محاورات المصريين على صفحات جريدة الدستور

[محمد شلبى]

فى العدد الصادر امس من جريدة الدستور فى الصفحة السادسة وتحت عنوان السخرية من اديب فى منتديات الشباب ,تناولت الصحفية دعاء سلطان الموضوعات التى خصصت فى محاورات المصريين للتعليق على حديث مبارك (كلمة للتاريخ) وتناولت اظرف التعليقات مثل تعليق فيولين كنج وسيستر.

وتحت عنوان بنت بتسال ايه اللى بيحصل فى مصر تناولت نفس الصحفية فى الصفحة الثالثة موضوع حادث الازهر وتعليقات بعض الاعضاء مثل عبدوس الوزير وقطز.كما تناولت التعليقات فى منتديات هايد بارك و شئون مصرية وذكرت تعليقات ايمى وكليو ولانس.

من الوقتى كل واحد مسئول عن كلامه يا رجاله وانتوا شايفين اللى بيكتب بيتنشر على صفحات الجرايد :blush: .

[Cleo]

كما تناولت التعليقات فى منتديات هايد بارك و شئون مصرية وذكرت تعليقات ايمى وكليو ولانس.

انت بتكتب إييييييييييييييييييييييييييييه.....!!!!! :blush: أنا اسمى مكتوب؟؟؟؟؟؟؟

[محمد شلبى]

آه والله اسمك مكتوب يا كليو :P

الحقى لمى هدومك وحضرى شنطتك واستخبى عند اى حد عشن زمانهم فى الطريق اليكى :blush: .

[Sherief AbdelWahab]

وأهي فرصة إن الصحافة والشعب كله يعرف أن "نحن هنا".. وأننا لسنا على الهامش ، وأن لنا آراء وأفكار من حق الكل أن يسمعها..

خلص الكلام

[se_ Elsyed]

بما إن إسمي مش مكتوب يعني معنى كده إن الحكومه مش واخده بالها مني .. فبهذا أُعلن عن إستعدادي للإدلاء بمعلومات تفصيلية عن الكادر المعارض / كليو بطليموس الثالث عشر .. لإن تحت يدي معلومات دقيقة عنها حتى أعرف هما طابخين إيه النهاردة ... وبالنسبة لسعر مكافأة الإرشاد فهذا قابل للتفاوض ..

س س الداسوس .. ساكن في الدور الثالث .

[عادل أبوزيد]

و فى جريدة المصرى اليوم عدد يوم الإثنين فى الصفحة 11 منشور ثلاث موضوعات واحد بعنوان " كلام جاد عن شم النسيم " و " كيف تلون البيض فى شم النسيم" و "ظاهرة تلوين البيض تغزو العالم " و كلها مأخوذة من محاورات المصريين و كلام سى السيد و هو ينتوى أخذ رنجة و فسيخ و بصل أخضر ... ويروح جنينة و يعمل زبالة و قلق حواليه علشان يحس بشم النسيم و كلام مصرية وأبو الفصاد و أمير و فارو.

لم يعد هناك أسرار ....

[MZohairy]

والله احنا بنشكر الظروف اللي اتاحت لنا فرصة الظهور في الصحف وبالمناسبه نحب نشكر كل من حكمنا طوال الخمسة الاف سنه الماضية ابتداء من جلالة الملك مينا موحد القطرين وحتى سيادة الرئيس مبارك واحب اهديله اغنية الفنانة المعتزلة شاديه - دحنا من غيرك ولا حاجه وناقصنا كام مليون حاجه من يوم مافارقتنا ودموع على خدنا واوعى تعملها تاني وتسيبنا لوحدنا :P :blush: :P

[achnaton]

كده .. يا ابو عمر .. انت ما بتصدق .. تجرى ورا البزنس .. دى حته كيلو طيبة وبنت حلال .. آى مكافآه لى فيها النص .. !! ماشى ولا ابلغ انا عنك ؟؟

[se_ Elsyed]

حتى شم النسيم ... لأ بقى ده أحنا مشمومين .. قصدي متراقبين .... صحيح يا ودلا الحيتان لها ودان ..

