لحقولنا

ونبدر فيها منك حَب .. وحَب شهامة ومروﱠة

ويجمعنا الحصيد إخوة . .

هنلاقي الدنيا مبتسمة .. بفجر جديد ..

ونلقاك في البلاد طواف ... و بتهني الجميع بالعيد .

أحمد سلطان ...

[هشام الجنيدى]

رائع جدا يا اخ عابر سبيل واتمنى من جميع الاعضاء رجوع ثقاتهم فيك .........

:blush:

[عابر سبيل]

مش مهم يا صاحبي

الثقة في النفس وبس ومش محتاجة حد يقول انه واثق فيك

أحمد سلطان

عابر سبيل