عمي أخناتون .. إيه رأيك في deal هايكلنا بلوظة وبغاشه وهو " إحنا نعمل جمعية بين أعضاء المحاورات وكل واحد يبلغ عن التاني شهر وبعدين نقسم المكافأة بيننا ونخصص معاش للمتبلغ عنه ده لو ما رجعش من عندهم ؟ "

فكر حبه شويه وبعدين رد عليه مع العلم إن أنا مستثنى من ذلك أو بمعنى أصح خلوني أخر واحد على أساس إن لازم حد يبقى بره يُراعي أسر السادة المتبلغ عنهم .. ولازم برضوا واحد يقوم الصبح بدري يفتح المحاورات ويرش ميه قدام الموقع .

[Cleo]

كل حلفائك خانوكى يا كليو.. :P

سمعنى يابنى أغنية "بودعك" :blush:

[وليد صفوت]

فى العدد الصادر امس من جريدة الدستور فى الصفحة السادسة وتحت عنوان السخرية من اديب فى منتديات الشباب ,تناولت الصحفية دعاء سلطان الموضوعات التى خصصت فى محاورات المصريين للتعليق على حديث مبارك (كلمة للتاريخ) وتناولت اظرف التعليقات مثل تعليق فيولين كنج وسيستر.

<{POST_SNAPBACK}>

أيـه ده ؟؟؟

أنا أسمى مكتوب ؟؟؟

طب سؤال ........

هما كتبوا أسامى أصحاب التعليقات و لا كتبوا التعليقات بس ؟ عشان أحضر هدومى من دلوقتى :blush:

[محمد شلبى]

لا يا حبيبى اسمك مكتوب :P

عينى عليك يا فيولين. كنت طيب يا ابنى وابن حلال والله ما تستاهل اللى هيجرالك :blush: .

[وليد صفوت]

لا يا حبيبى اسمك مكتوب :D

عينى عليك يا فيولين. كنت طيب يا ابنى وابن حلال والله ما تستاهل اللى هيجرالك :) .

<{POST_SNAPBACK}>

و الله ما ليا دعوة بالحاجات دى !

عصام شوقى هو اللى كان ماسكلى مسدس و حاطه على ودانى عشان أكتب الكلمتين دول

و س س هو اللى كان محرض عصام و سكوربيون و إبن مصر عشان يعملوا عصابة حساس اللى بتخطط للإغتيال السيد اللواء الرئيس .......... و الله العظيم !

عقلى الباطن : لازم اطلع من المصيبة دى و أضحى بكل صحابى فى المنتدى عشان أعيش , هما أكيد حيقدروا انى طالب لسة و عايز أنجح .... أكيد حيقدروا

[Tamsite]

هي دي فايدة ان الواحد يبقى لابد في الدرة

يقرا اللي بيتقال و يدوبك يكتب له كام مداخلة في الشهر عشان العضوية متروحش عليه حسب تعليمات الادارة

عيني عليك يا فيولين ياخويا ، و انا اللي كان نفسي أتعرف عليك من زمان ، أشوفك كمان عشر قرون ان شاء الله و نبقى نتفق على مكان قبليها ب 5 دقايق عشان برضه الحيطان ليها ودان

و نصيحة ليك يا صديقي ، ابقى لم هدومك انشالله في جرنال ورا باب البيت عشان لو حصلت كبسة

دول كتبوا اسمك و علقوا على مداخلتين ليك

1- بتاعة ازاي ننتخب غيره دحنا نبقى و نبقى

2- و التانية بتاعة طبق النفاق و بالهنا و الشفا

نيجي للجد بقى .......

انا لما قريت الدستور النهاردة ، حسيت ان ممكن فعلا الخلية الصغيرة ( محاورات المصريين ) يكون لها أثر ما ولو صغير في نقل و ابراز ردود الأفعال و افكار المواطن المصري بعيدا عن الصحف الرسمية بما فيها من نفاق ، و صحف المعارضة بما فيها من تهويل و مبالغات، بحيث يمكن جس نبض الرأي العام المصري من خلال فتح صفحة منتدانا العزيز و مشاهدة ما يقوله نخبة من مثقفي مصر الشرفاء ( و أقولها دون مجاملة لأحد )

و حسيت كمان انه أصبح فيه دور مهم للمحاورات بدأ يظهر في الأفق ، غير الفضفضة و الدردشة و مناقشة القضايا المهمة و الموضوعات الخفيفة بين الأعضاء ،

و لذا علينا ان نتحرى كل حرف نكتبه على صفحات منتدانا العزيز، بعد أن أصبحت المحاورات تحت المنظار بكل ما فيها

تحياتي و تقديري ........

[عصام]

و لذا علينا ان نتحرى كل حرف نكتبه على صفحات منتدانا العزيز، بعد أن أصبحت المحاورات تحت المنظار بكل ما فيها

<{POST_SNAPBACK}>

هو دا الكلام .. يا سلام على الناس اللى فاهمة .. (أيكون وردة لحد الأستاذ عادل ما يظظبط الحال)

شوف بقى يا فيولين يابنى .. حيث ان انت بتخبط فى الحلل من غير ما تدرى .. أحب أقولك ان س س هو اللى مسرب الكلام دا .. والصحفية اللى كاتبة الكلام دا تبقى بنت عمته .. :) .. وانا السواق بتاعهم :D .. وابن مصر ظابط فى أمن الدولة .. :wub:

إطلع لى بقى من خلال الشنطة .. ورينى نفسك ..

هاتولى المسدس م التلاجة :wub:

[وليد صفوت]

يا جماعة ,.......

ممكن حد يعمل للمقال اللى فى الجريدة scan و ينزله على الموقع هنا ,...... عايزين نشوف اللى كاتبينه :wub:

أنا امبارح فضلت هايم على وجهى فى الشوارع ادور ادور ادور ادوووووووور على الدستور ...... مافيش فايدة !

فياريت يا عصام بدل ما انت قاعد على مكتبتك لا شغل و لا مشغلة ( فالح بس تاكل شندوشتات فول و طعمية و تربى كرش :) ) يا ريت تعملنا scan على المقال و تنزله على الموقع ,.....

ميرسى بوكو :D ,....

تم تعديل 6 مايو 2005 بواسطة Violinking

[kotoz9]

تصدقوا يا جماعة انا كمان طلع اسمى مكتوب :) انا مش عارف ازاى يكتبوا اسمى من غير ما يقولولى بس المهم كشفنا شبكة الجاسوسية اللى موجودة فى المنتدى...... قفشناكم ولا حد يتحرك حد يجيب حبل يا جماعة ......احنا ناخدهم رهائن ونفاوض الحكومة.....وعايزين كدة نعمل لنا شريط فيديو عراقى افغانستانى واحنا حاطين السيخ المحمى على رقابيهم.ايه رايكم مش فكرة برضه؟؟؟؟

بس انا معجب بجريدة الدستور لانها جابت الراى الحقيقى للشعب المصرى من خلال المنتديات

[عادل أبوزيد]

و فى صحيفة المصرى اليوم

اليوم الإثنين التاسع من مايو 2005 فى جريدة المصرى اليوم فى الصفحة الحادية عشر تغطية مأخوذه من محاورات المصريين و عنوان الموضوع " خناقة حارة حول جبهة إنقاذ مصر و التمويل الخارجى"

[Sherief AbdelWahab]

واليوم نشرت المصري اليوم مداخلات في موضوع 25 مايو ماذا نحن فاعلون ، واسم س س وإخناتون وسلوى وتام سايت وباقي الأعزاء منور على صفحاتها..

خلص الكلام